1. Nemene la tulu hna hamën hnei Iesu kowe la itretre drei nyidrë, nge nemene la hnei angatr hna kuca? (Wange ju la icetrön.)

 AME lo Iesu e celë fen, hnei nyidrëti hna catre cainöj. Aja i nyidrëti tro la itre nyipi Keresiano a nyitipu nyidrë. (Ioane 4:35, 36) Eje hi, itretre drei Iesu a madrin troa cainöj ke, ce nyidrëti me angatr. (Luka 10:1, 5-11, 17) Ngo ame hë la kola othi Iesu me humuthi nyidrë, kola nanazije trootro la aja i angatr troa cainöj. (Ioane 16:32) Thupene la kola amele Iesu hmaca, hnei nyidrëti hna ithuecatr koi angatr troa wangatrune la huliwa ne cainöj. Celë hi matre, ame hë la nyidrëti a elë hnengödrai, hnene la itretre dreng hna catre cainöj. Önine la itre ithupëjia: “Asë hë epuni haöthe la Ierusalema asë hnene la ini i epun.”—Itre hu. 5:28.

2. Nemene la ka amamane laka, Iehova a amanathithine la huliwa ne cainöj?

² Iesu la ka xomiujine la huliwa ne cainöj ngöne lo hneijine la itre pane Keresiano. Hnei Iehova hna amanathithine la huliwa cili. Celë hi lai ka mama ngöne lo Penetekos 33 ke, 3 000 lao atr ka xomi bapataiso. (Itre hu. 2:41) Nge kolo palahi a elë la etrune la itre ka xötrethenge Iesu. (Itre hu. 6:7) Ketre, hnei Iesu hna perofetan ka hape, ame ngöne la itre drai ne la pun, tro palakö a kapa la maca ka loi hnei itre xan.—Ioane 14:12; Itre hu. 1:8.

3-4. Pine nemene matre jol troa cainöj ngöne la itre xaa nöj, nge nemene la hne së hna troa ce wang?

³ Ame fe enehila, easa madrin troa catre cainöjëne la maca ka loi. Nyipici laka, ame ngöne la itre xaa nöj, tha  jole kö troa eatrëne la huliwa cili. Pine nemen? Pine laka, nyimutre la itre atr ka ajane troa ini tus. Angatr a nyialiene la pepa ne sipo ngöne la site së me treqene tro la ketre trejin a sa koi angatr. Ame ngöne la itre xaa nöj, tha ka hmaloi kö troa cainöj ke, pëkö atr ngöne la itre hnalapa. Nge ame itre xan, tha ajane kö angatr troa dreng me kapa la maca qa hnine la Tusi Hmitrötr.

⁴ Maine jol troa cainöj ngöne la nöje i epun, troa xatua epuni hnene la tane mekun celë. Tro sa ce wang la aqane kuca itre xan matre troa cainöj kowe la nöjei atr. Nge tro fe sa ce wang la kepin matre nyipiewekë tro palahi sa madrin troa cainöj, ngacama tha drei së kö hnei itre xan.

5. Nemene la itre jol hna cile kow hnene la itre trejine ngöne la huliwa ne cainöj?

⁵ Itre hlue i Iehova a catre cainöj, ngacama paatre kö la itre atr ngöne la itre hnalapa. Itre xan a thele troa cainöj ngöne la itre batima hna thing nge hna thupëne hnyawa. Ame la itre xaa trejin, angatr a cainöj ngöne la itre götran gaa nany, nge xalaithe hi la itre atr ka mel e cili. Maine jë, caasi hi la atr hnei angatr hna troa cainöje kow. Ngo ame la angatr a traqa, paatre kö lai atr! Maine hna traqa fe koi së la itre jole cili, tha tro pi kö sa kucakuca. Nemene la nyine tro sa kuca matre troa cile kowe la jol cili me catre cainöj?

6. Pine nemene matre ceitune hi la itre ka nyi ie memine la itre ka cainöj?

⁶ Hnei Iesu hna aceitunëne la huliwa ne cainöj memine la kola nyi ie. (Mar. 1:17) Ame itre xaa ijin, pëkö ie hna ea. Ngo tha kucakuca kö la itre ka nyi ie. Angatre pe a saze la ijin maine götrane hnë troa nyi ie, maine saze pena aqane kuca. Ceitune hi lai memine la huliwa ne cainöj. Tro sa ce wang la itre nyine tro angatr a kuca.

7. Nemene la eloin e tro sa cainöj ngöne la nöjei ijin?

⁷ Troa cainöj ngöne la nöjei ijin. Ijije hi tro sa iöhnyi memine la itre atr ngöne la itre hnalapa i angatr. Itre xaa trejin a cainöj e hnaipajö maine e jidr pena ke, ajane la itre atr troa porotrik ngöne la itre ijine cili. Maine jë, tro sa nyitipune la aqane kuca i David, ketre qatre thup. Thupene la hna cainöj ngöne la ketre teritoar, David a bëek kowe lo itre hnalapa gaa pëkö atr. Öni nyidrë: “Alanyimu la itre atr hnenge hna iöhnyi memin, ngöne la eni a bëeke hmaca.” *

8. Nemene la aqane tro sa trongëne la hna qaja ngöne Ate Cainöj 11:6?

⁸ Tha tro pi kö sa kucakuca. Kola amamane hnene la xötr ka nyitrepene la tane mekun celë, la itre nyine tro sa kuca. (E jë la Ate Cainöj 11:6.) Hane la hna kuca hnei David. Anyimua wang nyidrëti la ketre hnalapa, ngo paatre palahi la itre atr. Ame pe, tha hnei David kö hna kucakuca. Ame hë la David a iöhnyi memine lai atr, hna canga kepe nyidrëti hnei angeic. Önine lai atr: “Traqa koi 8 lao macatre ne eni a lapa e celë. Eni petre hi a iöhnyi memine la ketre atre nyipici Iehova.” Öni David: “Öhne hi ni laka, ame la itre ka canga kapa la maca ka loi ke, kolo itre ka paatr ngöne la hnalapa i angatr.”

9. Nemene la hna kuca hnene la itre trejin e paatre kö la itre atr ngöne la itre hnalapa?

 ⁹ Troa cainöj ngöne la nöjei götran. Celë hi hna kuca hnene itre trejin, e paatre kö la itre atr ngöne la itre hnalapa. Eje hi, ame la easa cainöj jëne présentoir, kola aijijë së troa iöhnyi memine la itre atr ka paatr ngöne la itre hnalapa, maine ka mel ngöne la itre hnalapa hna wathebone troa cainöj. Ketre, öni itre trejin ka hape, tha xou kö la itre atr troa ithanata ngöne la itre parc, itre magazë, me hna maketr. Öni Floiran, ketre atre thupëne la sirkoskripsio e Bolivie: “Eahuni a cainöj ngöne hna maketr me magazë e 1h uti hë 3h e hnaipajö ke, tha tru kö hnei huliwa ne la itre ka salem. Lolo catr la itre porotrike hun, nge hetre ka nyiqane ini tus.”

10. Nemene la nyine tro sa kuca matre troa iöhnyi memine la itre atr?

¹⁰ Troa saze la aqane cainöj. Pane mekune jë laka, epuni a thele troa iöhnyi memine la ketre atr. Anyimua wai angeice hë hnei epun, ngo paatre palahi angeic. Nemene la nyine troa kuca? Öni Katarína: “Maine paatre kö la ketre atr, eni a cinyanyi koi angeic.” Ketre tu së fe, loi tro sa saze la aqane cainöje së, matre troa öhne la nöjei atr ne la teritoar.

11. Pine nemene matre tha pi drei së kö hnene la itre atr?

¹¹ Ame itre xan, tha pi drei së kö hnei angatr. Ame koi angatr, tha ka nyipiewekë kö Akötresie memine la Tusi Hmitrötr. Hnene la itre akötr ne la fen,  matre tha mejiune hë angatr koi Akötresie. Ketre, hnene la aqane ujë ne la itre hene ne hmi, matre tha ajane kö angatr troa e la Tusi Hmitrötr. Ame pena itre xan, angatr a hnehengazone la huliwa i angatr, me fami, me mele i angatr. Nge tha nyipiewekëne kö angatr la itre eamo qa hnine la Tusi Hmitrötr. E cili, nemene la nyine troa kuca matre tro palahi sa madrin troa cainöj?

12. Nemene la thangan e tro sa trongëne la hna qaja ngöne Filipi 2:4 ngöne la easa cainöj?

¹² Troa wangatrune la itre atr hna cainöje kow. Ame la itre xan ka tha drei së kö ngöne la qaan, hnei angatr hna kepe së e thupen ke, hnene la aqane ujë së. (E jë la Filipi 2:4.) Öni David: “Maine tha kapa kö ketre atr la maca, loi e tro sa pane amë la Tusi Hmitrötr me itre itus, me hnyingë angeic ka hape: ‘Hnauëne laka tha epuni kö a ajane troa atre la hna qaja hnei Tusi Hmitrötr?’ ” E cili, tro la atr a öhn laka, easa wangatrune la mekuna i angeic. Maine jë, tro angeic a thëthëhmine la itre hne së hna qaja. Ngo tha tro kö angeic a thëthëhmine la aqane ujë së. Eje hi, ngacama tha pi drei së kö hnei itre xan, ngo loi e tro sa amamane jëne la aqane ujë së me ithanata së laka, easa wangatrunyi angatr.

13. Nemene la nyine tro sa kuca ngöne la easa cainöj?

¹³ Easa wangatrune la itre atr ngöne la easa ce thawa me angatr la itre mekun ka ihmeku memine la aja i angatr. Maine hetre nekönatr, loi e tro sa amamane kowe la itre kem me thine la itre eamo qa hnine la Tusi Hmitrötr, ka troa xatua angatr troa hetru nyudren me mele madrin. Maine hna kiine la qënehlö, ijije hi tro sa ithanatane la itre ewekë ka traqa enehila, tune la ihumuth, isi, me itre xaa jol. Maine jë, ajane la atr troa atre la aqane troa apatrene elanyi la ngazo. Eje hi, nyipiewekë troa xatuane la itre atr troa öhne la enyipiewekëne la Tusi Hmitrötr. Öni Katarína: “Hnene la nyipici, matre tingeting me lolo la meleng.” Mama hi ngöne la aqane cainöje i Katarína laka, ka mejiune angeic kowe la itre ini hnei angeic hna tro fë.

14. Thenge la Ite Edomë 27:17, tune kaa la aqane tro la itre trejin a ce huliwa?

¹⁴ Troa sipo ixatua kowe la itre xaa trejin. Ame ngöne lo hneijine la itre pane Keresiano, hnei Paulo aposetolo hna ini Timoteo la aqane troa cainöj me inine la itre atr. Hnei nyidrëti fe hna ithuecatr koi Timoteo troa hane kuca tun.  (1 Kor. 4:17) Haawe, tui Timoteo, loi e tro sa sipo ixatua kowe la itre trejine la ekalesia. (E jë la Ite Edomë 27:17.) Hane hi la hna melën hnei Shawn, ketre pionie. Hna upi angeic troa cainöj ngöne la ketre neköi traon. Ame la itre atr e cili ke, angatr a madrine la hmi angatr. Nemene la ka xatua Shawn tro palahi a madrin troa cainöj? Öni angeic: “Hnenge palahi hna ce cainöj memine la ketre trejin. Qëmekene troa tro kowe la ketre hnalapa, nyio a ce thawa la aqane troa tro fë la maca. Thupene la hna porotrik memine la ketre atr, nyio a ce ithanatane la aqane cainöje nyio. Maine öhne hi nyio laka, hetre nyine troa saze, nyio hë lai a amacane la aqane troa eköth la itre mekun.”

15. Pine nemene matre nyipiewekë troa thith qëmekene troa cainöj?

¹⁵ Troa sipo ixatua koi Iehova ngöne la thith. Qëmekene tro sa cainöj, loi e tro sa pane thith. Maine easa ajane troa hetre thangane la huliwa ne cainöj, loi e tro sa sipone la uati hmitrötr. (Sal. 127:1; Luka 11:13) Ame la easa thith, loi e tro sa qaja hnyawa la mekuna së koi Iehova. Maine jë, tro sa sipo Nyidrë troa eatrongë së kowe la itre atr ka hetre hni ne aja. Ngo thupene lai, loi e tro sa catre cainöj kowe la nöjei atr.

16. Pine nemene matre loi e tro sa ini tusi caas?

¹⁶ Troa xomi ijine troa ini tusi caas. Öni Tusi Hmitrötr: “Isa tupathe [jë] la aja i Akötresie laka, ka lolo, nge ka iamadrinë, nge ka pexej.” (Rom. 12:2) Maine tro sa ini tusi caas, tro hë sa atrepengöi Akötresieti hnyawa. Nge ame hë la easa qeje Akötresieti kowe la itre atr, tro ha mama koi angatr laka, easa mejiune koi Nyidrë me kowe la itre ini Nyidrë. Öni Katarína: “Hnenge hna öhn laka, nyipiewekë tro ni a acatrene la lapauneng. Celë hi matre eni palahi a ini tusi caas. Xecie hë koi ni laka, Iehova la Atre Xup, ewekë i Nyidrëti la Tusi Hmitrötr, nge hetre Organizasio i Nyidrëti e celë fen.” Eje hi, hnei Katarína hna ini tusi caas, matre hna acatrene la lapaune i angeic me madrine i angeic troa cainöj.

17. Pine nemene ka madrin palahi Iesu troa cainöj?

¹⁷ Ngacama tha kapa kö la itre atr la maca hna tro fë hnei Iesu, ngo hnei nyidrëti hna madrin troa cainöj. Pine nemen? Pine laka ka sisitria catre koi Iesu tro la itre atr a atre la nyipici göne la Baselaia i Akötresie. Celë hi matre, hnei nyidrëti hna cainöj kowe la nöjei atr asë. Ketre, atre hi Iesu laka, tha tro kö angatr a dreng ngöne la xötrei, ngo tro angatr a kapa e thupen. Celë hi lai ka traqa kowe la itre jini nyidrë. Ame ngöne lo köni macatre nge sine ne cainöje Iesu, tha lapaune kö Iesu koi nyidrë. (Ioane 7:5) Ngo thupene la kola amele nyidrëti hmaca, itre Keresiano hë angatr.—Itre hu. 1:14.

18. Pine nemene matre easë palahi a cainöj?

¹⁸ Eje hi, thatre kö së la itre ka troa kapa elanyi la nyipici. Ame itre xan, hmitre koi angatr troa kapa la maca. Ngo maine tro palahi sa madrin me loi thiina ngöne la hna cainöj, tro hë angatr a kepe së me “atrunyi Akötresie.”—1 Pet. 2:12.

19. Nemene la mekun ka sisitria ngöne 1 Korinito 3:6, 7?

¹⁹ Nyipici, easa tran me fi, ngo Akötresieti kö la ka acian. (E jë la 1 Korinito 3:6, 7.) Öni Getahun, ketre trejin qa  Éthiopie: “Traqa koi 20 lao macatre ne eni ngöne la nyipici. Ame lo xötrei, eni caasi hi la ka cainöj ngöne la teritoar. Ngo ame enehila, ala 14 hë la itre ka cainöj, nge 13 ka xomi bapataiso, ene la föeng memine la köni neköng. Ketre, traqa koi 32 lao atr ka sine la itre icasikeu.” Tru la madrine i Getahun ke, tha hnei angeice kö hna nue la huliwa ne cainöj. Hnei angeic pe hna xomihni aqeany me treqene tro Iehova a eatrongëne la itre atr ka hetre hni ne aja kowe la Organizasio i Nyidrë!—Ioane 6:44.

20. Pine nemene matre huliwa ne iamele la huliwa ne cainöj?

²⁰ Iehova Akötresieti a wangatrune la mele ne la nöjei atr. Celë hi matre, Nyidrëti a aijijë së troa ce huliwa me Iesu ngöne la hna cainöj, qëmekene troa nyipune la fene celë ka ngazo. (Hag. 2:7) Eje hi, huliwa ne iamele la huliwa ne cainöj. Hna aceitunëne la fene celë memine la ketre he ka troa lö hnine la hnagejë. Ngacama ala xalaithe hi la itre ka mel, ngo hna amele angatr jëne la trengecatre ne la nöjei ka ithel. Ketre tune la easa cainöj. Thatre kö së la etrune la itre atr hna troa amelene qa ngöne la fene i Satana. Ngo Iehova a aijijë së troa hane thele angatr. Öni Andreas, ketre trejin e Bolivie: “Hnene la trengecatr ne la itre trejin, matre kola atre la nyipici me xomi bapataiso hnene la ketre atr.” Haawe, loi e tro sa madrin troa cainöj. E cili, tro Iehova a amanathithi së nge tro hë sa madrin troa catre cainöj.