1. Ngera el kerebai a lekiltmeklii a Jesus el kirir a rultirakl er ngii, e te milekerang a rultirakl er ngii? (Momes er a siasing er a medal tia el babier.)

A JESUS a millemolem el oba ungil uldasu er a loruul er a omesiungel er tia el chutem, e soal a osisiu el tekoi el kirir a rultirakl er ngii. (Jn. 4:35, 36) A redisaiplo er ngii a kmal uleba blakerreng el omerk er a lengar tia el chutem. (Lk. 10:1, 5-11, 17) Me nguaisei engdi sera lemekelebus e lokodir, e a redisaiplo er ngii a mlo mechitechut a rengrir e mlo diak el omerk er a klumech el telkib el taem. (Jn. 16:32) Me a Jesus er a lemokiis e ngmillisiich er tir el mo blak a rengrir el omerk. Te kmal mlo blak a rengrir el omerk er a uriul er a lebora eanged a Jesus me a recherrouir a dilu el kmo: “Ka mues a ikal bla mruul! Kom mla merk osisechekliu er a Jerusalem el rokir.”​—Rel. 5:28.

2. Ngmekera Jehovah e mla omekngeltengat er a ureor er a berkel a klumech?

² A Jesus a ulemekrael er a urerir a Rekristiano er a irechar me a Jehovah ulemekngeltengat er tir. El ua tiang, te bekord el 3,000 el chad a miltecholb er a Pentekost 33 C.E. (Rel. 2:41) E a ildisir a redisaiplo a di milleketek. (Rel. 6:7) Me nguaisei, engdi a Jesus ulemlaoch el kmo te lmuut el betok a mo kongei er a ungil chais er a taem er a uriul sils.​—Jn. 14:12; Rel. 1:8.

3-4. Ngera uchul me ngmeringel er a rebebil el omerk er a klumech, e ngera kede mo mesaod er tia el suobel?

³ Kede rokui el melasem el mo oba ungil uldasu el kirel a omesiunged. Ngar er a bebil er a beluu e ngbeot a doruul el uaisei. E ngera uchul? E le te kmal betok a sorir el mesuub a Biblia me a lebebil e ngkirir el mengiil el mo er ngii a chad el sebechel mesuub  el obengterir. Me nguaisei, engdi kuk ngar er a bebil beluu e ngmeringel a ureor er a berkel a klumech e le rechad a diak leblechoel el ngar er a blai me tirke el debetik er tir a diak el semeriar.

⁴ Aike el ngeso er a uldasu el ngar tia el suobel a sebechel ngosukau a lsekum e ke kiei er a basio el meringel a domerk a klumech er ngii. Kede mo mesaod a tekoi el loruul a rebebil me bo lsebechir el metik er a rechad. Kede dirrek el mo mesaod er a uchul me ngsebeched el melemolem el oba ungil uldasu a lorrenges er kid a rechad me a lak.

5. Ngera el omelsemai a lechebangel a rebebil el Sioning?

⁵ A rebetok el Sioning a kmal mla mo meringel er tir a metik er a rechad er a blai. A rebebil a kiei apartment el diak el sebeched el mo soiseb er ngii me a lechub e ngdelengchokl el lou gate. Nglocha ngar ngii a security er ngii el diak lekengei er a remo soiseb a lsekum te diak loba kengei er a ta er tirke el chad el kiei aika el basio. A rekuk bebil a mimokl el oldingel a obliil engdi te di mekesai el chad a ngar er a blai. Me a rebebil a omerk a klumech er a meklou el basio el di mekesai a rechad er ngii engdi ngchacheroid a obliil. Te merael el kemanget el taem el osiik er a rechad engdi lebora obliil e ngdiak a chad er ngii. A lsekum kede mo chelebangel chouaika el omelsemai, e lak lebo el mechitechut a rengud. Ngera sebeched el meruul el mo mesisiich aika el omelsemai e mo bekerredechel a omesiunged?

6. Te mekera rumerk er a klumech e ua rechad er a omenged?

⁶ A Jesus a ulemekesiu er a ureor er a berkel a klumech el mo er omenged. (Mk. 1:17) A rechad er a omenged a locha mo ngar er a chei el betok el klebesei e diak lebetik a ngikel. Me nguaisei, engdi ngdiak el bo lemechitechut a rengrir e lemeterob. Te bai ngodechii a taem, basio, me a rolel a longesokes a ngikel. Kid me ngdirrek el sebeched el meruul omelodech el ngar er a urered er a berkel a klumech. Ka molatk aika el tekoi.

7. Ngera sebechel duubech sel dolasem el oldingel er a rechad er a kakerous el taem?

⁷ Molasem losiik er tir er a kakerous el taem. Ngsebeched el metik er a rechad a lsekum e kede mo oldingel er tir er aike el taem el lengar er a blai. A rokui el chad a ngar ngii a taem el lebo el rei. Me a rebetok el odam me a odos a mla metik el kmo sel ieta sils me a lekebesesengei e a rechad a ngar er a blai. Me a lmuut kung, ngtemir a rechad el olengull me nglocha beot a dongedecheduch er tir. Me a lechub e ngsebechem el melasem er a tekingel a David el ta er a remechuodel. Ngmelekoi el kmo a uriul er a loldingel er a territory el telkib el taem e ngii me a partner er ngii a lmuut el mo melasem aike el blai el dimlak a chad er ngii er a kot. Ngdmu el kmo: “Ngkmal mechas a renguk e le ki metik er a rebetok el chad sel ki mluut el mora ike el obliil.” *

8. Ngmekera sebeched el oltaut er a Olisechakl 11:6, NW sel domerk er a klumech?

⁸ Ngkmal diak el kired el meterob. Tiakid a desuubii er a bades el lemlengai er ngii tia el suobel. (Monguiu er a Olisechakl 11:6, NW. *) A David el dulsaod er ngii er a uchei a dimlak el meterob. Ngmlo sebechel metik er a chad er a blai el lullasem er ngii el betok el taem. Ngika el chad a kmal mle semeriar e dirrek el dilu el kmo, “Ngmla mo bekord el eai el  rak el kiei er tiang, e dirkak a ta el kungedecheduch er a Resioning er a Jehovah.” Me a David a dmu el kmo: “Ak mla metik el kmo sel di molasem e betik er a chad er a blai, e te kmal kongei lorrenges er a klumech el domerk er ngii.”

9. Te mekera rebebil Sioning e mla metik er a rechad el meringel er kid a mengedecheduch er tir er a rekeblirir?

⁹ Molasem a kakerous el basio. A rebebil er a publisher a mla ngodechii a basio el lomerk a klumech er ngii me bo el sebechir el metik er a rechad el diak el sebechir el mengedecheduch er tir er a rekeblirir. El ua tiang, a cart witnessing me a berkel a klumech er a buai a uchul me te sebechir el mengedecheduch er a rechad el kiei apartment el diak el sebeched el mo er ngii sel doldingel a obliil. A re publisher a mla metik el kmo ngbeot a dongedecheduch e dorous a babilenged er a rechad el ngar er a park, makit, me a basio er a siobai. A Floiran el odam el oldingel a ongdibel er a Bolivia a kmo: “Aki mora makit me aike el basio er a siobai er a ngar er a 1:00 p.m. el mo 3:00 p.m. el aike el taem el rechad er a siobai me a makit a diak lsal mechesang. Aki blechoel el mengedecheduch er a rechad e omuchel a omesubel a Biblia.”

10. Ngera dirrek el sebechem el meruul el omerk er a klumech?

¹⁰ Molasem a kakerous el rolel. Okmo ke mla melasem el betok el taem losiik er a chad er a blai. Ke mla oldingel er ngii er a kakerous el taem e dirk ke diak obetik er a chad er a blai. Ngngar er ngii a lmuut el bebil er a rolel e ngsebechem el mengedecheduch er ngii? A Katarína a kmo: “Ak blechoel el meluches a letter el mora ike el blai el dimlak a chad er ngii, louchais er tir aike el tekoi el mle soak el melekoi  okmo ak miltik er tir er a blai.” Ngera kede suubii? Molasem a bek el rolel e ngsebechem el merkii a klumech el mo er tirke el ngar er a territory er kau.

11. Ngera uchul me a rebebil a diak el sorir lorrenges er a klumech el domerk er ngii?

¹¹ A rebebil a diak el sorir lorrenges er a klumech el domerk er ngii. Te kmo ngdiak lousbech er a Dios me a Biblia. Ngdiak loumerang er a Dios le ngkmal klou a ringel er a beluulechad. Ngdiak el sorir a Biblia le te omes er a remengeteklel a klechelid el diak lekiei el otirakl er ngii. A rekuk bebil a di mechesang a urerir, telungalek er tir, me a lechub e ngmondai er a klengar er tir e diak lutebengii el kmo a Biblia a sebechel el ngosuterir. Kede mekera melemolem el dmeu a rengud alta rechad el domerk el mo er tir a diak lesa klungel a ultutelel a klumech el domerk er ngii?

12. Ngmekera Filipi 2:4 e ngosukid sel domerk er a klumech?

¹² Mochotii el kmo ke melatk er tir. A rebetok el uchei e ngdimlak el sorir el orrenges a mlo kongei er a ungil chais e le te mlo mtebengii el kmo, a publisher a kmal millatk el kirir. (Monguiu er a Filipi 2:4.) El ua tiang, a David el dulsaod er ngii er a uchei a kmo, “A lsekum a chad a diak lsoal lorrenges er a klumech el domerk er ngii, e kede ngmai a Biblia me aike el babilenged el mo mechei e oker er ngii el kmo, ‘Ngdi ungil a bo kudengelii a uchul me nguaisei a uldesuem?’” A rechad a sebechir el mtebengii el kmo kede mera el lomekerreu a uldesuir. Te sebechir lobes aike el dullekoi engdi te kmal diak lobes a omerelled el mo er tir. Mo lmuut me a lsekum a chad er a blai a diak lebechikid me dongedecheduch, e ngdirk sebeched lochotii loeak a medad me a blekerdeled el kmo kede melatk er ngii.

13. Ngmekera sebeched el ngmodech a tekinged el mo oltirakl aike el lousbech a chad er a blai?

¹³ Kede ochotii el kmo kede melatk er a chad er a blai sel dolodech a tekinged el mo oltirakl aike el soal me aike el lousbech. El ua tiang, kede mes olechotel a kmo te ngar ngii a rengalek er a blai? Nglocha mo sorir el orrenges aike el lolekoi a Biblia el kirel a domekeroul er a rengalek me a lechub a rolel e ngmo er ngii a deurreng er a telungalek. Kede mes a betok el chesechesel a blai? Nglocha sebeched el mesaod er a dakt el ngar ngii le ngmla mo klou a delengerenger er a beluulechad e a uriul e ngsebeched louchais er ngii er a rolel aika el tekoi a mo mesmechokl. Chelsel a ngii di el blekeradel e molasem el ngosuir a chad el mo mesa el kmo a Biblia kmal sebechel el ngosuir. A Katarína el dulsaod er ngii er a uchei a kmo,  “Ak blechoel el melatk er a rolel e a klemerang a mla rullii a klengar er ngak el lmuut el mo ungil.” Tiakid a uchul me a Katarína a sebechel mengedecheduch el oba ulterekokl el reng e a rechad lorrenges er ngii a dirrek el mtebengii tiang.

14. El ua lolekoi a Osisechakl 27:17, kede mekera mongeseu sel doureor lobengterir a rebebil?

¹⁴ Mngai a klungiolem er a ngelsurir a rebebil. Sera taem er a rekot el Kristiano e a Paulus ulsisecheklii a Timothy el mo omerk e olisechakl e dirrek el dilu er ngii el kmo, bo lolengeseu er a rebebil el mo meruul el uaisei. (1 Ko. 4:17) Me ngsebeched el mo ua Timothy el ngilai a klubelel er a rebebil er a ongdibel. (Monguiu er a Osisechakl 27:17.) Molatk er a kerebil a odam el Shawn. Ngika mle pioneer el telkib el taem er a basio el oumesingd el chad er ngii a kmo, ngmla er ngii a klechelid er tir. Ngmilekera melemolem el oba deurreng? Ngmelekoi el kmo, “A lsekum e ngsebechel e a kuureor el obengterir a rebebil. Aki uluusbech aike el taem er a delongelel a obliil el kaingeseu el menglou a duch er kemam el olisechakl. El ua tiang, aki blechoel el mesaod a tekoi el dilubech er a obliil me a rolel aki bo mongedecheduch er a chad a lsekum aki chobengelii a osisiu el blekeradel.”

15. Ngera uchul me a nglunguuch a kmal klou a ultutelel sel domerk er a klumech?

¹⁵ Moluluuch lolengit a ngeso er a Jehovah. Bora Jehovah el kirel a ulekrael sel momerk er a klumech. A lak a ngelsuil a chedaol reng er ngii e ngdiak el sebeched el kutmokl a ngii di el ngerang. (Psa. 127:1; Lk. 11:13) Me sel molengit a ngeso er a Jehovah e bo bleketakl. El ua tiang, molengit er ngii me lokrolau el mo er tirke el sorir el mo medengelii e sorir el lorrenges. E moureor loltirakl a nglunguchem loeak sel momerk a klumech el mo er tirke el rokui el bo modengelterir.

16. Ngera uchul me ngkired el meruul er a omesubed el di kid el tang a lsoad el mo ungil lomerk er a klumech?

¹⁶ Moruul omesubem el di kau el tang. A Tekingel a Dios a kmo: ‘Bo modengelii a rengul a Dios er a kmo, ng ngera ungil, ma ngera odeuir a rengul, ma ngera kmal cherrungel el ungil.’ (Rom 12:2) Sel bo lungil el ulterekokl a rengud el kmo kede medengelii a klemerang el kirel a Dios, e ngmo ulterekokl a rengud el mengedecheduch er a rebebil. A Katarína el dulsaod er ngii er a uchei a kmo: “A telkib el taem er a uchei e ak mlo mtebengii el kmo ngkirek el smisichii a klaumerang er ngak er aike el uchetemel a osisechakl er a Biblia. Me ak mlo kerekikl el mesuub aike el lochotel a kmo ngngar ngii a Ulemeob, me a Biblia mera el Tekingel a Dios, e ngar ngii a cheldebechelel a Dios lomtechei er ngii er chelecha el taem.” A Katarína a kmo tiakid el omesubel el di ngii el tang a silsichii a klaumerang er ngii e milenglou er a deurreng er ngii el omerk er a klumech.

17. Ngera uchul me a Jesus a millemolem el oba ungil uldasu er a lomerk er a klumech?

¹⁷ A Jesus a millemolem el oba ungil uldasu e omerk er a klumech alta rebebil a dimlak el sorir lorrenges er ngii. E ngera uchul? Ngmle medengei el kmo a rechad a kirir el mo medengelii a klemerang e mle soal mesterir a techall el mo kongei er a klumech el kirel a Renged. Ngdirrek el mle medengei el kmo a rebebil el dimlak el sorir lorrenges a locha mo kongei er a klumech er uriul. Ka molatk er a telungalek er ngii. Ngdimlak a ta er a ruchellel el mo disaiplo er ngii er sel taem er a loruul er omesiungel er tia el chutem el edei me a tedobech el rak. (Jn. 7:5) Me nguaisei, engdi uriul er a lemokiis el mora eanged e te mlo Kristiano.​—Rel. 1:14.

18. Ngera uchul me ngkired el di melemolem el omerk er a klumech?

 ¹⁸ Ngkmal diak dodengei el kmo te rua techang a mo kongei er a klemerang el dolisechakl er ngii. A rebebil a ousbech er a kemanget el taem el mo kongei er a klumech el domerk er ngii. Mo lmuut me tirke el chetirir lorrenges er kid a locha “mo oldanges er a Dios” sel lomes a ungil omerelled me a blekerdeled.​—1 Pe. 2:12.

19. A doltirakl er a 1 Korinth 3:6, 7, e ngera el tekoi a diak el kired lobes er ngii?

¹⁹ Me alta kede melalem e melubs engdi kmal diak el kired lobes er a ngerechelel a Dios. (Monguiu er a 1 Korinth 3:6, 7.) A Getahun el odam el mesiou er a Ethiopia a melekoi el kmo: “Ngmle betok er a 20 el rak el di mle ngak el tang a Sioning er a basio el kiliei er ngii. Me nguaisei, engdi chelechang e aki mla mo 14. A reteruich me a tedei er tir a mla metecholb, e a bechik me a retedei el ngelekek a uldimukl er tir. E bekord el 32 el chad a mei er a bek el blsechel a miting.” Me a Getahun a kmal dmeu a rengul le ngdimlak el meterob lomerk e uleba kllourreng el mengiil er a Jehovah el omekrael er a remedemedemek a rengrir el mora cheldebechel!​—Jn. 6:44.

20. Ngoeak a ngera el rolel e kid a ua rechad er a search and rescue?

²⁰ A Jehovah omes er a rokui el chad el mekreos. Ngmla meskid a techelled el mo oureor lobengkel a Ngelekel el mengudel er a rechad er a rokui el renged er a uchei er a lemei a ulebongel er tia el mekngit el blekeradel. (Hag. 2:7) A urered er a berkel a klumech a sebeched el omekesiu er ngii el mora search and rescue. E kid a ua tirke el chad el urerir a osiik er a remla medakl er a chelsel a basio er omengiis. E alta ngdiak el tirke el rokui losiik a mo metik er a rechad engdi a urerir el rokui a kmal klou a ultutelel. Me ngdi osisiu, sel domerk er a klumech e ngkmal diak dodengei el kmo te tela mo suobel er tia el beluulechad er a Satan. Me nguaisei, engdi Jehovah a sebechel lousbech er kid el mo olengeseu er tir. A Andreas el kiei er a Bolivia a kmo: “Ak medengei el kmo a chad el suubii a klemerang e metecholb a betok a ullengeseu er ngii.” Me bo doba osisiu el uldasu sel domerk er a klumech. Sel doruul el uaisei e a Jehovah a mo omekngeltengat er kid, me a urered er a berkel a klumech a mo meskid a klou el deurreng.