1. Usihen kai si bereken Jesus? Janah uga tanggapen murid-muridna? (Nen gambar sampul.)

SANGA Jesus i doni, tetap ia positif bas erberita janah iarapkenna gelah pengikutna pe bage. (Joh. 4:35, 36) Sanga Jesus ras murid-muridna denga semangat kel kalak e erberita. (Luk. 10:1, 5-11, 17) Tapi kenca Jesus itangkap janah ibunuh, sempat kalak e lanai semangat erberita. (Joh. 16:32) Kenca Jesus ipekeke, iahken Jesus kalak e gelah terus ngutamaken pendahin erberita. Emaka, kenca Jesus nangkih ku surga, semangat kel kalak e erberita. Ngidah si e, bagenda nina musuh-musuhna, “Enggo dem ban kena Jerusalem enda alu pengajaren kena.”​—Perb. 5:28.

2. Kai hasilna perban ipasu-pasu Jahwe pendahin erberita?

² Jesus si minpin pendahin erberita si ilakoken kalak Kristen bas abad pertama janah ipasu-pasu Jahwe kai si lakoken kalak e. Alu bage, enterem kalak si ngaloken berita si meriah. Contohna, bas Pentakosta tahun 33 Masehi, lit kira-kira 3.000 kalak si iperidiken. (Perb. 2:41) Jumlah e terus reh teremna. (Perb. 6:7) Tapi inubuatken Jesus maka bas wari-wari pendungi, reh teremna kari kalak ngaloken berita e.​—Joh. 14:12; Perb. 1:8.

3-4. Engkai maka la menukah iakap piga-piga kalak erberita bas daerahna? Janah kai kari sibahas bas artikel enda?

³ Siusahaken gelah tetap kita positif sanga erberita. Bas piga-piga negri menukah tetap positif. Engkai? Perban enterem kel kalak nggit erlajar Pustaka bas negri e janah piga-piga arah kalak e arus lebe nimai seh asa lit Saksi si banci nampati kalak e erlajar. Tapi bas negri-negri si deban lit tentangen si adapi perberita. Misalna, jarang kalak i rumah janah bicara lit pe kalak i rumah, banci saja sitik ngenca minatna man Pustaka.

 ⁴ Adi bas daerahndu la menukah erberita, artikel enda banci nampati kam. Bas artikel enda, sibahas kari kai saja si ilakoken piga-piga perberita gelah banci reh teremna kalak si ijumpaina sanga erberita. Sibahas ka kari engkai kita banci tetap positif la soal uga tanggapen kalak man beritata.

5. Tentangen kai si iadapi enterem Saksi Jahwe?

⁵ Enterem Saksi Jahwe si reh serana iakapna njumpai kalak bas rumah. Piga-piga perberita tading i daerah si enterem pendudukna tading bas rumah-rumah si ijaga ketat. Banci saja satpam si njaga rumah e la berena ise pe masuk adi la kin iundang si mpuna rumah. Perberita si deban banci bebas erberita arah rumah ku rumah tapi jarang lit kalak i rumah. Perberita si debanna ka erberita bas daerah pelosok janah sitik ngenca kalak si tading i je. Banci saja ndauh kel perdalanen si arus idalani kalak e gelah banci njumpai sekalak jelma saja, janah e pe banci saja la ia i rumah. Adi bage tentangenna, ula kita nyerah. Kai nge si arus silakoken gelah reh teremna kalak si banci sijumpai?

6. Engkai maka perberita banci ipeseri ras nelayan?

⁶ Ipeseri Jesus pendahin erberita bagi pendahin sekalak nelayan. (Mrk. 1:17) Banci saja la lit dat nelayan ikan amin pe enggo erwari-wari dekahna ia ndarami ikan. Tapi, labo ia nyerah. Isesuaikenna waktuna, inganna, ntah pe carana ndarami ikan. Kita pe arus ka siban penyesuaien sanga erberita. Mari sibahas kai saja si perlu silakoken.

7. Kai hasilna adi sisesuaiken waktuta erberita?

⁷ Sesuaikenlah waktuta erberita. Biasana reh teremna kalak si banci sijumpai adi erberita kita sanga kalak enggo i rumah. Kerina kalak pasti nge mulih ku rumahna. Enterem turang seninata erberita karaben ntah pe berngi, perban paksa si e reh teremna kalak si banci ijumpaina i rumah. Selain si e, banci saja si mpuna rumah enggo santai janah lit waktuna ngerana-ngerana. Banci ka usihndu kai si ilakoken sekalak pertua si gelarna David. Sanga ia erberita ras sekalak perberita ku sada daerah janah lit rumah si la lit kalakna, kai si ilakoken kalak e? Kenca sada ntah pe dua jam kalak e erberita i je, mulihi ka idahi kalak e rumah-rumah ndai. Nina, “Sengget kel aku perban enterem kalak si banci jumpai kami sanga mulihken kami ku je.” *

8. Uga kita ndalanken nasehat bas Pengerana 11:6 sanga erberita?

⁸ Bagi ayat tema bas artikel enda, arus terus siusahaken njumpai kalak bas rumahna. (Baca Pengerana 11:6.) David si ituriken ndai la nyerah. Kenca piga-piga kali dahina sada rumah, dungna jumpa ia ras si mpuna rumah e. Meriah iakapna mbahas Pustaka janah bagenda nina si mpuna rumah e, “Enggo lit kira-kira waluh tahun dekahna aku tading i jenda. Tapi enda denga ngenca aku jumpa ras Saksi Jahwe si reh ku rumahku.” Nina David, “Menurut pengalamenku, sanga dungna jumpa kita ras kalak bas rumahna, biasana nggit kalak e megiken beritata.”

9. Kai si ilakoken piga-piga perberita gelah banci erberita man kalak si mesera njumpaisa bas rumahna?

 ⁹ Sesuaiken ingan erberita. Gelah banci njumpai kalak si mesera njumpaisa bas rumahna, piga-piga perberita erberita bas ingan si deban. Contohna, erberita kalak e bas dalan ras nggunaken gerai. Alu bage banci kalak e erberita man kalak si tading bas ingan si biasana la kita banci erberita ku je, misalna rumah-rumah si ijaga ketat. Cara erberita si bage erban kita banci jumpa langsung ras kalak si mesera njumpaisa. Selain si e, enterem perberita ngataken maka riahen akap kalak ngerana-ngerana ntah pe ngaloken baca-bacanta sanga sijumpai ia bas taman, pajak, bage pe bas daerah bisnis. Sekalak pertua keliling si gelarna Floiran ngataken, “Erberita kami bas pajak ras daerah bisnis antara jam 1 seh jam 3 ciger. Perban bas jam e perbinaga la sibuksa. Biasana nggit kalak e ngerana-ngerana ras kita janah lit ka si dungna erlajar Pustaka.”

10. Kai deba nari si banci silakoken gelah banci reh teremna kalak sijumpai sanga erberita?

¹⁰ Sesuaiken carata. Banci saja enggo mulih-ulih dahindu kalak. Enggo rusur isesuaikenndu waktundu gelah banci jumpa ras ia, tapi la ia rumah. Lit nge cara si deban gelah banci jumpa ras kalak si bage? Bagenda nina Katarína, “Kutulis surat man kalak si la pernah aku jumpa i rumahna. Bas surat e, kutulis kai ateku si kukataken man bana.” Kai pelajarenna? Siusahakenlah erberita man  kerina kalak si lit bas daerahta alu erbage-bage cara.

11. Engkai maka piga-piga kalak la nggit megiken beritata?

¹¹ Piga-piga kalak la nggit megiken beritata. Engkai? La iakap kalak e ia perlu Dibata ntah pe Pustaka. La kalak e tek man Dibata perban melala idahna kiniseran bas doni enda. Itulak kalak e Pustaka perban melala idahna peminpin agama si munapik. Si debanna ka sibuk ngukuri dahinna, keluargana, ntah pe ngukuri masalahna saja. Iakap kalak e labo lit gunana Pustaka e man bana. Uga carana gelah tetap kita ermeriah ukur bas erberita amin pe jarang kalak ngergai beritata?

12. Kai gunana adi sidalanken nasehat bas Pilipi 2:4 sanga kita erberita?

¹² Buktikenlah maka kita ermediate. Enterem kalak si tangtangna la nggit megiken berita si meriah dungna nggit megiken perban igejapkenna maka tuhu-tuhu ermediate kita man bana. (Baca Pilipi 2:4.) Contohna, David si ituriken ndai ngataken, “Adi lit si ngataken maka la ia tertarik, ula sibacaken Pustaka ntah pe sibere baca-bacanta man bana. Banci sikataken bagenda man bana, ‘Merhat aku metehsa engkai maka bage perasanndu?’” Banci igejapken kalak adi ermediate kita man bana. Banci saja lupa ia kai si enggo sikataken, tapi perbahanenta si mehuli banci ndekah ingetna. Amin pe la bere kalak kesempaten man banta guna erberita, banci tetap sicidahken kita ermediate man bana arah ayota ras perbahanenta.

13. Uga carana gelah beritata jadi lebih menarik?

¹³ Bukti kita ermediate man kalak adi sisesuaiken beritata ras kai si iperlukenna bage pe si menarik akapna. Contohna, lit nge siidah barang-barang si ncidahken maka lit anak-anak bas rumah e? Adi lit, banci jadi meriah akapna ncakapken nasehat si lit bas Pustaka kerna uga carana mpebelin anak-anak ntah pe uga carana gelah keluarga ermeriah ukur. Selain si e, lit nge siidah melala gembok bas pintuna? Adi lit, banci sicakapken kerna kejahaten ras kai si erban kalak mbiar gundari. Banci jadi meriah ukurna metehsa maka lanai pagi lit kejahaten. La soal uga situasina, siusahakenlah nampati kalak si nggit megiken gelah itehna uga nasehat Pustaka banci nampati ia. Katarína, si ituriken ndai  ngataken, “Kuukuri uga nasehat Pustaka enggo tuhu-tuhu nampati aku.” Dungna, lebih percaya diri ia sanga erberita janah kalak si megiken ia pe idahna kerna si e.

14. Menurut Kuan-kuanen 27:17, uga kita banci sisampat-sampaten ras temanta erberita?

¹⁴ Aloken penampat arah kalak si deban. Bas abad pertama, iajari Paulus Timotius uga carana erberita ras ngajar janah iahkenna Timotius nggunaken cara-cara e nampati kalak si deban. (1 Kor. 4:17) Bagi Timotius, banci sidat melala penampat arah kalak si mbue pengalamenna si lit bas runggunta. (Baca Kuan-kuanen 27:17.) Cuba perdiateken pengalamen sekalak turang seninata si gelarna Shawn. Pernah ia merintis bas sada kuta si teremen kalakna enggo meriah iakapna bas agamana. Uga carana gelah tetap ia ermeriah ukur bas erberita? Nina, “Kuusahaken gelah lit lalap temanku erberita. Sanga kami erdalan arah rumah kurumah, icakapken kami uga carana gelah reh ulina pengajaren kami. Contohna, ibahas kami uga ndai cara kami erberita man si mpuna rumah. Kenca si e, gelah reh ulina cara kami erberita, ibahas kami ka kai kari si ikataken kami man si mpuna rumah adi seri denga tanggapenna.”

15. Engkai maka toto penting bas pendahin erberita?

¹⁵ Ertotolah mindo penampat Jahwe. Tiap erberita atendu ertotolah kam mindo penampat Jahwe. Bas kerina pendahinta perlu kita penampat kesah si badia. (Ms. 127:1; Luk. 11:13) Sanga ertoto kam man Jahwe turikenlah alu jelas penampat kai si perlukenndu. Contohna, pindolah gelah ipejumpaNa kam ras kalak si nggit erlajar kerna Ia ras si nggit megiken. Kenca si e, usahakenlah erberita man kerina kalak si jumpaindu.

16. Engkai maka pelajaren pribadi banci erban kita reh ulina bas erberita?

¹⁶ Banlah waktundu pelajaren pribadi. Nina Pustaka, “Banci jelas teh kena peraten Dibata si mehuli, si sempurna, janah si erban Ia senang.” (Rom. 12:2) Adi siban pelajaren pribadi banci reh bagesna sitandai Dibata. Sanga sipeseh kerna Dibata man kalak si deban banci idahna maka tek kel kita man kai si enggo sipeseh. Bagenda nina Katarína si ituriken ndai, “Piga-piga waktu si lewat sadar aku maka perlu kupegegehi kinitekenku kerna ajaren-ajaren dasar Pustaka. Emaka tutus ateku ndarami bukti maka pencipta e lit, Pustaka e Kata Dibata, ras lit organisasi Dibata bas doni enda gundari.” Ikatakenna maka pelajaren pribadi enggo mpebelin kinitekenna ras reh riahna iakapna erberita.

17. Engkai maka Jesus tetap positif sanga erberita?

¹⁷ Jesus tetap positif janah terus erberita amin pe lit kalak si la nggit megiken ia. Engkai? Perban tehna maka perlu teh kalak kebenaren janah asa ngasupna sampatina atena enterem kalak. Tehna ka maka kalak si tangtangna la nggit megiken banci jadi dungna nggit megiken. Cuba perdiateken kai si terjadi bas keluarga Jesus. Sanga ia ngelayani telu setengah tahun dekahna, la lit senina-seninana si jadi pengikutna. (Joh. 7:5) Tapi kenca ia ipekeke, senina-seninana e enggo jadi kalak Kristen.​—Perb. 1:14.

18. Engkai maka arus terus kita erberita?

¹⁸ La siteh ise si nggit ngaloken kebenaren  si lit bas Pustaka. Piga-piga kalak ndekah maka alokenna kebenaren e. Amin pe lit kalak si la nggit megiken kita, banci jadi mulai “muliaken kalak e Dibata” perban idahna perbahanenta si mehuli.​—1 Pet. 2:12.

19. Menurut 1 Korinti 3:6, 7, kai si arus siinget kerna dahin erberita?

¹⁹ Amin pe kita si nuan ras si niram benih kebenaren, arus siinget maka Dibata kap si erbanca turah. (Baca 1 Korinti 3:6, 7.) Getahun sekalak turang seninata si ngelayani bas Etiopia ngataken, “Enggo lebih 20 tahun dekahna aku ngenca Saksi Jahwe bas kutaku. Tapi gundari enggo lit 14 perberita i je. Lit 13 kalak arah kalak e si enggo iperidiken, termasuk diberuku ras telu anakku. Lit kira-kira 32 kalak si reh ku perpulungen.” Meriah ukur Getahun perban terus ia erberita guna nampati kalak nembah Jahwe.​—Joh. 6:44.

20. Engkai maka pendahin erberita banci ipeseri ras dahin tim penyelamat?

²⁰ Meherga akap Jahwe kerina manusia. BereNa kita hak istimewa kerja sama ras AnakNa guna mpepulung kalak arah erbage bangsa sope lenga seh kedungen jaman enda. (Hag. 2:7) Sanga erberita, kita banci ipeseri ras tim penyelamat si itugasken guna nelamatken kalak arah kapal si nandangi gedap. Amin pe sitik ngenca kalak si banci iselamatken, tapi kerina si ilakoken anggota tim e seh kel pentingna. Pendahin erberita pe bage. La siteh piga kalak nari si banci iselamatken arah doni Setan enda. Tapi banci gunaken Jahwe kita nampati kalak e. Andreas si tading i Bolivia ngataken, “Tiap kalak si erlajar Pustaka janah dungna iperidiken situhuna hasil arah kerja sama enterem kalak guna nampati ia.” Mbera-mbera sipertahanken perukuren si bage bas dahin erberita. Adi bage siban pasti ipasu-pasu Jahwe kita janah reh belinna keriahen ukurta bas erberita.