1. Gifezegeselo gitshi Yesu wahanele alandudi enji? Ndaga itshi alandudi ene akalegele? (Tala gifuanesa holu dia gizula.)

TANGUA Yesu wakhalele ha mavu, walanduile gulongesa nu gusuanguluga guagasue. Wakhalele nji mutshigina egi alandudi enji akhale nu gusuanguluga guavula tangua adi mukalagala mudimo wa gulongesa. (Yone 4:35, 36) Alandudi a Yesu akhalele mulongesa nu gikhesa giagasue tangua Yesu wakhalele nawo. (Luka 10:1, 5-11, 17) Uvi tangua akuatele Yesu nu amushiyile, alandudi enji akhalelego luko nu gikhesa gia guya mulongesa. (Yone 16:32) Gungima dia gufuzumuga guenji, Yesu waakuatesele ha gulandula gukalagala mudimo wa gulongesa nu gikhesa. Ha vutugile Yesu mu dilu, alandudi enji alanduile gulongesa nu gikhesa giagasue. Ndaga yene yatumile mbalagaji jiawo ha guzuela egi: ‘Enue muazalesa Yelusalema nu malongo enu.’—Makal. 5:28.

2. Luholo tshi Yehowa wana kuatesa Aklisto mu mudimo wa gulongesa?

² Yesu walanduile gutuameza mudimo wa gulongesa wakhalele mukalagala Aklisto a mu siekle ya thomo. Yehowa nji waakuatesele. Hene athu avula atshiginyile lukuma luabonga. Mu Pantekote ya givo 33 gia T.D., athu hehi nu 3 000 abatijiwe. (Makal. 2:41) Luko, athu avula akhalele mulandula gubua alandudi. (Makal. 6:7) Yesu waalayele egi mu masugu agisugishilo athu avula mbatshigina lukuma luabonga.—Yone 14:12; Makal. 1:8.

3-4. Mukunda natshi mudimo wa gulongesa wana khala ndo ndaga yaleba gudi aphangi ako? Ndaga tshi tuza mulonguga mu longo edi?

³ Mukut’etu agasue tuana tshigina gukhala nu gusuanguluga mu mudimo wa gulongesa. Yakhala yaleba ha gukhala nu gusuanguluga mu mudimo wa gulongesa mu ifutshi iko. Mukunda natshi? Handaga mu ifutshi yene athu avula ana suanguluga ha gulonguga Biblia, ndaga eyi yana tshita egi ako mukatshi diawo ana nengenena gu jinzo jiawo  hagula Temue wa Yehowa mumoshi aze a alongese Biblia! Uvi mu ifutshi iko yakhala ndo ndaga yaleba ha gukalagala mudimo wa gulongesa, handaga aphangi ana sanga ndo athu avula gu jinzo jiawo. Uvi anyi ana sanga gu jinzo jiawo ana suanguluga ndo muavula ha gulonguga Biblia.

⁴ Gula wana jinga ha fundo dinyi gukalagala mu mudimo wa gulongesa guakhalago ndaga yaleba, longo edi diza gugukuatesa diago. Tuza muzuelela ndaga aphangi ako ana kalagala ha guheta athu avula mu mudimo wa gulongesa. Tuza mumona nji luholo tuajiya gubamba gusuanguluga guetu mu mudimo wa gulongesa ikhale athu adi mutegelela lukuma luabonga nga ndo.

5. Malamba atshi alongeshi avula ana tagana nawo?

⁵ Masugu awa yana khala lamba gudi Matemue a Yehowa ha guheta athu gu jinzo jiawo ha gualongesa Biblia. Alongeshi ako ana jinga mu mafundo anyi athu ana bamba jinzo jiawo muabonga diago. Mu jinzo jia luholo elu athu ana gujibamba ana hana ndo muthu wagasue njila ha gungina gula muthu mumoshi amutamegelego. Mu mafundo ako, yakhala yaleba gudi Matemue a Yehowa ha gulongesa inzo nu inzo, uvi ana sanga ndo athu avula. Alongeshi ako ana longesa mu mafundo anyi phamba athu azonda ana njinga guene. Mu mafundo a luholo elu aphangi ajiya guwenda matangua avula ha guheta phamba muthu mumoshi, matangua ako anago nji guasanga gu jinzo jiawo. Gula tudi mutagana nu ndaga jia luholo elu mu mudimo wa gulongesa mu terituare yetu, tushigo naye guleba muila. Luholo tshi tuajiya gubinga malamba a luholo elu hagula tuajiya gulandula guta maga nu athu avula?

6. Gudivua gutshi gudi mukatshi dia mudimo wana kalagala alowi a jishui nu mudimo wa alongeshi a Ufumu?

⁶ Yesu wafuanesele mudimo wa gulongesa nu mudimo wana kalagala mulowi wa jishui. (Mako 1:17) Alowi a jishui ako ajiya gubalegesa masugu avula nu gulowa uvi anago gukuata nga ishui imoshi. Hafundo dia guleba muila ana sombegesa ba metode awo a gulowela. Ana sombegesa tangua nu fundo nu luholo lua gulowa. Tuajiya nji gukalagala usombegeshi wa luholo elu mu mudimo wetu wa gulongesa. Henyaha tuzuelelenu ba metode ajiya gutukuatesa.

7. Gubonga gutshi tuajiya guheta gula tudi mulongesa mu matangua agudisha?

⁷ Khala mukamba athu mu matangua a gudisha. Gula tudi mulongesa mutangua dinyi athu ajiya gukhala gumbo diawo, mbatuheta athu avula mu mudimo wa gulongesa. Ikhale athu avula anaya gu midimo yawo nga ana balegesa matagua awo fundo diko, uvi gudi nu matangua ana vutuga gu jinzo jiawo! Aphangi avula a mala nu a akhetu ana suanguluga gulongesa gungima dia midi nga mungueze handaga ene matagua ana sanga athu avula. Luko, matangua avula athu avula ana huluguga gumbo diawo matangua ene nu ana khala hehi ha guta maga. Wajiya nji gusuanguluga nu metode ana kalegela mukulu mumoshi mu jina dia David. Udi muzuela egi: “Gungima dia gulongesa mu terituare imoshi ngana vutuga luko nu phangi tuayi nenji mu mudimo wa gulongesa gu jinzo jinyi tuasangelego athu. Ngana gudihula mangololo tangua ngana sanga athu avula gu jinzo jiawo.” *

8. Luholo lutshi tuajiiya gukalegela longo didi mu mukanda wa Mulongeshi 11:6 mu mudimo wa gulongesa?

⁸ Tushigo naye guleba muila. Muto wa lumene wa longo edi udi gutuwunguluisa egi tudi naye gukhala nu gusuanguluga mu mudimo wa gulongesa. (Tanga Mulongeshi 11:6.) Phangi David tuazuelela guthunda alebelego muila. Wakhalele muvutuga mahugo avula gu inzo imoshi uvi gakhalelego musanga muthu gu inzo yene. Lusugu lumoshi wasangele muthu mumoshi guene. Muthu muene wasuangulugile muavula nu maga a Biblia wazuelele egi: “Ngana khala haha ivo 8 yabalega gale uvi khenji ngumonele ndo nga Temue  wa Yehowa mumoshi gumbo diami.” Phangi David udi muzuela egi: “Gula wana guya gumbo dia muthu mumoshi iphungu yavula uvi wanagumusanga ndo, matagua avula wana suanguluga nu lukuma luabonga gula wamusanga gumbo dienji.”

9. Ndaga itshi Matemue a Yehowa ako ana kalagala ha guheta athu anyi yakhala lamba ha guasanga gumbo diawo?

⁹ Khala mukamba athu mu mafundo a gudisha. Alongeshi ako asombegesele mafundo agulongesa ha gula ajiya guheta athu anyi yana khala lamba ha guasanga gumbo diawo. Ha gufezegesa ana kalegela ba table d’exposition nga ba présentoir mobile mafundo a athu avula hagula ajiya gulongesa athu ana khala mu phango jinyi jiakhala lamba ha gungina mu mudimo wa gulongesa wa inzo nu inzo. Gutshita ngenyi guana guakuatesa Matemue a Yehowa ha guta maga nu athu a luholo elu. Alongeshi avula akotelesele gale egi athu avula ana suaguluga guta maga nga guzula mikanda yetu mu mafundo gifua ba parke, gisalo (zando) nga mu ba magasin. Phangi Floiran udi mutadi muwendji gu Bolivie udi muzuela egi: “Tuana guya mu mazando nga mu ba magasin mu 13h nu mu 15h, handaga mu matangua ene athu ana sumbisa ana khala ndo nu midimo yavula. Tuana guta nawo maga muabonga tuana sendesa gulonguga Biblia nu athu ako.”

10. Ba metode atshi ako wajiya gukalegela ha guheta athu avula mu mudimo wa gulongesa?

¹⁰ Khala mukalegela ba metode ako. Tangiza egi watshita yagasue ha gusanga muthu gu inzo, waya guene matangua avula uvi ushigo gumusanga. Metode ako atshi wajiya gukalegela ha guheta muthu muene? Phangi Katarína udi muzuela egi: “Ngana sonegela athu ene mikanda ha guamonesa ndaga ngakhala nu funu ya guawambela.” Longo ditshi wazula? Kalegela ba metode a gudisha tangua udi mulongesa mu terituare yaye ha guheta athu avula.

11. Mukunda natshi athu ako ana suanguluga ndo nu lukuma luabonga?

¹¹ Athu ako ana suanguluga ndo nu lukuma luabonga tuana longesa. Ana tangiza egi ashigo nu funu ya gujiya Nzambi nga ya gulonguga Biblia. Ana tuna gusha gutshigina gudi Nzambi handaga ana mona malamba. Ana tshigina ndo Biblia handaga mafumu a ikombelelo yawo ana zuela egi ana tumagela ndaga jiana zuela Biblia, hoho ene hakhawo ana kalagala ndaga jiabola. Athu avula ana gudisagesa mukunda nu midimo yawo, fami jiawo nga ndaga jiawo jiko. Ngenyi ana tangiza egi Biblia yajiyilego guakuatesa. Luholo lutshi tuajiya gubamba gusuanguluga guetu gula athu avula ashigo muzula lukuma luabonga nu ndando?

12. Luholo lutshi longo didi mu Filiphi 2:4 diajiya gutukuatesa mu mudimo wa gulongesa?

¹² Khala mumonesa athu egi wana gudisagesa mukunda nu ene. Athu avula akhalele thomo mutuna lukuma luabonga asombegesele matangi awo tangua akotelesele egi Matemue a Yehowa ana gudisagesa mukunda nu ene. (Tanga Filiphi 2:4.) Phangi David tuazuelela gu thunda udi muzuela egi: “Gula muthu watuwambela egi maga etu ashigo gumusuanguluisa, tuana vutula Biblia nu mikanda iko mu makuba, gungima tuana gumuhula egi: Wajiya gutuwambela mukunda natshi wana tangiza ngenyi? Mihu ya luholo elu yajiya gutuma athu avula ha gutangiza egi, ‘tuana gudisagesa mukunda nu ene.’” Athu ajiya gubuita mutshima gu ndaga tuaawambelele uvi ene mbajimbilago luholo tuaakalegele ndaga nu gisemo. Ikhale muthu ashigo mutshigina egi tumulongese lukuma luabonga, tuajiya gumumonesa egi tuana gudisagesa mukunda nu muene gula tudi muzuela nu gumuemueta guagasue.

13. Itshi tuajiya gutshita hagula athu asuanguluge nu lukuma luabonga?

¹³ Ha gumonesa egi tuana gudisagesa mukunda nu athu, tudi naye guzuelela ndaga jiajiya guasuanguluisa tangua tudi muta nawo maga mu mudimo wa gulongesa. Ha gufezegesa, gudi nu ndaga jidi gugumonesa egi muthu udi muta nenji maga udi nu ana ba? Mvuaji jiajiya gusuanguluga nu malongo a Biblia adi muzuelela luholo lua gusansa ana nga malogo adi muzuelela luholo luagukhala nu gusuanguluga mu fami. Gula wasanga inzo imoshi ya gukanga muabonga itshi wajiya guzuela? Wajiya guzuelela ndaga jiabola jidi mukalegewa ha mavu gifua umbundudi nga unzangi nu luholo ndaga jiene jidi muhana athu woma. Fumi’a inzo mbawusuanguluga diago muavula ha gumona egi gualeha ndo ndaga jiabola mbajishigo luko mukalegewa ha mavu. Gula waheta muthu watshigina gutegelela lukuma luabonga tshita yagasue ha gumukotelesela luholo malongo a Biblia ajiya gumukuatesa. Phangi Katarína tuzuelela guthunda udi muzuela egi: “Ngudi muwunguluga luko luholo Biblia yangukuatesele muavula mu monyo wami.”  Phangi Katarína wana longesa nu gikhesa giagasue nu athu ana longesa muene Biblia ana kotelesa nji ndaga yene.

14. Ha gutadila Ishima 27:17, luholo lutshi alongeshi ajiya gudikuatesa mu mudimo wa gulongesa?

¹⁴ Khala mukamba ukuateshi wa athu ako. Mu siekle ya thomo mupostolo Phaula wawambelele Timote ba metode agukalegela mu mudimo wa gulogesa. Wa muwambelele nji ha gukalegela ba metode ene ha gukuatesa athu ako. (1 Kol. 4:17) Mangino esue nji tuajiya guheta malongo mu ba eksperianse a aphangi a mu hungu dietu gifua Timote. (Tanga Ishima 27:17.) Tuzuelelenu gifezegeselo gia phangi Shawn. Wakalegele mudimo wa gi pionye mu dimbo dinyi athu avula akhalele musuanguluga phamba nu gikombelelo giawo. Itshi yamukuatesele ha gulandula gukhala nu gusuanguluga? Udi muzuela egi: “Gula ngaheta okazio ngakhalele mulongesa nu phangi mumoshi. Gula tuakatuga gu inzo imoshi ha guya gu inzo iko tuakhalele muzuelela luholo lua gukudisa ba metode etu a gulongesa. Ha gufezegesa tuakhalele muzuelela luholo tuajiya guta maga nu muthu nu mvutu tuajiya gumuhana gula watuhula muhu. Gungima tuakhalele muzuelela nji luholo tuajiya guhana mvutu mu luholo luko gula muthu watuhula muhu wa luholo lumoshi.”

15. Mukunda natshi gukalagala gisambu gudi nu ndando yavula mu mudimo wa gulongesa?

¹⁵ Khala mutoga ukhuateshi wa Yehowa mu gisambu. Khala mutoga ukhateshi wa Yehowa tangua diagasue udi mu mudimo wa gulongesa. Tuana khala nu funu ya ukuateshi wa nyuma ya Nzambi mu ndaga jiagasue tuana kalagala. (Ngi. 127:1; Luka 11:13) Tangua udi mutoga ukuateshi wa Yehowa mu gisambu, muwambele ndaga udi mutshigina egi agukuatese. Ha gufezegesa mutoge ha gugutuameza gudi athu adi mutshigina gumujiya nu adi hehi ha gutegelela lukuma luabonga. Gungima, kalagala yagasue ha gulongesa athu udi mutagana nawo mu mudimo wa gulongesa.

16. Luholo lutshi gulonguga guaye hakhaye guajiya gugukuatesa mu mudimo wa gulongesa?

¹⁶ Khala mukalagala gulonguga guaye hakhaye. Mbimbi ya Nzambi idi muzuela egi: ‘Enue hakhenu mukambe gujiya gula gutshigina gua Nzambi gudi itshi, handaga gutshigina guenji gudi guabonga, guatagana nu guana gumusuanguluisa.’ (Lomo 12:2) Gula tudi mulonguga Biblia mbatujiya Nzambi muabonga diago. Mbatulongesa nji nu gikhesa giavula, ngenyi athu mbakotelesa egi ndaga tudi guawambela jidi jia giamatshidia. Phangi Katarína tuazuelela guthunda udi muzuela egi: “Ivo yazonda yabalega gale, ngakotelesele egi ngakhalele naye gukolesa gutshigina guami mu malongo a gishina a Biblia. Ngasendele gulonguga ndaga jiana monesa egi Mufugi wakhala guene, Biblia idi diago Mbimbi ya Nzambi nu ndaga jidi mumonesa egi Nzambi wakhala nu ulondegi wenji ha mavu.” Katarína udi muzuela egi, gulonguga guenji hakhenji guana kolesa gutshigina guenji nu ha gukhala nu gusuanguluga guavula mu mudimo wa gulongesa.

17. Mukunda natshi Yesu wabambele gusuanguluga guenji mu mudimo wa gulongesa?

¹⁷ Yesu wakhalele nu gusuanguluga mu mudimo wa gulongesa. Walanduile gulongesa ikhale athu ako akhalelego musuanguluga nu lukuma luabonga. Mukunda natshi? Handaga wajiyile egi athu avula akhalele nu funu ya gutegelela giamatshidia wakhalele nji mutshita yagasue ha gukuatesa athu avula ha gutegelela lukuma luabonga lua Ufumu. Wakhalele mujiya nji egi gudi nu lusugu athu anyi akhalele mutuna gumutegelela mbatshigina lukuma luabonga. Tuzuelelenu gale ndaga jiabalegele mu fami yenji. Yesu walongesele lukuma luabonga ivo thathu nu ndambo, uvi mu tangua diene gushigo nga nu phang’enji mumoshi wabuile mulandudi wenji. (Yone 7:5) Ndaga ya giamatshidia idi egi gungima dia gufuzumuga guenji aphangi’enji abuile Aklisto.—Makal. 1:14.

18. Mukunda natshi tudi naye gulandula gukalagala mudimo wa gulongesa?

¹⁸ Tuanago gujiya gula nanyi mukatshi dia athu tuana longesa mbawubua Temue wa Yehowa. Athu ako ajiya guzula tangua diavula ha gutshigina lukuma luabonga, ako ana tshigina muphushi. Uvi  nu ene athu ana tuna gututegelela ana mona makalegelo etu abonga nu luholo tuana khala nu gusuanguluga mu mudimo wetu wa gulogesa. Ndaga eji jiajiya nji guatuma ha ‘gutumbuisa Nzambi.’—1 Phet. 2:12.

19. Hagutadila 1 Kolinto 3:6, 7, ndaga itshi tushigo naye gujimbila?

¹⁹ Ikhale esue tuana tshita mudimo wa gulongesa, uvi tushigo naye gujimbila egi Yehowa wana tshita egi mudimo wetu uye gutuama. (Tanga 1 Kolinto 3:6, 7.) Phangi mumoshi wa yala mu jina dia Getahun, wana kalagala mudimo wa gulongesa gu Ethiopie, udi muzuela egi: “Uvi ivo 20 yabalega gale ame hakhami ngakhalele Temue wa Yehowa mu terituare yetu. Uvi mangino tudi alongeshi 14. Mukatshi dia alongeshi ene athu 13 abatijiwe gale. Mukaji’ami nu an’ami adi nji mukatshi dia alongeshi ene. Atu 32 ana guza tangua diagasue mu gudibungisa.” Phangi Getahun udi nu gusuanguluga luholo alanduile gulongesa nu guhuiminyina guagasue. Wakhalele munengenena egi Yehowa muene hakhenji akuatese athu hagubua akombeledi enji!—Yone 6:44.

20. Gudivua gutshi gudi mukhatshi dia mudimo wa gulongesa nu mudimo wa guhuluisa athu adi mu ingonza?

²⁰ Yehowa wana zula athu agasue nu ndando yavula. Watuhanele luendu lua gukalagala mudimo hamoshi nu Mun’enji ha gubungisa athu a ifutshi yagasue gutuama egi gisugishilo gia mavu awa gize. (Hag. 2:7) Mudimo wetu wa gulongesa wakhala gifua mudimo wa guhuluisa athu adi mu ingonza. Esue tudi gifua athu adi mu ekipe ya tumiwa ha guya mu kuatesa athu ene. Ikhale athu ene ahuluisa phamba athu azonda, uvi mukuta awo agasue akalagala mudimo wa ndando. Idi luholo lumoshi nu mudimo wetu wa gulongesa handaga tushigo mujiya guvula gua athu mbatukuatesa ha guhuluga ha mavu awa a Satana. Uvi Yehowa wajiya gukalegela muthu wagasue mukatshi dietu ha guakuatesa. Phangi wa yala Andreas gu Bolivie udi muzuela egi: “Ngudi mujiya egi gula muthu walonguga giamatshidia, gungima wabatijiwa idi handaga athu avula akalagala hamoshi ha gumukuatesa.” Tudi naye gutshita yagasue ha gubamba gusuanguluga mu mudimo wetu wa gulongesa. Gula tuatshita ngenyi, Yehowa mbawutukuatesa, mbatukhala nji nu gusuangulaga guavula mu mudimo wa gulongesa.