1. Ania ti inyulidan ni Jesus kadagiti pasurotna, ket ania ti epekto dayta kadakuada? (Kitaen ti ladawan iti akkub.)

BAYAT ti kaadda ni Jesus ditoy daga, nagtalinaed a positibo iti ministeriona. Kayatna a kasta met koma ti aramiden dagiti pasurotna. (Juan 4:35, 36) Bayat a kaduana dagiti adalanna, naregtada a nangasaba. (Luc. 10:1, 5-11, 17) Ngem idi naaresto ken napapatay ni Jesus, temporario a napukaw dagiti adalanna ti gagarda a mangasaba. (Juan 16:32) Kalpasan a napagungar, pinaregta ida ni Jesus nga agpokus iti panangasaba. Ket idi immulin idiay langit, kasta unay ti regtada a nangasaba nga uray la inreklamo dagiti bumusbusor kadakuada: “Pinunnoyo . . . ti Jerusalem iti pannursuroyo.”—Ara. 5:28.

2. Kasano a binendisionan ni Jehova ti trabaho a panangasaba?

² Inwanwan ni Jesus ti trabaho dagiti Kristiano idi umuna a siglo, ket binendisionan ida ni Jehova iti irarang-ay. Kas pagarigan, idi Pentecostes 33 C.E., agarup 3,000 ti nabautisaran. (Ara. 2:41) Immadu nga immadu dagiti adalan. (Ara. 6:7) Ngem impadto ni Jesus nga ad-adu pay ti umawat iti naimbag a damag iti maudi nga al-aldaw.—Juan 14:12; Ara. 1:8.

3-4. Apay a marigatan a mangasaba ti dadduma, ken ania ti usigentayo iti daytoy nga artikulo?

³ Ikagkagumaantayo amin ti agbalin a positibo iti ministerio. Iti dadduma a pagilian, nalaka laeng dayta. Apay? Gapu ta nagadu ti mayat nga agpayadal iti Biblia nga uray la masapul nga aguray ti dadduma agingga nga adda available a Saksi  a mangyadal kadakuada! Ngem iti dadduma a pagilian, marigatan a mangasaba ti dadduma a kakabsat; manmano nga adda dagiti tattao iti balayda, ken no addada man iti balayda, saanda unay nga interesado iti Biblia.

⁴ No narigat ti mangasaba iti lugaryo, makatulong kenka dagiti suhestion iti daytoy nga artikulo. Usigentayo ti inaramid ti dadduma tapno ad-adu ti makasabaanda. Pagsasaritaantayo met no kasanotayo nga agtalinaed a positibo, dumngeg man wenno saan dagiti tattao iti mensahetayo.

5. Ania dagiti karit a pakaipaspasanguan ti adu a Saksi?

⁵ Para iti adu a Saksi, rumigat a rumigat a makasarita dagiti tattao iti balayda. Dadduma nga agibumbunannag ti agnanaed kadagiti lugar nga adu ti guardiado nga apartment wenno subdibision. Baka adda parabantay wenno security guard a saan a kaskarina a mangpastrek iti asinoman a saan a bisita ti agnanaed sadiay. Nawaya a makapagbalaybalay ti dadduma nga agibumbunannag ngem manmano a tattao ti madanon iti balayda. Dadduma ti mangasaba iti adayo ken manmano ti matataona a lugar. Adda met dagiti agbiahe wenno magna iti adayo tapno makasaritada ti maysa a tao a posible nga awan gayam iti balayna. No maipasangotayo kadagiti kastoy a karit, ditay sumuko. Ania ti mabalintay nga aramiden tapno mapagballigiantayo dagitoy a karit ken agbalin a nabunga ti ministeriotayo?

6. Kasano a dagiti mangaskasaba ket kas kadagiti mangngalap?

⁶ Inyarig ni Jesus ti trabaho a panangasaba iti panagkalap. (Mar. 1:17) Dadduma a mangngalap ti agkalap iti sumagmamano nga aldaw nga awan ti makalapanda. Ngem dida sumuko no di ket makibagayda. Baliwanda ti oras, lokasion, wenno ti pamay-an ti panagkalapda. Mabalintay met nga aramiden dayta iti ministeriotayo. Usigentayo dagitoy a suhestion.

7. Ania ti mabalin a resulta no mangasabatayo iti sabali nga oras?

⁷ Padasem ti mangasaba iti sabali nga oras. Ad-adu ti makasabaantayo iti oras a posible nga addan dagiti tattao iti balayda. Ngamin, sigurado nga agawid met laeng dagiti tattao iti balayda! Nakita ti adu a kakabsat a praktikal ti mangasaba iti malem wenno rabii ta ad-adu ti makasaritada. Kasta met, mabalin a mas relaks ken nakasagana a makisarita dagiti bumalay kadagita nga oras. Wenno mabalin a makatulong ti suhestion ti maysa a panglakayen nga agnagan David. Imbagana a kalpasan a makapangasabada iti maysa wenno dua nga oras iti maysa a teritoria, sublianda dagiti balay nga awan ti nakasaritada. Imbagana, “Masdaawak ta nagadu ti addan iti balayda no agsublikami.” *

8. Kasano a mayaplikartayo ti Eclesiastes 11:6 iti ministeriotayo?

⁸ Ditay koma sumuksuko. Dayta ti ipalagip ti pannakatema a tekstotayo. (Basaen ti Eclesiastes 11:6.) Saan a simmuko ni David, a nadakamat itay. Adda maysa a balay a namin-adu a sinublianna ket nakasaritana met laeng idi agangay ti bumalay. Interesado ti lalaki maipapan iti Biblia ket imbagana, “Agarup walo a tawenen nga aggigianak ditoy ngem ita la nga adda ti nakasaritak a Saksi ni Jehova iti balayko.” Imbaga ni David, “Napaliiwko a no madanonmo met laengen dagiti tattao  iti balayda, masansan a dumngegda iti mensahe nga ikaskasabatayo.”

9. Ania ti inaramid ti dadduma a Saksi tapno makasaritada dagiti narigat a madanon iti balayda?

⁹ Padasem ti sabali a lokasion. Tapno makasarita dagiti narigat a madanon iti balayda, adda kakabsat a nangasaba iti sabali a lokasion. Kas pagarigan, ti panangasaba iti lansangan ken ti panangusar iti literature cart ket napaneknekan nga epektibo tapno makasarita dagiti tattao nga aggigian kadagiti dadakkel nga apartment a saan a maipalubos ti panagbalaybalay. Gapu iti dayta, personal a makasarita dagiti Saksi dagiti narigat a madanon iti balayda. Kasta met, nakita ti adu a kakabsat a nalaklakada a makasarita dagiti tattao wenno kayatda ti umawat iti publikasiontayo no addada iti pangpubliko a parke, paglakuan, palengke, ken lugar ti negosio. Imbaga ni Floiran, a maysa a manangaywan iti sirkito idiay Bolivia: “Mapankami kadagiti paglakuan ken lugar ti negosio manipud 1:00 agingga iti 3:00 ti malem a saan unay nga okupado dagiti aglako. Masansan no kua a nasayaat ti saritaanmi ken makairugikami pay iti panagadal iti Biblia.”

10. Ania dagiti pamay-an a mabalinmo nga usaren tapno madanonmo dagiti tattao?

¹⁰ Padasem ti agduduma a pamay-an. Ipapantayon a namin-adu a napanka iti maysa a balay. Napanka iti agduduma nga oras ngem saanmo latta a nadanon ti bumalay. Adda kadi sabali a pamay-an tapno makasaritam? Imbaga ni Katarína, “Suratak dagidiay saanko a madanon iti balayda. Isuratko ti ibagak koma no makasaritak ida iti personal.” Ti  punto? Padasem ti nadumaduma a pamay-an ti panangasaba tapno makasaritam dagiti tattao iti teritoriayo.

11. Apay a saan nga interesado ti dadduma a tattao iti mensahetayo?

¹¹ Saan nga interesado ti dadduma iti mensahetayo. Para kadakuada, saanda a kasapulan ti Dios wenno ti Biblia. Saanda a mamati iti Dios gapu ta nakaad-adu ti makitkitada a panagsagaba iti lubong. Laksidenda ti Biblia ta makitkitada dagiti managinsisingpet a lider ti relihion nga agkunkuna a sursurotenda ti ibagbaga dayta a libro. Sangkapanunot ti dadduma ti trabaho, pamilia, wenno problemada, isu a dida makita no kasano a makatulong kadakuada ti Biblia. Kasanotay nga agtalinaed a naragsak uray no ibilangda a saan a napateg ti mensahetayo?

12. Kasano a makatulong iti ministeriotayo ti Filipos 2:4?

¹² Ipakitam ti personal nga interes. Adu ti saan nga interesado iti naimbag a damag iti damo. Ngem gapu ta nariknada ti napudno nga interes nga impakita ti maysa nga agibumbunannag, dimngegda met laeng idi agangay. (Basaen ti Filipos 2:4.) Kas pagarigan, imbaga ni David, a nadakamat itay, “No adda mangibaga a saan nga interesado, isublimi iti bagmi ti Biblia wenno dagiti publikasion, sa ibagami: ‘Mabalin kadi a maammuan no apay a saankayo nga interesado?’” Marikna dagiti tattao no talaga a maseknanka kadakuada. Mabalin a malipatanda ti eksakto nga imbagatayo, ngem posible a malagipda ti interes nga impakitatayo. Uray no saandatayo a pagsawen dagiti bumalay, maipakitatayo iti kababalin ken iti ekspresion ti rupatayo a maseknantayo kadakuada.

13. Kasanotayo nga ibagay ti mensahetayo kadagiti kasapulan ti tunggal bumalay?

¹³ Maipakitatayo ti personal nga interes no ibagaytayo ti mensahetayo kadagiti kasapulan ken paginteresan dagiti bumalay. Kas pagarigan, adda kadi pakakitaan nga adda ubbing iti maysa a balay. Mabalin nga interesado dagiti nagannak iti balakad ti Biblia maipapan iti panangpadakkel iti annak, wenno iti praktikal a suhestion no kasano ti maaddaan iti naragragsak a biag ti pamilia. Adu kadi ti kandado iti ridawda? Mabalin a ti topikotayo ket maipapan iti krimen ken iti buteng nga agraraira iti daytoy a lubong, ket mabalin nga apresiarento ti bumalay nga adda gayam permanente a solusion dagiti krimen. Aniaman ti kasasaad, ikagumaam a tulongan dagiti dumngeg kenka tapno maawatanda a makatulong kadakuada dagiti balakad ti Biblia. Kinuna ni  Katarína, a nadakamat itay, “Laglagipek no kasano a simmayaat ti biagko gapu iti kinapudno.” Kas resultana, makakombinsir ti panagsao ni Katarína, ket sigurado a marikna dayta dagiti makasabaanna.

14. Maitunos iti Proverbio 27:17, kasano a makapagtinnulong dagiti agkadua iti panangasaba?

¹⁴ Agpatulongka kadagiti kakabsat. Idi umuna a siglo, insuro ni Pablo ken Timoteo dagiti pamay-anna a mangasaba ken mangisuro, ket imparegtana ken Timoteo nga isurona met dagita. (1 Cor. 4:17) Kas ken Timoteo, makasursurotayo kadagiti eksperiensiado a kakabsat iti kongregasion. (Basaen ti Proverbio 27:17.) Usigentayo ti kapadasan ti kabsat nga agnagan Shawn. Adda tiempo a nagpayunir iti probinsia a kaaduan a tattao ket kontento iti relihionda. Kasano a nagtalinaed a naragsak? “Agingga a posible, adda kaduak a mangasaba,” imbagana. “Bayat a mapankami iti sumaruno a balay, agtinnulongkami tapno mapasayaatmi ti panangisuromi. Kas pagarigan, pagsaritaanmi no ania ti imbaga ti bumalay ken ti insungbatmi. Sa pagsaritaanmi no ania ti isungbatmi no maipasangokami manen iti kasta a situasion.”

15. Apay a napateg ti panagkararag iti ministeriotayo?

¹⁵ Ikararagmo a tulongannaka ni Jehova. Agpaiwanwanka ken Jehova kada mangasabaka. No awan ti tulong ti nabileg a nasantuan nga espirituna, awan ti maaramidantayo. (Sal. 127:1; Luc. 11:13) No agpatulongka ken Jehova iti kararag, agbalinka nga espesipiko. Kas pagarigan, kiddawem nga iturongnaka iti maysa nga interesado ken nakasagana a dumngeg. Kalpasanna, maitunos iti kararagmo, kasabaam ti amin a makasaritam.

16. Apay a napateg ti personal a panagadal iti ministeriotayo?

¹⁶ Iwayaam ti personal a panagadal. Kuna ti Sao ti Dios: “Paneknekanyo iti bagiyo ti nasayaat, makaay-ayo, ken perpekto a pagayatan ti Dios.” (Roma 12:2) No ad-adda a kombinsidotayo nga ammotayo ti kinapudno maipapan iti Dios, naturturedtayo a mangasaba. Imbaga ni Katarína, a nadakamat itay: “Iti nabiit pay, nabigbigko a masapul a patibkerek ti pammatik maipapan kadagiti kangrunaan a pannursuro ti Biblia. Isu nga inadalko a naimbag ti ebidensia nga adda Namarsua, a ti Biblia ket talaga a Sao ti Dios, ken adda organisasion ti Dios a mangirepresentar kenkuana ita.” Imbaga ni Katarína a gapu iti personal a panagadalna, timmibker ti pammatina ken lalo a rimmagsak iti ministerio.

17. Apay a nagtalinaed a positibo ni Jesus iti ministeriona?

¹⁷ Nagtalinaed a positibo ni Jesus ken intultuloyna ti nangasaba uray no adda dagiti saan nga interesado iti mensahena. Apay? Ammona a kasapulan unay a maammuan dagiti tattao ti kinapudno. Kayatna nga adu ti maikkan iti gundaway nga umawat iti mensahe ti Pagarian. Ammona met a ti dadduma a saan a dimngeg kenkuana idi damo ket mabalin a dumngegto met laeng. Usigentayo ti napasamak iti pamiliana. Bayat ti tallo ket kagudua a tawen a ministerio ni Jesus, awan kadagiti kakabsatna ti nagbalin nga adalanna. (Juan 7:5) Ngem kalpasan a napagungar, nagbalinda a Kristiano.—Ara. 1:14.

18. Apay nga itultuloytayo ti mangasaba?

¹⁸ Ditay ammo no siasinonto dagiti umawat iti isursurotayo a kinapudno iti Biblia. Mabalin a saan a dagus nga awaten ti dadduma ti mensahetayo. Uray dagidiay saan a dumngeg kadatayo iti damo ket mabalin nga “idaydayawda  ti Dios” inton agangay no makitada ti nasayaat a kababalintayo ken ti kinapositibotayo.—1 Ped. 2:12.

19. Sigun iti 1 Corinto 3:6, 7, ania ti masapul a bigbigentayo?

¹⁹ Bayat nga agmulmula ken agsibsibugtayo, masapul a bigbigentayo a ti Dios ti mangpadpadakkel. (Basaen ti 1 Corinto 3:6, 7.) Imbaga ti kabsat a ni Getahun, nga agserserbi idiay Ethiopia: “Iti nasurok a 20 a tawen, sisiak laeng ti Saksi iti manmano a maasak a teritoria. Ngem ita, katorsekamin nga agibumbunannag ditoy. Trese ti nabautisaranen, a pakairamanan ni baketko ken ti tallo nga annakmi. Adda average a 32 a tumabtabuno iti gimongmi.” Naragsak ni Getahun ta intultuloyna ti nangasaba bayat a siaanus a nagur-uray ken Jehova nga iturongna dagiti nasingpet a tattao iti organisasionna!—Juan 6:44.

20. Iti ania a pamay-an a kaslatayo kadagiti rescuer?

²⁰ Napateg ken Jehova ti biag ti amin a tattao. Inikkannatayo iti pribilehio a makipagtrabaho iti Anakna iti panangurnong kadagiti tattao iti amin a nasion sakbay nga agpatingga daytoy a sistema. (Hag. 2:7) Ti trabahotayo a panangasaba ket kas iti rescue mission. Ket kaslatayo kadagiti miembro ti rescue team a naibaon a mangalaw kadagiti minero a napupok iti pagminasan. Uray no manmano ti maalawtayo a sibibiag, nakapatpateg latta ti trabaho nga inaramid ti amin a rescuer wenno paraalaw. Kasta met laeng iti ministeriotayo. Ditay ammo no mano pay ti maalawtayo iti sistema ni Satanas. Ngem mabalin nga usaren ni Jehova ti uray asino kadatayo a tumulong kadakuada. Kinuna ni Andreas, a taga-Bolivia, “Para kaniak, ti tunggal tao nga agad-adal iti kinapudno iti Biblia ken agpabautisar ket resulta ti panagregget ti maysa a grupo.” Kanayon koma a positibotayo iti ministeriotayo. No aramidentayo dayta, bendisionannatayo ni Jehova, ken talaga a makaparagsak kadatayo ti ministeriotayo.