1. Mak-sõng bʋg la a Zeezi kõ a karen-biisã, la b manesem yɩɩ wãn to? (Ges-y sebrã pipi neng fotã.)

A ZEEZI sẽn wa n be tẽngã zugã, a talla yam-sõng koe-moonegã wɛɛngẽ, la a ra rat t’a karen-biisã me kell n tall yam-sõng tʋʋm-kãng wɛɛngẽ. (Zã 4:35, 36) A Zeezi sẽn wa n be ne a karen-biisã, b ra moonda koɛɛgã ne yẽesem. (Luk 10:1, 5-11, 17) La b sẽn wa n yõk a Zeezi n kʋ wã poore, a karen-biisã yẽesmã booga wakat bilf pʋgẽ. (Zã 16:32) A vʋʋgrã poore, a yeel-b lame tɩ b kell n nang pãng ne koɛɛgã moonego. A sẽn wa n kẽng saasẽ wã poore, a karen-biisã kell n moona koɛɛgã ne yẽesem wʋsgo, hal tɩ b bɛɛbã yẽgem n yeel yaa: “Yãmb pidsa Zerizalɛm ne yãmb zãmsgã.”—Tʋʋ. 5:28.

2. Wãn to la a Zeova ning koɛɛgã mooneg barka?

² Yaa a Zeezi n wilg pipi kiris-nebã b sẽn segd n moon koɛɛgã to-to. La a Zeova ninga tʋʋmdã barka, hal tɩ neb wʋsg sak n kelg koɛɛgã. Wala makre, yʋʋmd 33 Pãntekotã daare, sẽn zems neb 3 000 n deeg lisgu. (Tʋʋ. 2:41) Rẽ poore, karen-biisã sõor da tara paasgo. (Tʋʋ. 6:7) Ne rẽ fãa, a Zeezi pĩnd n togsame tɩ yaoolem wakatã, neb sõor sẽn yɩɩd rẽ hal zĩig sẽn zãr n na n sak n kelg koe-noogã.—Zã 14:12; Tʋʋ. 1:8.

3-4. Bõe n tõe n kɩt tɩ neb kẽer getẽ tɩ koɛɛgã mooneg yaa toogo? Bõe yell la d na n gom sõs-kãngã pʋgẽ?

³ D fãa modgdame n na n kell n tall yam-sõng koɛɛgã mooneg wɛɛngẽ. Tẽns kẽere, rẽ yaa nana. Bõe yĩnga? Bala neb wʋsg n dat n zãms Biiblã, hal tɩ mi n yaa tɩlɛ tɩ kẽer gũ, a Zeova Kaset soab sẽn pa be n na n zãms-b Biiblã yĩnga. La  dũniyã zĩis kẽere, koe-moondbã getame tɩ koɛɛgã mooneg pa nana ye. Bala yaa toog tɩ b mik nebã b zagsẽ, tɩ sẽn be-b zagsẽ wã me pa rat n kelg koɛɛgã ye.

⁴ Yãmb sẽn be zĩig ningã, koɛɛgã mooneg sã n yaa toogo, sagls nins sẽn be sõs-kãngã pʋgẽ wã na n sõng-y lame. D na n yãa neb kẽer sẽn maan to-to, n tõog n paam neb wʋsg n taas koɛɛgã. D leb n na n yãa bũmb ning sẽn kɩt tɩ d tõe n kell n tall yam-sõngo, nebã sã n kelgda koɛɛgã bɩ b pa kelgde.

5. Bõe n yaa toog ne koe-moondb wʋsgo?

⁵ Maneg n lebgda toog ne a Zeova Kaset rãmb wʋsg tɩ b paam nebã b zagsẽ n sõs ne-ba. Koe-moondb kẽer vɩɩ zĩis sẽn tar ro-bɛda, b sẽn gũbg tɩ ned pa tõe n paam n kẽ nana ye. Ned n mi n be be n gũud zĩigã, n pa basdẽ tɩ ned kẽ, sã n pa ned sẽn be beenẽ n bool a soabã ye. Koe-moondb a taab moonda zak-zak tɩ yell kae ye. La yaa neb a wãn bal la b mikd b zagsẽ wã. Koe-moondb sãnda me moonda tẽn-kɩremsẽ wall zĩ-zãrsẽ, nebã sẽn pa waoogẽ. B mi n kẽnga hal zĩ-zãrgẽ, n na n tɩ sõs ne nin-yende, tɩ wakat ning meng bɩ b pa tɩ mik a soab ye. D sã n maooda ne zu-loe-kãensã buudu, d pa segd n koms raood n bas ye. Bõe la d tõe n maan n welg zu-loe-kãensã, tɩ d koe-moonegã kell n wom biisi?

6. Wãn to la koe-moondbã yaa wa zĩm-yõgdba?

⁶ A Zeezi rɩka koe-moonegã n mak ne zĩm-yõgd tʋʋmde. (Mark 1:17) Zĩm-yõgdb kẽer tõe n maana rasem wʋsg n pa paam zĩif n yõk ye. La b pa komsd raood n bas ye. B toeemda bũmb kẽere. Wala makre, wakatã, zĩigã, wall b sẽn maand to-to n yõgd zĩmã. Tõnd me tõe n maana woto koɛɛgã mooneg wɛɛngẽ. Bɩ d ges bũmb kẽer d sẽn tõe n maan tɩ sõng-do.

7. D sã n toeemd d moonegã wakate, tõe n baasa wãna?

⁷ Toeemd-y y moonegã wakate: D na n paama neb wʋsg n taas koɛɛgã, d sã n moond wakat ning d sẽn tõe n mik-b b zagsẽ wã. Sẽn yaa a soab fãa, ned fãa wat n leba a zakẽ. Saam-biis wʋsg moonda zaabr bɩ zĩ-sobdo, bala b getame tɩ yaa wakat kãng la b tõe n mik nebã b zagsẽ. Sẽn paase, sasa-kãense, nebã tõe n tara sẽk n na n sak n sõs ne-do. D tõeeme me n maan wa kãsem-soab a ye yʋʋr sẽn boond t’a Davɩɩd sẽn maand to-to wã. A yeelame tɩ yẽ ne a tũud-n-taagã sã n wa moon n kaoos bilfu, b lebd n leba zags nins b sẽn da pa mikẽ nebã. A yeelame: “D sã n lebg n kẽng fãa, d paamda neb wʋsg d sẽn da pa miki, n sõs ne-ba, hal tɩ mi n ling-du.” *

8. Wãn to la d tõe n tũ Koɛɛg soab 11:6 sẽn yet bũmb ningã d koe-moonegã pʋgẽ?

⁸ D pa segd n koms raood n bas ye. Vɛrse ning zug sõsgã sẽn tikã tẽegda tõnd d sẽn segd n tall manesem ninga. (Karm-y Koɛɛg soab 11:6.) Davɩɩd ning yell d sẽn gomã pa koms raood n bas ye. A kẽnga zak a ye pʋgẽ naoor wʋsg n pa mik a soabã ye. La daar a ye, a wa n kẽngame n tɩ mik-a. A soabã kelgame, la a sak tɩ b na n sõs Biiblã zugu. A yeelame: “Yʋʋm a nii la woto mam sẽn be ka, la a Zeova Kaset soab zɩ n wa mam zakẽ wã ye.” A Davɩɩd yeelame: “Mam bãngame tɩ f sã n wa baas n mik ned a zakẽ, naoor wʋsgo a sakd n kelga koɛɛgã d sẽn moondã.”

9. Koe-moondb kẽer maanda wãn n paam n sõs ne neb yãab sẽn yaa toogo?

 ⁹ Toeemd-y y moonegã zĩiga: Koe-moondb kẽer toeemda b moonegã zĩiga, sẽn na yɩl n paam neb nins b sẽn pa mikd b zagsẽ wã n taas-b koɛɛgã. Wala makre, d gũus n gesame tɩ d sẽn moond soayã noy la ne perzãntoaar-dãmbã womda biisi, bala ne rẽ maasem, d paamd n sõsa ne neb sẽn be zĩis b sẽn pa kõ sor tɩ d tõe n moon zak-zaka. Rẽ kɩtame tɩ d paamd nebã n sõsd ne. La sã n da pa tũ ne manesem-kãngã, ra na n yɩɩ toogo. Sẽn paase, koe-moondb wʋsg yãame tɩ nebã sã n be park-rãmbẽ, raasẽ, la koosem zĩis a taaba, b sakd n kelga koɛɛgã, bɩ n sak n deeg sebre. Saam-biig a Florã sẽn yaa tigims sull yel-getã yeelame: “D kẽnda raasẽ wã, la butigsẽ wã zaabr wakat a 1 ne wakat a 3 sʋka. Bala wakat kãngã, te-koaasdbã tara sẽk bilfu. D mi n paam n sõsa ne nebã sõma, la d sɩng Biibl zãmsg ne-b menga.”

10. Manesem-bʋs la d tõe n tũnug ne n taas nebã koɛɛgã?

¹⁰ Toeemd-y y sẽn moond to-to wã: Mams-y n ges-y yãmb sẽn na n kẽng ned zakẽ naoor wʋsg n pa mik-a, tɩ y toeem wakat n kẽnda, n ket n pa mikd-a ye. Bũmb a to bee y sẽn tõe n maan n paam n sõs ne a soabã bɩ? Saam-bi-poak a Katarina yeelame: “Mam gʋlsda neb nins m sẽn zɩ n mik b zagsẽ wã lɛtre, n togs-b koɛɛg ning m sẽn da wa n na n taas-bã.” Yam-bʋg la d tõe n dɩk rẽ pʋgẽ? D modg n tũnug ne manesem buud toor-toore, n paam d moonegã zĩigẽ nebã n taas koɛɛgã.

11. Bõe yĩng tɩ neb kẽer pa sakd n kelg koɛɛgã d sẽn moondã?

¹¹ Neb kẽer pa rat n kelg koɛɛgã d sẽn moondã ye. B pa tagsd tɩ yaa tɩlɛ tɩ b bao n bãng Wẽnnaam la Biiblã sẽn yetã ye. B sẽn ne namsgã sẽn yaa wʋsg dũniyã zugã kɩtame tɩ b pa tẽed Wẽnnaam ye. B pa tẽed Biiblã sẽn yetã, bala b nee tũudmã taoor-dãmb sẽn yet tɩ b tũuda Biiblã sẽn yetã n yaool n yaa zãmb dãmba. Neb kẽer yaa b tʋʋmã, b zakã rãmba, bɩ b mengã zu-loeesã yell n pak-b n tɩ yɩɩda, hal tɩ b pa tagsd tɩ Biiblã tõe n sõng-b lame ye. Wãn to la d tõe n kell n tall d sũ-noogã, baa nebã sã n getẽ tɩ koɛɛgã d sẽn taasd-bã pa tar yõodo?

12. D sã n tũ Filip rãmb 2:4 sẽn yet bũmb ningã, wãn to la rẽ tõe n sõng-d koɛɛgã mooneg wɛɛngẽ?

¹² Wilg-y nebã tɩ b yell pak-y lame: Neb wʋsg sẽn da pa rat n kelg koɛɛgã sɩngrẽ wã wa n sak n kelgdame, koe-moondbã sẽn wilg tɩ b sẽn moond b rãmbã yell pak-b lame wã yĩnga. (Karm-y Filip rãmb 2:4.) Wala makre, Davɩɩd ning yell d sẽn gomã yeelame: “Ned sã n yeel t’a pa rat n kelg koe-noogã, d lebsd n suii d Biiblã la d sɛbã d kordẽ, la d yeel a soab yaa: ‘M nongẽ lame n bãng yãmb sẽn pa rat n kelgã võore.’” Nebã tõe n bãnga b yell sã n sɩd pak-d lame. B tõe n yĩma tõnd sẽn yeel-b bũmb ningã, la b na n ket n tẽra tõnd sẽn wilg tɩ b yell pak-d lame wã. Baa nebã sã n pa sak tɩ d sõs ne-ba, d tõe n wilga ne d manesmã la d nen-wamdã tɩ b yell pak-d lame.

13. Wãn to la d tõe n toeemd d sẽn moond koɛɛgã to-to wã tɩ zemsd ne bũmb nins sẽn pak nebã n yɩɩdã?

¹³ D wilgda nebã tɩ b yell pak-d lame, d sã n toeemd d sẽn moond koɛɛgã to-to wã tɩ zemsd ne bũmb nins sẽn pak-b n yɩɩdã. Wala makre, y nee bũmb sẽn wilgd tɩ kamb n be zakã pʋgẽ bɩ? Roagdbã tõe n data sagls sẽn na n sõng-b kambã wubr wɛɛngẽ, bɩ sagls sẽn na n paas b kãadmã sũ-noogo. Yãmb neeme tɩ b kʋɩlensã tara sogds wʋsg bɩ? Y tõe n yãka yam n gom bi-beelmã la rabeemã sẽn be dũniyã gill zugã yelle. Tõe t’a soabã sã n bãng tɩ bi-beelmã na n wa saa zãnga, a sũur na n yɩɩ noogo. Sẽn yaa a soab fãa, bɩ y modg n sõng neb nins sẽn sakd n kelgã tɩ b bãng tɩ Biiblã saglsã tõe n naf-b lame. A Katarina, saam-bi-poak ning yell d sẽn zoe n gomã yeelame: “Mam tẽegda Biiblã sẽn yet bũmb ningã sẽn maneg m vɩɩmã to-to wã yelle.” Woto kɩtame t’a  Katarina moond koɛɛgã ne yẽesem, tɩ nebã neẽ t’a kɩsa sɩd ne a sẽn yet bũmb ningã.

14. Sẽn zems ne Yel-bũn 27:17 wã, d sã n wa yaa d yiib n tũud taab n moond koɛɛgã, wãn to la d tõe n sõng taaba?

¹⁴ Bao-y sõngr neb a taabã nengẽ: Pipi kiris-nebã wakatẽ, a Poll wilga a Tɩmote yẽ sẽn moond koɛɛgã la a zãmsd nebã to-to wã, la a sagl-a t’a maan woto me n sõng neb a taabã. (1 Kor. 4:17) Wala a Tɩmote, tõnd me tõe n paamame tɩ tigingã neb nins sẽn tar minim wʋsgã sõng-do. (Karm-y Yel-bũn 27:17.) D gom saam-biig a ye yʋʋr sẽn boond t’a Sam yelle. A yɩɩ so-pakd sẽn da tɩ moond koɛɛgã zĩig nebã wʋsg sũy sẽn noom ne b tũudmã. A maana wãn n kell n tall a sũ-noogã? Ad a sẽn yeele: “Sã n da tõe fãa, m kɩtdame tɩ koe-moond yãag-m tɩ d tɩ moone. Zak ne a to sʋka, d yalsdame n sõs ne taaba, n na n sõng taab tɩ d zãmsgã minim paase. Wala makre, d mi n lebg n gesa d sẽn tɩ zãms ned Biiblã to-to wã sã n yɩɩ sõma. Rẽ poore, d baooda d sẽn na n maan to-to, d sã n wa seg yel-kãng buud yɛsa.”

15. Bõe yĩng tɩ pʋʋsgã tar yõod wʋsg koɛɛgã mooneg pʋgẽ?

¹⁵ Pʋʋs-y a Zeova n kos sõngre: Y sã n wa moond koɛɛgã fãa, bɩ y pʋʋs a Zeova n kos sõngre. Sã n pa tũ ne vʋʋsem sõngã sõngre, d ned baa a ye pa tõe n maan baa fʋɩ. (Yɩɩn. 127:1; Luk 11:13) Y sã n na n pʋʋs a Zeova n kos sõngre, bɩ y modg tɩ y goamã yɩ takɩ. Wala makre, kos-y-yã-a t’a sõng-y tɩ y paam ned sẽn tar yam-sõng n dat n kelg koɛɛgã. Rẽ poor bɩ y taas koɛɛgã ned ning fãa y sẽn na n sege, tɩ zems ne y sẽn pʋʋs n kos bũmb ningã.

16. Bõe yĩng tɩ d sã n yãk wakat n zãmsd Biiblã d yembre, bɩ na n sõng-d wʋsg koɛɛgã mooneg pʋgẽ?

¹⁶ Yãk-y wakat n zãmsd Biiblã: Wẽnnaam Gomdã yetame tɩ d “kɩs sɩd tɩ Wẽnnaam daabã yaa sõma, tɩ sakda ne bãmba, la tɩ zemsa zãnga.” (Rom. 12:2) D sã n kɩsa sɩd tɩ d mii sɩdã Wẽnnaam zugu, d na n maneg n goma ne bas-m-yam, d sã n wa taasd nebã koɛɛgã. Katarina ning yell d sẽn zoe n gomã yeelame: “Sẽn nan pa kaoose, m bãngame tɩ m segd n maneg n zãmsa bũmb kẽer sẽn be Biiblã pʋgẽ, tɩ sõng-m tɩ m tẽebã pãng paase. Rẽ n so tɩ m maag m yĩng n zãms Biiblã, n na n maneg n paam kaset sẽn wilgd tɩ Naand n be, tɩ Biiblã sɩd yaa Wẽnnaam Gomde, la tɩ rũndã-rũndã, Wẽnnaam tara siglg sẽn gomd a yʋʋrã yĩnga.” A Katarina yeelame tɩ yẽ sẽn zãmsd Biiblã a yembrã, paasa a tẽebã pãnga, la kɩt t’a paam sũ-noog koɛɛgã mooneg pʋgẽ n paase.

17. Bõe yĩng t’a Zeezi kell n tall yam-sõng koe-moonegã wɛɛngẽ?

¹⁷ A Zeezi kell n talla yam-sõng n da ket n moond koɛɛgã, baa neb kẽer sẽn da pa kelgd-a wã. Bõe yĩnga? A ra mii sɩdã sẽn na n naf nebã to-to wã, n da rat n maan a sẽn tõe fãa n sõng neb wʋsg tɩ b sak Rĩungã koɛɛgã. A leb n da miime tɩ neb kẽer sẽn pa sak n kelg-a sɩngrẽ wã tõe n wa sak n kelga kaoosg zugẽ. Pʋd n yɩɩ woto ne a zakã neb kẽere. A Zeezi sẽn moon koɛɛgã yʋʋm a tãab la pʋɩ-sʋkã fãa sasa, a ma-biig baa a ye pa sak n lebg a karen-biig ye. (Zã 7:5) La a vʋʋgrã poore, b lebga kiris-neba.—Tʋʋ. 1:14.

18. Bõe yĩng tɩ d ket n moond koɛɛgã?

¹⁸ D pa tõe n zoe n bãng ãnd dãmb n na n  wa sak n tũ a Zeova ye. Neb kẽer kaoosda wʋsg n yaool n wa sak n tũ a Zeova. Baa neb nins sẽn pa sakd n kelgd tõndã nee d yel-manesmã sẽn yaa sõma wã la d yam-sõngã, tɩ rẽ me tõe n wa kɩt tɩ b “waoog Wẽnnaam.”—1 Pɩy. 2:12.

19. Wa 1 Korẽnt rãmb 3:6, 7 sẽn yetã, bõe la d pa segd n yĩmi?

¹⁹ Tõnd sẽn send la d zãgsd koomã, d pa segd n yĩm tɩ yaa Wẽnnaam n kɩtd tɩ bɩtẽ ye. (Karm-y 1 Korẽnt rãmb 3:6, 7.) Saam-biig a ye yʋʋr sẽn boond t’a Getahun, n be Etiopi tẽng a ye wã yeelame: “Na maan yʋʋm pisi la zaka, maam m ye bal n da yaa a Zeova Kaset soab kaanẽ. La masã, koe-moondbã sõor yaa 14. Bãmb 13 n deeg lisgu, mam pagã ne m kamb a tãab sẽn naage. Sẽn zems neb 32 n wat tigissã.” A Getahun sũur nooma a sẽn kell n moon koɛɛgã, la a tall sũ-mar n gũ t’a Zeova wa tak sũ-tɩrs rãmb n wa a siglgã pʋgẽ wã.—Zã 6:44.

20. Bõe yĩng tɩ d tõe n yeel tɩ d tʋmda tʋʋmd sẽn fãagd yõya?

²⁰ Ninsaalbã fãa tara yõod wʋsg a Zeova nifẽ. A kɩtame tɩ d naag a Bi-riblã, n tigimd neb sẽn yit buud toɛy-toɛy pʋsẽ nand tɩ dũni-kãngã saab ta, tɩ woto sɩd yaa zu-zẽkr meng-menga. (Aaze 2:7) D tõe n dɩka koɛɛgã mooneg n mak ne tʋʋmd sẽn fãagd yõya. Tõnd yaa wa neb b sẽn tʋme, tɩ b na n tɩ fãag neb sẽn be sãnem bokẽ tɩ bokã sirg tɩ b pa tõe n yi ye. Tõe tɩ yaa neb a wãn bal la d na n tõog n fãage, la tʋʋmdã d fãa sẽn na n tʋmã tara yõod wʋsgo. Yaa woto me ne koɛɛgã d sẽn moondã. D pa mi neb nins d sẽn na n tõog n fãag a Sʋɩtãan dũni-kãngã pʋgẽ wã sõor ye. La a Zeova tõe n tũnuga ne tõnd ned kam fãa n sõng-ba. Saam-biig a Ãndereyas sẽn be Bolivi wã yeelame: “Ned sã n zãms Biiblã hal n wa reeg lisgu, yaa neb wʋsg modgr yĩnga.” Bɩ tõnd me kell n tall yam-sõng a woto koɛɛgã moonegã wɛɛngẽ. D sã n maan woto, a Zeova na n ning-d-la barka, la d na n paama sũ-noog wʋsg koɛɛgã mooneg pʋgẽ.