1. Weh egzampl Jeezas mi set fi ih falowaz, ahn how dehn mi rispan? (Koment pahn di picha pahn di kova.)

WEN Jeezas mi deh pahn di ert, hihn mi aalwayz ga wahn pazitiv atichood tuwaadz ih minischri, ahn hihn mi waahn ih falowaz ga da saym pazitiv atichood tuwaadz di minischri tu. (Jan 4:35, 36) Wail Jeezas mi deh wid ih disaiplz, dehn mi eksaitid bowt di preechin werk. (Look 10:1, 5-11, 17) Bot wen dehn mi ares Jeezas ahn kil ahn, ih disaiplz neva hapi fi preech nohmoh. (Jan 16:32) Bot afta Jeezas mi geh rayz op bak tu laif, hihn mi inkorij dehn fi foakos pahn di preechin werk. An afta ih gaahn da hevn, dehn mi soh eega fi preech dat dehn enimiz mi seh: “Luk weh unu gaahn du, unu ful op di hoal a Jeroosalem wid unu teechin!”—Aks 5:28.

2. How Jehoava help wi fi ga sokses eena di preechin werk?

² Jeezas mi gaid di erli Kristyanz eena di preechin werk, ahn Jehoava mi bles dehn. Soh wahn lata peepl mi aksep dehn mesij. Fi egzampl, da Pentikaas 33 C.E., bowt 3,000 peepl mi geh baptaiz. (Aks 2:41) Ahn di nomba a disaiplz mi kantinyu fi groa moa ahn moa. (Aks 6:7) Stilyet, Jeezas mi prafesai dat di preechin werk mi wahn ga eevn moa sokses eena di laas dayz.—Jan 14:12; Aks 1:8.

3-4. Wai sohn bradaz ahn sistaz mait fain it haad fi du di preechin werk, ahn weh wi wahn diskos eena dis aatikl?

³ Aala wi chrai fi ga wahn pazitiv atichood tuwaadz di minischri, an eena sohn konchri ih eezi fi du dat. Wai? Bikaaz soh moch peepl waahn stodi di Baibl dat som a dehn haftu wayt til wahn Witnis avaylabl fi stodi wid dehn. Bot eena sohn ada konchri, di preechin werk haada fi som poblishaz bikaaz peepl bayli deh hoam, ahn di wan dehn weh deh hoam mait noh reeli bee inchrestid eena di Baibl.

 ⁴ If yu liv eena wahn ayrya wehpaat di preechin werk haada fi yu, di sojeshanz eena dis aatikl ku praabli help yu. Wi wahn diskos weh sohn bradaz ahn sistaz mi du fi reech moa peepl eena di minischri. Ahn wi wahn si how wi ku stil bee pazitiv weda peepl lisn tu wi mesij er nat.

5. Wat da sohn chalenj weh wahn lata Witnisiz fays?

⁵ Wahn lata Witnisiz di fain it haada ahn haada fi reech peepl da dehn hows. Som poblishaz liv da wahn plays wehpaat lata apaatment bildin ahn naybahud ga sikyoariti, ahn yu kyaahn goh een anles sohnbadi weh liv deh invait yu een. Fi ada poblishaz, ih eezi fi goh fahn doa tu doa, bot dehn mait onli fain lee bit a peepl hoam. Ahn den yu ga sohn poblishaz weh goh preech da sohn plays wehpaat onli wahn lee bit a peepl liv. Di poblishaz mait haftu chravl faar fi chrai preech tu wan persn weh praabli noh eevn deh hoam. If wee fays dehndeh kaina chalenj, wi kyaahn giv op! How wi ku deel wid dehndeh chalenj ahn taak tu moa peepl?

6. Wai wi kompyaa di werk weh wee du tu di werk weh wahn fishaman du?

⁶ Jeezas mi kompyaa di preechin werk tu di werk weh wahn fishaman du. (Maak 1:17) Wahn fishaman mait goh fi dayz widowt kech eni fish, bot dehn noh giv op, dehn jos mek lee chaynjiz lang di way. Dehn mait goh fishin da wahn difrent taim, da wahn difrent spat, er dehn mait eevn chaynj op di way how dehn kech fish. Wee ku mek di saym chaynjiz eena wi preechin werk. Mek wi luk pahn sohn sojeshanz.

7. Weh mait hapm if wi goh preech da wahn difrent taim?

⁷ Chrai preech tu peepl da wahn difrent taim. Wi wahn get fi taak tu moa peepl if wi goh preech joorin wahn taim wen dehn moa laikli fi deh hoam. Aftaraal, evribadi haftu goh hoam som taim! Wahn lata bradaz ahn sistaz preech eena di aftanoon bikaaz dehn noatis dat moas peepl deh hoam joorin da taim. Pahn tap a dat, di howshoalda dehn yoozhwali moa rilaks joorin da taim ahn redi fi lisn tu weh wi ga fi seh. Er maybi yu ku chrai du weh wahn elda weh naym Dayvid du. Hihn seh dat afta ih preech fi wahn wail eena di teritori, hihn ahn di brada weh ih werk wid wuda goh bak da di hows dehn wehpaat di howshoalda dehn neva deh hoam. Hihn seh “Ah sopraiz humoch peepl deh hoam wen wi goh bak di sekant taim.” *

8. How wi ku yooz Ecclesiastes 11:6 fi help wi eena wi minischri?

⁸ Wi shudn giv op! Wi teem skripcha rimain wi a di atichood weh wi need fi ga tuwaadz di minischri. (Reed Ecclesiastes 11:6.) Dayvid, di brada weh wi menshan erliya, neva giv op. Wen hihn mi-di goh bak da wan a di saym hows oava ahn oava agen, hihn mi fainali fain di persn weh ih mi-di luk fa. Di man mi waahn diskos di Baibl wid ahn, an ih seh, “Ai liv ya fi bowt ayt yaaz aredi, an Ah neva yet meet wan a Jehoava Witnisiz da mi hows.” Dayvid seh, “Ah fain owt dat wen wi fainali geh wahn chaans fi meet peepl da dehn hows, moas a di taim dehn lisn tu di mesij weh wi preech.”

9. Weh sohn Witnisiz du fi preech tu peepl weh dehn kyaahn fain hoam?

 ⁹ Chrai preech da wahn difrent loakayshan. Sohn poblishaz staat tu preech sohnweh els soh dat dehn ku fain peepl weh dehn neva fain hoam. Fi egzampl, schreet werk ahn kyaat werk da sohn gud wayz fi preech tu peepl weh liv eena sohn big apaatment bildin wehpaat wi noh ga permishan fi preech fahn doa tu doa. Dis alow di Witnisiz fi ga wahn fays-tu-fays kanvasayshan wid di peepl weh liv eena dehndeh bildin. Aalso, wahn lata poblishaz fain dat peepl moa wilin fi taak tu dehn er fi aksep lichricha wen dehn deh eena wahn poblik plays laik da paak, da maakit, er rong sohn ayrya wehpaat peepl du bizniz. Floiran, wahn serkit oavaseeya weh liv da Bolivia, seh: “Wi goh da di maakit ahn bizniz dehn bitween wan aklak ahn chree aklak eena di aftanoon wen di shap oana dehn noh soh bizi. Ahn wi yoozhwali ga sohn reeli gud kanvasayshan wid dehn an eevn staat sohn Baibl stodiz.”

10. Wat els yu ku du fi preech tu peepl?

¹⁰ Chrai fain wahn difrent way fi preech. Wat if yu kip aan di chrai fi preech tu wahn persn, bot yu stil kyaahn fain dehn hoam eevn if yu chrai vizit dehn wahn difrent taim? Yu tink eni ada way deh fi reech wahn persn laik dat? Katarína seh, “Ai rait letaz tu di wan dehn weh Ah kyaahn fain da dehn hows. An Ah tel dehn di saym tingz weh Ah wuda tel dehn if Ah mi meet dehn da dehn hows.” Weh wi laan fahn dis? Fain wayz fi preech tu evribadi eena yu teritori.

11. Wai sohn peepl noh waahn lisn tu wi mesij?

¹¹ Som peepl noh waahn lisn tu wi mesij. Dehn tink dat dehn noh need fi noa bowt Gaad er di Baibl. Dehn noh bileev eena Gaad bikaaz dehn si aala di sofarin weh di hapm eena di werl. Dehn noh inchrestid eena di Baibl bikaaz dehn si dat wahn lata di rilijos leedaz di du bad tingz eevn doa dehn klaym seh dat dehn obay weh di Baibl seh. Ada peepl bizi di werk, di tek kayr a dehn famili, er di schrogl fi tek kayr a dehn oan prablemz. Ahn dehn noh reeli tink dat di Baibl ku help dehn wid dehndeh tingz. How wi ku kantinyu fi bee hapi eevn wen di peepl weh wi preech tu noh tink dat wi mesij impoatant?

12. How Filipiyanz 2:4 ku help wi eena di minischri?

¹² Shoa adaz dat yu kay bowt dehn. Wahn lata peepl weh neva waahn lisn tu wi mesij fers mi lisn wen dehn mi feel dat wahn poblisha mi reeli kay bowt dehn. (Reed Filipiyanz 2:4.) Fi egzampl, Dayvid, weh wi menshan erliya, seh, “If sohnbadi tel wi dat ih noh inchrestid eena weh wi ga fi seh, wi put dong wi Baibl er wi lichricha ahn tel dehn: ‘Ah wuda waahn noa wai yu feel da way.ʼ” Peepl ku tel weda wi kay bowt dehn er nat. Dehn mait ferget evriting weh wi tel dehn, bot moa dan laikli dehn wahn memba how wi mek dehn feel. Soh eevn if sohnbadi noh waahn wi tel dehn eniting bowt di gud nyooz, wi ku shoa dehn dat wi kay bowt dehn bai di way how wi chreet dehn an if wi frenli wid dehn.

13. Weh wi ku du fi mek wahn howshoalda bee moa inchrestid eena wi mesij?

¹³ Wee shoa dat wi kay bowt adaz wen wi chaynj op di mesij soh dat ih ku help di howshoalda persnali. Fi egzampl, wen yu goh da wahn hows, yoo si eniting weh shoa yu dat di peepl weh liv deh ga pikni? Wel, maybi di peepl weh liv deh mait bee inchrestid eena weh di Baibl ga fi seh bowt how fi rayz pikni er how fi ga wahn hapiya famili. Er if yu noatis dat di persn ga wahn lata lak pahn dehn doa er gayt, maybi yu ku taak tu dehn bowt wahn taim wen nohmoh kraim wahn deh. Wateva yu chooz fi taak bowt, chrai fi help di persn si how di mesij ku help dehn persnali. Katarína, weh wi menshan erliya, seh, “Ai aalwayz tink bowt humoch di Baibl mi help mee fi ga wahn beta laif.” Sayka dat, wen Katarína preech shee taak eena wahn way weh shoa dat ih bileev weh ih di seh, ahn di peepl weh shee preech tu ku si dat.

14. Akaadn tu Proverbs 27:17, wen yu di werk lang wid sohnbadi eena di minischri, how unu ku help eech ada?

 ¹⁴ Geh help fahn ada bradaz ahn sistaz. Eena di fers senchri, Paal mi shoa Timoti di difrent wayz how hihn mi preech ahn teech, an ih mi inkorij Timoti fi help adaz di saym way. (1 Kor. 4:17) Jos laik Timoti, wee ku laan fahn ada bradaz ahn sistaz eena di kangrigayshan, espeshali di wan dehn weh ga lata ekspeeryens. (Reed Proverbs 27:17.) Fi egzampl, wahn brada weh naym Shawn mi-di painyaa da wahn plays wehpaat lata peepl mi hapi wid fi dehn oan rilijan. Weh hihn mi du fi kip ih jai? Hihn seh, “Weneva Ah kud, Ah werk lang wid sohnbadi eena di minischri. Wail wi goh fahn wan hows tu di neks, wi help eech ada fi du beta eena wi teechin. Fi egzampl, wi wuda taak bowt weh di howshoalda mi seh ahn how wee mi rispan. Den wi wuda taak bowt how wi kuda mi rispan eena wahn difrent way if wi wuda eva fays wahn sichuwayshan laik dat agen.”

15. Wai ih impoatant fi pray evritaim wi preech?

¹⁵ Aks Jehoava fi help. Pray tu Jehoava an aks ahn fi help yu evri taim yu goh preech, bikaaz wee kyaahn du notn if wi noh geh help fahn fi hihn powaful hoali spirit. (Ps. 127:1; Look 11:13) Wen yu di pray tu Jehoava fi help, yu ku tel ahn egzakli weh yu wuda waahn ih help yu wid. Fi egzampl, yu ku aks ahn fi help yu preech tu sohnbadi weh waahn laan bowt Hihn ahn weh redi fi lisn. Bot yoo haftu du yu paat tu. Soh preech tu evribadi weh yu meet eena di minischri.

16. Wai wi need fi du persnal stodi if wi waahn du gud eena di minischri?

¹⁶ Mek taim fi du persnal stodi. Di Baibl seh: “Du weh gud, weh perfek, ahn weh pleez Gaad.” (Roam. 12:2) Wen wi stodi, wi geh fi noa Jehoava beta ahn beta. Ahn wen wi taak tu adaz bowt hihn, dehn wahn si dat wi reeli bileev weh wi di seh. Katarína, weh wi menshan erliya, seh: “Noh tu lang agoa, Ah riyalaiz dat Ah mi need fi schrentn mi fayt eena som a di baysik Baibl teechinz. Soh Ah mi du deep risaach fi fain evidens dat wahn Kriyayta egzis, dat di Baibl da reeli Gaad Werd, ahn dat Gaad ga wahn aaganaizayshan weh di reprizent hihn tudeh.” Katarína seh dat wen shee du ih persnal stodi, dat reeli schrentn ih fayt an ih eevn mek ih ga moa jai eena di minischri.

17. Wai Jeezas mi aalwayz ga wahn pazitiv atichood tuwaadz ih minischri?

¹⁷ Jeezas mi aalwayz ga wahn pazitiv atichood tuwaadz ih minischri, an ih mi kip aan di preech eevn doa peepl neva waahn lisn tu ih mesij. Wai? Hihn mi noa humoch di peepl mi need fi hyaa di chroot, ahn hihn mi waahn help az moch peepl az pasabl fi geh di chaans fi aksep di Kingdom mesij. Hihn mi aalso noa dat som a di peepl weh neva waahn lisn tu ahn fers mi wahn en op di aksep di chroot laytaraan. Tink bowt weh mi hapm wid fi hihn famili. Fi di chree an a haaf yaaz weh ih mi spen pahn di ert di preech ahn teech, non a fi hihn breda dehn mi waahn bee ih disaipl. (Jan 7:5) Bot afta hihn mi rayz op bak fahn di ded, dehn mi ton Kristyan.—Aks 1:14.

18. Wai wee kip aan di preech?

¹⁸ Wee noh noa hoo aal mait en op di aksep di chroot fahn di Baibl. Som peepl mait tek langa dan adaz fi aksep di  chroot. Bot eevn di wan dehn weh chooz fi noh lisn tu wi si wi gud kandok ahn pazitiv atichood, an eena di langa ron dehn mait staat tu “aana Gaad.”—1 Peet. 2:12.

19. Weh 1 Korintyanz 3:6, 7 teech wi bowt wi minischri?

¹⁹ Eevn doa da wee di preech ahn teech, wi need fi memba dat Gaad da di Wan weh mek wi ga sokses. (Reed 1 Korintyanz 3:6, 7.) Getahun, wahn brada weh liv da Ethiopia, seh: “Fi moa dan 20 yaaz, Ai da-mi di onli Witnis eena di ayrya wehpaat Ah mi liv. Bot now 14 poblishaz deh ya. Terteen a dehn mi geh baptaiz, inkloodin mi waif ahn mi chree chiljren. Wi ga bowt 32 peepl di kohn da wi meetin dehn evri week.” Getahun onli hapi dat ih mi kip aan di preech wail ih wayt pahn Jehoava fi jraa di peepl wid di rait haat kandishan tu fi Hihn aaganaizayshan!—Jan 6:44.

20. Eena weh way fi wee minischri da laik wahn reskyu werk?

²⁰ Evribadi laif preshos tu Jehoava. Dat da wai hihn gi wi di privilij fi werk lang wid ih Son fi preech tu evribadi aal oava di ert bifoa di en kohn. (Hag. 2:7) Wee ku kompyaa di preechin werk tu wahn reskyu werk. Da laik wee da paat a wahn reskyu teem weh goh owt fi luk fi wahn groop a peepl weh deh eena daynja. Eevn doa wi mait onli fain wahn fyoo peepl, di werk weh evribadi eena da reskyu teem du veri impoatant. Da di saym ting wid di werk weh wi du eena wi minischri. Wee noh noa humoch peepl wahn geh sayv fahn Saytan sistem. Bot Jehoava ku yooz eni wan a wi fi help dehn. Andreas, wahn brada weh liv da Bolivia, seh, “Ai noa dat wen sohnbadi laan di chroot ahn geh baptaiz da noh bikaaz a di werk weh wan persn du, bot da bikaaz wahn lata bradaz ahn sistaz mi werk tugeda fi help da wan persn.” Mek wee ga da saym pazitiv atichood tuwaadz wi minischri. If wi du dat, Jehoava wahn bles wi ahn wi preechin werk wahn gi wi wahn lata jai.