1. Ebɛn nhwɛdo na Jesus yɛe maa n’ekyirdzifo no, na wɔyɛɛ hɔn adze dɛn wɔ ho? (Hwɛ mfonyin a ɔwɔ Ɔweɔn-Aban yi enyim no.)

ABER a nna Jesus wɔ asaase do no, ɔkɔr do nyaa asɛnka edwuma a ɔyɛe no ho adwen pa. Nna dɛmara na ɔpɛ dɛ n’ekyirdzifo no so yɛ. (John 4:35, 36) Aber a nna Jesus nye n’esuafo no yɛ asɛnka edwuma no, wɔdze ahokẽka kãa asɛm no. (Luke 10:1, 5-11, 17) Naaso aber a wɔkyeer Jesus na wokum no no, ɔpɛ a nna wɔwɔ dɛ wɔbɛkã asɛmpa no ano brɛɛ adze kakra. (John 16:32) Jesus no wusoɛr ekyir no, ɔhyɛɛ hɔn nkuran dɛ wɔmfa hɔn adwen nsi asɛnka edwuma no do. Aber a Jesus kɔr sor no, wɔkɔr do kãa asɛmpa no araa ma hɔn atamfo kãa dɛ: “Hwɛ, hom dze hom nkyerɛkyerɛ ahyɛ Jerusalem nyina mã.”​—Andw. 5:28.

2. Ebɛn kwan do na Jehovah ehyira asɛnka edwuma no do?

² Jesus kyerɛɛ asɛnka edwuma a tsetse Christianfo no yɛe no kwan, na Jehovah hyiraa do. Dɛm ntsi nyimpa piinara bɛgyee nokwar no. Dɛ nhwɛdo no, wɔ Pentecost 33 H.B. no, wonumaa nyimpa bɛyɛ 3,000. (Andw. 2:41) Na esuafo no dodow yɛɛ pii. (Andw. 6:7) Afei so, Jesus kãe too hɔ dɛ asɛnka edwuma no benya nkɔenyim kɛsenara wɔ nda a odzi ekyir no mu.​—John 14:12; Andw. 1:8.

3-4. Ebɛnadze ntsi na asɛnka edwuma no botum ayɛ dzen ama adawurbɔfo binom? Ebɛnadze na yebosusu ho wɔ adzesua yi mu?

³ Hɛn nyinara yɛbɔ mbɔdzen dɛ yebenya asɛnka edwuma no ho adwen pa. Wɔ aman bi do no, ɔnnyɛ dzen dɛ yɛbɛyɛ dɛm. Ebɛnadze ntsi a? Osiandɛ nyimpa piinara na hɔn enyi gye ho dɛ wobosũa Bible no, ma ntsi hɔn mu binom wɔ hɔ a ɔsɛ dɛ wɔtweɔn kesi dɛ wobenya Ɔdasefo bi ma ɔnye hɔn esũa adze! Naaso wɔ aman afofor do no, ɔyɛ dzen ma adawurbɔfo dɛ wɔbɛyɛ  asɛnka edwuma no osiandɛ wɔnntaa nnto nyimpa wɔ fie, na hɔn a wɔto hɔn no so bi a na hɔn enyi nngye Bible no ho ahen biara.

⁴ Sɛ etse beebi a asɛnka edwuma no yɛ dzen ma adawurbɔfo a, bi a nyansahyɛ a ɔwɔ adzesua yi mu no bɔboa wo. Yɛbɔhwɛ dza binom ayɛ a aboa hɔn ma hɔn nsa aka nkorɔfo wɔ asɛnka mu. Afei so yɛbɔhwɛ siantsir a ɔsɛ dɛ yɛkɔ do nya adwen pa anaa yɛma hɛn enyi gye, dɛ nkorɔfo tsie asɛm no anaa wonntsie no.

5. Ebɛn nsɛndzendzen na Adasefo piinara hyia?

⁵ Yɛ araa na ɔreyɛ dzen ma Adasefo piinara dɛ hɔn nsa bɛka nkorɔfo wɔ fie. Adawurbɔfo binom kã asɛm no wɔ efie a wɔabɔ ho ban dzendzenndzen mu, anaa ɔbrɔn a wɔatow ho fasu na wɔdze abow kɛse ato ano. Wɔ mbea a ɔtsetse dɛm no, obotum aba dɛ sɛ hɔn a wɔtse hɔ no bi nntoo nsa mmfrɛɛ wo a, ɔweɔmfo a ɔwɔ hɔ no remma wo kwan ma ennkɔ hɔ. Adawurbɔfo binom so dze, ɔyɛ mberɛw ma hɔn dɛ wɔbɔkɔ fie biara mu, naaso wɔnnto nkorɔfo pii wɔ fie. Bio so adawurbɔfo binom kã asɛm no wɔ nkurow nkakraba mu anaa mbea a atsew no ho a nyimpa kakraabi na wɔwɔ hɔ. Obotum aba dɛ adawurbɔfo botwa kwan tsentsen akɔ nyimpa kor hɔ, naaso bi mpo a nna nyimpa no nnyi fie! Sɛ yehyia nsɛndzendzen a ɔtsetse dɛm a, ɔnnsɛ dɛ hɛn abaw mu bu. Ebɛnadze na yebotum ayɛ ama yeedzi nsɛndzendzen a ɔtsetse dɛm do na hɛn asɛnka edwuma no eetu mpon?

6. Ebɛn kwan do na hɔn a wɔkã asɛmpa no tse dɛ afarfo?

⁶ Jesus dze asɛnka edwuma no totoo edwuma a afarfo yɛ no ho. (Mark 1:17) Obotum aba dɛ afarfo binom dze nda dodow bi bɔkɔ po a worinnya nam biara. Naaso wɔmmpa abaw, mbom wɔyɛ nsesa. Wɔyɛ nsesa wɔ ber, bea, nye kwan a wɔfa do pa nam no mu. Hɛn so yebotum ayɛ nsesa a ɔtse dɛmara wɔ hɛn asɛnka edwuma no mu. Hom mma yensusu nyansahyɛ yinom ho nhwɛ.

7. Sɛ yɛyɛ nsesa wɔ ber a yɛdze kɔ nkorɔfo nkyɛn no mu a, ebɛnadze na obotum efi mu aba?

⁷ Yɛ nsesa wɔ ber a edze kɔ nkorɔfo nkyɛn no mu. Sɛ yɛkɔ asɛnka wɔ ber a yɛbɔto nyimpa pii wɔ fie a, yebenya nyimpa pii akã asɛm no akyerɛ hɔn. Osiandɛ beebiara wɔbɔkɔ biara, ɔnyɛ dɛn ara a wɔbɛba fie! Enuanom piinara ehu dɛ sɛ wɔkɔ asɛnka ewiaber anaa ewimbir a ɔboa osiandɛ wonya nyimpa pii kã asɛm no kyerɛ hɔn. Afei so, bi a dɛm aber no nna fiewuranom regye hɔn ahom ma ntsi hɔn enyi bɛgye ho dɛ wɔnye hɔn bɔbɔ nkɔmbɔ. Anaa ibotum dze nyansahyɛ a asafo mu panyin bi a wɔfrɛ no David dze mae no ayɛ edwuma. Ɔkãa dɛ sɛ ɔreyɛ asaasesin bi mu edwuma a, fie a wɔannkɔto obiara wɔ mu no, ɔyɛ kakra a ɔnye obi a ɔnye no nam no san kɔ hɔ. Ɔtoaa do dɛ: “Sɛ yɛsan kɔ a, nyimpa dodow a yɛkɔto hɔn wɔ fie no, ɔyɛ mpo a na ɔyɛ me nwanwa.” *

8. Yebesi dɛn dze asɛm a ɔwɔ Ɔsɛnkafo 11:6 no ayɛ edwuma wɔ asɛnka mu?

⁸ Ɔnnsɛ dɛ yɛpa abaw. Kyerɛwsɛm a adzesua yi gyina do no ma yehu su a ɔsɛ dɛ yɛda no edzi. (Kenkan Ɔsɛnkafo 11:6.) David a yeedzi kan akã no ho asɛm no ammpa abaw. Nna ɔtaa kɔ fie bi mu naaso ɔnnkɔto obiara wɔ hɔ. Da kor bi dze ɔkɔtoo fiewura no. Nna fiewura no n’enyi gye ho dɛ wɔnye no bɔbɔ Bible mu nkɔmbɔ. Ɔkãa dɛ: “Mebɛtsenaa ha bɛyɛ mfe awɔtwe nye yi, naaso munnhun Jehovah Adasefo wɔ me fie ha da.” David kãa dɛ, “Mebohu dɛ hɔn a yɛnntaa nnto hɔn wɔ  fie no, sɛ ewiei koraa yɛto hɔn a, ɔyɛ a wɔtaa tsie asɛmpa no.”

9. Ebɛnadze na Adasefo binom ayɛ mbrɛ ɔbɛyɛ a hɔn nsa bɛka hɔn a ɔyɛ dzen dɛ wɔbɔto hɔn wɔ fie no?

⁹ Yɛ nsesa wɔ beebi a ekã asɛm no mu. Adawurbɔfo binom ayɛ nsesa wɔ beebi a wɔkã asɛmpa no mu mbrɛ ɔbɛyɛ a hɔn nsa bɛka hɔn a ɔyɛ dzen dɛ wɔbɔto hɔn wɔ fie no. Dɛ nhwɛdo no, wɔabɛda edzi dɛ abɔntsen do adasedzi nye trɔk a wɔhyehyɛ nwoma wɔ do dzi dase no yɛ kwan a otu mpon a ɔma hɛn nsa ka hɔn a wɔtsetse adan akɛse a wɔmma kwan ma wɔnnyɛ efiefi asɛnka wɔ hɔ no mu. Iyi boa Adasefo no ma wodzi hɔn a wɔtsetse mbea a ɔtsetse dɛm no dase. Bio so adawurbɔfo piinara ehu dɛ nkorɔfo enyi gye ho dɛ wɔnye hɔn bɔbɔ nkɔmbɔ anaa wɔbɛgye nwoma wɔ beebi a nkorɔfo tsena gye hɔn ahom, gua mu nye mbea a ndwuma wɔ. Ɔmansin do hwɛfo bi a wɔfrɛ no Floiran a ɔwɔ Bolivia kãa dɛ: “Yɛkɔ gua mu nye mbea a ndwuma wɔ ofi ewiaber dɔnkor kesi ndɔnebiasa aber a hɔn a wɔtɔn adze no ho adwe hɔn kakra no. Mpɛn pii no yɛbɔ nkɔmbɔ kɔ ekyir na yetum mpo hyɛ Bible adzesua ase.”

10. Ebɛn kwan fofor na ibotum afa do edzi nkorɔfo dase?

¹⁰ Yɛ nsesa wɔ kwan a efa do kã asɛm no mu. Fa no dɛ abɔ mbɔdzen mpɛn pii dɛ wo nsa bɛka obi na enye no abɔ nkɔmbɔ. Bi a ayɛ nsesa mpɛn pii wɔ ber a edze kɔ fie hɔ no mu naaso wo nsa nnka no. Ana akwan afofor wɔ hɔ a ibotum afa do ama wo nsa aaka no? Akyerɛbaa bi a wɔfrɛ no Katarína kãa dɛ, “Hɔn a monntoo hɔn wɔ fie da no, ɔyɛ a mekyerɛw hɔn nkrataa. Nsɛm a nkyɛ mihyia hɔn a mebɛkã no, ɔno ara na mekyerɛw no wɔ nkrataa no mu.” Esuadze a ɔwɔ mu nye dɛn? Sɛ ereyɛ asɛnka edwuma no wɔ  w’asaasesin mu a, bɔ mbɔdzen fa akwan ahorow do dzi obiara dase.

11. Ebɛnadze ntsi na nyimpa binom nntsie asɛmpa a yɛkã no?

¹¹ Nyimpa binom nntsie asɛmpa a yɛkã no. Wonnhu mfaso a ɔwɔ do dɛ wobosũa Nyankopɔn ho adze anaa Bible no. Osiandɛ amandzehu ahyɛ wiadze mu mã ntsi wɔnngye Nyankopɔn nndzi. Bio so hɔn enyi nngye Bible no ho osiandɛ wohu dɛ nyamesom akandzifo a wɔkã dɛ wɔdze Bible mu nsɛm bɔ hɔn bra no yɛ ndzɛmba bɔn. Binom so wɔ hɔ a wɔdze hɔn adwen si hɔn edwuma, hɔn mbusua nye hɔn asetsena mu haw do araa ma wonnhu mbrɛ Bible no botum aboa hɔn mpo. Sɛ hɔn a yɛkã asɛmpa no kyerɛ hɔn no nnhu mfaso a ɔwɔ do a, yebesi dɛn akɔ do enya enyigye?

12. Sɛ yɛdze asɛm a ɔwɔ Philippifo 2:4 no yɛ edwuma wɔ asɛnka mu a, ɔbɔboa hɛn dɛn?

¹² Kyerɛ dɛ edwen afofor ho. Nyimpa piinara a ahyɛse no wonntsie asɛmpa no, sɛ ekyir yi wohu dɛ ɔdawurbɔfo no dwen hɔnho ankasa a, wotsie. (Kenkan Philippifo 2:4.) Dɛ nhwɛdo no, David a yeedzi kan akã noho asɛm no kãa dɛ, “Sɛ obi kã dɛ n’enyi nngye asɛmpa no ho a, yɛdze hɛn Bible anaa hɛn nwoma hyɛ hɛn baag mu, na mekã dɛ: ‘Ma mimbisa wo o, ebɛnadze ntsi na ereka dɛm?’” Sɛ yɛkyerɛ dɛ yɛdwen afofor ho a, wohu. Obotum aba dɛ wɔrennkaa asɛm pɔtsee a yɛkãe dze, naaso bi a wɔbɛkaa mbrɛ yesii daa no edzi dɛ yɛdwen hɔnho no. Sɛ fiewuranom amma hɛn kwan ma yaannkasa mpo a, yebotum dze hɛn ndzeyɛɛ nye hɛn enyim yɛbea akyerɛ dɛ yɛdwen hɔnho.

13. Yebesi dɛn asesa hɛn nsɛm mu ma ɔnye fiewuranom hɔn nsɛm tsebea eehyia?

¹³ Sɛ yɛsesa asɛm a yɛdze nam no ma ɔfa fiewuranom no ho a, yɛkyerɛ dɛ yɛdwen hɔnho. Dɛ nhwɛdo no, ana yehu biribi a ɔkyerɛ dɛ mbofra wɔ fie hɔ? Bi a awofo no enyi bɛgye ho dɛ wobohu Bible mu afotu a ɔfa mbatsetse anaa nyansahyɛ a mfaso wɔ do a ɔfa mbrɛ wobesi enya ebusua asetsena a enyigye wɔ mu no ho. Ana yehu dɛ wɔdze ndadze esisi abow no enyim dze robɔ ban anaa wɔdze daagow (padlock) pii atoto abow no mu? Sɛ yehu no dɛm a, bi a yebotum nye fiewura no abɔ nkɔmbɔ afa nsɛmbɔndzi a ebu do wɔ wiadze yi mu a ɔma nkorɔfo bɔ hũ no ho. Bi a fiewura no enyi bɛgye ho dɛ obohu dɛ ber bi bɛba a nsɛmbɔndzi befi hɔ. Mbrɛ tsebea no tse biara no, bɔ mbɔdzen dɛ ebɔboa hɔn a wotsie asɛmpa no ma woeehu mbrɛ Bible mu afotu besi aboa hɔn. Katarína a yeedzi kan akã noho asɛm no kãa dɛ, “Ɔyɛ a modwendwen mbrɛ nokwar no esi aboa me no ho.” Dɛm ntsi, Katarína dze ahotodo kasa,  na ekyingye biara nnyi ho dɛ hɔn a ɔnye hɔn bɔ nkɔmbɔ no hu n’ahotodo no.

14. Dɛ mbrɛ asɛm a ɔwɔ Mbɛbusɛm 27:17 ma yehu no, ebɛn kwan do na sɛ yɛnye afofor nam asɛnka mu a yebotum aboa hɛnho?

¹⁴ Ma afofor mboa wo. Wɔ mfeha a odzi kan no mu no, Paul kyerɛɛ Timothy kwan a ɔfa do kã asɛm no nye mbrɛ osi kyerɛkyerɛ no, na ɔhyɛɛ no nkuran dɛ ɔmfa dɛm kwan no ara do mboa afofor. (1 Cor. 4:17) Hɛn so, yebotum enya hɔn a hɔnho akokwaa wɔ asafo no mu no hɔn suahu do mfaso dɛ mbrɛ Timothy nyae no. (Kenkan Mbɛbusɛm 27:17.) Hom mma yensusu onua bi a wɔfrɛ no Shawn n’asɛm no ho. Ɔyɛɛ akwampaae edwuma no mber kakra wɔ ekuroba bi ase. Nna hɔn a wɔwɔ hɔ no mmpɛ ɔsom fofor biara gye dza wɔwɔ mu no. Ebɛnadze na ɔboaa no ma ɔkɔr do nyaa enyigye? Ɔkãa dɛ, “Aber biara a ho kwan bɛba no nna menye obi nantsew wɔ asɛnka mu. Sɛ yefi fie kor mu rokɔ fie fofor mu a, nna yɛbɔ mbrɛ yebesi etu mpon wɔ hɛn nkyerɛkyerɛ mu ho nkɔmbɔ. Dɛ nhwɛdo no, asɛm a fiewura bi kãe nye nyiano a yɛdze maa no no, nna yɛbɔ ho nkɔmbɔ. Ɔno ekyir no nna yɛhwɛ kwan pa a yebotum afa do ayɛ hɛn adze ber a yeehyia tsebea a ɔtse dɛmara no.”

15. Ebɛnadze ntsi na mpaabɔ ho hia wɔ asɛnka edwuma no mu?

¹⁵ Bɔ Jehovah mpaa dɛ ɔmboa wo. Aber biara a ebɔkɔ asɛnka no, serɛ Jehovah ma ɔmboa wo. Sɛ ɔammfa no sunsum krɔnkrɔn a tum wɔ mu no ammboa hɛn a, yerunntum nnyɛ hwee. (Ndw. 127:1; Luke 11:13) Kã adze pɔtsee a epɛ dɛ Jehovah yɛ ma wo no wɔ wo mpaabɔ mu. Dɛ nhwɛdo no, ibotum aserɛ no dɛ ɔmboa wo ma hu akomapafo a wɔpɛ dɛ wosũa noho adze na wɔayɛ krado dɛ wobetsie asɛmpa no. Ɔno ekyir no yɛ wo mpaabɔ no ho edwuma na kã asɛmpa no kyerɛ obiara a ibehyia no no.

16. Ebɛnadze ntsi na ankorankor adzesua ho hia ama yeetum etu mpon wɔ asɛnka edwuma no mu?

¹⁶ Gye ber sũa adze. Nyankopɔn n’Asɛm no kã dɛ: “Hom [nsɔ] Nyankopɔn pɛ no a oye na ɔsɔ enyi na odzi mũ no [nhwɛ].” (Rom. 12:2) Sɛ yesũa Nyankopɔn ho adze a, yebohu no yie. Ɔba no dɛm na sɛ yɛrekã noho asɛm akyerɛ afofor wɔ asɛnka mu a, wobohu dɛ yɛgye dza yɛrekã no dzi ankasa. Katarína a yeedzi kan akã noho asɛm no kãa dɛ: “Mber kakra a etwa mu no mubohun dɛ mfitsiase Bible nkyerɛkyerɛ a minyim no, ɔsɛ dɛ mehyɛ gyedzi a mowɔ wɔ mu no mu dzen. Dɛm ntsi adanse a ɔkyerɛ dɛ Ɔbɔadze bi wɔ hɔ, Bible no yɛ Nyankopɔn Asɛm ampa, nye dɛ Nyankopɔn wɔ ahyehyɛdze wɔ asaase do no, musũaa ho adze kɔr ekyir.” Katarína kãa dɛ ankorankor adzesua hyɛɛ ne gyedzi dzen na ɔmaa onyaa enyigye kɛse wɔ asɛnka edwuma no mu.

17. Ebɛnadze ntsi na Jesus kɔr do nyaa no som edwuma no ho adwen pa?

¹⁷ Ɔwɔ mu dɛ binom enntsie asɛm a Jesus kãe no dze, naaso ɔkɔr do nyaa adwen pa na oenngyaa dɛ ɔbɛkã asɛmpa no. Ebɛnadze ntsi na ɔyɛɛ dɛm? Nna onyim dɛ no ho hia dɛ nkorɔfo no hu nokwar no. Afei so nna ɔpɛ dɛ ɔboa nyimpa dodow biara a obotum ma wɔbɛgye Ahendzi ho nkrasɛm no to mu. Bio so nna onyim dɛ hɔn a ahyɛse no woenntsie asɛmpa no, ekyir yi wobetsie. Hom mma yensusu dza osii wɔ nankasa n’ebusua mu no ho nhwɛ. Mfe ebiasa na fã a Jesus dze yɛɛ no som edwuma no, no nuanom no mu kor mpo nnyi hɔ a ɔbɛyɛɛ no suanyi. (John 7:5) Naaso wɔbɛyɛɛ Christianfo wɔ no wusoɛr ekyir.​—Andw. 1:14.

18. Ebɛnadze ntsi na yɛkɔ do kã asɛmpa no?

¹⁸ Yennyim hɔn a ewiei koraa no wɔbɛgye  Bible mu nokwar no ato mu. Binom gye nokwar no ntsɛm, binom so dze ɔkyɛr ana wɔaagye. Hɔn a wɔmmpɛ dɛ wotsie asɛmpa no mpo hu hɛn abrabɔ pa nye enyigye a yɛdze yɛ asɛnka edwuma no, na bi a iyi bɛka hɔn ma “wɔaahyɛ Nyankopɔn enyimnyam.”​—1 Pet. 2:12.

19. Dɛ mbrɛ 1 Corinthfo 3:6, 7 kyerɛ no, ebɛnadze na ɔsɛ dɛ yɛkaa?

¹⁹ Ɔwɔ mu dɛ yedua na yegugu do nsu dze, naaso ɔsɛ dɛ yɛkaa dɛ Nyankopɔn na ɔma onyin. (Kenkan 1 Corinthfo 3:6, 7.) Onua bi a wɔfrɛ no Getahun a ɔwɔ Ethiopia kãa dɛ: “Bɔbor mfe 20 no, nna mankotsee na meyɛ Ɔdasefo wɔ asaasesin bi a wɔnntaa nnyɛ mu edwuma mu. Naaso seseiara dze yɛyɛ adawurbɔfo 14. Hɛn mu 13 na yeenuma; me yer na me mba baasa ka ho. Sɛ wɔkyekyɛ mu pɛpɛɛpɛr a nyimpa 32 na wɔba asafo nhyiamu.” Getahun n’enyi agye dɛ ɔkɔr do kãa asɛmpa no na onyaa abotar tweɔɔn dɛ Jehovah bɔtwe nyimpa akomapafo aba ahyehyɛdze no mu!​—John 6:44.

20. Ebɛn kwan do na yɛtse dɛ hɔn a wɔasoma hɔn dɛ wɔnkɔhwehwɛ hɔn a esian ato hɔn no?

²⁰ Jehovah bu nyimpa nyinara dɛ hɔn nkwa som bo. Ɔama hɛn ho kwan dɛ yɛnye ne Ba no mbɔ mu nyɛ edwuma na yɛmboaboa nyimpa a wofi aman ahorow nyinara mu no ano ansaana ewiei no aba. (Hag. 2:7) Yebotum dze hɛn asɛnka edwuma no atoto edwuma a wɔyɛ dze gye nkorɔfo nkwa ber a esian bi esi no ho; na yɛtse dɛ hɔn a wɔyɛ edwuma a ɔtse dɛm na wɔasoma hɔn dɛ wɔnkɔhwehwɛ nyimpa bi a wotu famu egudze, na asaase ebu egu hɔn do. Ɔwɔ mu dɛ bi a hɔn a wotu famu egudze no mu kakraabi na hɔn nsa bɛka hɔn enyimon dze, naaso edwuma a hɔn a wɔasoma hɔn no mu biara yɛ no ho hia. Dɛmara na hɛn asɛnka edwuma no so tse. Yennyim nyimpa dodow a yebotum agye hɔn efi Satan no wiadze bɔn yi mu. Naaso Jehovah botum afa hɛn mu biara do agye hɔn. Onua bi a wɔfrɛ no Andreas a ɔwɔ Bolivia no kãa dɛ, “Sɛ obi sũa nokwar no na wonuma no a, muhu dɛ ɔyɛ nyimpa piinara na wɔaboa no ma oetum ayɛ dɛm.” Ɔmbra dɛ hɛn nyinara yɛbɔkɔ do enya adwen pa a ɔtse dɛm wɔ asɛnka edwuma no ho. Sɛ yɛyɛ dɛm a, Jehovah behyira hɛn, na yebenya enyigye wɔ asɛnka edwuma a yɛreyɛ no mu.