1. Mufano guchi Yesu alekeraga abanafunzi bage, na gurhe balijirire? (Olole efoto eli oku chiganda.)

YESU aligenderere kugwarha amawazo menja oku bilolere akasi kage k’okuhubiri oku gulu, anasimire abanafunzi bage bagenderere kuhubiri n’omwishingo eyi bananihire okw’abantu babayunviriza. (Yoh. 4:35, 36) Amango Yesu aliri n’abanafunzi bage, baliri bahubiri n’omwete goshi. (Lu. 10:1, 5-11, 17) Aliko babere bafarha Yesu n’okumuyirha, abanafunzi bage baheza enyorha y’okuhubiri mu mango maguma. (Yoh. 16:32) Enyuma y’okufuka kwage, Yesu ahebabo omurhima baseze obwenge oku kasi k’okuhubiri. N’enyuma y’okugaluka embingu, abanafunzi bage bahubiri na mwete gunene kuhika ah’abashombanyi babo baderhaga mpu: “Hala! mwayeneze enyigirizo zenyu omu Yerusalemu.”—Mdo. 5:28.

2. Nka gurhe Yehova anagisha akasi k’okuhubiri?

² Yesu aliri ayerekeza akasi abola Bakristu b’omu myaka 100 ya burhanzi baliri bakola. Na Yehova aligishirebo, bagenderera kuyushuka. Omufano, oku Pentekoste y’omu mwaka gwa 33 N.K.Y., bantu 3 000 ntya, babatizwa. (Mdo. 2:41) N’oluganjo lw’abanafunzi lwagenderera kuyushuka bwenene. (Mdo. 6:7) Yesu abaga alebere oku bantu banene bakayemerere emyazi minja omu siku z’obuzinda.​—Yoh. 14:12; Mdo. 1:8.

3-4. Bulagurhe bahubiri baguma bakabona okw’akasi k’okuhubiri kakomeere, na bichi rhwashambalako mu gunola mwazi?

³ Rhweshi rhunachihangana rhugenderere kugwarha amawazo menja oku kasi kerhu k’okuhubiri. Biyorohere okujira ntyo omu bihugo biguma. Bulagurhe? Bulala bantu banene basimire okuyiga Ebiblia, eyi na baguma mubo banalinga kugera amango bapata Omuhamirizi wabalambagirira! Aliko omu bindi bihugo, abahubiri banabona okw’akola kasi kakomere  bwenene; abantu barhazigana bonekana, na balala babonekana ahambuga, bakaba eyi barhavire basimiswa ne Biblia.

⁴ Akaba olamire omu eneo bikomeeremo okuhubiri, kweri, ebi gunola mwazi gwaganirira byakurhabala. Rhwabona bichi bahubiri baguma bajirire yi bagala kupata bantu banene omu mahubiri. Rhwashuba kubona bulagurhe rhwakagenderera kuhubiri n’omwishingo, chiro abantu bayunviriza changwa nanga oburhumwa bwerhu.

5. Bibazo bihe binene Abahamirizi yi bahurana nabyo omu mahubiri?

⁵ Bahamirizi banene banabona oku bikomeere bwenene okubugana abantu ahamwababo. Bahubiri baguma balamire omu maeneo mali m’obulanzi bukomeere, changwa am’abantu barhakahikamo buzira ruhusa. Ahola hakaba eyi hali omulanzi orhakayemera chiro n’omuntu n’omuguma ahika ahola nk’arhalihamagerwe na nyin’enju. Abandi bahubiri bakahubiri nju ku nju buzira chibazo, aliko banabugana bantu bageke ahambuga. Chiro n’abandi bahubiri banahubiri omu eneo za hale, zilamire mu bantu bageke. Byakahemabo balambagire bwenene yi babona chiro nju nguma, yakanaba eyi nta muntu oliho! Rhurhakwanene kuleka hubiri akaba rhuli rhwabuganana n’ebibazo bili nk’ebyola. Gurhe rhwakajira yi rhuhima ebibazo bili nk’ebila n’okupata bantu banene rhwaganira nabo omu mahubiri?

6. Nka gurhe abahubiri bali kuguma n’abashana?

⁶ Yesu alihuzenye akasi k’okuhubiri n’akasi k’omushana. (Mk. 1:17) Bashana baguma bakaja rhega siku zenene eyi banali bahina. Aliko echola chirharhuma baleka kurhega. Banahindamula akasanzi, ahantu, n’obulyo b’okurhega. Intyo ku rhwakanajira nerhu omu mahubiri. Rhukalaja rhwashambala ku njira ziguma rhwakapima kukolesa.

7. Gurhe byakaba nka rhuhubirire omu bindi-bindi bisanzi?

⁷ Opime kulonza abantu omu kandi-kandi kasanzi. Rhwakapata bantu banene nka rhujire omu mahubiri omu kasanzi bakabonekanamo ahambuga. Okuderha kuli, ntaye olala embuga! Bene-berhu na bali-berhu banene banabona oku kuli kwinja okuhubiri enyuma w’emidi changwa egolo bulala banapata bantu banene. Kandi, banyin’enju bakaba eyi baluhukire banali tayari kuganira mw’ebyola bisanzi. Changwa nkabaga, hali oku wakabona oku kwakaba kwinja okolese ebila mushamuka muguma oyirikirwe David aderhere. Aderhere okw’enyuma y’okuhubiri kasanzi kalebe omu eneo, yewe n’owindi muhubiri bali naye banagalukira enju barhalibwene k’omuntu. Ashambere ntya: “Binansomeza okubona bantu banene bali ahamwababo amango rhwamashuba kugaluka.” *

8. Nka gurhe rhwakakolesa olwandiko lwa Muhubiri 11:6 omu kasi kerhu k’okuhubiri?

⁸ Rhukwanene rhugenderere kuchihangana yi rhupata abantu ahambuga. Echola chi rhuyigire kugerera olwandiko lwerhu gunola mwazi guyumangiireko. (Osome Muhubiri 11:6.) David, rhwashambalagako burhanzi arhaluhaga. Buzinda ku nju nguma, ayinja pata nyin’enju enyuma y’okugalukaho kanene buzira kumupata. Oyola mulume alisimisizwe bwenene okushambala oku bilolere Ebiblia, anaderha ntya: “Namamala myaka 8 ntya hanola, inta Muhamirizi wa Yehova chiro n’omuguma osaga kugera oku mulyango gwani.” David ashambere ntya: “Nabona okw’amango wamaja wabugana abantu ahamwababo,  banazigana kuyunviriza oburhumwa rhuli rhwahubiri.”

9. Nka gurhe Bahamirizi baguma bagalire kushambala n’abantu barhazigana kubonekana ahambuga?

⁹ Opime okuja ahandi-handi hantu. Yi bihashikana okupata abantu barhabonekana ahambuga, bahubiri baguma bahindamwire ahantu banahubiri. Omufano, amahubiri m’okubarabara n’okukolesa eprezantware, yabere njira nyinja y’okupata balala bantu balamire omu maju mazibu-zibu malangirwe, ah’amahubiri ma nju ku nju malahizwe. Echola chili charhabala Abahamirizi kuganira masu oku masu n’abola bantu balamire omu maju marhakagerwamo. Kandi, bahubiri banene babwene oku bantu banene banazigana kusima kuganira changwa kuyemera ebitabu amango bali ahantu h’okuhumukira, omu soko, changwa omu zindi fasi z’okuguzizamo. Floiran, mwimangizi muguma w’omuzunguluko w’omu Bolivie, aderhere ntya: “Rhunaja omu soko n’ahantu h’okuguziza ahagarhi ka sa Saba na sa Mwenda eyi mw’akola kasanzi abachuruzi banaba eyi barhagwerhe bakiliya banene. Rhunazigana kugwarha enganiro nyinja haguma nabo chiro n’okuhwanzisa amafunzo me Biblia.”

10. Njira zihe wakakolesa y’opata abantu?

¹⁰ Opime kukolesa eyindi-yindi njira. Rhuderhe oku wachihanganire kanene y’oshambala na muntu mulebe masu oku masu. Wamulambagirire omu bisanzi birhali kuguma aliko orhasaga mubugana ahambuga. Ka hali ezindi njira wakakolesa y’opata oyola muntu? Katarina aderhere ntya: “Inanyandikira balala ntasaga kubugana ahambuga amaruba mayerekene ebi nakasimire mbwirebo nka mbabuganire masu oku masu.” Bichi birhuyigirize?  Opime njira nguma changwa eyindi y’opata buli muntu omu eneo yawe amango oli omu mahubiri.

11. Bulagurhe bantu baguma barhasimiswa n’oburhumwa bwerhu?

¹¹ Bantu baguma barhasimiswa n’oburhumwa bwerhu. Barhawaza oku balagirire kuyiga eju ya Mungu changwa Ebiblia. Barhayemerere Mungu bulala bali babona malibuko manene oku gulu. Barhasimisizwe ne Biblia bulala bali babona obulyalya bw’abakulu b’amadini bali bachihala mpu bakengere eby’ederhere. Abandi bachishwekere oku makasi mabo, emilala, changwa ebibazo byabo by’omu kalamo, barhanamenyere nka gurhe Ebiblia yakarhabalabo. Nka gurhe rhwakagendereza omwishingo gwerhu amango balala rhuli rhwahubiri barhasimisizwe n’oburhumwa bwerhu?

12. Nka gurhe okukolesa ebinwa bili omu Wafilipi 2:4 kwakarhurhabala amango rhuli omu mahubiri?

¹² Oyerekane ok’olagire oku bandi. Bantu banene barhaliri basimiswa n’emyazi minja embere, buzinda banayinja kusimiswa nayo amango bamabona ok’omuhubiri abalagireko. (Osome Wafilipi 2:4.) Omufano, David rhwashambalagako burhanzi aderhere ntya: “Amango omuntu amaderha okw’arhasimisizwe, rhwanarhabika Ebiblia yerhu changwa echitabu rhwali rhwamamuha n’okuderha ntya: ‘Nakasima imenye bichi birhumire waderha ntyo.’” Abantu banabona ok’omuntu alagire ku bo. Kweri bakayibagira ebi rhwaderhaga, aliko bakwanene kuyibuka okuntu rhwarhumaga bachiyunva. Na chiro akaba abonviriza barhayemerere rhwaganira nabo, rhwakabayereka oku rhubalagireko kugerera okuntu rhuchifarhire na buzira kugaya.

13. Nka gurhe rhwakafarhisa oburhumwa bwerhu n’eby’omunviriza alagirire n’ebimusimisize?

¹³ Rhunayerekana oku rhulagire oku muntu, amango rhwamaderha ebifarhene n’eby’omunviriza alagirire n’ebimusimisize. Omufano, ka hali echiyerekene ok’omunviriza agwerhe abana? Abazere bakasimiswa n’amahano me Biblia malolere okuntu k’okulemba abana changwa amahano ehaanire mayerekene nka gurhe omuntu akapata omulala guli m’obusime. Ka rhubwene rhufuli rhunene oku mulyango? Rhwakachishoga kuganira oku bilolere obubandi n’okuntu buli bwayubahisa abantu omu gulu. Omunviriza akasima bwenene amango amayunva oku nji haba obuzinda b’obubandi. Koshi-koshi byakaba, orhabale abakuyunvirize bamenye okw’amahano me Biblia makarhabalabo. Katarina, rhwabaga rhwashambereko aderhere ntya: “Inanyibuka okuntu okuli kwe Biblia kwarhumaga akalamo  kani kakwira.” Bobola Katarina anaderha n’obwizere eby’ayemerere, n’abantu anaganira nabo banachibonera echola.

14. Nk’oku olwandiko lwa Mezali 27:17 luderhere, nka gurhe bahubiri babiri bakarhabalana?

¹⁴ Oyunguke n’oburhabale bw’abandi. Mu myaka 100 mirhanzi, Paulo aliri ayereka Timoteo enjira aliri akolesa omu kuhubiri n’okuyigiriza, anamuhanula akolese ezola njira omu kurhabala abandi. (1 Ko. 4:17) Kuguma na Timoteo, nerhu rhwakayunguka n’obufundi bw’abandi omu chibaga. (Osome Mezali 27:17.) Rhushambale oku mufano gwa mwene-werhu oyirikirwe Shawn. Mu mango maguma, aliri akolera obupainiya omu eneo elamire mu bantu bageke, eyi na banene mw’abola bantu, basimire bwenene edini lyabo. Bichi byamurhabalaga y’agenderera kugwarha omwishingo? Ashambere ntya: “Buli mango byaliri byahashikana, naliri nakola n’owindi muhubiri. Rhwaliri rhwakolesa akasanzi rhwaliri rhwalambagira nju oku yindi omu kurhabalana rhumenye gurhe rhwakakomeza obufundi bwerhu b’okuyigiriza. Omufano, rhwalemaga rhwashambala oku bilolere okuntu enganiro yageraga haguma na nyin’enju. Rhwanaja rhwaganira oku birhwakaderha omu kandi kasanzi nk’omunviriza amashuba kuderha ebyola.”

15. Bulagurhe okusalira kugwerhe echi kumalire oku bilolere akasi kerhu k’okuhubiri?

¹⁵ Oheme Yehova oburhabale omu sala. Oheme Yehova obwerekezi buli mango wamaja omu mahubiri. Rhukenere eroho lyage lichesibwa lirhurhabale mu buli chintu rhwakola. (Zb. 127:1; Lu. 11:13) Obe wazi amango oli wahema Yehova oburhabale omu sala. Omufano, omuheme akuyerekeze emunda omuntu yeshi-yeshi ali oherhe oborhere b’omurhima bukwanene onali tayari kuyunviriza. Ahola, okwanene kuja wachihangana kuhubiri buli muntu yeshi-yeshi wakabuganana naye.

16. Bulagurhe rhukwanene kujira efunzo lyerhu-lyerhu yi rhupata amalehe menja omu mahubiri?

¹⁶ Orheganye akasanzi k’okuyiga wenyine. Echinwa cha Mungu chiderhere ntya: “Ochiyemeze wenyine obulonza bwa Mungu bwinja, buyemererwe, bunashinganene.” (Ro. 12:2) Okuntu rhuchizerere oku rhumenyere okuli oku bilolere Mungu, ku rhwanagenderera kuchizera amango rhuli rhwashambala n’abandi omu mahubiri. Katarina, rhwashambalagako embere aderhere ntya: “Mu mango mageke mageraga, narhegeera oku byalimpemere nkomeze obwemere bwani oku bilolere nyigirizo ziguma z’omusinji ze Biblia. Nava nayiga bwinja ebyemezo biyerekene oku hali Omulemi, biyerekene oku kweri Ebiblia chili Chinwa cha Mungu, n’oku Mungu agwerhe Olubaga luli lwamukolera zene.” Katarina aderhere okw’elyola funzo lyage-lyage lyalikomeze obwemere bwage n’okuyushula omwishingo gwage omu kasi k’amahubiri.

17. Bulagurhe Yesu aligenderere kugwarha amawazo menja omu mahubiri?

¹⁷ Yesu aligenderere kugwarha amawazo menja n’okugenderera kuhubiri chiro akaba oku bantu baguma barhalilonzeze kuyunviriza oburhumwa bwage. Bulagurhe? Alimenyere kangana gurhe abantu bakenere okumenya okuli, anasima ahereze banene nk’okubyakashobokana olozo l’okuyemera oburhumwa b’Obwami. Alishubire kumenya oku bantu baguma bakalahire kuyunviriza burhanzi, aliko buzinda banayemera. Waza oku byabaga omu mulala gwage. Mu myaka esharhu n’enusu y’amahubiri ma Yesu, ntaye n’omuguma mu bene-babo walibere mwanafunzi wage. (Yoh. 7:5) Aliko enyuma y’okufuuka kwage, bayinja kuba Bakristu.​—Mdo. 1:14.

18. Bulagurhe bihemere rhugenderere kuhubiri?

 ¹⁸ Rhurhamenyere nde wayemera buzinda okuli kwe Biblia rhuli rhwayigiriza. Bantu baguma banageza bisanzi binene kulusha abandi embere bayemere oburhumwa bwerhu. Chiro na balala banalahira kurhuyunviriza, banabona oborhere bwerhu n’amawazo merhu menja, na buzinda, bakahwanza “kukuuza Mungu.”—1 Pe. 2:12.

19. Nk’oku olwandiko lwa 1 Wakorinto 3:6, 7 luderhere, bichi rhukwanene kuyibuka?

¹⁹ Chiro akaba oku rhwerhunabyala n’okumimira, rhukwanene kuyibuka oku Mungu yekuza. (Osome 1 Wakorinto 3:6, 7.) Mwene-werhu muguma oyirikirwe Getahun oli wakolera omu chihugo che Ethiopie aderhere ntya: “Haligerere myaka erhalukire 20 eyi nyenyine nye Muhamirizi aha ndamire. Aliko lero zene, hakola hali bahubiri 14. Mu bo, 13 babatizwe, kuheba ha na mukani na bana bani basharhu. Rhuli rhwahika omu luganjo lwa bantu 32 oku mbuganano.” Getahun agwerhe mwishingo gunene bulala aligenderere kuhubiri omu kulingiriza buzira kahidiko okuntu Yehova akulula abantu b’emirhima minja omu lubaga lwage!​—Yoh. 6:44.

20. Mu njira nchi rhuli nka bantu b’okuyokola abandi?

²⁰ Yehova anabona okw’akalamo k’abantu boshi kali k’akamaro. Arhuhere olukengo l’okukola haguma n’Omugala omu kugusha abantu kurhenga omu mashanja moshi embere obuzinda bwa linola gulu libi buhike. (Hag. 2:7) Akasi kerhu k’okuhubiri kakahuzanywa n’akasi k’okuyokola. Nerhu rhunali nka bantu b’omu chigusho ch’okuyokola charhumirwe omu kukula abantu omu shimu y’amatiyere yafandikire. Chiro akaba oku bantu bageke bonyine bakashimanwa eyi bachizene, boshi bakolere mw’akola kasi, bajirire akasi k’akamaro. Intyo ku binali oku bilolere akasi kerhu k’okuhubiri. Rhurhamenyere bantu bangana gurhe nji bafuma linola gulu libi lya Shetani. Aliko Yehova akakolesa buli muntu yeshi-yeshi mu rhwewe arhabalebo. Andreas olamire omu Bolivie aderhere ntya: “Imenyere oku karhali kasi ka muntu muguma okurhabala omuntu amenye okuli kwe Biblia anahikire kubatizwa.” Rhujage rhwagenderera kugwarha amawazo menja mali nk’amola oku bilolere akasi kerhu k’okuhubiri. Rhukajira ntyo, Yehova arhugisha, n’akasi kerhu k’okuhubiri karhulerhera mwishingo gunene.