1. Ni ky’erileberyako kyahi ekyo Yesu ahiriraho abakamukwama, kandi mukyaleka ibakolhaki? (Lebaya ekisasani ky’okwa kidipa.)

YESU mwalholha embere eribya n’amalengekania awuwene omw’ithulira liwe hano okwa kihugho, kandi anzire abakamukwama ibabya ibane n’amalengekania ng’ayo okw’ithulira. (Yn. 4:35, 36) Yesu iniane n’abigha biwe, babya bawithire omubiiri w’erithulira w’omuhwa. (Lk. 10:1, 5-11, 17) Aliwe Yesu abere abirihambwa n’eriholha, abigha mubahwa omuhwa ow’erithulira habw’akathambi kake. (Yn. 16:32) Yesu abere abirilhubuka, mwabahira mw’omuhwa w’erihwerya amalengekania okw’ithulira. Kandi abere abirisuba elhubulha, mubathulhughania n’omuhwa munene kyamaleka n’esyonzighu syabu isyayineghenia sithi: “Lebaya! Mwabiryusulya e Yerusalemu mw’erikangirirya lyenyu.”​—Emib. 5:28.

2. Yehova abiritsumulha athi omubiiri w’erithulira?

² Yesu mwasondolha omubiiri ogho Abakristayo ab’omwa kighana ky’erimbere bakolha, kandi Yehova mwatsumulhabo bamayongera. Ng’eky’erileberyako, okwa Pentekote 33 E.K., abandu nga 3,000 mubabatizibwa. (Emib. 2:41) N’omughanzo w’abigha mwalholha embere erikanyirira kutsibu. (Emib. 6:7) Kandi ibbwa Yesu abya iniabiribugha athi abandu banene kwilhaba n’aho banga lighire engulhu yuwene omwa biro by’enyuma-nyuma.​—Yn. 14:12; Emib. 1:8.

3-4. Busana naki hakanayira omubiiri w’erithulira iniakalira abandi, kandi thukendikania okuki omo mwatsi ono?

³ Ithwe bosi thukalengaho eribya n’amalengekania awuwene  okwa mubiiri w’erithulira. Omwa bindi bihugho, kyolhobire erikolha ekyo. Busana naki? Kundi abangyi banzire erigha e Biblia indi n’abaghuma ba kubo bakabya ibanalindire erihika aho Omwema akendi syabahikirako! Aliwe omwa bindi bitsweka, omubiiri w’erithulira akakalira abathuliri; abandu sibalibera eribya eka, n’abangabya eka bangana ghana erianza ebye Biblia.

⁴ Wamabya iw’ikere omwa bulhambu eyo omubiiri w’erithulira akalire, amenge awali omwa mwatsi ono angana kuwathikya. Thukendilebya ebyo bandi babirikolha eribana abandu bangyi omw’ithulira. Kandi thukendi lebya ekyangaleka ithwabya ithune n’amalengekania awuwene mbulha abandu bahulikirire kutse eyihi.

5. Ni bitsibu byahi ebyo Abema bangyi bakabana?

⁵ Kikongera erikalira Abema eribana abandu omwa miyi yabu. Abandi bathuliri bikere omwa bitsweka ebiri mwa manyumba aw’aliko obutheya obukalire kutse awaliko esyogeti. Anganabya iniali kw’abatheya abathelighira omundu wosi-wosi eringiramo athakokibirwe. Abandi bathuliri bangana ghenda nyumba okwa nyumba isihali ekikabakakiraya aliwe ibeya eka y’abandu bake. N’abandi bathuliri bakathulira omwa byalu eyithe bandu banene. Abathuliri bangana ghenda lhughendo lhuuli eriyabana mundu mughuma​—kandi ibeya isyali nayu! Thwamabana ebitsibu ng’ebi, sithutholere thukabikyako. Thwanga kolhaki erisingura ebitsibu ng’ebi nuku thwangabya ithune mubana ab’erithulira?

6. Abathuliri bali bathi ng’abasohi?

⁶ Yesu mwalinganisya omubiiri w’erithulira ng’omubiiri w’erisoha. (Mk. 1:17) Abandi basohi bangana ghunza biro binene isibalibathabana n’eyiswe n’enguma. Aliwe sibali bikyako; bakahiraho embinduka. Bakahindulha endambi, omwanya, kutse emibere y’erisoheramo. Nethu thwangana kolha esyombinduka ng’esyo omw’ithulira. Thalengekania okwa menge ano.

7. Ni byahi ebyanga lhwiririra omw’ithulira okwa sindi ndambi?

⁷ Lengaho erihika okwa bandu okwa yindi ndambi. Ithukendibana bandu bangyi thwamathulira okwa ndambi eyo banga banikiramo eka. Kundi nibya, obuli mundu akabya ini w’erisuba eka! Balikyethu bangyi bakabana ikyuwene erithulira omw’ithungyi kutse omw’igholho kundi bakabana abandu bangyi. Eryongera okw’ekyo, okwa syondambi esyo, abandu bakabya ibali okw’ilhuhuka n’eribya ibanayitheghekire erikania n’abandi. Kutse obundi amenge w’omusyakulhu w’ekithunga oyukahulhawamo David iniangana kuwathikya. Akabugha athi bakabya babirithulira ahabw’esyosaha nga sy’esyo, iyo n’oyo balyakolha nayu bakasuba okwa balhue isibali eka. Akabugha athi, “Ngasweka thukeya abangyi b’eka thukasubayo.” *

8. Thwanga ghendera thuthi okwa Omugambuli 11:6 thukakolha omubiiri wethu w’erithulira?

⁸ Sithutholere thukabikyako. Erisako erihirikirire omwatsi ono likathw’ibukaya amalengekania agho thutholere ithwabya nagho. (Soma Omugambuli 11:6.) David, oyo thulyakanayako mwathabikyako. Okwa nyumba nguma, mwasalha eyako omundu iniamabirisubulirako ngendo nyingyi. Omulhume oyo mwahulikirira n’eribugha athi, “Namabirighunza hano h’emyaka nga munani, sindinathabana n’Omwema wa Yehova n’omughuma akanyibungira.” David akabugha athi, “Nabirilhangira  ngoku wukabya wukasalha w’eya abandu b’eka mughulhu mungyi bakahulikirira.”

9. Abandi Bema babirikolhaki eribana abandu abo kikalire eribana?

⁹ Lengesaya erithulira ehandi. Erithoka eribana abandu abathebanika eka, abandi bathuliri bakanahindulha omwanya w’erithuliramo. Ng’eky’erileberyako, erithulira okwa nzira n’erikolesya ehiggali yabiribya nzira eyikakolha ndeke ey’eribaniramo abandu abali omwa myanya eyiriko obutheya obukalire eyithelighirawa erithuliramo nyumba okwa nyumba. Eki kikaleka Abema ibathoka erithulira busu okwa busu n’abandu abo bathe banga bwene. Kandi abathuliri bangyi babirilhangira ngoku abandu bakanza erihulikirira kutse erimya ebitabu byethu aho abandu bakalhuhukira, omwa kathali, n’omwa myanya y’esuburu. Floiran, omulebererya w’omuthimbo e Bolivia, akabugha athi: “Thukaghenda omwa kathali n’omwa myanya y’esuburu omw’ithungyi okwa saha 7:00 erihika 9:00 omughulhu abakaghulha ni bake. Mughulhu mungyi thukabana ab’erikania nabu ndeke kandi nibya ithwabana n’abigha.”

10. Ni nzira syahi esyo wanga kolesya eribana abandu?

¹⁰ Lengesaya esindi nzira. Thubughe thuthi wabirilengaho ngendo nyingyi eribungira omundu mulebe. Wabirihika okwa wiwe okwa sindi ndambi aliwe iwuthamweyayo. Mbwino hane esindi nzira esy’eribaniramo omundu ng’oyo? Katarína, akabugha athi, “Ngahandikira abo ngathebana eka b’esyobbaruha, inahiramo ebyo nangabughire indyababana busu okwa busu.” Enzumwa ni yahi? Lengaho erithulira obuli mundu omwa bulhambu bwawu omw’ikolesya enzira yosi-yosi.

11. Busana naki abandi bandu sibalihulikirira omwatsi wethu?

¹¹ Abandi bandu sibalyanza erihulikirira omwatsi wethu. Sibalilhangira ekyangaleka ibaminya Nyamuhanga kutse e Biblia. Sibalikiriraya omu Nyamuhanga kundi bakalhangira eriaghalhwa lingyi omwa kihugho. Bakaghana e Biblia kundi bakalhangira obuthebya bw’abakangirirya b’amadini abakabugha bathi bakaghendera okwa kitabu ekyo. Abandi bakasurusutha kutsibu busana n’emibiiri yabu, amaka wabu, kutse ebitsibu byabu, neryo ibalemwa erilhangira ngoku e Biblia yangana bawathikya. Thwanga sighalha thuthi ithunatsemire abo thukathulira nomubanga ghana erilhangira omughaso w’omwatsi wethu?

12. Erighendera okwa binywe ebiri omwa Abanya Filipi 2:4 kyanga thuwathikya kithi omw’ithulira?

¹² Kanganaya eritsomana. Abandu bangyi abaghana erihulikirira engulhu yuwene erimbere endambi muyahika bamanza erihulikirira bakalhangira ngoku omuthuliri abatsomene. (Soma Abanya Filipi 2:4.) Ng’eky’erileberyako, David, oyothulyakanayako, akabugha athi, “Omundu amabugha athi singanzire, thukasubaya e Biblia kutse ebitabu byethu by’omwa kikapa n’eribugha thuthi: ‘Nganzire eriminya ekikaleka iwayowa wuthya.’” Abandu bangana lhangira ngoku omundu abatsomene. Bangan’ibirirwa ebyonyine-nyine ebyo thwabugha, aliwe ib’ibuka emibere thwabathwaliramo. Nomubangaghana erithulighira erikania nabu, emibere yethu n’ebiminyikalho by’obusu byangana kangania ku thubatsomene.

13. Thwanga kolhaki erithoka erihindulha omwatsi wethu erikwamana n’emibere eyo thwameya aho?

¹³ Thukakanganaya eritsomana omw’ithulira thukahindulha omwatsi wethu erikwamana n’emibere eyo thwameya aho. Ng’eky’erileberyako, mbwino hane ekikakanganaya ngoku omwinye nyumba anawithe abaana? Ababuthi ibangananza erihabulha lye Biblia erihambire okw’ilembera abaana kutse amenge awanga bawathikya eribya n’eka eyiri mw’etseme. Thukanalhangira esyokofiro nyingyi okwa lhuyi lhwabu? Ithwangana thwamu erikania okwa bubi obuswire omwa kihugho obukaleka abandu ibabya omwa buba, neryo ikyaleka omwinye nyumba iniatsema akaminya ngoku obubi bukendi syahwaho kera na kera. Mbulha wamathwamu erikania oku kyahi, lengaho eriwathikya abakahulikirira erilhangira ngoku erihabulha lye Biblia lyangana bawathikya. Katarína, oyothulyakanayako, akabugha athi, “Ngabya inganemuyibukya ngoku ekwenene yabiryuwania engebe yaghe.” Busana n’ekyo,  Katarína akakanaya inianakakasirye, kandi ahathe erithika-thika abandu abo akakanaya nabo bakalhuaho ibakilhangira.

14. Ngoku kiri omwa Emisyo 27:17, thwanga wathikania thuthi n’oyothukakolha nayu?

¹⁴ Ghasirawa omwa buwathikya bw’abandi. Omwa kighana ky’erimbere, Paulo mwabwira Timoteo esyonzira esyo akakolesaya erithulira n’erikangirirya, kandi mwahira omu Timoteo mw’omuhwa w’erikolesya esyonzira esyo eriwathikya abandi. (1 Kor. 4:17) Nga Timoteo, nethu thwangan’ighira okwa basi bingyi abali omwa kithunga kyethu. (Soma Emisyo 27:17.) Lengekanaya okwa ky’erileberyako kya mughalha wethu oyukahulhawamo Shawn. Habw’obuthuku bulebe, mwakolha obutemburi omwa kyalu ekiri mw’abandu abahambirire eby’edini yabu. Mwakolhaki eribya inianatsemire? Akabugha athi: “Ikyamathokekana, iningakolha n’owundi. Ithukakolesaya obuthuku obwa thukaghunza thukalhua okwa muyi erighenda okwa wundi eriwathikania eryuwania emibere yethu y’erikangirirya. Ng’eky’erileberyako, ithukalengekanaya okwa mibere thulyakanirayamo n’omwinye nyumba. Neryo ithwalhangira nga thwangathasyabugha thuthiki thwamathasyabana omwinye nyumba oyuli ng’oyo.”

15. Busana naki erisaba ni kikulhu omwa mubiiri wethu w’erithulira?

¹⁵ Saba Yehova y’obuwathikya. Saba Yehova y’obusondoli obuli sangira omw’ithulira. Ahathe obuwathikya bw’omulimu wiwe abuyirire ow’amaaka, sihali n’omughuma w’okw’ithwe oyuwangathoka kindu. (Esy. 127:1; Lk. 11:13) Wukasaba Yehova y’obuwathikya, bugha ekyonyine-nyine. Ng’eky’erileberyako, musabe wubane omundu oyuwithe amalengekania awatholere kandi oyuwanzire erihulikirira. Neryo kolha erikwamana n’erisaba lyawu omw’ithulira owosi-wosi oyo wukabana.

16. Erithoka omubiiri wethu w’erithulira, busana naki ni kikulhu eriyeghesya?

¹⁶ Hiraho obuthuku bw’eriyeghesya. Ekinywe kya Nyamuhanga kikabugha kithi: ‘Muthoke eriminya erisonda lya Nyamuhanga. Erisonda eri ni libuya, kandi likatsemesaya, kandi lihikene.’ (Abar. 12:2) Thukabya thuk’ongera erikakasya ngoku thwabiriminya ekwenene eyihambire oku Nyamuhanga, thuk’ongera erithulira abandi ithunakakasirye. Katarína, oyo thulyakanayako akabugha athi: “Buthuku buke enyuma, munaminya ngoku ngatholere ingaghumya erikirirya lyaghe omwa syongangirirya ndebe sye Biblia esy’omusingyi. Neryo mun’igha buuli okwa bikakanganaya ngoku hane Omuhangiki, ngoku e Biblia kwenene ni Kinywe kya Nyamuhanga, kandi ngoku Nyamuhanga anawithe ekithunga kiwe munabwire.” Katarína akabugha athi eriyeghesya liwe mulyongera erighumya erikirirya liwe n’eryongera etseme yiwe omw’ithulira.

17. Ni kyahi ekyaleka Yesu iniabya iniane n’amalengekania awuwene omw’ithulira liwe?

¹⁷ Yesu mwabya iniane n’amalengekania awuwene kandi mwalholha embere erithulira nomwakine indi abandi mubaghana omwatsi wiwe. Busana naki? Abya inianasi ngoku abandu batholere ibaminya ekwenene, neryo mwanza ahe abandu bangyi b’akaghisa k’eriligha omwatsi w’Obwami. Kandi abya inianasi ngoku abandi okw’itsuka banganaghana erihulikirira aliwe enyuma waho ibasyahulikirira. Thuthalebya ekyabya kyabere omw’eka yabu. Omwa myaka isathu n’embindi y’erithulira lya Yesu, muhathabya n’omughuma okwa baghalha babu oyuwabya wabere mwigha wiwe. (Yn. 7:5) Aliwe, abere abirilhubuka, nimobabya babere Bakristayo.​—Emib. 1:14.

18. Busana naki thukalholha embere erithulira?

 ¹⁸ Sithwasi nga ni bahi abakendi syabya baghombe ba Yehova. Abandi bakaghunza buthuku buuli okwa bandi imubasalha baligha ekwenene. Nibya n’abakaghana erithuhulikirira bakayilhangirira embere yethu mibuya, neryo erighunzerera ibangana tsuka ‘eripipa Nyamuhanga.’​—1 Pet. 2:12.

19. Ngoku kiri omwa 1 Abanya Korinto 3:6, 7, ni kyahi ekyathutholere ithwabya ithunasi?

¹⁹ Thukahera n’eryuthangirira, thutholere ithwabya ithunasi olhukwamirwa lhwa Nyamuhanga. (Soma 1 Abanya Korinto 3:6, 7.) Getahun, mughalha wethu oyuli e Ethiopia, akabugha athi: “Ahabw’emyaka eyilhabire oku 20, ngabya Mwema ingyuwene omwa mwanya owathebera erikolhwa. Aliwe lino yiri abathuliri 14. Ikumi n’abasathu babatizibirwe, imwamuli mukali waghe n’abaana baghe basathu. Thukanahindana abandu nga 32.” Getahun atsemire kundi mwalholha embere erithulira, omw’ighumisirizya inianalindirire Yehova eriletha omwa kithunga kiwe mw’ab’emithima myolho!​—Yn. 6:44.

20. Ni mwa nziraki thuli ng’abakayasabulha abandu?

²⁰ Yehova akalhangira abandu bosi mwa b’obughuli. Akathuha olhusunzo lhw’erikolha na Mughalha wiwe erihindania abandu erilhua omwa bihanda byosi enduli y’omughulhu ono yithe yahika. (Hag. 2:7) Omubiiri wethu w’erithulira angana sosekanibwa n’omubiiri w’eriyasabulha abandu. Kandi thuli ng’abali omwa gurupu eyikathumawa eriyawathikya abandu abali omo bwathu obwabiridikira. Nomwakine indi banganeya abake ibabakiriho, omubiiri owalyakolhawa n’abalyayabasabulha ni w’omughaso. Kwabine bithya n’okwa mubiiri wethu w’erithulira. Sithwasi nga ni bangahi abanga lhamibwa okwa kihugho kya Sitani. Aliwe Yehova angana kolesya owosi-wosi ow’okw’ithwe eribawathikya. Andreas, oyuwikere e Bolivia, akabugha athi, “Ngalhangira obuli mundu oyuk’igha ekwenene ye Biblia n’eribatizibwa ini busana n’akaghalha k’abandu banene.” Ka thulhole embere eribya ithune n’amalengekania awuwene okwa mubiiri wethu w’erithulira. Thwamakolha ekyo, Yehova iniakendi thutsumulha, n’omubiiri wethu w’erithulira iniathulethera etseme nene.