1. Jesu naatomezi balateleli bahae mutala mañi, mi nebaezize cwañi? (Mubone siswaniso sesi fa kava.)

JESU naanani mubonelo omunde ka za bukombwa bwahae ka nako kaufela ya bupilo bwahae bwa fa lifasi, mi ubata kuli balateleli bahae ni bona babe ni mubonelo oswana. (Joa. 4:35, 36) Jesu hanaasali ni balutiwa bahae, nebakutalize ka tukufalelo. (Luka 10:1, 5-11, 17) Kono hasaatamilwe ni kubulaiwa, balutiwa bahae nebazwafile ka nakonyana mi nebatuhezi kukutaza. (Joa. 16:32) Jesu hasaazusizwe kwa bafu, abasusueza kuli bazwelepili kuisa pilu kwa musebezi wa kukutaza. Mi hasaakambamezi kwa lihalimu, balutiwa bahae nebakutalize ka tukufalelo yetuna kuli mane lila zabona nelibilaezi, ka kubulela kuli: “Mwabona! Mutalize Jerusalema ka tuto yamina.”—Lik. 5:28.

2. Jehova ufuyauzi cwañi musebezi wa kukutaza?

² Jesu naaetelezi musebezi one baeza Bakreste ba kwa makalelo bao, mi Jehova naabafuyauzi ni kutahisa kuli batu babañata baamuhele lushango lwabona. Ka mutala, ka Pentekota ya 33 C.E., batu bababato eza 3,000 nebakolobelizwe. (Lik. 2:41) Mi palo ya balutiwa yazwelapili kuekezeha hahulu. (Lik. 6:7) Nihakulicwalo, Jesu naapolofitile kuli mwa mazazi a mafelelezo batu babañata-ñata nebaka utwa taba yende kufita haisali.—Joa. 14:12; Lik. 1:8.

3-4. Ki kabakalañi Lipaki babañwi haku babelanga taata kukutaza, mi lukanyakisisañi mwa taba ye?

³ Kaufelaa luna luswanela kuba ni mubonelo omunde ka za bukombwa bwaluna. Mwa linaha zeñwi, kubunolo kuba ni mubonelo ocwalo. Kabakalañi? Kakuli batu babañata batabela kuituta Bibele kuli mane babañwi batokwanga kulibelela ilikuli kufumanehe Paki ya Jehova yakaitutanga ni bona! Kono mwa libaka  zeñwi za lifasi, bahasanyi kubabelanga taata kukutaza; batu habafumanehangi fa mandu, mi batu babafumanehanga fa mandu fokuñwi babonisanga kuli habatabeli kuituta Bibele.

⁴ Haiba mwa sibaka semupila ku sona kutaata kukutaza, liakalezo zefilwe mwa taba ye zakona kumitusa. Lukanyakisisa zebaezize Lipaki babañwi kuli bakone kukutaza kwa batu babañata. Mi hape lukanyakisisa libaka halukona kuba ni mubonelo omunde ka za bukombwa bwaluna ibe kuli batu baamuhela lushango lwaluna kamba kutokwa.

5. Ki miinelo mañi yetaata yebatalimana ni yona Lipaki za Jehova babañwi?

⁵ Lipaki za Jehova babañata kubabelanga taata kufumana bafu fa mandu. Bahasanyi babañwi bapila mwa libaka zenani miyaho yekantelwa hahulu kamba yeinzi mwa makwakwa. Libaka zeo mwendi likantelwa ki batu, ili bao mwendi habalumelezangi mutu ufi kamba ufi kukena mwahali haiba haasika memiwa ki muñaa sibaka. Mwa libaka zeñwi, bahasanyi balukuluhile kukutaza fa ndu ni ndu, kono habafumanangi batu babañata fa mandu. Bahasanyi babañwi bona bayo kutalezanga kwa libaka za kwa matakanyani kokupila batu babanyinyani. Bahasanyi bao bakona kuzamaya misipili yemitelele kuli bayo kutaza feela mutu alimuñwi, mi mwendi habayo fita kwapila bafumana kuli haayo fa ndu! Haiba luipumana mwa miinelo yecwalo, lusike lwazwafa. Ki lika mañi zelutokwa kueza kuli lutiyele miinelo yecwalo ni kuzwelapili kukutaza?

6. Bakutazi ba taba yende baswana cwañi ni bayambi ba litapi?

⁶ Jesu naabapanyize musebezi wa kukutaza kwa musebezi wa kuyamba litapi. (Mare. 1:17) Mandui babañwi fokuñwi bayambanga ka mazazi amañata basaswasi litapi. Kono habazwafangi, baezanga licinceho zeñwi. Bacincanga nako ya kuyamba, sibaka sa kuyambela, ni mobayambela litapi. Ni luna lwakona kueza licinceho zeswana mwa bukombwa bwaluna. Halunyakisiseñi liakalezo zelatelela.

7. Kukutaza ka linako zeshutana-shutana kukona kulutusa cwañi?

⁷ Mulike kupotela batu ka linako zeshutana-shutana. Lukakutaza kwa batu babañata haiba lubapotela ka nako yebafumaneha fa mandu. Niha basafumanehi fa mandu, hakutalusi kuli bayelezi, bakakuta! Mizwale ni likaizeli babañata bakutazanga musihali kamba manzibwana bakeñisa kuli batu babañata bafumanehanga fa mandu ka nako yeo. Hape ka nako yeo, batu bakatuluhile mi bakona kutabela kuteeleza ku luna. Kamba mwakona kulika kueza zaezanga muzwale yomuñwi yali muuna-muhulu mwa puteho, yabizwa David. Muzwale yo utalusa kuli hamulaho wa kukutaza mwa sibaka sesiñwi ka hora iliñwi kamba zepeli, yena ni Paki yomuñwi yasebeza ni yena mwa bukombwa, bakutelanga fa mandu fone basika fumana batu hane banze bakutaza. Utalusa kuli: “Nikomokanga hahulu kuli lufumananga batu babañata fa mandu ao.” *

8. Lukona kusebelisa cwañi sikuka sesiñozwi kwa Muekelesia 11:6 haluli mwa bukombwa?

⁸ Haluswaneli kuzwafa. Liñolo fokutomile taba yelunyakisisa ye, lilutusa kulemuha mubonelo oluswanela kuba ni ona. (Mubale Muekelesia 11:6.) Bo David, bababulezwi kwamulaho, nebasika zwafa. Zazi leliñwi hane bakutela fa ndu yeñwi, bafumana muñaa ndu yanaasa fumanehangi nako kaufela hane bayanga fateñi. Muuna yo naatabela kuambola litaba za mwa Bibele, mi abulela kuli: “Senipilile mwa ndu mo ka lilimo zebato eza 8 kono nalikuba nipotelwe ki Lipaki za Jehova.” Bo  David bali: “Nilemuhile kuli hamufumana batu fa mandu hañata batabelanga kuteeleza kwa lushango lwaluna.”

9. Lipaki za Jehova babañwi bakonanga cwañi kukutaza kwa batu babasa fumanehangi fa mandu?

⁹ Mulike kucinca sibaka semukutaleza ku sona. Bahasanyi babañwi bacincize sibaka sebakutalezanga ku sona ilikuli bakone kukutaza kwa batu babasa fumanehangi fa mandu. Ka mutala, bakutazanga mwa makululu ni ka kuitusisa likalani za lihatiso, mi kueza cwalo kutusize kuli bakopane ni batu babapila mwa miyaho yemituna, ili mobasa lumelezwi kukutaza fa ndu ni ndu. Habanze bakutaza ka nzila yeo, bakonanga kuambola ni batu babapila mwa miyaho yecwalo. Hape bahasanyi babañata balemuhile kuli batu babali mwa libaka za kuitabisa ka zona, fa misika, ni libaka za lipisinisi bakona kutabela kuambola kamba kuamuhela lihatiso zaluna. Muzwale yabizwa Floiran, yali muokameli wa mupotoloho kwa Bolivia, utalusa kuli: “Luyanga kwa misika ni libaka za lipisinisi mwahalaa 13:00 ni 15:00 kakuli ka nako yeo, balekisi habasika pateha hahulu. Hañata lubanga ni lipuisano zende mi mane lukalisanga lituto za Bibele.”

10. Ki lika mañi zeñwi zemukona kueza kuli mukutaze kwa batu?

¹⁰ Mulike mikutalezo isili. Luungeñi kuli mulikile kupotela mutu yomuñwi fa ndu yahae hañata-ñata. Mwendi nemuyanga fa ndu yahae ka linako zeshutana-shutana kono naasafumanehangi. Kana kunani nzila yeñwi yemukona kukutaza ka yona ku mutu yo? Kaizeli yabizwa Katarína, utalusa kuli: “Niñolelanga batu bonisika fumana fa mandu mañolo, kubataluseza litaba zene nikabulela kambe neniambola ni bona pata ka pata.” Luitutañi kwa taba yeo?  Mulike momukonela kaufela kuambola ni mutu ni mutu yapila mwa sibaka semukutaleza ku sona.

11. Ki kabakalañi batu babañwi habasa tabeli kuteeleza kwa lushango lwaluna?

¹¹ Batu babañwi habatabeli kuteeleza kwa lushango lwaluna. Baikutwa kuli habatokwi kuziba za Mulimu kamba litaba zefumaneha mwa Bibele. Bakeñisa manyando amañata aliteñi mwa lifasi, habalumeli kuli Mulimu uteñi. Habalumeli zeibulela Bibele bakeñisa kuli babahulu ba bulapeli babaipapata kuli bapila ka kuya ka likuka za mwa Bibele, baeza lika zeñata zemaswe. Babañwi banahananga hahulu za mibeleko yabona, mabasi, kamba miinelo yetaata yebakopana ni yona, mi baikutwa kuli Bibele haikoni kubatusa. Ki nto mañi yekona kulutusa kuzwelapili kuba ni tabo haiba batu bolukutaza ku bona baikutwa kuli lushango lwaluna haki lwa butokwa?

12. Kusebelisa sikuka sesiñozwi kwa Mafilipi 2:4 kukona kulutusa cwañi haluli mwa bukombwa?

¹² Mubonise kuli mwaisa pilu batu bomukutaza ku bona. Batu babañwi bane basatabeli kuteeleza kwa lushango lwaluna baamuhezi taba yende hamulaho wa kulemuha kuli muhasanyi yanaakutaza ku bona naabaisa pilu luli. (Mubale Mafilipi 2:4.) Ka mutala, bo David bababulezwi kwamulaho, batalusa kuli: “Haiba mutu abulela kuli hatabeli, lukutisanga Libibele ni lihatiso zaluna mwa mikotana, mi kihona lubulela kuli: ‘Lubata kuziba libaka hamuikutwa cwalo.’” Batu balemuhanga haiba mutu wabaisa pilu. Mwendi habana kuhupula zene lubulezi kono mwendi bakahupula kuli nelu baisize pilu. Batu niha basike balufa kolo ya kuli lukutaze ku bona, lusakona kubonisa kuli lwabaisa pilu ka lika zelueza ni kubabonisa silikani.

13. Lukona kueza cwañi kuli batu bolukutaza ku bona batabele lushango lwaluna?

¹³ Lubonisa kuli luisa pilu mutu yoluambola ni yena haiba lucinca litaba zene lubata kubulela ni kuikambota ni yena litaba zatabela. Ka mutala, kana fa lapa kunani lika zebonisa kuli muñaa ndu unani bana? Muñaa ndu ukona kutabela kuutwa kelezo ya mwa Bibele ya mwakuhuliseza bana kamba likuka zekona kumutusa kuba ni tabo mwa lubasi. Kana ndu yapila ku yona inani likulukulu zeñata kwa munyako? Lukona kuikatulela kuambola za bukebenga bobuatile mwa lifasi ni sabo yetuna yebanani yona batu kabakala bukebenga bo, kihona lukataluseza muñaa ndu mobuka tatululelwa butata bo. Nako kaufela hamufumana batu babatabela kuteeleza kwa lushango lwaluna, mubatuse kuziba mobakona kutusezwa ki zeibulela Bibele. Bo Katarína bababulezwi kwamulaho, batalusa kuli: “Niikupulisanga monituselizwe ki niti ya  mwa Bibele.” Kueza cwalo kutusize bo Katarína kukutaza ka buikolwiso, mi batu bobakutazanga ku bona balemuhanga cwalo.

14. Ka kuya ka Liproverbia 27:17, batu babasebeza hamoho mwa bukombwa bakona kutusana cwañi?

¹⁴ Mukupe tuso ku babañwi. Mwa linako za baapositola, Paulusi naabonisize Timotea mwakuezeza musebezi wa kukutaza ni kuluta batu, mi naamususuelize kuitusisa miezezo yeswana kuli atuse mizwale ni likaizeli bahae. (1 Makor. 4:17) Ka kuswana ni Timotea, ni luna lwakona kuituta kwa mutala wa mizwale ni likaizeli babayezi seli. (Mubale Liproverbia 27:17.) Halunyakisiseñi mutala wa muzwale yabizwa Shawn. Muzwale yo naali paina, mi naaizo sebeleza kwa sibaka sesiñwi sa kwa matakanyani ka nakonyana, ili ko batu bane bapila kwateñi nebaikutwa kuli nebasa tokwi kucinca litaba zene balumela. Ki nto mañi yene mutusize kuzwelapili kuba ni tabo? Utalusa kuli: “Nenibonanga teñi kuli nako kaufela nisebeza ni mutu yomuñwi mwa bukombwa. Hane luzwa fa ndu yeñwi kuya ku yeñwi, neluikambotanga molukona kuekeleza kwa buikoneli bwaluna bwa kukutaza. Ka mutala, nelunyakisisanga mone izamaezi puisano ni mutu yene lusazo kutaza ku yena. Hasamulaho, nelunyakisisanga mone lukaezeza haiba muñaa ndu alualaba ka nzila yeswana.”

15. Ki kabakalañi haluswanela kulapelanga haluyo kutaza?

¹⁵ Mulapele ku Jehova kuli amituse. Mukupe Jehova kuli amituse nako kaufela hamuyo kutaza. Lutokwa kutusiwa ki moya wahae okenile omaata kuli lukone kukondisa mwa bukombwa. (Samu 127:1; Luka 11:13) Hamulapela ku Jehova, mueze cwalo ka kunonga. Ka mutala, mumukupe kuli amituse kufumana mutu yatabela. Hasamulaho, mueze sina momukupezi mwa tapelo ka kulika kukutaza kwa batu kaufela bomukopana ni bona mwa bukombwa.

16. Ki kabakalañi kueza tuto ya ka butu hakukona kulutusa mwa bukombwa?

¹⁶ Mubange ni nako ya kueza tuto ya ka butu. Linzwi la Mulimu libulela kuli: “Mulemuhe tato ya Mulimu yende ni yeamuheleha ni yepetehile.” (Maro. 12:2) Haiba luikolwisisize luli kuli litaba zeluitutile ka za Mulimu ki za niti, lukabulelanga ka buikolwiso bobutuna haluli mwa bukombwa. Bo Katarína, bababulezwi kwamulaho, batalusa kuli: “Nakonyana kwamulaho, nenilemuhile kuli nenitokwa kutiisa tumelo yaka ka za lituto zeñwi za mwa Bibele za makalelo. Kacwalo, nakala kuituta ka butungi litaba zebonisa kuli kunani Mubupi, Bibele ki Linzwi la Mulimu luli, ni kuli Mulimu unani kopano yaitusisa kacenu.” Bo Katarína batalusa kuli kueza tuto ya ka butu neku batusize kuba ni tumelo yetiile ni kuba ni tabo mwa bukombwa.

17. Ki kabakalañi Jesu hanaazwezipili kuba ni mubonelo omunde mwa bukombwa bwahae?

¹⁷ Jesu naazwezipili kuba ni mubonelo omunde mi naazwezipili kukutaza kusina taba kuli batu babañwi nebasika amuhela lushango lwanaakutaza. Kabakalañi? Naaziba kuli batu nebatokwa kuziba niti, mi naabata kutusa batu babañata kuutwa lushango lwa Mubuso. Hape naaziba kuli batu babañwi bane basika teeleza ku yena hanaakutalize ku bona lwapili nebaka amuhela lushango lwahae hasamulaho. Halunyakisisiseñi zeneezahezi kwa lubasi lwahae kasibili. Ka nako kaufela ya bukombwa bwa Jesu bwa fa lifasi, ili lilimo zetaalu ni licika, hakuna nihaiba alimuñwi kwa banyani bahae yanaabile mulutiwa wahae. (Joa. 7:5) Kono hasaazusizwe kwa bafu, nebabile Bakreste.—Lik. 1:14.

18. Ki kabakalañi haluswanela kuzwelapili kukutaza?

¹⁸ Hakuzibahali kuli kwa batu bolukutaza ku bona, ki bo mañi babakaba batanga ba Jehova. Batu babañwi kukona kubaangela nako yeñata  kuli baitute niti kufita babañwi. Mane nihaiba batu babahana kuteeleza ku luna, balemuhanga muzamao waluna omunde ni moya omunde olubonisa, mi hamulaho wa nako, bakona kukala ‘kukanyisa Mulimu.’—1 Pit. 2:12.

19. Liñolo la 1 Makorinte 3:6, 7 lilutusa kulemuhañi?

¹⁹ Nihaike kuli luna ki luna babacala ni kuselaela, luswanela kulemuha kuli Mulimu ki yena yahulisa. (Mubale 1 Makorinte 3:6, 7.) Muzwale yabizwa Getahun, yasebeleza kwa Ethiopia, utalusa kuli: “Ka lilimo zefitelela 20, neli na feela Paki mwa sibaka mone nipila, mi sibaka seo nesisa kutalezwangi hahulu. Kono cwale sekunani bahasanyi ba 14 kwanu. Ba 13 ku bona bakolobelizwe, kukopanyeleza ni bakuluna ni bana baluna babalaalu. Batu ba 32 ka avareji bafumanehanga kwa mikopano yaluna.” Bo Getahun batabile hahulu kuli nebazwezipili kukutaza mi nebalibelezi ku Jehova ka pilu-telele kuli ahohele batu ba lipilu zende kwa kopano yahae!—Joa. 6:44.

20. Musebezi olueza uswana cwañi ni wa batu babayo pilisa batu babañwi babaziyelehile?

²⁰ Jehova uunga batu kaufela kuli ki ba butokwa. Ulufile tohonolo ya kusebeza ni Mwanaa hae mwa musebezi wa kukubukanya batu babazwa mwa macaba kaufela pili lifasi le lisika fela kale. (Hag. 2:7) Musebezi waluna wa kukutaza ukona kubapanywa kwa musebezi wa kupilisa batu babaziyelehile. Mi luna luswana sina batu babalumilwe kuyo pilisa batu babakwalezwi mwa mukoti wa macwe otibukile. Nihaike kuli batu bao bakona kufumana feela babeleki basikai babasa pila, musebezi obaeza kaufelaa bona ki wa butokwa. Musebezi olueza wa kukutaza ni ona ucwalo. Haluzibi kuli ki batu babakai boluka pilisa mwa lifasi la Satani le. Kono Jehova wakona kuitusisa mutu ufi kamba ufi ku luna kuli abatuse. Muzwale yabizwa Andreas, yapila kwa Bolivia, utalusa kuli: “Haiba mutu aituta niti ni kuunga muhato wa kukolobezwa, naziba kuli utusizwe ki mizwale ni likaizeli kaufela mwa puteho.” Haike ni luna luzwelepili kuba ni mubonelo omunde oswana ka za bukombwa bwaluna. Haiba lueza cwalo, Jehova uka lufuyaula mi lukaba ni tabo mwa bukombwa.