1. Yezu ye ɲɛyirali juman lo to a ka kalandenw ye ani u ye mun lo kɛ? (Jaa lajɛ ɲɛɛ fɔlɔ kan.)

YEZU ka cidenya baara kuru bɛɛ la dugukolo kan, a tun be waajuli baara filɛ ni ɲɛɛ ɲuman ye. A tun b’a fɛ fana a ka kalandenw ka to n’o miiriya ɲɔgɔn ye (Zan 4:35, 36). Tuma min na Yezu tun be n’a ka kalandenw ye, u tun kisɛyanin lo waajuli la (Luka 10:1, 5-11, 17). Nka tuma min na u ye Yezu minɛ k’a faga, a ka kalandenw sumayara waajuli la (Zan 16:32). Yezu suu kununin kɔ, a y’u jija ko u ka waajuli kɛ u ɲɛnako fɔlɔ ye. A yɛlɛnin kɔ sankolo la, a ka kalandenw ye waajuli kɛ ni kisɛya ye, fɔɔ u juguw dimina k’a fɔ ko: “Aw ye Zeruzalɛmukaw tulo fa n’aw ka kalan ye.”—Kɛw. 5:28.

2. Jehova ye Yezu ka kalandenw duga cogo di waajuli la?

² Yezu ye kerecɛn fɔlɔw ɲɛminɛ waajuli la ani Jehova ye u duga. O lo kama mɔgɔ caaman sɔnna kibaro diiman na. Misali la, saan 33 Pantekɔte loon na, mɔgɔ 3 000 ɲɔgɔn batizera (Kɛw. 2:41). Ani mɔgɔ caaman tora ka fara Yezu ka kalandenw hakɛ kan (Kɛw. 6:7). O bɛɛ n’a ta, Yezu tun kɔnna k’a fɔ ko laban loonw na, mɔgɔ caamanba tun bena sɔn kibaro diiman na.—Zan 14:12; Kɛw. 1:8.

3-4. N’a sɔrɔ mun na dɔw b’a jati ko waajuli ka gwɛlɛ? An bena mun lo lajɛ barokun nin na?

³ An kelen kelen bɛɛ b’an jija ka to ka waajuli baara filɛ ni ɲɛɛ ɲuman ye. Jamana dɔw la, a ka nɔgɔ k’o kɛ. Mun na do? Sabu mɔgɔ caaman b’a fɛ ka bibulukalan kɛ. O kama, u dɔw ka ɲi ka kɔnɔni kɛ fɔɔ weleweledala dɔ labilanin ka sɔrɔ ka bibulukalan kɛ n’u ye. Nka jamana wɛrɛw la,  balimaw b’a jati ko waajuli ka gwɛlɛ kojugu. Mɔgɔw man teli ka sɔrɔ soo ani minw be yen, n’a sɔrɔ olu t’u mako don kosɔbɛ Bibulu la.

⁴ I be yɔrɔ min na, ni waajuli man nɔgɔ yen, ladili minw be sɔrɔ barokun nin na, n’a sɔrɔ u bena i nafa. An bena a ye dɔw ye min kɛ ka se ka kuma ni mɔgɔ caaman ye waajuli la. Mɔgɔw b’an lamɛn wo, u t’an lamɛn wo, mun na an ka ɲi ka to ka waajuli baara filɛ ni ɲɛɛ ɲuman ye? An bena o fana lajɛ.

5. Gwɛlɛya jumanw lo be Jehova Seere caaman kan?

⁵ Jehova Seere caaman fɛ, a ka gwɛlɛ kosɔbɛ ka mɔgɔw sɔrɔ u ka soo. Weleweledala dɔw be yɔrɔ minw na, boonw wala kiin caaman latanganin lo kosɔbɛ. N’a sɔrɔ garadiw b’o boonw wala o kiinw kɔrɔsi ani u tɛ sɔn mɔgɔ ka don yen ni sira ma di a ma. Yɔrɔ wɛrɛw la, a ka nɔgɔ Jehova Seerew fɛ ka waajuli kɛ soo ni soo. Nka, u tɛ mɔgɔ caaman sɔrɔ soo. Yɔrɔ dɔw la fana, weleweledala dɔw be waajuli kɛ dugu denninw na wala yɔrɔ minw na mɔgɔw man ca. O weleweledalaw be se ka taga yɔrɔjanw na walisa ka mɔgɔ kelen dama sɔrɔ. A be se ka kɛ ko o tigi yɛrɛ tɛ soo! N’o gwɛlɛyaw ɲɔgɔn b’an kan, an man ɲi k’an fari faga. An be se ka mun lo kɛ walisa ka see sɔrɔ o gwɛlɛyaw kan ani ka mɔgɔ caaman waaju?

6. Mun na waajuli baara bɔnin be jɛgɛminɛ ma?

⁶ Yezu ye waajuli baara suma ni jɛgɛminɛ ye (Mariki 1:17). Jɛgɛminɛla dɔw be se ka baara kɛ tile kuru bɛɛ kɔnɔ ani u tɛ jɛgɛ foyi sɔrɔ. Nka, u t’u fari faga. U be yɛlɛmani don u ka jɛgɛminɛ cogo la. Misali la, u be deli ka jɛgɛ minɛ wagati, yɔrɔ ani cogo min na, u b’o yɛlɛma. An be se k’o yɛlɛmaniw ɲɔgɔn kɛ an ka waajuli baara la. An ka ladili dɔw lajɛ.

7. N’an be waajuli kɛ wagati wɛrɛw la, nafa juman lo be se ka sɔrɔ o la?

⁷ Taga bɔ mɔgɔw ye wagati wɛrɛ la. Mɔgɔw ka teli ka sɔrɔ soo wagati min na, n’an be taga bɔ u ye o tuma na, an bena u caaman sɔrɔ. A ka kɛ cogo o cogo, mɔgɔw be laban ka kɔsegi u ka soo! Balimaw caaman y’a ye ko nafa b’a la ka waajuli kɛ wulafɛ wala sufɛ sabu u be mɔgɔ caaman sɔrɔ soo. Ka fara o kan, a be se ka kɛ ko mɔgɔw hakili siginin lo ani u labilanin lo ka kuma o wagatiw la. N’a sɔrɔ i bena a ye fana ko nafa b’a la ka David ka ladili sira tagama. Diinan mɔgɔkɔrɔ dɔ lo ani a ko ni ale n’a tɔɲɔgɔn ye waajuli kɛ wagati dɔ la kiin dɔ kɔnɔ, u be segi ka taga bɔ mɔgɔw ye, minw tun tɛ soo. A ko: “A be n’ kabakoya k’a ye ko an be mɔgɔ caaman sɔrɔ u ka soo n’an kɔsegira ka taga bɔ u ye.” *

8. Min fɔra Waajulikɛla 11:6 kɔnɔ, an be se k’o sira tagama cogo di waajuli la?

⁸ An man ɲi k’an fari faga. Barokun ka vɛrise jɔnjɔn b’a yira an ka ɲi ka koow kɛ cogo min na (Waajulikɛla 11:6 kalan). An kumana David min koo la, ale m’a fari faga. A labanna ka cɛɛ dɔ sɔrɔ a ka soo, k’a sɔrɔ a tun tagara bɔ a ye siɲɛ caaman. O cɛɛ y’a mako don Bibulu la ani a ko: “N’ be yan a saan seegi ɲɔgɔn ye nin ye, ani n’ ma deli ka Jehova Seere si ye n’ ka soo.” David ko: “An be laban ka  mɔgɔ minw sɔrɔ u ka soo, olu ka teli k’an lamɛn.”

9. Mɔgɔ minw man teli ka sɔrɔ soo, Jehova Seere dɔw ye mun lo kɛ walisa k’olu sɔrɔ?

⁹ A ɲini ka waajuli kɛ yɔrɔ wɛrɛ la. Mɔgɔ minw man teli ka sɔrɔ soo, balima dɔw ye waajuli kɛ yɔrɔ wɛrɛ la walisa ka se k’o mɔgɔw sɔrɔ. Misali la, mɔgɔ dɔw be sangaso janjanw kɔnɔ ani soo ni soo waajuli ma daga yen. Balimaw y’a ye ko a ka nɔgɔ k’o mɔgɔw sɔrɔ n’u be waajuli kɛ siradaw la wala ni waajulikɛ wotorow ye. O b’a to u be se ka kuma ni mɔgɔw ye minw sɔrɔ man di cogo wɛrɛ la. Weleweledala caaman y’a kɔrɔsi fana ko mɔgɔw ka teli ka baro kɛ wala ka sɛbɛ dɔ minɛ zaradɛnw, lɔgɔfiyɛw ani jagokɛyɔrɔw la. Floiran ye kafokulu kɔrɔsibaga ye Bolivi jamana na ani a ko: “An be taga lɔgɔfiyɛw ni jagokɛyɔrɔw la tilefɛ 1h ani 3h cɛ, tuma min na feerelikɛlaw bolo degunnin tɛ. Tuma caaman na, an be baro diimanw kɛ ni mɔgɔw ye ani an yɛrɛ be bibulukalanw daminɛ.”

10. I be se ka koo wɛrɛ jumanw lo kɛ walisa ka mɔgɔw sɔrɔ k’u waaju?

¹⁰ A ɲini ka koow kɛ cogo wɛrɛ la. Miiri k’a filɛ ko i tagara bɔ mɔgɔ dɔ ye a ka soo siɲɛ caaman, nka i m’a sɔrɔ. I y’o kɛ wagati wɛrɛw la, nka i bele m’a sɔrɔ. Yala i be se k’o tigi sɔrɔ cogo wɛrɛw la wa? Katarina ko: “N’ ma se ka mɔgɔ minw sɔrɔ u ka soo, n’ be lɛtɛrɛ sɛbɛ olu ma. N’ tun b’a fɛ ka min fɔ u ye, n’ b’o lo sɛbɛ o lɛtɛrɛ kɔnɔ.” An be kalan juman lo sɔrɔ o koo  la? N’an be waajuli kɛra, an ka koo bɛɛ lajɛnnin kɛ walisa ka kiinmɔgɔw bɛɛ sɔrɔ.

11. Mun na mɔgɔ dɔw tɛ sɔn k’an lamɛn?

¹¹ Mɔgɔ dɔw tɛ sɔn k’an lamɛn sabu olu fɛ, u mako t’a la ka dɔ lɔn Ala wala Bibulu koo la. U lanin tɛ Ala la sabu tɔɔrɔ ka ca duniɲa kɔnɔ. U tɛ u mako don Bibulu la sabu diinan kuntigiw b’a fɔ k’olu be tugu Bibulu ka ladiliw kɔ, k’a sɔrɔ u be koo jugu caaman kɛ. Dɔ wɛrɛw be miiri u ka baara, u ka denbaya wala u ka gwɛlɛyaw lo koo la wagati bɛɛ. U t’a miiri ko Bibulu be se k’u nafa. An ninsɔn diyanin be se ka to cogo di n’an be mɔgɔ minw waaju, olu b’a miiri ko nafa bɛrɛ t’an ka kuma na?

12. Ladili min be sɔrɔ Filipikaw 2:4 kɔnɔ, n’an b’o sira tagama, o be se k’an dɛmɛ cogo di waajuli la?

¹² A yira ko i b’i janto tɔɔw la. Mɔgɔ dɔw ma sɔn ka lamɛnni kɛ u siɲɛ fɔlɔ la. Nka kɔfɛ, u caaman sɔnna ka mɛnni kɛ tuma min na u y’a ye ko weleweledalaw y’u mako don u la sɔbɛ la (Filipikaw 2:4 kalan). Misali la, an kumana David min koo la, ale ko: “Ni mɔgɔ dɔ ko ale t’a fɛ k’an lamɛn, an b’an ka Bibulu n’an ka gafew don sakɔsi kɔnɔ ani an b’a fɔ ko: ‘A bena diya n’ ye k’a lɔn fɛɛn min kama i y’o fɔ.’ ” N’an b’an mako don mɔgɔw la, u b’o kɔrɔsi. An ye min fɔ u ye tigitigi, u be se ka ɲinɛ o kɔ. Nka, an y’u minɛ cogo min na, u man teli ka ɲinɛ o kɔ. Hali n’a tigi m’a to an kumana, an be se k’a yira an ka kokɛcogo n’an ɲɛda cogo fɛ ko an b’an janto a la.

13. An be se ka mun lo kɛ walisa an ka kuma ka diya an lamɛnbaga kelen kelen bɛɛ ye?

¹³ An b’a yira ko an b’an mako don mɔgɔw la, n’an b’an ka kumaw yɛlɛma ka kɛɲɛ n’u makoya ani u diyanyekow ye. Misali la, yala fɛɛn dɔw b’a yira ko denmisɛnw b’an lamɛnbaga fɛ wa? Bibulu be ladili minw di deenw lamɔcogo ani hɛɛrɛ sɔrɔcogo koo la denbaya kɔnɔ, n’a sɔrɔ o bena diya bangebagaw ye. Yala sɔgɔnan caaman b’u ka daa la wa? N’o lo, fariyakow ani siranyako minw be duniɲa kɔnɔ, an be se ka kuma o koo la. O kɔ, n’a sɔrɔ a bena diya an lamɛnbaga ye k’a lɔn ko fariyakow bena ban loon dɔ. A mana kɛ min o min ye, an k’an jija k’an lamɛnbaga dɛmɛ a k’a ye Bibulu ka ladiliw be se k’a nafa cogo min na. An kumana Katarina min koo la, ale ko: “Bibulu ye n’ dɛmɛ cogo min na, n’ be miiri o la.” O kama ni Katarina  be kumana, a ka kumaw b’a yira ko a lanin b’a ka fɔtaw la ani a lamɛnbagaw b’o kɔrɔsi.

14. Ka kɛɲɛ ni Talenw 27:17 ye, waajulikɛɲɔgɔnw be se ka ɲɔgɔn dɛmɛ cogo di?

¹⁴ Nafa sɔrɔ tɔɔw ka dɛmɛ na. Saan kɛmɛkulu fɔlɔ la, Pol ye Timote degi a ka waajuli kɛcogo n’a ka mɔgɔw kalancogo la. A ye Timote jija ko ale fana ka mɔgɔ wɛrɛw degi o la (1 Kor. 4:17). I ko Timote, an fana be se ka kalan sɔrɔ kerecɛn kolɔnbagaw fɛ an ka kafow kɔnɔ (Talenw 27:17 kalan). An ka balimacɛ dɔ ka koo lajɛ min tɔgɔ ko Shawn. Wagati dɔ la, a tun ye piyɔniye ye dugu dennin dɔ la. O yɔrɔ la, mɔgɔw fanba ka diinan tun ka di u ye kosɔbɛ. Mun lo y’a dɛmɛ a ninsɔn diyanin tora? A ko: “N’a tun be se ka kɛ, n’ tun be waajuli kɛ ni mɔgɔ dɔ ye. Soow ni soow cɛ, an tun be ɲɔgɔn dɛmɛ k’an ka waajuli kɛcogo fisaya. Misali la, lamɛnnikɛla tun ye min fɔ ani an tun y’a jaabi cogo min na, an tun be baro kɛ o kan. O kɔ, an tun b’a filɛ an be se ka mɔgɔ wɛrɛ jaabi cogo min na, n’a y’o ɲɔgɔn fɔ.”

15. Mun na delili kɔrɔtanin lo kosɔbɛ waajuli la?

¹⁵ Jehova deli a k’i dɛmɛ. Tuma o tuma n’i be waajuli kɛra, dɛmɛ ɲini Jehova fɛ. N’a ka hakili senu barikaman sababu tɛ, an si tun tɛna se ka foyi kɛ (Zab. 127:1; Luka 11:13). N’i be Jehova delila, koo tigitigi dɔw ɲini a fɛ. Misali la, a deli a k’i ɲɛminɛ walisa i ka mɔgɔw sɔrɔ minw b’a fɛ ka dɔ lɔn a koo la ani u labilanin lo ka mɛnni kɛ. O kɔ, koow kɛ ka kɛɲɛ n’i ka delili ye, o kɔrɔ, i mana mɔgɔ o mɔgɔ kunbɛn, o tigi waaju.

16. N’an b’a fɛ ka se waajuli la koɲuman, mun na kelenna kalan kɔrɔtanin lo?

¹⁶ Wagati kunmabɔ kelenna kalan kama. Ala ka Kuma b’a fɔ ko: “Aw ka se ka Ala sago lɔn, o min ye koɲuman ye, min ka di Ala ye, n’a dafanin be.” (Ɔrɔm. 12:2). N’an lanin b’a la kosɔbɛ ko an be tiɲɛn lɔn Ala koo la, mɔgɔw bena o ye n’an be kumana n’u ye waajuli la. Katarina min kofɔra ka tɛmɛ, ale ko: “A wagati damanin ye nin ye, n’ y’a faamu ko n’ ka ɲi ka n’ ka limaniya sabati Bibulu ka kalan jɔnjɔn dɔw koo la. O la, n’ ye sɛgɛsɛgɛri kɛ koɲuman walisa ka daliluw sɔrɔ minw b’a yira ko Danbaga be yen, Bibulu ye Ala ka Kuma ye tiɲɛn na ani ko Ala be ni ɔriganisasiyɔn dɔ ye bi.” Katarina ko ale ka kelenna kalan ye a ka limaniya barika bonya ani ka dɔ fara a ka ninsɔndiya kan waajuli la.

17. Mun na Yezu tora ka koow filɛ ni ɲɛɛ ɲuman ye waajuli la?

¹⁷ Yezu tun be koow filɛ ni ɲɛɛ ɲuman ye ani a tora ka waajuli kɛ hali ni mɔgɔ dɔw tun tɛ sɔn k’a lamɛn. Mun na do? A tun b’a lɔn ko mɔgɔw mako b’a la ka tiɲɛn lɔn ani a tun b’a fɛ ka sababu di mɔgɔ caamanba ma u ka sɔn Masaya kibaro diiman ma. A tun b’a lɔn fana ko mɔgɔ minw ma sɔn k’a lamɛn u siɲɛ fɔlɔ la, u dɔw tun bena sɔn k’o kɛ kɔfɛ. A kɔrɔsi ale yɛrɛ somɔgɔ dɔw ye min kɛ. A ka cidenya baara kuru bɛɛ la saan saba ni tilan kɔnɔ, a balimacɛ si ma kɛ a ka kalanden ye (Zan 7:5). Nka Yezu suu kununin kɔ, u kɛra kerecɛnw ye.—Kɛw. 1:14.

18. Mun na an be to ka waajuli kɛ?

¹⁸ An t’a lɔn mɔgɔ minw bena laban ka sɔn Bibulu ka tiɲɛn kalanw ma. Dɔw tɛ mɛɛn ka sɔn tiɲɛn ma, nka dɔ wɛrɛw be wagati caaman ta. Hali minw t’a fɛ k’an  lamɛn, u b’a ye ko an tagamacogo ka ɲi ani an be koow filɛ ni ɲɛɛ ɲuman ye. A laban, n’a sɔrɔ u bena a daminɛ ka “Ala tanu.”—1 Piyɛri 2:12.

19. Ka kɛɲɛ ni 1 Korɛntikaw 3:6, 7 ye, an ka ɲi ka sɔn mun lo ma?

¹⁹ N’an be tiɲɛn kisɛw dan ani k’u sɔn jii la, an ka ɲi ka sɔn a ma ko Ala lo b’a kɛ u be falen ka bonya (1 Korɛntikaw 3:6, 7 kalan). Balimacɛ Getahun be Etiyopi jamana na. A ko: “N’ be yɔrɔ min na, ne kelen dɔrɔn lo tun ye Jehova Seere ye saan 20 ni kɔ kɔnɔ. Nka sisan, weleweledala 14 lo be yen. U mɔgɔ 13 batizera ani n’ muso ni n’ ka denmisɛn saba b’u cɛma. Mɔgɔ 32 ɲɔgɔn lo be to ka na lajɛnw na.” Getahun ninsɔn ka di sabu a tora ka waajuli kɛ ani ka kɔnɔni kɛ walisa Jehova ka mɔgɔ kɔnɔgwɛw dɛmɛ u ka na a ka ɔriganisasiyɔn kɔnɔ!—Zan 6:44.

20. Cogo juman na an ka baara bɔnin lo kisili baara ma?

²⁰ Adamadenw bɛɛ nafa ka bon Jehova ɲɛɛ kɔrɔ. A ye nɛɛma kɛ an ye walisa an n’a Dencɛ ka jɛn ka baara kɛ ka mɔgɔ sifa bɛɛ lajɛn sanni duniɲa nin laban ka se (Aze 2:7). An ka waajuli baara be i ko kisili baara. An be komi mɔgɔ minw cira ka taga mɔgɔw kisi ka bɔ sanuwo dɔ kɔnɔ min karila ka ben u kan. Mɔgɔ minw cira ka taga, u damanin dɔrɔn lo bena se ka mɔgɔ dɔ kisi. Nka, u kelen kelen bɛɛ ka baara kɔrɔtanin lo. O kelen lo n’an ka waajuli baara ye. An t’a lɔn mɔgɔ hakɛ min bena kisi ka bɔ Sutana ka duniɲa nin kɔnɔ. Nka, Jehova be se ka tɛmɛ an kelen kelen bɛɛ fɛ k’u dɛmɛ. Andreas be Bolivi jamana na ani a ko: “N’ b’a jati ko ni mɔgɔ dɔ ye Bibulu ka tiɲɛn kalanw lɔn ani ka batize, o kɛra sabu mɔgɔ caaman jɛnna k’a dɛmɛ.” An fana ka kɛ n’o miiriya ɲuman ɲɔgɔn ye an ka waajuli baara koo la. O la, Jehova bena an duga ani an bena ninsɔndiyaba sɔrɔ an ka waajuli baara la.