1. Yesu akateeraho abakuratsi be ky’okureeberaho ki, kandi bakatwaza bata? (Reeba ekishushani ekiri aha kipampagare.)

YESU akaguma aine emiteekateekyere mirungi omu buheereza bwe aha omu nsi, kandi naayenda abakuratsi be nabo bagire emiteekateekyere nk’eye aha buheereza bwabo. (Yoh. 4:35, 36) Abeegi ba Yesu bakaguma nibabuurira baine omuhimbo obu baabaire bari nawe. (Luk. 10:1, 5-11, 17) Kwonka Yesu ku yaakwatsirwe kandi akaitwa, omujinya gw’abeegi be ogw’okubuurira gukatuuba. (Yoh. 16:32) Bwanyima y’okuzooka, Yesu akabahiga kuta omutima aha kubuurira. Ku yaagiire omu iguru, bakagumizamu nibabuurira baine omujinya kandi abazigu baabo baayetomboita bati: “Reeba mwijwize Yerusaalemu okwegyesa kwanyu.”​—Byak. 5:28.

2. Yehova ahaire ata omugisha omu murimo gw’okubuurira?

² Yesu akeebembera omurimo ogwabaire nigukorwa Abakristaayo omu kyasha ky’okubanza, kandi Yehova akabaha emigisha baakanya. Nk’eky’okureeberaho aha Pentekoote 33 Y.A.K., abantu nka 3,000 bakabatizibwa. (Byak. 2:41) Kandi omubaro gw’abeegi gukaguma nigweyongyera kukanya munonga. (Byak. 6:7) Kwonka, Yesu akagira ngu omurimo gw’okubuurira gukaba nigwija kwongyera kurugamu ebirungi omu biro by’aha mperu.​—Yoh. 14:12; Byak. 1:8.

3-4. Ahabw’enki abamwe nibagumirwa kubuurira, kandi nituza kushwijuma ki omu kicweka eki?

³ Twena nituteeraho kuguma twine emiteekateekyere mirungi omu buheereza. Omu mahanga agamwe, ekyo kyorobi kukora. Ahabw’enki? Ahakuba baingi nibakunda kwegyesibwa Baibuli kandi obumwe abeegi ba Baibuli baine kutegyereza kuhitsya  obu haraaboneke Omujurizi wa Yehova ow’okubeegyesa! Kwonka omu bicweka ebindi, omurimo gw’okubuurira nigugumira ababuurizi ahakuba, abantu tibarikukira kuba bari omuka, kandi n’obu barikuba bariyo tibarikukunda Baibuli.

⁴ Ku oraabe nootuura omu kicweka ahu kitoorobi kubuurira, obuhabuzi oburi omu kicweka eki nibuza kukuhwera. Nituza kureeba ebi bamwe bakozire kubaasa kuhika aha bantu baingi omu buheereza. Kandi nituza kushwijuma ahabw’enki twine kuguma twine emiteekateekyere mirungi yaaba abantu baikiriza obutumwa bwaitu nari babwanga.

5. Ababuurizi baingi nibaraba omu mbeera ki ezigumire?

⁵ Abajurizi ba Yehova baingi nibagumirwa kushanga abantu omu maka gaabo. Ababuurizi abamwe nibatuura omu myanya egumire kubuuriramu ahabw’oburinzi bw’amaani nari ebikaari. Amaju agamwe nigabaasa kuba gariho abarinzi abatarikwikiriza abantu kutaahamu baaba batakozire entebeekanisa na baanyineeka. Ababuurizi abandi nibabaasa kubuurira enju aha nju kwonka bashangye ngu baingi tibariyo omu maka gaabo. Kandi ababuurizi abandi nibabuurira omu byaro nari emyanya eyehereire erimu abantu bakye. Ababuurizi nibabaasa kugyenda engyendo ndaingwa kubaasa kubuurira omuntu omwe kandi obundi bashangye n’omuka atariyo! Twaba twine oburemeezi nk’obu, nabwo twine kugumizamu nitubuurira. Nitubaasa kukora ki kusingura oburemeezi obwo kandi tukatunga ebirungi omu buheereza bwaitu?

6. Ababuurizi ni nk’abajubi mu muringo ki?

⁶ Yesu akagyeragyeranisa omurimo gw’okubuurira n’ogw’omujubi w’eby’enyanja. (Mak. 1:17) Abajubi b’eby’enyanja nibabaasa kumara ebiro barikujuba kwonka batarikutunga eby’enyanja. Kwonka tibarikurekyera aho kujuba, kureka nibahindura enjuba yaabo. Nibahindura omu bwire, omwanya nari omuringo gw’okujuba. Nitubaasa kukora nikyo kimwe omu buheereza bwaitu. Ka tureebe oku turikubaasa kukikora.

7. Niki ekirikubaasa kubaho twahindura omu bwire obu turikubuuriramu?

⁷ Teeraho kuhika abantu omu bwire obundi. Nitwija kubuurira abantu baingi omu maka gaabo twaba nituzayo obu barikuba bariyo. Ahakuba, buri omwe naahitsya obwire ataaha! Ab’eishe-emwe na banyaanyazi-itwe bashangire ngu baabuurira omu ihangwe nari omu mwabazyo nibwo barikushanga abantu baingi omuka. Okwongyera ahari ekyo, abu barikubuurira nibaba baikaikaine kandi beeteekateekire kugaaniira omu bwire obwo. Nari obundi obuhabuzi bw’omureeberezi orikwetwa David nibubaasa kukuhwera. Naagira ngu bwanyima y’okubuurira omu kicweka eki barimu, we n’ogwo ou aine nibagarukayo kubuurira abu bataashangayo. Naagira ati: “Nikintaangaaza kushanga abantu baingi omuka ku turikugarukayo omurundi gwa kabiri.” *

8. Nitubaasa kugyendera tuta aha Omubuurizi 11:6 omu buheereza bwaitu?

⁸ Titwine kuhanika. Ekyahandiikirwe kikuru eky’ekicweka eki, nikitwijutsya emiteekateekyere ei tushemereire kugira. (Shoma Omubuurizi 11:6.) David, owaaba yaagambirweho, tarahanikire. Aha nju emwe, akarugaho yaashangaho omushaija bwanyima y’okuteeraho emirundi mingi atarikumubona. Omushaija ogwo akaba naakunda kugaaniira ahari Baibuli kandi akagira ati: “Ntwire aha kumara emyaka nka munaana, kwonka tihaine Mujurizi wa  Yehova oraizire kumbuurira.” David naagira ati: “Nyetegyereize ngu waashanga abantu omu maka gaabo abatarikukira kushangwayo, kaingi nibakira kwikiriza obutumwa obu turikubuurira.”

9. Abajurizi ba Yehova abamwe nibabuurira bata abantu abatarikukira kushangwa omuka?

⁹ Teeraho kubuurira omu myanya endiijo. Kubaasa kutunga abantu abatarikukira kushangwa omuka, abamwe bahindwire emyanya ei barikubuuriramu. Nk’eky’okureeberaho, okubuurira aha nguuto nari okukoresa akagaari n’emiringo mirungi y’okutunga abantu abarikutuura omu byombeko ahu batarikwikiriza kubuurira omuryango aha gundi. Eki nikibaasisa Abajurizi ba Yehova kubuurira abantu abarikutuura omu myanya nk’egyo barikureebana nabo butunu. Kandi, ababuurizi baingi bashangire ngu abantu nibooroberwa kugaaniira nari kwakiira ebitabo byaitu omu myanya y’okuhuumuriramu, obutare, nari emyanya y’eby’obushuubuzi. Floiran, omureeberezi orikutaayaayira ebibiina omuri Bolivia, naagira ati: “Nituza omu butare n’emyanya y’obushuubuzi aha gati ya shaaha mushanju na mwenda z’eihangwe obu barikuba bataine baguzi baingi. Nitukira kugira ekigaaniiro kirungi nangwa tutandika n’okubeegyesa Baibuli.”

10. Noobaasa kukoresa miringo ki endiijo kuhika aha bantu?

¹⁰ Teeraho kukoresa omuringo ogundi. Ka tugire ngu oteireho emirundi mingi kubuurira omuntu. Ogiire owe omu bwire butari bumwe na bumwe kwonka nabwo waashanga atariyo. Hariho emiringo endiijo ei orikubaasa kumubonamu? Katarína, naagira ati: “Abu ntarikushanga omuka ninkira kubahandiikira amabaruha, ndikubamanyisa obutumwa obu naaba  mbainiire.” Eky’okwega? Teeraho kuhika buri omwe omu kicweka kyanyu omu miringo etari emwe n’emwe omu buheereza bwawe.

11. Ahabw’enki abantu abamwe batarikufayo aha butumwa bwaitu?

¹¹ Abantu abamwe tibarikufayo kuhurira obutumwa bwaitu. Tibarikureeba oku barikubaasa kugasirwa omu kumanya Ruhanga nari Baibuli. Tibarikwikiririza omuri Ruhanga ahabw’okubonabona kwingi okuri omu nsi. Nibanga Baibuli ahakuba nibareeba oburyarya bw’abeebembezi b’ediini abarikugira ngu nibagikuratira. Abandi beemariire aha mirimo yaabo, amaka gaabo n’oburemeezi obu baine kandi baaremwa kureeba oku Baibuli erikubaasa kubahwera. Nitubaasa kuguma tuta twine okushemererwa abu turikubuurira baaba batarikureeba omugasho gw’obutumwa bwaitu?

12. Ebiri omu Abafilipi 2:4 nibibaasa kutuhwera bita omu buheereza bwaitu?

¹² Yoreka ngu noobafaho. Baingi abaabandize kworeka ngu tibarikufayo aha makuru marungi babaasize kuhinduka ahabw’okureeba oku ababuurizi barikubafaho. (Shoma Abafilipi 2:4.) Nk’eky’okureeberaho, David, owaaba yaagambirweho naagira ati: “Omuntu yaagira ngu tarikwenda kuhurikiza, nitubiika Baibuli nari ebitabo byaitu reero tumugira tuti: ‘Nitwenda kumanya ekirikukureetera kwehurira otyo.’” Abantu nibabaasa kumanya yaaba nitubafaho. Nibabaasa kutaijuka eki twagambire, kwonka nibaija kwijuka oku twabatwariize. Ou turikubuurira n’obu yaakuba atatwikiriize kugamba, nitubaasa kutwaza gye kandi n’endeebeka yaitu ey’aha maisho neebaasa kworeka ngu nitumufaho.

13. Nitubaasa kuhikaanisa tuta obutumwa bwaitu n’ebi abu turikubuurira barikukunda?

¹³ Nitworeka ngu nitufayo twahindura obutumwa bwaitu kuhikaana n’ebi abu turikubuurira barikukunda. Nk’eky’okureeberaho, hariho obuhame oburikworeka ngu eka ei orikubuurira erimu abaana? Obundi abazaire nibabaasa kuba nibenda kumanya obuhabuzi bwa Baibuli oburikukwata aha kworora abaana nari okugira okushemererwa omu ka. Mbwenu shi enyigi z’abantu enyingi ziriho ekufuru? Nitubaasa kugamba aha kuhenda ebiragiro n’okutiina okwijwire omu nsi, reero bwanyima omuntu ayende kumanya obu embeera egyo eraahwereho kimwe. Omu mbeera zoona, teeraho kuhwera abu orikubuurira kumanya oku obuhabuzi bwa Baibuli burikubaasa kubahwera. Katarína, owaaba yaagambirweho naagira ati: “Ninyeijutsya oku amazima gampwereire kugira embeera nungi.” N’ekirikurugamu, Katarína  naagamba aine omuhimbo, kandi n’abu arikugaaniira nabo nibakireeba.

14. Kurugiirira aha Enfumu 27:17, nitubaasa kuhwerahwerana tuta omu kubuurira?

¹⁴ Ikiriza abandi kukuhwera. Omu kyasha ky’okubanza, entumwa Paulo akeegyesa Timoseo obukodyo bw’okubuurira n’okwegyesa kandi yaamuhiga kubukoresa kuhwera abandi. (1 Kor. 4:17) Nka Timoseo, naitwe nitubaasa kwegyera ahari abo abamazire obwire buraingwa omu buheereza. (Shoma Enfumu 27:17.) Teekateeka aha ky’okureeberaho ky’ow’eishe-emwe Shawn. Akamara obwire arikuheereza nka payoniya omu kyaro ahu abantu baingi baabaire nibakunda ediini yaabo. Niki ekyamuhweraire kuguma aine okushemererwa? Naagira ati: “Nkaba niinteeraho kugira ou naabuurira nawe kyaba nikibaasika. Tutakahikire aha nju endiijo tukaba tugyenda nitugaaniira aha kuboneza emyegyeseze yaitu. Nk’eky’okureeberaho, tukaba tugaaniira aha muringo ogu twakwatamu ou twabuurira, reero tureeba oku turikubaasa kutwaza twahikwaho embeera nk’egyo omurundi ogundi.”

15. Ahabw’enki okushaba kuri kukuru omu buheereza bwaitu?

¹⁵ Shaba Yehova kukuhwera. Shaba Yehova kukuhwera buri murundi waaza kwejumba omu kubuurira. Twaba tutaine buhwezi bw’omwoyo gurikwera, tihaine eki turikubaasa kuhikiiriza. (Zab. 127:1; Luk. 11:13) Waaba nooshaba Yehova obuhwezi gamba kyenyini eki orikwenda. Nk’eky’okureeberaho, mushabe kukuhwera kubona omuntu oine ekihika ky’okumwegaho kandi oyeteekateekire kuhurikiza. Reero oteereho kuta omu nkora okushaba kwawe orikubuurira buri omwe.

16. Ahabw’enki okweyegyesa n’okw’omugasho omu buheereza?

¹⁶ Gira obwire bw’okweyegyesa. Ekigambo kya Ruhanga nikigira kiti: ‘Mumanye gye ebi Ruhanga arikukunda oku biri birungi, ebirikusiimwa, kandi ebihikire buzima.’ (Rom. 12:2) Twayehamiza amazima agarikukwata ahari Ruhanga, nitwongyera kubuurira abandi twine omuhimbo. Katarína, owaaba yaagambirweho naagira ati: “Nibwo mperize kwetegyereza ngu nyine kuhamya okwikiriza kwangye okurikukwata aha nyegyesa za Baibuli ezirikutandikirwaho. N’ahabw’ekyo n’obwegyendesereza nkashwijuma omu bwijwire obuhame oburikukwata aha Muhangi, naahamya ngu Baibuli n’Ekigambo kya Ruhanga, kandi aine ekibiina ekirikumujwekyera aha omu nsi obunaku obu.” Katarína naagira ngu okweyegyesa kimuhweraire kuhamya okwikiriza kwe n’okwongyera aha kushemererwa kwe omu buheereza.

17. Ahabw’enki Yesu yaagumire aine emiteekateekyere mirungi aha buheereza bwe?

¹⁷ Yesu akaguma aine emiteekateekyere mirungi yaagumizamu naabuurira n’obu bamwe baraabe baabaire nibanga obutumwa bwe. Ahabw’enki? Akaba naamanyira kimwe ngu abantu baine kumanya amazima, kandi akaba naayenda kuhwera baingi nk’oku kirikubaasika. Kandi akaba naamanya ngu bamwe abarikwanga omu kubanza nibabaasa kuhurikiza bwanyima. Teekateeka aha kyahikire aha ka ye yenyini. Yesu omu buheereza bwe obw’emyaka eshatu n’ekicweka, tihaine n’omwe omu beene ishe owaahindukire omwegi. (Yoh. 7:5) Kwonka, bwanyima ya Yesu kuzooka, bakahinduka Abakristaayo.​—Byak. 1:14.

18. Ahabw’enki nitugumizamu turikubuurira?

¹⁸ Titurikubaasa kumanya orikwija kukunda amazima. Abamwe nibatwara obwire buraingwa kukunda amazima. Nangwa n’abarikwanga kutuhurikiza nibareeba emitwarize  n’emiteekateekyere yaitu mirungi, kandi nibabaasa kurugaho “bahimbise Ruhanga.”​—1 Pet. 2:12.

19. Ebiri omu 1 Abakorinso 3:6, 7, nibitwegyesa ki aha buheereza bwaitu?

¹⁹ Twabyara kandi tukaitirira, twine kumanya ngu Ruhanga naija kukora ogwe. (Shoma 1 Abakorinso 3:6, 7.) Getahun, ow’eishe-emwe orikuheereza omuri Ethiopia, naagira ati: “Kumara emyaka erengire 20, niinye nyenka owaabaire ari Omujurizi wa Yehova omu kicweka ekyabaire kitarikukira kubuurirwamu. Kwonka hati twine ababuurizi 14. Ikumi na bashatu aharibo babatizibwe, otwariiremu omukazi wangye n’abaana bangye bashatu. Twine abantu abarikuhika nka 32 abarikwija omu nteerane.” Getahun ashemereirwe ahabw’okugumizamu naabuurira n’okugumisiriza ategyereize Yehova kweyiriza haihi ab’emitima eshemeire omu kibiina kye!​—Yoh. 6:44.

20. Turi nk’abashahuzi b’abantu mu muringo ki?

²⁰ Yehova naatwara amagara g’abantu boona nk’ag’omuhendo. Atuhaire omugisha gw’okukora n’Omwana we omu kurundaana abantu kuruga omu mahanga goona emperu y’ensi egi etakahikire. (Hag. 2:7) Omurimo gwaitu gw’okubuurira nigubaasa kugyeragyeranisibwa n’ogw’abarikushahura abantu omu kabi. Kandi turi nk’abashahuzi aboohereziibwe kuhwera abantu abahatamire omu kirombe. N’obu abashahuzi baakushanga abantu bakye omu kirombe abakihuriire, omurimo gwabo nabwo niguguma guri mukuru. Nikyo kimwe n’omurimo ogu turikukora omu buheereza. Titurikumanya abantu benyini abarikwija kucungurwa omu nsi egi eya Sitaane. Kwonka Yehova naabaasa kukoresa buri omwe ahariitwe kubahwera. Andreas, orikutuura omuri Bolivia, naagira ati: “Buri omwe orikwega amazima ga Baibuli kandi akahika aha kubatizibwa, niimureeba nk’ohwerairwe abantu baingi.” Ka tugume twine emiteekateekyere nk’egyo aha buheereza bwaitu. Twakora tutyo, Yehova naija kutuha emigisha, kandi obuheereza bwaitu nibwija kutureetera okushemererwa okwabuzima.