1. Yotajhiha baani Yesu aahiyedhiye anamaharaye, ki aliwa yonenlemo avi? (Osugwe fotu yavakapani)

MUDHIDHI Yesu alaleyaga elabo ela yavati, ahikanna moonelo wapama ni mabasaye oolaleya ni afuna anamaharaye ekanne moonelo mmodhave. (João 4:35, 36) Yesu agaali elabo ela yavati, anamaharaye yolaleya nuuviheya. (Luc. 10:1, 5-11, 17) Mbwenye Yesu nuumagiwa ni nuupiwa, anamaharaye omala mudhidhi wowinjhivene ehilaleyaga. (João 16:32) Yesu nuvenyihiwa muukwani, oliye wakongomedha wihina yahogolowele mabasa oolaleya. Siyeyo yavahile kopolo anamahara a Yesu wahogolowela mabasiwa oolaleya nuuviheya, oliye nudhowa odhulu, ofiyedha amwiddaniwa wasumulula yegi: ‘Kasugwani! Nyu muhudhaliha luwani yo Jeruzale ni dhohudhiha dhenyu.’ — Atos 5:28.

2. Yehova areelihe addi mabasa oolaleya?

² Yesu ahaaholela mabasa oolaleya yapariwesa ni makiristawu oobajha, teto vadhuluva Yehova wareliha. Mwaha wa yeyo athu owinjhiva orumedha muthenga yalaleyiwa. Motajhiha, va Pentekoste a yaka ya 33, yahibaddiziwa athu owakwana 3000. (Atos 2:41) Vano numero naanamahara weraga othabwa winjhiva mwamakalelo ootikiniha. (Atos 6:7) Mbwenye Yesu ahisoriha wihina malabo ookuthula mabasa oolaleya enere wenjhedhedheya. — João 14:12; Atos 1:8.

3-4. Mwahaya bwaddi dhilabo dhimodha dhigarusa olaleya? Yohudhera ela ni nnaasuze ddi?

³ Ki iyo nihikanna moonelo wapama ni mabasa oolaleya? Dhilabo dhimodha dhinokweya wapara mabasa ala. Mwahaya bwaddi? Mwaha athu owinjhiva ehikanna efunelo yomuhudhera Bibliya. Ohiya eyo, enokala nuujheha wihina namona di namona  a Yehova afwanye wihina alaleye. Mbwenye dhilabo dhimodha, kahi yokweya anamalaleya wapara mabasa yala. Mwaha athuya kinafwanyiwa mmavaade mwewa, teto yafwanyiwamo aliwa kinafuna ovuruwana muthenga.

⁴ Akala onakala elabo enarusa olaleya, dhithu nnasuzihu va yohudhera ela podi wukavihera. Nnere woona dhithu baani addibila amodha eneriwana wihina yalaleye athu owinjhiva. Ni nnere woona mwahaya bwaddi ekala yapama wawona mabasa ehu oolaleya mwamakalelo apama, naarive athuya ehirumedhaga muthenga nnalaleyihu.

5. Makathamiho baani enafwanya anamalaleya owinjhiva peeno?

⁵ Anamona a Yehova owinjhiva enowona wi ethu yorusa wafwanya athu mmavaade mwewa wihina yalaleye. Anamalaleya amodha enakala luwani athu owinjhiva enakala mukintali obe mperediyuni winavila ofiyawo. Podi wera yawoga ni gwarda onowakoddiha mwaha mwanamuralaya kawithanile. Teto anamalaleya amodha ehikanna ofuru wolaleya nyumba ni nyumba mbwenye athuya kinaafwanyamo. Anamalaleya amodha enodhowa olaleya murudda dholapela. Teto anamalaleya amodha ehikanna ofuru wolaleya othemba, wahinjhivile athu. Enowedda olenddo wolapela wihina ethapanye ni muthu mmodha baahi, teto malabo mamodha muthuya kinanfwanyavo! Akala onofwanyiwa makathamiho yala, kuselele. Onere ddi wihina wagonjhihe makathamiho ala ni wawoonege mabasa ala mwamakalelo apama?

6. Anamameza ni anamalaleya mabasiwa eniwanana avi?

⁶ Yesu aaliganihe mabasa oolaleya ni mabasa omeza oba. (Mar. 1:17) Anamameza podi ovira malabo owinjhivene ehimezile oba. Mbwenye aliwa kinaselela omeza. Enowakakana mudhidhiya, mburo enameziwa nimakaleloya oomeza. Iyo podi watajhiha mmabasani oolaleya. Kasugwa makalelo nnafunihu watajhiha.

7. Nakakanihaga mawora oolaleya, enakumelelavo ddi?

⁷ Osayelege mudhidhi wofwanelela wafwanya. Iyo nnere wanda walaleya athu owinjhiva nawaaja mawora enafwanyeyiwa mmavaade mwewa. Ebaribariya sowi muthu alaba anoohogolowela vaade! Anamalaleya owinjhiva enowanda wafwanya athu mmavaade mwewa yaalaleyaga mutana obe mahiyu. Ohiya eyo mawora yayo mubuwelo wamwanamurala ohupwaseya ni enofuna othapanyedha muselu bumuselu. Podi wera onere odhiveliwa yotajhiha ya ddibila Davidi ali namaholela mulogo. Oliye anowoga wi yamala olaleya murudda ole, yaliwa, oliye nimukwaye enohogolowela nyumba ndhe yahafwanyiwamo athu. Oliye onowoga egi: “Sotikiniha wafwanya anamurala nahogolowa dila bili.” *

8. Mmalaleyelo nnande addi ovirihamo ele anawoga Eclesiastes 11:6?

⁸ Kaniselele olaleya. Siyeyo yolebela ela enanikogomedhiwa werana. (Omwileri Eclesiastes 11:6.) Davidi awogiwe mundduli kahiyile olaleya. Podive ahafwanyagamo athuya, oliye ahinfwanya mwanamurala oliye afuna othapanyedha muselu dha mBibliyani. Mwanamurala owoga egi: “Miyo ginakala wewuno yaka 8, mbwenye Namona a Yehova kanafiyege vala.” Davidi onowenjhedhedha: “Miyo gahona wi nafwanya athu vaade vewa aliwa enofuna onona muthenga ninnihuna.”

9. Anamalaleya amodha eneera ddi yoona wi soorusa wafwanya athu wihina yalaleye?

⁹ Wawaajege mburo dhatedhene. Yahafwanyagamo athu mmavaade mwewa, anamalaleya  amodha enolupela murudda dhimodha. Motajhiha, aliwa enokanna mareeliho owinjhiva mwaha wolaleya murampani obe olabihedha karinyu dhamalivuru ehu. Nimakalelo yala, aliwa enowanda othapanya naathu enakala operediyuni, nimakalelo mamodha yahandiwa walaleya. Teto anamalaleya amodha ehona wi athu enofuna othapanya niwawakela malivuru ehu mmamerkado mmaloja ni mwinagulihiwa. Floiran nameeddela mulogo oBoliviya onosoriha egi: “Iyo nnodhowa mburo muneriwa fera ni mmamerkado mudhidhi wa 13 obe 15 hora. Mudhidhi yola anamaguliha atene eli oopwaseyene. Iyo nnokanna othapanya wapama teto nnowanda wambela ohudhera wa Bibliya.”

10. Makalelo baani we onafuniye walabihedha wihina ohumulupe muthu ohumulaleyile?

¹⁰ Wawaajege mburo dhatedhene. Podi wera we ohuxixa dila dhowinjhivadhene wihina onfwanye muthu vade vaye mbwenye kuwandile. Podi wera onowakakanihaga mudhidhi newene kunanfwanyavo. Nerege ehikalawo makalelo onfwanya muthu vade vaye? Murogola anithaniwa Katarina anowoga egi: “Miyo ginaleba makarta wihina gaahiye vaade vaathu ale gihafwanyilimi. Ginowoga mukartani mune dhithu gaawogimi gahere ginfwanyavo.” Nnahudhera ddi ni yotajhiha ela? Nakala mmabasani oolaleya kulupe nyumba si nyumba wahafwanyamo athuya, wakakanihe makalelo awo oolaleya.

11. Mwahaya bwaddi athu owinjhiva kinafuna ovuruwana muthenga nnalaleyihu?

¹¹ Athu amodha newene kinafuna ovuruwana muthenga ninnihuna. Aliwa kinonelamo mwahaya  bwaddi egahoweyelaga ohudhera wodhela Mulugu ni wodhela Bibliya. Mwaha ehigomana woona makathamiho mwilaboni, mwaha wa yeyo, aliwa kinarumedha wi Mulugu ohukalawo. Teto kinafuna wiwa Bibliya dhinawogiye. Mwaha enowawoona anamaholela gereja eni nnomurumedha Bibliya mbwenye enerana dhithu dhotakala. Athu amodha ehipinyaminyeya ni mabasa, emudhiwa, obe ni makathamiho enniwana, newene kinubuwela wihina Bibliya podi wakavihera. Ethu baani nnahowelihu werana wihina nihiyelele ohagalala naari athuya ehirumedhaga muthenga ninnihuna?

12. Ohara yolebela ya Filipenses 2:4 enanikavihera addi mmalaleyelo?

¹² Wapwathege athuya onawogiwena. Athu owinjhiva yahifuna wiwa muthenga ninnihuna aliwa ehisaddula mubuwelo wewa nuwona wihina nnowapwatha. (Omwileri Filipenses 2:4.) Motajhiha, Davidi nnamuthapanyedhihu mundduli anowoga egi: “Muthu awoga wihina kaginafuna wiwa, iyo nnomukoya Bibliya mpastani ni malivuru ehu iyo owoga negi: ‘Gere odhiveliwa onona mwahaya bwaddi ogubuwela ndo.’” Athu enowedha woona wi muthu ola onogipwatha. Aliwa podi ohubuwela ele niwogilihu, mbwenye enere wubuwela makalelo iyo nnaweddihihu. Podi akala mwanamurala kananihiya owoga, iyo podi woniha wi nnomuthuwathuwela wodhela mweddelo wehu ni makalelo ehu omusugwa.

13. Nnawedhe addi wakakaniha makalelo ehu oolaleya wa dhothuwathuwela dha kadda muthu nnafwanyihu?

¹³ Makalelo owoniha wi nnowathuwathuwela athu, fuwakakaniha makalelo ehu oolaleya wa dhofuna ni dhothuwathuwela dhaathu yale. Vaade ofiliwevo vinowooniha wihina vihikala ahima? Ole ali babi obe ali mayi podi odhiveliwa wiwa makalelo owaalela ahima obe makalelo okanna egumi ya vamuralani yohagalala. Onowoona musiwo dhowinjhiva dhigafugiwe ni akaddiyaddo? Podi wera yere okala yapama murudda yole owoga wodhela opanga, ni makalelo baani onathusiwa. Podi wera mwanamurala onere ohagalala wawoga wihina makathamiho ala labo nimodha enere omala. Wanfwanya muthu ahinafuna wiwa muthenga ninnihuna, omutonyihedhe makalelo muthenga dha mBibliyani dhinamukaviheriwa. Katarina nimuwogilihu mundduli onosoriha egi: “Miyo ginoveda wubuwela makalelo ebaribari esaddunliwa egumaga.” Mwamakalelo yala Katarina onowedha owoga ahanganyedhaga, teto athu enanvuruwana enowoona wi eyo ebaribari.

14. Ninga anawogela Provérbios 27:17, athu abili enaapara mabasa oolaleya enakaviherana nimakalelo baani?

¹⁴ Orumedhe nikavihero naathu amodha. Murumiwi Pawulo ahimuhudhiha Timotiyu makalelo oolaleya ni ohudhiha, teto oliye ahimukongomedha  wihina alabihedhe makalelo yala wihina akaviherena amodha. (1 Cor. 4:17) Ninga Timotiyu iyo podi ohudhera dhithu dhowinjhiva na addibila yakovelele mabasa ala ammulogoni mwehu. (Omwileri Provérbios 27:17.) Kasugwa yotajhiha ya ddibila mmodha anithaniwa Shawn. Oliye ohulaba ninga piyonero mudhidhi wowinjhivene othemba, murudda yola athuya yodhiveliwiwa pamadhene egereja yewa. Oliye ahagalale addi mmabasani oolaleya? Shawn onosoriha egi: “Dhandeya miyo ginakala ni mukwaga. Iyo naakumaga nyumba nilaleyilihu nadhowaga emodhaya nnothapanyedha makalelo owomihedha makalelo ehu oolaleya. Motajhiha, iyo noovirisedha makalelo nimulaleyihu mwanamurala nifwanyilihu. Eyo yoonikavihera woona ethu baani nnafunihu owoga nanfwanya mwana murala mmodha.”

15. Mwahaya bwaddi olobela nihinadhowe mmalaleyelo sathima?

¹⁵ Olobe nikavihero wa Yehova. Ohunadhowe mmalaleyelo olobege nikavihero na Yehova. Kavo muthu anafuna wapara mabasa oolaleya ahikaviheriwe ni muzimu wotxena. (Sal. 127:1; Luc. 11:13) Walobelaga osorihege ethu yele onahoweliwe. Omulobe Yehova wihina onfwanye muthu anafuna ovuruwana muthenga wehu ni anafuna ohudhera wodhela oliye. Wera ndo, werena epaddi yawo wilibihedhe wihina othapanye naathu atene onafwanyiwe.

16. Mwahaya bwaddi werana ohudhera wavayekiwa ononikavihera mmalaleyelo?

¹⁶ Okanne ohudhera wawo wavayekiwa. Madhu a Mulugu enosoriha yegi: ‘Monelemo yekinyu ele eli yapama, enarumedhiwa ni efunelo yologomana ya Mulugu.’ (Rom. 12:2) Naamuhudheraga Bibliya, nnomunona Yehova mwamakalelo apama. Nalaleyaga wodhela oliye, athu enowedha woona wihina ndhe nnawogihu iyoya nnowerana. Katarina nimusorihihu mundduli anowoga egi: “Mudhidhi mug’nove mundduli miyo gahonelamo wihina ginohowela wunnuwiha nroromelo naaga wodhela dhithu gihudherimi mBibliyani. Bumwahaya miyo ohudhera nupwaseya dhithu dhinawoga wihina Mulugu mpaddusi, Bibliya avetheliwe ni Mulugu ni Mulugu ohukanna nikuru naaye nnamwakihedha peeno.” Katarina onowoga wihina okanna ohudhera wavayekiwa ohunnuwiha nroromelo naaga ni ohenjhedhedha ohagalala waaga ni mabasa oolaleya.

17. Mwahaya bwaddi Yesu owawoona mabasaye oolaleya ni makalelo apama

¹⁷ Athu amodha kiyaafuna ovuruwana muthenga walaleya Yesu. Podi dhigalive ndo, oliye owawoona mabasaye oolaleya nimakalelo apama. Mwahaya bwaddi? Oliye ahinona wi athu enohowela vanlubale ohudhera ebaribari teto oofuna wakavihera owinjhiva orumedha muthenga ole. Teto oliye ahinona wihina owinjhiva enakodda peeno mudhidhi wavira aliwa podi osaddula mubuwelo wewa. Kasugwa epadduwile ni emudhi ya Yesu. Oliye ahapara mabasa oolaleya yaka tharu ni meya mbwenye newene mmudhaye mmodha kavo ali namahara aye. (João 7:5) Mbwenye Yesu nuvenyihiwa muukwani atene okala anamahara aye. — Atos 1:14.

18. Mwahaya bwaddi nihahiyaga mabasa oolaleya?

¹⁸ Kanonne muthu baani anakale Namona a Yehova. Athu owinjhiva enohowela mudhidhi owinjhivene wihina ekale Anamona a Yehova amodha enahowela mudhidhi mug’nove. Podi ale enakala ninga omaambelelo wene kinafuna okala Anamona a Yehova, mudhidhi wavira podi “omuthithimihaga Mulugu” mwaha woona mweddelo wehu ni makalelo ehu owubuwela. — 1 Ped. 2:12.

19. Ninga anawoga 1 Coríntios 3:6, 7, ethu baani nnahowelihu ohanganyedha?

 ¹⁹ Iyo dinadhala ni dinahela manjhe, mbwenye nihinona wi Yehova dinaapara mabasa athimaya muwari mwamabasa ehu oolaleya. (Omwileri 1 Coríntios 3:6, 7.) Getahun, ddibila anakala elabo yo Etiyopiya, anowoga egi: “Mwa yaka 20, miyo gaali Namona a Yehova baahi murudda walaleyiwe vang’no. Mbwenye peeno nili 14 Anamonave a Yehova. Athu owakwana 13 ehibaddiziwa, gihimudduwalaga mwaraga ni anaaga abili ebaddiziwe. Athu owakwana 32 enowona mutugumano dhehu.” Getahun onohagalala mwaha wojheha nuuvilela, Yehova wakavihera amodha okosa epaddi ya nikuru naaye! — João 6:44.

20. Mwahaya bwaddi nigawogaga wi nnoligana naale enawobola athu yapadduwa ngo’vi?

²⁰ Yehova anowawona athu atene okala ninga athima. Teto oliye ononivaha ofuru wolaba vamodha ni mwanaye wihina natugumanye athu atene koddo ya Armajedoni ehinafiye. (Ageu 2:7) Mabasa ehu oolaleya enooligana ni mabasa aale enaakavihera athu yapadduwa ngo’vi. Teto iyo nnakala ninga athu erumiwe wihina yawobole athu amodha eparile okunguni onatibiwa mina. Podi wera athu ang’nove anikuru nenne binamone muthu anafuna nikavihero ali mminani mune, mbwenye mabasa athu atene bathima. Iyo podi owoga ni makalelo mamodhave ni mabasa ehu oolaleya. Kanimunonne ddibila baani anafuna omoobola muthu elabo ela yabure. Ethu nnonihu sowi Yehova podi omulabihedha namona di namona. Andreya anakala elabo yoBoliviya anowoga egi: “Miyo ginonelamo wi muthu akaviheriwa omunona Yehova ni abaddiziwa mabasa ala napanre atene.” Nnohowela wi nikanne makalelo yala owubuwela wodhela mabasa oolaleya. Nubuwelaga ndala, Yehova anerege onireliha, teto mabasihu oolaleya enerege othabwa onihagalasa.