1. Jmé choa̱ xi tsakʼéjna je Jesús, kʼoa jókisʼin je chjotatjenngile (chótsenlai sén xi faʼaitʼa ya portada).

KʼIANGA tsakʼejna i̱ Sonʼnde je Jesús, kao kjoatsjoa kitsoyason kʼoa kui kuenta kisʼin ngantsjai nga tjín je chjota xi kjuinrʼoéle, kʼoa kui xi mele nga kʼoati sʼiaan tsanda ñá (Juan 4:35, 36). Kao kjoatsjoa kitsoyason chjotatjenngile kʼianga yasa tíjnakao je Jesús (Luc. 10:1, 5-11, 17). Tonga alikui titsjoa kisationi kon nga kindoa kʼoa kinikʼien je Jesús (Juan 16:32). Kʼianga jejaʼáyanile kʼoakitsole nga tosi tonda katatsoyason. Kʼoa kʼianga jekini ngʼajmi je Jesús, je chjotatjenngile tosi tonda kitsoyason, saʼnda je chjotakontrale i kitso: “Jo tichanison ngakijnda Jerusalén je én xi tibakoyao” (Hech. 5:28).

2. Jósʼin basenkaoná Jeobá nga ʼmiyasoán.

² Jé Jesús tsakándiaale josʼin tsakʼinyason kʼianga siglo 1, kʼoa jé Jeobá tsakasenkao nga̱ nʼio nkjín chjota koankjainle nga kitsoyason. Tobʼelañá, janla jmi koanni xi kisʼenngindá nga sʼuí Pentecostés nga nó 33 (Hech. 2:41). Sa nkjín sa nkjín koanni je chjotale Cristo (Hech. 6:7). Kʼoa je Jesús tongini kʼoakitso nga nʼio nkjín koa̱nni chjota xi koa̱nkjainle xi tʼatsʼe Niná kʼianga to jetífetʼa nichxin (Juan 14:12; Hech. 1:8).

3, 4. 1) Ánni ñʼai ma sakʼoaniná nga ʼmiyasoán. 2) Jmé xi chótʼayajiaan i̱ kjoaʼmiya jebi.

³ Ngatsʼiñá nga kao kjoatsjoa ʼmiyasoán je Énle Niná. Tjín ʼnde jñani nkjín mani chjota xi mele kotʼaya je Biblia, kʼoa je ndsʼee saʼnda tsín masonnile nichxin nga bakóyale ngatsʼi. Tonga kʼoati tjín ʼnde jñani tsín nanda tsaojin chjota je ndsʼee kʼianga tsoyason, kʼoa ninga tsaojinlani tsakui nichxin tsín mandosinle.

 ⁴ Tsa tsín nanda ʼya xi tsaojiaan nga ʼmiyasoán, koasenkaoná jmeni xi chótʼayajiaan i̱bi. Kʼoati jchaa jósʼín kʼa je ndsʼee nga básjaile nga ngisa nkjín chjota tsaojin, kʼoa jókoa̱n sʼiaan nga tsín si̱kʼajenlee tokoán ninga tsín kjuinrʼoéná je chjota.

5. Jmé xi ñʼai ma sakʼoale je ndsʼee nga tsoyason.

⁵ Tjínkʼa ndsʼee xi tsín satéjin chjota ya ndʼiale. Tjínkʼa chjota xi ya tjío ya ndʼia jñani tsín ma bitjasʼeen, kʼoa tjínkʼa ndʼia jñani policía binyajchxo kʼoa tsín tsjoáʼndele xi ya bichó kʼiatsa tsín toxá kanokjoanile. Tonga kʼoati tjín ʼnde jñani ma tsoyason je ndsʼee nga xki̱ ndʼia xki̱ ndʼia, tonga likui ʼya xi nanda satéjin. Kʼoati tjín xi ya tsoyason jñani kjintʼa jñani tochoa chjota tjín, kʼoa tjínkʼa xi kjin fitsoyason tonga tokjitiaa ndʼiale chjota nga bichó. Jméni xi sʼiaan nga tsín si̱kʼajenlee tokoán tsa kʼoama jñani ʼmiyasoán, kʼoa jósʼiaan nga ngisasa nkjín chjota kʼuínyalee je Énle Niná.

6. Jósʼin mangóson nga ʼmiyasoán kao josʼín je chjota xi jti̱ bʼasjengindá.

⁶ Je Jesús kui kisingósonkao nga ʼmiyasoán kao josʼín je chjota xi jti̱ bʼasjengindá (Mar. 1:17). Je chjota xi jti̱ bʼasjengindá sakʼoaa nkjín nichxin nga tsín jme jti̱ sokóle, tonga likui síkinroajen kon. Básjaile jochon fikʼasjengindá je jti̱ kʼoa yaa fi jñani bele kon nga so̱kole. Kataʼyala jmeni xi koasenkaoná nga kʼoati sʼiaan tsanda ñá kʼianga ʼmiyasoán.

7. Jósʼin kuichomani tsa kjaʼaí kjaʼaí hora kʼuínyasoán.

⁷ Chósonnilee jochon kʼuínyasoán. Sa̱téjinjián je chjota tsa kʼoachon kuitjokʼinyasoán jochon bele tokoán nga batio ya ndʼiale, nga̱ kjoanʼio bichóni niʼyale chjota ningalani bitjo. Kuinga nkjín ndsʼee xi kʼia tsoyasonni nga jemaxon kʼoa tsa kʼianga jekjimaʼña̱, nga̱ ngisaa nkjín chjota tsaojin. Kʼoa tsakui nichxin ngisa nda kjuinrʼoéná je chjota nga kʼoachon kʼuínyasoán. Kʼoati koa̱n chjénngiaa josʼín jngo ndsʼee xi chjotajchínga sʼin tíjna, xi David ʼmi. Kʼianga jejngo jao hora tjíotsoyason, faʼato ngindia ya ndʼia jñani tsín ʼya xi kasatéjin. Itso: “Tokʼoamanajin nga nkjínni chjota tsaojinjin nga bitjato ngindialaijin”. *

8. Jósʼin kjuintjenngiaa jmeni xi tso Eclesiastés 11:6 nga ʼmiyasoán.

⁸ Je texto xi yʼangini kjoaʼmiya jebi kui síkjaʼaitsjenjinná nga tsín koa̱n si̱kʼajenlee tokoán (tʼexkiai Eclesiastés 11:6). * Alikui kisikʼajenle kon je David, xi jenása kanikʼaxkiaa. Nkjín kʼa kikásjai je chjota kʼoa chaan kisatejin. Je chjota xi kisatejin koanndosinle xi tʼatsʼe Biblia, kʼoa i kitso: “Jekjoan jin nó nga i̱ tisijchá yaona kʼoa tosʼaa tísatéjian je testigole Jeobá”. Je David itso: “Kʼianga satéjiaan je chjota ya ndʼiale, nʼio nkjín xi nrʼoé je Énle Niná”.

9. Jósʼín kʼa je ndsʼee nga fákaonajmíni Énle Niná je chjota xi tsín satéjin ya ndʼiale.

⁹ Alikui tojngo ʼnde kʼuínyasoán. Tjínkʼa je ndsʼee xi xinxin ʼnde tsoyason kʼianga tsín satéjin chjota ya ndʼiale. Tobʼelañá, ya ʼnde jñani nʼio yʼai kjoan ndʼia xi tjín, jñani tsín ma nga xki̱ ndʼia xki̱ ndʼia tsoyason, je ndsʼee yaa tsoyason yandiaa,  kʼoa kʼoati síchjén je carrito nga tsoyason. Nga kʼoasʼin tsoyason je ndsʼee ma fákaonajmí je chjota xi tsín tsaojin ya ndʼiale. Ngisaa nrʼoé Énle Niná je chjota nga ya fákaonajmí ya parque, ya jinndi̱tsi̱n kʼoa jñani tsojmi saténa. Jngo ndsʼee xi Floiran ʼmi, xi superintendente xi tsʼe circuito sʼin tíjna ya Bolivia, itso: “Kʼiaa mangínjin ya tienda kʼoa ya jinndi̱tsi̱n nga jemaxon, nga la una saʼnda tjen las tres, nga̱ ngisaa maʼale chjota xi tsojmi baténa. Nga kʼoanʼiaijin ngisaa nda nrʼoé je Énle Niná kʼoa tjínkʼa xi ngisa mandosinle nga kotʼaya je Biblia”.

10. Jméni xi koa̱n sʼiaan nga ngisa nkjín chjota kʼuínyasonlee.

¹⁰ Si̱kʼantjaiyaa josʼin kʼuínyasoán. Jméni xi koa̱n sʼiaan tsa jenkjín kʼa tsangínchonlee chjota ya ndʼiale tonga tsa tsín kisatejiaan ninga kjaʼaí kjaʼaí hora tsangián. Jngo tichjaa xi Katarína ʼmi, itso: “Carta kjile je chjota xi tsín satéjian ya ndʼiale, kʼoa kui kʼoaxinle jmeni xi xínle tsakai kʼianga bichoa ya ndʼiale”. Jebi kui bakóyaná nga koa̱n kjoásjailee josʼin chja̱kaonajmíñá Énle Niná je chjota xi tsín tsaojiaan ya ndʼiale.

11. Ánni nga tsín mandosin kʼanile chjota je Énle Niná.

¹¹ Tjínkʼa chjota xi tsín mandosinle je Énle Niná. Kʼoasʼin síkjaʼaitsjen nga tsín machjénle xi tʼatsʼe Niná kʼoa nga tsín machjén nga skótʼaya je Biblia. Tsakui nichxin kuinga tsín makjainnile xi tʼatsʼe Niná nga tse kjoañʼai tjín i̱ Sonʼnde, kʼoa  nga tsínni kʼoasʼin sítjoson je xi nyatítjonle religión jmeni xi tso je Biblia. Tjínkʼa xi tokui kuenta sʼín je xále, familiale kʼoa kao je kjoa xi tjínle, kʼoa tsín be tsakuini Biblia xi koa̱n kuinyakao. Jósʼiaan nga tsín si̱kinroajeen tokoán nga tsín mandosinle chjota je Énle Niná.

12. Jósʼin kjuintjenngiaa jmeni xi tso Filipenses 2:4 nga ʼmiyasoán.

¹² Koakoá nga mandosinná je chjota. Je chjota xi tsín kinrʼoé nga títjon je Énle Niná, nʼio nkjín xi skanni koankjainle kʼianga tsabe nga koanndosin kjoaixile xi tʼatsʼe je ndsʼee xi kitsoyale (tʼexkiai Filipenses 2:4). * Tobʼelañá, je David, xi jenása kanikʼaxkiaa, itso: “Kʼiatsa jngo chjota kajinjin xi tsín mandosinle je Énle Niná, bajnatjaoníjin je Biblia kao xo̱n xi kichʼaijin, kʼoa chjonangilaijin ánni nga kʼoasʼin síkjaʼaitsjenni”. Je chjota bele kon kʼianga mandosin kjoaixiná. Tsakui nichxin cha̱jinle jmeni xi tsakʼinlee, tonga kjoaʼaítsjenjinle jokisʼe kon kʼianga kichjakaonajmiá. Ningalani tsín tsjoáʼndená je chjota nga kuinókjoaa, tonga yaa koakonilee josʼiaan nga mandosin kjoaixiná.

13. Jókoa̱n sʼiaan nga ngisa sa̱sénle chjota je Énle Niná.

¹³ Jngo koya josʼin koakoá nga mandosinná je chjota kʼiaa nga kui chja̱kaonajmíñá jmeni xi mandosinle. Tobʼelañá, tsa xti tjínle, tsakui nichxin ngisa koa̱nndosinle nga kui chja̱kaonajmíñá jósʼin tjínnele sijchínga je ʼndíxtile, kʼoa tsakuije̱ josʼin nga ngisa nda koatio ya yaniʼyale. Kʼoa tsa ya kuichoaaje̱ jñani nkjín candado tjíotʼa ndʼiale chjota, koaan kui chja̱kaonajmíñá nga xkón tiyoaa ndʼaibi kʼoa nga kuicho nichxin nga tjóxin kjoa jebi. Kʼiatsa kjuinrʼoéná je chjota, kʼuínyalee nga katamajinle nga nʼio basenkaoná jmeni xi tso je Biblia. Je Katarína, xi saje kabʼaxki̱ ya párrafo 10, itso: “Kui sikjaʼaitsjenjian jósʼin tíbasenkaona an je Énle Niná”. Nga kʼoasʼín tichjaa jebi, ñaki tjínjngo kon jmeni xi tsole je chjota, kʼoa je chjota kʼoati majinle nga ñaki kʼoatjín jmeni xi tso je tichjaa.

14. Tojo tso Proverbios 27:17, jósʼin basenkaoná nga tsín tojngo mañá nga ʼmiyasoán.

¹⁴ Koaan kuinyakaoná je ndsʼee. Kʼianga siglo 1, je Pablo kitsoyale je Timoteo josʼin tjínnele kuitsoyason, kʼoa kʼoakitsole nga kʼoatisʼin katatsoyale je chjotale Cristo xi ngikʼa (1 Cor. 4:17). Joni je Timoteo, kʼoati tse jmeni xi kuitsoyaná je ndsʼee xi tjío ya jinjtín (tʼexkiai  Proverbios 27:17). * Kataʼyala je choa̱le ndsʼee Shawn, xi precursor sʼin tísíxá, xi ya kikakóyason choatse ya ʼnde jñani jetjínle religiónle chjota. Jméni xi tsakasenkao nga tsín kisikinroajenni kon. Itso: “Kʼianga fikaona je ndsʼee nga fikakoyasoan, kui chobayanijin jósʼiainjin nga ngisa ndasʼin kʼuínyalaijin je chjota. Tobʼelañá, kui chobayanijin josʼin kachjakaonajmíjin je chjota xi kasatéjinjin. Kʼoa xijema, kui chobayanijin jókʼuínlaijin chjota kʼiatsa tojo kui kʼoakuitsonajin”.

15. Ánni nga nʼio tjínnile kjoandosin nga kʼoétsʼoaa kʼianga kuitjokʼinyasoán.

¹⁵ Si̱jélee nganʼio je Jeobá. Kʼianga ñandia ñandia kuitjokʼinyasoán, kʼoakʼuínlee Jeobá nga je katabándiaaná. Alikuijin jme xi koa̱n sʼiaan tsa tsín koasenkaoná je nganʼiotsjele (Sal. 127:1; Luc. 11:13). Kʼoakʼuínkixilee Jeobá jósʼin mená nga koasenkaoná. Koaan kui si̱jélee nga katasatéjiaan chjota xi mele kjuinrʼoé Énle. Xijekoa̱n, kʼuínyalee je chjota xi sa̱téjiaan.

16. Jósʼin koasenkaoná nga nda kʼuínyasoán tsa chótʼayá nga toñá.

¹⁶ Si̱kʼayaa nichxin nga chótʼayá nga toñá. Je Énle Niná, itso: “Jméni nga jchasínio jmeni xi Niná mele, jñale xi nda, xi sasénle, xi ñaki tjíjngo” (Rom. 12:2). Kʼianga ngisasa nda ʼyaa xi tʼatsʼe Niná, ñaki sʼejngo tokoán nga chjakaonajmíñá Énle Niná je chjota. Je Katarína itso: “Koanjinna nga ngisasa machjén nga skotʼaya jmeni xi bakóya je Biblia, ánni nga nʼio sʼe̱jnasíni je kjoamakjainna. Kuinga kiskotʼayaña je choa̱ xi tjín nga ñaki tíjna je Niná xi kisindaná, nga ñaki Énle Niná je Biblia, kʼoa nga jngo naxinandá tíjnale Niná i̱ Sonʼnde”. Je Katarína kʼoatso nga ngisa nʼio kisʼejna kjoamakjainle nga kiskotʼaya nga toje, kʼoa ngisaa tsjoa kisʼe kon nga kitsoyason.

17. Ánni nga tsín kisikʼajennile kon je Jesús nga kitsoyason.

¹⁷ Je Jesús alikui kisikʼajenle kon ninga tsín kinrʼoé kʼale je chjota, tosi tonda kitsoyason. Kui kʼoakisʼinni nga̱ be nga nʼio machjénle chjota nga kjuinrʼoé je Énle Niná kʼoa koanmele tsakasenkao. Kʼoati koanjinle nga tjínkʼa chjota xi tsín kjuinrʼoé nga títjon, kʼoa nga skanni koa̱nndosinle je Énle Niná. Kʼoakisʼin je xínkjín. Je xi jan nó basen kitsoyason Jesús, nijngojin ndsʼe̱ xi chjotatjenngile koan (Juan 7:5). Tonga kʼianga jejaʼáyanile Jesús chjotatjenngile koanni je ndsʼe̱ (Hech. 1:14).

18. Ánni nga tosi tonda ʼmiyasonñá.

¹⁸ Alikui ʼyaa jotjín chjota xi koa̱nkjainle je Énle Niná kʼianga ʼmiyasoán. Tjínkʼa chjota xi tsín ndi̱to̱n makjainle. Ningalani tsín nrʼoéná je chjota, tonga kuenta sʼín josʼin mangínkoaa yaoná kʼoa jonʼia, kʼoa tsakui nichxin skanni koa̱nndosinle je Énle Niná (1 Ped. 2:12).

19. Tojo tso 1 Corintios 3:6, 7, jméni xi kuenta sʼiaan.

¹⁹ Ningalani ñá binyakoaa chjota nga be xi tʼatsʼe Niná, xi kuenta sʼiaan kuinga je Niná basenkao nga makjainle (tʼexkiai 1 Corintios 3:6, 7). * Jngo ndsʼee xi Etiopía tsʼe, xi Getahun ʼmi, itso: “Tsʼato  20 nó nga toʼan xi testigole Jeobá koan ya jñani tsʼan, jngo ʼnde jñani tosakʼoa sakóyason. Tonga ndʼaibi, 14 mani xi tsoyason, kʼoa 13 mani xi jekisʼenngindá. Jekisʼenngindá je chjoónna kʼoa kao nga jan ʼndíxtina. Kʼoa kantejaola mani chjota xi bichó nga satío kjoajtín”. Je ndsʼee jebi tsjoa kisʼe kon nga kitsoyason kʼoa tsejta koan nga tsakasenkao je chjota nga naxinandále Jeobá tsakatiojin (Juan 6:44).

20. Jósʼin mangósoán je xi chjota fikásjai.

²⁰ Je Jeobá nʼio chjí bekon ngatsʼi chjota. Kui kjoanda títsjoáná nga tibisenkoaa je ʼNdíle nga naxinandále Niná katabatiojin chjota xi xinxin naxinandále nga kjesa faʼaijin kjoafetʼa (Ageo 2:7). Kʼianga ʼmiyasoán yaa mangósoán josʼín je xi chjota fikásjai kʼianga kixó fine, ninga tsín tongatsʼi nga koa̱nsjaile chjota, nʼio chjíle je xá xi sʼín ngatsʼi. Kʼoatisʼinni nga ʼmiyasoán, alikui ʼyaa jotjínsa chjota koa̱nkjainle je Énle Niná kʼoa koa̱n kuitjontjai. Tsakui nichxin ñá sichjénná je Jeobá nga kuisenkoaa chjota jebi. Je Andreas, xi ya Bolivia tíjna, itso: “Kʼianga jngo chjota makjainle Énle Niná kʼoa fisʼenngindá, ali tojngojin mani xi basenkao, binyakaoñá ngatsʼiaa”. Kuinga tosi tonda kʼuínyasonñá. Tsa tsín si̱kʼajenlee tokoán, jé Jeobá koasenkaoná kʼoa nʼio tsjoa sa̱tío tokoán nga kʼuínyasoán.