1. Sitih inlahen ök Yēsū nö hachōten yik haköptöre, ngaich sitih inlahen cha-a? (Ngëichköm lama uk nyat.)

HĒ YĒSŪ misī nö ing panam öt kūönngöre ellōn anga-aṅ nö ahangköm tölöök inhānga. (Yôh. 4:35, 36) Ṙamlōn yik mahaköp nö ahangköm tölöök inhānga hē Yēsū nö ṙòngmö in cha. (Lūk. 10:1, 5-11, 17) Hē Yēsū pöri nö fëliyö, kūönngöre ellōn ngaich cha-a. (Yôh. 16:32) Unôichrit Yēsū pöri nö chōholre nö ṙa-ang im kinpaha, havan tö inlahen re hēk cha-a nö ahangköm tölöök inhānga. Uroh yik tö kunyaha elmat nö ngö ṙô: “Yĕh meuk! ngaich yin yih tööḵöl tī tö Yerūsalem, tö ngam ṙô yīö haköphöti.”—Inl. 5:28.

2. Kūö yòh öi mihôiṅ vënyen Yāvē nö hakôlò ngam la-en inhānga?

² Hachōten yik Kristīön ang Yēsū nö ahānga ik raneh senchurī, ngaich hakôlöng ṙô ngam la-en cha tö Yāvē. 3,000 ṙôken yik kamë ngam vinôkö ik Pentikòstē. (Inl. 2:41) Höng iṙūöhöröön sanīöpö ṙôken cha-a. (Inl. 6:7) Ngö ṙô Yēsū, söl mana-angkūö ngih panam min ngam tölöök inhānga nö ahangka ing mana-aṅ sakamö.—Yôh. 14:12; Inl. 1:8.

3-4. Kūö yòh öi mihôiṅ hēṙu kihngen öi ahangköm tölöök inhānga, asuh nup haköplö hī min in ngih ātiköl?

³ Ōt nup panam chūök hī lööṙen öi ahānga. Kūö yòh? Pön hō yip tarik nö hang, hòṅ haköp mat Paipöl inrē! Ōt pöri kamngö chūök më pöplisör nö kihngen nö ahānga, pön öt ōt më tarik nö i patī, öt ööire nö hang, hēk haköp mat ngam Paipöl inrē.

 ⁴ Yěn sō yip tarik nö hang ngam tölöök inhānga nö i panam meh ngaich hòṅ sitih inlahen më-eṅ? Yöölen in min tö minë haköplö hī in ngih ātiköl. Yěi haköp inlahen yip töheuveū-en holre nö vë-ekūö tarik nö el fīlt. Yöölen min inrē ayī-ö öi höng iṙūöhen ahānga yěn hang ṙô hī yip tarik hēk yěn pòrô nö sō nö hang.

5. Asuh nup kanihngen hī im inhangköm tölöök inhānga?

⁵ Höng kihngen in töngamuh vë-eny nang yip tarik töm tölöök inhānga kūö cha nö sō nö hang hēk öt uroh inrē cha-a nö iyöng patī re, marôvat chūök inrē nup patī tö höö. Yěi chuh in nup patī ngaich öt ōt cha-a. Yěn ngatī minë kanihngen nö ip kamtö chūök meh, um ṙangenre öm ahānga. Sitih inlahen öm min yěm hòṅ teūngen öm vë-ekūö yip tarik?

6. Sitih inlahen öng ngam inhangköm tölöök inhānga nö sā inlahen kinë-e kāḵ?

⁶ Ngö ṙô ang Yēsū, Sā ṙēngen inlahen kinë-eṅ kāḵ an ngam inhangköm tölöök inhānga. (Māk. 1:17) Pī-a ṙung yip kamë kā nö ṙōl höiny sumkam nö kēḵ kā nöng öt pò-òvö. Sön cha-a nö öt ṙangenre. Tahëng tahëng tö inlahen re pöri cha-a nö kēḵ kā, mihôiṅ nö harīkngö ṙē-ěnyre, kamtö chūökre yěn hòṅ pōi höny tö kāḵ. Hòṅ ngatī inlahen ayī-ö yěi ahānga, hòṅ hī pōyen vahë-eny nang töm tölöök inhānga. Ta-a chěi töi ngëichkö tumkangen u.

7. Asuh öp min ṙòng ngam inlahen hī yěi lööngö ṙētak öi chuh in yip tarik?

⁷ Ngëichkö tölöng ṙētakre chuh in yip tarik. Yěn löng min ngam ṙētak hī öi chuh in cha, ngaich teūngen min öi meuk kūö cha. Pōyen yip prötör sistör ma-ahānga hē el harap pön hē e më tarik nö ōtren, öt sānngen inrē. Hang ṙô ngòh minṙönylen ang Tēvit nö vë-eny inlahenre. Ngö ṙô anga-aṅ, höng rahëichtaṙen āyö ahānga töp holröön chu, ngaich havan röönre ai chuh in yip tarik tö sō sin nö hang ik raneh van chu. Ngö ṙô anga-aṅ, “Pingang chū-ö öich meūkö cha nö i patī, hō inrē cha-a nö hang.” *

8. Sitih inlahen öi mihôiṅ kēḵkö kaha ngam inlēnö im Mumkahten 11:6 yěi ahānga?

⁸ Ötkô in ṙangenre. Fēḵlöng in töm haköp hī tö hī ötkô ṙangenre. (Vë-evkūö Mumkahten 11:6.) Ngatī ang Tēvit ngam haköp inlahen hī taheui nöng öt ṙangenre. Teūngen anga-aṅ töm tarik im töhěng patī im chūök ò sin nö ṙōlvan nö öt teūngen tö ò. Töyal ngam tarik nö haköp mat Paipöl, ngö ṙô ngam tarik, “Ngaich chin öich hevhöre samyeūheu rò-òten öich ihih, öl öich hěngtak yamihka tö Vamënyen Yāvē.” Ngö ṙô ang Tēvit, “Ngaich chin akahalōn tö hī yěi teūngen tö më tarik öi i patī ngaich öthō cha-a nö sō nö hang ngam tölöök inhānga.”

9. Sitih inlahen yip rīkre pöplisör nö ahānga yěn öt teūngen tö yip tarik nö i patī?

⁹ Ngëichkö tahëng kamtö chūökre ahānga. Yěn öt teūngen yip pöplisör tö yip tarik nö i patī, mihôiṅ cha-a nö harīkngö chūök re nö ahānga. Sā ngam istrīt vitnesing, yinūsöm litrēchör kāt inrē. Anū-ö tö söö inlahen hī inup chūök hī sō-oiṙen öi chuh kūö patī ahānga. Pöi teūngen tö yip tarik töt taneūngen hī öi i patī. Ĕhten inrē nö hō cha-a nö hang yěi el pāk, el pachār  hēk ichūök tökiröng chūök mi-inyīha öi vë-ekūö cha. Ngö ṙô ngam töhěngtak sörkit ovörsīör aṅ Poliviā ang Floiran: “Chuh el mārkět īhö hēk minë tökiröng chūök mi-inyīha ihôi ngam tö hěng köiny ṙô töm tö lūöi köiny ṙô tö harap, pön hē e më mi-inyih nö öt yaha ṙôken. Öt kihngen öi vë-ekūö cha, teūngen inrē öi rěhlörit Paipöl istötī.”

10. Asuh nup kò-òren tö kalahtuṙen inlahen hī öi vë-ekūö yip tarik yēḵ hī öt teūngen tö cha öi i patī?

¹⁰ Kalahten nup tahëng inlahen re vë-ekūö yip tarik. Ngaich sitih inlahen yěm ṙōlvan öm chuh in yip tarik pöm hòṅ meuk kūö cha lang? Öt teūngen pöri tö cha. Kalahten nup tahëng man inlahenre öm vë-ekūö cha. Ngö ṙô ang Katarinā, “Yēḵ chu öt teūngen tö yip tarik öich i patī, ngaich kūich chitri cha chū-ö. Keuheūtlö nup ṙô chū-ö nö kūichö nup ṙahônyö chu öre yēḵ chu öich meuk kūö cha.” Ngam haköplö hī in ngam kanānö hī tö hī hòṅ tahëng tahëng tö inlahenre öi ahānga.

11. Kūö yòh yip rīkre tarik nö öt hòṅ hang ṙô hī?

¹¹ Yěn meuk në kanihngen tarik ngaich kūönngöre ṙinatö-ellōn cha nö im Tēv. Ōt tö sō nö hang ṙôm Paipöl, pön meuk inlahen yip ameūköre nö mahaköp tö ṙôm Paipöl nöng kēḵken nup la-en sahō-o ngam Tēv. Ōt in cha tökihngen nö el nup mikūönöre, öt kinmānu hēk nup tahëng kanihngen, ngaich öt yanööluṙen cha-a tö lōnre yěn haköp mat ngam Paipöl. Lökten cha nö sō nö hang  ṙô hī. Sitih inlahen öi min haköpkö ngam ṙanamlōnre öi im inhānga yěn ngatī inlahen yip tarik?

12. Asuh öng ngam inlēnö hī im līpöre Filipī 2:4 yěi ahangköm tölöök inhānga?

¹² Hòṅ kô-en chumkūöṙen in tö yip tarik. Yěi rěhnyôre vë-eny nang yip tarik, lohten min cha-a nö sō nö hang ṙô hī. Yěn meuk chumkūöṙen hī pöri min cha-a öi vë-eny nang cha, ngaich öt hō min cha-a nö öt hangihtö ṙô hī. Yěi milēḵṙen inrē tö cha. (Vë-evkūö Filipī 2:4.) Ngö ṙô ang Tēvit ngam ahang inlahen hī taheui, “Yěn vë-eny re ṙung yip tarik nö sō nö hang, ngaich höng ilööṙen öi chaphöt öp Paipöl re tö nup līpöre re öi el öp pëk re, öt rēhěn öi hòṅ mikahtö kūöre töp lāinyngen cha nö sō nö hang ṙô hī.” Öt köplōn yip tarik tö nup vahënyö hī, höng ngam chumkūöṙen hī tö cha kanööpölōn cha. Lökten, yěn sō cha-a nö hang, ngaich höng hòṅ vai ngam mufē hī öi in cha.

13. Hòṅ asuh nup öre ṙô hī öi vë-ekūö yip tarik öi el fīlt, ngaich hang ṙô hī min cha-a?

¹³ Yěn sā lōn yip tarik nup vahënyö hī, ngaich hang ṙô hī min cha-a. Tö sā ngih öre, yěi sölta ip patī ngaich meuk nup nyam yip nyīö ayī-ö, ngaich mihôiṅ öi ṙô tö nup kanihngen vē inyööngö nö haruklö kūönre, hēk löktö yanīhim ṙanamlōn nö el ngam mikūönö. Yěi meuk nup këmrā nö lā kūö nup patī, mihôiṅ öi ṙôtö sanīöplö në ötlanöökö nö ing panam, vënyö në kanihngen inrē nö kē-ěyö min nö ngaich. Öt vaichngö ang Katarinā ngam ahang inlahen hī taheui, tö ngam Paipöl nö vailöre tī töm tinrīken ò, lökten anga-aṅ nö ngatī inlahen ṙô yěn vë-ekūö yip tarik nö el fīlt, ngaich hang ṙô ò cha-a. Ngaich öthō min cha-a nö öt hang ṙô hī inrē.

14. Sā ṙô ngam Inchōḵoṙô 27:17, sitih inlahen öi yöölen öi löktö i heuneu-en yip holröönre yěi ahānga?

¹⁴ Yöölen löktö i heuneu-en yip tahëng. Hameukhö mat Timôtī ang Pôl tö inlahen re nö ahangköm tölöök inhānga, ngaich töl ṙô ò anga-aṅ nö asīnken u, nö hayööken yik tahëng. (1 Kòr. 4:17) Ngatī yanöölen ayī-ö kò-òren tö nup heuneu-en yip holre aṅ ngam māṅ. (Vë-evkūö Inchōḵoṙô 27:17.) Ngëichköm inlahen prötör Shôn. Hē ò nö painīör nö im chūök më töt yal nö hang ngam tölöök inhānga pön tölēn tö tinlöökenre. Sitih inlahen anga-aṅ nö köptī ngam ṙanamlōnre? Ngö ṙô anga-aṅ, “Yēḵ chu hōluröön töp holre öich ahānga, ngaich  hayööken höö āyö ai chöh sanapṙô yip tarik vahë-ekūö ai, yě-āi kiröönngöre ai ṙāngö nup patī cha. Kô-en nö sīöp ngam heuneū-euṙô ai vë-ekūö yip tö sō nö hang.” Angū-ö lāinyngen ngam ṙanamlōn chu nö köp.

15. Kūö yòh öm hòṅ örheūheu havëkö hinòlṙenre öm in Yāvē yěm ahangköm tölöök inhānga?

¹⁵ Havëkö hinòlṙenre man in Yāvē. Hòṅ örheūheu man havëkö kūö Yāvē tö inchōḵo kūöre im inhangköm tölöök inhānga. Pöi ötkô la-evṙen yěn hö-öv ngam töhet fanöinylö ò nö in hī. (Sal. 127:1; Lūkös 11:13) Lökten man keuheūtnyö ṙô re öm vë-eny nang ò tö nup ṙô ellōnre. Hòṅ ò min nö hachō-okūö meh. Ngaich yēḵ meh havëkö hinòlṙenre öm chöh yip tö yāchö ellōn, ngaich un hěng hang tak yip tarik töt vënyu nang tö meh ip chūök meh min öm ahānga.

16. Asuh nup min yanöölen hī yěi kahngenre haköpmat Paipöl?

¹⁶ Kēnyö ṙētakre man kahngenre öm haköp. Ngö ṙô an ngam Ṙô ngam Tēv nö in hī: “Hòṅ yīö hameukten ngam tölöök tö hōḵovö inrē, tö ngam tö teungten inrē lōn ngam Tēv.” (Rōm. 12:2) Yěi akahakūö min tö ngam Tēv, ngaich öt vöö min öi ahangkö ngam tölöök inhānga. Ngö ṙô ang Katarína: “Akahngen ngam ṙinātö ellōnre chū-ö nö öl nö ngön öich in minë raneh lô hī haköpmat Paipöl. Lökten öich kahngenre haköp pöich hòṅ mikahtö kūöre töm vamī-il në taṙòkhöre nö ōt, tö ngam Paipöl inrē nö Ṙô ngam Tēv, töm söngkötön ò inrē nö ōt nö hachō-ovkūö tö ò.” Ngö ṙô ang Katarína, ngönlöre ngaich ngam ṙinatö-ellōn chu, sīöp inrē ngam ṙanamlōn chu öich im inhangköm tölöök inhānga pô chu kahngenre öich haköp.

17. Kūö yòh ök Yēsū nö öt ṙangenre nö im la-en inhānga?

¹⁷ Hē Yēsū nö ahangköm tölöök inhānga misī. Pōyen yik tö sō nö hang ṙô ò. Sön anga-aṅ nö öt ṙangenre. Kūö yòh? Pön akahalōn tö yik tarik nö ötkô nö öt hang ngam kanô-en ngam pūlngö, hòṅ kētö ṙētak cha anga-aṅ nö hō-o ngam kanô-en. Meuk inlahen yik aṅ patī ò. Lūöi samyeūheu ròngti anga-aṅ nö ahangköm tölöök inhānga, sön nö öt hěngtak ṙamatö-ellōnre nö in yik kahëm ò. (Yôh. 7:5) Unôichrit ngam invanlö ò pöri cha-a nö kaheuktu nö Kristīön.—Inl. 1:14.

18. Kūö yòh öi ötkô ṙangenre öi ahānga?

¹⁸ Hö-ö in akahakūö töp tö hō min nö haköp, ngaich kētöre nö löklōn Yāvē. Pön ōt yip tö ilööṙen nö kētöre ngaich ōt töt ilööṙen nö hō-en ngam kanô-en. Ngaich in ṙung meuk yip tö sō sin nö hang ngaich yěn meuk vanāyö tinrīken hī cha-a ngaich yihtöre cha-a nö “ha-öiny ngam Tēv.”—1 Pīt. 2:12.

19. Sā ṙô ngam 1 Kòrin 3:6, 7, asūp tö hòṅ kanöplōn hī im la-en inhānga?

¹⁹ Kalēḵ alaha in ṙung öi ahangköm tölöök inhānga, haköptö yip tarik inrē töm kanô-en öthō pöri yip tarik nö yihtöre nö haköp ngam kanô-en yěn öt lōn Yāvē angū-ö. (Vë-evkūö 1 Kòrin 3:6, 7.) Ngö ṙô ang Kōtahun ök prötör hī aṅ Itiōpiā: “Lohten chū-ö pōyen tö tö 20 samyeūheu höng hěngtak öich Vamënyen Yāvē öich ip panam re. Ngaich pöri töngamuh öi 14 tak ṙôken pöplisör. Lūöi sīön tak yin ngaich më kamë ngam vinôkö nö kaheuk hötre öp pīhö chu tö yip tö lūöi tak kūön chu. Ngaich in  ṙung öi 32 ṙôken öi mīting.” Ṙamlōn ang Kōtahun pön öt ṙāngenre nö im inhānga hanöng sā tī Yāvē nö tūökten më tarik nö haköp ngam kanô-en nö el ngam söngkötön ò—Yôh. 6:44.

20. Sā ṙēngen yòh öng ngam la-en inhangköm tölöök inhānga?

²⁰ Pōiṙāi nômö tarik nö meūkö tö Yāvē. Tökiröng inrē nö minlēḵken hī tö ò öi holṙen ngam kūön ò im inmūlö tarik nö haköp ngam kanô-en urēhěkūö öp manāngen nö yih. (Hak. 2:7) Sā ṙēngen lamaklö nômö tarik in ayī-ö yip tö lōngti kupòk. Töng la-evṙen ayī-ö öi el ngam tīm öi kamëhöt yip tarik nö i kuyāyö, yip tö lōngti nö elmai. Pôrò cha-a nö öt ṙōltit tak, sön minë nômö cha nö pōiṙāi. Ngatī inlahen ngam inhānga nö lamaklö nômö yip tarik yěn hāngö e min cha-a. Öt akahkūö ayī-ö inrē tö ṙôktit yip tö hôṅ hang ngam kanô-en nö ing panam ngam Sī-ö. Höng ngamuh mikahkūö hī tö Yāvē nö mihôiṅ nö aṅtī ten tö hī nö kēnyen cha. Ngö ṙô ang Antrīās ngam aṅ Poliviā, “Yěn hěngtak öp tarik yamihtöre nö haköp, ngaich kēḵ ngam vinôkö, ṙòng kumlēḵ akaha yip töpōyen angū-ö nö meūkö tö chu.” Yēḵ hī min ngatī mufē öi im inhānga. Öthō min Yāvē nö öt kētö inkôlò ngih la-en hī ngaich teūngen min inrē ayī-ö töm tökô-en ṙanamlōn.