1. Yeˍsuˆ awˬ laꞈ gʼawˇ henˇ yuˬ tuˬ hkʼaˬ hkʼe te maˍ piˇ ve le? Leh awˬ laꞈ gʼawˇ hui hkʼaˬ hkʼe te ve le? (Awˬ htaꞈ hpawˇ ve awˬ han htaꞈ nyi sheˍ.)

 Yeˍsuˆ miˬ guiˬ hkʼoˆ lo chehˇ htaˇ, yawˇ Gʼuiˬ sha ve kanˉ te ve htaꞈ hkʼaˬ htaˆ kaꞈ daꞈ ve hpawˇ dawˇ ve yoˬ. Leh yawˇ ve awˬ laꞈ gʼawˇ Gʼuiˬ sha ve kanˉ te ve htaꞈ daꞈ ve hpawˇ yawˇ hkʼa shuˍ dawˇ tcuh gaˇ ve yoˬ. (Yoˇhanˬ 4:35, 36) Yeˍsuˆ yawˇ ve awˬ laꞈ gʼawˇ hui geh chehˇ htaˇ, yawˇ hui kaꞈ kaiˬ ve hkʼaw bon maˍ ve yoˬ. (Luˉkaꞈ 10:1, 5-11, 17) Yaꞈ hkʼaˇ, Yeˍsuˆ htaꞈ shu hpeh leh tiˇ pehˍ piˇ peuˬ hkʼawꞈ nawˉ, yawˇ hui kaꞈ teˇ tcuhˉ teˇ yanˇ bon maˇ maˍ ve yoˬ. (Yoˇhanˬ 16:32) Yeˍsuˆ kʼawꞈ teꞈ tu la htaˇ, yawˇ hui bon kʼawꞈ maˍ tuˬ yawˇ awˬ gʼaˇ piˇ ve yoˬ. Yawˇ mvuhˇ naw ma hkʼoˆ taˆ kʼawꞈ˗e htaˇ, yawˇ hui kaiˬ ve hkʼaw bon maˍ ve yoˬ. Canˇ paˍ yawˇ hui htaꞈ kʼoˆ piˇ ve htawˇ, “nawˬ hui maˍ piˇ ve teˇ hpaˍ Yeˍruˆsaˍlehnˍ venˇ awˬ hkʼaw lo nawˬ hui hkʼa biˇ biˇ la piˇ peuˬ.”—Tcuh yaˇ 5:28.

2. Yaˬhoˉvaˬ lehˬ bon maˍ ve htaꞈ awˬ bon hkʼaˬ hkʼe naꞈ piˇ ve le?

² Awˉ lawˉ peuˇ ve Hkriꞈ yaˇ bon maˍ ve htaꞈ Yeˍsuˆ beˆ maˍ piˇ ve yoˬ. Leh Gʼuiˬ sha kaꞈ yawˇ hui htaꞈ awˬ bon naꞈ piˇ ve yoˬ. Tawˇ pa haˉ te kʼo, Peˍteˍkoˆteˍ 33 hkʼawꞈ C.E. htaˇ, aˬ laˬ hkʼe 3,000 gʼaˇ Baˆtiˆsaˬ haꞈ yuˬ ve yoˬ. (Tcuh yaˇ 2:41) Leh peuˬ hkʼawꞈ nawˉ awˬ nu ve chaw yawˇ ve awˬ laꞈ gʼawˇ maˇ maˇ hpehꞈ la ve yoˬ. (Tcuh yaˇ 6:7) Yaꞈ hkʼaˇ, Yeˍsuˆ kʼoˆ ve awˬ leh meuˇ ve awˬ yanˇ htaˇ chaw maˇ maˇ daꞈ ve awˬ lawn sha tanˇ htaꞈ haꞈ yuˬ tuˬ yoˬ.—Yoˇhanˬ 14:12; Tcuh yaˇ 1:8.

3-4. Aˬ htoꞈ ma te mvuhˇ miˬ teˇ hpaˍ hpaˍ hkʼaw awˬ viˉ awˬ nyi awˬ pon kʼo hto toˇ ve haˍ jaˇ ve le? Leh awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Ngaˬ hui teˇ gʼaˇ le le Gʼuiˬ sha ve kanˉ te ve daꞈ ve hpawˇ dawˇ ve yoˬ. Nyi ma pfuhˇ ve chaw cawˬ maˇ jaˇ ve pa taw, chaw teˇ hpaˍ kʼo Liꞈ hpu henˇ tuˬ kaꞈ gʼa law ve yoˬ. Mvuhˇ miˬ teˇ hpaˍ hpaˍ hkʼaw kʼo, ngaˬ hui ve awˬ viˉ awˬ nyi chi hkʼe te sha ve yoˬ. Yaꞈ hkʼaˇ, mvuhˇ miˬ teˇ hpaˍ hpaˍ kʼo, chi hkʼe te tuˬ maˇ sha. Ngaˬ hui ve awˬ viˉ awˬ nyi hto toˇ˗e htaˇ, aˉ hkʼaw chaw chehˇ˗aˬ laˇ ve htaꞈ hkʼa dehꞈ maˇ mawˬ ve, maˇ heˆ leh chaw chehˇ˗aˬ ve htaꞈ mawˬ ve htawˇ, yawˇ hui hkʼa dehꞈ maˇ na gaˇ ve pa taw yoˬ.

 ⁴ Nawˬ awˬ ti chi hkʼe ve hkʼaw gʼa hto toˇ ve kʼo, awˬ lawn chi ve hkʼaw nawˬ htaꞈ beˆ maˍ laˇ gʼa tuˬ cawˬ ve yoˬ. Awˬ viˉ awˬ nyi teˇ hpaˍ chaw maˇ maˇ htaꞈ mawˬ daꞈ tuˬ, hkʼaˬ hkʼe te ve teˇ geh henˇ tuˬ yoˬ. Leh shu ngaˬ hui hkawˇ na maˇ na ve htawˇ, ngaˬ hui Gʼuiˬ sha ve kanˉ te ve daꞈ ve hpawˇ hkʼaˬ htaˆ kaꞈ dawˇ tuˬ teˇ geh henˇ tuˬ yoˬ.

5. Awˬ viˉ awˬ nyi laiˉ gʼaˇ shoꞈ shaꞈ ve aˬ htoꞈ ma gʼa hpuˇ ve le?

⁵ Chi teˇ hkui ngaˬ hui ve awˬ viˉ awˬ nyi teˇ yehˬ peuˬ teˇ yehˬ hto toˇ˗e htaˇ, chaw htaꞈ mawˬ daꞈ tuˬ haˍ jaˇ tehꞈ dawˇ ve yoˬ. Tawˇ pa haˉ te kʼo, hkehˉ chaw haˉ kuiˬ yehˬ maˇ heˆ leh hkʼaˆ hkʼaw loꞈ˗e kuiˬ yehˬ miˉ hpeꞈ lo chaw shaw paˍ cawˬ leh awˬ baˬ lo ve chaw maˇ loꞈ˗e tcuh laˇ ve yoˬ. Teˇ kaˬ kaˬ kʼo, ngaˬ hui ve awˬ viˉ awˬ nyi teˇ yehˬ peuˬ teˇ yehˬ hto toˇ gʼa ve htawˇ, aˉ hkʼaw chaw chehˇ˗aˬ ve htaꞈ hkʼa dehꞈ maˇ mawˬ ve yoˬ. Hto toˇ kuiˬ teˇ kaˬ kaˬ kʼo, vuiˇ jaˇ leh yehˬ kaꞈ hkʼaˬ nyiˇ yehˬ maˇ cawˬ ve yoˬ. Awˬ viˉ awˬ nyi yehˬ teˇ yehˬ lo kʼai tuˬ, yehˬ oˇ ve chaw chehˇ maˇ chehˇ ve naˍ kaꞈ maˇ shiˍ ve htawˇ gʼa kʼai vuiˇ jaˇ. Ngaˬ hui hto toˇ kuiˬ awˬ ti chi hkʼe hpehꞈ ve kʼo, awˬ gʼaˇ taˇ nuˇ sheˍ. Caˉ leh ngaˬ hui hto toˇ sheˍ. Ngaˬ hui shoꞈ shaꞈ ve chi teˇ hpaˍ htaꞈ gu gʼa tuˬ leh, chaw maˇ maˇ htaꞈ ngaˬ hui hkʼaˬ hkʼe te mawˬ daꞈ gʼa tuˬ le? Teˇ geh henˇ tuˬ yoˬ.

6. Hto toˇ ve chaw ngaˇ ca paˍ htaꞈ hkʼaˬ hkʼe te shuˍ daꞈ ve le?

⁶ Yeˍsuˆ lehˬ bon maˍ ve leh ngaˇ ca ve kanˉ htaꞈ tehˆ daꞈ taˍ ve yoˬ. (Maˍkuˆ 1:17) Chaw teˇ hpaˍ ngaˇ laiˉ nyi ca ve htawˇ, teˇ hkeh˗ehˬ kaꞈ maˇ gʼa. Yaꞈ hkʼaˇ, yawˇ hui awˬ gʼaˇ maˇ nuˇ. Ngaˇ ca tuˬ yawˇ hui awˬ nu ve awˬ yanˇ kʼawꞈ kʼai ve, awˬ nu ve teˇ kaˬ lo kʼawꞈ ca ve, leh awˬ hkʼaˇ awˬ suhˉ kʼawꞈ yehˇ nyi ve yoˬ. Ngaˬ hui hto toˇ htaˇ kaꞈ chi hkʼa shuˍ te gʼa ve yoˬ. Chi ve hkʼe leˇ ngaˬ hui hkʼaˬ hkʼe te gʼa tuˬ teˇ geh nyi sheˍ.

7. Awˬ nu ve awˬ yanˇ htaˇ ngaˬ hui kʼawꞈ hto toˇ ve kʼo, awˬ bon hkʼaˬ hkʼe gʼa tuˬ le?

⁷ Awˬ nu ve awˬ yanˇ kʼawꞈ kʼai ve. Chaw yaˇ awˬ baˬ lo kʼai ve hkʼaˬ hkʼe maw htawˇ maˇ kʼoˆ, yawˇ hui aˉ hkʼaw lo kʼawꞈ la tuˬ ve yoˬ. Yawˇ hui aˉ hkʼaw chehˇ˗aˬ ve tehꞈ dawˇ ve awˬ yanˇ htaˇ, ngaˬ hui coˇ caˇ leh kʼai ve kʼo, ngaˬ hui yawˇ hui htaꞈ gʼa mawˬ daꞈ tuˬ awˬ hkʼaˇ cawˬ ve yoˬ hehˉ. Awˬ viˉ awˬ nyi laiˉ gʼaˇ dawˇ ve, sha gʼuˇ hkʼawꞈ nawˉ maˇ heˆ leh mvuhˇ hpeuꞈ la htaˇ hto toˇ˗e ve kʼo, yawˇ chaw htaꞈ mawˬ daꞈ maˇ tuˬ awˬ hkʼaˇ cawˬ leh yehˬ shehˍ hpaˇ nyi ma sha leh ngaˬ hui geh yaw daꞈ gaˇ tuˬ yoˬ. Nyi haꞈ shaˉ paˍ Daˍviˆ kaꞈ teˇ gʼaˇ daꞈ jaˇ ve beˆ maˍ laˇ hkawˇ cawˬ ve yoˬ. Yawˇ kʼoˆ ve, yehˬ hkʼaˬ ve teˇ yehˬ leh chaw maˇ chehˇ ve kʼo, hto toˇ ve teˇ hkui peuˬ hkʼawꞈ nawˉ, yawˇ leh awˬ chawˇ oˇ ve teˇ yehˬ htaꞈ ca kʼawꞈ nyi la ve yoˬ. Yawˇ kʼoˆ ve, “ngaˬ hui ca kʼawꞈ nyi˗e htaˇ ngaˬ hui laiˉ gʼaˇ htaꞈ gʼa kʼawꞈ yaw daꞈ tuˬ tehꞈ maˇ dawˇ.” *

8. Cuˇ yiˍ piˇ ve liꞈ 11:6 hkʼaw ngaˬ hui Gʼuiˬ sha ve kanˉ te ve hkʼaw hkʼaˬ hkʼe yuˬ yehˇ gʼa tuˬ le?

⁸ A yeˇ uiˍ ve Liꞈ hpu awˬ tawn hkʼaw kʼoˆ ve, ngaˬ hui awˬ gʼaˇ taˇ nuˇ. Chi htaꞈ pa taw, aˉ hkʼaw chehˇ ve chaw htaꞈ mawˬ daꞈ tuˬ ngaˬ hui gʼa coˇ caˇ cawˇ ve yoˬ. (Cuˇ yiˍ piˇ ve 11:6 gʼaw sheˍ.) Chi awˬ gʼuˇ suhˍ htaˇ kʼoˆ kʼai peuˬ ve Daˍviˆ kaꞈ awˬ gʼaˇ maˇ nuˇ. Teˇ yehˬ cawˬ ve, yawˇ laiˉ pawˆ kʼai kaꞈ chaw htaꞈ maˇ mawˬ daꞈ. Yaꞈ hkʼaˇ, awˬ leh meuˇ htaˇ hawˉ hkʼaˆ teˇ gʼaˇ Liꞈ hpu awˬ lawn yaw daꞈ gaˇ ve htaꞈ mawˬ ve yoˬ. Hawˉ hkʼaˆ chi ve teˇ gʼaˇ kʼoˆ ve, “ngaˬ choˬ kaˬ chehˇ ve 8 hkʼawꞈ gaˬ˗oˬ. Yaꞈ hkʼaˇ, Yaˬhoˉvaˬ ve Shaˉhkiˆhkanˍ ve chaw ngaˬ ve aˉ hkʼaw lo teˇ gʼaˇ˗ehˬ kaꞈ maˇ laˬ jaw.” Daˍviˆ kʼoˆ ve, “yehˬ hkʼaˬ ve teˇ yehˬ ngaˬ hui coˇ caˇ leh laiˉ pawˆ kai˗oˬ ve kʼo, awˬ leh meuˇ htaˇ gʼa mawˬ daꞈ leh yehˬ oˇ ve hkʼaw chehˇ ve maˇ˗awˍ ve kʼo nyi ma pfuhˇ ve yoˬ.”

9. Aˉ hkʼaw maˇ mawˬ daꞈ ve chaw htaꞈ gʼa kʼawꞈ mawˬ daꞈ tuˬ awˬ hkʼaˇ awˬ viˉ awˬ nyi hkʼaˬ hkʼe te ve le?

⁹ Awˬ nu ve teˇ kaˬ kʼawꞈ kʼai ve. Awˬ viˉ awˬ nyi teˇ yehˬ peuˬ teˇ yehˬ hto toˇ htaˇ, maˇ mawˬ daꞈ  ve chaw htaꞈ gʼa kʼawꞈ mawˬ daꞈ tuˬ, awˬ nu ve teˇ kaˬ kʼawꞈ hto toˇ˗e ve yoˬ. Tawˇ pa haˉ te kʼo, awˬ viˉ awˬ nyi laiˉ gʼaˇ dawˇ ve, chaw te toˇ kuiˬ yaꞈ kʼaw jaˇ lo leh, ngaˬ hui loꞈ˗e maˇ gʼa ve hkehˉ chaw yehˬ hkʼaw haˉ ve chaw htaꞈ gʼa mawˬ daꞈ tuˬ, hto toˇ htaˇ liꞈ kʼoˆ keu leh caꞈ tuˬ htaꞈ yehˇ ve yoˬ. Chaw guiˇ kuiˬ lo, tcuh hkʼaw lo, leh tanˇ kaˬ hkʼaˇ te kuiˬ lo hto toˇ˗e htaˇ, yawˇ hui mawˬ daꞈ ve chaw tawˇ yaw daꞈ gaˇ leh liꞈ kʼoˆ kaꞈ heuˆ gaˇ ve yoˬ. Boˬliˇviˇ˗aˇ mvuhˇ miˬ lo toˇ nyi shehˍ hpaˇ Faw˗lanˬ kʼoˆ ve, “1 naˍ riˍ te leh 3 naˍ riˍ htaˇ ngaˬ hui tcuh hkʼaw lo leh, tanˇ kaˬ hkʼaˇ te kuiˬ lo hto toˇ ve yoˬ. Oˇ ve teˇ yanˇ mawˇ hawˇ ve chaw awˬ yanˇ cawˬ ve pa taw, laiˉ gʼaˇ ngaˬ hui htaꞈ tawˇ hkʼa dehꞈ yaw laˇ leh teˇ gʼaˇ gʼaˇ htaꞈ ngaˬ hui Liꞈ hpu maˍ piˇ gʼa ve yoˬ.”

10. Nawˬ awˬ nu ve chaw htaꞈ hto maˍ piˇ tuˬ aˬ htoꞈ ma awˬ hkʼaˇ cawˬ sheˍ ve le?

¹⁰ Awˬ nu ve awˬ hkʼaˇ kʼawꞈ yehˇ ve. Chaw teˇ gʼaˇ geh nawˬ coˇ caˇ leh laiˉ pawˆ kʼai˗oˬ ve kaꞈ maˇ mawˬ ve kʼo, nawˬ awˬ nu ve awˬ yanˇ kʼawꞈ kʼai ve htawˇ maˇ mawˬ sheˍ ve kʼo, yawˇ htaꞈ hto maˍ piˇ tuˬ awˬ nu ve awˬ hkʼaˇ cawˬ˗aw laˇ? Hka˗hta˗ri˗naˇ kʼoˆ ve, “aˉ hkʼaw lo chaw teˇ gʼaˇ˗ehˬ kaꞈ maˇ mawˬ ve kʼo, ngaˬ yawˇ htaꞈ liꞈ bvuhꞈ piˇ leh liꞈ hkʼaw ngaˬ yawˇ htaꞈ awˉ lawˉ teˇ pawˆ hto maˍ piˇ ve hkʼe bvuhꞈ tuˬ yoˬ.” A yeˇ uiˍ ve aˬ htoꞈ ma le? Nawˬ hto toˇ kuiˬ awˬ ti lo ve chaw htaꞈ gʼa hto maˍ piˇ tuˬ, nawˬ hkʼaˬ hkʼe ve awˬ hkʼaˇ yehˇ kaꞈ gʼa ve yoˬ.

11. Aˬ htoꞈ ma te chaw teˇ hpaˍ ngaˬ hui hto toˇ ve htaꞈ nyi ma maˇ pfuhˇ ve le?

¹¹ Laiˉ gʼaˇ ngaˬ hui hto toˇ ve htaꞈ nyi ma maˇ pfuhˇ. Yawˇ hui Gʼuiˬ sha leh Liꞈ hpu htaꞈ gʼa shiˍ cawˇ ve tehꞈ maˇ dawˇ ve pa taw yoˬ. Miˬ guiˬ hkʼoˆ tuꞈ ve hkanˍ ve htaꞈ tiˉ gʼa mawˬ ve pa taw, yawˇ  hui Gʼuiˬ sha htaꞈ maˇ yonˍ. Bon awˬ hoˉ laiˉ gʼaˇ Liꞈ hpu htaꞈ yonˍ ve tehꞈ kʼoˆ ve htawˇ, maˇ gʼaꞈ te ve htaꞈ yawˇ hui mawˬ ve pa taw, Liꞈ hpu htaꞈ a yeˇ maˇ yuˬ. Teˇ hpaˍ kʼo, kanˉ te ve, yehˬ kʼa, maˇ heˆ leh a shu yawˇ ve shoꞈ shaꞈ ve htaꞈ tiˉ dawˇ nyi ve pa taw, Liꞈ hpu yawˇ hui awˬ pon awˬ bon hkʼaˬ hkʼe cawˬ ve htaꞈ a yeˇ maˇ yuˬ. Ngaˬ hui hto toˇ ve htaꞈ a yeˇ maˇ yuˬ laˇ ve chaw htaꞈ mawˬ htaˇ, ngaˬ hui Gʼuiˬ sha ve kanˉ te ve hkʼaˬ hkʼe te ha lehˬ gʼa tuˬ le?

12. Hpiˇliˇpiˆ liꞈ 2:4 hkʼaw ngaˬ hui Gʼuiˬ sha ve kanˉ te ve htaꞈ hkʼaˬ hkʼe ga laˇ gʼa ve le?

¹² Nawˬ yawˇ htaꞈ a yeˇ yuˬ leh dawˇ haˍ ve tehꞈ hpeuꞈ maw piˇ ve. Laiˉ gʼaˇ awˉ lawˉ htaˇ nyi ma maˇ pfuhˇ ve htawˇ, awˬ viˉ awˬ nyi yawˇ htaꞈ dawˇ haˍ laˇ ve tehꞈ mawˬ htaˇ, yawˇ kaꞈ daꞈ ve awˬ lawn sha tanˇ kʼawꞈ na la ve yoˬ. (Hpiˇliˇpiˆ 2:4 gʼaw sheˍ.) Tawˇ pa haˉ te kʼo, chi awˬ gʼuˇ suhˍ htaˇ kʼoˆ kʼai peuˬ ve Daˍviˆ kʼoˆ ve, “nyi ma maˇ pfuhˇ tehꞈ kʼoˆ laˇ ve chaw kʼo, ngaˬ hui ve Liꞈ hpu leh liꞈ kʼoˆ gʼawˆ gu sheˍ leh na piˇ ve, ‘nawˬ chi hkʼe dawˇ tuˬ aˬ htoꞈ ma te laˇ ve le?’ a ciˉ na laˇ gaˇ ve yoˬ.” Chaw teˇ hpaˍ yawˇ hui htaꞈ a yeˇ yuˬ piˇ htaˇ, yawˇ hui dawˇ ve ngaˬ hui aˬ htoꞈ ma kʼoˆ ve yawˇ maˇ tawnˇ gʼa ve htawˇ, ngaˬ hui yawˇ htaꞈ dawˇ haˍ leh a yeˇ yuˬ piˇ ve htaꞈ yawˇ tawnˇ gʼa ve yoˬ. Yehˬ shehˍ hpaˇ ngaˬ hui tawˇ yaw tuˬ awˬ yanˇ maˇ peꞈ laˇ ve htawˇ, ngaˬ hui yawˇ htaꞈ a yeˇ yuˬ leh dawˇ haˍ ve tehꞈ te tawˆ la ve hkʼaw mawˬ tcuh gʼa ve yoˬ.

13. Ngaˬ hui tawˇ yaw daꞈ ve chaw nyi ma pfuhˇ tuˬ ve awˬ lawn hkʼaˬ hkʼe yaw piˇ gʼa ve le?

¹³ Ngaˬ hui tawˇ yaw daꞈ ve chaw nyi ma pfuhˇ tuˬ te piˇ gʼa ve teˇ hkʼaˇ lehˬ, yawˇ awˬ pon nyi ma pfuhˇ tuˬ ngaˬ hui tawˇ yaw ve awˬ hkʼaˇ kʼawꞈ pa ve yoˬ. Tawˇ pa haˉ te kʼo, chi ve teˇ yehˬ yaˇ ehˉ cawˬ ve tehꞈ ngaˬ hui shiˍ tuˬ teˇ ceuˬ ceuˬ mawˬ ve kʼo, ngaˬ hui yaw daꞈ ve chaw awˬ pa maˇ heˆ leh awˬ e hpehꞈ ve kʼo, yaˇ htaꞈ maˍ ve awˬ hkʼaˇ maˇ heˆ leh yehˬ kʼa hkʼaw ha lehˬ tuˬ ve awˬ hkʼaˇ, chi ve teˇ hpaˍ Liꞈ hpu hkʼaw beˆ maˍ laˇ ve htaꞈ maˍ piˇ ve kʼo, yawˇ hui nyi ma pfuhˇ tuˬ yoˬ hehˉ. Yehˬ chi shawˇ hkʼa dehꞈ keu leh yehˬ htaꞈ nehˉ taˍ ve awˬ han htawˍ tuˬ awˬ hkʼeun cawˬ ve htaꞈ ngaˬ hui mawˬ htaˇ, laiˉ gʼaˇ kawˆ tuˬ te piˇ ve chaw hkʼawˇ ve awˬ lawn htaꞈ ngaˬ hui kʼoˆ leh, awˬ ceuˬ chi ve teˇ hpaˍ kʼawꞈ cawˬ tuˬ ve maˇ heˆ tehꞈ ngaˬ hui kʼoˆ piˇ ve yoˬ. Chi yehˬ shehˍ hpaˇ nyi ma pfuhˇ tuˬ te piˇ gʼa ve yoˬ hehˉ. Hkʼaˬ hkʼe hpehꞈ ve htawˇ maˇ kʼoˆ, na ve chaw htaꞈ Liꞈ hpu hkʼaw beˆ maˍ laˇ ve yawˇ hui htaꞈ ga laˇ gʼa ve mawˬ tuˬ ga piˇ sheˍ. Chi awˬ gʼuˇ suhˍ htaˇ kʼoˆ kʼai peuˬ ve Hka˗hta˗ri˗naˇ kʼoˆ ve, “Liꞈ hpu ngaˬ ve a shaꞈ teꞈ hkʼaˇ daꞈ la tuˬ hkʼaˬ hkʼe te laˇ ve htaꞈ dawˇ nyi ve yoˬ.” Chi Hka˗hta˗ri˗naˇ yonˍ gʼa ve hkʼaw kʼoˆ ve, yawˇ hkawˇ na ve chaw kaꞈ yonˍ gʼa ve yoˬ.

14. Tawˇ naˉ ve liꞈ 27:17 hkʼaw kʼoˆ taˍ ve hkʼe, teˇ geh hto toˇ˗e ve chaw hkʼaˬ hkʼe te ga daꞈ gʼa tuˬ le?

¹⁴ Teˇ gʼaˇ leh teˇ gʼaˇ ga daꞈ ve. Pawˇluꞈ Tiˆmoˉseˍ htaꞈ bon maˍ leh hkʼaˬ hkʼe maˍ tuˬ ve awˬ hkʼaˇ  shiˍ tuˬ maˍ piˇ ve yoˬ. Leh Tiˆmoˉseˍ awˬ lawn chi ve awˬ nu ve awˬ viˉ awˬ nyi htaꞈ kaꞈ maˍ piˇ tuˬ Pawˇluꞈ kʼoˆ piˇ ve yoˬ. (1 Kawˇrenˍhtuˆ 4:17) Tiˆmoˉseˍ hkʼa shuˍ ngaˬ hui ve Hkriꞈ yaˇ awˬ moˍ hkʼaw awˬ viˉ awˬ nyi hpehꞈ laˬ jaw ve awˬ lawn cawˬ maˇ ve chaw geh kaꞈ henˇ yuˬ gʼa ve yoˬ. (Tawˇ naˉ ve 27:17 gʼaw sheˍ.) Awˬ viˉ awˬ nyi Chawn˗ehˍ ve awˬ lawn htaꞈ teˇ geh nyi sheˍ. Yawˇ gʼuˇ suhˍ peuˍ ve te chehˇ ve teˇ yanˇ htaˇ, oˇ teˇ tawn lo maˇ˗awˍ ve chaw a shu yawˇ ve bon liˇ htaꞈ nyi hkʼaˇ suh ve yoˬ. Yawˇ hkʼaˬ hkʼe te Gʼuiˬ sha ve kanˉ te ve ha lehˬ gʼa ve le? Chawn˗ehˍ kʼoˆ ve, “hpehꞈ gʼa ve kʼo, ngaˬ hto toˇ˗e htaˇ awˬ viˉ awˬ nyi geh ku ve, ngaˬ hui chi teˇ yehˬ peuˬ leh awˬ nu ve teˇ yehˬ kʼawꞈ kʼai htaˇ hkʼaˬ hkʼe te leh maˍ cheuˬ laˇ tuˬ ngaˬ hui yaw daꞈ ve yoˬ. Tawˇ pa haˉ te kʼo, peuˬ taˉ ve teˇ yehˬ, yehˬ shehˍ hpaˇ tawˇ hkʼaˬ hkʼe yaw laˇ ve, ngaˬ hui yehˬ shehˍ hpaˇ htaꞈ hkʼaˬ hkʼe hkʼawꞈ piˇ ve yaw daꞈ ve yoˬ. Yehˬ shehˍ hpaˇ chi hkʼe yaw laˇ ve kʼo, ngaˬ hui hkʼaˬ hkʼe hkʼawꞈ piˇ tuˬ yaw daꞈ ve yoˬ.”

15. Ngaˬ hui Gʼuiˬ sha ve kanˉ te htaˇ bon lawˬ ve aˬ htoꞈ ma te a yeˇ uiˍ jaˇ ve le?

¹⁵ Yaˬhoˉvaˬ ga laˇ tuˬ bon lawˬ ve. Nawˬ hto toˇ˗e ve teˇ pawˆ le le Yaˬhoˉvaˬ ga laˇ tuˬ bon lawˬ cawˇ ve yoˬ. Ngaˬ hui Gʼuiˬ sha geh daꞈ kehˬ ve awˬ ha hpu maˇ gʼa ve kʼo, teˇ ceuˬ˗ehˬ kaꞈ te biˇ maˇ gʼa taˬ. (Chiˇ mvuh ve 127:1; Luˉkaꞈ 11:13) Nawˬ bon lawˬ htaˇ, nawˬ Gʼuiˬ sha htaꞈ aˬ htoꞈ ma ga laˇ tcuh gaˇ ve hkʼa tawˍ lehˆ kʼoˆ piˇ sheˍ. Tawˇ pa haˉ te kʼo, nyi ma pfuhˇ leh awˬ tehˬ ve htaꞈ na gaˇ ve chaw htaꞈ mawˬ tuˬ, Gʼuiˬ sha ga laˇ tuˬ nawˬ lawˬ gʼa ve yoˬ. Leh nawˬ lawˬ taˍ ve hkʼe leˇ mawˬ daꞈ ve chaw teˇ gʼaˇ le le htaꞈ gʼa hto maˍ piˇ cawˇ ve yoˬ.

16. Aˬ htoꞈ ma te a shu yawˇ hkʼaˇ yawˇ Liꞈ hpu henˇ ve ngaˬ hui Gʼuiˬ sha ve kanˉ te ve hkʼaw a yeˇ uiˍ jaˇ ve le?

¹⁶ A shu yawˇ hkʼaˇ yawˇ Liꞈ hpu henˇ tuˬ awˬ yanˇ shawˍ teh ve. Liꞈ hpu hkʼaw kʼoˆ ve, ‘Gʼuiˬ sha ve daꞈ jaˇ ve nyi ma cawˇ jaˇ ve leh biˇ jaˇ ve a loˍ htaꞈ nawˬ hui shiˍ leh fuiˍ daꞈ pehˬ daꞈ gʼa tuˬ te˗o.’ (Roˉmaꞈ 12:2) Ngaˬ hui a shu yawˇ hkʼaˇ yawˇ Liꞈ hpu hkʼaˬ htaˆ kaꞈ henˇ ve kʼo, ngaˬ hui Gʼuiˬ sha htaꞈ hkʼa dehꞈ shiˍ daꞈ tuˬ yoˬ. Ngaˬ hui hto toˇ˗e htaˇ ngaˬ hui kʼoˆ ve htaꞈ awˬ tehˬ yonˍ gʼa ve tehꞈ awˬ nu ve chaw mawˬ tuˬ yoˬ. Chi awˬ gʼuˇ suhˍ htaˇ kʼoˆ kai peuˬ ve Hka˗hta˗ri˗naˇ kʼoˆ ve, “maˇ maw ve awˬ yanˇ htaˇ Liꞈ hpu hkʼaw maˍ ve teˇ lawn lawn htaꞈ ngaˬ hkʼa dehꞈ yonˍ gʼa tuˬ gʼa te cawˇ ve tehꞈ dawˇ ve yoˬ. Hpanˍ shehˍ hpaˇ cawˬ ve, Liꞈ hpu awˬ tehˬ awˬ na Gʼuiˬ sha geh laˬ ve, leh chi beuꞈ teˇ co˗e Gʼuiˬ sha yawˇ ve kanˉ hkʼaˇ htaꞈ yehˇ chehˇ ve tehꞈ, chi ve teˇ hpaˍ htaꞈ caˉ daꞈ ve ngaˬ hkʼa dehꞈ chaˬ nyi ve yoˬ.” Hka˗hta˗ri˗naˇ kʼoˆ ve, a shu yawˇ hkʼaˇ yawˇ Liꞈ hpu henˇ ve yonˍ hkʼaˇ uiˍ la mvuh la leh Gʼuiˬ sha ve kanˉ te ve hkʼaw ha lehˬ jaˇ ve yoˬ.

17. Aˬ htoꞈ ma te Yeˍsuˆ Gʼuiˬ sha ve kanˉ te ve htaꞈ daꞈ ve hpawˇ hkʼaˬ htaˆ kaꞈ dawˇ nyi ve le?

¹⁷ Yeˍsuˆ yawˇ maˍ ve awˬ ceuˬ htaꞈ shu maˇ na gaˇ ve htawˇ, Yeˍsuˆ daꞈ ve hpawˇ hkʼaˬ htaˆ kaꞈ dawˇ leh bon maˍ ve yoˬ. Aˬ htoꞈ ma pa taw le? Chaw yaˇ awˬ tehˬ ve htaꞈ gʼa shiˍ tuˬ a yeˇ uiˍ jaˇ ve tehꞈ, yawˇ shiˍ ve pa taw te gʼa ve hkʼe chaw maˇ maˇ htaꞈ yawˇ ga piˇ gaˇ ve yoˬ. Chi hkʼoˆ kaꞈ, awˉ lawˉ htaˇ nyi ma maˇ pfuhˇ ve htawˇ, daꞈ ve awˬ lawn sha tanˇ kʼawꞈ na gaˇ la tuˬ yoˬ hehˉ. Yeˍsuˆ ve yehˬ kʼa hkʼaw ve chaw htaꞈ dawˇ nyi sheˍ. Yeˍsuˆ miˬ guiˬ hkʼoˆ 3 hkʼawꞈ hpaˆ Gʼuiˬ sha ve kanˉ te ve awˬ yanˇ htaˇ, yawˇ ve awˬ nyi awˬ naˉ awˬ laꞈ gʼawˇ hpehꞈ la ve teˇ gʼaˇ˗ehˬ kaꞈ maˇ cawˬ. (Yoˇhanˬ 7:5) Yaꞈ hkʼaˇ, Yeˍsuˆ kʼawꞈ teꞈ tu la peuˬ hkʼawꞈ nawˉ yawˇ hui Hkriꞈ yaˇ hpehꞈ la ve yoˬ.—Tcuh yaˇ 1:14.

18. Aˬ htoꞈ ma te ngaˬ hui hkʼaˬ htaˆ kaꞈ hto toˇ ve le?

¹⁸ Hkʼaˬ ve teˇ gʼaˇ awˬ viˉ awˬ nyi hpehꞈ la tuˬ ve ngaˬ hui maˇ shiˍ. Teˇ hpaˍ kʼo, awˬ tehˬ ve htaꞈ henˇ tuˬ awˬ nu ve chaw aꞈ kehˉ awˬ yanˇ gʼa yehˇ maw ve yoˬ. Ngaˬ hui maˍ ve htaꞈ shu maˇ na laˇ ve htawˇ, ngaˬ hui te ve daꞈ ve htaꞈ yawˇ gʼa mawˬ htaˇ ngaˬ hui daꞈ ve hpawˇ dawˇ chehˇ sheˍ ve tehꞈ yawˇ mawˬ ve yoˬ. Awˬ leh meuˇ htaˇ yawˇ  kaꞈ ‘Gʼuiˬ sha htaꞈ chiˇ uiˍ chiˇ mvuh la tuˬ yoˬ.’—1 Peˍtruˆ 2:12.

19. 1 Kawˇrenˍhtuˆ liꞈ 3:6, 7 hkʼaw kʼoˆ taˍ ve hkʼe, ngaˬ hui aˬ htoꞈ ma htaꞈ tawnˇ taˍ cawˇ ve le?

¹⁹ Ngaˬ hui ti leh iˉ kaˆ pfuhˍ piˇ ve chaw hpehꞈ ve htawˇ, Gʼuiˬ sha lehˬ uiˍ la piˇ shehˍ hpaˇ hpehꞈ ve tehꞈ ngaˬ hui tawnˇ taˍ cawˇ ve yoˬ. (1 Kawˇrenˍhtuˆ 3:6, 7 gʼaw sheˍ.) Eˬtiˬyoˇpi˗aˇ mvuhˇ miˬ hkʼaw awˬ viˉ awˬ nyi Keh˗hta˗hon kʼoˆ ve, “ngaˬ chehˇ kuiˬ teˇ tawn lo 20 hkʼawꞈ hpaˆ ve awˬ yanˇ Shaˉhkiˆhkanˍ ve chaw ngaˬ teˇ gʼaˇ tiˉ cawˬ ve yoˬ. Chi teˇ hkui Shaˉhkiˆhkanˍ ve chaw ngaˬ miˇ ma leh ngaˬ yaˇ 3 gʼaˇ htaꞈ kaꞈ shawˍ ve kʼo, 13 gʼaˇ cawˬ ve yoˬ. Baˆtiˆsaˬ maˇ haꞈ yuˬ sheˍ ve hto toˇ ve chaw kaꞈ teˇ gʼaˇ cawˬ ve yoˬ. Teˇ shinˉ le le ngaˬ hui geh hpawnˬ daꞈ la ve aˬ laˬ hkʼe 32 gʼaˇ cawˬ ve yoˬ.” Keh˗hta˗hon ha lehˬ ve hkʼaw caˉ leh hto toˇ leh nyi ma nuˇ nehˬ ve chaw htaꞈ Gʼuiˬ sha ve kanˉ hkʼaˇ hkʼaw loꞈ la tuˬ, Yaˬhoˉvaˬ ga piˇ ve htaꞈ yawˇ yeunˇ hkanˍ leh lawˬ chehˇ ve yoˬ.—Yoˇhanˬ 6:44.

20. Aˬ miˍ toꞈ ve hpawˇ ga piˇ ve chaw htaꞈ ngaˬ hui hkʼaˬ hkʼe shuˍ ve le?

²⁰ Yaˬhoˉvaˬ lehˬ teˇ gʼaˇ le le htaꞈ awˬ hpfuhˇ cawˬ ve tehꞈ shawˍ ve yoˬ. Awˬ leh meuˇ ve awˬ yanˇ maˇ gaˬ la sheˍ htaˇ, teˇ chaw ceuˬ le le htaꞈ shaw hpoˆ tuˬ ngaˬ hui yawˇ ve Yaˇ paˍ geh kanˉ teˇ geh te tuˬ daꞈ jaˇ ve awˬ vuiˬ peꞈ laˇ ve yoˬ. (Haˆgehˇ 2:7) Ngaˬ hui hto toˇ ve kaꞈ aˬ miˍ toꞈ ve hpawˇ ga piˇ ve chaw hkʼe hpehꞈ ve tehꞈ kʼoˆ gʼa ve yoˬ. Yehˬ lonˉ htaꞈ aˬ miˍ toꞈ chehˇ leh oˇ kaˬ lo chehˇ taˍ ve chaw htaꞈ ca ga piˇ tuˬ kʼai tcuh ve chaw hkʼe, ngaˬ hui kaꞈ chi htaꞈ shuˍ ve yoˬ. Chi ve htaꞈ gʼa ponˬ ve chaw teˇ hpaˍ hpaˍ ceh cawˬ leh ga piˇ ve chaw hkʼaˬ nyiˇ gʼaˇ maˇ cawˬ ve kaꞈ, yawˇ hui htaꞈ ga piˇ gʼa ve yoˬ. Ga piˇ ve chaw kanˉ lehˬ awˬ hpfuhˇ hkʼaˆ jaˇ leh a yeˇ uiˍ jaˇ. Chi beuꞈ teˇ co˗e ngaˬ hui hto toˇ chehˇ ve kanˉ hkʼa shuˍ yoˬ. Saˍtanˍ ve miˬ guiˬ haiˬ jaˇ ve hkʼaw hkʼaˬ nyiˇ gʼaˇ gʼa ponˬ tuˬ ngaˬ hui maˇ shiˍ ve htawˇ, yawˇ hui htaꞈ ga piˇ tuˬ, Yaˬhoˉvaˬ a shu htaꞈ yehˇ kaꞈ gʼa ve yoˬ. Boˬliˇviˇ˗aˇ mvuhˇ miˬ hkʼaw awˬ viˉ awˬ nyi An˗deh˗ri˗aˆ kʼoˆ ve, “shu awˬ tehˬ ve htaꞈ henˇ leh Baˆtiˆsaˬ haꞈ yuˬ htaˇ awˬ viˉ awˬ nyi laiˉ gʼaˇ ga daꞈ ve pa taw yoˬ.” Ngaˬ hui Gʼuiˬ sha ve kanˉ te ve htaꞈ hkʼaˬ htaˆ kaꞈ daꞈ ve hpawˇ dawˇ nyi sheˍ. Ngaˬ hui chi hkʼe te ve kʼo, Yaˬhoˉvaˬ awˬ bon naꞈ laˇ leh Gʼuiˬ sha ve kanˉ te ve ngaˬ hui ha lehˬ jaˇ tuˬ yoˬ.