1. Nyan ḇepyum risai Yesus byuk faro manfamyan ḇyesi, ma bon risai sismai na? (Mam sonin ḇero ḇarpon.)

ROFYOR Yesus ifarmyan ro supswan ine, iryaḇ pdef ma isusu ḇa. Imarisen insama manfamyan ḇyesi sakna raryaḇ ḇerarirya kako. (Yoh. 4:35, 36) Rofyor Yesus isya kaker kuker manfamyan ḇyesi, manfamyan ḇyesine siryaḇ kaku fa sbaryas. (Luk. 10:1, 5-11, 17) Ḇape, rofyor Yesus sfor ma smuni, manfamyan ḇyesine ro fafisu anya siryaḇ wer ḇa. (Yoh. 16:32) Rofyor ḇyeḇebawes kwar, danun ḇe si fa smam monda faro fararur ḇaḇebaryas ya. Rofyor dek ḇe nanggi kwar, sbaryas kuker raryaḇ. Snonggaku ḇesampum si kako sikofen radine, ”Mko ḇaryas farkarkor mkoḇena, ro Yerusalem ḇesiper.”​—Kis. 5:28.

2. Snar Yahwe ḇyebarakas fararur ḇaḇebaryas ya, bon risai sismai na?

² Yesus fyarkin ḇaḇebaryas snonggaku Kristen ro abad randak sifrur na, ma Yahwe ḇyebarakas roi sifrur na. Bon sismai yaiso snonggaku ḇebor simarisen srower abar sbaryas na. Imnis ra, ro Pentakosta 33 M, snonggaku ri 3000 sisya sebaptis. (Kis. 2:41) Ma, barbor ro ḇeso Yesus i nek pdef ḇesya kwar. (Kis. 6:7) Ḇape, Yesus ḇyardi kwar snar ras-ras ḇepupes, nari snonggaku sisya sibor syadi wer ḇemarisen ḇerower abar ḇepyum.​—Yoh. 14:12; Kis. 1:8.

3-4. Rosai ḇefnai fa ro sup riḇeso ḇaḇebaryas ya syamswen syadi, ma rosai na kawos ro farkarkor inena?

³ Kokam koḇesewar fa koryaḇ pdef ma kosusu ḇa ro fararmyan ya. Ro sup riḇeso, ine napyan fa sifrur na. Kukro? Snar ro sup anna, snonggaku sibor sisya simarisen sfarkor Refo. Manbaryas ono fandun kaku fa sfasepen snonggaku ḇemarisen sya sisnosna fa siwaf rawo sia sbuk farkarkor Refo ḇe si. Ḇape ro sup ḇesena, ḇaḇebaryas  syamswen syadi fa sifrur na. Snonggaku sisya ro rum ker ḇa, ma sisyano simarisen manggun ḇa.

⁴ Ro moḇ Bedi ḇaḇebaryas samswen fa sifrur na ido, anun ḇero farkarkor ine na nafnoḇek Au. Nari kawos rosai naek srar riḇeso sifrur insama sisrow snonggaku sibor syadi ro ḇaḇebaryas ya. Ma, na kawos rosai ḇefnai fa koryaḇ pdef ro ḇaḇebaryas fyor ono sisya simarisen ḇaido simarisen ḇa.

5. Samswen risai monda Saksi ḇebor sismai ro fararmyan ya?

⁵ Manbaryas ḇebor soḇe samswen kaku sisrow snonggaku sya rofyor sbaryas. Ro moḇ ḇeḇeso, apartemen ma kompleks perumahan nabor nasya smamwarek kaku na. Ro moḇ ḇeraryan na, siwan satpam fa smamwarek na insama snonggaku osoḇaḇeri ipok syun ḇa fyor ḇero diansya sbuk fa syun ḇa. Ḇape moḇ ḇese na ido, manbaryas bisa sbaryas ro rum ḇe rum. Fama, sisrow snonggaku osoḇaḇeri ro rum anna. Manbaryas sya kako sbaryas ro moḇ kawasa sya sibor ḇa. Sifrur maran ḇebinggwan kaku fa sra kaḇer ḇe snonggaku oso monda, ma fyorno ido snonggaku ani isya ro rum ḇa! Rofyor kosmai samswen ḇerarirya na, kopok kosusu awer. Rosai kofrur kaku fa kofrur mnis na insama kosrow snonggaku sibor syadi wer?

6. Rosai ḇefnai fa fararur ḇaḇebaryas imnis ra fararur ro mandaswan oso?

⁶ Yesus byuk imnis fararur ḇaḇebaryas kuker fararur ro mandaswan oso. (Mrk. 1:17) Fyorno, mandaswan ono sisya sraswan ras nakam fama sismai in noḇa. Ḇape sisusu ḇa. Sisewar fa sra ro oras ḇesrow, moḇ, ma nyan sḇuki sfor in sya. Imnis rarirya kako, fandun fa kofrur mnis fararmyan koḇena. Mgorama kawos anun ḇeḇeso ḇeuser nane.

7. Koḇesewar fa kobaryas ro oras ḇesrow ido, rosai kosmai na?

⁷ Ḇesewar fa baryas ro oras ḇesrow. Kobaryas fyor snonggaku sisya ro rum ido, na kosrow snonggaku sibor syadi. Inja, snonggaku kosrow ro rum ḇa sya nari kosrow si snar na sibur fasaw ḇe rum sena. Naek srar ḇebor sbaryas ro mandira na ḇaido roḇ na insama sisrow kuker snonggaku sibore. Ono wer ido, ro mandira ḇaido roḇ na ido ḇena rum sya sifrur fararur noḇa ma napyan fa kawos yoḇ si. Penatua oso ḇenir David, ikofenḇadir nyan eḇese imbude bisa kakfrur na. Rofyor i ma naek oso sura subaryas ro moḇ oso ma rum riḇeso snonggaku sroro rum ḇa, inja rosai sufrur na? Subaryas oras oser ḇaido suru ro moḇ anya insape surama wer ḇe rum anna. Ikofen ḇo doḇe, ”Yakandor kaku kukro snonggaku sisya sibor nggosrow si rofyor nggorama wer.” *

8. Rariso koso wos anun ro Pengkhotbah 11:6 ro fararmyan koḇena?

⁸ Kopok kosusu awer. Mnuk tema farkarkor ine nbuk swarapepen ḇe ko fa koryaḇ pdef. (Wasya Pengkhotbah 11:6.) David, ḇeyap ḇepon ani, isusu ḇa. Rofyor ryama kaḇer ker ḇe rum oser ani, ḇarpur mura isrow kuker ḇena rum ya. Snon ani imarisen fa suyawos Refo ya. Snon ani doḇe, ”Yaḇarek ro dine taun ri 8 kwar, imbape kali ine insape yawos kuker Saksi Yahwe ḇerama ro rum ayedine.”  David doḇe, ”Ro fawar ayena ido, ras kosrow kuker ḇena rum sya, na simarisen srower abar kobaryas na.”

9. Rosai manbaryas riḇeso sya sifrur kaku fa sisrow snonggaku sisrow ro rum ḇa sya?

⁹ Ḇesewar fa baryas ro moḇ ḇese. Insama sisrow snonggaku sisrow ro rum ḇa sya, manbaryas ḇebor sisewar fa sbaryas ro moḇ ḇesena. Imnis ra, sisewar fa sbaryas ro nyan ḇaido sbuk rak ḇeroda. Roi sismai iso, bisa sbaryas ḇe snonggaku ḇebarek ro moḇ na samswen fa sisrow si na, rupa ra apartemen. Oso wer ido, manbaryas ḇebor soḇe snonggaku simarisen kawos yoḇ si ḇaido simarisen siwasya syap koḇena fyor kosrow si ro taman, pasar, ḇaido moḇ sfarḇaḇyan rona. Floiran, pengawas wilayah oso ro Bolivia, doḇe, ”Nggobaryas ro pasar ma moḇ sfarḇaḇyan ro oras oser 1 ma 3 arkok ya, kukro ro oras ḇeradirya ḇebaḇoḇ sya sna ḇekaḇkoḇes manggun ḇa. Inja, nggona oras fa nggawos kawan kuker si ma nggorandak farkarkor Refo riḇeso.”

10. Rosai kofrur kaku wer insama kobaryas ḇe snonggaku ḇebor syadi?

¹⁰ Ḇesewar fa baryas kuker nyan ḇesena. Imbude ḇesewar fa rwama kaḇer ker ḇe snonggaku oso kwar. Ḇesewar kaku kwar rwama oras ḇese, ḇoi sro rum ker ḇa. Nyan ḇese nasya fa kobaryas faro si ke? Imbesrar oso ḇenir Katarína doḇe, ”Yafas surat ḇe snonggaku ḇesya ro rum ḇa. Ro surat ani, yafas rosai imbe yawos ḇeri ḇe si na.” Rosai kofarkor ya? Fandun kaku fa kobuk nyan sarirya fa kobaryas ḇe snonggaku syakam ro moḇ koḇena.

11. Rosai ḇefnai fa snonggaku sia simewer srower abar kobaryas na?

¹¹ Rofyor kobaryas, snonggaku sia simewer srower abar kobaryas na. Skara sfarkor fa sfawi Allah ḇaido Refo ine nefandun ḇa. Imbude sikyar manggun ḇa snar Allah isya kukro smam kandera nabor nasya ro dunya ine. Ḇaido simarisen kuf faro Refo ya ḇa kukro smam manfarkin agama ḇekofen siso anun ro Refo na ḇoi sifrur na ḇa. Sia smam ker fararur sena monda, kina sena, ḇaido samswen sena, ma skara Refo ḇyefainda ḇe si ḇa kako. Rariso koryaḇ pdef ma komarisen ro fararmyan koḇena rofyor snonggaku ḇese sesyowi abar kobaryas na ḇa rai?

12. Kosouser anun ro Filipi 2:4 ido, rosai fainda ḇyena faro ḇaḇebaryas koḇena?

¹² Fasnai wafandun si. Snonggaku ḇebor randak ya simewer srower abar kobaryas ya ḇarpur mura simarisen srower kukro smam kofandun si. (Wasya Filipi 2:4.) David, ḇeḇeyap ḇepon ani, doḇe, ”Rofyor snonggaku oso doḇe imarisen ḇa, na nggosun mundum Refo ḇaido syap nggoḇena ro tas yadori, ramnai nggofuken, ’Rosai ḇefnai fa wakofen radirya?’” Snonggaku sya na sḇaḇir snonggaku ḇesesya sfandun si. Snonggaku kobaryas yoḇ sya imbude siswarepen ḇa rosai kawos na, ḇoi nari siswarepen kofandun si. Rofyor snonggaku oso byuk swaf fa kobaryas ḇe i ḇa, ḇape kofasnai kofandun si ro rari koḇena ma ro komgasna.

13. Rosai kofrur kaku insama abar kobuk na nun marisen ḇe ḇena rum sya oser-oser?

¹³ Kofasnai kofandun snonggaku sya kuker komam awawos koḇena imnis fandandun ma marisen ro ḇena rum ya. Imnis ra, ro rum ani roi ono isya ḇefasnai kina ani nya romawa kasun ke? Kaku ido, ḇena rum ani imbude imarisen fa ryower anun ro Refo kuker nyan sfaduru romawa sesya ḇaido nyan insama sna aski ro kina yadori. Ḇaido, pagar ḇero rum korama ya sisyopder kuker rante ma gembok ke? Imbude bisa kawos roi ḇeḇarḇor ḇebor ro dunya ine ma roi snonggaku ḇebor seḇirḇar kuker na. Ḇena rum ya imbude imarisen rofyor kokofenḇadir snar roi anna kam nari napromes ro fafisu iyama. Rosai monda wawawos na, ḇesewar kaku fa wafnoḇek ḇena rum ya ifawi pyum kaku snar anun ro Refo na ḇyefainda faro si. Katarína, ḇeḇeyap ḇepon ani, doḇe, ”Yawasenuser  fainda yasmai kwar na snar yambranuser anun ro Refo.” Roi ani nafnoḇek Katarína fa byaryas kuker kakyar kaku, ma snonggaku smam kakyar fyasnai na.

14. Imnis Amsal 27:17 ikofen ya, rariso Au ma ḇeso Au mufnoḇekyae mu rai?

¹⁴ Farkor ro manbaryas ḇese. Ro abad randak, Paulus ikofenḇadir ḇe Timotius nyan byukibaryas ma byukifarkor. Paulus danun kako ḇe Timotius fa fyasnaiḇair nyan anna ḇe ḇesesya. (1 Kor. 4:17) Raris Timotius i, fandun fa kofarkor kako ro manbaryas ḇefyoro kwar ro sidang. (Wasya Amsal 27:17.) Mampan fawar ro naek Shawn i. Ḇyemerintis ro mnu oso, ma snonggaku ro diansya simarisen kwar kuker agama sena. Rosai ḇefnoḇek i fa iryaḇ pdef ro fararmyan ḇyena? Doḇe, ”Yaḇesewar fa yabaryas ro manggundaya ḇa. Rofyor aya ma ḇeso aya numbran ro rum oso ḇe rum ḇese, nufnoḇekyae insama nuḇekir syadi fa nubuk farkarkor na. Imnis ra, nuyawos moḇsa nukarem snonggaku nubaryas babo ansya roi sikofen na. Ramnai, nuyawos wer moḇsa nubuk kankarem ḇepyum syadi fyor nusmai roi ḇerarya na.”

15. Rosai ḇefnai fa fandun kaku ḇenadi resari rofyor wabaryas ḇaim?

¹⁵ Ḇenadi wor fafnoḇek ro Yahwe I. Rofyor wabaryas ḇaim, wor fafnoḇek ro Yahwe I. Snar fafnoḇek ro rur ḇesren Yahwe Ḇyedi ḇa ido, fararur marḇak koḇena na nun bon ḇa. (Mz. 127:1; Luk. 11:13) Rofyor ḇenadi, wakofen rosai monda wafandun na. Imnis ra, wor ḇe Yahwe I fa ifnoḇek Au fa wasrow snonggaku ḇenapes sya ma ḇemarisen ḇerower sya. Ramnai, ḇesewar kaku fa baryas faro snonggaku syakam wasrow sya.

16. Insa koḇekir syadi ro fararmyan na, rosai ḇefnai fandun kaku fa kofrur farkarkor manggun?

¹⁶ Buk swaf fa wafrur farkarkor manggun. Refo ikofen snar fandun fa ’kofawi Allah marisen ḇyena isoine rosai ḇeḇye ma ḇefrur sneprei Allah ma ḇemnis’. (Rm. 12:2) Rofyor kofarkor Refo pdef, nari kokyar kaku snar rosai kofarkor ḇekur Allah iso kakaku rirya. Inja fyor kobaryas, snonggaku smam snar kokyar kaku kuker rosai kokofen na. Katarína doḇe, ”Swaf ḇeḇeso aniwara, yaḇaḇir fandun kaku fa yasambraḇser kakyar yena faro knam riḇeso ro farkarkor Refo ya. Inja, yafarkor kuker pyum roi ḇefasnai kaku snar Manḇefrur kaku isya, snar Refo iso Allah Wos Ḇyena, ma Allah nya organisasi ḇefnoḇek I ro baboine.” Katarína doḇe snar farkarkor manggun ifrur na nafrur ikyar syadi ma iryaḇ syadi ro fararmyan ḇyena.

17. Rosai ḇefnai fa Yesus byaryas kuker raryaḇ pdef?

¹⁷ Yesus byaryas kuker raryaḇ pdef fyor snonggaku ono sisya simewer srower indi. Rosai ḇefnai i? Kukro ifawi kaku fandun fa snonggaku sya sfawi kaku kakaku ya, ma imarisen imbe ifnoḇek snonggaku ḇebor sya. Dakfawi kako snonggaku riḇeso randak ḇemarisen ḇa sya ḇarpur mura simarisen srower i. Imnis raris Yesus naek kasun ḇyesya. Ro fafisu Yesus fyarmyan taun peser rikyor, simewer sakḇe Yesus manfamyan ḇyedi. (Yoh. 7:5) Ḇape rofyor Yesus ḇyeḇebawes kwar, sakḇe snonggaku Kristen.​—Kis. 1:14.

18. Rosai ḇefnai fa kobaryas pdef?

¹⁸ Kofawi ḇa nari mansei ḇarpur ya ḇemarisen fa ḇefarkor kakaku ro Refo ya.  Snonggaku riḇeso sfandun swaf kawan fa simarisen sakfawi kakaku ya. Ma, rofyor snonggaku oso imewer ryower kondi, na myam rari ma kenem ḇepyum koḇena, ma imbude insape ’isandik Allah’.​—1 Ptr. 2:12.

19. Imnis ḇeḇeyap ro 1 Korintus 3:6, 7, rosai koswarepen kaku ya?

¹⁹ Kosmai fararur fa koker ma koruḇ mor kakaku ya. Ḇape, koswarepen kaku ḇefrur fa isur iso Allah. (Wasya 1 Korintus 3:6, 7.) Getahun, naek oso ḇefarmyan ro Etiopia, fyawar, ”Fafisu syadi ro taun 20 ḇaim, saksi oser ro moḇ ayedi. Imbape kirine manbaryas ri 14 sisya kwar ro dine. Samfur seser rikyor sebaptis kwar, swa ayedi ma romawa rikyor ayeskoya kako. Snonggaku ḇeyakso fananjur sya se 32.” Getahun imarisen kaku kukro syadi ro taun 20 ani, byaryas pdef kuker iwaf Yahwe dun snonggaku ḇenapes sya ḇe organisasi Ḇyedi.​—Yoh. 6:44

20. Rosai ḇefnai fa sbukimnis ko raris tim penyelamat?

²⁰ Ro Yahwe mamam Ḇyedi, kankenem snonggaku syakam semaeja kaku. Byuk syowi ḇeba fa kofararur kayam kuker romawa Ḇyedi fa koryur snonggaku ro er sarirya kam rofyor roi ḇeḇarḇor ro dunya ine impromes ḇaim. (Hag. 2:7) Rofyor kobaryas, sbukimnis ko raris tim penyelamat ḇesmai fararur fa ḇefnoḇek snonggaku ḇewarai ro tambang oso. Fama na sifnoḇek snonggaku riḇeso monda, ḇefararur ro tim penyelamat ansya kam nefandun fafayaḇa. Ine imnis raris fararur ḇaḇebaryas kofrur na. Kofawi napyum ḇa barbor ro snonggaku nari sifnoḇek sya sefis fyor dunya Setan ine ipromes. Ma, Yahwe na byuk manbaryas mansei monda fa ifnoḇek snonggaku ansya. Andreas, ḇeḇarek ro Bolivia, doḇe, ”Yafawi snar rofyor snonggaku isya fyarkor Refo ma ḇarpur ya ḇyebaptis, inema fararur kayam ro manbaryas ḇebor. Rarirya koryaḇ pdef ma kosusu ḇa ro ḇaḇebaryas koḇena. Kofrur rarirya ido, Yahwe nari ḇyebarakas ko, ma nari koryaḇ kaku fyor kofrur ḇaḇebaryas koḇena.