1. Wanem example nao Jesus showimaot for olketa disaepol, and hao nao olketa followim datwan? (Lukim piksa lo front page.)

TAEM Jesus stap lo earth hem gohed for preach and hem hope samfala bae interest lo datfala message. Hem laekem olketa disaepol tu for gohed preach. (John 4:35, 36) Olketa disaepol blo Jesus barava enjoyim preaching waka taem Jesus stap witim olketa. (Luke 10:1, 5-11, 17) Bat from olketa soldia arrestim Jesus and then hem dae, olketa stop for preach nao. (John 16:32) Bihaen Jesus resurrect, hem encouragem olketa for gohed preach. Then bihaen Jesus go bak lo heven, olketa disaepol barava busy for duim preaching waka gogo olketa enemy sei: “Evriwan long Jerusalem herem teaching bilong iufala nao.”—Acts 5:28.

2. Wanem nao showimaot Jehovah blessim preaching waka?

² Taem Jesus lo heven, hem leadim preaching waka wea olketa Christian lo first century duim. Jehovah blessim datfala waka and staka kamap disaepol, olsem example, lo Pentecost 33 C.E. samting olsem 3,000 nao baptaes. (Acts 2:41) Bihaen lo datwan, staka pipol moa kamap disaepol. (Acts 6:7) Nomata olsem, Jesus sei lo olketa last day, preaching waka bae kamap barava big winim datwan.—John 14:12; Acts 1:8.

3-4. Why nao hem no isi for duim preaching waka lo samfala ples, and wanem nao bae iumi storyim lo disfala article?

³ Iumi evriwan traem best for duim ministry. Lo samfala kantri hem isi for duim preaching waka, bikos staka pipol interest for studyim Bible. Lo samfala ples pipol  mas weit firstaem bifor wanfala Witness garem taem for study witim olketa bikos hem garem staka study finis. Bat lo olketa nara kantri hem no isi for duim preaching waka bikos pipol no stap lo haos, and staka no interest lo Bible.

⁴ Sapos iu stap lo ples wea staka taem pipol no stap lo haos or staka no interest lo Bible, olketa idea lo disfala article savve helpem iu. Iumi bae storyim wanem samfala pablisa duim mekem olketa preach lo staka pipol. And bae iumi storyim samting wea savve helpem iumi for gohed enjoyim preaching waka nomata pipol no stap or no interest.

5. Wanem nao staka pablisa mas deal witim?

⁵ Samfala pablisa faendem hem no isi for preach bikos lo territory blo olketa pipol stap lo building wea garem intercom, or pipol stap lo area wea garem fence raonem and gate hem lok. Maet pipol hia garem security tu wea letem nomoa olketa fren blo olketa wea stap lo building or haos for kam insaed. Territory blo olketa nara pablisa maet no garem kaen haos or building olsem, bat staka taem pipol lo datfala territory no stap lo haos. And tu, samfala territory no garem staka haos, so olketa pablisa maet wakabaot for staka hour for kasem wanfala haos, bat haosholder go finis! Nomata maet iumi deal witim olketa samting hia, iumi laek for gohed preach. Wanem nao savve helpem iumi?

6. Hao nao preaching waka hem olsem waka for kasem fish?

⁶ Jesus sei preaching waka hem olsem waka for kasem fish. (Mark 1:17) Lo samfala ples, olketa wea duim disfala waka maet spendem staka day lo sea bat no kasem eni fish. Nomata olsem, olketa no givap. Olketa traem difren samting, olsem for fishing lo difren taem, lo difren ples, and lo difren wei. Iumi savve traem olketa idea hia lo preaching waka blo iumi.

7. Wanem nao savve happen sapos iumi preach lo difren taem?

⁷ Preach lo difren taem. Hem gud for preach lo taem wea pipol stap lo haos. Nomata pipol lusim haos for waka or nara reason, olketa bae kam bak lo haos! So samfala brata and sista preach lo aftanun or evening taem pipol stap lo haos. Lo taem olsem samfala haosholder garem taem for story. Or maet iu savve followim idea blo David, wanfala elder. Hem storyim hao hem and partner blo hem preach lo territory olketa markem for lelebet taem, then tufala go bak noknok lo olketa haos wea no eniwan stap firstaem. Hem sei, “Staka pipol wea no stap firstaem, olketa stap nao!” *

8. Hao nao iumi savve followim toktok lo Ecclesiastes 11:6 lo preaching waka?

⁸ Iumi no laek for givap for preach. Hem nao wanem theme scripture blo disfala study encouragem iumi for duim. (Readim Ecclesiastes 11:6 lo footnote.) * David wea iumi storyim finis gohed for preach. Evritaem David duim wanfala territory, lo wanfala haos no  eniwan savve stap, bat gogo hem meetim man wea laek for storyim Bible. Man hia sei, “Mi stap lo hia for samting olsem eit year finis and iu nao first Jehovah’s Witness wea mi meetim.” David sei, “Mi faendem taem mi meetim pipol wea olketa Witness no preach lo olketa bifor, olketa savve barava interest.”

9. Wanem nao samfala pablisa duim mekem olketa preach lo pipol wea no stap lo haos?

⁹ Preach lo difren ples. From samfala pablisa no savve kasem pipol lo haos, olketa go preach lo ples wea pipol stap. Olsem example, samfala pipol stap lo building wea garem intercom, so olketa pablisa duim street witnessing and trolley witnessing mekem olketa savve preach lo pipol hia. Nara samting, taem olketa pablisa duim pablik witnessing lo market, park, and lo taon, olketa lukim pipol laek for story and tekem pablikeson blo iumi. Floiran, wanfala circuit overseer lo Bolivia sei: “Mifala preach lo market and lo olketa stoa from 1 klok lo aftanun kasem 3 klok taem olketa hia no busy tumas. Lo taem olsem, staka laek for story and mifala startim olketa Bible study tu.”

10. Wanem nao iumi savve duim mekem iumi preach lo staka pipol?

¹⁰ Iusim difren wei for preach. Maet staka taem iumi go lo wanfala haos for preach, bat no eniwan stap. Waswe, eni nara wei stap for preach lo hem? Katarína sei, “Taem mi no meetim samwan lo haos blo hem, mi raetem leta olsem mi  preach lo hem.” Wanem nao iumi lanem? Iusim difren wei for preach mekem iumi preach lo evriwan lo territory blo iumi.

11. Why nao samfala no interest lo message wea iumi preachim?

¹¹ Samfala no interest lo message wea iumi preachim. Samfala tingse olketa no needim God, no tinghae lo Bible, or no biliv lo God from staka pipol safa tumas. Samfala no interest lo Bible bikos olketa lukim olketa bigman blo religion no followim wanem Bible talem. Olketa narawan busy lo waka, famili, or warim problem blo olketa seleva and tingse Bible no savve helpem olketa. Hao nao iumi savve gohed for enjoyim preaching waka nomata pipol no interest lo message iumi preachim?

12. Taem iumi followim toktok blo Philippi 2:4, hao nao datwan savve helpem iumi lo preaching waka?

¹² Showimaot iumi tingim pipol. Man wea no interest firstaem lo gud nius, maet gogo studyim Bible from pablisa showimaot hem tingim hem. Datwan happen lo staka pipol. (Readim Philippi 2:4.) For example, David wea iumi storyim finis sei, “Taem samwan sei hem no interest, mi putim Bible and pablikeson lo basket and sei: ‘Mi laek for savve why nao iu ting olsem.’” Pipol bae luksavve sapos iumi laek for herem tingting blo olketa. Maet olketa no rememberim story blo iumi, bat olketa bae tingim hao iumi kaen lo olketa. Nomata haosholder no letem iumi for story, iumi savve smile and kaen mekem olketa luksavve iumi tingim olketa.

13. Wanem nao iumi savve storyim for showimaot iumi tingim interest blo haosholder?

¹³ Iumi savve showimaot iumi tingim haosholder taem iumi changem story for fitim wanem hem interest lo hem. Olsem example, sapos iumi luksavve haosholder garem pikinini, maet hem gud for storyim hao Bible savve helpem parents for trainim pikinini, or hao for mekem famili hapi. Or sapos iumi lukim haosholder garem staka lok for security, maet iumi storyim hao pipol evriwea lo world fraet lo olketa criminal. Hem maet hapi for savve Bible storyim taem wea no eni nogud man bae stap. Hem gud for tingim wanem each haosholder maet interest lo hem, mekem iumi storyim samting from Bible wea fitim  hem. Katarína, wea iumi storyim finis sei, “Bifor mi go preaching, mi tingim gud samting wea mi kasem from mi savve lo truth.” Datwan helpem Katarína for showimaot hem biliv strong lo wanem hem storyim taem hem preach, and haosholder luksavve lo datwan.

14. Olsem Provebs 27:17 storyim, hao nao tufala wea preach tugeta savve lane from each other?

¹⁴ Lane from narawan. Lo first century, Paul teachim Timothy hao for preach and teach, and hem encouragem Timothy for teachim olketa narawan wanem hem lanem. (1 Cor. 4:17) Olsem Timothy, iumi savve lanem gud samting from olketa narawan lo kongregeson. (Readim Provebs 27:17.) Tingim example blo Shawn. Lo bifor, hem pioneer lo ples wea garem olketa farm and pipol no laek for changem religion blo olketa. Wanem nao helpem hem for gohed enjoyim preaching waka? Hem sei: “Mi laek for preach witim narawan. Taem mitufala spendem taem for draev go lo next farm, mitufala bae storyim man wea mifala meetim lo last haos and story blo mifala. Then mitufala storyim wanem mifala savve duim sapos nara taem mifala meetim kaen man olsem.”

15. Why nao hem important for prea abaotem preaching waka?

¹⁵ Prea lo Jehovah for helpem iumi. Evritaem iumi go preaching, askem Jehovah for helpem iumi. Iumi needim holy spirit blo Jehovah for helpem iumi duim preaching waka. (Sams 127:1; Luke 11:13) Taem iumi prea lo Jehovah, talem hem iumi laek for meetim samwan wea bae interest for lane abaotem hem and willing for lisin. Then duim samting followim prea blo iumi and preach lo evriwan wea iumi meetim.

16. Hao nao study seleva savve barava helpem iumi lo preaching waka?

¹⁶ Markem taem for duim study seleva. Bible sei taem iumi duim study seleva, iumi bae “luksavve long samting wea God laekem iumi for duim.” (Rome 12:2) Study bae helpem iumi for savve gud lo truth, then taem iumi preach lo pipol bae olketa luksavve iumi biliv strong lo wanem iumi storyim. Katarína, wea iumi storyim finis sei: “Mi luksavve mi need for strongim faith blo mi lo samfala main Bible teaching. So mi duim study seleva wea helpem mi for pruvim God hem stap, Bible hem toktok blo God, and God iusim wanfala organization lo earth for duim waka blo hem distaem.” Katarína sei study wea hem duim strongim faith blo hem and helpem hem for enjoyim preaching waka.

17. Why nao Jesus gohed for preach?

¹⁷ Jesus gohed for preach nomata samfala no interest lo message blo hem bikos hem luksavve hem important for pipol savve lo truth, and hem laekem staka for herem message abaotem Kingdom. Hem savve tu samfala wea no laek lisin firstaem maet gogo bae olketa interest. Tingim olketa haf brata blo Jesus. Insaed thri and haf year wea Jesus preach, no eniwan lo olketa kamap disaepol blo hem. (John 7:5) Bat bihaen Jesus resurrect, olketa kamap Christian.—Acts 1:14.

18. Why nao iumi gohed for preach?

¹⁸ Taem iumi preach, iumi no savve hu nao bae interest. Hem maet tek longtaem  bifor samfala pipol disaed for studyim Bible. Olsem example, samfala wea no laek herem message firstaem, gogo maet olketa interest lo truth from olketa lukim gudfala wei blo iumi and from iumi no givap for preach lo olketa.—1 Pet. 2:12.

19. Wan Corinth 3:6, 7 helpem iumi for luksavve lo wanem?

¹⁹ Nomata iumi duim waka for plantim seed and watarem, iumi luksavve God nao mekem seed hem grow. (Readim 1 Corinth 3:6, 7.) Getahun, wanfala brata lo Ethiopia sei: “For winim 20-fala year, mi nomoa Witness lo ples blo mi. Bat gogo waef blo mi, thrifala pikinini blo mifala, and naenfala narawan joinim mi. Distaem mifala 14-fala pablisa, and 32 pipol savve attendim olketa meeting.” Getahun hapi tumas hem gohed for preach and weit lo Jehovah for leadim olketa hia for kam lo organization blo Hem!—John 6:44.

20. Hao nao iumi olsem olketa wea sevem pipol?

²⁰ Jehovah laekem evriwan for herem gud nius. Dastawe Jesus leadim waka for preach distaem and iumi garem privilege for faendem pipol wea interest lo truth bifor end hem kam. (Hagae 2:7) Iumi wea preach olsem olketa wea sevem pipol taem ship hem sink lo sea. Nomata olketa sevem samfala pipol nomoa, evriwan wea go for help duim important waka. Datwan semsem tu witim preaching waka. Iumi no savve haomas pipol nao bae sev from world blo Satan, bat Jehovah savve iusim eniwan lo iumi for helpem olketa. Andreas, wanfala brata lo Bolivia sei: “Evriwan wea studyim Bible and gogo olketa baptaes hem from staka brata and sista nao helpem olketa.” So iumi laek for gohed duim disfala waka for preach bikos Jehovah bae blessim iumi for datwan, and iumi bae enjoyim disfala waka for sevem pipol.