1. ¿Jesukwe kukwe meden kwin bämikani nitre ja tötikaka kwe käne aune nitre ja tötikaka käkwe dre nuainbare? (Üai kena täräkwatabätä mikadre ñärärä).

JESÚS nämäne kä tibienbätä ye ngwane töbikabare kwin kwe kukwe driebätä aune ye erere nikwe ja töi mikadre ie niara tö (Juan 4:35, 36). Jesukwe kukwe driebare nitre ja tötikaka ben ye ngwane, nitre ja tötikaka kwe käkwe kukwe driebare kä jutobiti (Luc. 10:1, 5-11, 17, TNM). Akwa Jesús kani ngite aune murie ketani ye bitikäre, nitre ja tötikaka kwe di namani nekä kukwe driekäre (Juan 16:32). Jesús ganinkröta ye bitikäre, nitre ja tötikaka kwe töi mikani kwe ja töi mike kwatibe kukwe driebätä. Aune namanina kä kwinbiti ngwane, nitre ja tötikaka kwe nämäne kukwe driere kä jutobiti, yebätä nitre ja mikaka niaratre rüere käkwe niebare: “¡Se ñobtä abko mun tä dirire kore amarebti mtare mun nena dirire ni jökräye Jerusalén nete!” (Hech. 5:28).

2. ¿Jehovakwe kukwe meden kwin mikanina nemen bare kukwe driebätä?

² Nitre kristiano siklo kena kukwe driebare ye ngwane, Jesukwe kukwe drie ye jie ngwani aune Jehovakwe kukwe kwin mikani nemen bare ye köböire nitre kwati käkwe kukwe ye kani ngäbiti. Ñodre, kä Pentecostés 33 ye ngwane, nitre 3,000 näre käkwe ja ngökani ñöte (Hech. 2:41). Aune nitre ja tötikaka ye jatani nirien bäri (Hech. 6:7). Ne madakäre, nitre kwati krubäte käkwe kukwe kwin ye kai ngäbiti kä krüte näire niebare Jesukwe (Juan 14:12; Hech. 1:8).

3, 4. a) ¿Ñobätä ñan tä nemen nuäre kukwe driekäre kä ruäre känti? b) ¿Dre rabai gare nie kukwe ja tötikara nekänti?

³ Ni jökrä tä ja di ngwen töbike kwin nita kukwe driere ye ngwane.  Kä ruäre känti, nitre kukwe driekä kräke tä nemen nuäre kukwe driekäre. Ñobätä ñan aune nitre kwati tö ja tötikai Bibliabätä, yebätä ja mräkätre tä kä tike jai täräbätä tötikakäre ja känenkäre. Akwa, kä ruäre känti ñan tä nemen nuäre nitre kukwe driekä kräke, ñobätä ñan aune nitre braibe tä kwen gwi ietre aune nitre ruäre ye ñan tö kukwe mikai gare krubäte jai Bibliabätä.

⁴ Ñan nemen nuäre ni kräke kukwe driekäre ni käite ngwane, kukwe meden mikai gare nie kukwe ja tötikara nekänti ye käkwe ni dimikai krubäte. Ja mräkätre ruäre käkwe dre nuainbarera blitakäre bäri ni kwati ben aune nitre ñan tö ni kukwe nuabätä yebiti ta ñobätä nikwe ja töi mikadre kwin nita kukwe driere ye ngwane, ye rabai gare nie kukwe ja tötikara nekänti.

5. ¿Ñobätä ñan tä nemen nuäre nitre testiko kwati kräke kukwe driekäre?

⁵ Nitre testiko ruäre kräke ñan tä nemen nuäre blitakäre nitre gwi yebe, ñobätä ñan aune kä ruäre känti, ju krikri tä kriemikani kwin aune guardia iti tä ju ye ngübarebiti, yebätä nire ñaka nübaita nitre nünanka yete yekwe ñan raba niken gwä. Kä madakänti, ja mräkätre tä kukwe driere ju ju te, akwa nitre braibe tä kwen gwi ietre. Aune kä ruäre känti, ja mräkätre tä kukwe driere mente, känti ju ñaka ja kenken krubäte aune yete nitre braibe tä nüne. Ñodre, tätre dikekä mente krubäte blitakäre ni iti ben, akwa tätre nemen yete ngwane, nitre ñaka tä kwen gwi ietre. Nita ja tuin kukwe ne kwrere ben ngwane, ¿dre raba ni dimike blite bäri ni kwati ben aune ñaka ja di ngwen nekä?

6. ¿Kukwe drie aune gwakita ye ñobätä bäsi ja erebe?

⁶ Jesukwe kukwe drie ye ketani gwakita yebätä (Mar. 1:17). Köbö kabre te ni gwakitaka ñan käbä raba nemen, ñan tä ja di ngwen nekä, ñakare aune tä kukwe ükete jene jai. Ñodre, ora mada ngwane, kä madakänti o kukwe mada ükaite kwe gwa kitakäre jai. Ye erere ni raba nuainne kukwe driekäre. Kukwe meden ni raba nuainne ye ani mike gare jai.

7. ¿Ora jene jene te nikwe kukwe driedre ngwane dre raba nemen bare?

⁷ Nikwe kukwe driedre ora jene jene te. Ora meden te nitre täi gwi ye ngwane nikwe kukwe driei ngwane, nikwe blitai ni kwati ben. Ñobätä ñan aune nitre ye rükaita gwi. Ja mräkätre kwati tä kukwe driere dere o kä kitera iko ye ngwane, ñobätä ñan aune ora ye ngwane nitre kwati tä kwen gwi ietre yebätä. Ne madakäre, ora ye ngwane nitre töi tärä nemena jäme aune tä juto biare blitakäre. O ni raba nuainne ni umbre ji ngwanka konkrekasionte David ye erere. Niarata kukwe driere kä keteiti känti aune jukwe meden känti nire ñaka tä kwen gwi ie, yekänti niara aune kukwe drie muko kwe tä nikenta jukwe meteta ora tä niken ruäre ta ye bitikäre. Niara tä niere: “Nunta niken bobukäreta ngwane nitre kwati tä kwen gwi nunye, ye tä ti töi mike niä”. *

8. ¿Nita kukwe driere ngwane ni raba Eclesiastés 11:6 ye mike ño täte?

⁸ Nikwe ñaka ja di ngwandre nekä ye texto dianinkä kukwe ja tötikara ne kräke tä ngwen törö nie (ñäkädre Eclesiastés 11:6 yebätä). * David kädininte párrafo käne yebätä, ñaka käkwe ja di ngwani nekä, ñakare aune ja di ngwani krubäte kwe ye köböire ni iti kwani ie gwi. Ni iti ye töi nämäne kukwe Bibliabätä mikabätä gare jai aune niebare kwe David ie: “Kä kwä kwä te tita nüne nete, krire kena ni testiko Jehovakwe nüke jukwebätä tie”. David tä niere: “Nitre ñaka tä kwen gwi nie, akwa biti tä kwen gwi nie  ngwane, bä kabre töta nemen kukwe Bibliabätä mikai gare jai ye nükanina gare tie”.

9. Nitre meden ñan kwen gwi ye ie kukwe driedre yekäre, ¿ja mräkätre ruäre tä dre nuainne?

⁹ Kä madakänti kukwe driedre. Ja mräkätre ruäre tä kukwe driere kä jene jene känti nitre ñan kwen gwi ietre ye ie kukwe driekäre. Ñodre, kä känti ju krikri jabiti kwin yekänti ñan nemen nuäre kukwe driekäre ju ju te. Yekäre, kukwe drieta ji ngrabare aune karito yebiti, ye köböire kukwe kwin tä nemen bare. Parque aune jondron rürübäinkäre yekänti nitre kwati töta nemen blitabätä aune tä täräkwata kain ngäbiti ye nükanina gare ja mräkätre kwati ie. Floiran, nünanka Bolivia, niara tä sribire ni circuito tuabitikä erere, tä niere: “Nunta niken kä känti jondron rürübäinta ora 1 o 3 dere, nitre jondron rürübäinkä ñan tä sribire krubäte ye ngwane. Bäsi käre nunta blite kwin nitre ben aune nunta ja tötika kömike arato”.

10. ¿Ni rabadre dre nuainne kukwe driekäre nitre ie?

¹⁰ Nikwe kukwe ükadrete jene jene jai kukwe driekäre. Nikwe ja di ngwanina blitakäre bati bobu ni iti ben nita kukwe driere yekänti yebätä töbike. Ni janamanena ora bätäkä ngwarbe te gwirete, akwa ñan kwen gwi nie. ¿Nikwe dre nuaindre kukwe driekäre ie? Meri testiko kädekata Katarína tä niere: “Nire ñaka tä kwen gwi tie yei tita tärä tike. Tikwe dre niedre gwärere ie ye erere tita tike täräbätä”. ¿Kukwe ne tä dre driere nie? Nikwe kukwe jene jene ükadrete jai kukwe driekäre nitre jökrä ie.

11. ¿Kukwe drieta nikwe ye ñobätä nitre ruäre ñan tö kukwe nuai?

¹¹ Kukwe drieta nikwe ye nitre ruäre ñan tö kukwe nuabätä. Ngöbö mikadre gare jai aune  kukwe nieta Bibliabätä mikadre gare jai ye niaratre ñan tä ribere jai nütüta kwetre. Kukwe taretare tä nemen bare käbiti tibien yebätä Ngöbö ñan era kräketre aune kukwe nieta Bibliabätä ye niaratre ñan tö kain ngäbiti, ñobätä ñan aune nitre ji ngwanka iglesiate tä kukwe driere akwa ñan tä mike täte yebätä. Nitre mada abokän töita krubäte sribibätä, mräkätre kwebätä aune kukwe tä kisetebätä, yebätä Biblia raba dimike ye ñan nüke gare ietre. Kukwe drieta nikwe ye nitre kwati ñan tä mike ütiäte jai, ¿yebätä ni raba ja töi mike ño kwin?

12. ¿Nita kukwe driere ngwane Filipenses 2:4 ye ni raba mike ño täte?

¹² Ni töita nitrebätä ye nikwe bämikadre. Kenanbe, nitre kwati ñan tö namani ni kukwe nuabätä, akwa ja känenkäre ni kukwei kani ngäbiti kwe, ñobätä ñan aune nire käkwe kukwe driebare ie, yekwe ja töi mikani bökänbätä ye jutuabare ietre yebätä (ñäkädre Filipenses 2:4 yebätä). Ñodre, David, kädininte käne, tä niere: “Nire töi ñaka kukwe mikabätä gare jai tä niere nunye ngwane, nunta Biblia aune täräkwata ye mike ngwäte aune ñobätä töbikata kore kwe ye nunta mike gare jai”. Nunta ja töi mike nitrebätä ngwane ye raba tuin ietre. Nikwe dre niedre ie ye raba käi nikwitekäbiti, akwa nikwe blitabare jäme bentre ye ñan käi rikwitaikä jirebiti ye gare metre nie. Nire ñaka tö blitai nibe akwa nita ja töi mike ño aune ja bämike ño yebiti ni töita bätätre ye ni raba bämike ie.

13. Kukwe drieta nikwe ye raba nitre dimike rabadre tuin nitre ie yekäre, ¿nikwe dre nuaindre?

¹³ Kukwe meden raba nitre dimike aune rabadre tuin kwin nitre ie yebätä nikwe blitadre bentre, yebiti ni töita bätätre ni raba bämike ietre. Ñodre, nire ben nikwe blitadre ye monsoi tärä rabadre tuin nie ngwane, ¿nikwe dre nuaindre? Monsotre ngübadre ño o nitre ja mräkäre dre nuaindre nünankäre kä jutobiti yebätä Biblia tä dre mike gare ye nitre rüne tö mikai gare jai, yebätä ni raba blite ben. Aune candado jutuadre jukwebätä nie ngwane, ¿nikwe dre nuaindre? Ja kämikata aune ni ñaka nüne jäme aune kukwe ye dianka kebera kärekäre yebätä ni raba blite nitre ben. Kukwe ño erere känti, nitre tä ni kukwe nuin ngwane Biblia raba dimike ño ye nikwe ja di ngwandre mike gare ietre. Katarína, kädininte párrafo 10 yekänti, tä niere: “Kukwe metre ti dimikanina ño yebätä tita töbike”. Aune Katarína tä blite ngwane kukwe ye era kräke tä nemen tuin nitre ie.

14. Proverbios 27:17 tä niere erere, ¿kukwe driedre ni madabe ye ñobätä kwin ni kräke?

¹⁴ Nitre madakwe ni dimikadre ye nikwe kadre ngäbiti. Siklo kena yete, Pablo nämäne kukwe driere ño ye driebare kwe Timoteo ie aune yebiti Timoteo nitre mada dimikadre niebare kwe ie (1 Cor. 4:17, TNM). Ja mräkätre ie kukwe gare krubäte yebätä nikwe ja  kitadre Timoteo erere (ñäkädre Proverbios 27:17 yebätä). * Dre namani bare ja mräkä kädekata Shawnbätä yebätä ani blite. Kä keteiti känti kukwe meden nitre nämäne mike täte ye käi nämäne juto bätätre, yekänti niarakwe sribibare kä ruäre te prekursor erere. ¿Dre käkwe dimikani ñan ja di ngwen nekä? Niara tä niere: “Käre ti nämä niken kukwe driere ni madabe. Ju kwati te nun nämä kukwe driere, biti nun nämä niken ju kwati mada kokwäre ngwane nun raba kukwe driere ño bäri kwin ye nun nämä kädriere jabe ji ngrabare. Ñodre, drebätä nun nämä blite ni iti ben ye nun nämänta kädriere jabe aune ni mada käkwe kukwe ye kwrere niedre nunye ngwane, nun rabadre dre niere ie yebätä nun nämä blite”.

15. ¿Ni rikadre kukwe driere ngwane nikwe oradre ye ñobätä ütiäte krubäte?

¹⁵ Jehovakwe ni dimikadre ye nikwe kärädre ie. Ni rikadre kukwe driere batire batire ngwane, nikwe oradre Jehovai ni jie ngwandre kwe yekäre. Üai deme ñaka ni dimikadre akräke kukwe keta kabre ñan raba nemen bare nie (Sal. 127:1; Luc. 11:13). Nikwe oradre Jehovai ngwane kukwe meden ie ni tö nikwe niedre metre ta ie. Ñodre, nitre töi kwin aune tö ni kukwe nuabätä ye ni dimikadre kwe känene ye nikwe kärädre ie. Biti, nikwe ja di ngwandre kukwe driekäre ni ñokwä ie.

16. ¿Ja tötikadre kaibe ye ñobätä kwin ni kräke kukwe driekäre?

¹⁶ Nikwe kä diandrekä jai ja tötikakäre kaibe. Biblia tä niere: “Kukwe meden kwin aune meden Ngöböta kain ngäbiti bätä meden metre ye rabadre gare kwin munye” (Rom. 12:2, TNM). Kukwe metre Ngöböbätä tä nemen bäri era ni kräke ngwane, nita blite bäri töi jämebiti ni madabe kukwe yebätä. Katarína tä niere: “Känera, kukwe ruäre nieta Bibliakwe ye rabadre bäri era ti kräke rükaba gare tie. Aisete, ni Sribekä tärä, Biblia ye abokän kukwe Ngöbökwe aune Ngöbökwe juta keteiti tä kä nengwane ye kukwe meden tä bämike yebätä tikwe ja tötikaba nguseta”. Katarína tä ja tötike kaibe ye tä tödeka kwe mike bäri dite aune kukwe drie ye käi bäri jutobätä nieta kwe.

17. ¿Ñobätä Jesukwe töbikabare kwin kukwe driebare kwe ngwane?

¹⁷ Nitre ñan tö namani Jesús kukwe nuai, akwa yebiti ta Jesukwe kukwe driebare jankunu aune ja töi mikani kwin kwe. ¿Ñobätä nuainbare kwe? Kukwe metre ye rabadre gare nitre ie ye nämäne gare ie aune tö namani nitre nuäi erere dimikai kukwe ye mike gare jai. Kenanbe, nitre ñan käkwe kukwe kwin Gobran Ngöbökwe yebätä kukwe nuani, akwa ja känenkäre kukwe ye kai ngäbiti kwe ye nämäne gare ie arato. Kukwe ye namani bare mräkätre kwebätä. Kä komä biti ötare te kukwe driebare kwe ngwane, etebantre ñan jire iti käkwe ja mikani ja tötikaka kwe (Juan 7:5). Akwa, Jesús ganinkröta ye bitikäre, niaratre ja mikani kristiano (Hech. 1:14).

18. ¿Ñobätä nita kukwe driere jankunu?

¹⁸ Kukwe metre Bibliabätä drieta nikwe ye nirekwe kai ngäbiti ñaka gare nie. Kukwe drieta nikwe ye nitre ruäre ñan tä kain ngäbiti jötrö. Aune nita töbike kwin ye jutuai nitre ñan tö ni kukwe nuabätä ie, ye köböire ja känenkäre raba Ngöbö käikitekä (1 Ped. 2:12).

19. 1 Corintios 3:6, 7 tä niere erere, ¿dre tädre gare metre nie?

¹⁹ Kukwe drieta nikwe ye nita nökö aune ñö metekäbiti nura ye erere, akwa Ngöbö aibe tä mike nirien ye nikwe ngwandre törö jai (ñäkädre 1 Corintios 3:6, 7 yebätä). Ja mräkä nünanka Etiopía kädekata Getahun tä niere: “Kä keteiti känti kukwe drieta nane nane, yete ti aibe nämä testiko Jehovakwe kä 20 näre biti te.  Akwa nengwane, nitre kukwe driekä 14 niena. Nitre 13 näre ja ngökanina ñöte, ye ngätäite ti muko aune monsotre nimä tikwe ja ngökanina ñöte. Nitre 32 näre tä nüke gätäbätä”. Getahun ñaka ja di ngwani nekä kukwe driekäre, ñakare aune nitre töi kwin ye Jehová jatadre ngwena juta kwe kokwäre ye ngübabare bätärekä kwe ye käi jutobätä (Juan 6:44, TNM).

20. ¿Ñobätä ni abokän ni mada diantarikä ye kwrere nie raba?

²⁰ Ja nire ni jökräkwe ye ütiäte Jehová kräke. Niara tä ni mike sribire gwairebe monso kwe yebe ne kwe nitre kä jökräbiti tibien nikwe ükadrekrö juta kwe yete kä krütadre ye känenkri (Ageo 2:7). Kukwe drie ye keta raba nitre diantarita yebätä ye kwrere. Nita nitre diantarikä ye ngätäite, ni juandre ni mada namaninkä kä mäkäte nguse ye mikakäre kwäre. Nitre namaninkä kä mäkäte nguse ye ruäre aibe kwandre nire ni diantarikä ruäre ie, akwa nitre ni diantarikä jökrä tä ja di ngwen ye ütiäte krubäte. Ye kwrere tä nemen bare kukwe driebätä, nitre nibe gobrainta Satanakwe ye ni raba dentari ñan gare nie. Akwa, nitre Ngöbö mikaka täte meden ererebiti Jehová raba nitre ye dimike. Andreas, nünanka Bolivia, tä niere: “Ni jökrä konkrekasionte ye köböire ni iti tä kukwe metre mike gare jai aune tä ja ngökö ñöte ye gare tie”. Aisete nikwe ja di ngwandre töbike kwin nita kukwe driere ye ngwane. Nikwe ye erere nuaindi ngwane, Jehovakwe kukwe kwin mikai nemen bare aune kukwe drie ye käi rabai juto krubäte nibätä.