1. Wapi ekzample Yesu bikilá badisiple ya yandi, mpe yinki ba salá? (Tala foto ya kuverture.)

NTANGU Yesu vandá awa na ntoto, yandi kontinyeke kupreche mpe yandi vandá na kiminu ti, mba ba ke kuwa yandi. Mpe yandi vandá na nsatu ti badisiple ya yandi tala bamambu faso yandi. (Yoa. 4:35, 36) Ntangu Yesu vandá na bawu, badisiple ya yandi vandá zolá kisalu ya predikasion. (Luke 10:1, 5-11, 17) Kasi, ntangu ba kangá Yesu mpe ba kufwá yandi, badisiple lutisá mwa bantangu yina ba vandá dyaka ve na nsatu ya kupreche. (Yoa. 16:32) Ntangu yandi vumbuká na lufwa, Yesu zonzá na bawu na kutula kisalu ya predikasion na plase ya ntete na luzingu ya bawu. Mpe ntangu yandi vutuká na zulu, ba precheke na tiya nyonso. Ya natá ba-enemi ya bawu na kuzonza: ‘Beno me fulusa Jeruzalem na malongi ya beno.’—Bis. 5:28.

2. Wa’ faso Yehova salá ti kisalu ya predikasion simba?

² Yesu dirijeke kisalu ya bakristo ya ntete, mpe Yehova sadisá bawu. Na yawu bantu mingi ndimá kuwa bawu. Na kifwani, na Pentecote 33 N.B., bantu 3000 kuzwá bateme. (Bis. 2:41) Mpe nombre ya badisiple vandá kontinye kukuma kaka mingi. (Bis. 6:7) Yesu zonzá ti na ntangu ya nsuka, bantu mingi ke ndima nsangu ya mbote.—Yoa. 14:12; Bis. 1:8.

3-4. Samu na yinki ya ke vandá mpasi na kupreche na bateritware ya nkaka, mpe yinki beto ke zonzila na artike yayi?

³ Beto nyonso ke salá bangolo na kubumba kilengi ya beto na kisalu ya predikasion. Ya ke na bateritware yina ya ke ve mpasi na kubumba kilengi. Samu na yinki? Samu bantu mingi ke zolá kulongoka Biblia mpe samu baproklamatere ke ndambu, ya ke na ba yina ke vingilá tii Temwe ya Yehova ke kuma libre samu na  kulongoka na bawu! Kasi bateritware ya nkaka ke vandá mpasi na kupreche. Baproklamatere ke kutaná ve bantu na bayinzo ya bawu mpe ba yina ba ke kutaná ke zolá ve kulongoka Biblia.

⁴ Si nge ke vandá na bwala yina kisalu ya predikasion ke mpasi, bametode yina beto ke zonzila na artikle yayi lenda sadisa nge. Beto ke zonzila yinki baproklamatere ya nkaka salá samu na kukutana na bantu mingi na teritware ya bawu. Beto ke zonzila mpe samu na yinki beto zolá bumba kilengi ya beto ata bantu ke na wá beto to ve.

5. Wapi bamambu baproklamatere mingi ke kutaná na yawu?

⁵ Ya ke na kumá vrai mpasi na Batemwe ya Yehova mingi na kukutana na bantu na bayinzo ya bawu. Baproklamatere ya nkaka ke vandá na babwala yina bayinzo ke na ba-mur ya yinda mpe ke na sekurite ya ngolo, to na bakartye yina ba ke kotá ve kidi-kidi. Ya ke na bayinzo ke na ba-gardien yina ke biká ve bantu kotá si ba ke ve na permision ya ba yina ke vandá kuna. Na bateritware ya nkaka, ya ke ve mpasi na Batemwe ya Yehova na kusala predikasion ya yinzo na yinzo, kasi, ba ke kutaná ve na bantu mingi na bayinzo ya bawu. Baproklamatere ya nkaka mpe ke precheke na bateritware yina kaka bantu fioti ke vandá. Na yawu, ba lenda tambula badistanse ya yinda kaka samu na kusosa kusolola na muntu mosi, kasi muntu yango mpe lenda vanda ve na yinzo! Si beto ke precheke na bateritware ya faso yayi, beto zolá lemba ve. Yinki beto lenda sala samu ata kima empeche beto na kupreche na bantu mingi?

6. Na wa’ faso baproklamatere ke nete ba yina ke salá lapeche?

⁶ Yesu kompareke kisalu ya predikasion na lapeche. (Mrk. 1:17) Ba yina ke salá lapeche, lenda kwenda peche bilumbu mingi mpe kuzwa ve bambisi. Kasi ba ke biká ve, ba ke chanjeke faso ya bawu ya kupeche. Ba ke chanjeke heure, kisika, to metode ya kupeche. Beto lenda sala mpe bachanjement ya faso yayi na kisalu ya beto ya predikasion. Beto zonzila bachanjement yango yina beto lenda sala.

7. Yinki lenda salama si beto preche na ba-heure ya nkaka?

⁷ Sosa kukutana na bantu na heure ya nkaka. Beto ke kutana na bantu mingi, si beto preche na bantangu yina ba lenda vanda na bayinzo ya bawu. Kote ni kote yina ba lenda kwenda, ba ke vutuka kaka na bayinzo ya bawu! Bampangi mingi ke precheke na nkokila to na mpimpa samu na kukutana na bantu mingi. Na bantangu yina, bantu ke vandá aleze mpe ba ke ndimá kusolola. To beto lenda sala yina salá kuluntu mosi na nkumbu ya David. Na manima ya kulutisa ba-heure na kusala teritware, yandi na mpangi yina vandá preche na yandi, ba baká desizion ya kuvutuka kutala bayinzo yina ba talá ata muntu. Yandi me zonza: “Mu pamuká na kutala ti bantu mingi ke vandá na bayinzo ya bawu ntangu beto ke vutuká kutala bawu na ba-heure ya nkaka.” *

8. Wa’ faso beto lenda sadila Longi 11:6 na kisalu ya predikasion?

⁸ Beto zolá sala nyonso samu na kukutana na bantu na bayinzo ya bawu. Ni yina ke na lakisá beto verse teme ya artikle yayi. (Tanga Longi 11:6.) David yina beto me zonzilá deja, biká ve. Na yinzo mosi, yandi kutaná na muntu kaka na manima ya kuvutuka kuna bambala mingi. Bakala yango zolá mingi masolo ya Biblia yina ba kuzwá na David mpe yandi zonzá: “Mu ke vandá na yinzo yayi depuis 8 ans, mpe mu me talá ata Temwe ya Yehova mosi na  porte ya munu.” David me zonza: “Mu talá ti si nge me sala nyonso na kukutana na bantu na bayinzo ya bawu, souvent ba ke wá mambu yina beto ke precheke.”

9. Wa’ faso baproklamatere ya nkaka ke salá samu na kukutana na bantu?

⁹ Sosa baplase yina nge lenda kutana na bantu. Ntangu ya ke kumá mpasi na bawu na kukutana na bantu na bayinzo ya bawu, baproklamatere ya nkaka ke chanjeke plase ya kupreche. Na kifwani, predikasion na banzila mpe prezentwar, me lakisá ti ya ke bametode ya bien. Ya ke sadisá na kukutana na bantu yina ke vandá na bayinzo yina ke na sekurite ya ngolo, yina beto lenda sala ve predikasion ya yinzo na yinzo. Baproklamatere mingi mpe ke talá ti, bantu ke ndimá kuwa beto ntangu ba ke vandá na bapark, na bazandu, mpe na ba-zone yina ke na ba-entreprize mingi. Floiran, Ntwadisi ya sirkonskripsion mosi na Bolivie, me zonza: “Beto ke kwendá na bazandu mpe na bakartye yina bantu ke salá komerse, na kati ya 13 heure mpe 15 heure ntangu ba yina ke tekisá ke vandá mwa libre. Souvent beto ke zwá masolo ya bien na bawu mpe bantangu ya nkaka beto ke bandá kulongoka Biblia.”

10. Yinki nge lenda sala dyaka samu na kupreche bantu?

¹⁰ Meka bafaso ya nkaka ya kubanda kusolola na bantu. Kanisa ntete, nge me meka na bafaso nyonso na kukutana na muntu. Nge me lutá bambala mingi na yinzo ya yandi, kasi nge ke talá ve yandi kuna. Wapi yina ke faso ya nkaka ya kusolola na muntu yina? Katarína me zonza: “Mu ke soniká baletre na ba yina mu ke kutaná ve na bayinzo ya bawu. Na kati ya letre, mu ke zonzá bamambu yina mu zolá zonzila bawu si mu kutaná na bawu.” Wapi yina ke leson samu na beto? Meka bafaso nyonso yina lenda sadisa  nge na kukutana na bantu ya teritware ya nge ntangu nge ke na precheke.

11. Samu na yinki bantu mingi ke zolá ve kuwa beto?

¹¹ Bantu ke mangá kuwa beto. Ba ke talá ti ba ke ve na nsatu ya kuzaba Nzambi to mambu ya Biblia. Ba ke ve na kiminu na Nzambi samu ba ke talá ti bampasi ke mingi na yinza. Ba ke zolá ve mambu ya Biblia samu ba ke talá ti bachef ya mabuundu yina ke zonzá ti ba ke sadilá mambu ya Biblia, ke salá bamambu mingi ya yimbi. Bantu ya nkaka ke kanisá mingi na bisalu ya bawu, bafamiye ya bawu to bamambu yina ke na kwamisá bawu, mpe ba ke talá ve faso Biblia lenda sadisa bawu. Wa’ faso beto lenda bumba kilengi ya beto ntangu ba yina beto ke precheke ke pesá ve valere na mambu yina beto ke zonzá na bawu?

12. Wa’ faso kusadila mambu yina ke na Bafilipi 2:4 lenda sadisa beto na kisalu ya predikasion?

¹² Lakisa bawu ti ba ke na valere. Bantu mingi yina vandá kuwá ve beto, bandá kuwa beto ntangu ba talá ti, beto ke pesá bawu valere. (Tanga Bafilipi 2:4.) Na kifwani, David yina beto zonzilá deja, me zonza: “Si muntu me zonza na beto ti yandi ke ve na nsatu ya kuwa mambu beto ke na zonzá na yandi, beto ke kangá Biblia to mikanda ya beto mpe ke zonzá: ‘Ya ke kwandi na kima yina ke na salá ti nge kuwa ve beto?’” Bantu ke zabá si muntu yina ke na sololá na bawu ke na pesá bawu valere. Ba lendá zimbana mambu yina beto zonzá na bawu, kasi ba lenda zimbana ve faso beto bakilá bawu. Ata muntu me bika ve beto zonzila yandi mambu ya Nzambi, beto lenda lakisa ti yandi ke na valere na meso ya beto, na faso ya beto ya kuzonza mpe ya kubakila yandi.

13. Yinki beto lenda sala samu ba yina ke kuwa beto zola bamambu yina beto ke na zonzá?

¹³ Beto ke lakisá ti beto ke pesá valere na muntu yina beto ke na sosá kupreche, ntangu beto ke chanjeke mambu yina beto zolá zonza na yandi, na mambu yina ke na kwelaná na situasion ya yandi. Na kifwani, beto ke na talá bima yina ke na lakisá ti muntu yango ke na bana? Baparent lenda sepela na bakonseye ya Biblia yina ke lakisá faso ya kukulisa bana to bakonseye yina ke lakisá faso ya kuvanda na kilengi na kati ya famiye. Beto ke na talá kwandi ti porte ya bawu ke na bakadena mingi? Beto lenda baka desizion ya kuzonzila faso babandi mpe miyibi ke na pesá boma na bantu mingi. Muntu yina ke vanda na kilengi ya kuzaba ti bubandi mpe bamambu nyonso ya yimbi yayi ke manisa. Lere nyonso yina nge ke kutaná na muntu yina ke na nsatu ya kuwa nge, lakisa yandi bakonseye ya Biblia yina lenda sadisa yandi. Katarína yina beto me zonzila deja, me zonza:  “Mu lenda zimbana ve faso yina Biblia sadisá munu.” Na yawu, Katarína ke zonzilá mambu ya Biblia na konfianse nyonso mpe ba yina ke sololá na yandi lenda tala yawu.

14. Yinki Bingana 27:17 ke zonzá na faso baproklamatere zolá sadisa bampangi na predikasion?

¹⁴ Sosa bampangi sadisa nge. Na siekle ya ntete, Paul lakisá na Timote, bametode ya kupreche mpe ya kulonga bantu. Yandi zonzá na Timote na kusadila bametode yango samu na kusadisa bampangi. (1 Ko. 4:17) Faso Timote, beto lenda longoka bamambu na mpangi mosi ya kimvuka yina zaba mingi na kimpeve. (Tanga Bingana 27:17.) Beto zonzila disolo ya mpangi mosi ya bakala na nkumbu ya Shawn. Yandi lutisá bantangu mingi faso pionier, na bwala mosi yina bantu vandá zolá ba-eglize ya bawu. Wa’ faso yandi bumbá kilengi ya yandi? Yandi me zonza: “Mu vandá salá nyonso samu na kupreche na mpangi ya nkaka. Lere beto vandá sala predikasion ya yinzo na yinzo, beto vandá sololá na yina beto lenda sala samu na kubongisa faso ya beto ya kupreche avant na kuluta na porte ya nkaka. Beto vandá zonzilá mpe faso vandá disolo na porte yina me luta, mpe faso vandá reponse ya beto. To yinki beto lenda sala si beto kutana na mambu ya faso yina na porte ya nkaka.”

15. Samu na yinki ya ke important na kusambila samu na predikasion?

¹⁵ Zonza na Yehova na kusadisa nge. Ntangu nyonso yina nge ke precheke, zonza na Yehova na kusadisa nge. Na bima nyonso yina beto ke salá, beto ke na nsatu ya mpeve ya yandi. (Nku. 127:1; Luke 11:13) Ntangu nge ke sambilá Yehova, zonza na yandi mambu yina nge ke na yawu nsatu. Na kifwani, zonza na yandi na kusadisa nge na kukutana na bantu yina ke na nsatu ya kulongoka mambu ya yandi mpe yina lenda kuwa nge. Na manima, nge zolá sala bangolo ya kupreche bantu nyonso yina nge ke kutana na bawu.

16. Samu na yinki kulongoka ya beto mosi ya Biblia ke important samu na kisalu ya predikasion?

¹⁶ Baka ntangu ya kulongoka nge mosi. Biblia ke zonzá: ‘Sosa kuzaba nge mosi yina ke luzolo ya Nzambi, yina ke mbote, yina yandi lenda ndima mpe yina ke ya kulunga.’ (Rom. 12:2) Ntangu beto ke longoká Biblia, beto ke lutilá dyaka kuzaba Nzambi. Na manima, ntangu beto ke zonzila yandi na bantu ya nkaka, ba ke tala ti beto ke na konfianse na mambu yina beto ke na zonzá. Katarína yina beto zonzilá deja me zonza: “Ntama mingi ve mu kwizá tala ti, mu vandá na nsatu ya kukulisa kiminu ya munu na malongi ya nkaka ya Biblia. Na yawu, mu longoká mbote-mbote bima nyonso yina ke lakisá ti, Nzambi ke muntu yina yidiká bima nyonso, Biblia ke mambu ya yandi, mpe yandi ke na organizasion ya yandi awa na ntoto.” Katarína me zonza ti kulongoka ya yandi ya Biblia me kumisa kiminu ya yandi ngolo, mpe me kulisa kilengi ya yandi na kisalu ya predikasion.

17. Samu na yinki Yesu bumbá kilengi na kisalu ya predikasion?

¹⁷ Yesu bumbá kilengi ya yandi na kisalu ya predikasion ata bantu ya nkaka vandá manga kuwa yandi. Samu na yinki? Yandi zabá ti ya vandá important na bantu mingi na kuzaba laverite, mpe yandi vandá na nsatu ti bantu mingi zaba yawu. Yandi zabá mpe ti bantu ya nkaka yina lenda manga kuwa yandi bubu yayi, lenda kuwa yandi mbasi. Beto zonzila mambu yina salamá na famiye ya Yesu. Na kati ya bamvula tatu na ndambu yina dureke kisalu ya yandi ya predikasion, ata leki ya yandi mosi kumá disiple. (Yoa. 7:5) Kasi na manima ya kuvumbuka ya yandi na lufwa, ba kumá bakristo.—Bis. 1:14.

18. Samu na yinki beto zolá kontinye kupreche?

 ¹⁸ Beto zaba ve nani lenda ndima laverite. Bantu ya nkaka ke baká ntangu mingi avant na kundima yawu. Ata ba yina ke zolá ve kuwa beto lenda tala komportement ya beto ya mbote, kilengi ya beto, mpe kubanda kupesa “Nzambi nkembo.”—1 Pi. 2:12; nwt-MK.

19. Faso me zonza 1 Bakorinto 3:6, 7, yinki beto me lunga kundima?

¹⁹ Ata ni beto ke kundá bambuma mpe ke losá maza, beto zaba ti ni Nzambi muntu ke kulisak’ yawu. (Tanga 1 Bakorinto 3:6, 7.) Getahun, mpangi mosi yina ke vandá na Éthiopie, me zonza: “Na kati ya 20 ans, mu vandá kaka munu mosi Temwe ya Yehova na teritware yina mu kele. Kasi bubu yayi, ya ke na baproklamatere 14 awa. Bantu 13 kuzwá bateme, na kati ya bawu ya ke na kento ya munu mpe babana ya munu tatu. Bambala mingi, bantu 32 ke vandá na balukutakanu.” Getahun ke na kilengi samu yandi kontinyeke kupreche mpe kuvingila tii ntangu Yehova bendá ba yina ke na ntima ya mbote na organizasion ya yandi!—Yoa. 6:44.

20. Na wa’ faso beto ke nete bantu yina ke vuukisá luzingu ya bantu yina mase kufwa?

²⁰ Luzingu ya muntu nyonso ke na valere na meso ya Yehova. Yandi me pesa beto okazion ya kusala na Mwana ya yandi samu na kunata bantu ya babwala nyonso na kati ya organizasion ya yandi, avant nsuka ya yinza yayi kuma. (Aga. 2:7) Kisalu ya beto ya predikasion ke faso kisalu ya kuvuukisa bantu yina mase kufwa. Mpe beto ke faso bantu yina ba me filisa samu na kukwenda basisa bantu yina ntoto me bwidila ntangu ba vandá timuna dibulu ya yinda. Ata kaka ndambu ya bantu ba me lenda kubasisa moyo, kasi kisalu yina ba me sala ke important. Mambu yayi ke mpe vrai na kisalu ya beto ya predikasion. Beto zaba ve nombre ya bantu yina beto ke lenda kuvuukisa avant yinza yayi ya Satan kufwa. Kasi, Yehova lenda sadila mosi na mosi na kati ya beto samu na kusadisa bawu. Andreas yina ke vandá na Bolivie me zonza: “Mu zaba ti lere muntu ke zabá laverite mpe ke kuzwá bateme, ya ke samu baprokalmatere mingi me vukisa bangolo samu na kusadisa yandi.” Beto vanda mpe na makanisi ya faso yayi samu na kisalu ya beto ya predikasion. Si beto sala yawu, Yehova ke pesa beto bima ya mbote mpe kisalu ya predikasion ke pesa beto vrai kilengi.