1. Ọgụ-ẹpẹtẹ oyina iJisọsị à tị́ ya deeji ha angịjụgbẹyị nyamwụ? Ẹlịyẹ ị tị́ họ? (Yẹ ifoto ọla ẹbẹ nya ọgbanyẹ.)

ỤKA ká iJisọsị jam odehe ọlẹ, ọ kịnyaa la o-ya ẹla nya Ohe je angịnyị bala ọ-dahịhile nyori ị ka ke ụrụ wo lọọ, lẹ ọ tịtọ ká angịjụgbẹyị nyamwụ ka họ ịnyị ịnyịnyị. (Jọn. 4:35, 36) Ụka ká iJisọsị juwa bala angịjụgbẹyị nyamwụ, ị kaa họ ụkụrwọ nya ẹla Ohe oyaya la ila ọchịchị. (Luk. 10:1, 5-11, 17) Ma lụka o-kpii ọhẹ nyọlẹ kị wu iJisọsị bala ọ-nwọọ kpá, ẹrụ ọnyịịla ọ-kpa pyẹ á ju angịjụgbẹyị nyamwụ ahị kaka. (Jọn. 16:32) Nyọlẹ ká iJisọsị tị wuleji bwula igu kpá, o jwaa ọhụ nyọka yẹhị ju ẹrụ ọnyịịla ọ-kpa pyẹ. Nyọlẹ kọ tị rụ ka epwoohe kpa, ị kpa ẹrụ ọnyịịla pyẹ la ila ọchịchị gbee ká aluji nyaa wẹẹjẹ yẹkẹẹ: “[Anụ] họ la ang ọmẹjẹ nyanụ ọọwa yịrị epweji nya iJerusalẹm yịrị wuu” lẹ.​—Ụkụr. 5:28.

2. Ányị iJihova à tị́ wahị kụrụ ụkụrwọ nya ẹrụ ọnyịịla ọ-kpa pyẹ?

² IJisọsị à kpa angịnyị nyamwụ ịla oyi ọhọhẹ ụgbẹyị jaabwọ kị wẹẹ kpa ẹrụ ọnyịịla pyẹ lẹ, iJihova tị daa ụbwọ ịnyịnyị. Lẹ angịnyị lụmẹ-lụmẹ ye ang ọmẹjẹ nyaa myị. La ahyẹẹnụ nya ịPentịkọsị ọla ẹka iwo ịta kụrụ ịta nyọlẹ kị ma ịKịrayịsị kpá, angịnyị lala ụnọ ịta hụ enyi Ohe. (Ụkụr. 2:41) Angịjụgbẹyị ịwẹ tị kịnyaa la o-ju iru gụ ọwọwa. (Ụkụr. 6:7) Kpọkpọọkpọ, iJisọsị tị ya nyori iru nya angịnyị ị-gụ ọwẹ gụ nyị ka ye ẹrụ ọnyịịla myị la ahyẹẹnụ ihyẹẹkpẹ wẹẹ.​—Jọn. 14:12; Ụkụr. 1:8.

3-4. Ịyẹ à tị́ du ká ẹrụ ọnyịịla ọ-kpa pyẹ kaa lujwo ẹ-ẹga ịhyẹ? Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

³ Ahị kaa maga nyọka kpa ẹhị ọnyịịla yẹ ụkụrwọ nya ẹrụ ọnyịịla ọ-kpa pyẹ. Ẹ-ẹpwụma ịhyẹ, ọ kaa chịkpẹẹ la ọ-ka họ  ịnyị. Ịyẹ à tị́ du? Chajị angịnyị lụmẹ-lụmẹ kaa tịtọ nyọka jẹ́ ịBayịbụụ kpụ angịhyẹ dọmwụ kaa dayị gbe ụka kị ka jẹ́-ẹ yẹ ọngọhẹ nya Alibeenu nya iJihova! Ma ụpa nya odehe ịkịla tị lẹ, ẹrụ ọnyịịla ọ-kpa pyẹ kaa lujwo ha aanahị; chajị angịnyị-ị́ kaa ji ẹpwa nwà ka, ẹla nya ịBayịbụụ á tị kaa há angịlẹ kị tọ ẹ-ẹpwa gbuu ka.

⁴ Ó ri ká juwa o-oye nya ẹga ọlẹ ká ẹrụ ọnyịịla ọ-kpa pyẹ kaa lujwo aalẹ, irya ọ-gba kpehe ịlẹpwụ nya ang ọjẹ́jẹ ọlẹ ka jẹ́-ẹ dang ụbwọ myị́. Ahị ka ya ẹla u-uhye nya ang ọlẹ ká angịhyẹ họ nyọka tọ angịnyị gụ ọọwa ụka kị ja kpa ẹrụ ọnyịịla pyẹ. Ahị ka myịmyị-ị̀ ya ẹla u-uhye nya ang odudu kahị ka chị ọkẹkẹnị kori ká angịnyị-ị́ ke ụrụ wo ẹla nyahị lee ị́ ke ụrụ wo wẹwẹ ka.

5. Akama iyina aanahị lụmẹ-lụmẹ à tị́ la?

⁵ Ọ wẹẹ lujwo gụ ọwọwa ha Alibeenu nya iJihova ịhyẹ nyọka tọ angịnyị ẹ-ẹpwa nyaa lẹẹlẹẹ. Aanahị ịhyẹ kụ oye nya ẹga ịlẹ ká angịnyị kaa chewu ke ẹpwa nyaa lụmẹ lee ọ-dọmwụ me egwalọ dagaga ju ụwa wuu. Ọngọ gbeji ka ji ẹpwa ịlịnyị ọlẹ kọ ka myị-ị ya iwe ha ọngịnyị ọlẹ ká ọngọhẹ kpangga bwu ẹpwa ịwa-à wụrụ ene ka myị́. Ẹ-ẹga ịkịla, aanahị jẹ́-ẹ jẹ bwu ẹpwa ka ẹpwa, ma angị ịmanyị-ịmanyị ị tị kaa tọ ẹ-ẹpwa kem lẹ. Ịnyịnyị aanahị ịkịla tị kaa ya ẹla nya Ohe ẹ-ẹga ọlẹ ká angịnyị ji lụmẹ ka. Aanahị ịịwa ka jẹdịyẹ lụrụ-lụrụ ene kị ka pwụ ẹpwa nya ọngịnyị, ọhẹka ị́ tị dọmwụ ka tọọ ẹ-ẹpwa ka myị́! Kori kahị la akama ịlịịwẹ wẹwẹ, abwọ a chị́ịhị pyẹpyẹ ẹnẹnẹhẹ ka. Ányị ahị tị́ ka họ nyọka kụrụ akama ịlịịwẹ bala ọ-ka jẹ́-ẹ ya ẹla tọ angịnyị gụ ọọwa?

6. Ụgbẹyị oyina angị kpa ẹrụ ọnyịịla pyẹ à tị́ lala alurwe-enyi?

⁶ IJisọsị chụ ụkụrwọ nya ẹrụ ọnyịịla ọ-kpa pyẹ ka pwoku ụkụrwọ nya urwe-enyi ọdada. (Mak. 1:17) Angị durwe-enyi ịhyẹ ka jẹ ahyẹẹnụ ịmanyị tị la ọ-ka wu iyenyi ọhẹ-lọhẹ ka myị́. Ma abwọ-ọ́ kaa chaa pyẹpyẹ ka; ị kaa kpa ụgbẹyị onyeewe họ ụkụrwọ. Ị kaa ka olurwe-enyi lụka ọdatị, ka ẹga ọdatị, bala ọ-kpa ụgbẹyị ọdatị ịnyịnyị. Ahị ka jẹ́-ẹ yụbwọ da ẹ-ẹpwụ nya ẹrụ ọnyịịla ọ-kpa pyẹ ịnyịnyị. Kụ ẹhị yẹ irya ọ-gba kpehe ịlẹ wẹe.

7. Apyobwuna iyina ahị tị́ ka ye kori kahị kpa ẹrụ ọnyịịla pyẹ ụka ịdatị-datị?

⁷ Maga nyọka tọ angịnyị lụka ọkịla. Ahị ka tọ angịnyị gụ ọọwa kori kahị kpehe ụka ká angịnyị ka ji ẹpwa. Abwọ myị́ abwọ kọ la, ọng myị́ ọng jẹ́-ẹ wẹ ẹpwa ka ya ọmwụ gu eji ụka ọhẹ lẹ! Aanahị lụmẹ-lụmẹ kaa kpehe nya ẹla Ohe alẹnụ lee alobyi, chajị ị kaa tọ angịnyị gụ ụka ọlịịwẹ. Ọ-da ọọwa u-uhye, angịnyị kaa mwịịnyọ bala ọ-myị ọnụ nyọka ya ẹla ụka ịlịịwẹ. Lee ọhẹka ọ ka háng nyọka họ jaabwọ ká ọngọgbahị nya ọjịra-jịra ọhẹ ká ẹnyị nyamwụ ri David kaa họ myị́. Ọ ya nyori ụka kịịwa nyị́ kpehe nya ẹla Ohe chẹẹ, ọwa bala ọngọ oheeye nyọwa nyị kaa tịrẹkpẹ ka ẹpwa ịlẹ kịịwa nyị́ yẹ ọngịnyị lụka nya ọgbanyẹ ka. Ọ yẹkẹẹ, “Ọ kaa lam ẹbyẹbyị nya angịnyị ịmanyị tị́ ịlẹ kahị kaa yẹ ụka kahị kele ụka oheeye.” *

8. Ányị ahị tị́ ka kpa ẹla ọlụpwụ nya Ọngọlirya 11:6 họ ụkụrwọ ẹ-ẹpwu nya ẹrụ ọnyịịla ọ-kpa pyẹ nyahị?

⁸ Abwọ á ka chị́ịhị pyẹpyẹ ka. Ụpwụ ịgọgọ ọlẹ kọ ri egbeju nya ang ọjẹ́jẹ ọlẹ kpụhị ịtịya nya abwẹla ọlẹ kahị baba nyọka la. (Wa Ọngọlirya 11:6.) Abwọ á chị́ David ọlẹ kahị gu ẹnyị ụka ọhẹ lalẹ pyẹpyẹ ka. Ọ tọ ọngịnyị ẹ-ẹpwa ọhẹ ụka ohyẹẹkpẹ, nyọlẹ kọ tịrẹkpẹ ka ẹpwa lụmẹ-lụmẹ kpá. Ẹla nya ịBayịbụụ kpụ ọngọọwa ịpyọ kpụ kọ yẹkẹẹ, “M̀ kụ  ẹgẹlẹ lala ẹka ineku myị́ lẹ, ḿ tị yẹ ọngọngọhẹ nya Alibeenu nya iJihova ẹ-ẹpwa nyam ẹnẹnẹhẹ lẹka.” David yẹkẹẹ, “M̀ yẹ nyori ụka kahị maga kpụ kahị tọ angịnyị ẹ-ẹpwa, ị kaa ke ụrụ wo ẹla ọlẹ kahị kpa.”

9. Ányị aanahị ịhyẹ à tị́ bwu wu angịlẹ kọ kaa lujwo la ọ-ka tọ ẹ-ẹpwa ọyị?

⁹ Ma ẹga ọkịla yẹ. Nyọka jẹ́-ẹ yẹ angịlẹ kị kaa lujwo la ọ-ka tọ ẹ-ẹpwa, aanahị ịhyẹ yẹ ẹga ọlẹ kị kaa kpa ẹrụ ọnyịịla pyẹ da lẹ. Ọ-chụ pwokwita, ẹrụ ọnyịịla ọ-kpa pyẹ tụ́ ụgbẹyị da bala apwụ ọ-ya guru ịị cart kaa dụbwọ yẹẹyẹẹ nyọka yẹ angịlẹ kị kụ ẹpwa ịtụka ịlẹ ká ẹrụ ọnyịịla ọ-kpa pyẹ bwu ẹpwa ka ẹpwa á kaa chịkpẹẹ ụ-ụwa ka. Ọwẹ kaa ya iwe ha aanahị nyọka jẹ́-ẹ ya ẹla bala angịlẹ kị kụ ẹpwa ịlịnyị. Ịnyịnyị, aanahị ịhyẹ lụmẹ-lụmẹ yẹ nyori ọ kaa há angịhyẹ gụ nyọka ya ẹla lee o-ye ụpwụ ẹ-ẹga ọmwịịnyọ nya alụma, ihi, bala ẹga ká angịnyị kaa da ọhị. Floiran, ko ri ọngọ kpẹhị rịrị isekut ịị Bolivia yẹkẹẹ: “Ahị kaa ka ẹpwụ nya ihi bala ẹga ká angịnyị kaa da ọhị la ịngịhyẹ nya oje ookpokpo bala oje ịta nya ẹnụ ụka ọlẹ ká alọhị kaa hi ụbwọ pyịnyẹng. Ahị kaa ye angịnyị ya ẹla ta ọlam-ọlam bala ọ-dọmwụ nya ịBayịbụụ ọjẹ́jẹ.”

10. Agbẹyị iyina a tị́ ka kpa nyọka wu angịnyị ọyị?

¹⁰ Kpa ijẹẹhị ụma ọdatị. Ọhẹka à maga mwụba-mwụba nyọka tọ ọngọhe ẹ-ẹpwa lẹ. À ka ẹpwa nyamwụ lụka ọdatị-datị lẹ, ma á tị tọọ ẹ-ẹpwa ka. Agbẹyị ịkịla ịhyẹ ji nyọka jẹ́-ẹ wu ọngọlịnyị ọyị myị́ wẹẹ? Katarína yẹkẹẹ, “M̀ kaa da ileta tọ angịlẹ kam tọ ẹ-ẹpwa ẹnẹnẹhẹ lẹka nyọka ya ẹla ọlẹ kam ka ya jaa ịnọ kori kam taa lịlọm.” Ẹlịyẹ ahị tị́ jẹ́ bwu ẹga nyamwụ? Maga nyọka wu ọng myị́ ọng ọyị o-oye nyang la ụgbẹyị ọhẹ lee ọkịla jaabwọ ká wẹẹ kpa ẹrụ ọnyịịla pyẹ.

11. Ịyẹ tị́ du ká angịhyẹ á kaa myị ke ụrụ wo ẹla nyahị ka?

¹¹ Angịhyẹ á kaa myị ke ụrụ wo ẹla nyahị ka. Ị́ me irya nyori ịwa nyị baba nyọka jẹ́ ang u-uhye nya Ohe Oluhye lee ịBayịbụụ ka. Ị́ kaa myị la Ohe Oluhye ka chajị nyọlẹ kị yẹ ká akama lụmẹ odehe. Ị pwa ẹla nya ịBayịbụụ ọọlajị nyọlẹ kị yẹ nyori alegbeju nya ịgba ọgbagba ịlẹ kị ya ịwa nyị kaa ju ihi nya ịBayịbụụ kaa họ ang ịtịpyo. Angịkịla kaa kụ irya u-uhye nya ụkụrwọ, ugbiyegu, lee akama nyịlaa ụka myị́ ụkạ, ọọwa lẹ ị jẹ́ yẹ abwọlẹ ká ịBayịbụụ ka jẹ́-ẹ daa ụbwọ myị́ kaka lẹlẹ. Ányị ahị tị́ ka jẹ́-ẹ kịnyaa la ọ-chị ọkẹkẹnị ụka ká angịlẹ kahị ya ẹla nya Ohe je á me irya nyori ẹla nyahị nyị́ ju apyobwuna ka?

12. Ányị ọ-kpa ẹla ọlụpwụ nya Ala iFilipayị 2:4 họ ụkụrwọ à tị́ ka jẹ́-ẹ dahị ụbwọ ẹ-ẹpwụ nya ẹrụ ọnyịịla ọ-kpa pyẹ?

¹² Mẹjẹ nyori à kpahị ju angịkịla. Angịhyẹ ịlẹ ká ẹla nyahị á háa ka lụka nya ọgbanyẹ kaa ye ẹrụ ọnyịịla myị ụka ohyẹẹkpẹ kori kị yẹ nyori aanahị nyị kpahị jwaa ọlam-ọlam. (Wa Ala iFilipayị 2:4.) Ọ-chụ pwokwita, David ọlẹ kahị ya ẹla nyamwụ ụka ọhẹ lalẹ, yẹkẹẹ “Kori ká ọngịnyị á ya nyori ọwa nyị́ tịtọ nya ẹla nyahị ka, ahị ka ya ịBayịbụụ lee ụpwụ nyahị ju ang lụka ọwẹ, lẹ ahị kaa byoo yẹkẹẹ: ‘Ọ ka hám nyọka jẹ́ ang odudu kọ lang ịnyị.’ ” Angịnyị kaa jẹ́ datị kori ká ẹla nyaa á ri ẹla nyahị. Ị ka deeri nya ẹla ọlẹ kahị ya kpangga myị́, ma ị tị ka kpịtịya nya abwọlẹ ká ẹla nyahị gwaa ọkịlẹtụ. Kori ká ọngịnyị á dọmwụ myị ahị ya ẹla ka wẹwẹ, ahị ka jẹ́-ẹ mẹjẹ bwula abwẹla bala ẹhị nyahị nyori ahị kpahị jwaa.

13. Ányị ahị tị́ ka họ ká ẹla oyaya nyahị ka kpụ ọng myị́ ọng ọlẹ kahị wẹẹ ya bala ịpyọ?

¹³ Ahị ka yẹ ẹla oyaya nyahị da chajị kọ ka pwoku iwe-ahụrụ nya ọngịnyị bala ọ-kpọọ ịpyọ myị́. Ọ-chụ pwokwita, ahị yẹ ang ẹjẹẹ nyori anjwo juwa ẹ-ẹpwa ọọwa? Ẹla ọlẹ ká ịBayịbụụ ya u-uhye nya ẹla ọmẹjẹ anyị bala abwọlẹ ká ugbiyegu ka bwu chị ọkẹkẹnị gụ ọọwa ka kpa angị ma anyị ịịwa ịpyọ myị́. Ahị yẹ kị da ịgbọgọlọ lụmẹ-lụmẹ chị ube nyaa? Ahị ka ya ẹla u-uhye nya uguru ẹla ọhọhọ bala abwọle ká ọọwa kaa kpa uhi wẹ ẹpwụ nya angịnyị lụmẹ-lụmẹ myị́. Ọ chịkpẹẹ myị́ ká ọngọọwa ka chị ọkẹkẹnị nyọka wo nyori uguru ẹla ọhọhọ ka cheju wẹẹ. Jaabwọ myị́ abwọ kọ la, maga ká da angịlẹ kị ke ụrụ wo lang ụbwọ nyọka yẹ abwọlẹ ká ẹla ọmẹjẹ nya ịBayịbụụ ka jẹ́-ẹ daa ụbwọ. Katarína, kahị ya ẹla nyamwụ ụka ọhẹ lalẹ yẹkẹẹ, “M̀ kaa kpụ ịlọm ịtịya nya abwọlẹ ká ẹlịlẹhị yẹ ọhịhị nyam da ka ọ-há gụ.” Lẹ Katarína kaa myị ọnụ ju ẹla ọlẹ kọ wẹẹ ya, angịlẹ kọ wẹẹ ya ẹla bala tị kaa yẹ jẹ ịnyịnyị.

14. Jaabwọ ká ụpwụ nya Etu 27:17 ya, ányị angịlẹ kị bajẹ kpehe nya ẹla Ohe à tị́ ka jẹ́-ẹ da awụlẹ ụbwọ?

 ¹⁴ Ye bwu ụbwọ ọdada nya angịkịla myị. Lụka nya oyi ọhọhẹ, ịPọlụ mẹ ụgbẹyị ọlẹ kọ kaa bwu ya ẹla nya Ohe bala ọ-mẹ ang jẹ jẹ iTimoti, bala ọ-jwọọ ọhụ nyọka kpa agbẹyị ịịwa da angịkịla ụbwọ. (1 Kọr. 4:17) Lala iTimoti, ahị ka jẹ́-ẹ jẹ́ ang bwu ẹga nya ala ọjịra-jịra ịlẹ kị la ijẹẹhị nya ụkụrwọ ọwẹ. (Wa Etu 27:17.) Kụ ẹhị ye ọ-chụ pwokwita nya ọọnahị ọlẹng ọhẹ ká ẹnyị nyamwụ ri Shawn wẹẹ. Lụka o-kpii ọhẹ, ọ kaa ye ịlahị nya ụgbẹyị ẹ-ẹpwụ nya ẹpwa ọlẹ ká ụmụmẹ nya angịnyị á kaa tịtọ nya ịgba ọgbagba ọhẹ datị hi ịnya ịlaa kaka. Ányị ọ tị́ bwu kịnyaa la ọ-chị ọkẹkẹnị? Ọ yẹkẹẹ: “Ụka myị́ ụka kọ chịkpẹẹ, m̀ kaa bajẹ bala ọngịnyị kpehe nya ẹla nya Ohe. Ahị kaa kpa ụka ọlẹ kahị wẹẹ rụ bwu ẹpwa ọhẹ ka ọkịla da awụlẹ ụbwọ u-uhye nya abwọlẹ kahị ka jẹ́-ẹ mẹ ang jẹ gụ olene. Ọ-chụ pwokwita, ahị kaa wụla abwọlẹ kahị ya ẹla bala ọngịnyị yẹ. Ọọwa lẹ, ahị kaa ya ẹla u-uhye nya abwọlẹ kahị ka nwụ họ kori kahị gba chị iwe-ahụrụ ọlịnyị myịmyị lẹlẹ.”

15. Ịyẹ tị́ du ká abwọ ọrịrị baba ẹ-ẹpwụ nya ẹrụ ọnyịịla ọ-kpa pyẹ nyahị?

¹⁵ Raabwọ ha iJihova nyọka dang ụbwọ. Bịlẹ iJihova nyọka dang ụbwọ ụka myị́ ụka ká ja kpa ẹrụ ọnyịịla pyẹ. Kori ká olegu ịgọgọ nyamwụ á dahị ụbwọ ka, ọngọngọhẹ nyahị á ka jụ ịngịngịhyẹ họ myị́ ka. (Eje. 127:1; Luk. 11:13) Ụka ká ja raabwọ ha iJihova nyọka dang ụbwọ, ya ẹla ọlẹ ká tịtọ kpangga. Ọ-chụ pwokwita, bịlọọ nyọka kpang ụgbẹyị ka ẹga nya ọngịnyị ọlẹ kọ tịtọ nyọka jẹ́ ang u-uhye nyamwụ bala ọ-nwụlanọ nyọka ke ụru. Ọọwa lẹ a họ ụkụrwọ tụ abwọ ọrịrị nyang ọọwa da bwula ọ-ya ẹla nya Ohe je ọng myị́ ọlẹ ká tọ lẹlẹ.

16. Ịyẹ tị́ du ká ịBayịbụụ ọjẹ́jẹ la ịlọhị baba nyọka jẹ́-ẹ kpa ẹrụ ọnyịịla pyẹ?

¹⁶ Hu ụka nọ nya ịBayịbụụ ọjẹ́jẹ nya ịlọng. Omyi ẹla nya Ohe yẹkẹẹ: “Jẹ́ ang ọlẹ kọ ri ang ọnyịịla datị bala ang ọlẹ kọ chịla-chịla bala ang ọlẹ kọ la kpẹẹkpẹẹ datị ẹ-ẹpwụ nya irya nya Ohe Oluhye ayịdang hiigu-hiigu.” (Rom. 12:2) Ụka kahị jẹ́ ang bwu ịBayịbụụ, ahị kaa jẹ́ Ohe Oluhye gụ ọwọwa. Ọọwa ụka kahị ja ya ẹla nyamwụ jẹ angịkịla lẹ, ị ka yẹ jẹ́ nyori ahị nyị myị ọnụ ju ẹla ọlẹ kahị nyị wẹẹ ya ịlẹhị lẹlẹ. Katarína, ọlẹ kahị gu ẹnyị ụka ọhẹ lalẹ yẹkẹẹ: “Lụka ọkẹkpẹ ọhẹ pyịnyẹng, m̀ yẹ nyori m̀ baba nyọka ju ọmyịmyị nyam ọngịrị u-uhye nya ẹla ichiche-ichiche ịhyẹ ịlẹ ká ịBayịbụụ mẹjẹ. Lẹ m̀ jẹ́ ang u-uhye nya ang ẹjẹẹ nyori Ọngọ họ ang juwa ịlẹhị, nyori ịBayịbụụ ri omyi ẹla nya Ohe ịlẹhị, bala o-ri Ohe la ogu nya angịnyị ọlẹ kọ ku ọmwakpa nyamwụ alẹ.” Katarína ya nyori ang ọlẹ ká ọwa nyị jẹ́ lịlọọwa nyị ju ọmyịmyi nyọwa ọngịrị bala ọ-ya ọkẹkẹnị họwa gụ olene ẹ-ẹpwụ nya ẹrụ ọnyịịla ọ-kpa pyẹ.

17. Ịyẹ tị́ du ká iJisọsị jẹ́ kịnyaa la ọ-chị ọkẹkẹnị ẹ-ẹpwụ nya ẹrụ ọnyịịla ọ-kpa pyẹ?

¹⁷ IJisọsị kịnyaa la ọ-chị ọkẹkẹnị bala ọ-kpa ẹrụ ọnyịịla pyẹ nanana nyori angịhyẹ á myị ke ụrụ wo ẹla nyamwụ ka. Ịyẹ à tị́ du? Ọ jẹ́ jaabwọ ká angịnyị baba nyọka jẹ́ ẹlịlẹhị kaka ba, ọ tị tịtọ nyọka ya iwe ha ọng myị́ ọng yẹẹyẹẹ nyọka ye ẹla nya Ịpyị-Adịrahụ myị jaabwọ kọ ka họ ba myị́. Ọ jẹ́ ịnyịnyị nyori angịhyẹ ịlẹ kị myị ke ụrụ lụka nya ọgbanyẹ ka kà ke ụrụ myị́ wẹẹ. Kpịtịya nya ẹla ọlẹ kọ họ ẹ-ẹga nya alugbiyegu nyamwụ kpangga wẹẹ. Ẹ-ẹpwụ nya ẹka ịta ba ẹhya ịlẹ ká iJisọsị kpa ẹrụ ọnyịịla pyẹ, ọngọngọhẹ nya anyịnamwụ á wẹ ka ri angịjụgbẹyị nyamwụ ka. (Jọn. 7:5) Ma, ụka ọlẹ kọ wuleji bwula igu kpá, ị wẹ ka ri angịnyị nya ịKịrayịsị.​—Ụkụr. 1:14.

18. Ịyẹ tị́ du kahị ka kịnyaa la ọ-kpa ẹrụ ọnyịịla pyẹ?

¹⁸ Ahị-ị́ jẹ́ angịlẹ kị ka myị-ị ye ẹlịlẹhị ọla  ịBayịbụụ ịlẹ kahị wẹẹ mẹjẹ myị wẹẹ ka. Angịhyẹ kaa tata gụ angịkịla ene kị ka ke ụrụ wo ẹla nyahị. Angịlẹ kị dọmwụ chụ nyọka ke ụrụ wo ẹla nyahị ka wẹwẹ kaa yẹ abwẹla bala irya ọnyịịla nyahị, lẹ ị ka “gwogbo ha Ohe Oluhye” myị́ wẹẹ.​—1 Pit. 2:12.

19. Ẹlịyẹ Ala 1 ịKọrịntị 3:6, 7 à tị́ mẹjẹ́ẹhị u-uhye nya ụkụrwọ nya ẹrụ ọnyịịla ọ-kpa pyẹ ọlẹ kahị wẹẹ họ?

¹⁹ Jaabwọ kahị wẹẹ ya ẹjẹ nya ẹla nya Ohe tọ bala ọ-kpa enyi jwoo, ahị ka kpịtịya pyii nyori Ohe kaa họ ụpa nyamwụ ịnyịnyị. (Wa 1 Ala ịKọrịntị 3:​6, 7.) Getahun, ọọnahị ọlẹng ọhẹ kọ kaa họ ụkụrwọ ha iJihova Ethiopia yẹkẹẹ: “Ọ gụ ẹka iwo imiiye káam ụbwọọm à ri Olibeenu nya iJihova ẹ-ẹga ọlẹ kam ji. Ma angị kpa ẹrụ ọnyịịla pyẹ tị la angị iwo kụrụ ine lẹẹlẹẹ lẹ. Angị iwo kụrụ ịta lẹpwụ nyaa, tụ́ ahụ bala anjwo nyam ịta, hụ enyi Ohe lẹ. Angịnyị lala angị iwo ịta kụrụ imiiye kaa wẹ ọjịra-jịra.” Getahun chị ọkẹkẹnị nyọlẹ kọ kịnyaa la ọ-kpa ẹrụ ọnyịịla pyẹ jaabwọ kọ wẹẹ godayị la ugbodu ojuju gbe iJihova nyọka gbile angị la ọkịlẹtụ ọnyịịla wẹ ẹpwụ nya ogu nyamwụ!​—Jọn. 6:44.

20. Ụgbẹyị oyina ahị tị́ lala angị chị angịnyị da?

²⁰ IJihova yẹ ọng myị́ ọng wuu lala ọngọ ju apyobwuna. Ọ ya iwe hahị nyọka họ ụkụrwọ bala Ọnyị nyamwụ nyọka tụ angịnyị guru bwu ẹpwụma ọnyị myị́ ọnyị wuu ene ká ọmyịmyị nya odehe ọlẹ ka pwụ eji. (Hag. 2:7) Ahị ka jẹ́-ẹ chụ ụkụrwọ nya ẹrụ ọnyịịla ọ-kpa pyẹ nyahị kaka pwoku ịnya angị chị angịnyị da bwu ẹpwụ nya ayịreji. Ahị lala ogu nya angịlẹ kị du ẹrụ kaka gba angịlẹ kị chabwọ kpụ ụjẹ kpehe. Ọ ka ri angị ịmanyị-ịmanyị kị ka jẹ́-ẹ gba kpehe lahị-lahị kem myị́, ma ụkụrwọ nya angịịwa á tị ri ododu ka. Ịnyịnyị ọ la ẹ-ẹga nya ụkụrwọ nya ẹrụ ọnyịịla ọlẹ kahị wẹẹ họ lẹ. Áhị jẹ́ angị ịmanyị tị́ ịlẹ kahị ka jẹ́-ẹ gba kpehe bwu ẹpwụ nya odehe nya Olegu Onyobyi ọlẹ ka. Ma iJihova ka jẹ́-ẹ kpa ọng myị́ ọng lẹpwụ nyahị daa ụbwọ myị́. Andreas, kọ kụ Bolivia yẹkẹẹ, “M̀ kaa yẹ ọng myị́ ọng ọlẹ kọ jẹ́ ẹlịlẹhị kpụ kọ hu enyi Ohe lala ụbwọ nya ụkụrwọ nya alụma.” Ahị la irya ọnyịịla ọlịnyị kịnyaa u-uhye nya ụkụrwọ nya ẹrụ ọnyịịla ọlẹ kahị wẹẹ họ mẹ. Kori kahị họ ịnyị, iJihova ka wahị kụrụụhị, ẹrụ ọnyịịla ọ-kpa pyẹ tị ka ya ọkẹkẹnị ọtụka-ọtụka hahị ịnyịnyị.