1. (1) ¿Kasa naaʼinraka Jesuu süpüla nashatüin na nikirajüinkana? (2) ¿Kasa naaʼinraka nayakana? (Piirakaa sümüin tü ayaakuaa sünainkat süta tü rewiisütakat).

KEEʼIREESÜ naaʼin Jesuu nashatüin nukuwaʼipa na nikirajüinkana. Wanaa sümaa yaajachin nia mmapaʼa aküjapuʼushi maʼin pütchi sümüin wayuu (Juan 4:35, 36). Aküjashii maʼin pütchi na nikirajüinkana Jesuu sümaa yalayalain naaʼin wanaa sümaa yaajachin nia namaa mmapaʼa (Luc. 10:1, 5-11, 17). Shiasaʼa nütaʼünapa jee nuʼutunapa aaʼin Jesuu, nnojotpünaasü naaʼin na nikirajüinkana sünain aküjaa pütchi (Juan 16:32). Süchikijee nüsoʼiraain aaʼin Jesuu nütütüleʼerüin naaʼin na nikirajüinkana süpüla naaʼinmaainjatüin tü aküjaakat pütchi. Shiasaʼa chapa Jesuu chaa sirumatuʼu, aküjashi maʼin pütchi naya sümaa yalayalain naaʼin. Jashichika na naʼünüükana namüin sünain maa: «Shialeeitpaʼa neʼe joutka sainküin Jerusalén, tü jikirajakat anain» (Aluw. 5:28).

2. ¿Kasa anasü eeka nutuma Jeʼwaa sünain aküjaa pütchi?

² Nia oʼuniraka Jesuu tü aküjaakat pütchi soʼu nakalia na nikirajüinkana otta eeshi chi naaʼinkai Maleiwa naaʼu. Müshiijeseʼe wainmain na wayuu aapaakana sümaa tü pütchi naküjakat. Jamüsüjaʼa soʼu tü Pentecostés eejatkat soʼu juyakat 33 woutiisashii maʼaka 3.000 wayuu (Aluw. 2:41). Shiasaʼa mapa ayatüshii akooʼomüinraain na nikirajüinkana Jesuu (Aluw. 6:7). Nüküjatüjülia Jesuu wainmainjatüin wayuu aapaaka sümaa tü pütchi anasükat sükalioʼu tü kaʼi sajaʼttajatkalü oʼu kasa süpüshuaʼa (Juan 14:12; Aluw. 1:8).

3, 4. (1) ¿Jamüsü kapüleeka aküjaa pütchi suluʼu waneirua mma? (2) ¿Kasa wekirajaajeetka anain sünain ekirajaayakat tüü?

³ Wapüshuaʼa wayakana wachajaain sukuwaʼipa süpüla waküjainjanain maʼin pütchi. Eesü mma eere mapüleein aküjaa pütchi süka  wainmain maʼin na wayuu ekirajaweekana sünain tü Bibliakat. Eesü kapüleere namüin na wawalayuukana nekirajüin napüshuaʼa naya wayuukana. Eekajasaʼa suluʼu wane mma, eesü kapüleere namüin na wawalayuukana naküjain pütchi süka nnojoluin nousütüin nanain na wayuukana nepialuʼu jee shiale sutuma eein na wayuu nnojoliikana kamalain amüin ekirajawaa sünain tü Bibliakat.

⁴ Kapüleere wamüin aküjaa pütchi eere kepiain waya, eesü süpüla waaʼinrüin tü wekirajaajeetkalü anain. Wekirajaajeerü anain tü naaʼinrakat waneinnua wawalayuu süpüla naküjainjanain maʼin pütchi otta jamüin ayatüinjatka waaʼinrüin tia mayaapejeʼe nnojoluin saapajeein wayuu wanüiki.

5. ¿Kasa kapüleʼewaika namüin na wawalayuukana naküjapa pütchi?

⁵ Wainma na wawalayuu kapüleekana amüin aküjaa pütchi süka eein wayuu kepiakana suluʼu edificio jee shiale urbanización eere saaʼinmajünüin suulia shikerotüin wayuu eekai eein. Süpüla nikerotüinjachin wanee wayuu suluʼu tia edificiokot, acheküshi nuunejaanüin nutuma wanee kepiakai suluʼu. Eesü mma eere mapüleein namüin na wawalayuukana naküjain pütchi nepialuʼu na wayuukana, shiajaʼa neʼe eein süpüla nnojoluin wayuu napüla. Eeshii wawalayuu aküjakana pütchi wattapünaa eere nnojoluin jouluin maʼin wayuu. Eeshiijaʼa noʼunule naya wawalayuukana wattamüin süpüla naküjainjanain pütchi. Shiasaʼa nantapa chamüinya, nnojotsü wayuu napüla. Müle wakuwaʼipa mayaa, ¿kasa waaʼinrajatka süpüla ayatüin waküjain maʼin pütchi?

6. ¿Kasa wanaawaka amaa tü aküjaakat pütchi sümaa tü olojookot jime?

⁶ Naashin Jesuu tü aküjaakat pütchi müsü aka saaʼin ejimejaa (Mar. 1:17). Eeshi süpüla masirüin wanee wayuu olojüi jime sünain jeʼra kaʼi, nnojoipejeʼe amalajaain nia sutuma tia. Nüchajaain sukuwaʼipa süpüla kasirüinjachin nia. Eesüjaʼa nuʼwanajaale tü oora nulojokalü oʼu jime jee nüchajaale eere jouluin jime. Eesüjaʼa nuʼwanajaale sukuwaʼipa tü nulojiainjatkat jime. Müinjatia watuma sukuwaʼipa tü aküjaakat pütchi. Wekirajaa sünain tü eekat süpüla waaʼinrüin.

7. ¿Kasa anasü weʼreetka waʼwanajaale tü oora waküjakalü oʼu pütchi?

⁷ Waʼwanajaa tü oora waküjakalü oʼu pütchi. Waaʼinrüle tia, eeshii süpüla wousütüin nanain na wayuukana nepialuʼu waküjapa pütchi namüin. Wainma wawalayuu aküjawaikana pütchi aliika jee piyuujeematapa süka yalain na wayuukana nepialuʼu. Eeshii süpüla naashajaweein na wayuukana soʼu oorakat tia süka neemeraain. Eesü süpüla wooʼulaküin tü naaʼinrakat wanee laülaashi kanüliakai David. Wanaa sümaa nüküjain pütchi aleʼejüshi nia nüchikuaʼa nümaa chi nüküjakai amaa pütchi eemüin tü piichi eejatüle nnojoluin wayuu napüla paala. Anuu nünüiki: «Ponusü taaʼin tü alatakat taleʼejapa namaʼanamüin na wayuukana süka yalain naya nepialuʼu». *

8. ¿Jamüsü süpüla waaʼinrüin tü sümakat Eclesiastés 11:6 waküjapa pütchi?

⁸ Wayaawatüin saaʼu nnojoliinjanain wakulajaain sünain aküjaa pütchi sükajee tü sümakat Eclesiastés 11:6 (paashajeʼera). David chi wachuntakai anülia paalapa, nnojotsü amalajaain naaʼin sünain aküjaa pütchi. Süchikijee wainmatuain nukua nipialuʼujee wanee wayuu, nünta anainchi nia nipialuʼu. Chia wayuukai nütüjaweein saaʼu tü sümakat tü Bibliakat, nümaka nümüin David: «Mekiisalüitchipa juya kepiain taya yaʼayaa, eiwaʼaya teʼrüin antüin wanee aküjai pütchi yaa tamaʼanamüin». Anuu nünüiki David: «Tayaawatüitpa aaʼu naapajeein na wayuukana tü  pütchi waküjakalü amüin waleʼejüle wachikuaʼaya nepialuʼumüin».

9. ¿Kasa naaʼinraka waneinnua wawalayuu süpüla naashajaain namaa na wayuu nnojoliikana napüla nepialuʼu?

⁹ Wachajaa eere jouluin wayuu. Eeshii wawalayuu aküjakana pütchi eere jouluin wayuu süpüla naashajaain namaa na wayuu nnojoliikana nantüin anain nepialuʼu. Jamüsüjaʼa suluʼu waneirua mma eere nnojoluin süpüla waküjain pütchi nepialuʼu na wayuukana, neʼrüin na wawalayuukana anain maʼin naküjale pütchi kaayeruʼupunaa otta süka tü kareetachonkat. Sutuma naaʼinrüin tia, wainma na wayuu eekana süpüla naküjain amüin pütchi. Jamüshiijaʼa na wawalayuukana neʼrüin sünain anain naküjale pütchi suluʼu parque, metkaaraluʼupünaa otta eere noikaain na wayuukana, süka jamüin, wainmain na wayuu aapajeekana tü pütchikat. Anuu nünüiki Floiran, wanee wawala alapalaakai naaʼu na wawalayuukana chaa Bolivia: «Aküjashii waya pütchi kaleʼu jee aliika, metkaaraluʼupünaa jee eere noikaain na wayuukana süka shiain tü oora neemeraakalü oʼu. Sutuma waaʼinrüin tia, wainma na wayuu aapajakana wanüiki jee na wekirajakana sünain tü Bibliakat».

10. ¿Kasa waaʼinrajatka süpüla waküjain pütchi namüin na wayuukana?

¹⁰ Waʼwanajaa sukuwaʼipa waküjia pütchi. Eeshiijaʼa wainmatuainnale woʼunuin nepialuʼumüin na wayuukana süpüla waküjain pütchi namüin, nnojoliipejeʼe naya wapüla. ¿Kasache maa waaʼinrüinjatka süpüla waküjain pütchi namüin? Anuu sünüiki wanee wawala kanüliaka Katarína: «Tashajüin karaloʼuta namüin na wayuu nnojoliikana tapüla nepialuʼu otta tashajüin namüin tü taküjainjatkat namüin». Tü watüjakat sünainjee tü saaʼinrakat tü wawalakat shia wachajaainjatüin maʼin sukuwaʼipa süpüla waküjain pütchi namüin na wayuukana.

11. ¿Jamüsüche nnojotka saapajüin wayuu wanüiki waküjapa pütchi?

¹¹ Wainma na wayuu nnojoliikana aapajeein wanüiki waküjapa pütchi namüin. Naashin nayakana, nnojotsü choʼujaain nekirajaain sünain tü Bibliakat otta nnojoishii aapajeein nüchiki Maleiwa. Eeshii nnojoliire nanoujain nünain Maleiwa sutuma tü kasa mojusü alatakat sainküin mmakat jee shiale sutuma naaʼinrüin kasa mojusü na shikiipüʼükana tü iküleesia ekirajakalü alawaa. Eeshii wayuu nnojoliikana ayaawatüin saaʼu aneerüin nakuwaʼipa nekirajaale sünain tü Bibliakat sutuma naaʼinmaain maʼin naʼyataain, naaʼinmaain napüshi jee sutuma tü kasa alatakat namüin. ¿Kasa waaʼinrajatka süpüla waküjain maʼin pütchi mayaainjeʼe nnojoluin kachipünaain shia saaʼin wayuu?

12. ¿Kasa waaʼinrajatka saashin Filipos 2:4 waküjapa pütchi?

¹² Kapüla waaʼin sukuwaʼipa wayuu. Wainma wayuu nnojoliikana aapajeein tü pütchikat. Shiasaʼa mapa, kamalainsü namüin tü pütchikat sutuma kapülain naaʼin na wawalayuukana nakuwaʼipa (paashajeʼera Filipos 2:4). Anuu nünüiki David, chi wachuntayüikai anülia paalapa: «Eere wanee wayuu eekai nnojoluin naapajeein wanüiki, wanaajaain tü Webibliasekat otta tü karaloʼuta wamaʼanakat. Wasakirüin nia kasain mamalain aaʼujee nümüin tü pütchikat». Natüjaa aaʼulu na wayuukana müleka kapürale waaʼin nakuwaʼipa. Eesü motule naaʼin na wayuukana tü pütchi waküjakat namüin. Nnojoleetpajaʼa motuin naaʼin tü kasa anasü waaʼinrakat namüin. Mayaapejeʼe nnojoluin saapajeein wayuu wanüiki, nayaawateerü aaʼu kapülain waaʼin nakuwaʼipa anale wakuwaʼipa noʼupala jee kamaneere waya namüin.

13. ¿Jamüsü süpüla kamalainjatüin namüin na wayuukana tü pütchi waküjakat namüin?

¹³ Kapürale waaʼin nakuwaʼipa na wayuukana wachajaajeerü sukuwaʼipa süpüla kamalainjatüin namüin tü pütchi waküjakat namüin. Weʼrüle wanee wayuu eekai kachoin, eesü süpüla waküjain sümüin tü sümakat tü Bibliakat süchiki sukuwaʼipa nepijia na tepichikana jee tü naaʼinrajatkat süpüla talatüinjanain naya sümaa napüshi. Weʼrüle nipia wanee wayuu süttashaanain suulia aʼluwajünaa, eesü süpüla waashajaain süchiki jouluin kaʼruwarannuu otta keemain maʼin tü mmapaʼakat. Eesü süpüla waküjain nümüin najaʼlajeʼereerüin Maleiwa tü kasa mojusü eekat maaʼulu yaa. Yootopa waya sümaa wayuu wachajaainjatü sukuwaʼipa süpüla nayaawatüin saaʼu aneerüin nakuwaʼipa naaʼinrüle tü sümakat tü Bibliakat. Müsü sünüiki Katarína, tü wachuntayütkalü anülia: «Taküjapa pütchi jülüjasü taaʼin anain takuwaʼipa sutuma taaʼinrüin tü sümakat tü Bibliakat». Nayaawatakalaka aaʼu na wayuukana shiimain tü sunoujakalü anain saaʼujee sünüiki.

14. Saashin Proverbios 27:17, ¿kasa anasü weʼreetka nnojoliire waya wamüiwaʼain sünain aküjaa pütchi?

 ¹⁴ Watüja sünainjee nakuwaʼipa na wawalayuukana. Nikirajüin Pablo Timoteo süpüla nütüjain aküjaa pütchi jee ekirajaa wayuu. Otta nüküjain nümüin Timoteo nikirajüinjanain na nuwalayuukana sünain tü nütüjakalü apüleerua (1 Cor. 4:17). Müinjana waya maʼaka naaʼin Timoteo sünain watüjain nanainjee na wawalayuu kakaliainnakana sünain anoujaa (paashajeʼera Proverbios 27:17). Anuu nüchiki wanee wawala kanüliakai Shawn, pürekutsootpuʼushi nia suluʼu wanee mma eere wattain saalii wayuu kamalainka amüin tü sunoujakalü anain. Anuu nünüiki süchiki tü naaʼinrakat suulia nuuʼulaain suulia aküjaa pütchi: «Toʼunapa sünain aküjaa pütchi nümaa wanee wawala, yootopuʼushii waya süchiki tü wanüikinjatkat sünain aküjaa pütchi süpüla anaʼleeinjatüin shia jee yootopuʼushii waya süchiki jamüin sünüiki wanee wayuu wamüin. Otta wachajaa wamüsia sukuwaʼipa süpüla jamüinjateerüin wanüiki müle sünüiki wanee wayuu wamüinya».

15. ¿Jamüsü anaka woʼuraajüle süpülapünaa waküjain pütchi?

¹⁵ Wachunta kaalinwaa nümüin Jeʼwaa. Süpülapünaa woʼunuin sünain aküjaa pütchi, anasü wachuntule nümüin Maleiwa chi naaʼinkai süpüla anainjatüin wakuwaʼipa sünain aküjaa pütchi (Sal. 127:1; Luc. 11:13). Pansaa wanüiki nümüin Jeʼwaa wachuntapa kaalinwaa nümüin. Eeshii süpüla wachuntuin kaalinwaa nümüin süpüla wantüin nanain na wayuu aapajeekana nünüiki jee na ekirajaweekana sünain tü Bibliakat. Waaʼinrapa tia, aküjainjana waya pütchi namüin na wayuukana.

16. Süpüla anainjatüin wakuwaʼipa sünain aküjaa pütchi, ¿jamüsü choʼujaaka wekirajaain sünain tü Bibliakat?

¹⁶ Wakatala kaʼi süpüla wekirajaain sünain tü Bibliakat. Anuu sünüiki Roma 12:2: «Juunteerü jiyaawatüin saaʼu tü nüchekakat [Maleiwa] jüpüleerua, je keeʼireejeerü jaaʼin jaaʼinreein tia». Wayaawatüle maʼin saaʼu tü shiimainkat nüchiki Maleiwa, yalayaleerü waaʼin sünain aküjaa pütchi. Anuu sünüiki Katarína: «Tayaawatüin saaʼu choʼujaain pansaainjatüin tamüin tü shikirajakalü anain tü Bibliakat süpüla katchinjatüin tü tanoulakat sünain. Tekirajaashaana anainrüjeseʼe eein chi Akumajakai kasakat süpüshuaʼa, sünain niainya Kanüikin Maleiwa tü Bibliakat otta eein wanee pueulo nuʼuniraka akuwaʼipa maaʼulu yaa». Saashin Katarína akatchinraasü maʼin sunoula otta talatüsü maʼin saaʼin sünain aküjaa pütchi sutuma shikirajaain sünain tü Bibliakat.

17. ¿Jamüshi ayataka Jesuu nüküjain pütchi?

¹⁷ Ayatüshia Jesuu aküjain pütchi mayaainjeʼe eein wayuu nnojoliikana aapajeein nünüiki. Naaʼinrüin tia süka nütüjaain saaʼu choʼujaain namüin na wayuukana nayaawatüinjatüin saaʼu tü shiimainkat nüchiki Maleiwa otta nükaalinjeein maʼin naya. Nütüjaa aaʼu Jesuu eein na aapajeekana süchiki nuluwataainjachin Maleiwa mapeena mayaainjeʼe nayoutapuʼuin tia paala. Majatia nakuwaʼipa na nüpüshikana Jesuu. Wanaa sümaa yaajachin Jesuu mmapaʼa, nnojoishii anoujain na nuwalayuukana nünain (Juan 7:5). Shiasaʼa mapa, süchikijee nüsoʼirüin naaʼin Jesuu anoujashii naya nünain (Aluw. 1:14).

18. ¿Jamüshii ayataka waküjain pütchi?

¹⁸ Nnojotsü watüjaain aaʼu jaraleenain aapaain sümaa tü pütchi wekirajakat. Eeshii wayuu eekai nnojoluin naapaamaatüin sümaa tü pütchi wekirajakalü anain naya. Eeshii na nnojoliikana aapajeein wanüiki, shiasaʼa sutuma neʼrüin anain wakuwaʼipa, eeshii süpüla nanoujain mapa (1 Ped. 2:12).

19. ¿Kasa watüjaka sünainjee tü sümakat 1 Corinto 3:6, 7 süchiki tü aküjaakat pütchi?

¹⁹ Mayaainjeʼe wayain aküjain pütchi otta ekirajüin wayuu, nia chi Maleiwakai katchinka atuma nanoula (paashajeʼera 1 Corinto 3:6, 7). Anuu nünüiki wanee wawala kanüliakai Getahun  kepiashi chaa Etiopía: «Aküjapuʼushi taya pütchi tamüiwaʼa suluʼu wanee mma eepuʼule nnojoluin maʼin süküjünüin pütchi. Alatüsü suulia 20 juya taaʼinrüin tia. Eekajasaʼa jooluʼu eeinapa 14 wawalayuu, woutiisainnapa 13. Naʼakajee naya woutiisakana, eeshii apünüinshii tachonnii otta müsia tü taʼwayuusekat. Antawaishii maʼaka 32 wayuu sünain tü outkajawaakat». Talatüsü naaʼin Getahun süka nnojoluin neemeraain suulia aküjaa pütchi sümaa kaʼatapalain maʼin nia süpüla nüntirüinjanain Jeʼwaa na wayuukana süpüla nanoujain nünain (Juan 6:44).

20. ¿Jamüshii maka waya aka saaʼin wayuu eeka akaalinjain eekai sojoituuin mmapü?

²⁰ Keeʼireesü naaʼin Jeʼwaa katüin soʼu wayuu süpüshuaʼa. Kojutushii waya nümüin Jeʼwaa süka nuuʼulaain waʼyataajiraain nümaa chi Nüchonkai süpüla wantirüin na wayuukana suluʼumüin nupueulose süpülapünaa sajaʼttüin kasakat süpüshuaʼa (Ageo 2:7). Waküjapa pütchi müshii aka waya naaʼin na wayuu akaalinjakana wayuu eekana nojoituuin mmapü. Mayaapejeʼe nnojoluin nayuʼlüin napüshuaʼa na wayuu ojoituukana, kojutusü tü naʼyataainkat atumawaa. Müsia neʼe sukuwaʼipa tü aküjaakat pütchi süka nnojoluin watüjaain saaʼu jeʼreenain wayuu oʼtteʼenneenaka naʼakajee na manoujainsaliikana. Eepejeʼe süpüla nüneeküin Jeʼwaa woʼutku wayakana süpüla wakaalinjain wanee wayuu. Anuu nünüiki Andreas, wanee wawala kepiakai chaa Bolivia: «Wanaa sümaa niyaawatüin wanee wayuu tü shiimainkat nüchiki Maleiwa jee woutiisain nia, nnojotsü shiain sünainjeejatüin tü naaʼinrakat waneeshia wayuu». Ayataʼaya waküjain maʼin pütchi nüchiki Maleiwa jaʼitairü nnojoluin saapajeein wayuu wanüiki. Waaʼinrüle tia, eʼreena waya kasa anasü nutuma Jeʼwaa otta talateena waya sutuma tü kasa anasü eekat sünainjee aküjaa pütchi.