1. Ka hénpulu líchugubei Hesusu houn lani disipulugu, ani ka hadügübei? (Ariha humóun iyawaü to luáguboun tidáü garüdia).

DAN meha le ya lubéi Hesusu Ubouagu, mábürühanti meha larüna lidan lani ministeriu, ani busenti meha giñe lun mábürühan lan harüna lani disipulugu (Huan 4:35, 36). Sun meha dan le laubei Hesusu hama lani disipulugu apurichihatiña meha lau ubebeni (Luk. 10:1, 5-11, 17). Féridi hamuti meha ubebeni ligía dan le lárügüdübei hamaisturun afarúa ligía hilagubei (Huan 16:32). Lárigiñe láguyugun, aba línchahaniña lun hetenirun lun apurichihani. Ani da le siéluhali, sigimémetiña lani disipulugu apurichiha lau ubebeni darí lun hekeharun háganiñu lau hariñagun: “Buíngüda humá sun Herusalén lau le harufudahabei” (Adü. 5:28).

2. Ida liña labiniruni Heowá apurichihani?

² Hesusu abugurubalin hapurichihan kristiánugu lidan furumiñeti sígulu, ani lau lídehan Heowá gíbetiña gürigia ánharutiña lun uganu le hapurichihabei. Kei hénpulu lidan Pentekosutesi irumu 33, badiseitiña kéiburi 3,000 gürigia (Adü. 2:41). Sigitiña disipulugu aganwounda saragu (Adü. 6:7). Ariñagati giñe Hesusu lidan aban profesía hánharuba lan saragu gürigia lun uganu buiti lídounme lagumuhóun dan (Huan 14:12; Adü. 1:8).

3, 4. a) Ka uagu hénrengu lubéi apurichihani lidan fiu fulasu? b) Kaba wariha lidan aturiahani le?

³ Sun wagía áfaaguatiwa lun warufudun lubuidun igaburi lidan luáguti apurichihani. Lidan burí fiu fulasu ménrengunti lun ladügǘn katei le. Ladüga añahein saragu gürigia busentiña haturiahanu Bíbülia darí lun mosu lan hadügün íbirigu aban lísüta lau hiri gürigia ha agurabahatiña lun haturiahan hama. Lidan  amu burí fulasu, hénrengutimati katei le houn íbirigu lugundun míbetiña gürigia hadarirun hábiñe, ani ha adarirubaña lóuguati hebereserun lau le tariñagubei Bíbülia.

⁴ Anhein hénrengu lubéi apurichihani lidan fulasu le ñein lubéi wawinwanda, líderagubadiwa adundehani le lunbei warihini lidan aturiahani le. Warihiba ka lan hadügübei fiu íbirigu lun gayara lan hayanuhan hama bandi gürigia luma ka lan uagu lunti lubéi wasigirun arufuda aban lubuidun igaburi lidan apurichihani íbini meberesen hamá gürigia lau uganu le wapurichihabei.

5. Ka burí lénrengunga úmabei hagagibudagua saragu Gefentiña?

⁵ Eibu dan hénrengutimahali houn saragu Gefentiña hayanuhan hama gürigia hábiñe. Añahein hádangiñe gürigia ha wínwantiña lidan fulasu le ñein tubéi saragu muna íñutu lau saragu rumu o lidan aban fulasu to ñein lubéi saragu ichouruni. Gayaraati anihein lan aban óunigihati gedi le mígirunbei lun hebelurun furumiñeguarügü gürigia ha magunbirahan habaaña ni aban hádangiñe ha awinwandubaña ñein. Lidan amu burí fulasu, apurichihatiña íbirigu tidan burí muna sin ni murusun turobuli, íbini ítara, madaritiña saragu gürigia. Añahein giñe íbirigu apurichihatiña lidan burí aüdü o lidan fulasu díseti le ñein lubéi ua hamá saragu gürigia. Anihein dan aweiyasuhatiña íbirigu dise lun hapurichihan lun somu gürigia, ani dan le hachülürün madarirún hamuti gürigia lúbiñe. Anhein ligía lubéi asuseredubei woun, ka gayaraabei wadügüni lun mábürühan lan warüna luma lun wibihin lun wayanuhan hama saragu gürigia?

6. Ida liña genegegua lan apurichihani luma óuchahani?

⁶ Ariha lumuti Hesusu apurichihani kei óuchahani (Mar. 1:17). Gayaraati lidin aban óuchahati óuchaha sagü weyu sin ladigin ni aban úduraü, lau sun lira, mábürühanti larüna, aba léchudun. Sansi lumuti kaba lan oura lidin óuchaha, fulasu le ñeinba lubéi lóuchaha luma ligaburi lóuchahan. Gayaraati giñe wadügüni ligiaméme lidan wapurichihan. Ariha wamá fiu adundehani.

7. Ka gayaraabei lasuseredun ánhawa apurichiha lidan ámuñegueinarügü oura?

⁷ Sansi waméi oura. Wayanuhaba hama saragu gürigia ánhawa apurichiha lidan lóurate wadariruniña hábiñe. Súnwandan hagiribuduba lan gürigia hábiñoun íbini darü. Saragu íbirigu apurichihatiña rábounweyu o dan le aguñedeina lan ladüga subudi hamuti hadariruba lan saragu gürigia hábiñe. Dariwatimatiña gürigia lidan oura ligía hábiñe ladüga hemeraaguña lan ani busén hagía hayanuhan. Gayaraati giñe wouchun wadügün libe le ladügübei aban wéiyaali lidan afiñeni le gíribei David. Dan le barühali saragu oura apurichiha lidan aban fulasu, ábaya lagiribudun ligía luma lupaaná adaünha tidan muna to ñein lubéi ua lan ni aban gürigia. Ariñagati: “Aba taweiridun nanigi lau burí wadariruniña gürigia hábiñe dan le wagiribudun luagu libiaman wéiyaasu”. *

8. Ida luba wadügüni le lariñagubei Apurichihati 11:6 lidan wapurichihan?

⁸ Haritaguagüda lumutiwa bérusu le ídangiñebei lasagarúa aturiahani le lun mábürühan lan warüna (aliiha huméi Apurichihati 11:6). Mábürühanti larüna David, le úagubei wayanuha lidan párafu sedü. Lárigiñe saragu áfaaguni, dariti aban gürigia tidan aban muna. Aban meha gürigia le busenbei lafurendeirun tuagu Bíbülia, ani ariñagati gürigia ligía lun: “Widü irumu nau awinwanda ya, anihán furumiñeti wéiyaasu narihin aban gefenti luagu  Heowá nubenari”. Ariñagati David: “Furendeihadina dan lan wadariruniña gürigia hábiñe, saragu hádangiñe aganba hamuti uganu”.

9. Ka hadügübei fiu íbirigu lun gayara lan hapurichihan houn gürigia ha madarirúnbaña hábiñe?

⁹ Sansi waméi fulasu. Añahein íbirigu hóuchatiña hapurichihan lidan ámuñegueinarügü fulasu lun hapurichihan houn gürigia ha madarirun habaña hábiñe. Kei hénpulu, lidan burí fulasu le ñein tubéi muna íñutu to ídanboun siñá lan lapurichihóun muna tuagu muna, buiti lidin houn íbirigu lau hapurichihan ǘmadarugu lau tarufudaagüle agumeiraguagüdüni. Seremei lun ligaburi apurichihani le gayaraahali hayanuhan íbirigu hama gürigia ha madarirúnbaña hábiñe. Arihaaña saragu íbirigu hínsiñetima lan houn gürigia hayanuhan o hárügüdün agumeiraguagüdüni párükerugu, mágidurugu luma lidan fulasu le ñein tubéi bísinisi. Ariñagati Floiran, aban óunigiruti sirkuitu boliwiana: “Ñǘduntiwa apurichiha mágidurugu luma tidan burí bísinisi kéiburi ladáün aban luma ǘrüwa rábounweyu dan le míbehali heberesegun alugurahatiña. Liibe-agei dan, buiti lidin woun lidan wayanuhan hama gürigia darí lun gumese wamá burí aturiahani tídangiñe Bíbülia”.

10. Ka igaburi lunbei warufuduni dan le wapurichihan houn sun hawuyeri gürigia?

¹⁰ Sansi waméi ligaburi wapurichihan. Samina wamá áfaaguaadiwa lan saragu wéiyaasu lun gayaraabei lan wapurichihan lun somu gürigia lidan fulasu le ñein lubéi wapurichiha. Ñǘdünhadiwa lúbiñe lidan ámuñegueinarügü oura, lau sun lira, madari wamuti. Ka amu igaburi lunbei wayusuruni? Ariñagatu aban íbiri gíritu Katarína: “Aba nabürühan gárada houn ha madarirun nubaña hábiñe ariñaganéi dimurei le nasaminarubei  nariñagun houn lun hamuga darí nániña”. Ka larufudahabei le woun? Lunti lan wayusurun ámuñegueinarügü igaburi lun gayaraabei lan wapurichihan houn gürigia ha madarirun wabaña hábiñe.

11. Ka uagu mabusenrun habéi fiu gürigia haganbuni uganu le wanügübei?

¹¹ Añahein gürigia mabuseeruntiña haganbuni uganu le wapurichihabei. Saminatiña memegeirun hamá hafurendeirun luagu Bungiu ni tuagu Bíbülia. Másiñati mafiñen hamá luagu Bungiu ladüga harihini saragu asufuriruni le ubouagubei, maha hagía tun Bíbülia ladüga harihini mawinwandun hamani alidihatiña relihión le hapurichihabei. Añahein hagía bereseguñanu etenira lun hawadigimari, houn haduheñu luma lun haturobulin darí lun míchugun hamá fe gayara lan tíderaguniña Bíbülia. Ida luba wakipurun aban igaburi buiti dan le marihin hamani gürigia lisudinin uganu le wanügübei?

12. Ida luba wadügüni le lariñagubei Filipuna 2:4 lidan wani ministeriu?

¹² Arufuda waméi berese wamá hau gürigia. Saragu gürigia ha meha mabusenrunbaña haganbuni uganu le wanügübei ánhatiña lun lárigiñe ladüga arihatiña berese lan gürigia le ayanuhabei houn hau (aliiha huméi Filipuna 2:4). Kei hénpulu, ariñagati David, le buga uágubei wayanuha: “Anhein ariñaga somu gürigia mabusenrunti lan laganbuniwa, aba wareidunun Bíbülia o agumeiraguagüdüni” ani aba wálugun wasubudiruni ka lan uagu lasaminara ítara. Ariha hamuti gürigia dan lan le lebereserun gürigia hau. Gayaraati habulieiduni le wariñagubei, chóuruti mabulieidun habéi lan le wadügübei lun hasandiragun houngua buidu. Íbini anhein mabusenrun habéi wayanuha, lau wagaburi luma le wadügübei warufudubei houn berese wamá hau.

13. Ida luba wadügün lun ménrengun lan uganu le wanügübei houn gürigia?

¹³ Aban igaburi lun warufuduni berese wamá hau gürigia dan le wapurichiha, lau wasansiruni le wariñagubei lun ménrengun lan luma lun línsiñedun uganu houn. Kei hénpulu, arihatiwa san somu katei le arufudubei gasaanigu lan gürigia? Háfuga busén hamá agübürigu adundehani tídangiñe Bíbülia lun hagüriahaniña hasaanigu o lun buídutima lan habagari keisi iduheñu. Ánheinti wariha hanarime lan tachoururuniwa muna? Gayaraabei wayanuha luma tabureme muna luagu machouruni le ubouagubei, luma lun wafuranguagüdün lun lagumuchaguba lan turobuli le lun súnwandan. Lidan furumiñeguarügü kesi, danme laganbuniwa somu gürigia, áfaagua wamá lun gunfuranda lani gayara lan tíderaguni Bíbülia. Katarína, to uáguboun wayanuha lidan párafu 10,  ariñagatu: “Saminatina ida liña lan líderagunina inarüni”. Ítarati ayanuhatu lau ichouruni, ani ariha hamuti gürigia lira.

14. Según le lariñagubei Ariñawagúni 27:17, ida liña lahuudun wani paaná woun lidan apurichihani?

¹⁴ Sagá wamá buiti lídangiñe ídemuei le híchugubei amu. Lidan furumiñeti sígulu, arufudaha lumuti Pábulu ligaburi lapurichihan luma larufudahan lun Timotéu, ani ínchaha lumuti lun lafalaruni luma larufuduni houn amu (1 Ko. 4:17). Ítara kei Timotéu, gayaraati giñe wafurendeirun saragu lídangiñe ligaburi hapurichihan íbirigu ha lídanbaña damuriguaü (aliiha huméi Ariñawagúni 27:17). Ariha waméi lani aban íbiri gíriti Shawn hénpulu, luagu meha aban dan prekursoru meha ligía lidan aban aüdü le ñein habéi saragu gürigia ha gúndaabaña tau hani relihión. Ka íderagubalin lun mábürühan lan larüna? Ariñagati: “Sagü gayara lan, súnwandan meha gani nan paaná lidan apurichihani. Dan méhati le wóudiña lan tidoun amu muna meferidiruntiwa meha dan, ayanuhatiwa luagu ida luba lan wabuiduragüdüni ligaburi warufudahan. Kei hénpulu, aba burí wayanuhan luagu le wariñagubei lun somu gürigia lidan apurichihani, ayanuha wagía luagu le gayaraabei wariñaguni ánheinya lariñaga somu gürigia ligiaméme woun”.

15. Ka uagu súdini lubéi lun wafurieidun dan le woudin apurichiha?

¹⁵ Amuriaha wamá ídemuei luma Heowá. Ságüme wáfuridun apurichiha, adüga wamá aban furíei lun ladundehaniwa Heowá. Sin lídehan lani sífiri sandu le gabafubei, siñabei wadügün ni kata (Sal. 127:1; Luk. 11:13). Danme wamuriahan ídemuei luma Heowá írida waméi le wabusenrubei. Kei hénpulu, amuriaha wamá luma lun líderaguniwa adarira furumiñeguarügü gürigia ha busentiña haganbun. Lárigiñe ru wamá luéigiñe wóubadina, ani apurichiha wamá houn sun hawuyeri gürigia ha wayaraatiña adarira.

16. Ka uagu mégeiwa lubéi waturiahan wábuguarügü lun buidu lan lidin woun lidan apurichihani?

¹⁶ Sagá wamá dan lun waturiahan wábuguarügü. Ariñagatu Lererun Bungiu: “Ítara luba hiabin lun hasubudiruni le lugundanbei Bungiu hun le buídubei, le úaraguabei” (Rom. 12:2). Éibutima wachoururuni inarüni luagu Bungiu, chóurutimabei wasandiragun woungua lun wayanuhan luagu lidan apurichihani. Ariñagatu Katarína: “Lüha níchugun fe lunti lan nederebudagüdüni nafiñen luagu fiu arufudahani tídangiñeti Bíbülia. Ligíati aba lubéi naturiahan hulili luagu burí katei le achoururagüdübalin anihein lan Bungiu, luagu Lererun lan Bungiu Bíbülia luma luagu anuhein lan aban óundaruni to ayanuhaboun luagu uguñe weyu”. Ariñagatu Katarína adüga lan taturiahan tábuguarügü lun lederebugudun tafiñen luma lun hínsiñetima lan apurichihani tun.

17. Ka meha uagu larufuda Hesusu aban igaburi buiti lidan lapurichihan?

¹⁷ Buiti meha igaburi le larufudubei Hesusu luagu apurichihani ani sigiti apurichiha íbini añahein lan meha gürigia mabuseeruntiña haganbuni. Ka san uagu ladügei? Ladüga subudi lumuti meha megei hamá gürigia haganbuni inarüni ani busenti meha líderagun saragu gürigia. Subudi lumuti meha giñe ñéinbaña lan buga gürigia ha mabusenrúntiña haganbuni uganu luáguti Larúeihan Bungiu furumiñe, ani lau lanme lásügürün dan hánharuba lan lun. Ligía meha asuseredubei houn liduheñu. Ǘrüwa irumu dimí le laubei Hesusu apurichiha, úati meha ni aban hádangiñe lamulenu adügaguatiña houngua lánime disipulu (Huan 7:5). Gama lumoun, lárigiñebei láguyugun, aba hadügagun houngua kristiánugume (Adü. 1:14).

18. Ka san uagu awanhagua lubéi apurichiha?

¹⁸ Ibidiñeti woun kaba lan ánhara lun inarüni  tídangiñeti Bíbülia le warufudahabei. Añahein gürigia barüti saragu dan lun hánharun lun uganu le wapurichihabei lau aban lubuidun igaburi. Íbini ha mabusenrunbaña haganbuni, ariha hamuti lubuidun wagaburi, ani másiñati lau lanme lásügürün dan “híchugun uéiriguni lun Bungiu” (1 Fe. 2:12).

19. Según 1 Korintuna 3:6, 7, ka lunbei wasubudiruni?

¹⁹ Íbini wagía lan ábunagubei ani áturagua wagía, lunti wasubudiruni Bungiu lan “aweiridagüdübalin nadü” (aliiha huméi 1 Korintuna 3:6, 7). Ariñagati aban íbiri etiopíana gíriti Getahun: “Lóugiñe 20 irumu, áurügüñein meha Gefenti lidan aban fulasu le ñein lubéi lougua lan lapurichihóun. Guentó añaheinhaña 14 apurichihatiña ñein. Badiseihaña 13, nani weiriou hama ǘrüwa wasaanigu haganagua. Chülütiña kéiburi 32 gürigia lidoun adamuridaguni”. Gúndaati Getahun lau mabuchadun lan luagu apurichiha, agurabati lau gurasu lun lachawahaniña Heowá gürigia haruma tanigi tidoun lóundarun (Huan 6:44).

20. Ida liña ítara waña lan kei sétanu gürigia ha esefuhabaña ibagari?

²⁰ Gebegiti habagari sun gürigia lun Heowá. Ru lumuti lubuidun chansi woun lun wídehan luma Lisaani lidan hóundarawagun saragu gürigia hadoun lumutuniña lubaragiñe lagumuchun ubóu (Ahéu 2:7). Dan le wapurichihan, ítara waña kei sétanu gürigia ha ounahóubaña esefuha habagari gürigia ha erederubaña dáüwañu lidan lagadabugiñe dübü. Íbini fiúrügüñanu lan esefuhatiña, esefuraña gürigia, súdiniti hawadigimari súngubei. Ligiaméme giñe asuseredubei lidan apurichihani: ibidiñewati átiribaña lan gürigia esefura lídangiñe ubóu le lábugiñebei lubafu Satanási, íbini ítara, gayaraati layusurun Heowá furumiñeguarügü wádangiñe lun líderaguniña. Ariñagati Andreas le awinwandubei Boliwia: “Subuditi nun, dan le lan lasubudiruni aban gürigia inarüni ani badisei ligía, susereti seremei áfaaguni le hadügübei saragu íbirigu”. Ligíati áfaagua wamá lun warihini apurichihani lau aban lubuidun igaburi. Ánhawa adügei, labinirubadiwa Heowá ani líchuguba apurichihani saragu ugundani woun.