1. Iesu be ena hahediba taudia ediai dahaka haheitalai namona e hahedinaraia bona idia be dahaka e kara? (Rau 1 laulauna ba itaia.)

IESU do tanobada ai e nohova neganai, ia na e haroro goadagoadava bona e urava taunimanima na bae kamonai. Danu e ura ena hahediba taudia na unu bae kara toma. (Ioa. 4:35, 36) Iesu na ena hahediba taudia ida neganai, idia na e haroro goadagoadava. (Luka 10:1, 5-11, 17) To Iesu na inaina ese e ḡuia bona e mase murinai, ena hahediba taudia ese edia haroro urana e haboioa. (Ioa. 16:32) Iesu e toreisi lou murinai ia ese e hagoadadia haroro ḡaukara bae laloa bada. Bona ia e dae guba murinai edia haroro goadagoada dainai idia inaidia na e maumau eto: “Harihari emui hahediba herevadia ese Ierusalem vada eme hahonua.”​—Apos. 5:28.

2. Iehova ese haroro ḡaukara be edena dalai e hanamoa?

² Iesu ese Kristen ginigunadia edia haroro ḡaukara e gunalaia bona Iehova ese edia ḡaukara na e hanamoa. Una dainai momo ese edia haroro herevana e abia dae. Heḡereḡere, Pentekoste 33 C.E. ai taunimanima 3,000 mai kahana e bapatiso. (Apos. 2:41) Bona hahediba taudia edia namba na e bada e laova. (Apos. 6:7) To Iesu na e peroveta dina gabediai taunimanima momo herea na sivarai namona bae abia dae.​—Ioa. 14:12; Apos. 1:8.

3-4. Dahaka dainai gabu haida ai haroro ḡaukara ikarana na auka, bona ina atikol ai dahaka baita herevalaimu?

³ Ita iboudai na ta uramu haroro ḡaukara baita moalelaia. Bona tano haida ai una na dia auka. Dahaka dainai? Badina momo na e uramu Baibul bae stadilaia bona idia haida na e narimu ela bona Witnes ta ese e vadivadi henidiamu! To tano haida ai pablisa edia haroro ḡaukara na auka, badina nega momo ruma na asi taudia eiava e davaridiamu taudia na asie uramu bae kamonai.

 ⁴ Bema oi o nohomu gabunai haroro ḡaukara na auka, ina atikol ese be herevalaimu daladia ese oi na be durumumu. Baita itaiamu haida be dahaka e kara unu amo haroro ḡaukara ai momo e davaridia. Bona dahaka dainai dounu baita moale herevana taunimanima ese eda hereva bae kamonai eiava lasi.

5. Witnes taudia momo be dahaka hekwakwanai e davarimu?

⁵ Witnes momo na e davariamu taunimanima na edia ruma ai bae hereva henidia na auka. Pablisa haida e nohomu gabudiai taunimanima momo na bisnes rumadia ai e nohomu eiava edia gabu na fensi amo e koua heḡeḡe. Unu ruma momo na mai edia security dainai, taunimanima na asie vareai kavamu bema una gabu ai e nohomu tauna ese gwaumaoro na se henidia. Pablisa haida be ruma ta ruma ta ai e haroromu to taunimanima haida mo e davaridiamu. To pablisa haida be gunika hanuadiai e haroromu bona unuseniai taunimanima na dia momo. Reana gabu daudau e laomu, ruma tauna ta bae davaria totona to idia e kaumu neganai, ruma tauna na lasi! Bema ita na teritori unu bamodia ai ta haroromu namona na basita hesiku, to dounu baita haroro. Dahaka baita kara hekwakwanai unu bamodia baita hanaidia bona taunimanima momo baita haroro henidia?

6. Edena dalai haroro ḡaukara e karaia taudia na haoda taudia heḡereḡeredia?

⁶ Iesu ese haroro ḡaukara na haoda ḡaukarana ida e haheḡereḡerea. (Mar. 1:17) Haoda taudia na dina momo e haodamu. Herevana gwarume se davarimu to se hesikumu. Idia ese haoda negana, gabuna, bona haoda dalana e haidauamu. Ita danu eda haroro ḡaukara ai unu baita kara toma. Mani ini dala haida aita herevalai.

7. Bema nega idauidau ai baita haroromu dahaka be varamu?

⁷ Nega idauidau ai taunimanima baita haroro henidia. Bema taunimanima na ruma ai e nohomu negadiai baita vadivadidiamu, momo baita hereva henidiamu. Ena be taunimanima na gabu haida be laomu, to idia na dounu edia ruma be lou heniamu! Tadikaka taihu momo na adorahi ai e haroromu badina momo e davaridiamu. Bona nega unu bamodiai taunimanima na edia ruma ai e laḡa-animu bona e uramu bae kamonai. Eiava elda ta ladana David ese e badinaia dalana ta ese oi be durumumu. Ia na e gwa, teritori ai e haroromu murinai ia bona ia e bamoa tadikakana na ruma ai asie davaridia taudia ma e lou henidiamu. Ia na e gwa: “Na moale badina a lou lao neganai, ruma taudia momo a davaridia.” *

8. Kohelete 11:6 be edena dalai eda haroro ḡaukara ai baita badinaia diba?

⁸ Basita hesiku na namo. Ina stadi ena siri badana ese na e hagoadadamu unu baita kara toma. (Kohelete 11:6 ba duahia.) David, matamanai tame herevalaia tadikakana na se hesiku. Taunimanima ta se davariava rumana e lao loulouva ela bona ruma tauna e davaria. Una ruma tauna na e ura Baibul bae herevalaia, bona e gwa: “Lau na iniseniai laḡani 8 vada na noho, to nega ta Iehova ena Witnes tauna ta asi na hedavari henia.” David na e gwa: “Taunimanima na edia ruma ai bo davaridiamu neganai, idia na be uramu ta harorolaiamu herevana bae kamonai.”

9. Witnes haida be dahaka e kara taunimanima na ruma ai bae davaridia totona?

⁹ Gabu idauidau ai baita haroro. Pablisa  haida na ruma ai asie davaridiamu taudia bae davaridia totona, edia haroro gabuna e haidauamu. Heḡereḡere, apartment badadiai haroro na taravatu, una dainai pablisa na pablik harorona e karaiamu neganai, unu apartment ai e nohomu taudia e davaridiamu bona e hereva henidiamu. Danu pablisa momo na e itaiamu pablik, makedi, bona bisnes gabudiai taunimanima na be uramu oi ida bae herevahereva bona pablikeisin bae abi dae. Bolivia ai seket tauna ta ladana Floiran na e gwa: “Ai na adorahi 1 oklok ela 3 oklok padadiai makedi bona bisnes gabudiai, hoihoi taudia asie bisimu negadiai a haroro henidiamu. Una na vaevae nega namona taunimanima ida a herevaherevamu bona Baibul stadi a hamatamamu.”

10. Ededia dala ma haida ai taunimanima ba haroro henidia diba?

¹⁰ Eda haroro daladia baita haidau. Reana nega idauidau ai ta o vadivadia loulou to ruma ai na so davaria. Dala ma haida ba badina diba ruma tauna ba davaria totona, a? Katarína na e gwa: “Ruma ai asina davaridiamu taudia totodia revareva na toremu bona idia ediai nama gwauraia herevadia na unu revareva ai na toremu.” Taihu ena ekspiriens amo dahaka ta dibamu? Namona na ba hekwarahi emu teritori ai e nohomu taudia na dala idauidau ai ba haroro henidia.

11. Dahaka dainai taunimanima haida na asie uramu bae kamonai?

¹¹ Taunimanima haida na asie uramu eda hereva bae kamonai, idia na e laloamu Dirava eiava Baibul bae dibaia na asi anina. Idia na Dirava asi abia daemu badina e itaiamu tanobada  ai na hisihisi bada herea e varamu. Idia ese Baibul ena hereva na asie abia daemu, badina e itaiamu dubu igunalaidia taudia na e tomamu Baibul ena hereva e badinaiamu, a edia kara be didika. Haida na edia moni ḡaukara, ruma bese, eiava edia hekwakwanai e lalohekwarahilaimu, bona se laloamu Baibul ese idia na be durudiamu. Ta haroro henidiamu taudia ese eda haroro herevana asie laloa badamu neganai, edena dala ai dounu baita moale?

12. Haroro ḡaukara ai Filipi 2:4 ese ita be ede baine duruda toma?

¹² Taunimanima edia namo baita lalo. Guna asie ura bae kamonai taudia momo na gabeai sivarai namona e abia dae badina e mamia ita ese idia na ta lalodia badamu. (Filipi 2:4 ba duahia.) Heḡereḡere, David, matamanai tame herevalaia tadikakana na e gwa: “Bema ta na e gwaumu, ‘Asina uramu!’ Ai ese emai Baibul bona pablikeisin na emai baege ai a uda loumu bona a gwaumu: ‘Bema namo baina henanadai, dahaka dainai unu o hemami tomamu?’” Taunimanima na mai dibadia daidia be idia e lalodia badamu. Reana ta gwaurai herevadia na basie lalotaomu, to idia ta lalodia badamu karana hari be laloataomu. Ena be ruma tauna na basine uramu sivarai namona baita herevalaia, to namona na eda kara bona vairada toana amo baita hahedinaraia idia na ta lalodia badamu.

13. Dahaka baita kara unu amo ruma taudia ese eda haroro herevana bae abia dae?

¹³ Bema ruma taudia ese e lalo badamu ḡaudia heḡereḡerena eda haroro herevana baita haidauamu, ta hahedinariamu idia na ta lalodia badamu. Heḡereḡere, ruma badinai mimia ḡaudia ese e hahedinaraiamu ruma ai maraḡidia nonoho, eiava? Tama sina na reana be uramu natu inarina karana ai bona ruma bese baine moale dalana ai Baibul ena sisiba bae diba. Edia ruma iduarana ai loka haida o itamu, a? Reana tanobada ai raskol karadia dainai momo e garimu badina baita herevalaia. Una murinai ruma tauna na be moalemu bema baita hahedinaraiamu nega ta ini raskol karadia na be ore vaitanimu. Herevana dahaka, to kamonai taudia ta davaridiamu neganai, namona na baita durudia bae laloparara Baibul ena sisiba ese idia na bae durudia diba. Matamanai tame herevalaia taihuna Katarína na e gwa: “Baibul ese e durugu dalana na nega iboudiai na laloamu.” Katarína ese e harorolaimu herevadia na e abi daemu dainai, e hereva henidiamu taudia ese una danu e itaiamu.

14. Hereva Lada-isidia 27:17 ena hereva heḡereḡerena, edena dalai haroro ḡaukara ai e bamodamu taudia ese bae duruda diba?

¹⁴ Ma haida amo heduru baita abi. Aposetolo edia negai, Paulo ese haroro bona hahediba  daladia na Timoteo e hadibaia, bona Timoteo e hagoadaia unu dala baine ḡaukaralai ma haida baine durudia. (1 Kor. 4:17) Timoteo heḡereḡerena, kongrigeisin ai haroro ḡaukara e manadalaia taudia amo diba baita abi. (Hereva Lada-isidia 27:17 ba duahia.) Mani tadikaka Shawn ena haheitalai aita laloa. Ia na gunika hanuana ta ai e painiava, bona unuseniai e nohova taudia na tomadiho e laloa badava. Edena dalai dounu e moaleva? Ia na e gwa: “Haroro ai lau e bamoguva tadikakana ida ruma ta ta a karadiava muridiai emai hahediba dalana baia hanamoa daladia a herevalai hebouva. Heḡereḡere, ruma tauna ena henanadai bona ia a haere henia dalana a herevalaiava. Bena ruma tauna ma ta ese henanadai unu bamona baine heni neganai, ai ese ia ede baia haere henia toma dalana danu a herevalaiava.”

15. Dahaka dainai eda haroro ḡaukara ai ḡuriḡuri na mai anina bada?

¹⁵ Ḡuriḡuri amo Iehova ena heduru baita noia. Haroro ḡaukara o karaiamu negadiai Iehova ena heduru ba noia. Momokani, Iehova ena lauma helaḡa ena heduru amo ḡau iboudiai baita kara dibamu. (Sal. 127:1; Luka 11:13) Ḡuriḡuri amo Iehova ena heduru o noiamu neganai, o uramu ḡauna na ba gwauraia hedinarai. Heḡereḡere, ba noia baine durumu kudou-maoro taudia ba davaridia totona. Bena emu ḡuriḡuri heḡereḡerena ba ḡaukara goada o davaridiamu taudia ba haroro henidia.

16. Haroro ḡaukara baita karaia namonamo totona, dahaka dainai siboda eda stadi baita karaia na mai anina bada?

¹⁶ Nega baita ato siboda eda stadi baita kara. Baibul na eto: “Dirava ena ura, mai namona bona mai hairaina bona mai hereadaena ida, vada ba diba.” (Roma 12:2) Baita stadimu neganai Dirava baita dibaia namonamomu, bena taunimanima baita hereva henidiamu neganai, idia na be dibamu ita ta gwauraimu herevadia na ta abi daemu. Katarína, matamanai tame herevalaia taihuna na e gwa: “Na laloparara Baibul ena hahediba hereva badadia haida ai, egu abidadama baina hagoadaia na namo. Una dainai hahemomokani ḡaudia haida na stadilai namonamo, unu amo na diba ita na mai Ihavarada Tauna, Baibul na Dirava ena Hereva, bona hari ina negai Dirava na mai ena orea.” Katarína na e gwa, sibona ena stadi karana ese ena abidadama na e hagoadaia bona ena haroro ḡaukara na e moalelaia badamu.

17. Dahaka dainai Iesu na ena haroro ḡaukara e goadalaia?

¹⁷ Iesu na ena haroro ḡaukara e goadalaiava ena be haida na asie urava bae kamonai. Dahaka dainai? Ia na dibana taunimanima ese hereva momokani bae dibaia na namo, bona ia na e ura momo baine durudia Basileia sivarai namona bae abia dae. Bona mai dibana matamanai haida na basie kamonaimu, to gabeai be uramu bae kamonai. Mani ena ruma bese ai e vara ḡauna aita laloa. Iesu na laḡani to mai kahana e haroro neganai, ia tadikakana ta na hahediba tauna ta ai sela. (Ioa. 7:5) To ia e toreisi lou murinai, idia na Kristen taudia ai ela.​—Apos. 1:14.

18. Dahaka dainai dounu baita haroro na namo?

¹⁸ Ita na asi dibada daika be Baibul ena hereva momokani be abia daemu. Haida be hereva momokani e abia dae haraḡamu bona ma haida be nega daudau murinai hereva momokani e abia daemu. Bona asie uramu bae kamonai taudia ese eda kara namodia bona eda haroro goadagoada karana be itaiamu neganai,  gabeai idia ese ‘Dirava be imodaiamu.’​—1 Pet. 2:12.

19. Korinto Ginigunana 3:6, 7 ese eda haroro ḡaukara be ede e herevalaia toma?

¹⁹ Vaia ita ese taunimanima ta haroro henidiamu bona ta hadibadiamu, to namona na baita helalotao Dirava ese eda ḡaukara anina e havaraiamu. (1 Korinto 3:6, 7 ba duahi.) Ethiopia ai hesiai ḡaukara e karamu tadikaka ta ladana Getahun na ini e gwau toma: “Laḡani 20 mai kahana lalodiai, lau na nohomu gabunai, lau sibogu na Witnes. To hari inai gabu ai pablisa na 14. Idia amo 13 vada e bapatiso, lau adavagu bona natugu tatoiosi danu. Bona hebou e laomu taudia iboudiai na 32.” Getahun na e moale badina e haroro goadagoadava bona mai haheaukana ida e nari Iehova ese kudou-maoro taudia na ena orea lalonai e hakaudia vareai!​—Ioa. 6:44.

20. Edena dalai ita na rescue taudia heḡereḡeredia?

²⁰ Iehova ese taunimanima iboudiai edia mauri na e laloa badamu. Ia ese e henida hahenamo ta na ia natuna ida ta ḡaukara heboumu ina nega oromana dokona do se kau neganai, bese iboudiai amo taunimanima baita haboudia totona. (Hag. 2:7) Eda haroro ḡaukara na rescue ḡaukarana ida baita haheḡereḡerea dibamu. Bona ita na rescue team ta heḡereḡerena; idia na mine ai dika e davari taudia idurudia totona e siaidiamu. Ena be una rescue team ese tamona mo be davariamu, to una rescue team taudia iboudiai edia ḡaukara na mai anina bada. Eda haroro ḡaukara danu unu bamona. Ita na do asi dibada taunimanima hida be Satana ena nega oromana amo baita durudiamu. To Iehova ese ita ta ta na baine ḡaukaralaida diba idia baita durudia totona. Bolivia ai e nohomu tadikakana ta ladana Andreas na e gwa: “Na dibamu ta hereva momokani e dibaia bona e bapatiso badina momo e ḡaukara hebou ia e durua.” Una heḡereḡerena, namona na ita danu eda haroro ḡaukara ai lalohadai maorona baita abia. Bema unu baita kara tomamu, Iehova ese ita na be hanamodamu bona eda haroro ḡaukara na baita moalelaia badamu.