1. Waut fa een Biespel jeef Jesus siene Nofolja, un waut deeden dee dan? (See daut Bilt oppe väaschte Sied.)

JESUS fieed sienen Deenst hia oppe Ieed met Freiden derch un hee wull, daut siene Nofolja dautselwje deeden (Joh. 4:35-36). Aus Jesus met siene Jinja toop wia, hauden dee väl Freid biem prädjen (Luk. 10:1, 5-11, 17). Oba aus Jesus faustjenomen un dootjemoakt wort, veluaren siene Jinja fa een Stootje dise Freid (Joh. 16:32). Un aus hee ieescht vom Doot oppjestonen wia, rod hee siene Jinja too, wada flietich to prädjen. Un nodäm aus Jesus nom Himmel jefoaren wia, wieren siene Nofolja soo sea biem prädjen, daut äare Jäajna mau rajcht säden: “Kjikjt emol, jie haben june Lia äwa gaunz Jerusalem vespreet” (Apj. 5:28).

2. Woo säajend Jehova daut Prädichtwoakj?

² Jesus leid de ieeschte Christen, aus dee prädjen deeden, un Jehova holp an doabie un väle horchten no dee äare Norecht. Biejlikj aune Pinjsten 33 leeten sikj ojjefäa 3 000 deepen (Apj. 2:41). Un de Zol von niee Jinja neem bosich too (Apj. 6:7). Oba Jesus säd verut, daut en de latste Tiet noch väl mea de Woarheit aunnämen wudden (Joh. 14:12; Apj. 1:8).

3-4. Wuarom es daut prädjen fa eenje schwoa, un waut woa wie en disen Artikjel seenen?

³ Wie aula proowen, daut wie onse Freid em Prädichtdeenst hoolen. Opp eenje Städen es daut uk leicht. Wuarom? Wiels et doa soo väl Menschen jeft, waut de Bibel studieren wellen, daut doa nich mol jenuach Zeijen sent, om dee fuaz to halpen. Oba opp aundre Städen es daut prädjen schwanda, wiels de Menschen foaken goanich tus sent un dee, waut doa tus sent, nich werkjlich intressieet sent.

 ⁴ Wan du opp soone Städ wonst, wua daut prädjen schwanda es, dan woat die de Rot von disen Artikjel secha halpen. Wie woaren seenen, waut eenje jedonen haben, om met mea Menschen em Prädichtdeenst to räden. Wie woaren uk seenen, wuarom wie onse Freid hoolen kjennen, endoont aus de Menschen horchen ooda nich.

5. Met waut fa Schwierichkjeiten motten väl Vekjindja foadich woaren?

⁵ Fa väl Vekjindja es daut emma schwanda, daut see met Menschen räden kjennen. Eenje wonen opp soone Städen, wua de Hiesa sea vesechat sent ooda bewoakt woaren, un dee kjennen doa bloos nenn toom prädjen, wan wäa, waut doa wont, an hanjekroacht haft. Aundre Vekjindja kjennen veleicht sondasorj von Hus to Hus prädjen, oba dee trafen nich väl Menschen tus. Noch aundre prädjen opp Städen, waut wiet auf sent, wua oba mau weinich Menschen läwen. Dee foaren veleicht eenen langen Wajch, om met eenen eensjen to räden, un wan see bat doa sent, es dee nich mol tus. Wan wie soone Schwierichkjeiten haben, dan well wie nich oppjäwen. Waut kjenn wie doonen, om met soont foadich to woaren un met mea Menschen to räden?

6. Wuarom es daut Prädichtwoakj biejlikj soo aus feschen?

⁶ Jesus vejlikjt daut Prädichtwoakj met feschen (Mar. 1:17). Eenje Fescha proowen veleicht doagenlank, oba kjrieen doawäajen kjeene Fesch. Dee woaren nich mootloos. Dee paussen sikj aun. Dee proowen daut dan veleicht to eene aundre Tiet, opp eene aundre Städ ooda opp eene aundre Wajch. Biejlikj soo kjenn wie daut en onsen Deenst uk doonen. See wie mol, woo daut schauft.

7. Woo kaun daut utkomen, wan wie to veschiedne Tieden prädjen?

⁷ Proow daut to veschiedne Tieden. Wie woaren met mea Menschen räden kjennen, wan wie to soone Tieden prädjen, wua dee woomäajlich tus sent. Wiels jieda eena mott je irjentwanea mol no Hus! Väl Breeda un Sestren prädjen biejlikj aum Nomeddach ooda aum Zeowes, wiels dan mea Menschen tus sent. To soone Tieden sent de Menschen veleicht loosjelotna un ea reed, no ons to horchen. Ooda veleicht halpt die de Rot von eenen Eltesten, waut David heet. Hee sajcht, daut hee un sien Poatna wada no soone Hiesa gonen, wua kjeena tus wia, wan see ieescht een Stoot jeprädicht haben. Hee sajcht: “Ekj sie werkjlich vewundat, woo väl Menschen dan tus sent, wan wie doa toom tweede Mol hankomen.” *

8. Woo kjenn wie daut em Deenst nokomen, waut et en Liera 11:6 sajcht?

⁸ Wie sellen eefach wieda proowen, de Menschen tus to trafen. Daut es, waut de Teemavarsch ons lieet (läs Liera 11:6). David, von dän wie ea aul räden, jeef nich opp. Bie een Hus, wua hee aul mieremol jewast wia, troff hee dan schlieslich wäm tus. De Maun wull wellich äwa de Schreft räden un dee säd: “Ekj won hia nu aul rom acht Joa un bat nu es noch kjeenmol eent von Jehova siene Zeijen no ons jekomen.” David sajcht: “Ekj hab jeseenen, daut de Menschen foaken no de Norecht horchen  wellen, wan eena dee dan schlieslich tus traft.”

9. Waut haben eenje Vekjindja jedonen, om met mea Menschen to räden?

⁹ Proow daut opp eene aundre Städ. Eenje Vekjindja prädjen nu opp eene aundre Städ, om met soone to räden, waut see jeweenlich nich tus trafen. Daut schauft biejlikj fein, soone oppe Gaussen to prädjen ooda metem Bieekjakrota, waut en groote Hiesa wonen, wua eena jeweenlich nich nenn kaun toom prädjen. Väl Vekjindja haben uk jeseenen, daut see oppem Park, oppem Moakjt ooda en de Jeschafta leichta met de Menschen räden kjennen ooda dee Bieekja jäwen. Floiran, een Kjreisoppsechta en Bolivien, sajcht: “Wie gonen no de Moakjts ooda Jeschafta tweschen Klock eent un Klock dree no Meddach, wan de Vekjeepa mea Tiet haben. Un jeweenlich kjenn wie fein met dee räden un mau rajcht Bibelstudiums aunfangen.”

10. Opp woone Wajch kaust du de Menschen prädjen?

¹⁰ Proow daut opp eene aundre Wajch. Stal die väa, du hast aul mieremol jeprooft, met wäm em Prädichtdeenst to räden. Oba du hast dän nich tus jetroffen, wan du doa uk to veschiedne Tieden wieescht. Jeft et dan noch aundre Mäajlichkjeiten, woo eena met dänjanjen räden kaun? Katarína sajcht: “Ekj schriew Breew aun deejanje, waut ekj nich tus traf, un schriew dee, waut ekj an wudd haben wult sajen.” Waut lia wie doavon? Proow aules, waut du kaust, om met de Menschen en dien Jebiet to räden.

11. Wuarom sent eenje Menschen nich aun de Norecht intressieet?

¹¹ Eenje Menschen sent nich intressieet aun onse Norecht. Dee seenen daut nich fa needich aun, mea äwa Gott ooda äwa de Schreft to lieren. Dee jleewen nich aun Gott, wiels daut soo väl Lieden opp dise Welt jeft. Dee jleewen uk nich aun de Schreft, wiels de Gloowesleidasch väajäwen, no de Schreft to läwen, un daut oba lang nich nokomen. Aundre sent sea besorcht äwa äare Oabeit ooda Famielje ooda haben aundre Trubbels un denkjen nich, daut de Schreft an doamet halpen kaun. Woo kjenn wie dan onse Freid em Deenst hoolen, wan de Menschen nich aun de Norecht intressieet sent?

12. Woo kaun ons daut, waut en Filippa 2:4 steit, em Prädichtdeenst halpen?

¹² Wies, daut du om de aundre bekjemmat best. Väle, waut ea nich no de goode Norecht horchen wullen, haben daut lota oba jedonen, wäajen de Vekjindja opprechtich om dee bekjemmat wia (läs Filippa 2:4). David biejlikj, von dän wie ea aul räden, sajcht: “Wan doa wäa sajcht, daut hee nich intressieet es, dan stopp wie onse Biblen ooda onse Bieekja wada trigj un sajen to dän: ‘Ons wudd mol intressieren, wuarom du soo denkjst.’” De Menschen kjennen daut feelen, wan wie opprechtich om dee bekjemmat sent. Dee woaren veleicht vejäten, waut wie krakjt to dee jesajcht haben, oba dee woaren secha em Denkj hoolen, woo wie dee behaundelt haben. Veleicht wellen dee met ons goanich räden, oba dee woaren aun ons Jesecht un aun ons Vehoolen seenen, daut wie om dee bekjemmat sent.

13. Woo kjenn wie em Prädichtdeenst äwa daut räden, waut de Menschen werkjlich fält?

¹³ Wie wiesen, daut wie om de Menschen bekjemmat sent, wan wie em Deenst äwa daut räden, waut dee intressieet un fält. See wie biejlikj, wan wie bie een Hus sent, aus de Lied Kjinja haben? De Elren sent veleicht doaraun intressieet, woo de Rot ut de Schreft an halpen kaun, äare Kjinja rajcht opptotrakjen, ooda woo see kjennen een schaftjet Famieljenläwen haben. Ooda see wie, daut dee äare Däaren väl Schlots haben? Dan woa wie veleicht doaräwa räden, daut väle Angst haben, daut et soo väl schlajchtet enne Welt jeft, un woo daut aules noch mol woat een Enj nämen. Wooemma daut nu es – wie wellen de Menschen halpen to vestonen, daut de Rot ut de Schreft an halpen kaun. Katarína, von dee wie ea aul  räden, sajcht: “Ekj denkj emma doaräwa no, woo de Woarheit mie jeholpen haft.” Un daut halpt ar, daut see sikj selfst secha es äwa daut, waut see de Menschen vetalt, un dee kjennen daut seenen.

14. Woo kjenn wie ons em Deenst unjarenaunda halpen, soo aus Spricha 27:17 sajcht?

¹⁴ Lot die von aundre halpen. Paulus lieed biejlikj Timotäus, woo hee prädjen un lieren kunn, un rod am too aundre dautselwje to lieren (1. Kor. 4:17). Un soo aus Timotäus kjenn wie von erfoarne Breeda en de Vesaumlunk lieren (läs Spricha 27:17). See wie mol, waut een Brooda beläwd, waut Shawn heet. Hee wia fa eene Tiet em Pioniadeenst opp eene Städ butakaunt Staut, wua de mieeschte Menschen met äaren Gloowen tofräd wieren. Woo kunn hee siene Freid em Deenst hoolen? Hee sajcht: “Wanemma daut mäajlich wia, deed ekj met aundre toop prädjen. Wie nuzten de Tiet ut, ea wie no daut näakjste Hus kjeemen, om doaräwa to räden, woo wie ons em Deenst vebätren kunnen. Biejlikj vetald wie doaräwa, woo daut bie daut väaje Hus jewast wia. Un dan räd wie doavon, woo wie daut daut näakjste Mol noch bäta moaken kunnen, wan doa wada wäa dautselwje säd.”

15. Wuarom es daut soo wichtich to bäden, wan wie prädjen?

¹⁵ Bäd Jehova om Help. Doo daut jiedatsmol, wan du em Prädichtdeenst best. Onen de Krauft von Jehova sienen heiljen Jeist wudd wie nuscht volbrinjen kjennen (Psa. 127:1; Luk. 11:13). Wan du to Jehova bätst, dan saj dän krakjt, bie waut hee die halpen saul. Saj am biejlikj, daut hee die halpen saul, soone Menschen to finjen, waut von am lieren wellen un reed sent toom horchen. Un dan strenj die sea aun, aule Menschen to prädjen.

16. Wuarom es daut wichtich, selfst to studieren, daut wie fein prädjen kjennen?

¹⁶ Nemm die Tiet toom studieren. En Gott sien Wuat sajcht daut, daut wie sellen “bewiesen kjennen waut Gott sien gooda, aunjenäma un volkomna Wellen es” (Reem. 12:2, Fn.). Je sechra wie ons sent, daut wie de Woarheit äwa Gott jefungen haben, je sechra woa wie ons feelen, wan wie met de Menschen em Deenst räden. Katarína, von dee wie ea aul räden, sajcht: “Een Stootje trigj wort mie kloa, daut ekj mie eenje biblische Lieren nochmol unjastonen must. Doawäajen studieed ekj deep doaräwa, woo wie ons secha sennen kjennen, daut et eenen Schepfa jeft, daut de Schreft von Gott kjemt un daut Gott eene Organisazion haft.” Äa perseeneljet Studium haft ar sea em Gloowen jestoakjt un daut see nu noch mea Freid em Deenst haft.

17. Woo kunn Jesus siene Freid em Prädichtdeenst hoolen?

¹⁷ Jesus hilt siene Freid un deed wiedaprädjen, wan eenje uk nich horchen wullen. Wuarom? Wiels hee wist, woo sea de Menschen de Woarheit fäld, un hee wull soo väl aus mäajlich met de goode Norecht vom Kjennichrikj bekauntmoaken. Hee wist uk, daut eenje, waut ieeschtlich nich jehorcht hauden, lota secha horchen wudden. Soo wia daut biejlikj en siene ieejne Famielje. En de dreeunhaulf Joa, aus hee sienen Deenst hia oppe Ieed derchfieed, wort nich eena von siene Breeda eent von siene Nofolja (Joh. 7:5). Oba nodäm daut hee vom Doot oppstunt, worden dee Christen (Apj. 1:14).

18. Wuarom doo wie wiedaprädjen?

 ¹⁸ Wie weeten nich, wäa de biblische Woarheit aunnämen woat. Eenje brucken lenja aus aundre, bat dee de Woarheit aunnämen. Un wan dee uk nich reed sent no ons to horchen, seenen dee oba onsen gooden Waundel un onse Enstalunk un woaren sikj met de Tiet veleicht uk eenich “Gott . . . [to] lowen” (1. Pet. 2:12).

19. Waut lieet ons 1. Korinta 3:6-7 äwa dän Prädichtdeenst?

¹⁹ Wie plaunten un jeeten, oba wie sellen em Denkj hoolen, daut Gott daut waussen lat (läs 1. Korinta 3:6-7). Getahun, een Brooda, waut en Ätiopien deent, sajcht: “Ekj wia mea aus 20 Joa de eensja von Jehova siene Zeijen en de Jäajent, wua ekj won. Oba nu jeft et hia 14 Vekjindja. Drettieen von dee haben sikj aul deepen loten, wua uk miene Fru un miene dree Kjinja met en sent. Jeweenlich komen no onse Toopkomes 32 Menschen.” Getahun es sea schaftich, daut hee wiedajeprädicht un jeduldich doano jeluat haft, bat Jehova opprechtje Menschen no siene Organisazion trock (Joh. 6:44).

20. En waut fa Stekjen doo wie krakjt soone Oabeit aus dee, waut Menschen raden?

²⁰ Fa Jehova sent aule Menschen wieetvoll. Hee lat ons met sienen Sän toopschaufen, om Menschen von aule Velkja tooptosaumlen, soolang aus dise Welt noch nich to Enj jeit (Hag. 2:7). Wan wie prädjen, dan kjenn wie Menschen raden. Wie sent dan biejlikj soo aus dee, waut soone proowen to raden, waut bie eene Mien unjajeschett sent. Wan see veleicht uk mau een poa Stekj raden kjennen, haft sikj de Oabeit oba von aule sea jeloont. Soo es daut met daut Prädichtwoakj, waut wie derchfieren. Wie weeten nich, woo väl Menschen noch woaren jerat woaren von dän Soton siene Welt. Oba Jehova kaun jieda eenen von ons brucken, om dee to halpen. Andreas, waut en Bolivien wont, sajcht: “Wan doa wäa de Woarheit aunnemt un sikj deepen lat, dan es daut, wäajen väle toopjeschauft haben, om dän to halpen.” Well wie uk soo mootich wiedaprädjen. Wan wie daut doonen, woat Jehova ons säajnen un wie woaren väl Freid doabie haben.