1. ¿Imanotaj Jesús Diospita yachachicoj, y imanotaj gatejnincunapis rurapäcoj? (Garancho caycaj dibujuta ricay).

CAY Pachacho Jesús cawashgan wichanga ganas ganaslami predicargan, chaynola noganchipis rurananchita payga munaycan (Juan 4:35, 36). Jesuswan gatejnincuna cawashgan wichanga, paycunaga cushi cushilami Diospita yachachicärirgan (Luc. 10:1, 5-11, 17). Jesús wanuptenga yachachicunanpaj ganasnincuna alapa cargannachu (Juan 16:32). Jesusga cawarimurganmi y yachachicuycarla mana uticaypa carcaycänanpaj gatejnincunata nergan. Y chaynolami rurapäcurgan Jesús cielupana cuticuptenga, chaychi chiquicoj runacunaga cayno nipäcurgan: “Qamkunaqa Jesúspita yachatsirmi intëru Jerusaléncho purirkaykanki” (Hech. 5:28).

2. ¿Imanotaj predicaciunninchita Jehová yanapacaycämun unaypita canancama?

² Jesusga cielucho caycarpis gatejnincunatami yanapargan, chaymi Jehovapa bendiciunninwanga aypala runacuna cristianuman ticrapäcurgan. 33 wata Pentecostés fiesta junajchomi, 3.000 runacuna bautizacärirgan (Hech. 2:41). Wata pasaycashganmannomi tiempuwanga masraj miraycärirgan (Hech. 6:7). Cay ushanan junajcunapaj parlarmi Jesús nergan aypala runacuna may chaycho Diosta chasquicärinanpaj (Juan 14:12; Hech. 1:8).

3, 4. 1) ¿Imanirtaj waquin naciuncunachoga sasa ticracurinman Diospita yachachicunapaj? 2) ¿Imatataj canan yachacurishun?

³ Lapanchimi calpachacunchi Diospita ganas ganasla yachachicunapaj. Waquin marcacunachoga runacunaga  ‘ruwacuyparämi’ nipäcun ‘nogata Bibliapita yachaycachilämay’ nir, ichanga chaychoga walca Testigucunala caycan. Chaynoga manami pasacunchu waquin naciuncunachoga, chaychoga wasicuna chunyaranmanmi o wasiyojcunata tarirpis chasquicäriyta mana munanmanchu.

⁴ Chayno marcacunacho cawarga ama yarpachacushunchu. Cananmi yachacurishun imata ruranapaj. Caycunapitapis yachacushunmi: imatataj waquin hermanunchicuna rurapäcushga más achca runacunata Diospita yachachinanpaj y imatataj noganchicunapis rurashwan ganas ganasla runacunata parlapänapaj chasquicuyta mana munaptinpis.

5. ¿Imanirtaj waquincunapäga sasa canman Diospita yachachicunanpaj?

⁵ Waquinninchicunapäga sasa canman runacunata wasincho tariytaga. Waquin edificiucunachoga jäpacuna yaycunanta munapäcunchu, waquin wasiyojcunana murallancunata ruracarcärin. Chaycho yachachicunapäga sasami ticracurin o wasicuna captinpis öraga wasiyojta tarishwanchu. Jinamanpis nacayparämi maygan caru marcamanpis chayashwan y chayaycurga pilatapis tarishwanchu. Chayno marcacunacho cawaycarga, ¿Diospita yachachicuycashganchita jaguiycushwanchuraj?, o imaraj yanapämäshun yachachicuycarla caycänapaj.

6. ¿Imanotaj tincunman predicaciunninchi juc pescaj runa rurashganwan?

⁶ Predicaciuntaga pescaduta chariytawanmi Jesús igualachergan (Mar. 1:17). Pescaj runaga goyaylata pescaduta ashiptinpis öraga manami tarinmanchu, imaycatarämi ruranman tarinanpäga. Noganchipis juc pescadurnomi ali sitiutaraj ashinanchi, horacunatapis acrananchiraj; ichanga imano yachachicushganchitapis trucarcushwanrämi. Imata ruranapaj ricarcushun.

7. ¿Imanoraj canga runacuna wasincho cashgan hora yachachicoj yarguptinchi?

⁷ Juc horacunachopis ashishwanmi. ¿Imay horataj runacuna wasincho caycanman? Chay hora yargurga alimi canga. Yargushga carpis runacunaga punojlapis cuticäramungami wasinman. Waquin hermanunchicunaga tardipayparaj o chacayparaj yachachicoj yargun. Chay horaga runacuna más jaucala carcaycan y cushi cushila chasquicärin Diospa Palabranta. Congregaciuncho ancianuno yanapacoj David wawguinopis rurashwanmi, payshi wasin wasin yachachicuycar mana tarishgan cajcunaman ratulancho cutirin. Payga nin: “Yapayraj cutiptëga achca runacunatami taripäcö”. *

8. ¿Imanotaj yanapämanchi Eclesiastés 11:6 texto Diospita yachachicunapaj?

⁸ Galanancho acracämushga textuga yarpächimanchi mana uticaypa Diospita yachachicuycarla caycänapaj (leiriy Eclesiastés 11:6). Naga parlashganchi David wawguiga, calpachacushganraycurmi juc ali shongu runata tariycurgan. Paytash cay runa nergan: “Pusaj watanami cay wasïlacho cawacö pero cananrämi juc Testigo watucaycäman”. Davidpis cayno nin: “Imaycataraj rurar runacunata ashirga, paycunaga cushishgami chasquicärin”.

9. Wasincunacho runacunata mana tarirga, ¿imatataj waquin hermanunchicuna rurapäcun?

⁹ Juc laduchopis yachachicushwanmi. Runacuna wasincho mana caycaptenga waquin  hermanunchicunaga juc sitiucunacho tarinanpämi calpachacärin. Nishganchinopis öraga sasa canman waquin sitiucunacho yaycunapaj runacunata ashir, chayno captenga alapa ali canga callicunachopis yachachicuptinchi o maylachopis charashganchi carritucunacho publicaciunninchicunata camarächiptinchi. Chayno carga tincushunchi wasincunacho mana tarishganchi runacunawan. Achcajmi nipäcun feriacunachonopis runacuna cashgan sitiucunacho Diospita yachachicuptenga ali cashganta. Bolivia naciuncho congregaciuncunata watucaj Floiran wawgui cayno nin: “Mercaducunapaj yachachicoj yargunchi almuerzo hora pasarcuptinrämi, chay hora runacunaga jamarpaycan y cushi cushila chasquicärin y Bibliapitapis yachacuyta galaycärin”.

10. ¿Imatataj rurashwan marcanchicunacho lapan runacunata yachachinapaj?

¹⁰ Jucnopäpis yachachicushwanmi. Pipa wasinmanpis tutapa tardipa cutin cutin aywashga carga, ¿imatataj rurashwan? Katarína jutiyoj cristiana cayno nin: “Wasincho pitapis mana tarirga juc cartatami guelgapä, imanir watucashgäta wilapänapaj”. ¿Imatataj yachacunchi chaypita? Noganchicunapis imaycatarämi rurananchi marcanchicho lapan runacunaman Diospa ali wilacuyninta chayachinapaj.

11. ¿Imanirtaj waquincunaga ali wilacuyta apashganchita chasquicuyta munapäcunchu?

¹¹ Waquin runacunaga yachachishganchita chasquicuyta munapäcunchu, ‘imapäta  Diospita yachacushaj, ali cawacuycä’ nipäcunmi. Nacaycunata ricashpanmi Diosmanpis creinchu waquincuna. ‘Biblianta aptaraycaptinpis mana alicunata rurarcaycan’ nipäcunmi religiosutucojcunapita. Waquin runacunaga wasinlapa yarpachacärin, trabajunlacho jaticash cacärin; cuentata gocärinchu Diospa Palabran imano yanapänanpa cajta. Chauras, ¿imanotaj mana uticaypa Diospita yachachicuycarla caycashwan runacuna ni ichiclapis chasquicuyta munaptinpis?

12. ¿Imanotaj Diospita yachachicunapaj Filipenses 2:4 texto yanapacun?

¹² Runacunata cuyashganchita musyachicushun. Achca runacunami nawpachoga parlapänanchilatapis munarganchu, nircur imano paycunapa yarpachacushganchita ricarmi ali shongulanwanna chasquimashcanchi (leiriy Filipenses 2:4). Naga parlashganchi David wawgui cayno nin: “Pipis ‘mana munächu’ niptenga Bibliata wichgaycurmi parlapacärë chay runa imacunapa pasashganpita. Runacunaga cuentata gocärinmi yanapacoj runa cashganchita o mana. Yachachishganchitaga gongarpis gongarinmanmi, pero yarpaytaga yarparanganmi imano cushircachishganchita. Upälala caycarpis caranchichoga ricacämunmanmi ali shongu cashganchi.

13. ¿Imano yachachicurtaj runacunaga cushi cushila chasquimäshun?

¹³ Runacunataga cuyapanchi paycuna munashganno y ali shongulanpaj Diospita yachachicurmi. Wamrayoj captenga, ¿imapitaraj parlapashwan? Wamrancunata ashmananpaj, familianpis alila goyananpaj Biblia yachachicushganta niptinchega tayta cajcunaga cushi cushilachi chasquicunga. Y achca candaduyoj puncuta ricarga alichi canman shamoj tiempucho suwacojcuna manana cananpaj cajpita parlapaptinchi, chay wichan imatapis manana manchacunapaj. Imano captinpis shumaj ricarcachishun Diospa Palabran imano cawaynincho yanaparcunanpaj cajta. Naga parlashganchi Katarína cayno nin: “Puntataga yarpachacömi imano rasunpa caj yachachicuycuna yanapämashganta”. Chayta rurashpanga más shumajräshi yachachicun.

14. Proverbios 27:17 texto nishganno, ¿imanotaj yanapämäshun Diospita yachachicunapaj pilawanpis yanagänacurga?

¹⁴ Waquincunatapis yanapämänanchipaj nishun. Apóstol Pabluga imaycatami Timoteuta yacharcachergan paypis shumaj Diospita yachachicunanpaj (1 Cor. 4:17). Timoteo rurashgannopis congregaciunchoga  ashishwanmi ali yachachicoj hermanucunata (leiriy Proverbios 27:17). Shawn hermanupita parlarcushun. Paymi precursorno yanapacurgan juc religiunniyoj achca runacuna cashgan marcacho. Yachachicuycarla caycänanpaj ima yanapashganpita cayno nin: “Pilawanpis yanagänacurmi yachachicoj yargoj cä, wasin wasin yachachicuycarga parlapacärejmi cä, imano más shumaj yachachicärinapaj. Chaylaraj juc runata imano yachachishganchipitapis parlapacärejmi cä, chayta rurapäcurmi yachachicuynëcuna aliyarcoj”.

15. ¿Imanirtaj Diosta mañacurir-raj yachachicoj yargushwan?

¹⁵ Jehovata ruwacushun yanapämänanchipaj. Diospita yachachicoj yargunapäga payta mañacuycur-rämi yargushwan. Espíritu santun yanapämaptinchirämi imapis ali camacanga (Sal. 127:1; Luc. 11:13). Alimi canga Jehovata wilapaptinchi imacunacho yanapämänanchipaj. Juc ali shongu runata chay junaj tarinapaj mañacurga alapa alimi canga. Awmi, calpachacushun Diospita lapan runacunata yachachinapaj.

16. ¿Imanopataj Bibliapita shumaj yachacushganchega yanapämashwan Diospita shumaj yachachicunapaj?

¹⁶ Tiempunchita camacächishun Bibliapita shumaj yachacurcunapaj. Biblia cayno nin: “Yarpachacuy [...] Tayta Diosninchi munashanno cawayga mas alli caway cashanta” (Rom. 12:2). Diosninchita masraj reguirga mana manchacuypami puncun puncun Paypita yachachicushun. Katarína cayno nin: “Cuentata gocurgä Bibliapa waquin yachachicuyninman alapa mana yaracuycashgäta, chaymi calpachacurgä yaracuynëta sinchiyarcachinäpaj. Chaypäga estudiargä Diosninchi imanir Camacoj cashganta, Palabranta imano escribichimushganta y cay Pachacho pïcuna rasunpa caj sirvejnin cashgantapis”. Katarinaga más alinash yaracurgan Bibliata shumaj yachacushganraycur y cananga más cushi cushilanash predicacun.

17. ¿Imanirtaj Jesusga ganas ganasla Taytanpita yachachicurgan?

¹⁷ Waquin runacuna chasquicuyta mana munaptinpis Jesusga ganas ganaslami Papäninpita yachachicurgan. Chaytaga rurargan runacuna rasunpa cajta yachacunanpaj, achcajmi pantacashgaraj carcaycargan. Jesusga musyarganmi nawpacho chasquicuyta mana munajcunapis tiempuwan cambiananpaj cajta. Juc tiempuchoga quiquin castancunami Jesusta wasguipargan (Juan 7:5). Wanushganpita cawarimushgan wichanrämi hermanuncuna cristianuman ticrapäcurgan (Hech. 1:14).

18. ¿Imanirtaj Diospita yachachicuycarla caycashwan?

¹⁸ Manami musyanchichu yachachicushganchita pïcuna chasquicärinanpaj. Waquincunapäga tiempuran pasanan ali shongulanwan chasquicunanpaj. Waquin runacunaga Diosta cushi cushila sirvishganchita ricar y imano cawacushganchita ricarpis Diosta sirvir galaycärinman (1 Ped. 2:12).

19. ¿Imatataj gongashwanchu 1 Corintios 3:6, 7 textucuna nishganno?

¹⁹ Murupacoj carpis y plantashganchita pargoj carpis, quiquin Diosninchimi imatapis winachimunga (leiriy 1 Corintios 3:6, 7). Etiopía naciunpita Getahun wawgui cayno nin: “Juc marcachoga 20 watacunapanomi japalä Testigo cargä. Canan ichanga 14 publicadorcunana capäcö. Isgun hermanucuna, warmëpis y quimsa wamräcunapis  bautizacärishgana. 32 runacunanomi juntacärë reuniuncunachopis”. Getahun wawguinchiga cushicunmi mana uticaypa Diospita yachachicushganpita, y lapancho quiquin Jehová imano yanapacamushganta ricarpis (Juan 6:44).

20. ¿Imanotaj cashwan juc minacho salvacoj runacunano?

²⁰ Jehovaga pï may runacuna salvacunantami munan. Cay mundo ushacänanpäga ichiclana pishin, chaymi Jesús pushaycämanchi may chaycho caycaj runacunata yachachinapaj y Taytalanchi Jehovaga cushicungami chaycho ganas ganasla yanapacuptinchi (Ageo 2:7). Mina rurincho runacuna wichgapacushga quedacäriptenga yanapacoj runacunaga juclachi aywapäcunman salvananpaj. Chay japuylami caycan predicaciunninchi, runacunapa cawaynintami salvaycanchi. Jucninchi jucninchi yanapänacurga alimi canga, manami musyanchichu Diablupa maquinpita ayca runacuna salvacärinanpaj. Bolivia naciuncho tiyaj Andreas wawgui cayno nin: “Pipis bautizacunanpäga manami juc ishcaylachu yanapacun, lapanchirämi yanapacunchi”. Chauras noganchipis ganas ganasla Diospita yachachicuycäshun, chayta rurarga Jehovami bendecimäshun y paypita yachachicushganchipis cushircachimäshunmi.