1. Us fayn ɛgzampul Jizɔs bin sɛt fɔ in disaypul dɛn, ɛn wetin dɛn bin du? (Luk di pikchɔ na di frɔnt pej.)

DI TƐM we Jizɔs bin de na dis wɔl, i bin kɔntinyu fɔ tink di rayt we bɔt in prichin wok, ɛn i bin want in disaypul dɛn bak fɔ kɔntinyu fɔ tink di rayt we bɔt dɛn prichin wok. (Jɔn 4:​35, 36) We Jizɔs bin de wit in disaypul dɛn, dɛn bin de du di prichin wok wit zil. (Lyuk 10:​1, 5-11, 17) Bɔt we dɛn arɛst ɛn kil Jizɔs, in disaypul dɛn nɔ bin gɛt bɛtɛ zil igen fɔ du di prichin wok fɔ sɔm tɛm. (Jɔn 16:​32) Afta we Jizɔs gɛt layf bak, i ɛnkɔrej dɛn fɔ pe atɛnshɔn pan di prichin wok. Ɛn afta we i go bak na ɛvin, dɛn prich wit zil te dɛn ɛnimi dɛn bigin tɔk se: “Una dɔn mek una tichin de ɔlsay na Jerusɛlɛm.”—Akt 5:​28.

2. Aw Jiova dɔn ɛp wi we wi de du di prichin wok?

² Jizɔs bin de dayrɛkt di fɔstɛm Kristian dɛn fɔ du di prichin wok, ɛn Jiova bin ɛp dɛn. So bɔku pipul dɛn bin lisin to dɛn mɛsej. Fɔ ɛgzampul, di de fɔ Pɛntikɔst insay di ia 33, na lɛk 3,000 pipul dɛn bin baptayz. (Akt 2:​41) Ɛn di disaypul dɛn bin kɔntinyu fɔ bɔku mɔ ɛn mɔ. (Akt 6:​7) Jizɔs bin tɔk se bɔku pipul dɛn go kɔntinyu fɔ lisin to di gud nyuz insay di las dez.—Jɔn 14:​12; Akt 1:​8.

3-4. Wetin mek i nɔ kin izi fɔ du di prichin wok na sɔm ples dɛn, ɛn wetin wi go tɔk bɔt insay dis atikul?

³ Wi ɔl de tray fɔ kɔntinyu fɔ tink di rayt we bɔt di prichin wok. Insay sɔm kɔntri dɛn, dat kin izi fɔ du. Wetin mek? Bikɔs bɔku pipul dɛn kin want fɔ stɔdi di Baybul, ɛn sɔm pan dɛn kin gɛt fɔ wet te wan Jiova Witnɛs go ebul fɔ stɔdi dɛn. Bɔt na sɔm ɔda pat dɛn na di wɔl, i nɔ kin izi fɔ wi brɔda ɛn sista dɛn fɔ du di prichin  wok bikɔs pipul dɛn nɔ kin de na os, ɛn if dɛn de na os, dɛn nɔ kin want fɔ no bɔt di Baybul.

⁴ If yu de na eria usay i nɔ izi fɔ du di prichin wok, di difrɛn tin dɛn we dis atikul go tɔk bɔt go mɔs ɛp yu. Wi go tɔk bɔt wetin sɔm pan wi brɔda ɛn sista dɛn dɔn du fɔ mek dɛn go tɔk to mɔ pipul dɛn we dɛn de du di prichin wok. Ɛn wi go tɔk bak bɔt wetin mek wi go kɔntinyu fɔ tink di rayt we ilɛk pipul dɛn lisin to wi mɛsej ɔ dɛn nɔ lisin to am.

5. Wetin nɔ izi fɔ bɔku brɔda ɛn sista dɛn?

⁵ I nɔ kin rili izi fɔ bɔku pan wi brɔda ɛn sista dɛn fɔ tɔk to pipul dɛn na dɛn os dɛn. Sɔm pan wi brɔda ɛn sista dɛn de na say usay bɔku os dɛn gɛt tayt sikyɔriti, ɔ say dɛn we gɛt fɛns ɛn get dɛn. Ɛn dɛn os ɔ kɔmyuniti dɛn ya kin gɛt getman dɛn ɔ sikyɔriti gaydman dɛn we nɔ de gri fɔ mek pɔsin ɛnta if wan pan di pipul dɛn we de de nɔ alaw am fɔ ɛnta. Na ɔda ples dɛn, di brɔda ɛn sista dɛn kin ebul fɔ go prich na pipul dɛn os dɛn, bɔt bɔku pan dɛn nɔ kin de. Dɔn bak, ɔda brɔda ɛn sista dɛn de prich na ɔplayn say dɛn usay bɔku pipul dɛn nɔ de. Di brɔda ɛn sista dɛn kin gɛt fɔ go fa fasay dɛn fɔ go fɛn wangren pɔsin, ɛn i kin bi se di pɔsin nɔ kin ivin de na os. If wi de prich na dɛn kayn tɛritri dɛn ya, wi nɔ fɔ giv-ɔp. Wetin wi go du fɔ mek wi go ebul fɔ tɔk to mɔ pipul dɛn?

6. Aw di wan dɛn we de du di prichin wok tan lɛk fishaman dɛn?

⁶ Jizɔs bin kɔmpia di prichin wok to di wok we fishaman kin du. (Mak 1:​17) Sɔm fishaman dɛn kin go fishin fɔ lɔng tɛm, ɛn dɛn nɔ kin kech natin. Bɔt dɛn nɔ kin giv-ɔp; bifo dat, dɛn de chenj sɔm tin dɛn. Dɛn de chenj di tɛm we dɛn kin go fishin, di say we dɛn kin go, ɔ di we aw dɛn kin fishin. Wisɛf kin mek dɛn sem kayn chenj dɛn de we wi de du di prichin wok. Lɛ wi tɔk bɔt sɔm tin dɛn we wi go du.

7. Wetin go apin if wi prich difrɛn tɛm dɛn?

⁷ Tray fɔ tɔk to pipul dɛn difrɛn tɛm. Wi go tɔk to mɔ pipul dɛn if wi prich di tɛm we dɛn go mɔs de na os. Ilɛk aw lɔng pɔsin nɔ de na os, i go mɔs kam bak. Bɔku brɔda ɛn sista dɛn dɔn si se i kin fayn we dɛn kin go prich aftanun tɛm ɔ ivintɛm bikɔs na dɛn tɛm dɛn de dɛn kin ebul tɔk to mɔ pipul dɛn. Pantap dat, i go bi se na dɛn tɛm dɛn de di pipul dɛn kin rilaks, ɛn dɛn go rɛdi fɔ tɔk to wi. Ɔ sɔntɛm yu go tray fɔ du wetin wan ɛlda we nem Devid kin du. I bin tɔk se afta we dɛn dɔn prich fɔ sɔm tɛm na wan tɛritri, in ɛn in patna kin go bak na di os dɛn usay dɛn nɔ bin mit pɔsin di fɔs tɛm we dɛn bin go prich de. I bin tɔk se, “A kin sɔprayz fɔ si di kayn bɔku pipul dɛn we wi kin mit na os di sɛkɔn tɛm we wi go bak.” *

8. Aw wi go du wetin de na Ɛkliziastis 11:​6 we i kam pan wi prichin wok?

⁸ Wi nɔ fɔ giv-ɔp. Wi tim skripchɔ de mɛmba wi bɔt di rayt we aw wi fɔ tink. (Rid Ɛkliziastis 11:​6.) Devid, we wi bin dɔn tɔk bɔt, nɔ bin giv-ɔp. I bin ɛnd-ɔp fɔ mit wan man na in os pan ɔl we i nɔ bin de mit pɔsin di ɔda tɛm dɛn we i bin de go de. Di man bin rili lɛk fɔ tɔk bɔt di  Baybul, ɛn i bin se, “A dɔn de ya fɔ lɛk et ia, ɛn no Jiova Witnɛs nɔ ɛva kam prich to mi.” Devid bin se, “A dɔn si se we yu ɛnd-ɔp fɔ mit pipul dɛn na os, dɛn kin rili want fɔ lisin to di mɛsej we wi de prich.”

9. Wetin sɔm brɔda ɛn sista dɛn dɔn du fɔ mek dɛn ebul fɔ tɔk to pipul dɛn we nɔ kin izi fɔ mit na dɛn os dɛn?

⁹ Tray fɔ prich na difrɛn ples dɛn. Fɔ mek sɔm brɔda ɛn sista dɛn go tɔk to pipul dɛn we at fɔ mit na dɛn os dɛn, dɛn dɔn chenj di ples usay dɛn kin prich. Fɔ ɛgzampul, we dɛn de prich na strit ɛn we dɛn de yuz kat dɛn, dat dɔn ɛp dɛn fɔ mit pipul dɛn we de na big bildin dɛn we gɛt bɔku apatmɛnt dɛn usay dɛn nɔ de alaw Jiova Witnɛs dɛn fɔ prich. Dis dɔn mek am izi fɔ mek brɔda ɛn sista dɛn prich to di pipul dɛn we de na dɛn os dɛn de. Dɔn bak, bɔku brɔda ɛn sista dɛn dɔn si se pipul dɛn kin want fɔ tɔk mɔ ɔ gri fɔ tek wi pɔblikeshɔn dɛn we dɛn de na pak, makit, ɛn dɛn biznɛs ples dɛn. Wan sakit ovasia we de na Bolivia we nem Flɔran bin se: “Wi kin go na dɛn makit ɛn biznɛs ples dɛn arawnd dɛn wan oklɔk ɛn tri oklɔk aftanun, di tɛm we di pipul dɛn we kin sɛl nɔ kin tu bizi. Bɔku tɛm, wi kin tɔk fayn, ɛn wi kin ivin stat Baybul stɔdi.”

10. Us ɔda we dɛn yu go yuz fɔ prich to pipul dɛn?

¹⁰ Tray difrɛn we dɛn. Lɛ wi se yu dɔn tray bɔku tɛm fɔ tɔk to pɔsin fes-to-fes. Yu dɔn go na in os difrɛn tɛm dɛn bɔt yu stil nɔ mit am. Ɔda we dɛn de fɔ tɔk to da kayn pɔsin de? Katarina bin tɔk se: “A kin rayt lɛta dɛn to di wan dɛn we a nɔ  kin ɛva mit na os, ɛn a kin rayt wetin a fɔ bin dɔn tɛl dɛn if a de tɔk to dɛn fes-to-fes.” Wetin wi lan frɔm wetin dis sista de du? We yu de du di prichin wok, tray fɔ tɔk to ɔlman na yu tɛritri difrɛn we dɛn.

11. Wetin mek sɔm pipul dɛn nɔ kin want fɔ lisin to wi mɛsej?

¹¹ Sɔm pipul dɛn nɔ kin want fɔ lisin to wi mɛsej. Dɛn nɔ tink se dɛn nid fɔ no bɔt Gɔd ɔ di Baybul. Dɛn nɔ biliv Gɔd bikɔs dɛn de si aw bɔku pipul dɛn de sɔfa na di wɔl. Dɛn nɔ want fɔ no bɔt di Baybul bikɔs dɛn de si se dɛn bigman dɛn pan Gɔd biznɛs we se dɛn de obe di Baybul de du bɔku bad tin dɛn. Ɔda wan dɛn de tink mɔ bɔt dɛn wok, dɛn famili, ɔ dɛn prɔblɛm dɛn, ɛn dɛn nɔ tink se di Baybul go ebul fɔ ɛp dɛn. Aw wi go kɔntinyu fɔ gɛt gladi-at we wi de prich to dɛn wan dɛn we tink se wi mɛsej nɔ impɔtant?

12. We wi du wetin de na Filipians 2:​4, aw dat go ɛp wi na di prichin wok?

¹² Sho se yu bisin bɔt ɔda pipul dɛn. Bɔku pipul dɛn we nɔ kin want fɔ lisin to wi mɛsej di fɔs tɛm we wi prich to dɛn kin leta gladi fɔ lisin to di gud nyuz we dɛn si aw wan brɔda ɔ sista sho se i rili bisin bɔt dɛn. (Rid Filipians 2:​4.) Fɔ ɛgzampul, Devid, we wi bin dɔn tɔk bɔt, bin tɔk se, “If sɔmbɔdi se i nɔ want fɔ lisin, wi kin put wi Baybul ɔ wi pɔblikeshɔn dɛn na wi bag ɛn aks am se: ‘A go lɛk fɔ no wetin mek yu de fil da kayn we de.’” Pipul dɛn kin no if pɔsin rili bisin bɔt dɛn. Sɔntɛm dɛn go fɔgɛt wetin wi tɛl dɛn, bɔt dɛn go mɔs mɛmba aw wi mek dɛn fil. Ilɛksɛf pɔsin nɔ gri fɔ mek wi prich to am, wi kin sho se wi bisin bɔt am bay di we aw wi de biev ɛn di we aw wi de mek wi fes.

13. Wetin wi go du fɔ mek ɛnibɔdi we wi prich to gladi fɔ lisin to wi mɛsej?

¹³ Wi go sho se wi bisin bɔt di wan dɛn we wi de prich to we wi chenj wetin wi want fɔ tɔk bɔt to wetin dɛn nid ɛn wetin go mek dɛn want fɔ lisin. Fɔ ɛgzampul, yu de si ɛnitin na di os we de sho se pikin dɛn de de? Sɔntɛm dɛn mama ɛn papa go want fɔ no wetin di Baybul se bɔt aw fɔ mɛn pikin dɛn ɔ wetin dɛn go du fɔ mek dɛn gɛt gladi-at na dɛn famili. Wi de si bɔku lɔk dɛn na dɛn domɔt? Sɔntɛm yu go disayd fɔ tɔk bɔt kraym ɛn aw dat dɔn mek bɔku pipul dɛn na di wɔl de fred. I go bi se di pɔsin we yu de prich to go gladi fɔ no se kraym nɔ go de igen. Ilɛk  wetin yu si, tray fɔ ɛp di wan dɛn we lisin to yu fɔ si aw di Baybul in advays go ɛp dɛn. Katarina, we wi bin dɔn tɔk bɔt, bin se, “A kin tink bɔt aw di Baybul dɔn rili ɛp mi.” So Katarina biliv wetin i de prich bɔt, ɛn di pipul dɛn we i kin prich to kin si dat.

14. Akɔdin to Prɔvabs 27:​17, aw di wan dɛn we kin prich togɛda kin ɛp dɛnsɛf?

¹⁴ Gri fɔ mek ɔda pipul dɛn ɛp yu. Insay di fɔstɛm Kristian dɛn tɛm, Pɔl bin tich Timoti fɔ prich ɛn tich, ɛn i bin ɛnkɔrej Timoti fɔ ɛp ɔda brɔda ɛn sista dɛn di sem we. (1 Kɔr. 4:​17) Lɛk Timoti, wisɛf kin lan frɔm brɔda ɛn sista dɛn we gɛt ɛkspiriɛns na wi kɔngrigeshɔn. (Rid Prɔvabs 27:​17.) Tink bɔt wan brɔda we nem Shɔn in ɛgzampul. Fɔ sɔm tɛm, i bin de payɔnia na wan smɔl tɔŋ usay bɔku pan di pipul dɛn nɔ want fɔ lɛf dɛn rilijɔn. Aw i bin kɔntinyu fɔ gɛt gladi-at? I bin tɔk se: “Ɛnitɛm we chans de, a bin de fɛn patna we a kin wok wit. Wi kin yuz di tɛm we wi de waka fɔ go na di ɔda os fɔ ɛp wisɛf fɔ sabi tich mɔ ɛn mɔ. Fɔ ɛgzampul, wi kin tɔk bɔt wetin wan pɔsin we wi mit na fil savis bin se ɛn wetin wi bin tɛl am. Dɔn wi kin tɔk bɔt us ɔda tin wi go se di nɛks tɛm we ɔda pɔsin tɔk da sem kayn tin de.”

15. Wetin mek i impɔtant fɔ lɛ wi pre we wi de du di prichin wok?

¹⁵ Pre to Jiova fɔ mek i ɛp yu. Aks Jiova fɔ ɛp yu ɛnitɛm we yu de prich. If in pawaful oli spirit nɔ ɛp wi, wi nɔ go ebul fɔ du natin. (Sam 127:​1; Lyuk 11:​13) We yu de pre to Jiova fɔ mek i ɛp yu, tɛl am bɔt di patikyula tin we yu go want fɔ lɛ i du fɔ yu. Fɔ ɛgzampul, yu kin aks am fɔ ɛp yu fɔ go to pɔsin we want fɔ lan bɔt am ɛn we rɛdi fɔ lisin to yu. Dɔn, du sɔntin we go mek wetin yu pre bɔt apin bay we yu de prich to ɔlman we yu mit.

16. Wetin mek pasɔnal stɔdi impɔtant to wi prichin wok?

¹⁶ Mek tɛm fɔ du pasɔnal stɔdi. Gɔd in Wɔd se: “Una . . . pruv to unasɛf wetin gud, wetin Gɔd de tek, ɛn di pafɛkt tin we Gɔd want.” (Rom. 12:​2) We wi de stɔdi, wi de ebul fɔ no Gɔd mɔ ɛn mɔ. Dɔn, we wi tɔk to ɔda pipul dɛn bɔt am, dɛn go si se wi rili biliv wetin wi de tɔk. Katarina, we wi bin dɔn tɔk bɔt, bin se: “Dis biɛn tɛm, a bin kam fɔ si se a nid fɔ lan bɔt di men tin dɛn we di Baybul de tich so dat a go biliv dɛn mɔ ɛn mɔ. So a bin tek tɛm stɔdi bɔt di tin dɛn we de sho se Pɔsin de we mek ɔltin, di Baybul na Gɔd in Wɔd, ɛn Gɔd gɛt ɔganayzeshɔn we i de yuz tide.” Katarina se di pasɔnal stɔdi we i du bin ɛp am fɔ gɛt mɔ fet ɛn fɔ gɛt mɔ gladi-at we i de du di prichin wok.

17. Wetin mek Jizɔs bin kɔntinyu fɔ tink di rayt we bɔt in prichin wok?

¹⁷ Jizɔs bin kɔntinyu fɔ tink di rayt we, ɛn i kɔntinyu fɔ prich pan ɔl we sɔm pipul dɛn nɔ bin want fɔ lisin to in mɛsej. Wetin mek? Na bikɔs i bin no se pipul dɛn nid fɔ lan di tru, ɛn i bin want fɔ ɛp bɔku pan dɛn fɔ lisin to di Kiŋdɔm mɛsej. I bin no bak se sɔm pan di pipul dɛn we nɔ bin de lisin to am fɔs go lisin to am as tɛm de go. Tink bɔt wetin bin apin na Jizɔs in famili. Insay di tri ɛn af ia we i du in prichin wok, nɔn pan in brɔda dɛn nɔ bin bi in disaypul. (Jɔn 7:​5) Na afta we i gɛt layf bak, na in dɛn bi Kristian.—Akt 1:​14.

18. Wetin mek wi de kɔntinyu fɔ prich?

 ¹⁸ Wi nɔ no udat-ɛn-udat go kam fɔ bi Jiova in savant. I kin tek lɔng tɛm fɔ lɛ sɔm pipul dɛn lan di tru na di Baybul pas ɔda pipul dɛn. Ivin di wan dɛn we nɔ kin want fɔ lisin to wi kin si se wi de biev fayn, ɛn sɔntɛm dat go mek dɛn stat fɔ “gi glori to Gɔd.”—1 Pit. 2:​12.

19. Akɔdin to 1 Kɔrintians 3:​6, 7, wetin wi fɔ mɛmba bɔt wi prichin wok?

¹⁹ As wi de plant ɛn wata, wi fɔ mɛmba se na Gɔd de mek wetin wi plant gro. (Rid 1 Kɔrintians 3:​6, 7.) Wan brɔda we de na Itiopia we nem Getoun bin se: “I pas 20 ia we na mi na bin di wangren Jiova Witnɛs we bin de na mi tɛritri. Bɔt naw, na 14 pɔblisha dɛn de ya. Tɔtin pan dɛn dɔn baptayz, ɛn 4 pan dɛn na mi wɛf ɛn tri pikin dɛn. Na lɛk 32 pipul dɛn kin atɛnd di mitin dɛn.” Getoun gladi fɔ we i bin kɔntinyu fɔ prich as i bin de wet fɔ lɛ Jiova ɛp pipul dɛn we rili lɛk am fɔ kam na In ɔganayzeshɔn.—Jɔn 6:​44.

20. Aw wi tan lɛk di wan dɛn di wan dɛn we kin sev pipul dɛn we de pan prɔblɛm?

²⁰ Jiova valyu ɔlman. I dɔn gi wi di big big ɔnɔ fɔ wok wit in Pikin as i de gɛda pipul dɛn we de ɔlsay na di wɔl bifo di ɛnd kam. (Egay 2:​7) Wi prichin wok tan lɛk di wok fɔ sev pipul dɛn we de pan prɔblɛm. Ɛn wi tan lɛk di wan dɛn we dɛn sɛn fɔ go fri pipul dɛn we dɔn lɔs na say we dɛn de mayn. Pan ɔl we nɔto ɔl di wan dɛn we dɛn sɛn fɔ go fri di pipul dɛn go ebul fɔ fɛn pɔsin, ɔl di wan dɛn we du da wok de du impɔtant tin. Na dis sem kayn tin kin apin we wi de du di prichin wok. Wi nɔ no ɔmɔs pipul dɛn we de na Setan in wɔl we wi go ebul fɔ sev. Bɔt Jiova kin yuz ɛni wan pan wi fɔ ɛp dɛn. Andrias, we de na Bolivia bin se, “A no se na bɔku pipul dɛn kin wok togɛda fɔ ɛp pɔsin fɔ lan di tru bɔt di Baybul te i baptayz.” Lɛ wisɛf kɔntinyu fɔ tink dis sem we bɔt wi prichin wok. If wi du dat, Jiova go blɛs wi, ɛn wi prichin wok go mek wi gɛt tru tru gladi-at.