1. Yootakiherya taani Yesu aatikithenryeiye wa oohuserya awe, nave tiheeni yeenraaya? (Moone eruku va ekaapa.)

ELUKULUKU Yesu aareiye veelaponi ya vathi, owo aatitelela olaleerya wa achu nave aanaweherya wi awo yaahaala onwiriyana, nave tho onachuna wi oohuserya awe yeerekeno emohamoha. (Yoh. 4:35, 36) Vaavaa Yesu aareiye ni oohuserya awe, awo yaanalaleerya mwamvai. (Luka 10:1, 5-11, 17) Yesu amanle ohooxiwa ni wiiphiwa, mu elukuluku vakhaani oohuserya awe yaayeleela nchuno na olaleerya. (Yoh. 16:32) Amanle oviihiwa mookhwani, Yesu aahaaceenyerya otikitheryeya mmuteko woolaleerya. Voocharela amanle oya wirimu, oohuserya awe yaatitelela olaleerya mwamvai ophiyerya wi amwiicani aya yaaloca eriki: “Vano moovuwiha ehusiho anyu yeela yinlaana muYerusalemu moothemwene.”—Saw. 5:28.

2. Ti mwawiihai Yehova aareelinheiye muteko woolaleerya?

² Yesu aanaahoolela Akristu oopacerya wi ewerye olaleerya, nave Yehova aanaakhaviherya. Mwawiihiiha, achu ancipale yaaneemererya michaka saya. Ntoko yootakiherya, mu Pentekoste 33 E.K., achu awaakhwana 3.000 yaapatisiwa. (Saw. 2:41) Nave numero na oohuserya naatitelela waaceereryeya. (Saw. 6:7) Nyenya Yesu, aaloherya wi muteko woolaleerya waahaala wunnuwa mmahiku ookuchula.—Yoh. 14:12; Saw. 1:8.

3-4. Ntakhara heeni mu ilapo ikina muteko woolaleerya oryaaya woovila, nave tiheeni nnahaalaahu othokororya mmwaha yoola?

³ Oothene ahu nnaphwanela otitelela okhalano moonelo woophwanelela vooloca sa muteko woolaleerya. Mu ilapo ikina, tahi wookhweya weerano yeeyo. Ntakhara heeni? Nthowa nawi ancipale yaawo arino nchuno na omuhuserya Piipiliya anaphwanela oweherya wi Namoona a Yehova aaphwanye! Nyenya mu ilapo ikina alaleeryi annakhalano makacamiho mmuteko woolaleerya; achu  akina hanaphwanyeya mmavaate mwaya, nave yaawo anaphwanyeya akhweya hanakhalano nchuno vooloca sa Piipiliya.

⁴ Waakhanle wi muri mmukuma yoowo muteko woolaleerya oryaaya woovila, sooleeliherya sinaphwanyeya mmwaha yoola akhweya sinahaala wookhaviheryaani. Nnahaala othokororya yeeyo akina aneeraaya wi ewerye oloca ni achu mmuteko woolaleerya. Nave tho nnahaala othokororya ntakhara heeni nnaphwanelaahu otitelela okhala oolucuwa moohiphwacha waakhanle wi achu anneemererya muchaka ahu naari hooye.

5. Makacamiho taani yaawo Anamoona a Yehova ancipale anahoolelaaya?

⁵ Onakhala woovila wa Anamoona a Yehova ancipale wi yaalaleerye achu mmavaate mwaya. Alaleeryi akina anakhala mmukuma yoowo orimo ipa sirino okhapeleleya wavasulu naari tho sirino mikhora soolipihiwa. Vakina vaya onnakhalavo kwarta yoowo ohineemererya wi muchu vyakala avolowe ahiwompwe ni mwaneene a vaate. Mmapuro makina, onakhala wookhweya wa Anamoona a Yehova olaleerya empa ni empa, nyenya anaaphwanya achu a vakhaani. Ophiyerya tho wi alaleeryi akina analaleerya mmapuro yaawo arimo achu vakhaani. Alaleeryi ananwerya weeca mukwaha woorakama wi yalaleerye empa emoha—yeeyo tho akhweya eneeraaya ehimphwanye mwaneene! Waakhanle wi ninnahoolela makacamiho yaala, hannaphwanela ovelavela. Tiheeni nnaphwanelaahu weera wi nivoothe makacamiho ntoko yaala ni otitelela olaleerya?

6. Ti mwawiihai alaleeryi analikanaaya ni alipa oototha?

⁶ Yesu aahilikanyiha muteko woolaleerya ni muteko wa mulipa oototha ihopa. (Mar. 1:17) Alipa oototha ihopa akina ananwerya ototha mahiku mancipale nyenya ehiwerye ophara echu. Nto awo hanaceecheya; awo anaavya mikhalelo mikina sa ototha. Awo annatoroka elukuluku, mpuro naari mukhalelo wa ototha. Hiyaano tho ninnaphwanela opaka matorokelo mamohamoha mmuteko ahu woolaleerya. Nthokororye sooleeliherya inacharela.

7. Teevi enahaala okhala yookhumelela wakhala wi ninnalaleerya mu ilukuluku soohiyana?

⁷ Mweererye owaavya achu mu elukuluku yoohiyana. Hiyaano nnanwerya oloca ni achu ancipale wakhala wi nnalaleerya elukuluku yeeyo awo aryaaya vaate. Mweeparipari, muchu ti muchu onnakookela vaate vawe mu elukuluku ekina! Anna ni arokora ancipale annasiveliwa olaleerya othana naari oxekuwa nthowa nawi ti elukuluku anaaphwanyaaya achu ancipale. Mwawaaceererya, akaneene a vaate ananwerya okhala oomaaleleya ni ooreheryeya oloca mu elukuluku yeele. Naari munanwerya weererya opaka yeeyo mutokweene mmoha awiichaniwa David aapankeiye. Owo olonce wi amanle olaleerya mu ekulucu emoha, owo ni munna aalaleeryeiyeno vamoha, yaahichikela mu ipa soothene mwemmo yahaaphwanyaayamo achu mu ekwaha yoopacerya. Owo ooloca: “Kaahitikhiniheya vancipale waaphwanya akaneene a vaate mu elukuluku yeele naachikenlaahumo wanawiili.” *

8. Nni nimpharihele hai Eklesiyaste 11:6 mmuteko ahu woolaleerya?

⁸ Hannaphwanela oceecheya. Yoorepa ya mwaha ahu ennanuupuxerya moonelo yoowo nnaphwanelaahu okhalano. (Mwaalakhanye Eklesiyaste 11:6.) David, yoowo oromoliwe woopaceryani, haaceechen’ye. Mu empa emoha, owo aahimphwanya mwaneene a vaate yoowo aahimphwanyeiye mu ikwaha sincipale. Mulopwana owo aahooniherya nchuno vooloca sa Piipiliya nave aahi: “Kinakhala vaava mu iyaakha 8, nyenya nkintonko omoona Namoona a Yehova aphiyaka vaate vaka.” David ooloca: “Vaavaa nnaaphwanyaahu achu mmavaate mwaya, awo  ikwaha sincipale annawiriyana michaka nnalaleeryaahu.”

9. Ti mwawiihai Anamoona a Yehova akina anaweryaaya oloca ni achu yaawo onakhala woovila waaphwanya mmavaate mwaya?

⁹ Mweererye nipuro noohiyana. Wi ewerye oloca ni achu yaawo onakhala woovila waaphwanya mmavaate mwaya, alaleeryi akina annatoroka mapuro yaawo analaleeryaayamo. Ntoko yootakiherya, mphiro yoowo achu anayaayano omutekoni ni opharihela ikarinya sa soolaleeryiwa meerelo oophwanelela a oloca ni achu yaawo anakhala mu ipa itokweene weiwo onakhala woovila olaleeryawo empa ni empa. Eyo enneeriha okhala wooweryeya oloca ni achu yaawo anakhala mu ipa seiho. Nave tho, alaleeryi ancipale ahoona wi achu awaaca annasiveliwa ochekula naari waakhela soolaleeryiwa sahu mmapuro awaaciwamo, mmisika ni mmafeerani. Floiran, ooweherya a ekulucu o Poliviya ooloca: “Ninnaya mmisika ni mmapuro a nakoso variyari va iwora 13 ni 15 vaavaa alipa ootumiha ahinaweiwaayaxa. Ikwaha ikina ochekula onnakhumelela phaama nave ophiyerya opaceryiha soohuserya sa Piipiliya.”

10. Meerelo taani makina munaphwanelaanyu opharihela wi mulaleerye wa achu?

¹⁰ Mweererye opharihela mukhalelo mukina. Mwaanyiherye wi mwawuuluulela munneererya oloca ni muchu. Nyuwaano moophiya vaate vawe ikwaha sincipale nyenya hamutonko omphwanya. Apwanne sookhalavo mikhalelo mikina sa oloca ni muchu ntoko yoola? Katarína, oriye: “Kinnarepa ikaarata wa achu oothene yaawo kihintonkwaka waaphwanya mmavaate mwaya, kilocaka yeeyo kaachunaaka ovaanela ni yaawo.” Tiheeni nnahuseryaahu orweela wa meerelo awe? Mweererye omphwanya muchu ti muchu a mu ekulucu anyu mmikhalelo soothene vaavaa munaakhwaniheryaanyu orummwa anyu.

11. Ntakhara heeni achu akina hanaakhulela phaama michaka sahu?

¹¹ Achu akina annakhooca michaka sahu. Awo hanuupuwela wi annachuna osuwela vooloca sa Muluku ni Piipiliya. Awo hanamuroromela Muluku nthowa na makacamiho yaawo anoonaaya veelaponi yavathi. Awo hanamuroromela Piipiliya nthowa nawi annawoona ahooleli a malapelo yaawo analoca wi annachariha yeeyo Piipiliya onaloceiye yeeraka ichu sincipale soonanara. Akina anuukhuwa ni muteko, emusi naari makacamiho aya, nave hanuupuwela mukhalelo Piipiliya onahaaleiye waakhaviherya. Nni ntitelele hai okhala oohakalala vaavaa nnaalaleeryaahu achu yaawo anooniherya nchuno navakhaani vooloca sa michaka sahu?

12. Opharihela masu anaphwanyeya mu Filipi 2:4 eni enikhaviherye hai mmuteko woolaleerya?

¹² Mooniherye wi munnaapwacha akina. Ancipale yaawo ahinooniherya nchuno woopaceryani voocharela annaakhulela michaka saphaama vaavaa anoonaaya wi mulaleeryi onnaapwacha chiryene. (Mwaalakahanye Filipi 2:4.) Ntoko yootakiherya, David, yoowo olociwe woopaceryani, oriye: “Wakhala wi muchu ooloca wi nkinachuna owiriyana, ninnamukuha Piipiliya ahu mmurupani naari yoolaleeryiwa nave nloca: ‘Mwanwerya onileela ntakhara heeni muhinachunaanyu owiriyana.’” Achu ananwerya woona waakhanle wi muchu onnaapwacha. Awo ananwerya ocuwala yeeyo nloncaahu, nyenya mwawooneya awo ananwerya wuupuwelela yeeyo nipankaahu wa yaawo. Naamwi akaneene a vaate ehineemerenrye wi nloce, nnanwerya wooniherya wi ninnaapwacha moorweela wa mukhalelo ahu ni sawooniherya sa ethoi.

13. Ti mwawiihai nneeraahu ntoroke muchaka ahu wi wiiwanane ni soothowa sa mwaneene a vaate?

¹³ Ninnooniherya opwacha vaavaa nnatorokaahu muchaka ahu wi okhale mwawiiwanana ni soothowa sa mwaneene a vaate. Ntoko yootakiherya, apwanne nohoona wi yookhalavo echu enooniherya wi mwaneene a vaate ookhalano anamwane? Asitiithi ananwerya wooniherya nchuno wa malakiheryo a Mpiipiliyani vooloca sa mukhalelo wa waaphuwa anamwane naari sooleeliherya soophara muteko vooloca sa okumi woohakalaliha veechokoni. Apwanne ninnawoona akhantiyato atokweene ewaliweno mikhora? Nnawerya olakelela ovaanela vooloca sa nlala ni mukhalelo nlo nnaweerihaaya achu okhala awoova. Mwaneene a vaate onanwerya ohakalala wiiwa wi nlo nnarwa nimala. Moohiphwacha mikhalelo saya, mweererye waakhaviherya oothene yaawo anachuna owiriyana, wi yoone mukhalelo miruku sa Mpiipiliyani sineeraaya saakhaviherye. Katarína, yoowo oromoliwe woopaceryani, ooloca: “Kinnuupuwela mukhalelo eparipari  yaatoronkaaya okumi aka.” Mwawiihiiha Katarína onnaroromela yeeyo onaloceiye, nave tho onnoona wi achu onaloceiyeno ananwerya ororomela.

14. Mwawiiwanana ni Masiposipo 27:17, ti mwawiihai olaleerya ni nthamwene oneeriha wi nikhaviheryane mukina ni mukhwaawe?

¹⁴ Mphure orweela wa nikhaviheryo na akina. Mu nsana noopacerya, Paulo aamuhusiha Timoteo olaleerya ni ohusiha, nave aamuceenyerya owo waakhaviherya akina weerano emohamoha. (1 Kor. 4:17) Moolikana ni Timoteo, nnanwerya ohuserya mavyakelo a akina mmulokoni. (Mwaalakhanye Masiposipo 27:17.) Muthokororye yootakiherya ya munna awiichaniwa Shawn. Owo aarumeela ntoko piyoneero mu ekulucu yeeyo waariwo othowa, weiwo achu ancipale anasivelaaya malapelo aya. Ti mwawiihai owo aatitelenleiye okhala oohakalala? Owo ooloca: “Ilukuluku soothene kaanakhala ni nthamwene. Naanapharihela elukuluku neecaahu niyaaka empa ekina wi nikhaviheryane waaceererya mavyakelo ahu a ohusiha. Ntoko yootakiherya, naanavaanela vooloca sa yeeyo mwaneene a vaate olonceiye ni mukhalelo nimwaakhunlaahu. Nave naanathokororya mukhalelo naahaalaahu waakhula waakhanle wi noohoolela mukhalelo mmohamoha.”

15. Ntakhara heeni ovekela ti woochuneya mmuteko ahu woolaleerya?

¹⁵ Mveke nikhaviheryo wa Yehova. Mveke nikhaviheryo wa Yehova ilukuluku soothene munalaleeryaanyu. Nihirivo nikhaviheryo na munepa awe waweela, haavo mmoha a hiyo aahaala owerya weera echu eri yoothene. (Sal. 127:1; Luka 11:13) Vaavaa munamvekaanyu Yehova nikhaviheryo, mukhale ooluluwanya. Ntoko yootakiherya, mumveke wi oohooleleni wa muchu yoowo onachuna ohuserya vooloca sa Muluku nave ori oorehereya owiriyana. Voocharela mpake ichu mwawiiwanana nnivekelo nanyu moorweela wa olaleerya wa oothene yaawo muneeraanyu mwaaphwanye.

16. Ntakhara heeni yoohuserya ya muchu mukhateiye ti yoochuneya ntakhara muteko ahu woolaleerya?

¹⁶ Mpakeke yoohuserya ya muchu mukhateiye. Masu a Muluku anii: “Mweererye moone okhwela wa Muluku, wi ti waphaama woohakalaliha ni wa waakhwanela.” (Aro. 12:2) Vaavaa nnahuseryaahu, ninnamusuwela phaama Muluku. Voocharela, vaavaa nnalocaahu ni achu akina vooloca sa yoowo, awo annoona mukhalelo nnaroromelaahu yeeyo nnalocaahu. Katarína, olociwe woopaceryani, oriye: “Iyaakha savakhaani ivirale kaahoona wi kaaphwanela olipiha nroromelo naka mmahusiheryo ari mathipelo a Piipiliya. Mwawiihiiha kaahuserya moopwacha sawooniherya sawi ookhalavo Mpatuxa, sawi Piipiliya chiryene masu a Muluku, ni sawi Muluku ookhalano marehereryo awe yaawo anamweemelela olelo.” Katarína olonce wi yoohuserya awe ya muchu mukhateiye yoolipiha nroromelo nawe ni waaceererya ohakalala wawe mmuteko woolaleerya.

17. Ntakhara heeni Yesu aatitelela okhalano moonelo woophwanelela mmuteko awe woolaleerya?

¹⁷ Yesu aatitelela okhalano moonelo woophwanelela ni olaleerya naamwi akina yahaachuna owiriyana michaka sawe. Ntakhara heeni? Owo aanasuwela wi achu annachuna ohuserya eparipari, nave aanachuna waakhaviherya achu ancipale vaavaa waakhalaaya wooweryeya wi ewiriyane michaka sa Omwene. Owo tho aanasuwela wi achu akina hiyaahaala waakhulela phaama michaka sawe woopaceryani nyenya voocharela awo yaahaala weemererya. Muthokororye yeeyo yeeren’ye mu emusi awe. Variyari va iyaakha raru ni emeya mmuteko awe, haavo mmoha a asinnawe aakhanle ohuserya awe. (Yoh. 7:5) Nyenya amanle oviihiwa mookhwani, awo yaakhala Akristu.—Saw. 1:14.

18. Ntakhara heeni ninnaphwanela otitelela olaleerya?

 ¹⁸ Hiyaano hannasuwela yaawo eni yeemererye iparipari sa Mpiipiliyani seiyo nnahusihaahu. Achu akina annamaliha elukuluku yincipale wi yaakhulele michaka sahu moohiyana ni akina. Naamwi yaawo ahinachuna oniwiriyana ananwerya woona meecelo ahu aphaama ni moonelo ahu woophwanelela, nave voocharela epacerye ‘omucicimiha Muluku.’—1 Ped. 2:12.

19. Mwawiiwanana ni 1 Korinto 3:6, 7, tiheeni nnaphwanelaahu osuwela?

¹⁹ Naamwi naalaka ni ohela maahi, nnaphwanela osuwela wi Muluku tonannuwiha. (Mwaalakhanye 1 Korinto 3:6, 7.) Getahun, munna yoowo onarumeela o Etiyopiya, oriye: “Mu iyaakha opwaha 20, kaari meekhaaka Namoona a Yehova mmukuma kaakhalaakawo. Nyenya vano aakhalawo alaleeryi 14. Khumi nararu a yaawo aapatisiwa, ophitaanyerya mwaaraka ni anaaka araru. Vano mmithukumano ninnaphiyerya achu awaakhwana 32.” Getahun onnahakalala woona wi aatitelela olaleerya ni onweherya Yehova moopisa murima wi aaruuhe achu a murima waphaama mmarehereryo awe!—Yoh. 6:44.

20. Mmukhalelo taani nnalikanaahu ni alipa a woopola?

²⁰ Yehova onawoona achu oothene okhala oochuneya. Owo oonivaha ekari ya olapa vamoha ni mwanawe mmuteko wa waathukumanya achu oorweela wa maloko oothene ehaakumve makuchuwelo a mukhalelo yoola wa ichu. (Ageu 2:7) Muteko ahu woolaleerya onalikana ni muteko wa waavuluxa achu. Nave hiyaano nnalikana ni achu a muniikhuuru na woopola yaawo arumihiwe wi yawoopole achu yaawo ari va yawoopiha. Naamwi eri avakhaani a mu nikhuuru nenle amphwannye muchu mmoha, muteko wa oothene ti woochuneya. Emohamoha tho ennaphariheleya vooloca sa muteko ahu woolaleerya. Hiyaano hannasuwela waaca wa achu yaawo anahaala ovuluwa mu elapo yeela ya Satana. Nyenya Yehova onanwerya ompharihela mmoha ti mmoha a hiyo wi naakhaviherye yaawo. Andreas, yoowo onakhala o Poliviya, ooloca: “Koosuwela wi vaavaa muchu onahusereiye eparipari ophiyerya opatisiwa, ti nthowa nawi ancipale aalapa vamoha wi emukhaviherye yoowo.” Nnanwerya otitelela okhalano moonelo mmohamoha woophwanelela vooloca sa muteko ahu woolaleerya. Wakhala wi noheerano, Yehova onahaala onireeliha, nave muteko ahu woolaleerya onahaala onivaha ohakalala wawaaca.