1. Ngimba kifwanikisyo kiliku iki Yesu abanangisye abamanyili bake kangi babombile isyafiki? (Keta ikithuzi kya pakikope.)

YESU akindilile ukuya naminong’ono amanunu pabufumusi bwake bo ali pa kisu kyapasi. Kangi umwene ikulonda ukuti abamanyili bake bakindilileghe ukuya naminong’ono amanunu linga bali mubufumusi. (Yoh. 4:35, 36) Pakabalilo aka Yesu ayagha nabafundiwa bake, biyipagha fiyo pambombo iyakufumusya. (Luka 10:1, 5-11, 17) Bo Yesu afwile, abafundiwa bake bawile amaka pambombo iyakufumusya. (Yoh. 16:32) Bo asyukile, Yesu abakasisye ukuti bakindilileghe ukufumusya. Kangi bo Yesu abukile kumwanya, abene baliyipile ukufumusya yonongwa yake abalughu babo balyandile ukwilumbusya ukuti: “Keta lilino mwiswisye akaya kosa ka Yerusalemu nulumanyisyo lwinu.”—Imbo. 5:28.

2. Ngimba Yehova asayile bulebule imbombo iyakufumusya?

² Yesu abalongosyagha Abakristu ba nkabalilo kakunyuma linga bikufumusya kangi Yehova abatulile. Yonongwa yake abandu bingi bapilikisyagha isi babafumukisyilagha. Mwakifwanikisyo, pa Pentekositi 33 C.E., abandu abakufwana 3,000 balyosiwe. (Imbo. 2:41) Kangi inambala ya bafundiwa yakindilile ukubala. (Imbo. 6:7) Loli Yesu ayobile ngani ukuti imbombo iyakufumusya yisakuya nywamu fiyo m’masiku aghabumalikisyo.—Yoh. 14:12; Imbo. 1:8.

3-4. Nongwa yafiki bamo bikuketa ukuti imbombo iyakufumusya yakutamya fiyo kangi tukuya pakumanyila isyafiki mu nkhani iyi?

³ Twesa tukughelaghela ukuya naminong’ono amanunu linga tuli mubufumusi. Mfisu fimo kupepe ukubomba isi. Nongwa yafiki? Panongwa yakuti bingi bikuhoboka ukumanyila Ibaibolo kangi bamo mwa aba bikughulila ukuti Unketi aghiwe ukuti  ande ukumanyila nabo. Loli ku fighaba ifingi, abafumusi bikuketa ukuti imbombo iyakufumusya yakutamya fiyo; abandu batikwaghiwa kabilikabili pakaya kangi linga babaghile bamo pakaya batikuhoboka ukumanyila Ibaibolo.

⁴ Linga mukwikala kuno imbombo iyakufumusya yikutamya fiyo, amasakisyo agha mu nkhani iyi ghikuya pakubatula. Tukuya pakuketa isi bamo babombile ukuti bayobesanieghe na bandu bingi linga bali mubufumusi. Kangi tukuya pakumanyila inongwa iyi tukulondiwa ukukindilila ukuya naminong’ono amanunu kali abandu bikupilika isi tukubafumukisya pamo hayi.

5. Ngimba ndamyo siliku isi Abaketi bingi bikwaghana nasyo?

⁵ Abaketi bingi bikuketa ukuti kukuya kukafu fiyo ukuyobesania na bandu pakaya kabo. Abafumusi bingi bikwikala nkighaba iki kili ninyumba isi sifighililiwe fiyo kangi sili na mageti. Lumo inyumba isi sikuya nabalindilili aba batikwitikisya abandu ukuti bingile kisita kubuliwa numwenenyumba. Abafumusi abangi bikubuka ukwakufumusya ku nyumba ni nyumba loli batikubagha abandu bingi pakaya. Loli abafumusi abangi bikukindilila ukufumusya ku malo agha kukwaghiwa abandu banandi. Abafumusi babaghile ukwenda ubulendo ubutali ukuti bamwaghe umundu yumo uyu lumo atikwaghiwa pakaya. Linga tukwaghana ni ndamyo bo isi, tungawagha amaka. Ngimba tubaghile ukulimbana bulebule ni ndamyo bo isi ukuti tuhobokeghe nubufumusi?

6. Ngimba abafumusi bafwene bulebule na balobi?

⁶ Yesu afwanikisye imbombo iyakufumusya ni mbombo ya ndobi. (Mar. 1:17) Abalobi bamo babaghile ukubuka ukwakuloba iniswi loli bakabaghila ukukola nayimo. Loli batikuwa amaka, bikuchenja muno bikulobela. Bikuchenja akabalilo, amalo pamo injila iyakulobela. Mwakufwana itolo, nanuswe tubaghile ukuchenja muno tukufumukisya. Inong’onela amasakisyo agha.

7. Ngimba fyakukongapo filiku ifi fikuyapo linga tukufumusya akabalilo akakukindanakindana?

⁷ Mugheleghe ukubafikila abandu pakabalilo akakukindanakindana. Tukuya pakubagha abandu bingi linga tukufumusya akabalilo aka abene bikwaghiwa pakaya. Nalinga ukuti utubalilo twingi abandu batikwaghiwa pakaya loli tusimenye ukuti linga akabalilo kakindilepo panandi bikughomokela ntwaya twabo. Abakamu na balumbu bingi bikuketa ukuti kununu ukufumusya pamusi pamo namayolo panongwa yakuti bikubagha abandu bingi pakaya. Mwakongelelapo, abenenyumba bikuya babuke ukuyobesania nabo pakabalilo bo aka. Lumo mubaghile ukuketa ukuti kwakutula ukukonga amasakisyo aghakufumu ku nkulumba wakipanga David. Bo bafumwisye kwa kabalilo akanandi nkighaba, umwene numwinake baghomokile kangi ku nyumba isi bakabaghileko abandu. Kangi atile, “Naswighile fiyo ukubagha abenenyumba bingi pakaya kabo bo tughomokileko akabubili.” *

8. Ngimba tubaghile ukukonda bulebule ubulongosi ubu buli pa Undumbilili 11:6 linga tuli mubufumusi?

⁸ Tutikulondiwa ukuwa amaka. Umutu wa nkhani yitu ghukutukumbusya isya kayilo aka tukulondiwa ukuya nako. (Belenga Undumbilili 11:6.) David, uyu tunjobile pabwandilo, akawile amaka. Umwene alyendile amabulendo mingi ukuti amwaghe umwenenyumba pakaya. Umwenenyumba uyu alondagha ukumanyila Ibaibolo. Umwene atile, “Nikele kuno kwa fyinja 8 loli akayapo Unketi wa Yehova uyu alisile pakaya kangu.” David atile, “Nsyaghenie  ukuti linga tubaghile abandu pakaya, utubalilo twingi bikupilikisya isi tukubafumukisya.”

9. Ngimba Abaketi bamo bikubomba bulebule ukuti bayobesanieghe na bandu aba kukafu ukwaghana nabo?

⁹ Mugheleghe ukufumusya amalo aghakukindanakindana. Ukuti bafwanisye ukuyobesania na bandu aba kukafu ukubagha pakaya, abafumusi bamo bikuchenja amalo agha bikufumusyako. Mwakifwanikisyo, ukufumusya mu nsebo na pa mashelefu yo njila inunu fiyo iyakwaghana na bandu aba bikwikala inyumba inywamu kuno ukufumusya ku nyumba ni nyumba kukaya kwakwitikisiwa. Isi sikubatula Abaketi ukuti bayobesanie maso na maso na bandu aba batikwaghana nabo. Kangi abafumusi bingi baketile ukuti abandu bikuhoboka ukuyobesania nabo pamo ukwambilila amabuku linga bali ku mapaki, ku musika na ku malo agha bizinesi. Floiran, uwakwendela idela ku Bolivia, atile: “Tukubuka ku malo agha bizinesi 1:00 na 3:00 namayolo akabalilo aka abulisi batikuya bize fiyo. Utubalilo twingi tukuyobesania nabo kanunu kangi tukwanda ukumanyila nabo Ibaibolo.”

10. Ngimba njila siliku isi tubaghile ukubombela ukuti tubaghe abandu?

¹⁰ Mugheleghe injila isingi. Lumo mughelile mwakwandisania ukuti muyobesanie nu mundu yumo. Mumwendile akabalilo akakukindanakindana loli mutikumwagha pakaya. Ngimba silipo injila isingi isi mubaghile ukubomba ukuti mwaghane nu mundu uyu? Katarína atile, “Ngubalembela abakalata abandu aba ngabagha pakaya nukulingania isi nayagha pakuyobesania nabo maso na maso.” Ngimba tukumanyilapo isyafiki? Mughelegheleghe ukumwagha umundu yumo nkighaba kinu mwakubombela injila iyingi linga muli mubufumusi.

11. Nongwa yafiki abandu bamo batikulonda ukupilika isi tukufumusya?

¹¹ Abandu bamo batikulonda ukupilikisya isi tukufumusya. Batikumanya ukuti bikulondiwa ukummanya Kyala pamo Ibaibolo. Batikunsubila Kyala panongwa yakuti bikuketa ukuti nkisu indamyo nyingi. Bikukana ukusubila Ibaibolo panongwa yakuti bikuketa ubutungulu bwa bakulumba ba matchalichi aba bikuyoba ukuti bikulisubila ibuku ili. Abene bikwiyaya isyakufwana ni mbombo syabo, imbumba pamo indamyo isi bikwaghana nasyo utubalilo tosa. Kangi bikutoliwa ukuketa muno Ibaibolo libaghile ukubatulila. Ngimba tubaghile ukubomba bulebule ukuti tukindilile ukuya balusekelo linga abandu bikuketa ukuti amasyu agha tukubafumukisya ghakaya ni mbombo?

12. Ngimba amasyu gha pa Bafilipi 2:4 ghabaghile ukututula bulebule mubufumusi?

¹² Munangisyeghe ukuti mukubinong’onela. Bingi aba kunyuma bakanagha ukupilikisya isi tukufumusya, bikwanda ukupilikisya linga baketile ukuti umfumusi ikubinong’onela. (Belenga Bafilipi 2:4.) Mwakifwanikisyo, David, uyu tunjobile pabwandilo, atile, “Linga yumo ayobile ukuti atikulonda ukupilikisya, tutikunnangisya Ibaibolo pamo amabuku ghitu nu kuyoba ukuti: ‘Mbaghile ukuhoboka ukumanya inongwa iyi utikulonda.’” Abandu bikumanya linga yumo ikubinong’onela. Babaghile ukwibwa naloli isi bayobile loli bikuya pakukumbuka muno babatulile ukuti bipilikeghe kanunu. Nalinga abenenyumba batikulonda ukuti tuyobesanieghe nabo tubaghile ukubanangisya akayilo kitu nu kuya babumanyani.

13. Ngimba tukulondiwa ukubomba isyafiki ukuti isi tukufumusya sinhobosyeghe umwenenyumba aliwesa?

¹³ Tukunangisya ukuti tukumwinong’onela umwenenyumba linga tukunangisya ukuti isi tukuyoba sikumfika pandumbula. Mwakifwanikisyo, ngimba tukuketa ubuketi ubu bukunangisya ukuti umwenenyumba ali na bana? Abapapi babaghile ukulonda ukupilikisya ubulongosi bwa mu Baibolo ubwa muno babaghile ukubalelela abanabo pamo ubu bubaghile ukutula ukuti imbumba yiye ya lusekelo. Ngimba utubalilo twingi tukuketa abaloko pa fifigho fyabo? Tubaghile ukusala ukuyobesania ifya bugabenga nubogha ubu abandu bali nabo nkisu iki. Isi sibaghile ukumpangisya umwenenyumba ukuketa ukuti ubumalilo bwa bungabenga buli pipi. Muli mosa muno ifindu fiyilile, mubatuleghe abandu aba bikulonda ukupilikisya muno ubulongosi bwa mu Baibolo bubaghile ukubatulila. Katarína, uyu tunjobile pabwandilo atile, “Ngukumbuka muno ubwanaloli bwalindulile ukuchenja pa bumi bwangu.” Ifyakukongapo fyake, Katarína ikusubila isi ikumanyisya  kangi abandu aba ikuyobesania nabo batikukayikila.

14. Ngimba ilemba lya Isya Mbupingamu 27:17, libaghile ukututula bulebule linga tuli numwinitu mubufumusi?

¹⁴ Musumeghe ubutuli ku bangi. Nkabalilo kakunyuma, Pauli afumusyagha nu kumanyisya pampene na Timoti kangi ankasyagha ukuti yope abatuleghe abangi. (1 Kor. 4:17) Mwakufwana itolo na Timoti, nanuswe tubaghile ukumanyila ku aba bali namaluso nkipanga kitu. (Belenga Isya Mbupingamu 27:17.) Inong’onela ikifwanikisyo kya nkamu Shawn. Kwa kabalilo akanandi, abombagha ubupayiniya nkaya aka abandu bingi bahobokagha nitchalichi lyabo. Ngimba akindilile bulebule ukuya walusekelo? Umwene atile, “Utubalilo twingi, nabukagha numwinangu mubufumusi. Twayagha nakabalilo akakufumusya ku nyumba ni nyumba ukuti tutulane ukukusya amaluso aghakumanyisya. Mwakifwanikisyo, twayobesaniagha isi umwenenyumba ayobile namuno twamulilagha. Ukufuma apo, twayobesaniagha muno tubaghile ukwamulila mwakukindana linga twaghene kangi nikyakubombiwa bo iki.”

15. Nongwa yafiki ulwiputo lwakulondiwa linga tuli mubufumusi?

¹⁵ Musumeghe ubutuli kwa Yehova. Munsubileghe Yehova ukuti abalongosyeghe akabalilo kosa linga muli mubufumusi. Kisita butuli bwa mbepo wake mwikemo, akayapo nayumo uyu abaghile ukufwanisya ukubomba ikindu kimo. (Sal. 127:1; Luka 11:13) Linga musumile ubutuli kwa Yehova ndwiputo, mubombengepo simo. Mwakifwanikisyo, munsumeghe ukuti abalongosye ku mundu uyu ikulonda ukumanyila isyakufwana numwene kangi ikulonda ukupilikisya. Ukufuma apo, mubombeghe mwakukolelana na isi musumile ndwiputo mwakufumusya ku mundu aliwesa uyu mwaghene nawe.

16. Nongwa yafiki ukumanyila kwa patwibene kwakulondiwa fiyo pabufumusi bwitu?

¹⁶ Muyeghe na kabalilo akakumanyila pamwibene. Amasyu gha Kyala ghikuti: “Mwanduliweghe itolo nubupya bwa nyinong’ono syinu; ukuti musimanyeghe isi ighanile Kyala, inunu, ingyeliwa, nimbelelesye.” (Rom. 12:2) Linga tuli nulusubilo losa ukuti tubumenye ubwanaloli ubwakuyoba isya Kyala, bope abandu bikuya pakusubila linga tukuyobesania nabo isyakufwana numwene. Katarína, uyu tunjobile pabwandilo, atile: “Bo akabalilo kakindilepo, nasyaghenie ukuti ngulondiwa ukukasya ulwitiko lwangu nifimanyisyo fya mu Baibolo. Yonongwa yake nalyandile ukwiyipa ukumanyila ukuti nsimikisye naloli ukuti Umpeli aliko, ukuti Ibaibolo Masyu gha Kyala kangi ukuti Kyala ali nigulu ili likwimila umwene amasiku agha.” Katarína atile ukumanyila kwa pamwene kuntulile ukukasya ulwitiko lwake nu kukindilila ukuya walusekelo mubufumusi.

17. Nongwa yafiki Yesu akindilile ukuya naminong’ono amanunu pabufumusi bwake?

¹⁷ Yesu akindilile ukuya naminong’ono amanunu nu kufumusya nalinga ukuti bamo bakapilikisyagha isi afumusyagha. Nongwa yafiki? Asimenye ukuti abandu balondagha ukumanya ubwanaloli kangi alondagha ukubapa ulusako ulwakuti bitikisye amasyu gha Bunyafyale. Kangi asimenye ukuti bamo aba pakwanda bakanagha ukupilikisya, linga akabalilo kakindilepo bisakupilikisya. Inong’onela isi Yesu alyaghene nasyo ku ba mumbumba yake. Kwa fyinja fitatu na hafu ifi abombile ubufumusi bwake, akalipo nayumo unnung’una wake uyu ali mfundiwa wake. (Yoh. 7:5) Loli bo Yesu asyukile, balisile ukuya Bakristu.—Imbo. 1:14.

18. Nongwa yafiki tukukindilila ukufumusya?

¹⁸ Tukamanya uyu ikuya pakwitika ubwanaloli bwa mu Baibolo ubu tukumanyisya. Abandu  bamo bikwegha akabalilo akatali ukukinda abangi ukuti bamanyile ubwanaloli. Abandu aba bikukana ukupilikisya bope babaghile ukwanda “ukumpala Kyala,” linga baketile akayilo kitu akanunu kangi linga tukubinong’onela.—1 Pet. 2:12.

19. Ngimba pa 1 Bakorinti 3:6, 7, pikutumanyisya isyafiki pa nkhani ya bufumusi bwitu?

¹⁹ Linga tukubyala nu konelela, tukumanya ukuti Kyala ikukusya. (Belenga 1 Bakorinti 3:6, 7.) Getahun, unkamu uyu ikubomba ububombeli ku Ethiopia, atile: “Kwa fyinja ifyakufwana 20, naliko nimwene ne Nketi ku kighaba iki ngwikala. Loli lino baliko abafumusi 14. Abafumusi 13 bosiwe, ukongelelapo unkasi wangu na banangu batatu. Pa aveleji abandu 32 bikwisa kungomano.” Getahun walusekelo fiyo panongwa yakuti ikukindilila ukufumusya bo ikughulila mbololo ukuti Yehova abakwabe abandu abandumbula inunu ukuti bise mu gulu lyake.—Yoh. 6:44.

20. Ngimba mo mu njila yiliku iyi tufwene itolo ni gulu ili likubapoka abandu?

²⁰ Yehova ikubaketa abandu bosa ukuya bakulondiwa. Atupele ulusako ulwakubomba pampene nu Mwanake ukuti tubabunganieghe abandu aba mfyikolo syosa bo ubumalikisyo bukali ukufika. (Haga. 2:7) Imbombo yitu iyakufumusya yifwene itolo nimbombo iyakubapoka abandu. Kangi tufwene itolo ni gulu lya bandu aba batumiwe pakubapoka abandu aba basiliwe mu mugodi. Nalinga abandu banandi itolo pa gulu ili babaghile ukumwagha umundu yumoywene, loli imbombo iyi bosa babombile yakulondiwa fiyo. Mo muno yiyilile nimbombo iyi tukubomba iyakufumusya. Tukabaghila ukumanya ubwingi bwa bandu aba bisakupona nkisu kya Setano iki. Loli Yehova abaghile ukumbombela aliwesa ukuti abatule. Andreas uyu ikwikala ku Bolivia atile, “Nguketa ukuti umundu aliwesa ikumanyila ubwanaloli bwa mu Baibolo nu kosiwa panongwa yabutuli bwa bandu bingi.” Isagha na nuswe tukindilileghe ukuya na minong’ono aghakufwana itolo pabufumusi bwitu. Linga tukubomba isi, Yehova ikuya pakutusaya kangi imbombo yitu iyakufumusya yikuya pakutupa ulusekelo.