1. Chakutalilahwinyi chayishililiyi Yesu akwakumulondela, nawa elilidi? (Talenu mwevulu wudi hakava.)

YESU watwalekelihu kushimwina hadiñayi hanu hamaseki nawa nakukeña niakwakumulondela niwena atwalekihu kushimwina chakadi kuzeya. (Yow. 4:35, 36) Hampinji yadiñayi Yesu nawatumbanji twindi, adiña nakushimwina neyena. (Luka 10:1, 5-11, 17) Ilaña chelili Yesu amukasi nawa amujahi, atumbanji twindi alekeli kushimwina hakapinji kantesha. (Yow. 16:32) Chamusañwiliwu, Yesu wayikolesheli atumbanji twindi kusha muchima hakushimwina. Hanyima yakwila nayi dehi mwiwulu, atumbanji twindi ashimwinini neyena chikupu chakwila ayilumbu jawu atachikili kuhosha nawu: “Talenu, munenzeshi Yerusalema yejima nantañishilu yenu.”—Yilw. 5:28.

2. Yehova nakiswili ñahi mudimu wakushimwina?

² Yesu walombweleña mudimu wazatileñawu akwaKristu amumafuku awapostolu nawa Yehova wayikiswilileña chakwila avulili chikupu. Chakutalilahu, haPentekosta 33 C.E., antu akushika ku 3,000 apapatisheweli. (Yilw. 2:41) Nawa atumbanji niwena atwalekelihu nakuvulilaku nankashi. (Yilw. 6:7) Hela chochu, Yesu washimwineñahu dehi nindi antu amavulu aketeja nsañu yayiwahi mumafuku akukuminina.—Yow. 14:12; Yilw. 1:8.

3-4. Muloñadi antu amakwawu chichayikalilaña kushimwina mumaluña amakwawu nawa tukuhanjekadi muchinu chibaaba?

³ Wejima wetu twatwalekañahu kushimwina chakadi kuzeya. Mumatuña amakwawu, chapela kwila mwenimu. Muloñadi? Muloña antu amavulu ekala nampwila yakudiza Bayibolu chakwila amakwawu ahembelelaña sampu kunamwekani Chinsahu wakuyidizisha! Ilaña mumatuña amakwawu chayikalilaña  nankashi akwakushimwina; antu ekalaña hamatala wanyi nawa antu ekalaña hamatala ekalaña wanyi nampwila yakutiyilila kunsañu yamuBayibolu.

⁴ Neyi mwashakamaña mwiluña mwakala kuzata mudimu wakushimwina, njila jidi muchinu chibaaba jikuyikwasha. Tukuhanjeka chelañawu antu amakwawu hakwila ahanjekeña nawantu amavulu mumudimu wakushimwina. Nawa tukuhanjeka chitunateli kutwalekahu kushimwina hela chakwila antu etejaña nsañu yetu hela nehi.

5. Kukalanyi kwamonañawu aYinsahu amavulu?

⁵ Chinakuyikalila nankashi aYinsahu amavulu kuwana antu akuhanjeka nawu hamatala. Akwakushimwina amakwawu ashakamaña mumaluña mwekala matala akiñañawu hela akutuñila mujimpwembu. Hanawa amatala hekalaña atulama hela anhembi abulaña kwiteja antu anabuli kutambikawu kwiñila. Akwakushimwina amakwawu ayaña nakushimwina kwitala nikwitala chakadi wakuyikañesha, ilaña awanañahu hohu antu antesha hamatala. Hela chochu, akwakushimwina amakwawu ashimwinaña munyikala mwekala antu antesha. Akwakushimwina anateli kwenda maluña amalehi hadaha kwendela muntu wumu wunateli nikubula kuwanawu hetala. Dichi neyi twamonaña kukala kwamuchidiwu, bayi tuzeyaku. Chumanyi chinateli kutukwasha hakwila nawu tushindi iku kukala nawa tuhanjekeña nawantu amavulu?

6. Akwakushimwina ekala ñahi neyi ayibinda anshi?

⁶ Yesu wesekejeli mudimu wakushimwina namudimu wazatañayi chibinda chanshi. (Maku 1:17) Ayibinda anshi amakwawu anateli kuya hadi mafuku amavulu chakadi kujahahu inshi hela wumu. Ilaña alekaña wanyi, ahimpaña njila yakujahilamu. Ahimpaña mpinji, iluña hela njila jakujahilamu. Ninetu tunateli kwila chochimu mumudimu wakushimwina. Ichi tuhanjekenu hayuma yitunateli kwila.

7. Chumanyi chinateli kufumamu neyi tushimwinaña hampinji jamboka-mboka?

⁷ Endelenuña antu hampinji yamboka-mboka. Tunateli kuhanjeka nawantu amavulu neyi tuyaña nakushimwina hampinji yekalañawu hamatala. Hela chakwila antu afumañahu hamatala, ilaña afuntaña cheñi. Amanakwetu niahela amavulu chayipelelaña kushimwina namwana hela namelela muloña awanañahu antu amavulu. Kubombelahu, eni matala haniyi mpinji ekalaña ananooki dehi nawa anakukeña kutiyilila kunsañu yetu. Hadaha mukukeña kwila neyi chelañayi manakwetu David. Wahosheli nindi hanyima yakwila anashimwini dehi hadi mpinji yayilehi, yena nimukwawu afuntaña cheñi nakutala antu abula kuwanawu hamatala. Wahosheli nindi, “Neyi tunafunti cheñi nahayamaña chitwawanañahu antu amavulu hamatala.” *

8. Tunateli kuzatisha ñahi Mukwakutañisha 11:6 mumudimu wetu wakushimwina?

⁸ Dichi bayi tuzeyaku. Dichinakutwanukisha mutu wachinu chibaaba. (Tañenu Mukwakutañisha 11:6.) Manakwetu David ashimunawu hakusambila wazeyeli wanyi. Mpinji yimu, wamuwaninihu mwiniitala wabulileña kuwanayi hetala hakusambila. Iwu iyala wadiña nampwila yakudiza Bayibolu nawa wahosheli nindi: “Nashakami yaaka 8 kunu, ilaña hanu hetala kanda henzeñahu dehi aYinsahu jaYehova.” Manakwetu David wahosheli nindi, “Ichi neluki nami neyi wuyiwana antu hetala kakavulu etejaña nsañu yitwashimwinaña.”

9. Yumanyi yelañawu aYinsahu amakwawu hakwila awaneña antu abulaña kuwanawu hamatala?

 ⁹ Esekenu kuya kumaluña amakwawu. Hakwila nawu ahanjekeña nawantu abulaña kuwanawu hamatala, akwakushimwina ayaña kwiluña dacheñi nakushimwinaku. Chakutalilahu, kushimwina munyikwakwa nikuzatisha jingolofwana hinjila yimu yinayikwashi kuhanjeka nawantu ashakamaña mujimpwembu mwabulañawu kushimwinawu kwitala nikwitala. Ichi chayikwashaña aYinsahu kuhanjeka nawantu ashakamaña mumatala amuchidiwu. Cheñi, akwakushimwina amakwawu aneluki nawu antu akasunukaña kuhosha hela kutambula nyikanda neyi adi kumaluña akunookela, kuyisankanu hela kumaluña akulandishila. Floiran, nkoñi wañinza wakuBolivia wahosheli nindi: “Twayaña kuyisankanu na 13:00 nikuma 15:00, hekalañawu akwakulandisha nampinji. Twahanjekaña chiwahi nawa twatachikaña nikuyidizisha Bayibolu.”

10. Njilanyi yikwawu yimwatela kuzatisha hakwila muwaneña antu hamatala?

¹⁰ Esekenuku njila yikwawu. Twili netu muneseki kumwendela muntu kapampa kakavulu. Nawa munayiku mpinji jamboka-mboka, ilaña mwamuwanañahu wanyi hetala. Kudihu njila jikwawu mumunateli kumuwanina iwu muntu? Katarína wahosheli nindi, “Nayisonekelaña nyikanda antu inabulaña kuwana hamatala nakuyileja nsañu yinatela kuyileja neyi twadiwana nawu.” Chumanyi chitunakudizilaku? Esekenuña kuzatisha njila yamboka-mboka kulonda muwaneña antu amwiluña denu hampinji yimunakuzata mudimu wakushimwina.

11. Muloñadi antu amakwawu chabulilañawu kukeña kutiya nsañu yetu?

¹¹ Antu amakwawu akeñaña wanyi kutiya nsañu yetu. Atoñojokaña nawu atela kumwiluka Nzambi hela Bayibolu wanyi. Amukuhwelela Nzambi wanyi muloña wamakabi adi mukaayi. Akeña wanyi Bayibolu muloña amonaña akulumpi jakwitiya anakukoña yuma yatama iku ashimunaña nawu ovwahilaña chahosha Bayibolu. Mpinji yejima amakwawu atoñojokaña hohu hanyidimu yawu, yisaka nikukala kukwetiwu, nawa akañanyaña kwiluka Bayibolu chiyinateli kuyikwasha. Tunateli kutwalekahu ñahi kushimwina namuzañalu hela chakwila antu itwashimwinaña alemesha wanyi nsañu yetu?

12. Mazu ekala haAFwilipi 2:4 anateli kutukwasha ñahi mumudimu wakushimwina?

¹² Mwekeshenuña nenu mwayakamenaña. Antu amavulu akaanineña nsañu yetu hakusambila, enjili nakwiteja nsañu yayiwahi chamweniwu nawu mukwakushimwina wayakamenaña. (Tañenu AFwilipi 2:4.) Chakutalilahu, David itwashimuna hakusambila wahosheli nindi, “Neyi muntu yahosha nindi inakukeña wanyi, twalekaña kuhanjeka haBayibolu hela nyikanda yetu, nawa namulejaña nami: ‘Inakukeña kwiluka chuma chinaleteshi wuhoshi neyi wunakukeña wanyi.’” Antu anateli kwiluka neyi muntu wayakamenaña. Anateli kuvulamena yuma yitwahosheli, ilaña akwanukaña yuma yitwayililili. Hela chakwila muntu wukutwiteja wanyi kumuleja nsañu yayiwahi, tunateli kumwekesha muyilwilu yetu hela hamesu netu twayakamenaña.

13. Chumanyi chitunateli kwila kulonda nsañu yetu yiyisañumuni antu?

¹³ Twamwekeshaña netu twayakamenaña antu neyi tuhimpa nsañu yitunakushimwina kulonda yiyikwashi. Chakutalilahu, kudihu yuma yitunakumona yinakumwekesha nawu mwiniitala wukweti anyana? Anvwali anateli kukeña kutiyilila kukufumba kwamuBayibolu kunakumwekesha chakukulisha anyana hela chakwikala namuzañalu muchisaka. Komana hanji yawu hadi malola? Tunateli kuhosha hawubanji niyuma yinakuleta woma mukaayi, hadaha mwiniitala nateli kutiya kuwaha kutiya nawu kumbidi kwakekala wubanji wanyi. Mpinji yejima yimunakuwana antu anakukeña kutiyilila kunsañu yamuBayibolu, yikwashenu amoni kufumba kwamuBayibolu chikunateli kuyikwasha. Katarína, itwashimunahu wahosheli nindi, “Mpinji yejima natoñojokaña hakufumba kwamuBayibolu chikunankwashi.” Ichi Katarína wakuhwelela yuma  yahoshañayi nawa antu ahanjekañayi nawu amonaña chumichi.

14. Kwesekeja naYishimu 27:17, antu anakushimwina hamu anateli kudikwasha ñahi wumu namukwawu?

¹⁴ Itejenuña akwenu ayikwashi. Mumafuku awapostolu, Pawulu wamulejeli Timotewu njila jakushimwinamu nikutañisha, nawa wamukolesheli Timotewu kuzatisha iji njila kulonda yakwashi antu amakwawu. (1 Kor. 4:17) Kufwana Timotewu, tunateli kudizila kudi amakwetu apama amuchipompelu chetu. (Tañenu Yishimu 27:17.) Talenu chakutalilahu chamanakwetu Shawn. Hadi mpinji yayilehi, wazatilileña wupayiniya mwiluña mwekala antu asweja kukeña nsakililu yawu. Watwalekelihu ñahi kushimwina namuzañalu? Wahosheli nindi, “Mpinji yejima nazatileña namukwetu. Hampinji yitwayileña kumatala awantu twadikwashileña wumu namukwawu chakuwahishaku njila jetu jakushimwinamu. Chakutalilahu, twahanjekeleña chahoshayi mwiniitala nichitwamwakula. Nkumininaku, twahanjekeleña chitwatela kwakula neyi mwiniitala yahosha chochimu.”

15. Kulomba kwalemenadi mumudimu wetu wakushimwina?

¹⁵ Mulombenu Yehova yayikwashi. Mulombenuña Yehova kulonda yayikwasheña mpinji yejima yimunakushimwina. Chakadi wukwashu waspiritu yindi yajila, kwosi chuma chitunateli kuzata. (Mas. 127:1; Luka 11:13) Tenenuña chuma chimunakukeña neyi munakumulomba Yehova nenu yayikwashi. Chakutalilahu, mulombenu yayilomboli kudi muntu wunakukeña kudiza nawa wunakukeña kutiyilila. Nawa zatenu nañovu kulonda mushimwini antu ejima imunakuwana.

16. Kudizaña Bayibolu nkawetu kunateli kutukwasha ñahi mumudimu wetu wakushimwina?

¹⁶ Ikalenu nampinji yakudiza nkawenu. Izu daNzambi dahosha nawu: “[Ilukenu] nkeñelu yaNzambi nenu yayiwahi, wayiteja nawa yawanina chikupu.” (Rom. 12:2) Neyi twiluka chikupu netu twamwiluka Nzambi, tukulejañaku antu hadi Nzambi nawa akumona nawu twakuhwelela yuma yitunakuhosha. Katarína itwashimuna hakusambila wahosheli nindi: “Hadi yaaka yantesha yinahitihu, nenjili nakwiluka nami nateleleli kukolesha chikuhwelelu kutalisha hayuma yatañishaña Bayibolu. Dichi nadizili chikupu wunsahu wamwekeshaña nawu kwekala nleñi, Bayibolu mwamweni Hizu daNzambi nawa nami Nzambi wukweti kuloñesha kwindi kunakumwimenaku makonu.” Katarína wahosheli nindi kudiza Bayibolu nkawindi kwakolesheli chikuhwelelu chindi nawa kwamukwashili kwikala namuzañalu mumudimu wakushimwina.

17. Muloñadi Yesu chatwalekelihu nakushimwina chakadi kuzeya?

¹⁷ Yesu wazeyeli wanyi nawa watwalekelihu kushimwina hela chakwila antu amakwawu akaanineña kutiyilila kunsañu yindi. Muloñadi? Welukili nindi antu akeñeleña kudiza chalala, nawa wakeñeleña kukwasha antu amavulu kulonda eluki nsañu yaWanta. Welukili cheñi nindi antu amakwawu akaanineña hakusambila anateli kwiteja. Toñojokenu chuma chamwekeni muchisaka chindi. Hadi yaaka yisatu nachikunku yazatiliyi Yesu mudimu wakushimwina, kwosi manakwindi hela wumu wekalili kambanji kindiku. (Yow. 7:5) Ilaña, hanyima yakwila anamusañuli dehi, ekalili akwaKristu.—Yilw 1:14.

18. Muloñadi chitwashimwinaña mpinji yejima?

¹⁸ Tuneluki wanyi wunateli kwiteja nakwikala kambuña aYehova. Antu amakwawu hashimbulaña hakwila adizi chalala amakwawu  nehi. Niantu akaanaña kutiyilila kunsañu yetu neyi amonaña yilwilu yetu yayiwahi, nkumininaku anateli kutachika ‘kumulemesha Nzambi.’—1 Pet. 2:12.

19. Kwesekeja na 1 AKorinda 3:6, 7, chumanyi chitwatela kwiluka?

¹⁹ Hampinji yitunakutumba nikutukumwina, twatela kwanukaña netu Nzambi diyi wukweti mudimu wakukulisha. (Tañenu 1 AKorinda 3:6, 7.) Manakwetu Getahun wazatilaña kuEthiopia, wahosheli nindi: “Hadi yaaka yakubadika ha 20, yami nadiña hohu Chinsahu wazatilileña mwiluña mwabula kuzatilawu dehi. Ilaña chayinu mpinji kunidi iluña kudi akwakushimwina 14. Ejima wawu 13 apapatishewa kushilahu niñodami nianyanetu asatu. Hakupompa twashikaña antu 32.” Getahun watiyaña kuwaha muloña watwalekelihu kushimwina nakudiwunjika nikumuhembelela Yehova kulonda yakoki antu akweti nyichima yayovu mukuloñesha Kwindi.—Yow. 6:44.

20. Twekala ñahi neyi akwakupulwisha antu?

²⁰ Yehova wamonaña antu ejima nindi alema. Watwinka kuzatila hamu naMwanindi mudimu wakupompesha antu akunyuza yejima henohu kukuma kwanshakaminu yamakonu kanda kushiki. (Hag. 2:7) Mudimu wakushimwina tunateli kuwesekeja namudimu wakupulwisha antu. Nawa tudi neyi antu anatemeshiwu kuya nakupulwisha antu anabutiliwu kudi maseki mumugoti. Hela chakwila antu antesha diwu anawaniwu amomi, mudimu wunazatiwu akwakupulwisha walema nankashi. Dichidi nimudimu wutwazataña wakushimwina. Tuneluki wanyi antu añahi itunateli kupulwisha mukaayi kaSatana. Yehova nateli kuzatisha muntu wudi wejima kulonda yayikwashi. Manakwetu Andreas, washakamaña muBolivia, wahosheli nindi, “Namonaña muntu wejima wunadizi Bayibolu nawa yapapatishewa nami himudimu wazatiluwu antu amavulu.” Ninetu tutwalekenuhu kushimwina chakadi kuzeya. Neyi twila mwenimu, Yehova wukutukiswila nawu tukwikala namuzañalu chikupu mumudimu wetu wakushimwina.