1. Kiko Hesus tabata ke pa su disipelnan tin, i kiko nan a hasi? (Wak e plachi riba portada.)

DURANTE henter Hesus su sirbishi el a keda positivo, i e tabata ke pa su disipelnan hasi meskos. (Huan 4:35, 36) Miéntras e tabata ku nan, nan tabata prediká ku entusiasmo. (Luk. 10:1, 5-11, 17) Pero despues di su aresto i morto, pa un tempu nan a pèrdè smak di prediká. (Huan 16:32) Despues di su resurekshon, el a animá nan pa enfoká riba e trabou di prediká. Komo resultado, despues ku el a bai bèk shelu, su disipelnan a prediká ku asina tantu entusiasmo ku nan enemigunan a keha: “Boso a yena Herúsalèm ku boso doktrinanan.”—Echo. 5:28.

2. Kon nos por sa ku Yehova a bendishoná e trabou di prediká?

² Hesus a dirigí e trabou di prediká di e kristiannan di promé siglo i Yehova a bendishoná nan ku kresementu. Por ehèmpel, na Pentekòste di aña 33, mas o ménos 3.000 hende a batisá. (Echo. 2:41) Anto e kantidat di disipelnan a sigui oumentá masha hopi mes. (Echo. 6:7) Pero, Hesus a bisa ku den e último dianan e kantidat di hende ku lo aseptá e bon notisia lo oumentá asta mas ainda.—Huan 14:12; Echo. 1:8.

3-4. Dikon e trabou di prediká ta difísil na algun pais, i kiko nos lo mira den e artíkulo akí?

³ Nos tur tin ku hasi esfuerso pa keda positivo den sirbishi. Na algun pais esei ta masha fásil. Tin asina hopi  hende ku ke studia ku algun di nan tin ku bai riba un lista di espera, wardando un ruman pa por studia nan. Pero, no ta na tur pais e ta asina fásil. Dikon? Pasobra masha poko hende sa ta na kas, anto si topa un hende mes, chèns ta grandi ku e no ta ni interesá.

⁴ Si den bo teritorio e trabou di prediká ta difísil, e ora ei e sugerensianan den e artíkulo akí lo yuda bo. Nos lo mira kiko algun ruman a hasi pa papia ku mas hende den sirbishi, anto nos lo mira kon nos por keda positivo sea ku hende ta interesá òf nò.

5. Ki difikultat hopi ruman ta haña nan kuné?

⁵ Hopi ruman ta haña ku ta birando mas i mas difísil pa haña hende na kas. Algun di e rumannan ei ta biba den teritorio ku tin hopi kompleho di apartamento òf barionan kaminda tin muraya haltu òf bewaker ku no ta laga hende drenta sin pèrmit di un di e residentenan. Den otro teritorio e rumannan por kana di kas pa kas sin niun problema, pero nan no ta haña niun hende na kas. Anto tin otro ruman ta prediká den teritorio isolá kaminda tin poko hende ta biba. Por ta nan tin ku biaha distansianan leu pa yega na un kas, anto kisas e persona ni t’ei! Si bo ta prediká den un teritorio asina, no desanimá. Laga nos wak kiko nos por hasi pa trata ku e difikultatnan ei i logra papia ku mas hende.

6. Ki similaridat tin entre e trabou di prediká ku esun di un piskadó?

⁶ Hesus a kompará e trabou di prediká ku e trabou di un piskadó. (Mar. 1:17) Algun piskadó por pasa dianan sin kue niun piská. Pero, nan no ta entregá; nan ta adaptá. Nan ta kambia nan orario, lugá òf método di piska. Nos tambe por hasi e tipo di kambionan asina den nos sirbishi. Laga nos wak algun sugerensia.

7. Kiko por pasa ora nos prediká na un otro ora?

⁷ Prediká na un otro ora. Nos lo por papia ku mas hende si nos purba di prediká ora e chèns ta mas grandi ku nan ta na kas. Pasó kon ku bai bini tur hende tin ku bai kas. Tin ruman ta prediká atardi òf anochi pasobra nan ta haña mas tantu hende na kas. Ademas, durante e oranan ei, hende ta mas trankil i tin mas gana di papia. Òf kisas bo por purba e sugerensia di un ansiano ku yama David. El a bisa ku despues di prediká pa mas o ménos un ora, e ku e ruman ku el a traha kuné tabata bai bèk na e kasnan unda hende no a sali. El a sigui bisa: “M’a keda sorprendí di mira kuantu hende ta sali ora nos yama pa di dos biaha.” *

8. Kon nos por apliká Eklesiástes 11:6 den nos sirbishi?

⁸ Nos tin ku sigui hasi esfuerso pa haña hende na kas. Nos teksto sentral ta kòrda nos ki aktitut nos mester tin. (Lesa Eklesiástes 11:6.) David, menshoná anteriormente, no a entregá. El a yama na un kas pa vários biaha promé ku el a haña un hende. E persona tabata interesá pa papia tokante Beibel i a bisa: “Mi tin ocho aña ta biba akinan i ta promé biaha mi ta papia ku un Testigu di  Yehova na mi kas.” David a bisa: “M’a ripará ku ora ku finalmente bo haña un hende na kas, hopi di nan ta dispuesto pa skucha.”

9. Kiko algun ruman a hasi pa haña hende ku ta difísil pa haña na kas?

⁹ Prediká na diferente lugá. Pa purba di haña hende ku ta difísil pa haña na kas, algun ruman ta hasi esfuerso pa prediká na diferente lugá. Por ehèmpel, e métodonan di prediká den kaya òf ku stènt di literatura a yuda ku nan a haña hende ku kisas ta biba den kompleho grandi di apartamento ku nan no tin mag di prediká den dje. Ta asina ei so nan por papia kara kara ku hende ku ta biba den e lugánan ei. Tambe, hopi ruman a ripará ku hende tin mas gana di papia òf tuma literatura ora nan ta den un parke públiko, plasa òf kaminda tin negoshi. Floiran, un superintendente di sirkuito na Bolivia, a bisa: “Nos ta bai plasa òf na e negoshinan entre un or i tres or di atardi ora e bendedónan ta ménos okupá. Generalmente nos ta kòmbersá dushi i te asta nos a kuminsá ku estudionan di Beibel.”

10. Ki método bo por usa pa prediká na hende?

¹⁰ Kambia bo método di prediká. Imaginá ku bes tras bes bo a purba di haña un persona na kas. Bo a bai na diferente ora, pero nada. Tin algu mas ku bo por hasi? Katarína a bisa: “Mi ta manda un karta i den dje mi ta skirbi loke mi kier a kompartí kuné.” Pues, kambia bo método di prediká pa asina di un manera òf  otro bo logra prediká na tur hende den bo teritorio.

11. Dikon algun hende no ta interesá den nos mensahe?

¹¹ Algun hende no ta interesá den nos mensahe. Nan no ta mira dikon nan mester sa tokante Dios i Beibel. Debí na tur e sufrimentu ku nan ta mira, nan no ta kere ku Dios ta eksistí. Nan no ta interesá den Beibel pasobra nan ta mira e hipokresia di e lidernan religioso ku ta pretendé di obedesé Beibel. Otronan tin nan kabes yen ku trabou, famia òf nan mes problemanan anto nan no ta kere ku Beibel por yuda nan. Kon nos por keda positivo ora hende ku nos ta prediká na dje no ta mira e importansia di nos mensahe?

12. Kon e palabranan na Filipensenan 2:4 por yuda nos den sirbishi?

¹² Mustra interes. Hopi hende ku na promé instante no tabata interesá den e bèrdat, ku tempu a skucha unabes ku nan a ripará ku realmente nos ta interesá den nan. (Lesa Filipensenan 2:4.) Por ehèmpel, David, menshoná anteriormente, a bisa: “Si un hende bisa ku e no ta interesá den religion ni den Beibel, nos ta hinka nos Beibel i literatura bèk den nos tas i puntr’é: ‘Semper bo tabata pensa asina?’” Mesora hende lo ripará si realmente bo ta interesá den nan. Nan por lubidá kiko bo a bisa, pero nan lo no lubidá kon bo a reakshoná. Asta si e hende no duna bo un chèns di papia, na bo reakshon i ekspreshon di kara lo bo demostrá ku bo ta interesá den dje.

13. Kon nos por hasi nos mensahe mas interesante pa e doño di kas?

¹³ Nos ta mustra interes den e doño di kas, ora nos inkluí algu ku ta interes’é den nos mensahe. Por ehèmpel, tin algu ku bo ta mira na e kas ku ta indiká ku tin mucha? Si ta asina, kisas e mayornan lo ta interesá den loke Beibel tin di bisa tokante kon pa lanta yu òf tokante un bida di famia felis. Bo ta mira algu ku ta indiká ku e doño di kas ta preokupá ku siguridat? Si ta asina, kisas bo por papia tokante kriminalidat i kon hopi hende ta biba ku miedu. Sea kual sea e kaso, ora un hende ta dispuesto pa skucha, mustr’é ku Beibel por yud’é. Katarína, menshoná anteriormente, a bisa: “Mi sa kon Beibel a yuda mi.” Debí na esei, ora e ta papia ku hende tokante Beibel, nan por  ègt mira ku e ta kere den loke e ta papia di dje.

14. Segun Proverbionan 27:17, kon rumannan ku ta traha huntu den sirbishi por yuda otro?

¹⁴ Yudansa di otro ruman. Apòstel Pablo a siña Timoteo kon pa siña hende i kon pa prediká. Anto el a anim’é tambe pa kompartí e métodonan ei ku otro ruman. (1 Kor. 4:17) Meskos ku Timoteo, nos tambe por siña for di otro ruman eksperensiá den nos kongregashon. (Lesa Proverbionan 27:17.) Wak loke un ruman ku yama Shawn ta hasi. Pa un tempu, el a traha pionero den teritorio isolá kaminda mayoria di hende tabata sinti nan bon ku nan religion. Kon el a logra keda positivo? El a bisa: “Mi ta purba pa no traha den sirbishi mi so. Ami ku e ruman ku mi ta traha kuné ta usa e tempu ku nos ta bai di un kas pa otro pa yuda otro mehorá su manera di siña. Por ehèmpel, nos ta puntra otro kon e kòmbersashon a bai. Djei, nos ta purba di wak kiko otro nos por bisa si un situashon similar presentá atrobe.”

15. Dikon orashon ta asina importante pa nos sirbishi?

¹⁵ Pidi Yehova yudansa. Nos tin ku hasi esei tur biaha ku nos bai den sirbishi. Sin su spiritu santu, nos niun lo no por logra nada. (Sal. 127:1; Luk. 11:13) Pero, sea spesífiko ora nos pidié yudansa. Por ehèmpel, pidi Yehova pa yuda bo haña un hende ku ta dispuesto pa siña tokante dje i ku ta kla pa skucha. Djei, hasi esfuerso pa prediká na tur hende ku bo topa.

16. Dikon estudio personal ta importante pa nos sirbishi?

¹⁶ Hasi estudio personal. Beibel ta bisa: “Komprobá pa boso mes kiko ta e boluntat di Dios, ku ta bon, agradabel i perfekto.” (Rom. 12:2) Mas konvensí nos ta ku nos tin e bèrdat, mas sigur nos lo ta ora nos ta papia di dje. Katarína, menshoná anteriormente a bisa: “Algun tempu pasá mi a ripará ku mi mester a pasa den algun di e siñansanan básiko ku tin den Beibel pa fortalesé mi fe den nan. Pues, mi a hasi estudio personal profundo pa konvensé mi mes atrobe ku Yehova ta e Kreador, ku Beibel ta su Palabra i ku e tin un organisashon aki riba tera ku ta represent’é.” Pues, estudio personal a yuda Katarína fortalesé su fe i bira mas positivo den su sirbishi.

17. Dikon Hesus a keda positivo den su sirbishi?

¹⁷ Aunke algun hende no tabata interesá den Hesus su mensahe, tòg el a keda positivo i a sigui prediká. Dikon? Pasobra e tabata sa kon importante tabata pa hende haña e bèrdat, anto e kier a yuda mas tantu hende posibel. E tabata sa tambe ku algun di esnan ku na promé instante no tabata interesá, ku tempu lo a skucha. Esei a pasa ku su mes famia. Durante e tres aña i mei ku Hesus a prediká, niun di su rumannan a bira su disipel. (Huan 7:5) Ta te despues di su resurekshon nan a bira kristian.—Echo. 1:14.

18. Dikon nos ta sigui prediká?

¹⁸ Nos no sa ken tur lo sirbi Yehova den futuro. Tin hende ta tuma mas tempu pa siña e bèrdat ku otronan. Asta esnan ku ta bisa nos ku nan no interesá kisas un dia por kuminsá sirbi Yehova debí  na nos bon kondukta i aktitut positivo.—1 Ped. 2:12.

19. Kiko 1 Korintionan 3:6 i 7 ta siña nos tokante nos sirbishi?

¹⁹ Segun ku nos ta planta i muha, nos ta keda kòrda ku ta Dios ta esun ku ta hasi krese. (Lesa 1 Korintionan 3:6, 7.) Getahun, un ruman ku ta sirbi na Etiopia, a bisa: “Pa mas ku 20 aña, mi so tabata Testigu kaminda mi tabata biba. Pero, awor tin 14 publikadó; diestres di nan ta batisá, inkluso mi esposa i nos tres yunan. Na tur reunion tin mas o ménos 32 persona.” Getahun ta masha kontentu ku el a sigui prediká wardando ku pasenshi te ora Yehova a hala serka djE esnan ku di bèrdat kier a sirbiÉ.—Huan 6:44.

20. Den ki sentido nos ta manera un tim di reskate?

²⁰ Pa Yehova, bida di tur hende ta presioso. El a duna nos e privilegio di traha huntu ku su Yu yudando hende di tur nashon haña e bèrdat promé ku e fin yega. (Ageo 2:7) Nos por kompará nos trabou di prediká ku e trabou di reskate. Nos tur ta forma parti di un tim ku mester reskatá hende for di un boto ku ta senk. Aunke kisas ta djis un par di hende so nos ta haña bibu, e trabou ku kada un di nos ta hasi ta masha importante. Meskos ta konta pa e trabou ku nos ta hasi den sirbishi. Nos no sa kuantu hende nos lo reskatá for di Satanas su mundu. Pero, Yehova por usa kada un di nos pa yuda nan. Andreas, ku ta biba na Bolivia, a bisa: “Mi sa ku ora un hende haña e bèrdat i batisá, ta pasobra hopi ruman a traha huntu pa yud’é.” Laga nos keda positivo den nos sirbishi. Si nos hasi esei, Yehova lo bendishoná nos i nos sirbishi lo ta un fuente di goso pa nos.