1. a) ¿Imaynatan Jesús kay pachapi kashaspa runakunaman yachachiran? b) ¿Imaynatan qatikuqninkunapas yachachiranku? (Qhaway tapanpi kaq dibujota.)

KAY pachapi Jesús kashaspaqa kusisqan runakunaman Diosmanta yachachiq. Payqa munanmi noqanchispas kusisqa runakunaman Diosmanta yachachinanchista (Juan 4:35, 36). Chaytan Jesuspa discipulonkunapas ruwaranku. Jesuspa ejemplonta qatikuspan paykunapas kusisqa Diosmanta willaranku (Luc. 10:1, 5-11, 17). Tiempowanmi ichaqa Jesuspa discipulonkunaqa pisikallpayaranku, Jesusta wañuchipusqankuraykun paykunaqa manaña Diosmanta willayta munarankuchu (Juan 16:32). Ichaqa kausarimpusqan qhepallamanmi Jesusqa jujmanta discipulonkunata kallpacharan Diosmanta willashanallankupaq, chaymi paykunaqa jujmanta kallpachakuranku kusisqa Diosmanta willanankupaq. Chayta rikuspan enemigonkunapas niranku: “¿Imaraykutaq qankunari Jerusalén llaqtaman yachachikuyniykichista junt’aykachishankichis?”, nispa (Hech. 5:28).

2. ¿Imaynatan Jehová Dios yanapawashanchis?

² Jesusqa apostolkunaq tiemponmantapachan Diosmanta willasqanchista pusarishan. Chaymi 33 watapi Pentecostés fiestapi Jehová Diospa yanapayninwan 3.000 runakuna bautizakuranku (Hech. 2:41). Chaymantapachan kunankamapas askha runakuna Diospi iñipushanku (Hech. 6:7). Chaymantapas kikin Jesusmi willaran kay tukukuy p’unchaykunapi askha runakuna Diosmanta willasqanchista uyarikunankuta (Juan 14:12; Hech. 1:8).

3, 4. a) ¿Imaraykun wakin llaqtakunapi sasa kanman Diosmanta willay? b) ¿Imamantan kay yachachikuypi yachasunchis?

 ³ Llapallanchismi kallpachakunanchis Jehová Diosmanta runakunaman kusisqa willananchispaq. Wakin llaqtakunapi runakunaqa allintan uyarikunku Diosmanta willasqanchista, chaymi tiemporaq faltawanchis paykunaman yachachinanchispaq. Wakin llaqtakunapin ichaqa sasapuni wasinkupi runakunata tariy, wasinkupiña kanku chaypas manan Diosmantaqa uyarikuyta munankuchu.

⁴ Yaqapaschá tiyasqanchis llaqtapipas sinchi sasa kanman runakunaman Diosmanta willay. Chhaynaqa, ¿iman yanapawasun ama pisikallpayaspa Diosmanta willashanallanchispaq? Chaymantan kay yachachikuypi yachasunchis. Yachallasuntaqmi imas chhaynapi tarikuq hermanonchiskunata yanaparan kusisqalla Diosmanta willanankupaq chaytapas.

5. ¿Imaraykun wakin hermanonchiskunapaq Diosmanta willay sasa kanman?

⁵ Wakin hermanonchiskunapaqqa sasan kashan runakunata wasinkupi tariy. Wakin llaqtakunapiqa jatun edificiokunapin tiyanku, chaypiqa cuidantekunan mana munankuchu chaypi tiyaq runakunaman Diosmanta willananchista. Wakin llaqtakunapitaqmi hermanonchiskunaqa karutaraq viajanku Diosmanta willanankupaq, chay llaqtachakunaman chayaspan ichaqa pisi runakunallata tarinku. Noqanchispas yaqapaschá chhaynapi tarikushanchis. Chhaynaqa, ¿iman yanapawasunman kusisqalla Diosmanta willashanallanchispaq?

6. ¿Imaynatan tupan Diosmanta willasqanchis challwa jap’iywan?

⁶ Jesusmi Diosmanta willasqanchista challwa jap’iywan tupanachiran (Mar. 1:17). Challwaq runakunaqa sasatan mayninpiqa challwata tarinku, chaywanpas manan pisikallpayankuchu. Aswanpas kallpachakunkun juj horapiñataq, juj ladokunapiñataq, jujniraymantañataq challwata jap’inankupaq. Noqanchispas paykuna jinan ruwasunman runakunata wasinkupi mana tarispaqa. Chaykunamantan kunan astawan yachasunchis.

7. ¿Imaraykun kallpachakunanchis juj horakunapiñataq Diosmanta willananchispaq?

⁷ Kallpachakusun juj horapiñataq Diosmanta willananchispaq. Sichus kallpachakusunchis juj horakunapiñataq Diosmanta willananchispaq chayqa askha runakunatan wasinkupi tarisunchis. Wakin runakunaqa ch’isintañan llank’anankumanta wasinkuman kutimpunku, chay horastan paykunaqa tiempochayoq kashanku. Chaymi kallpachakusunman chay horaskunata paykunawan rimaq rinanchispaq. Chaymantapas David hermanonchis jinan ruwasunman. Payqa compañaqnin hermanowansi predicasqanku pasayta mana tarisqanku wasikunaman jujmanta kutillankutaq. Paymi nin: “Chayta ruwaqtiykuqa askha runakunatan wasinkupi tariyku”, nispa. *

8. Eclesiastés 11:6 nisqan jina, ¿imata ruwananchispaqmi kallpachakushanallanchis?

⁸ Eclesiastés 11:6 textopin kallpachawanchis ama pisikallpayaspa Diosmanta willananchispaq (leey Eclesiastés 11:6). Chaytan hermanonchis Davidpas ruwaran, payqa kallpachakushallaranmi mana tarisqan runakunaman jujmanta kutinanpaq. Chhaynapin Diosmanta yachay munaq runata tariran. Chay runas hermanonchista nisqa: “Noqaqa pusaq watañan kaypiqa tiyashani, ichaqa manan juj testigollapas wasiymanqa jamuranchu,  chayraqmi reqsishaykichis”, nispa. Chaymi hermanonchis Davidqa khaynata nin: “May allinpunin runakunata tarinanchiskama wasinkupi maskhayqa, paykunamanta wakinqa allintan Diosmanta uyarikunku”, nispa.

9. ¿Imatan wakin hermanonchiskuna ruwanku runakunata wasinkupi mana tarispa?

⁹ Kallpachakunanchismi juj ladokunapiñataq Diosmanta willananchispaq. Wakin runakunaqa jatun edificiokunapin tiyanku, chaymi paykunawan rimayqa sasa. Chayraykun wakin hermanonchiskunaqa chay runakunaman Diosmanta willanankupaq callekunaman rinku, carretawan ima predicanku. Chaymantapas wakin hermanonchiskunaqa parquekunapi, mercadokunapi, negocio ruwanakunapi iman Diosmanta willallankutaq. Chaypiqa mastan runakunaqa Diosmanta uyarikunku. Bolivia nacionpi watukuq umalli Floiran hermanonchismi nin: “Mayninpiqa tiendakunapi mercadokunapin tardenkunata unamanta treskama Diosmanta willaq riyku. Chay horastaqa tiempoyoqmi runakunaqa kashanku, sumaqtan Diosmantapas uyarikunku. Chaymi wakinninkuwanqa Bibliatapas ña estudiashaykuña”, nispa.

10. ¿Imatan ruwasunman manapuniña runakunata wasinkupi tarispa?

¹⁰ Kallpachakunanchismi jujniraymantañataq Diosmanta runakunaman willananchispaq. ¿Imatan ruwasunman manapuniña runakunata wasinkupi tarispa? Jujniraymantañataqmi yachachisunman. Yaqapaschá cartakunata ruwasunman. Chaytan hermananchis Katarinapas ruwan, paymi nin: “Runakunata wasinkupi mana tarispaqa cartakunatan qelqani. Chay cartakunata qelqaspaqa kikin runawanpas rimashayman jinan qelqani”, nispa. Chhaynaqa, kallpachakusun jujniraymantañataq runakunaman Diosmanta willananchispaq.

11. ¿Imaraykun wakin runakuna Diosmanta willasqanchista mana uyarikuyta munankuchu?

¹¹ Wakin runakunaqa nishutan llank’anallankupi problemanku allichayllapi piensanku, chaymi Diosmantapas Bibliamantapas mana yachayta munankuchu. Wakin runakunapas ñak’ariykunata mana allin kausaykunata rikuspan Diospipas Bibliapipas mana creeyta munankuchu. Chaymantapas religionpi umallikunaq mana allin ruwasqankuta rikuspan runakunaqa manaña Diosmanta yachayta munankuchu. Chhaynaña runakuna kashanku chaypas, ¿iman yanapawasunman ama pisikallpayaspa Diosmanta willashanallanchispaq?

12. Filipenses 2:4 nisqan jina, ¿imatan ruwananchis runakuna Diosmanta willasqanchista uyarikunankupaq?

¹² Diosmanta willasqanchis runakunamanqa munakusqanchistan rikuchinanchis. Yaqapaschá qallariypiqa wakin runakunaqa Diosmanta willasqanchista mana uyarikurankuchu, tiempowanmi ichaqa munakuq khuyapayakuq kasqanchista rikuspa Diosmanta willasqanchista uyarikuranku (leey Filipenses 2:4). David hermanonchismi nin: “Sichus Diosmanta willashaqtiy runakuna mana Diosmantapas Bibliamantapas yachayta munankuchu chayqa, usqhayllan Bibliayta waqaychakapuni. Jinaspa makilla uyarini imachus niwasqankuta. Chhaynapin reparani imakuna llakichishasqanta, chayman jinataqmi paykunata yanapani”, nispa.

13. ¿Imaynatan runakunata reparachisunman Bibliaq yachachisqanqa allinninkupaq kasqanta?

¹³ Chaymantapas imamantachus yachayta munashanku chayman jinan runakunamanqa rimapayananchis, chhaynapin rikuchillasunmantaq paykunata munakusqanchista. Runakunaqa reparanankun imaynatachus Bibliaq yachachisqan vidankupi yanapanman chayta. Yaqapaschá willasqanchis runa wawayoq kasqanta reparanchis. Chhayna kaqtinqa wawakunata imayna uywaymantan rimapayasunman, otaq familiapi imayna kusisqa kausaymanta rimapayasunman. Chaymantapas yaqapaschá juj wasita rikusunman askha candadokunayoqta. Chhayna kaqtinqa chay wasiyoq runamanmi willasunman pisi tiempollamanta kay millay kausay tukupunanta, suwakunapas manaña kapunanta. Chaykunataqa Bibliawanpunin yachachinanchis, chhaynapin reparanqaku Bibliaq yachachisqanqa allinninkupaqpuni kasqanta. Katarína hermananchismi nin: “Diosmanta willaq rinaypaqqa ñaupaqtan piensarini imaynatas Biblia yanapawaran chayta. Chaymi yanapawan runakunaman tukuy sonqowanpuni Diosmanta yachachinaypaq”, nispa.

14. Proverbios 27:17 nisqan jina, ¿imaraykun allinpuni hermanonchiskunaq yanapayninta mañakuy?

 ¹⁴ Diosmanta yachachiq rishaspaqa jujkunawanmi yanapachikunanchis. Apóstol Pabloqa allin yachachiqmi karan, paymi Timoteotapas yanaparan allin yachachiq kananpaq. Chhaynapin Timoteoqa askha runakunata yanaparan (1 Cor. 4:17). Noqanchispas Timoteo jinan imaymanata yachasunman allin experienciayoq hermanonchiskunamanta, chaymi paykunaq yanapayninta mañakunanchis (leey Proverbios 27:17). Shawn hermanonchismanta yachasunchis. Payqa juj tiempon juch’uy llaqtachakunaman Diosmanta willaq risqa, chay llaqtachakunapiqa llapa runakunapas religionniyoqñas kasqaku. Chaywanpas payqa manas pisikallpayasqachu. Paymi nin: “Diosmanta willaq rishaqtiyqa manan sapallaychu riq kani aswanpas juj hermanokunawanmi compañachikuq kani. Compañawaqniy hermanokunawanqa imaynatas runakunaman aswan allinta yachachiykuman chaykunamantan rimaq kayku. Chhaynapin yacharaykuña imaynata runakunaq tapuwasqankuman kutichiyta”, nispa.

15. ¿Imaraykun allinpuni Diospa yanapayninta mañakuy?

¹⁵ Jehová Diospa yanapaynintan mañakunanchis. Manaraq Diosmanta willaq rishaspaqa Jehová Diospa santo espirituntan mañakunanchis, chhaynapi runakunaman allinta yachachinanchispaq (Sal. 127:1; Luc. 11:13). Jehová Diosmanta mañakuspaqa sut’itan ninanchis imapi yanapanata necesitasqanchista. Chaymi Diosmanta willaq rinanchispaqqa Jehová Diosmanta mañakusunman pay sonqo runakunata tarinanchispaq. Chay qhepamanmi ichaqa kallpachakunanchis llapa runakunaman Diosmanta yachachinanchispaq, chayta ruwasunchis chayqa tarisunpunin Dios sonqo runakunataqa.

16. ¿Imaraykun Bibliata allintapuni estudiananchis?

¹⁶ Kallpachakunanchismi Diospa simin qelqata allinta estudiananchispaq. Biblian nin: “Chhaynapin allinta yachankichis Diospa munayninqa allinpuni, junt’asqapuni, sonqonpaq jinapuni kasqanta”, nispa (Rom. 12:2). Sichus Bibliata estudiasunchis chayqa allintan Diosta reqsisunchis. Chaymi yanapawasun ama iskayaspa Diosmanta runakunaman yachachinanchispaq. Chaytan Katarína hermananchispas ruwan, paymi nin: “Allintaña Jehová Diosmanta yacharani chaypas, kallpachakunaymi karan aswan allinta payta reqsinaypaq, chhaynapi ama iskayaspa Diosmanta willanaypaq. Chaymi astawan estudiarani Jehová Diosqa kamaqninchispuni kasqanmanta, Bibliapas paypa siminpuni kasqanmanta, Jehová Diospa testigonkunapas paypa llaqtanpuni kasqanmanta”, nispa. Chay ruwasqanmi Katarína hermananchista yanaparan allin iñiyniyoq kananpaq, ama iskayaspa kusisqa Diosmanta willananpaqpas.

17. ¿Imaraykun Jesús kallpachakuran runakunaman Jehová Diosmanta willashanallanpaq?

¹⁷ Manaña runakuna Jesusta uyariyta munarankuchu chaypas, payqa manan chaywanqa pisikallpayaranchu. Jesusqa allintan repararan chaypi tiyaq runakunaqa mana allintachu Diosmanta yachasqankuta, chaymi paykunata yanapayta munaran. Chaymantapas Jesusqa yacharanmi mana uyarikuq runakunaqa tiempowan uyarikunankuta. Jesuspa familianpas qallariypiqa manan paytaqa uyariyta munarankuchu. Tiempowanmi ichaqa Jesuspa kausarimpusqan qhepaman payta qatikuranku (Juan 7:5; Hech. 1:14).

18. ¿Imaraykun kallpachakushanallanchis Diosmanta runakunaman willananchispaq?

¹⁸ Kallpachakushanallanchismi runakunaman  Diosmanta willananchispaq. Yaqapaschá tiempowanqa paykunaqa astawan Diosmanta yachayta munanqaku. Chaymantapas yaqapaschá runakunaqa allin kausasqanchista rikuspa Jehová Diosta jatunchankuman (1 Ped. 2:12).

19. 1 Corintios 3:6, 7 nisqan jina, ¿pin runakunata Diospa llaqtanman pusamun?

¹⁹ Apóstol Pablon niran: “Noqan plantarani, Apolostaq qarparan, ichaqa Diosmi wiñachiqqa”, nispa (leey 1 Corintios 3:6, 7). Apóstol Pabloq nisqan jina Jehová Diosmi runakunataqa llaqtanman pusamun. Etiopía nacionmanta Getahun hermanonchismi nin: “20 wata masmi llaqtaypiqa sapallay Jehová Diospa testigon karani. Kunanqa 14 runakunañan Diosmanta willashayku. Esposaypas kinsantin wawaykunapas ñan bautizakapunkuña. Juñunakuykunapipas yaqa 32 runakunañan juñunakuyku”, nispa. Getahun hermanonchisqa kusisqan kashan mana sayk’uspa runakunaman Diosmanta willasqanmanta. Payqa pacienciawanmi suyakuran allin sonqoyoq runakunata Jehová Dios yanapananta (Juan 6:44).

20. ¿Imaraykun kallpachakunanchis juj nisqalla runakunaman Diosmanta willananchispaq?

²⁰ Jehová Diosqa llapa runakunatan munakun, payqa manan munanchu ni juj runallapas wañunanta. Chaymi kallpachakunanchis runakunaman Diosmanta willananchispaq, chhaynapi llapa Dios sonqo runakuna Diospa llaqtanman jaykumunankupaq (Hag. 2:7). Kay tiempopi runakunaqa chinkasqa jinan kashanku, chaymi kallpachakunanchis Jesuswan kuska juj nisqalla runakunaman Diosmanta willamunanchispaq. Chayta ruwasunchis chayqa runakunatan yanapasunchis salvakunankupaq. Kay tiempopiqa astawanraqmi Dios sonqo runakunata maskhamunanchis, chhaynapi Satanaspa kamachisqan pachamanta lloqsipunankupaq. Bolivia nacionmanta Andreas hermanonchismi nin: “Mayqen estudiantepas Diospa llaqtanpi bautizakuqtinqa anchatan kusikunchis bautizakunanpaq llapallanchis yanapasqanchismanta”, nispa. Chhaynaqa kallpachakushanallanchismi kusisqa Diosmanta yachachinanchispaq. Chayta ruwasunchis chayqa Jehová Diostan kusichisun, manataqmi imawanpas pisikallpayasunchu.