1. Anong marahay na halimbawa an ipinahiling ni Jesus sa mga parasunod niya, asin ano an ginibo ninda? (Hilingon an ritrato sa cover.)

NAGDANAY na positibo si Jesus sa bilog niyang ministeryo digdi sa daga, asin gusto niya na magdanay man na positibo sa ministeryo an saiyang mga parasunod. (Juan 4:35, 36) Kan kaibanan si Jesus kan mga disipulo niya, ganado sinda sa gibuhon na paghuhulit. (Luc. 10:1, 5-11, 17) Pero kan arestaron saka magadan si Jesus, temporaryong nawara an gana nindang maghulit. (Juan 16:32) Pagkabuhay liwat ni Jesus, dinagka niya sinda na magpokus sa paghuhulit. Asin pagkasakat ni Jesus sa langit, maigot sindang marhay na naghulit mala ngani ta nagreklamo an mga kaiwal ninda: “Uni! pinano nindo an Jerusalem kan saindong mga ipinagtutukdo.”—Gibo 5:28.

2. Paano binendisyunan ni Jehova an gibuhon na paghuhulit?

² Giniyahan ni Jesus an gibuhon kan inot na mga Kristiyanong idto, asin dahil sa bendisyon ni Jehova, dakul an nag-ako kan mensahe ninda. Halimbawa, kan Pentecostes 33 C.E., mga 3,000 an nabawtismuhan. (Gibo 2:41) Asin padagos na naglangkaw na marhay an bilang kan mga disipulo. (Gibo 6:7) Pero ihinula ni Jesus na mas dakul pa diyan an maako kan maugmang bareta sa huring mga aldaw.—Juan 14:12; Gibo 1:8.

3-4. Taano ta dipisil na maghulit sa nagkapirang lugar, asin ano an pag-uulayan ta sa artikulong ini?

³ Gabos kita naghihinguwa na magin positibo sa ministeryo. Sa nagkapirang kadagaan, madali sana iyan. Taano? Dahil dakulon an interesado na magpatukdo sa Bibliya mala ngani ta an iba sainda kaipuhan pang maghalat bago may magtukdo saindang Saksi! Pero sa ibang kadagaan, nadidipisilan na maghulit an mga parahayag; bihira sana kayang nasa harong an mga tawo, saka su  mga naaabutan ninda sa harong dai man gayong interesado sa Bibliya.

⁴ Kun nakaistar ka sa lugar na dipisil maghulit, makakatabang na marhay saimo an mga suhestiyon sa artikulong ini. Pag-uulayan ta kun ano an ginibo kan nagkapira para mas dakul na tawo an makaulay ninda sa ministeryo. Asin pag-uulayan ta kun taano ta makakapagdanay kitang positibo, nagdadangog man sa mensahe ta an mga tawo o dai.

5. Anong mga kadipisilan an napapaatubang sa dakul na Saksi?

⁵ Lalong nagigin dipisil para sa dakul na Saksi na maabutan asin makaulay an mga tawo sa harong ninda. May mga parahayag na nakaistar sa mga lugar na dakul nin apartment o komunidad na mahigpit an seguridad. Tapos tibaad may mga bantay o security guard na dai pinapalaog an siisay man na mayong imbitasyon hali sa sarong kagharong. An ibang parahayag libreng nakakalaog pero dikit na tawo lang an naaabutan nindang nasa harong. Asin an iba man na parahayag naghuhulit sa mga puwerang lugar na dikit sana an nakaistar. Tibaad kaipuhan nindang magbiyahe nin halawigon tangani sanang makaulay an sarong kagharong—na tibaad mayo man ngani sa harong! Kun napapaatubang ka sa arog kaiyan na mga kadipisilan, dai pumundo. Ano an puwede tang gibuhon para mapangganahan an mga kadipisilan na iyan asin makakaulay nin mas dakul na tawo?

6. Paano nakakaagid sa mga parasira an mga parahulit?

⁶ Ikinumparar ni Jesus an paghuhulit sa ginigibo nin parasira. (Mar. 1:17) May mga parasira na tibaad pirang aldaw na, mayo pang nadadakop na sira. Pero dai sinda nagpupundo; binabago ninda an oras, lokasyon, o an paagi ninda nin paninira. Puwede man kitang gumibo nin kaagid na mga pagbabago sa satong ministeryo. Pag-isipan an mga suhestiyon na ini.

7. Ano an puwedeng magin resulta kun mahulit kita sa ibang oras?

⁷ Purbaran na dumanan an mga tawo sa ibang oras. Mas dakul kitang makakaulay kun mahulit kita sa mga oras na posibleng marhay na nasa harong an mga tawo. Tutal, gabos man minapuli sa harong! Para sa dakul na tugang, praktikal na maghulit sa hapon o sa banggi dahil mas dakul sindang nanunumpungan. Saka posibleng mas relaks saka andam na makipag-ulay an mga kagharong sa mga oras na iyan. O tibaad makatabang saimo kun iaaplikar mo an suhestiyon kan elder na si David. Sinabi niya na pagkatapos maghulit nin mga saro o duwang oras sa sarong teritoryo, binabalikan ninda kan kapartner niya an mga harong na dai ninda nakaulay an kagsadiri sa inot na pagduman ninda. Sinabi niya, “Makangalas ta dakul an naaabutan ming nasa harong sa ikaduwang beses ming pagduman.” *

8. Paano ta iaaplikar sa satong ministeryo an Parahulit 11:6?

⁸ Dai kita dapat pumundo. Ipinapagirumdom sato kan temang teksto kun ano an kaipuhan na magin kaisipan ta. (Basahon an Parahulit 11:6, NWT.) Si David, na sinambit kasubago, dai nagpundo. Naabutan niya man giraray an kagharong pagkatapos nin nagkapirang beses na pagbalik-balik. Interesado an lalaki na pag-ulayan an Bibliya asin sinabi kaini, “Mga walong taon na akong nakaistar digdi pero mayo pa lamang Saksi na nagdigdi sa harong.” Sinabi ni David, “Naaraman ko na pag naabutan mo na sa harong ninda an mga tawo, sa parati nagdadangog sinda sa mensaheng ihinuhulit ta.”

9. Paano nakakaulay kan nagkapirang Saksi an mga tawong dipisil maabutan sa harong?

 ⁹ Purbaran sa ibang lokasyon. Para makaulay an mga tawo na dipisil maabutan sa harong, may mga parahayag na naghulit sa ibang lokasyon. Halimbawa, napatunayan na epektibong pamamaagi an pagpapatotoo sa tinampo saka an paggamit nin literature cart para makaulay an mga tawong nakaistar sa darakulang apartment na bawal an pagharong-harong. Paagi kaiyan, nakakaulay nin personal kan mga Saksi an mga tawong nakaistar sa mga lugar na iyan. Nahiling man kan dakul na parahayag na mas gusto kan mga tawo na makipag-ulay o mag-ako nin literatura pag nasa mga pampublikong parke, saudan, saka sa mga lugar nin negosyo. Si Floiran, na sarong paraataman nin sirkito sa Bolivia, nagsabi: “Nagduduman kami sa mga saudan saka sa mga lugar nin negosyo nin mga 1:00 nin hapon sagkod sa 3:00 nin hapon na diyan bako gayong sibot an mga paratinda. Sa parati, nagkakaigwa kami nin marahay na mga pag-uulay saka nakakapuon pa ngani nin mga pag-adal sa Bibliya.”

10. Anong mga pamamaagi an puwede mong gibuhon para mahulitan an mga tawo?

¹⁰ Purbaran an ibang pamamaagi. Sabihon ta ngayang pauruutro mo nang pinupurbaran na makaulay an sarong tawo. Dinumanan mo na siya sa ibang oras pero dai mo pa man giraray siya maabutan sa harong. May ibang mga paagi pa daw para mahulitan siya? Sinabi ni Katarína, “Naggigibo ako nin surat para sa mga dai ko talaga maabutan sa harong ninda. Isinusurat ko diyan an mga sasabihon ko kuta sa sainda nin personal.” An punto? Purbaran na hulitan an gabos na tawo sa saindong teritoryo sa ano man na paaging posible mantang isinasagibo mo an saimong ministeryo.

11. Taano ta may mga tawong dai interesado sa mensahe ta?

¹¹ May mga tawo na dai interesado sa mensahe ta. Para sainda, dai ninda kaipuhan an Diyos o an Bibliya. Dai sinda naniniwala sa Diyos dahil sa kadakul na kasakitan na nahihiling ninda sa kinaban. Habo ninda sa Bibliya dahil sa pagsagin-sagin kan mga lider nin relihiyon na naghihingakong namumuhay kauyon kaiyan. An iba sibot-sibot sa trabaho, pamilya, o sa personal na mga problema ninda, asin para sainda dai makakatabang an Bibliya. Paano ta mapagdadanay an satong kaugmahan pag dai pinapahalagahan kan mga hinuhulitan ta an satong mensahe.

12. Paano makakatabang sato sa ministeryo kun iaaplikar ta an Filipos 2:4?

¹² Magpahiling nin personal na interes. Dakul na dai interesado kaidto an nag-ako kan maugmang bareta pag-abot nin panahon kan mamatian ninda na talagang interesado sainda an parahayag. (Basahon an Filipos 2:4.) Halimbawa, si David, na sinambit kasubago, nagsabi, “Pag sinabi nin saro na dai siya interesado, ipinapagilid mi nguna an Bibliya o literatura, tapos sinasabi mi: ‘Puwede pong maaraman kun ta’no?’” Namamatian kan mga tawo kun nagmamalasakit ka sainda. Puwedeng malingawan ninda an sinabi mo sainda, pero posibleng marhay na matatandaan ninda kun ano an ipinamati mo sainda. Dawa kun dai ka pinapataram kan kagharong, maipapahiling mo paagi sa saimong hiro-hiro saka ekspresyon nin lalawgon na nagmamalasakit ka sainda.

13. Ano an puwede tang gibuhon para ibagay an satong mensahe sa mga pangangaipo kan lambang kagharong?

¹³ Nagpapahiling kita nin personal na interes pag ibinabagay ta an satong mensahe sa mga pangangaipo saka pinagkakainteresan kan kagharong. Halimbawa, may mga senyales daw na may mga aki siya? Tibaad interesado an mga magurang manungod sa sadol kan Bibliya sa pagpadakula nin aki o sa praktikal na mga suhestiyon kun paano magkakaigwa nin mas maugmang buhay pampamilya. May nagkapirang kandado daw sa pinto ninda? Tibaad mas marahay na ipakipag-ulay sainda an manungod sa krimen asin sa takot na resulta kaiyan, tapos tibaad maapresyar kan kagharong kun ipapakipag-ulay mo saiya an manungod sa permanenteng solusyon sa krimen. Ano man an sitwasyon, hinguwahon na ipasabot sa mga nagdadangog kun paano sinda matatabangan kan sadol kan Bibliya. Si Katarína, na sinambit kasubago, nagsabi, “Iniisip-isip ko kun paano nakatabang sako an katotoohan na magkaigwa nin mas maugmang buhay.” Bilang resulta, nakakapagtaram si Katarína nin may kumbiksiyon, asin siguradong namamatian iyan kan mga nakakaulay niya.

14. Base sa Talinhaga 27:17, paano matatabangan kan magkapartner an lambang saro?

 ¹⁴ Maghagad nin tabang sa iba. Kan inot na siglo, itinukdo ni Pablo ki Timoteo an mga pamamaagi niya sa paghulit saka pagtukdo, asin dinagka niya si Timoteo na gamiton an mga pamamaaging iyan para tabangan an iba. (1 Cor. 4:17) Arog ni Timoteo, makakanuod kita sa eksperyensiyadong mga tugang sa kongregasyon. (Basahon an Talinhaga 27:17, NWT.) Pag-isipan an halimbawa kan brother na si Shawn. May panahon kaidto na nagpayunir siya sa sarong puwerang lugar na an kadaklan na tawo kontento na sa relihiyon ninda. Paano siya nagdanay na maugma? “Basta posible, pirmi akong may kapartner,” an sabi niya. “Ginagamit mi an panahon na nasa biyahe kami pasiring sa sunod na harong para pauswagon an mga kakayahan mi sa pagtukdo. Halimbawa, pinag-uulayan mi su nakaagi ming pagdalaw sa sarong kagharong. Tapos pinag-uulayan mi kun ano an mas marahay na sabihon pag mapaatubang kami sa arog giraray kaidtong sitwasyon.”

15. Taano ta mahalagang marhay an pamibi sa satong ministeryo?

¹⁵ Mamibi ki Jehova para sa tabang. Maghagad nin paggiya ki Jehova sa kada makikikabtang ka sa ministeryo. Kun mayo an tabang kan saiyang makapangyarihan na banal na espiritu, mayo nanggad nin mahahaman an siisay man sato. (Sal. 127:1; Luc. 11:13) Pag naghahagad ka nin tabang ki Jehova sa pamibi, magin espesipiko. Halimbawa, hagadon saiya na giyahan ka sa siisay man na igwa nin pusong nasa tamang kamugtakan asin andam na magdangog. Dangan humiro kauyon kan ipinamibi mo paagi sa paghulit sa gabos na nakakaulay mo.

16. Taano ta mahalagang marhay sa satong ministeryo an personal na pag-adal?

¹⁶ Magtao nin panahon para sa personal na pag-adal. Sinasabi kan Tataramon nin Diyos: “[Patunayan] nindo sa saindong sadiri an kabutan nin Diyos na marahay asin akseptable saka perpekto.” (Roma 12:2) Mantang mas kumbinsido kita na aram ta an katotoohan manungod sa Diyos, mas magkukusog man an kumbiksiyon ta pag nakikipag-ulay kita sa ministeryo. Si Katarína, na sinambit kasubago, nagsabi: “Dai pa sana nahahaloy, narealisar ko na kaipuhan kong pakusugon an pagtubod ko manungod sa pirang panginot na katukduan sa Bibliya. Kaya detalyado kong pinag-adalan an ebidensiya na may Kaglalang, na an Bibliya talaga an Tataramon nin Diyos, asin na may organisasyon an Diyos na nagrerepresentar saiya ngunyan.” Sa ibang pagtaram, dahil sa personal na pag-adal ni Katarína, nagkusog an pagtubod niya saka lalo siyang nagin maugma sa ministeryo.

17. Taano ta nagdanay na positibo si Jesus sa saiyang ministeryo?

¹⁷ Nagdanay na positibo si Jesus saka padagos siyang naghulit dawa ngani may mga dai interesado sa mensahe niya. Taano? Aram niya kun gurano kakaipuhan kan mga tawo an katotoohan, asin gusto niya na matawan an pinakadakul na tawong posible nin oportunidad na akuon an mensahe kan Kahadian. Aram niya man na may mga dai interesado na madangog pag-abot nin panahon. Pag-isipan an nangyari sa saiya mismong pamilya. Sa bilog na tulo may kabangang taon na ministeryo ni Jesus, mayong nagin disipulo sa mga tugang niyang lalaki. (Juan 7:5) Pero pagkabuhay liwat saiya, nagin Kristiyano na sinda.—Gibo 1:14.

18. Taano ta padagos kitang naghuhulit?

¹⁸ Dai ta aram kun sairisay an maako pag-abot nin panahon kan mga katotoohan sa Bibliya na itinutukdo ta. Kumpara sa iba, may mga tawong mas haloy bago akuon an mensahe ta.  Dawa an mga dai nagdadangog sa mensahe ta nahihiling an marahay na paggawi saka ugali ta, asin tibaad “pamurawayon [na man] ninda an Diyos” pag-abot nin panahon.—1 Ped. 2:12.

19. Uyon sa 1 Corinto 3:6, 7, ano an dapat niyatong isaisip?

¹⁹ Mantang nagtatanom kita saka nagbabaribi, dapat niyatong isaisip an papel nin Diyos. (Basahon an 1 Corinto 3:6, 7.) Si Getahun, na sarong brother sa Ethiopia, nagsabi: “Sa laog nin labing 20 taon, ako sana an Saksi sa teritoryong bihirang mahulitan. Pero ngunyan, 14 na an parahayag digdi. An 13 diyan nagpabawtismo na, kaiba an agom ko saka 3 aki. May average na 32 katawo na nag-aatender sa mga pagtiripon mi.” Maugma si Getahun na padagos siyang naghulit mantang mapasensiya siyang naghalat na irani ni Jehova sa Saiyang organisasyon an mga tawong sadiyosan an puso!—Juan 6:44.

20. Sa anong paagi nakakaagid kita sa mga rescuer?

²⁰ Para ki Jehova, mahalagang marhay an buhay kan lambang tawo. Tinatawan niya kita kan pribilehiyo na magtrabaho kaiba kan saiyang Aki sa pagtipon nin mga tawo hali sa gabos na nasyon bago umabot an katapusan kan sistemang ini. (Hag. 2:7) An satong gibuhon na paghuhulit puwedeng iagid sa sarong rescue mission. Asin garo kita mga miyembro kan rescue team na ipinadara para iligtas an mga tawong na-trap sa minahan. Tibaad dikit na minero na lang an posibleng mailigtas, pero mahalagang marhay an trabahong ginigibo kan gabos na rescuer. Totoo man iyan sa ginigibo tang paghuhulit. Dai niyato aram kun gurano pa kadakul na tawo an maililigtas sa sistema ni Satanas. Pero puwedeng gamiton ni Jehova an siisay man sato para tabangan sinda. Si Andreas, na sarong brother na nakaistar sa Bolivia, nagsabi, “Para sako, pag may nakakanuod kan mga katotoohan sa Bibliya tapos nagpabawtismo, resulta iyan kan pagtinarabangan nin dakul.” Lugod na pagdanayon niyato an arog kaiyan na positibong kaisipan sa ministeryo. Kun gigibuhon ta iyan, bebendisyunan kita ni Jehova saka magigin tunay nanggad na nakakaugma an satong ministeryo.