1. ¿Toni kuali neskayot kinkauilij Jesús imomachtijkauan, uan toni kichiujkej yejuan? (Xikonita taixkopin ipeujyan amaix).

JESÚS nochipa tanojnotsak keman yetoya nikan taltikpak uan amo keman kinemilij ke taltikpakneminij amo kikakiskiaj, uan kineki maj tiitatojtokakauan no ijkon titanemilikan (Juan 4:35, 36). Imomachtijkauan tanojnotskej ika yolpakilis keman yetoyaok iniuan (Luc. 10:1, 5-11, 17). Sayoj ke satepan ke Jesús kiuikakej iniuan tamelauanij uan kimiktijkej, amo kisentokakejok tanojnotskej ika yolpakilis (Juan 16:32). Satepan ke Dios oksepa kimakak inemilis, Jesús kinyolchikauak maj kitayekanaltianij tanojnotsaskej. Uan keman yetoyaya iluikak, imomachtijkauan miakejya kinnojnotskaj. Yejua ika akin kintauelitayaj kiniluijkej: “Nankinmatiltijke ya nochi in pueblojuani de nikan Jerusalén den namotanextililis” (Hech. 5:28).

2. ¿Keniuj Jiova kintatiochiuiani itekitikauan itech tanojnotsalis?

² Jesús kinixyekanak tokniuan itech yekinika siglo keman tanojnotsayaj, uan Jiova kintatiochiuij porin miakej taltikpakneminij kinkakkej. Kemej neskayot, itech Pentecostés tein mochiuak itech xiuit 33, moauijkej kemej 3,000 (Hech. 2:41). Uan okachiok momiakilijkej itatojtokakauan Cristo (Hech. 6:7). Uan no, Jesús kijtoj ke itech itamian tonalmej okachi miakej kikakiskiaj tein Biblia tamachtia (Juan 14:12; Hech. 1:8).

3, 4. 1) ¿Keyej itech seki altepemej tokniuan ouij kinkisa tanojnotsaskej? 2) ¿Toni tikitaskej itech nejin tamachtilis?

³ Tinochin timochikauaj tiksentokaskej titanojnotsaskej uan amo tiknemiliskej ke amo techkakiskej. Seki tokniuan amo ouij kinkisa kichiuaskej nejin porin itech altepet kampa nemij miakej kinekij momachtiskej Biblia, sayoj ke moneki mochiaskej hasta maj se tokniuj ueli kinmachti. Sayoj ke itech okseki  altepemej tokniuan ouij kinkisa tanojnotsaskej porin miakej amo semi yetokej ininchan uan akin yetokej amo semi kinekij kinkakiskej.

⁴ Komo kampa tinemij ouij techkisa titanojnotsaskej, uelis tikchiuaskej tein motayolmajxitia itech nejin tamachtilis. Tikitaskej keniuj seki tokniuan okachi kinajsinij taltikpakneminij uan keyej uelis tiksentokaskej titanojnotsaskej ika yolpakilis maski taltikpakneminij amo semi techkakiskej.

5. ¿Toni ouijkayomej kipanouaj miakej tokniuan?

⁵ Miakej tokniuan okachi ouij kinkisani tanojnotsaskej ininchan taltikpakneminij. Kampa nemij seki taltikpakneminij amo kikauaj maj akin yeski pano uan semi tajpiaj. Xa moajsi se tajpixkej akin sayoj tekaua maj se pano komo semej akin ompa nemi teyoleuak. Itech okseki altepemej tokniuan ueli tanojnotsaj kajkalpan, sayoj ke taltikpakneminij amo semi yetokej ininchan. Uan no, seki tokniuan tanojnotsatij kampa amo miakej nemij. Xa uejka ojtokaj keman tanojnotsatij itech se kali, uan keman ajsij amo akin yetok. Komo tejuan ijkon titanojnotsaj, ¿toni techpaleuis maj amo timosenkauakan uan maj ueli tikinnojnotsakan okachi taltikpakneminij?

6. ¿Keyej tanojnotsalis kemej yeskia keman se kintemoua amichimej?

⁶ Keman Jesús ika tajtoj tanojnotsalis, kiteajsikamatiltij ke kemej yeskia keman se kintemoua amichimej (Mar. 1:17). Akin kintemoua amichimej xa miak tonalmej amo kiajsi nion se. Sayoj ke amo mosenkaua, ta kipata hora keman kintemoua, youi kintemoti okseko oso kipata kemej kintemoua. Tejuan no uelis ijkon tikchiuaskej keman titanojnotsaj. Maj tikitakan seki taman tein uelis tikchiuaskej.

7. ¿Toni uelis panos keman tataman hora titanojnotsaj?

⁷ Maj tikpatakan hora keman titanojnotsaj. Tikinajsiskej okachi taltikpakneminij komo titanojnotsaj itech horas keman xa okachi yetokej ininchan. Tein melauj, maski kisaj ipa mokepaskej ininchan. Miakej tokniuan tanojnotsaj tiotakpa oso keman tayoua porin okachi kinajsij taltikpakneminij. Uan no, itech nejon hora taltikpakneminij xa amo semi sioujtokejok uan xa okachi kinekiskej tajtoskej. Oso uelis tikchiuaskej tein kichiua se tokniuj tayekankej akin monotsa David. Satepan ke yejua uan tokniuj akin iuan youi tanojnotskejya kemej se oso ome hora, oksepa tanotsaj kampa amo akin kintatapouilij. David kijtoua: “Semi miakej tikinajsij keman oksepa titanotsaj”. *

8. ¿Keniuj uelis tikchiuaskej tein kijtoua Eclesiastés 11:6 keman titanojnotsaj?

⁸ Tajkuilol kampa kisa nejin tamachtilis techelnamiktia ke amo moneki timosenkauaskej (xikonixtajtolti Eclesiastés 11:6). David, akin ika titajtojkej itech okse párrafo, amo mosenkauak. Satepan ke miakpaya panoka itech se kali, se tonal kitatapouilij se takat akin kiuelitaya ika tajtos tein Biblia tamachtia. Nejon takat kiluij: “Chikueyi xiujmejya ninemi nikan uan hasta axkan nikita se itaixpantijkauj Jiova nokaltenoj”. David kijtoua: “Nikitani ke keman tikinajsijya taltikpakneminij ininchan, miakej kikakij tein tikteixmatiltiaj”.

9. ¿Keniuj seki tokniuan ueli kinnojnotsaj akin amo kinajsij ininchan?

⁹ Maj okseko titanojnotsakan. Seki tokniuan tanojnotsaj kampa uelis kinajsiskej akin amo kinajsij ininchan. Kemej neskayot,  tanojnotsaj ojti uan ika carritos uan ompa kinajsinij taltikpakneminij akin nemij itech uejueyi kalmej kampa amo ueli tanojnotsaj kajkalpan. Nejin tapaleuiani maj tokniuan ueli kinnojnotsakan akin achto amo uelia kinnojnotsayaj. Miakej tokniuan no kiitanij ke taltikpakneminij okachi kinkakij oso okachi kiseliaj amaixmej keman yetokej parque oso kampa tanamakaj. Floiran, se tokniuj akin takalpanoua itech nechikolmej ompa Bolivia, kijtoua: “Tiouij mercados uan okseki tanamakaloyamej kemej se oso eyi hora tiotak, keman tanamakanij amo semi kipiaj tekit. Miakpa kuali techkakij uan hasta tikpeualtiaj nemachtilmej ika Biblia”.

10. ¿Keniuj uelis tikinnojnotsaskej nochin taltikpakneminij?

¹⁰ Maj tikchiuakan okseki taman kemej titanojnotsaj. Maj tiknemilikan ke miakpaya tiktemouanij titajtoskej iuan se taltikpaknenkej. Maski tianij ichan tataman hora, amo tikajsinij. ¿Toni no ueliskia tikchiuaskej? Se tokniuj siuat akin monotsa Katarína kijtoua: “Nikinijkuilouilia cartas akin amo nikinajsi ininchan uan nikiniluia tein nikiniluiskia komo nikinajsiskia”. ¿Toni techmachtia nejin? Ke moneki tikchiuaskej okseki taman tein tapaleuis maj ueli tikinnojnotsakan nochin taltikpakneminij.

11. ¿Keyej seki taltikpakneminij amo kinekij kikakiskej tein tikteixmatiltiaj?

¹¹ Sekin amo kinekij kikakiskej tein tikteixmatiltiaj porin kinemiliaj ke amo moneki kiixmatiskej Dios nion tein Biblia tamachtia. Xa  amo kineltokaj Dios porin onkak miak tajyouilis, uan kiixtopeuaj Biblia porin kiitaj ke taixyekananij itech taneltokalismej amo kichiuaj tein tamachtiaj. Oksekin semi tekitij, semi ininka motekipachouaj ininchankauan oso kuejmolmej tein kipiaj, uan yejua ika amo kiitaj ke Biblia uelis kinpaleuis. ¿Toni uelis techpaleuis maj tiksentokakan tiyolpakikan maski miakej taltikpakneminij amo kiitaj ke tein tikteixmatiltiaj semi kipia ipatiuj?

12. ¿Keniuj uelis tikchiuaskej tein kijtoua Filipenses 2:4 keman titanojnotsaj?

¹² Maj ininka timotekipachokan taltikpakneminij. Miakej akin achto amo kinekiaj kikakiskej tein tikteixmatiltiaj satepan kikakkej porin akin kinnojnotsak ininka motekipachoj (xikonixtajtolti Filipenses 2:4). Kemej neskayot, David, akin achto ika titajtojkej, kijtoua: “Komo se taltikpaknenkej kijtoua ke amo kineki techkakis, oksepa tikalakiaj toBiblia uan toamaixuan uan tiktemouaj tikmatiskej keyej ijkon tanemilia”. Taltikpakneminij kiitaj keman ininka se motekipachoua. Xa amo kielnamikiskej tein tikiniluijkej, sayoj ke xa kielnamikiskej keniuj momachilijkej porin ininka timotekipachojkej. Hasta komo taltikpaknenkej amo kineki techkakis, uelis tiknextiliskej ke ika timotekipachouaj ika tein tikchiuaskej uan komo tikualtakamej.

13. ¿Keniuj uelis tikinnojnotsaskej taltikpakneminij kemej kinekiskej techkakiskej?

¹³ Tiknextiaj ke ininka timotekipachouaj taltikpakneminij keman tikpataj tein yaya tikijtotij uan tikiniluiaj tein okachi kinpaleuis uan tein kinekiskej kikakiskej. Kemej neskayot, ¿moajsi teisa tein kinextia ke taltikpaknenkej kipia konemej? Komo kemaj, xa kinekis kikakis tein Biblia kinyolmajxitia tetatmej kemej moneki kiniskaltiskej ininkoneuan oso keniuj uelis yolpakiskej kemej kalyetouanij. ¿Uan komo tikitaj ke taltikpaknenkej semi tajtatsakua ichan? Uelis tikiluiskej ke maski mochiua miak taman tein amo kuali, nochi nejon senkis ixpoliuis. Nochipa keman tikajsiskej se taltikpaknenkej akin kineki techkakis, maj tiktemokan tikpaleuiskej maj kiajsikamati keniuj tein Biblia tayolmajxitia uelis kipaleuis. Katarína, akin ika titajtojkej itech párrafo 10, kijtoua: “Itech nitanemilia keniuj nechpaleuiani tein Biblia tamachtia”. Nejon kipaleuia maj kinexti ke kineltoka tein kiteixmatiltia uan taltikpakneminij kiitaj nejon.

14. Ika tein kijtoua Proverbios 27:17, ¿keniuj techpaleuia keman titanojnotsaj iniuan okseki tokniuan?

¹⁴ Maj tikitakan keniuj uelis techpaleuis tein kichiuaj okseki tokniuan. Itech yekinika siglo, Pablo kinextilij Timoteo keniuj tanojnotsas uan keniuj tamachtis, uan kiyolchikauak maj nejon no kinnextiliani okseki tokniuan  (1 Cor. 4:17). Kemej tanojnotsaj uan kemej tamachtiaj tokniuan uelis semi techpaleuis, ijkon kemej Timoteo semi kipaleuij tein Pablo kimachtij (xikonixtajtolti Proverbios 27:17). Maj tikitakan tein kichiuak se tokniuj takat akin monotsa Shawn, akin tapaleuito kemej precursor itech se xolalkonet kampa miakej kiuelitayaj taneltokalis tein kipiayaj. ¿Toni kipaleuij maj amo mosenkauani? Kijtoua: “Nochipa keman uelia, niaya nitanojnotsati iuan okse tokniuj. Keman tiayaj titanojnotsatij itech okse kali, ika titajtojtiayaj keniuj ueliskia okachi kuali titamachtiskej. Kemej neskayot, ika titajtouayaj tein se taltikpaknenkej techiluijka uan toni tiknankilijkaj. Ompa, tikitayaj toni ueliskia tikijtoskej komo okse taltikpaknenkej no techiluiaya nejon”.

15. ¿Keyej moneki tikchiuaskej netataujtil keman titanojnotsatij?

¹⁵ Maj tiktajtanikan Jiova maj techpaleui. Nochipa keman titanojnotsatiuij, maj tiktataujtikan Jiova maj techixyekana. Uelis tikchiuaskej tekit tein tikpiaj komo iyektikatsin espíritu techpaleuia (Sal. 127:1; Luc. 11:13). Keman tiktataujtiskej Jiova, maj tikiluikan keniuj tiknekij maj techpaleui. Kemej neskayot, maj tiktajtanikan maj techpaleui maj ueli tikajsikan se taltikpaknenkej akin kineki kiixmatis uan maj kineki techkakis. Ompa, maj timochikauakan tikinnojnotsaskej nochin akin tiueliskej.

16. ¿Keyej moneki timomachtiskej komo tiknekij maj kuali techyoui itech tanojnotsalis?

¹⁶ Maj timomachtikan. ITajtol Dios kijtoua: “Nankiyekajsikamatitiue [...] ten kuali; uan no nankajsikamatiske de keniu nankiyolpaktijtiyaske Dios; uan no nankajsikamatiske de keniu nankiyekajsikachiuaske ne tekit ten Dios kimonekiltia xikchiuakan” (Rom. 12:2). Keman timomachtiaj, okachi tikixmatij Dios uan nejon techpaleuia keman iniuan titajtouaj taltikpakneminij porin ueli kiitaj ke tikneltokaj tein tikiniluiaj. Katarína kijtoua: “Se tonal nikitak ke monekia okachi nitakuaujtamatis itech seki taman tein Biblia tamachtia. Yejua ika kuali nimomachtij nochi tein kinextia ke moajsi se Tachijchiujkej, ke Biblia iTajtol Dios uan ke Dios kipia se inechikol tein techixyekana itech nejin tonalmej”. Katarína kijtoua ke momachtis Biblia kipaleuij maj mochikaua itakuaujtamatilis uan maj okachi kiyolpakti tanojnotsas.

17. ¿Keyej Jesús kisentokak tanojnotsak ika yolpakilis?

¹⁷ Jesús kisentokak tanojnotsak ika yolpakilis maski sekin amo kinekkej kikakiskej. ¿Keyej kisentokak tanojnotsak? Porin kimatia ke taltikpakneminij monekia kiixmatiskej tein Biblia tamachtia uan kinekia kinpaleuis nochin akin ueliskia. No kimatia ke seki taltikpakneminij satepan kinekiskiaj kiixmatiskej tein kiteixmatiltiaya maski achto amo kinekkaj. Yejua nejon panok iniuan ichankauan. Itech eyi xiuit uan tajko keman tanojnotstinemik, nion semej iikniuan mochiuak imomachtijkauj (Juan 7:5). Sayoj ke satepan ke Dios oksepa kimakak inemilis, mochiujkej imomachtijkauan (Hech. 1:14).

18. ¿Keyej tiksentokaj titanojnotsaj?

¹⁸ Amo tikmatij akonimej akin tikinnojnotsaj mochiuaskej itekitikauan Jiova. Seki taltikpakneminij ouij kinkisa niman kiajsikamatiskej tein Biblia tamachtia. Hasta akin amo kinekij techkakiskej kiitaj tein kuali tein tikchiuaj uan ke semi tiyolpakij, uan xa satepan kinekiskej kiueyitaliskej Dios (1 Ped. 2:12).

19. Kemej kijtoua 1 Corintios 3:6, 7, ¿toni moneki tikelnamikiskej?

¹⁹ Maski tejuan titanojnotsaj uan titamachtiaj, moneki tikelnamikiskej ke Dios kichiua  maj kuali techyoui (xikonixtajtolti 1 Corintios 3:6, 7). Se tokniuj takat kayot Etiopía akin monotsa Getahun, kijtoua: “Kampa ninemi, sayoj nejua katka niitaixpantijkauj Jiova panoua 20 xiujmej. Sayoj ke axkan timoajsij 14 tokniuan tanojnotsanij. Timoauijkejya 13, sekin yejua nonamik uan nochin eyi nokoneuan. Itech nechikolmej timosentiliaj kemej 32”. Getahun yolpaki porin kisentokak tanojnotsak uan kichiak maj Jiova kichiuani maj taltikpakneminij akin kinekiaj kiixmatiskej motokianij itech inechikol (Juan 6:44).

20. ¿Keyej tejuan kemej yeskia akin kintemouaj taltikpakneminij satepan ke talolini?

²⁰ Jiova kipatiuita ininnemilis nochin taltikpakneminij. IKonetsin kinsentilijtok itech ixolal taltikpakneminij akin kayomej itech tataman xolalmej achto ke ixpoliuis tein amo kuali, uan techmaka tatiochiualis maj titekitikan iuan (Ageo 2:7). Tejuan kemej yeskia taltikpakneminij akin satepan ke talolini kintemouaj akin xa kinpechij teisa uan tatampa moajsij. Maski sayoj seki nejon taltikpakneminij kinajsiskej akin yoltokejok, tekit tein kichiuaj nochin semi tapaleuia. No ijkon panoua itech tanojnotsalis: amo tikmatij kanachimejok uelis tikinpaleuiskej maj kikauakan itaixyekanalis Satanás, sayoj ke Jiova uelis kichiuas maj tejuan oso okseki tokniuan tikinpaleuikan. Andreas, se tokniuj takat akin nemi Bolivia, kijtoua: “Nikmati ke miakej tapaleuiaj keman se taltikpaknenkej kiixmati tein Biblia tamachtia uan moauia”. Yejua ika, maj tiksentokakan titanojnotsakan uan maj amo tiknemilikan ke taltikpakneminij amo techkakiskej. Komo tikchiuaj, Jiova techtatiochiuis uan semi techyolpaktis titanojnotsaskej.