1. Isua’n a hnungzuitute tân entawn tûr eng nge a hnutchhiah a, engtin nge an chhân lêt? (A kâwma milem en rawh.)

ISUA chuan leia rawng a bâwl chhûng khân, rilru put hmang dik a nei reng a, a hnungzuitute pawh rawngbâwlnaa rilru put hmang dik nei reng tûrin a duh a ni. (Joh. 4:35, 36) A zirtîrte chu Isua an thawhpui lai chuan, thu hrilh rawngbâwlnaah an phûr hle a. (Lk. 10:1, 5-11, 17) Mahse, Isua man a nih a, tihhlum a nih hnu chuan, an phûrna chu rei lo te chhûng an hloh a ni. (Joh. 16:32) Isua chuan a thawhleh hnuah, anni chu thu hrilh rawngbâwlna ngaihven tlat tûrin a fuih a. Vâna a lâwn hnuah pawh, ṭhahnemngai taka thu an hrilh zawm zêl avângin, an hmêlmate chuan: “Hre rawh u, in thu zirtîrin Jerusalem khua in tihkhah vek tawh hi,” tiin an sawisêl hial a ni.—Tirh. 5:28.

2. Engtin nge Pathian Jehova’n thu hrilh rawngbâwlna chu mal a sâwm?

² Isua chuan kum zabi khatnaa rawngbâwlna chu a kaihruai a, Pathian Jehova’n an thawhrimna chu mal a sâwm a ni. Entîr nân, C.E. 33 Pentikost nî khân, mi 3,000 vêlin baptisma an chang a. (Tirh. 2:41) Zirtîrte chu nasa takinan rawn pung chho zêl a. (Tirh. 6:7) Chuti chung pawhin bâkah, Isua chuan thu hrilh rawngbâwlna chu ni hnuhnûngahte chuan a hlawhtling lehzual ang tih a sawi lâwk a ni.—Joh. 14:12; Tirh. 1:8.

3-4. Engvângin nge unau ṭhenkhat tân rawngbâwl chu a harsat theih a, he thuziakah hian eng nge kan sawiho vang?

³ Kan za hian rawngbâwlnaah rilru put hmang dik neih zawm zêl kan tum ṭheuh va. Ram ṭhenkhatah chuan, chu chu thil harsa a ni lo. Engvângin nge? Mi tam tak chuan Bible zirna neih an duh a, ṭhenkhat phei chuan zirna an neih theih hun tûr an nghah zâwkmah avângin! Mahse, hmun danga awm thuchhuahtute tân chuan thu hrilh rawngbâwlna chu a harsa lehzual  a ni, mite chu inah an awm khât hlein, ina awmte pawhin Bible an ngaihven mang meuh si lo va.

⁴ Thu hrilh rawngbâwl harsatna hmuna awm i nih chuan, he thuziaka rawtnate hi i hlâwkpui ngei a rinawm. Rawngbâwlnaa mi tam zâwk hmu thei tûra unau ṭhenkhatte tih dân kan sawiho vang a. Mite’n kan thuchah ken an chhâng lêt emaw, chhâng lêt lo emaw pawh ni se, rilru put hmang dik kan neih reng theih chhante kan bih chiang bawk ang.

5. Thuhretu tam takin eng harsatnate nge an hmachhawn?

⁵ Thuhretu tam tak chuan mite chu anmahni in ngeia hmuh a harsa telh telh tih an hria a. Thuchhuahtu ṭhenkhat chu vêngtu ṭha tak nei chhûngkaw tam tak chênna in lian tak tak awmna bialah emaw, mite tlawhpawh a harsatna hmunah emaw an awm a ni. Chûng hmuna gate vêngtu chuan inneitute’n an sâwm a nih loh chuan, mi dang tu mah luh an phal ṭhîn lo. Thuchhuahtu dangte chuan harsatna awm lovin in tin kal thei mah se, inah mi an hmu mang meuh lo va. Thuchhuahtu dang lehte chuan mi tlêm tê awmna thingtlâng khuaahte thu an hril ṭhîn a ni. Chûng unaute chuan in pakhat tlawh tûr pawhin hmun hla tak tak an kal a ngai ṭhîn a; mahse, an va thlen chuan in neitu a lo awm lo pawh a ni thei! Chutiang harsatnate kan hmachhawn a nih chuan, kan beidawng mai tûr a ni lo. Chûngte chu pal tlang tûr leh rawngbâwlnaa hlawhtlinna nei tûrin eng nge kan tih theih?

6. Engtin nge thuhriltute chu sangha mantute nêna an inan?

⁶ Isua chuan thu hrilh rawngbâwlna chu sangha man hna nên a khaikhin a. (Mk. 1:17) Sangha mantu ṭhenkhat chuan ni engemaw zât an beih hnuah pawh pakhat mah an man lo pawh a ni thei. Mahse, an beidawng lo va, an insiamrem zâwk a ni. An sangha man hun te, a hmun te, leh man dânte chu an thlâk danglam a. Keini pawh kan rawngbâwlnaah chutiang inthlâk danglamna chu kan siam thei a ni. Hêng rawtnate hi i lo ngaihtuahho vang u.

7. Hun hrang hranga thu kan hrilh hunah eng rah chhuah nge kan hmuh theih?

⁷ Mite chu hun hrang hrangah hmuh tum rawh. Mite ina an awm theih hun âwma thu kan hril a nih chuan, mi tam tak kan hmuh ngei a rinawm. Ni e, mi tin hian ina awm hun kan nei ṭheuh va! Unau tam tak chuan chawhnu lam, a nih loh leh tlai lama thu an hrilh hian mite an hmu tam zâwk tih an hria a. Chu bâkah, chûng hunahte chuan in neitute chu an hahdamin, titi an duh zâwk thei a ni. A nih loh leh, kohhran upa Unau David-a thurâwn hi ṭha i ti ngei ang. Ani chuan rawngbâwlna bial pakhata dârkâr hnih khat vêl thu an hrilh hnuah, a thawhpui nên a tîra mi an hmuh lohna inahte chuan an kal nawn leh ṭhin thu a sawi a. “Kan tlawhkîr leh chuan, in neitu tam tak kan hmu leh chu mak ka ti khawp mai,” tiin a sawi. *

8. Engtin nge Thuhriltu 11:6-na chu kan rawngbâwlnaa kan nunpui theih?

⁸ Kan beidawng tûr a ni lo. Kan thuziak ṭanchhan Bible chângin kan neih ngai rilru put hmang chu min hriatnawntîr a. (Thuhriltu 11:6 chhiar rawh.) Kan târ lan tâk Unau David-a chu a beidawng lo. In pakhat chu vawi tam tak a tlawh hnuah chauh in neitu a va hmu a. In neitu chuan Bible thute chu a lo ngaihven hle a, “Heta ka awmna hi kum riat vêl a ni tawh a; mahse, Jehova Thuhretute hi  ka inah vawi khat mah an lo la lêng ngai lo,” tiin a sawi. Unau David-a chuan, “Mite chu a tâwpa in lama kan va tawn fuh hian, kan thuchah kente chu an ngaithla duh fo ṭhîn tih ka hria,” tiin a sawi.

9. Engtin nge Thuhretu ṭhenkhat chuan ina hmuh awlsam lo mite chu an biak pawh theih?

⁹ Hmun dang dangah hrilh tum rawh. Thuchhuahtu ṭhenkhat chuan ina hmuh awlsam lo mite an biakpawh theih nân, an thu hrilhna hmunte chu an thlâk a. Entîr nân, kawtthlêra thu hrilhna leh nawrlirh hmanga thu leh hla pho chhuahna chu in tin kala thu hrilh phal lohna apartment-a awm mite hmuh theih nâna tih dân ṭha tak a ni. Chu chuan kawng danga hmuh theih loh tûr chûng mite chu min hmuhtîr thei a. Chu bâkah, thuchhuahtu tam tak chuan vântlâng lênvahna park-ah te, bazâr-ah te, leh sumdâwnna bialahte chuan mite’n inkawm emaw, thu leh hla chhuahte dawn emaw chu an duh zâwk tih an hria a ni. Bolivia rama bial kantu Unau Floiran-a chuan: “Bazâr-ah leh dâwrahte chuan thil zuartute buai lutuk loh hun tlâi lam dâr 1:00 aṭanga 3:00 inkâr vêlah rawng kan bâwl ṭhîn a. Chutiang hunah chuan, inkawmna ṭha tak kan nei theiin, Bible zirna kan ṭan hial thei a ni,” tiin a sawi.

10. Mite be pawh thei tûrin eng tih dânte nge i hman theih?

¹⁰ Tih dân hrang hrang hmanga thu hrilh tum rawh. Tuemaw chu vawi tam tak hmuh i tum angah han inchan teh. Hun hrang hrangah i va tlawh a; mahse, inah i la hmu thei chuang lo. Chutiang mi chu hmuh theih dân kawng dangte a awm ang em? Unaunu Katarína-i chuan, “Ina ka hmuh ngai lohte hnênah chuan anmahni ka hmuh huna ka sawi tûr thute chu  ziakin ka thawn a ni,” tiin a sawi. Kan zir tûr chu eng nge ni? Rawngbâwlnaa i tel hunah bial chhûnga mi zawng zawng hnêna thu i hrilh theih nân tih dân hrang hrang hmang ang che.

11. Engvângin nge mi ṭhenkhatin kan thuchah ken chu an ngaihven loh?

¹¹ Mi ṭhenkhat chuan kan thuchah ken chu an ngaihven lo va. Pathian emaw, Bible emaw chu mamawh niin an inhre lo a ni. Khawvêlah hrehawm tawrhna tam tak an hmuh avângin, Pathian an ring lo va. Bible mila nung nia inchhâl sakhaw hruaitute vêrvêkna an hmuh avângin Bible chu an hnâwl a ni. Mi dangte erawh chuan an hna te, chhûngkua te, leh mi mal buainate chauh an ngaihtuah avângin Bible-in anmahni a ṭanpui theih dân chu an hre lo a ni. A nih chuan, kan thuchah ken ngaihlu lotute hnêna thu kan hrilh hunah engtin nge hlimna kan neih reng theih?

12. Engtin nge Philippi 2:4-a thute chu rawngbâwlnaa kan nunpui theih?

¹² Mi mal ngaihsakna lantîr rawh. Chanchin ṭha chhâng lêt nghâl lo mi tam tak chuan thuchhuahtuin a ngaihsak tak zet tih an hriat hun chuan an chhâng lêt ṭhîn a. (Philippi 2:4 chhiar rawh.) Entîr nân, kan târ lan tâk Unau David-a chuan, “Tuemawin a ngaihven loh thu a sawi chuan, kan Bible leh thu leh hla chhuahte chu phawrh chhuak lovin: ‘Chutianga i ngaihven loh chhan chu hriat a châkawm hle mai,’ tiin ka sawi ṭhîn,” tiin a sawi. Mite chuan an chunga ngaihsakna kan lantîr chu an hre thei a. Kan thusawi chu an theihnghilh pawh a ni thei; mahse, an chunga mi mal ngaihsakna kan lantîr erawh an hriat reng a rinawm. In neitute chuan kan thusawi an ngaithla duh lo a nih pawhin, kan rilru put hmang leh kan hmêl lan dân aṭangin anni chu kan ngaihsak tak zet tih kan lantîr thei a ni.

13. Engtin nge kan thuchah ken chu in neitute mamawh nêna inmila kan siamrem theih?

¹³ In neitute mamawh leh ngaihven zâwng mila kan thuchah ken kan siamrem chuan an chungah mi mal ngaihsakna kan lantîr tihna a ni ang. Entîr nân, in neitute chuan naupang an nei tih hriat theihna a awm em? Nu leh pate chuan fate enkawl dân leh chhûngkaw nun hlim neih theih dân chungchânga Bible thurâwn ṭangkai tak takte chu an ngaihven ngei a rinawm. In engemaw zâtah mite chuan an kawngkâte an khâr tih kan hmu em? Khawvêla dân bawhchhiatna leh hlauhna a tam chhante kan sawi hnuah in neitute chuan chûng buainate chinfel theih dân chungchâng chu hriat belh an duh thei a ni. A enga pawh chu ni se, Bible thurâwnin min ṭanpui theih dân hre duhtute chu ṭanpui tum ang che. Kan sawi tâk  Unaunu Katarína-i chuan, “Thutakin nun ṭha zâwk min neihtîr dânte chu ka inhriatnawntîr ṭhîn,” tiin a sawi. Chutianga a tih avângin, Unaunu chuan rinnghehna neiin thu a hril a, a mi biakte pawhin chu chu an hre thei a ni.

14. Thufingte 27:17-a sawi angin, engtin nge thu hrilhnaa kan thawhpuite nêna kan inṭanpui tawn theih?

¹⁴ Mi dangte ṭanpuina chu hlâwkpui rawh. Kum zabi khatnaah, Paula chuan a thu hrilh dân leh zirtîr dânte chu Timothea a hrilh a, chûng tih dânte chu mi dangte a ṭanpui huna hmang tûrin a fuih a. (1 Kor. 4:17) Timothea ang bawkin, keini pawh kohhrana thiltawn ngah unaute hnên aṭangin kan inzir thei a ni. (Thufingte 27:17 chhiar rawh.) Unau Shawn-a thiltawn hi han ngaihtuah teh. Hun engemawti chhûng chu mahni sakhuaa lungawi tâwk mite awmna thingtlâng khuaah pioneer a thawk a. Engtin nge hlimna a neih reng theih? Ani chuan: “A theih hun apiangah, thawhpui ka nei ṭhîn a. In dang kan pan chhûng chu zirtîr thiam lehzual tûra inṭanpui tawn nân kan hmang ṭhîn a ni. Entîr nân, in neitu thusawite leh kan chhân lêt tâk dânte kha kan sawi leh a. Chumi hnuah, chutiang in neitu kan tawn leh huna kawng danga kan chhân theih dân tûrte chu kan sawi dûn ṭhîn,” tiin a sawi.

15. Engvângin nge ṭawngṭaina chu kan rawngbâwlna atâna thil pawimawh tak a nih?

¹⁵ Jehova hnênah ṭanpuina dîlin ṭawngṭai rawh. Rawngbâwlnaa i tel apiangin Jehova hnênah kaihhruaina dîl ṭhîn ang che. A thlarau thianghlim thiltithei tak ṭanpuina tel lo chuan eng mah kan hlen chhuak thei lo. (Sâm 127:1; Lk. 11:13) Pathian Jehova hnêna ṭawngṭaia ṭanpuina i dîl hunah, dîl bîk nei ang che. Entîr nân, i thusawi ngaithla duh, rilru put hmang dik tak nei tuemaw i hmuh theih nân dîl la. Tichuan, i ṭawngṭaina milin i mi tawh zawng zawngte hnênah thu hrilh ang che.

16. Engvângin nge mi mala inzirna chu kan rawngbâwlna atâna thil pawimawh tak a nih?

¹⁶ Mi mala inzir nân hun insiam rawh. Bible chuan: ‘Pathian duh zâwng, a ṭha leh lawm tlâk leh, ṭhat famkim chu hre fiah’ tûrin min fuih a. (Rom 12:2) Pathian chungchângah thu dik kan hria tih kan rin ngheh poh leh rawngbâwlnaa mite kan biak hunah inrin tâwkna kan nei lehzual ang. Kan sawi tâk Unaunu Katarína-i chuan: “Bible zirtîrna bulpui ṭhenkhat chunchângah ka rinna tihchak a ngai tih ka hriatna a la rei lo. Chuvângin, Siamtu a awm tih te, Bible hi Pathian Thu a ni tih te, leh Pathianin tûn laiah inawpna pâwl a nei tihte chu ngun takin ka zir a ni,” tiin a sawi. Unaunu chuan mi mala inzirnain a rinna a tinghetin, rawngbâwlnaah hlimna nei lehzual tûrin a ṭanpui tih a sawi bawk.

17. Engvângin nge Isua’n rawngbâwlnaah rilru put hmang dik tak a neih reng?

¹⁷ Isua chuan mi ṭhenkhatin a thuchah ken an ngaithla lo chung pawhin rilru put hmang dik tak neiin thu a hril zawm zêl a ni. Engvângin nge? Mite’n thutak an hriat a ngai tih a hriat avângin, a tam thei ang bera Lalram thuchah pawm theihna hun remchâng pêk chu a duh a. A tîra ngaithla duh lotute pawhin a hnuah an ngaithla leh duh thei tih pawh a hria a ni. Ama chhûngkua ngeia thilthleng hi han ngaihtuah teh. Kum thum leh a chanve rawng a bâwl chhûngin, a pianpui unaute zînga tu mah a zirtîr an ni lo. (Joh. 7:5) Mahse, a thawhleh hnuah, anni chu Kristian an rawn ni ta a ni.—Tirh. 1:14.

18. Engvângin nge thu kan hrilh zawm zêl ang?

¹⁸ Mite kan zirtîr Bible thutak chu tuin nge pawm dâwn tih kan hre lo va. Mi ṭhenkhat chuan mi dangte aiin kan thuchah ken chu an  chhâng lêt har deuh va. Min ngaithla duh lotute pawhin kan nunchang ṭha leh rilru put hmangte an hmuh hunah “Pathian an chawimawi” thei a ni.—1 Pet. 2:12.

19. Korinth thawn khat 3:6, 7-a sawi angin, eng nge kan hriat reng ang?

¹⁹ Chi kan tuh a, tui kan pêk rualin, a ṭhantîrtu chu Pathian a ni tih kan hre reng tûr a ni. (1 Korinth 3:6, 7 chhiar rawh.) Ethiopia rama rawngbâwl Unau Getahun-a chuan: “Ka awmna hmunah chuan kum 20 aia tam Thuhretu awm chhun ka ni a. Mahse, tûnah chuan thuchhuahtu 14 kan awm tawh a. Ka nupui leh kan fa pathumte pawh tiamin, mi sawm pathumin baptisma an chang tawh a. Chawhrualin inkhâwmah mi 32 kan tel ṭhîn,” tiin a sawi. Unau Getahun-a chu Pathian Jehova’n a inawpna pâwla thinlung ṭha pu mite a hruai luh lai dawhthei taka nghâka thu a hrilh zawm zêl avângin a lâwm hle!—Joh. 6:44.

20. Eng kawngin nge chhan chhuaktute ang kan nih?

²⁰ Pathian Jehova chuan mi tin nunna chu a ngaihlu hle a. Ani chuan he khawvêl tâwp hmaa hnam zawng zawnga mite a hruai khâwmnaah a Fapa nêna thawh dun theihna chanvo hlu min pe a ni. (Hag. 2:7) Kan thu hrilh rawngbâwlna hi mite chhanchhuahna hna nêna khaikhin theih a ni a. Keini chu lungalhthei khura tângte chhan chhuak tûra tirh chhuahte ang kan ni. Mi tlêm tê chauh chhan chhuah ni mah se, chhan chhuaktu zawng zawngte thawh rimna chu a ngaihhlutawm hle. Rawngbâwlnaa kan hnathawh pawh chutiang bawk chu a ni. Setana khawvêl aṭanga kan chhan chhuah theih zât tûr chu kan hre lo va. Mahse, Pathian Jehova chuan anmahni ṭanpui tûrin tu pawh a hmang thei a ni. Bolivia rama Unau Andreas-a chuan, “Miin Bible thutak a hriat a, baptisma a chan hian, hei hi kan zaa thawhhona rah chhuah a ni tih ka hria,” tiin a sawi. Kan rawngbâwlnaah chutiang rilru put hmang chu neih ṭheuh i tum ang u. Chutianga kan tih chuan, Pathian Jehova’n mal min sâwm ang a, kan rawngbâwlnaah hlimna nasa tak kan nei ang.