1. Iesu be ena hahediba taudia dekenai dahaka haheitalai namona ia hahedinaraia, bona dahaka idia karaia? (Rau 1 ena laulau itaia.)

IESU be tanobada ai ia noho neganai haroro gaukara ia laloa bada, bona ia ura ena murinai idia raka taudia ese unai gaukara do idia laloa bada danu. (Ioa. 4:35, 36) Iesu be ena hahediba taudia ida ia noho neganai, idia be mai ura bada ida haroro gaukara idia karaia. (Luka 10:1, 5-11, 17) To, Iesu idia dogoatao bona hamasea neganai, iena hahediba taudia be nega sisina lalonai haroro gaukara idia hadokoa. (Ioa. 16:32) Iesu ia toreisi lou murinai, idia ia hagoadaia haroro gaukara do idia karaia lou. Bona guba dekenai ia daekau murinai, mai ura bada ida idia haroro dainai edia inai taudia idia gwau: “Itaia, Ierusalema ibounai be emui hahediba herevana amo umui hahonua vadaeni.”​—Kara 5:28.

2. Edena dala ai Iehova ese haroro gaukara ia hanamoa?

² Iesu be Keristani ginigunadia edia gaukara ia gunalaia, bona Iehova ese edia gaukara ia hanamoa dainai, taunimanima momo be sivarai namona idia abia dae. Hegeregere, Pentekoste 33 C.E. ai, taunimanima 3,000 bamona idia bapatiso. (Kara 2:41) Bona hahediba taudia edia namba ia bada daekau haraga. (Kara 6:7) Iesu ia peroveta danu, dina gabedia ai taunimanima momo ese sivarai namona do idia abia dae.​—Ioa. 14:12; Kara 1:8.

3-4. Dahaka dainai tano haida ai sivarai namona idia harorolaia be auka, bona inai atikol ai dahaka do ita herevalaia?

³ Ita ibounai ita ura haroro gaukara ita moalelaia. Tano haida ai, haroro gaukara idia karaia be auka lasi. Badina momo idia ura Baibel idia stadilaia bona edia ladana idia henia, to pablisa taudia be momo lasi dainai, idia naria ela  bona ta ese idia ia stadi henia diba! To, tano ma haida ai, pablisa ese haroro gaukara idia karaia be auka. Badina nega momo taunimanima be ruma ai idia noho lasi, bona idia davaria taudia be Baibel idia laloa bada lasi.

⁴ Bema oi noho gabuna ai haroro gaukara oi karaia be auka, inai atikol ai idia noho hakaua herevadia ese oi idia durua diba. Pablisa haida ese haroro gaukara ai taunimanima momo idia davaria totona idia karaia gaudia do ita herevalaia. Bona do ita itaia edena dala ai ita moale noho diba ena be taunimanima be sivarai namona idia kamonai eiava lasi.

5. Pablisa momo be dahaka koua gaudia idia davaria?

⁵ Nega momo Witnes taudia ese taunimanima be edia ruma dekenai idia davaria lasi. Pablisa haida edia teritori ai sekuriti ese idia naria ruma badadia momo idia noho. Unai dainai, bema ruma tauna ese idia ia boiria lasi, sekuriti gadi ese gwaumaoro do ia henia lasi idia vareai totona. Tano ma haida ai pablisa taudia be iduara ta ta ai idia pidipidi diba, to taunimanima haida sibona idia davaria. To pablisa haida be taunimanima momo idia noho lasi gunika gabudia ai idia haroro. Pablisa taudia be reana gabu daudau idia raka ruma tamona idia karaia totona, to reana ruma tauna idia davaria lasi. Bema unai bamona teritori ai ita gaukara, namona be ita hesiku lasi. Dahaka ita karaia diba unai koua gaudia ita hanaia bona taunimanima momo ita haroro henia diba?

6. Edena dala ai haroro taudia be haoda taudia bamona?

⁶ Iesu ese haroro gaukarana be haoda gaukarana ida ia hahegeregerea. (Mar. 1:17) Haoda taudia haida be reana dina momo lalonai idia haoda to gwarume ta idia davaria lasi. To, idia hesiku lasi bona edia haoda dalana idia haidaua. Edia haoda negana, haoda gabuna bona haoda dalana idia haidaua. Iseda haroro gaukara lalonai unai bamona ita karaia diba. Mani unai ita herevalaia.

7. Nega ma ta ai ita haroro ena namo be dahaka?

⁷ Nega ma ta ai taunimanima ita vadivadi henidia. Bema taunimanima be edia ruma ai idia noho negadiai ita haroro, momo do ita hereva henia diba. Badina ena be taunimanima be gabu idauidau dekenai do idia lao, to gabeai edia ruma dekenai do idia giroa lou. Tadikaka bona taihu momo idia davaria adorahi eiava hanuaboi be nega namona idia haroro totona, badina taunimanima momo idia davaria. Danu, unai nega ai ruma taudia be idia laga-ani bona idia ura herevahereva. Reana elda ta ladana David ese ia badinaia dalana oi tohoa diba. Ia gwau, teritori ai hora ta o rua bamona idia haroro murinai, ia bona ena bamona be tau ta idia davaria lasi rumadia idia sekea lou. Ia gwau, “Lau hoa, badina nega iharuana ai giroa lou neganai ruma taudia ai davaria.” *

8. Edena dala ai haroro gaukara lalonai Hadibaia Tauna 11:6 ita badinaia diba?

⁸ Inai atikol ena siri badana ese ita ia hagoadaia do ita hesiku lasi be namo. (Hadibaia Tauna 11:6 duahia.) Matamanai ita herevalaia tadikaka David be ia hesiku lasi. Ia be ruma ta ia lao henia loulou murinai, ruma tauna ia davaria. Unai tauna be Baibel ena hereva ia abia dae bona ia gwau, “Inai gabu dekenai lagani 8 lau noho, to nega ta Iehova ena Witnes tauna  ta lau hereva henia lasi.” David ia gwau, “Lau itaia taunimanima be nega momo edia ruma ai idia noho lasi, to nega ma ta ai oi davaridia neganai idia ura sivarai namona idia kamonai.”

9. Witnes taudia be dahaka idia karaia ruma ai idia davaria lasi taudia idia haroro henia totona?

⁹ Haroro gabuna oi haidaua. Pablisa haida be edia ruma ai idia davaria lasi taudia idia haroro henia totona, edia haroro gabudia idia haidaua. Hegeregere, sekuriti ese idia naria ruma badadia ai idia noho taudia idia haroro henia totona, strit ai troli haroro idia karaia. Unai amo unai bamona taudia idia hereva henia diba. Danu pablisa momo idia davaria, laga-ani gabudia, maketi bona bisinesi gabudia ai taunimanima idia ura herevahereva bona litrisa idia abia dae. Bolivia ai, sekit naria tauna ta ladana, Floran * ia gwau: “Adorahi 1 oklok bona 3 oklok huanai maketi bona bisinesi gabudia ai lao, unai negai maketi taudia be idia bisi momokani lasi. Idia ida ai herevahereva namonamo bona Baibel stadi ai hamatamaia danu.”

10. Katarína ena ekspiriens amo dahaka oi dibaia?

¹⁰ Haroro dalana ma ta oi tohoa. Reana oi ura tau ta oi hereva henia, to nega idauidau ai ena ruma oi lao neganai oi davaria lasi. Edena dala ma ta ai ia oi hereva henia diba? Katarína ia gwau: “Ruma ai lau davaria lasi taudia dekenai revareva lau torea. Idia dekenai lau ura gwauraia herevana be revareva ai lau torea.” Unai ekspiriens amo dahaka ita dibaia? Namona be haroro daladia idauidau oi tohoa, unai  amo teritori ai idia noho taudia ibounai oi hereva henia diba.

11. Dahaka dainai taunimanima haida idia ura lasi sivarai namona idia kamonai?

¹¹ Taunimanima haida be idia ura lasi sivarai namona idia kamonai. Idia laloa Dirava bona Baibel idia abidadama henia be anina lasi, badina tanobada ai hisihisi momo idia itaia. Baibel idia abia dae lasi, badina idia itaia tomadiho gunalaia taudia idia gwau Baibel idia badinaia to kara dikadia idia karaia. Idia haida be edia moni gaukara, famili bona hekwakwanai idia laloa momo dainai, Baibel ese idia ia durua diba dalana idia lalopararalaia lasi. Ena be ta ia ura lasi kamonai, to edena dala ai iseda haroro gaukara ita moalelaia diba?

12. Edena dala ai haroro gaukara lalonai Filipi 2:4 ena hereva ita badinaia diba?

¹² Taunimanima do oi laloa bada. Guna momo be sivarai namona idia dadaraia, to gabeai idia abia dae badina idia itaia pablisa ese idia ia laloa bada. (Filipi 2:4 duahia.) Guna ita herevalaia tadikaka David, ia gwau: “Bema ta ia gwau ia ura lasi kamonai, iseda Baibel eiava magasin ita gaukaralaia lasi, to ita gwau: ‘Lau moale bema emu lalohadai oi gwauraia, lau ura kamonai.’” Taunimanima idia mamia diba bema ita be idia ita laloa bada. Reana iseda hereva do idia laloaboio, to ita kara namo henia dalana do idia laloatao. Ena be ruma tauna ia ura lasi sivarai namona ia kamonai, to iseda kara bona vairana toana amo do ia diba ia ita laloa bada.

13. Edena dala ai ruma tauna ena noho dalana hegeregerena iseda haroro herevana ita haidaua diba?

¹³ Ruma tauna ena noho dalana hegeregerena iseda haroro dalana ita haidaua neganai, ita hahedinaraia ia ita laloa bada. Hegeregere, ruma dekenai ita itaia gaudia amo ita diba unai ruma taudia be mai edia natudia, a? Reana tama sina do idia ura Baibel amo natudia naria dalana, eiava ruma bese do ia moale dalana ena sisiba idia kamonai. Ita itaia geiti dekenai loka ia noho, a? Reana ruma tauna dekena hari idia vara raskol bona kara dika do idia ore ena sivarai ita herevalaia diba. Reana unai sivarai ia diba dainai do ia moale. Herevana edena haroro herevana ita gaukaralaia, to namona be ita hahedinaraia Baibel ese ia durua diba. Guna ita herevalaia taihu Katarína, ia gwau: “Baibel ese egu mauri ia hanamoa dalana lau laloatao.” Unai dainai, Katarína be mai moale ida taunimanima ia haroro henia bona idia ese iena moale idia itaia danu.

14. Aonega Herevadia 27:17 hegeregerena, edena dala ai pablisa be ta ta idia durua diba?

 ¹⁴ Pablisa ma haida amo heduru oi abia. Aposetolo Paulo ese Timoteo dekenai iena haroro bona hahediba dalana ia hadibaia bona Timoteo ia hamaoroa tadikaka taihu ma haida do ia hadibaia danu. (1 Kor. 4:17) Timoteo hegeregerena, ita danu be ekspiriens pablisa amo heduru ita abia diba. (Aonega Herevadia 27:17 duahia.) Tadikaka Shawn ena ekspiriens mani ita laloa. Ia be hua haida lalonai gunika gabuna ta dekenai ia painia bona unuseniai taunimanima momo be mai edia tomadiho. Edena dala ai ena haroro gaukara ia moalelaia noho? Ia gwau: “Bema mai dalana pablisa ta ida lau gaukara hebou. Ruma ta dekenai ai raka lao lalonai, ta ta ai durua emai haroro dalana ai hanamoa totona. Hegeregere, ruma tauna ena hereva bona emai haere dalana ai herevalaia lou. Bona unai bamona ruma tauna ta ai davaria lou neganai, ai haere henia dalana ai herevalaia.”

15. Haroro gaukara totona, dahaka dainai guriguri be mai anina bada?

¹⁵ Heduru totona Iehova oi guriguri henia. Nega ibounai haroro gaukara oi lao neganai Iehova ena heduru totona oi guriguri. Iseda gaukara ibounai ita hagugurua totona iena lauma helaga ena heduru ita abia be namo. (Sal. 127:1; Luka 11:13) Heduru totona Iehova oi guriguri henia neganai, emu ura gaudia oi gwauraia hedinarai be namo. Hegeregere, ia oi noia kudou-maoro tauna ta do oi davaria. Vadaeni emu guriguri hegeregerena oi davaria taudia ibounai oi haroro henidia.

16. Dahaka dainai sibona eda stadi karana be mai anina bada?

¹⁶ Sibona emu stadi totona nega oi atoa. Baibel ia gwau: “Umui sibona dekenai do umui hamomokania Dirava ena ura be ia namo, ia ese ia abia dae bona ia goevadae.” (Roma 12:2) Sibona eda stadi karana amo Dirava do ita dibaia namonamo bena ma haida dekenai ita haroro neganai, do idia itaia ita herevalaia gaudia ita abia dae momokani. Matamanai ita herevalaia taihu Katarína, ia gwau: “Hua haida gunanai lau laloparara, Baibel ena hahediba hereva badadia haida dekenai egu abidadama lau hagoadaia be namo. Unai dainai Havaraia Tauna ia noho, Baibel be momokani Dirava ena Hereva, bona hari inai negai Dirava be mai ena orea ta lau stadilaia namonamo.” Katarína ia gwau sibona ena stadi karana ese ena abidadama ia hagoadaia bona ena haroro gaukara ia moalelaia bada.

17. Dahaka dainai Iesu be iena haroro gaukara ia laloa bada?

¹⁷ Iesu be ena haroro gaukara ia laloa bada, ena be haida ese ia harorolaia sivaraina idia kamonai henia lasi. Dahaka dainai? Ia laloparara taunimanima ese hereva momokani idia dibaia be namo, bona ia ura momo ia durua Basileia ena sivarai namona idia abia dae totona. Danu ia diba, guna idia ura lasi kamonai taudia be gabeai do idia kamonai. Mani Iesu ena ruma bese ita laloa. Ia be lagani toi mai kahana ia haroro lalonai, iena tadidia ese idia abidadama henia lasi. (Ioa. 7:5) To Keriso ia toreisi lou murinai idia abidadama henia.​—Kara 1:14.

18. Dahaka dainai ita haroro noho?

¹⁸ Ita diba lasi daidia be Iehova ena hesiai taudia ai do idia lao. Taunimanima haida be hereva momokani idia dibaia haraga, to ma haida be gabeai. Danu iseda hereva idia  ura lasi kamonai taudia be iseda moale toana bona kara namodia dainai, gabeai Iehova do idia hanamoa.​—1 Pet. 2:12.

19. Korinto Ginigunana 3:6, 7 hegeregerena, dahaka ita laloatao be namo?

¹⁹ Namona be ita laloatao ena be ita haroro bona hahediba gaukara ita karaia, to Dirava ese anina ia havaraia. (1 Korinto 3:6, 7 duahia.) Ethiopia ai tadikaka ta ladana Getah, ia gwau: “Lagani 20 mai kahana ai haroro gaukara idia karaia lasi teritori ta dekenai lau sibona be Witnes tauna. To hari pablisa ibounai be 14, idia amo 13 be idia bapatiso vadaeni, egu adavana bona emai natudia toi danu. Emai hebou idia mai taudia edia averes be 32 bamona.” Getah ia moale badina ia haroro noho, bona mai haheauka ida ia naria Iehova ese kudou-maoro taudia ia veria mai totona.​—Ioa. 6:44.

20. Edena dala ai ita be taunimanima hamauria taudia bamona?

²⁰ Iehova ese taunimanima ibounai edia mauri ia laloa bada. Inai nega oromana ena dokona ia do mai lasi lalonai, ita ia gaukaralaia iena Natuna ida bese ibounai taudia ita haboua totona. Unai be hahenamo badana. (Hag. 2:7) Iseda haroro gaukara be taunimanima hamauria gaukarana bamona. Bona ita be davara ai ia mutu bouti lalonai idia guia taudia durua totona idia siaia hamauria taudia bamona. Ena be haida sibona idia hamauria, to idia ibounai ese idia karaia gaukarana be mai anina bada. Iseda haroro gaukara danu be unai bamona. Ita diba lasi Satani ena tanobada amo taunimanima hida do ita hamauria. To, Iehova ese ita ta ia gaukaralaia diba idia ita durua totona. Bolivia ai ia noho tadikaka ta ladana Andreas, ia gwau: “Lau itaia ta be Baibel ena hereva momokani ia dibaia bona bapatiso ia abia, badina momo ese ia idia durua.” Namona be iseda haroro gaukara lalonai unai bamona ita karaia danu. Iehova ese ita do ia hanamoa bona iseda haroro gaukara do ita moalelaia bada.