EKICWEKA C’OKWEGA 20
Gumizamu kukunda omurimo g’okuburira
‘Ogume obibe embibo kandi oreke kugwisa omukono.’—MUB 11:6.
ECESHONGORO CA 70 Sherura Abashemereire
EMPINYE *
Yesu ku yamazire kutemba omu iguru, abegi beye bakaburira n’amani omuri Yerusalemu n’omu bindi bicweka bine obumanzi (Reba paragurafu ya 1)
1. Ni kiha cokureberaho eki Yesu yaterireho abakurasi beye, kandi shi ni enki eki bakozire? (Reba ekishushani c’aha kishembeso.)
YESU akaba nakunda omurimo g’okuburira obu yabire acari omu nsi kandi nayenda ngu n’abakurasi beye bagukunde. (Yoh 4:35, 36) Obwire obu Yesu yabire acari hamwe n’abegi beye, bakaba nibakunda omurimo g’okuburira kandi bagukora n’amani. (Luk 10:1, 5-11, 17) Konka ku yamazire kufa tibaragumizemu kugukunda. (Yoh 16:32) Yesu ku yamazire kuzoka akabahiga kuta omutima aha murimo g’okuburira. Kandi ku yamazire kuza omu iguru, bakaburira n’amani catuma abangi babo babatonganisa bati: ‘Mbwenu reba mwijwize Yerusalemu okwegesa kwanyu.’—Byak 5:28.
2. Ni bata oku Yehova yahire omugisha omurimo g’okuburira?
2 Yesu akebembera omurimo ogu Abakristo b’omu kinyigana c’okubanza bakozire, kandi Yehova akaguha omugisha. Ecokureberaho: Ahari Pentekote y’omu mwaka gwa 33 B.Y., abantu abari kuhika aha 3000 bakabatizibwa. (Byak 2:41) Kandi abegi bakaguma bari kweyongera. (Byak 6:7) Konka nabwe, Yesu akaba yagambire ku omurimo g’okuburira gwabire gurije kweyongera, gukahika ahari byingi omu biro by’aha muheru.—Yoh 14:12; Byak 1:8.
3-4. Ni biha bizibu ebi bamwe bari kubasa kubugana na byo omu murimo g’okuburira, kandi shi ni enki eki twaza kushwijuma omuri eki kicweka?
3 Twena nitugezaho kuguma turi kukunda omurimo g’okuburira. Omu mahanga agamwe eco corobi. Ahabw’enki? Ni ahabw’okuba abingi nibashemerererwa kwega Bibuli kandi oshanga abingi ari bo abari kutegereza ow’okubegesa Bibuli. Konka omu gandi mahanga noshanga ababurizi bari kutunga ebizibu omu murimo g’okuburira. Abantu noshanga bari kuba batari omu ka, kandi n’abari omu ka oshanga batari kukunda kwega Bibuli.
4 Waba otwire ahu muri kubasa kubugana ebizibu omu murimo g’okuburira, obuhabuzi obu twaza kushwijuma omuri eki kicweka nibwija kukukwasa. Twaza kushwijuma eki bamwe bakozire kikabakwasa kubona abantu bingi omu murimo g’okuburira. Nambwenu, twaza kushwijuma enshonga ahabw’enki tushemerire kugumizamu kukunda omurimo g’okuburira n’obu abantu bakuba bari kutuhurira ninga shi batari kutuhurira.
GUMA ORI KUKUNDA OMURIMO G’OKUBURIRA N’OBU KUBONA ABANTU CAKUBA KIGUMIRE
5. Ni biha bizibu ebi ababurizi bingi bari kubugana?
5 Ababurizi bingi nikibagumira kushanga abantu omu maka gabo baba bari kuburira. Ababurizi bingi batwire omu kacweka aku ori kushangamu amaju mingi gasibire, ni okugamba ahu otari kubasa kutahamu otine oruhusya. Noshanga hariho omurinzi otari kwikiririza omuntu wena kutahamu nyineka yaba atamuhire oruhusya. Abandi baburizi noshanga bari kuburira aha nju n’enju hatine ekiri kubateganisa, konka bashangayo abantu bace. Nambwenu, abandi baburizi nibaburira omu byaro ninga shi omu tucweka twa hare otutwiremu abantu bace. Abo baburizi nibabasa kutambura engendo ndingwa bari kuza kwegesa omuntu obumwe batamushange omu ka. Twaba turi kubugana ebizibu nk’ebyo titushemerire kuhwamu amani. Ni enki ekiri kubasa kutukwasa kwehanganira ebyo bizibu kandi tukagumizamu kukunda omurimo g’okuburira?
6. Ni bata oku ababurizi bari nk’abarobi?
6 Yesu akageranisa omurimo g’okuburira n’omurimo g’okuroba ebyenyanja. (Mak 1:17) Hariho abari kumara izoba ryona bari kuroba batakwate ecenyanja na kimwe. Konka tibari kuhwamu amani. Nibahindura obwire, omwanya n’oburyo obu bari kurobamu. N’itwe nitubasa kukora empinduka nk’ezo omu murimo g’okuburira. Reba obu buhabuzi.
Waba ori kuburira ahu abantu batari kukunda kuba bari omu ka, guma ogezeho kuzayo omu bundi bwire, obarondere omu ndijo myanya, ninga shi okorese obundi buryo bw’okuburira (Reba paragurafu ya 7-10) *
7. Ni enki ekiri kubaho ku turi kuburira omu bwire obutari kushushana?
7 Gezaho kuburira omu bwire obutari kushushana. Nitwija kutunga abantu bingi b’okuburira twaburira omu bwire obu bari kuba bari omu ka. N’obu bari kuba batari omu ka nibahika aho bataha. Benetata na banyanyazi abingi nibakira kuburira omu ihangwe ninga shi omu mwebazo ahabw’okuba ni bwo bari kushanga abantu bingi omu ka. Nambwenu ni bwo nyineka ari kuba aturize kandi ayetegwire kuganira. Ninga shi nobasa kukuratiza ebi omuzehe ori kwetwa David yagambire. Akagamba ku omu mwebazyo, we n’owu bari kuba bagenzire hamwe bari kugaruka kuburira abu batashangayo. Akagamba ati: “Nintangara ku ndi kugarukayo nkashanga abingi bari omu ka.” *
Waba ori kuburira ahu abantu batari kukunda kuba bari omu ka, guma ogezeho kuzayo omu bundi bwire (Reba paragurafu ya 7-8)
8. Ni bata oku turi kubasa kukuratiza ebiri omu Mubuurizi 11:6 omu murimo g’okuburira?
8 Titushemerire kuhwa amani. Ni co ecahandikirwe kikuru c’eki kicweka kiri kutugambira. (Shoma omu Mubuurizi 11: 6.) David owu twaba tugambireho na we tarahwire amani. Hine eka emwe eyi yabire atari kukunda kushangamu abantu, konka bwanyima yija kubashangamu. Nyineka akikiriza kwega Bibuli, yagira ati: “Emyaka munana yona eyi namara aha ni bwo bw’okubanza obu nabona Omuhamya wa Yehova owange!” David akagamba ati: “Nyowe eki nayerebire, bwanyima ku ori kushanga abantu omu ka nibaba bari kwendera kimwe kuhurira obutumwa burungi obu turi kuburira.”
Waba ori kuburira ahu abantu batari kukunda kuba bari omu ka, guma ogezeho obarondere omu ndijo myanya (Reba paragurafu ya 9)
9. Ni bata oku abamwe babwine abantu abu kigumire kuburira?
9 Gezaho kuburira omu myanya etari kushushana. Kugira ngu ababurizi bakizeho kuburira abantu abu kigumire kubona, bakahindura omwanya ogu babire bari kuburiramu. Ecokureberaho: Kuburira omu mihanda n’okukoresa otugari tw’ebitabo bukaba oburyo burungi bw’okuburira abantu abatwire omu myanya eyi kubaburira aha nju n’enju kitari kwikirizibwa. Eco nikikwasa ababurizi kuburira abantu abatwire omu myanya nk’eyo. Nambwenu ababurizi bingi bakashanga abantu bari kukunda kuganira ninga shi kwikiriza ebitabo byitu bababuririra ahu abantu bari kuhumurira, omu butare ninga shi omu ndijo myanya eyi bari kushuburiramu. Floiran, omureberezi ori kutayayira ebibina akagira ati: “Nitukunda kuburira omu butare ninga shi omu myanya eyi bari kushuburiramu ahagati ya shaha mushanju na shaha mwenda obu abashubuzi bari kuba batine emirimo myingi. Nitugira ebiganiro birungi kandi tutandika kwegesa abantu Bibuli.”
Waba ori kuburira ahu abantu batari kukunda kuba bari omu ka, guma ogezeho okorese obundi buryo bw’okuburira (Reba paragurafu ya 10)
10. Ni enki ekindi eki ori kubasa kukora kugira ngu otunge abantu b’okuburira?
10 Gezaho kukoresa oburyo obutari kushushana bw’okuburira. Reka tugire ngu okagezaho kutayayira omuntu emirundi myingi. Okamutayayira omu bwire obutari kushushana, konka na bwo tokamushangagaho omu ka. Mbehi hariho obundi buryo obu ori kubasa kuburiramu omuntu nk’ogo. Katarína akagamba ati: “Nimpandikira amabaruha abantu bona abu ntari kushanga omu ka ndi kubagambira ebi nabire nshemerire kubagambira turi kurebana.” Eco nikitwegesa ki? Gezaho kukoresa oburyo bw’okuburira obutari kushushana, oburire buri omwe omu kacweka kawe.
GUMIZAMU KUKUNDA OMURIMO G’OKUBURIRA N’OBU ABANTU BAKUBA BATARI KUKUNDA EBI TURI KWEGESA
11. Ahabw’enki abantu abamwe batari kuhurikiza obutumwa obu turi kubagambira?
11 Abantu abamwe tibari kukunda obutumwa obu turi kubaburira. Nibareba batari kwetenga kumanya ebiri kukwata ahari Ruhanga, ninga shi eby’omuri Bibuli. Tibari kwikiriza Ruhanga ahabw’okuba nibareba ensi eyijwiremu okubonabona. Tibari kwenda kuhurira ebiri kugambwa omuri Bibuli ahabw’okuba abebembezi b’amadini abari kugikoresa nibakora ebikorwa bibi. Abandi omutima nibaba bagutire aha mirimo yabo, aha maka gabo, ninga shi aha bibuzo byabo kituma batareba omugasho gwa Bibuli. Mbwenu shi, ni bata oku turi kubasa kuguma tushemerirwe n’obu bakuba batari kuhurikiza obutumwa obu turi kubagambira?
12. Ni bata oku ebigambo ebiri omu Bafilipi 2:4 biri kubasa kutukwasa omu murimo g’okuburira?
12 Bereke ku nobakunda kandi ku nobafaho. Abingi ababire batari kuhurikiza obutumwa burungi omu kubanza nibahika aho babuhurikiza bareba omuburizi ari kubakunda kandi ari kubafaho. (Shoma omu Bafilipi 2:4.) David, owu tubire tugambireho akagamba ati: “Omuntu yagamba ku atari kwenda kuhurikiza obutumwa bwitu nitubika Bibuli n’ebitabo, rero tumubuza enshonga.” Ku turi kukunda abantu kandi tukabafaho nibakireba. Nibabasa kwebwa ebi twabagambire, konka baguma bari kwijuka oku twabatwarize ge. N’obu nyineka yakuba atatwikiririze kugamba, nitubasa kumwereka ku turi kumufaho birabire aha ku turi kumutwariza n’aha bimanyiso by’aha misho.
13. Ni bata oku turi kubasa kuhindura ebi turi kugamba kugira ngu tubuganise n’ebiri kushemeza nyineka?
13 Nitwereka ku turi kukunda abantu kandi ku turi kubafaho turi kuhindura ebi turi kugamba kugira ngu obutumwa bwitu bubugane n’ebiri kubashemeza. Ecokureberaho: Mbehi hine ebintu ebiri kutwereka ku omuri eyo ka harimu abana? Caba kiri kisyoya, abazire nibabasa kushemerererwa obuhabuzi oburi omuri Bibuli bw’okurera abana n’okutunga okushemererwa omu ka. Mbehi omuri ako kacweka harimu obugomi? Caba kiri kisyoya, nitubasa kusharamu kugamba aha bugomi oburi omu nsi, kandi nyineka nashemererwa ku turi kumugambira ku obwo bugomi burije kuhwaho. Oku byakuba biri kona, gezaho kukwasa abari kukuhurikiza kumanya ku Bibuli erimu obuhabuzi oburi kubasa kubakwasa. Katarína, owu tugambireho akagira ati: “Ninkunda kweyijusya oku Bibuli yankwasize kugira amagara marungi.” Eco kikatuma Katarína yayikiriza ebi ari kugamba kandi abantu abu ari kubigambira nibahika bari kukireba.
14. Tukuratize ebiri omu Nfumu 27:17, ni bata oku ababurizi bari kubasa kuyambayambana?
14 Shaba abandi obuyambi. Omu kinyigana c’okubanza Pawulo akegesa Timoteyo oburyo bw’okuburira n’okwegesa kandi yamuhiga kuguma ari kubukoresa omu kukwasa abandi. (1 Kor 4:17) N’itwe nitutunga obuyambi bwa benetata na banyanyazi b’omu kibina abamanyirire nk’oku Timoteyo yabutungire. (Shoma omu Nfumu 27:17.) Reba ecokureberaho ca mwenetata ori kwetwa Shawn. Akamara obwire ari kukorera obupayoniya omu caro ecabire kirimu abantu abari kukunda edini yabo. Ni enki ecamukwasize kuguma ashemerirwe? Akagamba ati: “Ku cabire nikibasika, nkaba ningenda n’abandi omu murimo g’okuburira. Obwire obu twabire nitukoresa turi kuza aha ndijo nju tukaba nituganira aha ku turi kubasa kwegesa ge. Ecokureberaho: Tukaba nituganira aha bi twagambira nyineka, rero tuganira oku turi kubasa kuhinduramu twashuba kubugana embera nk’eyo.
15. Ahabw’enki eshara eri ey’omugasho omu murimo g’okuburira?
15 Shaba Yehova obuyambi. Shaba Yehova obuyambi waza kuburira. Tutatungire obuyambi bw’omwika gweye oguri kwera, tihine ekintu na kimwe eki turi kubasa kukora. (Zab 127:1; Luk 11:13) Washaba Yehova obuyambi omu shara, omugambire byona otari kumushereka. Ecokureberaho: Mushabe akukwase kuhika aha muntu oyetegwire kuhurikiza obutumwa. Bwanyima y’eco, otemu amani kugira ngu oburire abantu bona abu murabugane.
16. Ahabw’enki kweyegesa Bibuli kiri kutukwasa omu murimo g’okuburira?
16 Yetereho obwire bw’okweyegesa Bibuli. Ekigambo ca Ruhanga nikigira kiti: ‘Mumanye ge ebi Ruhanga akunda, oku biri birungi, ebiri kusimwa, kandi ebihikire buzima.’ (Rom 12:2) Oku turi kukizaho kumanya ge ebiri kukwata ahari Ruhanga, ni ko abantu bari kureba ku turi kwikiriza ebi turi kugamba. Katarína owu tugambireho akagira ati: “Omu myaka eyahwire, nkareba ku nshemerire kukizaho kwikiriza enyegesa za Bibuli z’okubandizaho. Obwe rero, nkeyegesa omu bwijwire ebihamya ebiri kwereka ku hariho Omuhangi, ku Bibuli eri Ekigambo ca Ruhanga, kandi ku Ruhanga ayine ekitongore eki ari kukoresa omuri obu bwire.” Katarína akagamba ku okweyegesa Bibuli cagumize okwikiriza kweye, kandi kikatuma yakizaho kushemerererwa omurimo g’okuburira.
ENSHONGA TUSHEMERIRE KUGUMIZAMU KUKUNDA OMURIMO G’OKUBURIRA
17. Ahabw’enki Yesu yagumire ari kukunda omurimo g’okuburira?
17 Yesu akaguma ari kukunda omurimo g’okuburira kandi yaguma ari kugukora n’obu abantu abamwe babire bari kwanga obutumwa obu yabire ari kubaburira. Ahabw’enki? Akaba namanya ku abantu bingi babire bashemerire kumanya amazima, kandi akakora cona eki yabire ari kubasa kugira ngu akwase abantu kwikiriza obutumwa bw’Obukama. Nambwenu, akaba ari kumanya ku abantu abamwe abari kwanga obutumwa aha murundi g’okubanza bari kuhika aho bakabwikiriza. Eco ni co ecabire aha b’omu ka yeye. Omu myaka ishatu n’ekicweka eyi Yesu yamazire ari kuburira, tihine mwenenyina owabire omwegi weye. (Yoh 7:5) Konka ku yamazire kuzoka bakaba Abakristo.—Byak 1:14.
18. Ahabw’enki tushemerire kugumizamu kuburira?
18 Tituri kumanya abantu abarije kuhika aho bakikiriza amazima agu turi kubegesa. Hine abari kuhika nibikiriza obutumwa bwitu, abandi bo babwikiriza hahwireho obwire buringwa. Nangwa n’abatari kutuhurikiza nibareba emicwe yitu mirungi kituma ‘bahimbisa Ruhanga.’—1 Pet 2:12.
19. Tukuratize ebiri omu 1 Bakorinso 3:6, 7, ni enki eki tushemerire kuguma turi kwijuka?
19 Nituhinga kandi tushucera amizi, konka tushemerire kwijuka ku Ruhanga ari we ori kukuza. (Shoma omu 1 Bakorinso 3:6, 7.) Getahun, mwenetata otwire omuri Etiyopiya, akagamba ati: “Nkamara emyaka 20 yona ari inye Omuhamya wenka otwire omu kacweka akatari kukira kuburirwamu. Konka hati turi ababurizi 14. Ikumi na bashatu omuri bo bakabatizibwa, harimu omukazi wange n’abana bange bashatu. Omu nterane nihijamu abantu abari kuhika ahari 32.” Hati Getahun ashemerirwe ahakuba akagumizamu kuburira kandi yagumizamu kutegereza Yehova ngu arete abantu b’emitima mirungi omu kitongore ceye!—Yoh 6:44.
20. Ni buha buryo obu turi nk’abatabazi?
20 Yehova nareba abantu bona nk’ab’omuhendo. Akatuha omugisha g’okukora n’Omwana weye turi kuhikanisa abantu b’omu mahanga gona emperu etakijire. (Hag 2:7) Omurimo gwitu g’okuburira guri nk’omurimo g’obutabazi. Kandi itwe turi nk’abatabazi abari kutumwa ngu bacungure abantu abu ekinombe kigwerire. N’obu bari kubasa kucungura abantu bace, abatabazi bona nibaba bakozire omurimo g’omugasho. Omurimo gwitu g’okuburira na go ni ko guri. Tituri kumanya abantu abu turije kucungura tukabiha omuri eyi nsi mbi ya Sitaane. Konka Yehova nabasa kukoresa buri omwe omuri itwe kugira ngu abakwase. Andreas, otwire omuri Boliviya, akagamba ati: “Nyowe nindeba ku omuntu ori kwega Bibuli kandi akabatizibwa ari kuba yaresirwe n’ababurizi bona.” Nimureke tugumizemu kugira emitekatecere nk’eyo aha murimo gwitu. Ku turakikore basyoya, Yehova nayija kutuha emigisha, kandi omurimo gwitu nigwija kutuma twashemererwa.
ECESHONGORO CA 66 Buurira Amakuru Marungi
^ par. 5 Ni bata oku turi kubasa kuguma turi kukunda omurimo g’okuburira n’obu abantu bingi twakuba tutari kubashanga omu ka, ninga shi batari kuhurira obutumwa burungi? Eki kicweka caza kutuha obuhabuzi oburi kubasa kutukwasa kuguma turi kukunda omurimo g’okuburira.
^ par. 7 Ababurizi bashemerire kukoresa oburyo bw’okuburira obwagambwa omuri eki kicweka bakuratize ebiragiro by’okwerinda by’omu kacweka kabo.
^ par. 60 EKISHUSHANI (kuruga ah’iguru ori kuza ahaasi): Omushija n’omukazi bari kuburira ahu kigumire kushanga abantu omu ka. Nyineka omwe agire aha murimo, ondijo agire ah’irwariro kandi ondijo agire kuronda ebyokurya. Nyineka w’okubanza bamuburira omu gandi mashaha. Ku baba bari aha kagari k’ebitabo hihi n’irwariro baburira owa kabiri. Baburira nyineka owa kashatu aha simu.
