1. Siusihan aha do na ibere Jesus hubani susianni, janah sonaha sidea mandalankon ai? (Tonggor gambar sampul.)

SADOKAH i tanoh on Jesus, totap do ia marbarita janah pos do uhurni sai adong do na ra manangihonsi. Sihol do homa ia ase sonai homa pangahap ni susianni. (Joh. 4:35, 36) Sanggah Jesus rap pakon susianni, ringgas do sidea marbarita. (Luk. 10:1, 5-11, 17) Tapi dobkonsi Jesus itangkap janah matei, sompat do susianni ai lang be marbarita. (Joh. 16:32) Dob ipapuho Jesus, iojur ma sidea ase ringgas use marbarita. Dobkonsi naik Jesus hu surga, domma ringgas susianni ai marbarita. Halani ai ma ihatahon munsuh ni sidea, ‘Lambin igoki hanima do huta Jerusalem marhitei ajarannima.’​—Lah. 5:28.

2. Sonaha Jahowa mamasu-masu horja parambilanon bani abad na parlobei?

² Jesus do na manogu-nogu horja parambilanon ni halak Kristen bani abad na parlobei. Anjaha ipasu-pasu Jahowa do horja ni sidea. Halani ai, gabe buei ma halak na manjalo hasintongan. Contohni bani ari Pentakosta tahun 33 M, adong hira-hira 3.000 halak na ididi ibagas na sadari. (Lah. 2:41) Anjaha torus do martambah bilangan ni susian ni Jesus. (Lah. 6:7) Domma ipatugah Jesus lambin bahat do holi na ra manjalo hasintongan bani ari simagira.​—Joh. 14:12; Lah. 1:8.

3-4. Mase adong na mangahap sunsah do marbarita, janah aha do na laho iulas hita bani artikel on?

³ Ganup do hita porlu marusaha ase lang marnaloja laho marbarita. Bani piga-piga ianan, urah do marbarita halani bahat do halak na rosuh marlajar Bibel. Anjaha dong homa na paima-imahon ronsi roh Saksi Jahowa laho mangajari sidea.  Tapi, bani ianan na legan use, sunsah do marbarita halani jarang pajumpah pakon halak i rumah. Anggo pajumpah pe, otik do halak na ra manangar.

⁴ Anggo i iananmu otik dassa halak na ra manangar baritanta, artikel on boi mangurupi nasiam ase totap ringgas marbarita. Pardiateihon ma sonaha sanina botounta boi manjumpahi bahat halak sanggah marbarita. Dob ai, pardiateihon hita ma sonaha hita boi totap ringgas marbarita age pe bahat atap otik dassa na ra manangar baritanta.

5. Tantangan aha do na iahapkon piga-piga hasomanta sanggah marbarita?

⁵ Sonari on, bahat do halak na sunsah ijumpahi i rumah. Bahat do halak na tading i apartemen na ijaga ketat. Dong do homa rumahni na ijaga satpam janah lang ibere halak masuk hujai anggo lang iontang parrumah ai. Dong hasomanta na boi marbarita hun rumah hu rumah, tapi otik dassa na boi ijumpahi sidea i rumah. Na leganni dong hasomanta na marbarita hu huta-huta na bagas janah otik do homa na tading ijai. Dong homa hasomanta na maningon daoh mardalan laho manjumpahi sasada halak, hape dob das sidea lang adong halak i rumah. Anggo sonai do tantangan na iahapkon hita, ulang ma hita maretek ni uhur. Aha ma na boi mangurupi hita ase totap ringgas mangidangi?

6. Mase ma sahalak parbarita isarupahon songon sijala dengke?

⁶ Isarupahon Jesus do marbarita ai songon sahalak na manjala dengke. (Mrk. 1:17) Ra do piga-piga ari sijala dengke ai laho manangkap dengke tapi lang adong dapot ni sidea. Hassi pe sonai, totap do sidea ringgas manjala dengke. Igantih sidea ma ari ni sidea manangkap dengke, atap igantih sidea homa ianan ampa cara ni sidea manjala dengke ai. Sonai ma homa hita, dong piga-piga cara na boi igunahon hita sanggah marbarita.

7. Aha ma gunani anggo hita marbarita bani panorang na legan?

⁷ Marusaha ma manjumpahi halak bani panorang na legan. Sihol do hita manjumpahi halak sanggah sidea i rumah. Tapi bahat do halak lang i rumah halani marhorja ope sidea. Halani ai ma bahat do sanina botou na marpangahap dearan do sidea marbarita sanggah bod ari. Sanggah ai, bahat do halak na boi ijumpahi sidea. Leganni ai, bani panorang ai lang be sibuk halak. Halani ai ra ma sidea manangar hita. Pardiateihon ma pangalaman ni hasomanta sahalak sintua na margoran si David. Ia mangkatahon dobkonsi salosei sidea mangkorjahon sada ianan, mulak do use sidea hu ianan lang dong ijumpahi sidea simada rumahni. Nini ma, “Malas tumang uhurhu boi pajumpah pakon buei halak, halani iulaki hanami use roh hujai.” *

8. Sonaha Parambilan 11:6 boi mangurupi hita sanggah marbarita?

⁸ Totap ma hita marusaha manjumpahi halak i rumah. Totap ma homa dingat hita ayat tema ni artikel on. (Basa Parambilan 11:6.) Si David na isaritahon nongkan ai, totap do ia ringgas marbarita. Halani domma bahat halak na boi ijumpahi ia i rumah, ujungni dapotsi ma sada halak na ra marlajar Bibel. Ihatahon dalahi ai ma hu bani, “Ahu domma ualuh tahun tading ijon. Tapi lape ongga ahu pajumpah pakon Saksi Jahowa.” Nini si David use, “Halani totap ahu marusaha  manjumpahi halak i rumah, ujungni lambin bahat ma halak na ra manangar baritanta.”

9. Sonaha do cara na igunahon piga-piga hasomanta laho marbarita bani halak na sunsah ijumpahi?

⁹ Marusaha ma marbarita i ianan na legan. Ase boi hita marbarita bani halak na sunsah ijumpahi i rumah, dong do piga-piga hasomanta na manggantih ianan ni sidea marbarita. Umpamani, marbarita i dalan ampa manjaga gerai. Sosok do cara on igunahon hita laho manjumpahi halak na tading i apartemen na ijaga ketat. Marhitei cara ai ma boi hita pajumpah pakon halak na sunsah ijumpahi i rumah. Piga-piga parbarita mangkatahon lambin bahat do halak na boi ijumpahi sidea. Janah boi do homa ibere sidea publikasi i parkiran, i pajak, ampa i daerah bisnis. Sahalak sintua kaliling i Bolivia na margoran si Floiran mangkatahon, “Gati do hanami marbarita i pajak atap daerah bisnis jam 1 atap jam 3 siang, halani sanggah ai lang pala sai sibuk halak marjualan. Halani sonai ibahen hanami, boi ma hanami marsahapi pakon sidea janah mamungkah parlajaran Bibel.”

10. Cara aha ope na boi igunahon hita laho manjumpahi halak?

¹⁰ Marusaha ma manggunahon marmasam cara. Tontu domma marusaha ham manjumpahi ganup halak i iananmu marbarita. Domma marbarita ham bani panorang na legan. Tapi totap ope adong na lang boi ijumpahi ham. Ai dong ope cara na legan laho manjumpahi sidea? Si Katarína mangkatahon, “Hubahen ma surat hubani halak na lang ongga ahu pajumpah pakon sidea i rumahni. Hupatugah ma aha do na sihol huhatahon  bani sidea.” Jadi marusaha ma hita totap manggunahon marmasam cara ase boi pajumpah pakon bahat halak i iananta marbarita.

11. Mase bahat halak lang marosuh manangar baritanta?

¹¹ Bahat do halak lang marosuh bani baritanta. Dong do sidea na marpangahap lang porlu sidea mananda Naibata ampa marlajar Bibel. Dong do homa na marpangahap lang porsaya sidea bani Naibata halani mangidah bahatni sitaronon na dong i dunia on. Dong homa na lang porsaya bani Bibel halani mangidah parlahou na sambor humbani pemimpin ugama. Leganni ai, dong na sibuktu i kaluarga, i parhorjaan atap sibuk halani bahat parsoalanni. Janah pangahap ni sidea lang boi Bibel mangurupi sidea. Jadi sonaha ma hita boi totap marmalas ni uhur hassi pe pangahap ni halak lang ponting baritanta ai?

12. Sonaha Pilippi 2:4 boi mangurupi hita sanggah marbarita?

¹² Patuduh ma anggo hita parduli bani sidea. Bahat do halak mungkahni lang marosuh bani baritanta. Tapi gabe mubah do sidea halani dong hasomanta na parduli tumang bani sidea. (Basa Pilippi 2:4.) Umpamani, si David na isaritahon nongkan ai mangkatahon, “Anggo dong sasada halak na mangkatahon lang marosuh ia bani baritanta, lang mintor hubuka Bibel atap mambere publikasi hu bani. Tapi husungkun ma, ‘Mase sonai pangahapni?’” Ra do lang idingat sidea aha na ihatahon hita. Tapi totap do idingat sidea sonaha pambahenanta hu bani. Hassi pe lang boi hita patugahkon baritanta tapi boi do ipatuduh hita anggo hita parduli bani sidea marhitei parsahap ampa pambahenanta.

13. Sonaha hita boi mangulas topik na sosok pakon haporluan ni simada rumah?

¹³ Anggo iulas hita topik na sosok pakon haporluan ni simada rumah, ai ma carani hita patuduhkon anggo hita parduli bani sidea. Ai dong do dakdanak ididah ham i rumah ai? Ra do namatoras rosuh manangar sonaha Bibel boi mangurupi sidea mangajari niombahni, atap sonaha ase lambin martuah kaluarga ni sidea. Ai dong do ididah nasiam piga-piga rumah na bahat ibahen kuncini atap gembokni? Boi do ra ijai isaritahon hita halani bahatni hajahaton sonari on, bahat do halak na mabiar. Tapi dong panorangni holi masap ma ganup parjahat i tanoh on. Ra do gabe malas uhur ni simada rumah ai manangar barita ai. Aha pe parsoalan ni sidea, marusaha ma patugahkon sonaha Bibel boi mangurupi  sidea. Si Katarína na isaritahon nongkan ai mangkatahon, “Hudingat do gabe martuah do goluhku halani mandalankon podah ni Bibel.” Halani ai ma gabe hinsah uhurni mansaritahon isi ni Bibel hubani na legan. Janah halak na mangangar pe boi mangidah tongon do barita na ipadas si Katarína ai.

14. Domu bani Podah 27:17, sonaha hita boi mandapot pangurupion humbani hasoman sanggah marbarita?

¹⁴ Mandapot pangurupion humbani hasoman. Iajari si Paulus do si Timoteus sonaha carani marbarita ampa mangajari. Janah iojur do si Timoteus ase dihut homa mangajari na legan. (1 Kor. 4:17) Songon si Timoteus, hita pe boi marlajar humbani hasoman i kuria. (Basa Podah 27:17.) Songon sada hasomanta na margoran si Shawn, ia merintis i huta-huta bagas janah ijai bahat do halak na mangkatahon domma adong ugama ni sidea. Jadi sonaha ma ia boi totap marmalas ni uhur sanggah marbarita? Ia mangkatahon, “Sanggah marbarita, porlu do adong hasomanta. Jadi paima das hita hu rumah na mangihut, boi ma iulas hita sonaha carani ase lambin dear hita mangajari. Umpamani, boi do iulas hita sonaha carani mambalosi sungkun-sungkun ni halak. Dob ai, boi ma itiru hita ai sanggah adong simada rumah na manungkun hubanta.”

15. Aha do na porlu itonggohon hita pasal horja parambilanonta?

¹⁵ Martonggo ma mangindo pangurupion. Pindo ma bani Jahowa ase iurupi anjaha itogu-togu hita sanggah marbarita. Pindo ma ase ibere hubanta tonduy na pansing halani marhitei ai boi do tarhorjahon hita ganup tugasta. (Ps. 127:1; Luk. 11:13). Sanggah martonggo, patugah ma aha do harosuh ni uhurmu sanggah marbarita. Umpamani, boi do ipindo ham bani Jahowa ase boi ham pajumpah pakon halak halak na ra marlajar pasal-Si. Dob ai dalankon ma domu songon tonggomu ai. Umpamani, marusaha ma marbarita bani ganup halak na ijumpahi ham.

16. Anggo ringgas hita marlajar Bibel, aha do pengaruhni ai hubanta sanggah mangidangi?

¹⁶ Tongtong marlajar Bibel. Bibel mangkatahon: “Mubah ma marhitei habayuon ni uhur ase boi nasiam manimbangi atap aha do harosuh ni uhur ni Naibata.” (Rom 12:2) Anggo lambin bagas haporsayaonta bani Naibata lambin tarojur ma hita marbarita. Si Katarína na isaritahon nongkan ai mangkatahon, “Baru-baru on hubotoh ma porlu tumang do ahu patoguhkon haporsayaonku pasal Bibel. Halani ai, lambin bagas ma huparlajari bukti-bukti aha do na patuduhkon dong do Sitompa langit ampa tanoh on. Anjaha mase ahu porsaya Hata ni Naibata do Bibel ai janah dong do organisasi-Ni i tanoh on.” Humbani na ihatahon si Katarína ai, anggo ringgas hita marlajar Bibel, gabe lambin toguh ma haporsayaonta. Janah boi ma hita lambin marmalas ni uhur sanggah mangidangi.

17. Mase Jesus boi totap ringgas mangidangi?

¹⁷ Jesus totap do ringgas mangidangi hassi pe dong halak na lang ra manangar. Mase? Halani ibotoh ia do porlu do halak manangar hasintongan ai, janah sihol do ia mambere bahat panorang ase ra sidea manjalo barita Harajaon. Ibotoh ia do homa dong do halak mungkahni na lang ra manangar, tapi ujungni gabe mubah. Umpamani, kaluarga ni Jesus sanggah ia i tanoh on. Sadokah tolu satongah tahun Jesus mangidangi, lang dong sada pe humbani saninani na gabe susianni. (Joh. 7:5) Tapi dobkonsi ipapuho ia, domma gabe halak Kristen sidea.​—Lah. 1:14.

18. Mase hita maningon totap marbarita?

 ¹⁸ Lang ibotoh hita ise do ujungni na ra gabe Saksi Jahowa. Dong do halak na dokah ase ra marlajar Bibel. Janah dong do homa na lang ra manangar baritanta. Tapi halani totap hita dear marparlahou janah ringgas marbarita, ‘gabe ipasangap sidea ma Naibata’.​—1 Ptr. 2:12.

19. Humbani 1 Korint 3:6, 7, parlajaran aha do na idapot hita pasal marbarita?

¹⁹ Hita do na manuan pakon na maniram. Tapi dingat ma Jahowa do na patubuhkon ai. (Basa 1 Korint 3:6, 7.) Si Getahun sahalak sanina i Etiopia mangkatahon, “Sadokah 20 tahun, pitah ahu dassa Saksi Jahowa i daerah na jarang ihorjahon. Tapi sonari domma adong 14 halak Saksi Jahowa ijon, tarmasuk ma istringku pakon niombahku. Janah sonari domma adong 32 halak hadirin na roh hu partumpuan.” Totap do si Getahun ringgas mangidangi janah sabar mangurupi halak gabe sisombah Jahowa.​—Joh. 6:44.

20. Mase hita boi isarupahon songon tim penyelamat?

²⁰ Maharga do ganup jolma bani Jahowa. Ibere Ia do banta hasangapon laho rup marhorja pakon Anak-Ni laho paluahkon bahat halak paima roh ujung ni dunia on. (Hag. 2:7) Isarupahon do horjanta on songon tim penyelamat i sada pertambangan. Hassi pe pitah sada halak dassa na boi ipaluah sidea, tapi maharga tumang do na ihorjahon sidea ai. Sonai homa ma hita. Lang ibotoh hita sadiha bahat do halak na laho ipaluah humbani dunia on. Janah boi do igunahon Jahowa ise pe juakjuak-Ni laho mangurupi sidea. Si Andreas na tading i Bolivia mangkatahon, “Hubotoh ma sasada halak boi marlajar Bibel janah ididi, ai halani horja ampa pangurupion ni buei halak.” Jadi totap ma hita ringgas marbarita anjaha marmalas ni uhur mangkorjahon ai. Sai ipasu-pasu Jahowa do horjanta ai. Janah boi do iahapkon hita malas ni uhur na banggal humbani horja ai.