1. Sihonena musinke ga tulilire po Jesus varongwa vendi ntani yisinke va rugene ko? (Tara efano lyopontunda.)

APA JESUS ga kere novarongwa vendi, age nga zuvhisa noupampi ntani kuna harere varongwa vendi va rugane yokulifana. (Joh. 4:35, 36) Apa Jesus ga ya kere pevhu, age nga zuvhisa noupampi kumwe novarongwa vendi. (Ruk. 10:1, 5-11, 17) Nye apa Jesus va mu kwete nokumudipaga, varongwa vendi kapi va kere hena noupampi ngwendi pomuhowo. (Joh. 16:32) Konyima zapa Jesus va mu vhumbwire, age kwa korangedere varongwa vendi va demenene kosirugana sokuzuvhisa. Apa Jesus ga tengwire meguru, varongwa vendi kwa zuvhisire noupampi ano eyi kwa ninkisire nonkore dawo di uyunge asi: “Tareni si, erongo lyeni ntaantani lina lihanene Jerusarema mudima.”—Yirug. 5:28.

2. Ngapi omu Jehova ga tungika sirugana sokuzuvhisa?

² Jesus kwa pitisilire sirugana esi ngava rugana Vakriste womosiruwo sovapositoli ntani Jehova ga va vaterere yiva tompoke. Pasihonena, poPentekoste momvhura 33, vantu wokusika po-3000 kwa gwene ekuho. (Yirug. 2:41) Ano mwaza siruwo varongwa kwa li gwederere unene. (Yirug. 6:7) Jesus kwa pumbire hena asi sirugana sokuzuvhisa mbudi zongwa ngasi ligwederera unene pomazuva gopouhura.—Joh. 14:12; Yirug. 1:8.

3-4. Morwasinke sirugana sokuzuvhisa asi digopere komavango gamwe ntani yisinke natu ka zogera mosirongwa esi?

³ Natuvenye kuhetekera ko kukara nomutaro gomuwa mokuzuvhisa. Moyirongo yimwe ayo ureru kuyirugana ngoso. Morwasinke? Morwa vantu wovanzi kwa hara kulironga Bibeli, ano eyi kuninkisa vamwe va ndindire dogoro noku gumwe goNombangi daJehova naya va zuvhisira. Nye komavango gamwe, vazuvhisi kuva digopera kuzuvhisa morwa kapi ava gwana vantu  pomambo ntani vantu ava ava gwana pomambo kapi va hara kulironga Bibeli.

⁴ Nsene asi sirugana sokuzuvhisa kudigopa momukunda omu wa tunga, magano gomosirongwa esi naga kaku vatera. Tatu ka lironga hena eyi va rugana ko vazuvhisi vamwe yipo va zuvhisire vantu wovanzi. Ntani natu ka lironga konda zeyi natu twikilira kuzuvhisa nokukara noruhafo nampili vantu va tambure mbudi zetu ndi hawe.

5. Maudigu musinke adi ligwanekere nado Nombangi daJehova dononzi mokuzuvhisa?

⁵ Sinzi sovazuvhisi kuvadigopera kuzuvhisira vantu momambo. Vanavazinyetu vamwe kwa tunga monomukunda omu mwa kara mambo aga ga kara nepopero lyenene. Pomambo ogo kwa kara po vanomeni ndi vasikiliti ava ava dili kupulisira nkenye ogu muntu vana dili kuzigida. Komavango gamwe, vazuvhisi kuvatompoka kurugana tunda embo zende embo, nye awo kugwana tupu vantu wovasesu pomambo. Vazuvhisi vamwe kuzuvhisira konomukunda ndi komavango oku va tunga vantu wovasesu. Vazuvhisi vamwe kugenda sinano sosire nositambo sokukadingura muntu gongandi nye pamwe kapi ava ka mu gwana po pembo. Nsene asi maudigu gokufana ngesi yigo a tu ligwanekere nago, twa hepa kutwikira ngororo kuzuvhisa. Yisinke natu rugana tu funde po maudigu aga ntani yipo yi tu tompoke kuzuvhisira vantu wovanzi?

6. Ngapi omu vazuvhisi va fana ngwendi vakwati wonomfi?

⁶ Jesus kwa hetakanesere sirugana sokuzuvhisa kosirugana sovakwati wonomfi. (Mar. 1:17) Vakwati vamwe wonomfi kurugana mazuva gomanzi va hana kukwata nomfi. Nye kapi ayi va dompesa. Awo kuruganesa nonkedi dapeke dokukwata nomfi. Awo kutjindja siruwo nevango ntani monkedi omu nava kwata nomfi. Nose kuvhura tu ture po malitjindjo gokulifana nsene kuna kuzuvhisa. Tu tareni ko yininke yimwe eyi natu rugana.

7. Yitundwamo musinke ngayi kara nsene tu zuvhisa poyiruwo yokulisiga-siga?

⁷ Hetekera ko kugwana vantu poyiruwo yokulisiga-siga. Ose ngatu gwana vantu wovanzi nsene tu va zuvhisira posiruwo esi ava kara pomambo. Nampili ngomu vantu wovanzi ava dili kukara pomambo, nye konyima zosiruwo awo kutengura komambo gawo. Vanavazinyetu wovanzi kuzuvhisa kositenguko ndi kongurova morwa vantu wovanzi kukara pembo poyiruwo eyi. Vantu kupurakena nawa poyiruwo oyo morwa awo vana pwizumuka po nawa. Nampo kuvhura o hetekere ko kurugana eyi a rugana mukuronambunga gumwe David. Age kwa tanta asi konyima zapa ava zuvhisire momukunda, nage nogu vana zuvhisa nendi konyima zosiruwo awo kutengwira pomambo aga ka va dili kugwana vantu. Age kwa tanta asi: “Ayo kutetukisa nge pokukagwana vantu wovanzi pomambo apa atu tengwire ko rwauvali.” *

8. Ngapi natu tura pasirugana etjangwa lyaMuudisi 11:6?

⁸ Twa hepa kutwikira ngorooro kuzuvhisa. Eyi yiyo tuna kulirongera ko ketjangwa oku sina demenene sirongwa setu. (Resa Muudisi 11:6.) David ogu ka tu tumbura pomuhowo, age kutwikira ngorooro kuzuvhisa. Sikando simwe, age kwa ka gwene muntu pembo limwe konyima zokuza po yikando yoyinzi pwa hana vantu. Mugara ogo kwa here kulironga Bibeli ntani age kwa tente asi: “Ame kwa tunga pembo eli ure wonomvhura ntantatu, nye kapi na mona gumwe goNombangi daJehova a wize a ya dingure nge.” David kwa tanta asi: “Ame na  yi dimburura asi nsene o gwana vantu pomambo, awo kupurakena nawa kombudi zetu.”

9. Yisinke va rugana vazuvhisi vamwe yipo va gwane vantu pomambo?

⁹ Hetekera ko kuzuvhisira komavango gokulisiga-siga. Mokumona asi vantu vamwe udigu kuvagwana pomambo, vazuvhisi vamwe kwa tura po malitjindjo yipo va zuvhisire komavango gokulisiga-siga. Pasihonena, kuzuvhisira moyitarata ntani noyitoroli kuna kara nonkedi edi adi tompoka vanavazinyetu yipo va zuvhisire vantu ava va tunga momambo omu va dira kutupulisira tu zuvhise tunda embo zende embo. Nonkedi edi kupulisira Nombangi di zuvhisire vantu owo. Ntani vazuvhisi wovanzi kwa yi dimburura asi vantu kuyihafera kuzogera nose nokutambura yimbapiratjangwa yetu apa atu va zuvhisire pomavango gokupwizumukira nopoyitanda ntani komavango gamwe gonongesefa. Mutareli gonombunga Florian ogu ga tunga moBolivia kwa tanta asi: “Ose kuza poyitanda nokomavango gonongesefa povili zo zimwe pometaha nezi zautatu kositenguko posiruwo esi varandesi ava dili kukara noyirugana yoyinzi. Awo kuhafera kuzogera kumwe nose ntani ose kutameka malirongo goBibeli.”

10. Nonkedi musinke dimwe no ruganesa yipo o zuvhisire vantu?

¹⁰ Hetekera ko kuruganesa nonkedi dokulisiga-siga yipo o zuvhise. Ove nampo wa hetekera ko kudingura muntu pembo yikando yoyinzi ntani poyiruwo yokulisiga-siga. Nye kapi o mu gwana po. Pwa kara nonkedi dimwe omu no vhura kugwana muntu ogo. Katrina kwa tanta asi: “Ame kutjangera vantu nombilive ava ani dili kugwana pembo nokuvatantera asi nyone nkare ni hare kuyadingura.” Yisinke tuna  kulirongera ko? Hetekera ko kuzuvhisira nkenye ogu momukunda gweni pokuruganesa nonkedi dokulisiga-siga.

11. Morwasinke vantu vamwe ava dilire kutambura mbudi zetu?

¹¹ Vantu vamwe kapi ava tambura mbudi zetu. Awo kugazara asi kapi va hepa Karunga ndi Bibeli morwa yeeyi vana kumona ruhepo oru runa kara mouzuni. Awo kapi ava tambura marongo goBibeli morwa yeeyi ava mono vampitisili womaukarelikarunga kuna kurugana yininke eyi ya lilimba noBibeli. Ano vantu vamwe kugazara unene yirugana yawo nomapata gawo ntani maudigu ganyamwawo, ano eyi kuvaninkisa va dire kugazara asi Bibeli kuvhura zi va vatere. Ngapi natu twikira kuzuvhisa nokukara noruhafo nampili ngomu vantu ava tara mbudi zetu asi kwato mulyo?

12. Ngapi nonkango domoVafilipi 2:4 na di tu vatera mokuzuvhisa?

¹² Yi likida asi wa kara nosinka kwava wopeke. Vantu wovanzi ava va dilire kutambura mbudi zetu pomuhowo, konyima va ya tambwire mbudi zetu morwa va dimbwilire asi ose twa kara nosinka kwawo. (Resa Vafilipi 2:4.) Pasihonena, David ogu katu tumbura muhowo kwa tanta asi: “Apa gumwe a tu tantere asi kapi ana hara kuzogera nose yomoBibeli, ose kapi atu mu sininike kumupa yimbapiratjangwa yetu ndi tu zogere nendi Bibeli, nye ose ku mu pura asi: ‘Kuvhura o tantere nge ko konda zeyi ono kulizuvhira ngoso ndi?’” Vantu kuyidimburura nsene asi twa kara nosinka kwawo. Awo kuvhura va dire kudiworoka eyi a tu uyunga nye awo ngava diworoka nawa-nawa monkedi omu a tu va pakere mbili. Nampili muntu kapi ana kutupulisira tu uyunge, ose kuvhura tu kare nonkareso zongwa nokuyilikida kosipara setu asi twa kara nosinka kwawo.

13. Yisinke natu rugana yipo mwenya embo a hafere mbudi zetu?

¹³ Ose kuyilikida asi twa kara nosinka kovantu apa a tu zogere novantu kuliza noukaro wawo. Pasihonena, ngapi nsene mwenya embo ga kara novanona? Vakondi vemembo olyo kuvhura va hafere kuzuvha magano gomoBibeli gokuhamena omu nava rera vana vawo ndi omu nava kara noruhafo mepata. Nye ngapi nsene tuna dimburura asi muvero kuna gu pata nomakumba? Kuvhura tu zogere nawo kuhamena ukorokotji ntani nomu au ninkisa vantu va kare noutjirwe, mwenya embo kuvhura ayi hafere pokuzuvha asi ezuva limwe ukorokotji ngau haga po. Nsene ono gwana vantu ava vana hara kupurakena, hetekera ko kuvavatera va kwate egano omu magano gomoBibeli naga  va vatera. Katrina ogu tuna tumbura muhowo kwa tanta asi: “Ame kugazadara ko omu Bibeli za vatera nge meparu.” Ngoyitundwamo, apa Katrina a zuvhisa, age kuyilikida asi ga pura nawa-nawa eyi a zuvhisa ntani vantu kuyidimburura.

14. Kuliza noYisewe 27:17, ngapi vazuvhisi ava vana kurugana kumwe mokuzuvhisa nava vhura kulivatera vatera?

¹⁴ Gwanena mo uwa mevatero lyovakweni. Mosiruwo sovapositoli, Paurusa kwa rongere Timoteusa omu na zuvhisa nokuronga ntani ga mu korangedere a vatere vakwawo mononkedi dokulifana. (1 Kol 4:17) Ngwendi Timoteusa, nose kuvhura kulirongera ko kovanavazinyetu ava va kara noudivi mombungakriste. (Resa Yisewe 27:17.) Tu tareni sihonena samunazinyetu gomugara Shawn. Ure wosiruwo songandi, age nga zuvhisire momukunda omu mwa kere vantu wovanzi ava va here unene ukarelikarunga wawo. Yisinke ya mu vaterere a twikire kukara noruhafo? Age kwa tanta asi: “Ame ngani ruganesa nkenye mpito yipo ni rugane nomuzuvhisi mukwetu ngomu ngatu rugana kumwe tunda embo zende embo. Ose ngatu zogere kuhamena omu natu wapukurura udivi wetu wokuronga. Pasihonena, ose ngatu zogere eyi ana uyunga mwenya embo ntani monkedi omu tuna mu limburura. Ose hena ngatu zogere omu ngatu limburura nsene gumwe a tu pura monkedi zokulifana.”

15. Morwasinke ya karera nomulyo tu kanderere nsene kuna kuza mokuzuvhisa?

¹⁵ Kanderera kwaJehova a ku vatere. Pura Jehova a ku vatere nkenye apa nsene kuna kuza mokuzuvhisa. Pwa hana evatero lyendi lyompepo zokupongoka, ose kwato eyi natu vhura kutompora. (Epis. 127:1; Ruk 11:13) Nsene kuna kukanderera kwaJehova, mu tantera kuvyukilira eyi ono hepa. Pasihonena, mu pura a ku vatere o gwane muntu ogu ana hara kupurakena. Makura rugana kuliza nekanderero lyoge pokuzuvhisira nkenye ogu no ligwana nage.

16. Morwasinke elirongo lyoBibeli lya karera nomulyo?

¹⁶ Litulira po siruwo sokurugana elirongo lyanyamoge lyoBibeli. Nonkango daKarunga kuuyunga asi: ‘Twa hepa kukoneka mpango zaKarunga neyi yoyiwa ya mu wapera ayo ya sikilira mo.’ (Rom 12:2) Nsene tu li ronga Nonkango daKarunga, ose ngatu diva momunene Karunga, ano apa ngatu zuvhisira vantu, awo ngava yi dimburura asi ose twa pura eyi atu zuvhisa. Katrina ogu ka tu tumbura kwa tanta asi: “Sikando simwe, ame kwa dimbwilire asi na hepere kunkondopeka epuro lyange kuhamena yirongwa yimwe yomoBibeli. Ame kwa konakonene nawa mauzera yipo ni yi pure asi pwa kara Musiti ntani asi Bibeli kuna kara Nonkango daKarunga ntani asi Karunga ga kara nombunga zendi pevhu neina.” Katrina kwa tanta asi elirongo lyanyamwendi lyoBibeli kwa nkondopeka epuro lyendi nokumuvatera a hafere unene kuzuvhisa.

17. Morwasinke Jesus ga twikilire kuzuvhisa?

¹⁷ Jesus kwa twikilire kuzuvhisa nampili ngomu vantu vamwe va dilire kupurakena kombudi zendi. Morwasinke? Morwa ga yi divire asi mbudi zendi ngazi vatera unene vantu ano yipo ga ruganesere nkenye mpito a ronge vantu usili wokuhamena Uhompa. Age hena ga yi divire asi vantu vamwe kuvhura va dire kumupurakena pomuhowo nye konyima kuvhura ngava tambure usili. Tu tareni eyi ya horokerere ekoro lyendi. Bibeli kulikida asi kwato gumwe govamumbya vendi ogu ga tambwire usili apa Jesus ga zuvhisire nomvhura ntatu noharufa. (Joh. 7:5) Nye konyima zevhumbuko lyendi, awo kwa ya kere Vakriste.—Yirug. 1:14.

18. Morwasinke natu twikilira kuzuvhisa?

 ¹⁸ Kapi tuna diva asi wolye ngava tambura usili womoBibeli. Vantu vamwe kuvagusa siruwo sosire komeho va ya tambure usili. Nampili vantu ava ava dili kutupurakena, nye konyima apa ava mono nkareso zetu zongwa ayo kuvatumangeda ‘va fumadeke Karunga.’—1 Pet. 2:12.

19. Kuliza no-1 Vakolinte 3:6-7, sitwa musinke twa hepa kudiworoka?

¹⁹ Nampili ngomu atu tapeke nokutekera, twa hepa kudiworoka asi Karunga yige a yi kulisa. (Resa 1 Vakolinte 3:6-7.) Munazinyetu Getahun ogu ga tunga moEtiyopiya kwa tanta asi: “Nyamelike na kere mbangi momukunda gwetu ure wonomvhura dokupitakana 20. Nye ngesi mwa kara vazuvhisi 14. Vazuvhisi 13 va gwana ekuho kukwatera mo mukadange novana vetu vatatu. Apa atu kara nomapongo, sivaro sovantu kukasika ko-32. Getahun ana hafa kweyi ga twikilire kuzuvhisa nokundindira mwaJehova yipo a vatere vantu va ya hame kombunga zendi!—Joh. 6:44.

20. Ngapi sirugana setu sa lifana nesi sovantu wokupopera moyimpagwa?

²⁰ Jehova kutara eparu lyovantu navenye asi mulyo kwendi. Age kwa tupa situmbukira sokurugana kumwe naMunwendi yipo tu zuvhisire vantu wokonomuhoko nadinye komeho u wize uhura. (Hag. 2:7) Sirugana setu sokuzuvhisa sa lifana nesi sovarugani ava ava popere vantu moyimpagwa. Ose kwa fana ngwendi mbunga zovarugani ava vana tumu mokukapopera vantu ava sina gwana simpagwa momina. Nampili yi kare asi wovasesu tupu vana popere momina, nye varugani navenye owo kuna rugana sirugana somulyo. Ayo ya lifana nosirugana sokuzuvhisa. Kapi tuna diva asi vantu wokuhura kupi vana hepa simpe evatero mokuvapopera mouzuni ou waSatana. Nye Jehova kuvhura kuruganesa nkenye gumwe gwetu yipo tu va vatere. Andreas ogu ga tunga moBolivia kwa tanta asi, “Ame na yi dimburura asi muntu kulironga usili nokuyagwana ekuho morwa vanzi va mu vatera.” Tu twikireni ngorooro kuzuvhisa. Nsene tu yi rugana ngoso, Jehova nga tu tungika ntani ngatu gwana ruhafo mosirugana sokuzuvhisa.