1. a) Jesusca villachinamandaca ¿imatata yachachishpa saquirca? b) Chaimandaca ¿imatata paipa discipulocunapash rurarca? (Callari paginapi fotota ricupangui).

JESÚS cai alpapi cashpaca cushijushpami villachirca. Paipa catijcunapash shinallata villachichunmi munarca (Juan 4:35, 36). Jesuspa discipulocunaca Jesushuan cashpaca cushijushpami villachinajurca (Luc. 10:1, 5-11, 17). Shinapash Jesusta prezu japishpa huañuchijpimi paipa discipulocunaca villachinataca desanimarirca (Juan 16:32). Chaimandami Jesús causarishca jipaca, villachinataca pundapi churachun animarca. Shina rurashcamandami Jesús jahua cieloman rishca jipaca, paipa discipulocunaca cutin cushijushpa villachi callarirca. Chaimi contracunaca Jesuspa discipulocunataca: ‘Jerusalenbi tucuicunamanmi yachachishpa puringuichi’ nishpa rimarca (Hech. 5:28).

2. Jehová Diosca Jesuspa catijcunataca ¿imashinata bendiciashca?

² Callaripica Jesusmi paipa catijcunataca ali villaigucunata villachishpa catichun ñaupaman pushajurca. Chaimi Jehová Dios bendiciajpica ashtaca gentecunaca ali villaigucunata chasquirca. Shinami Pentecostés huata 33​pica, más o menos 3 mil gentecuna bautizarirca (Hech. 2:41). Chai tiempopimi Jesusta catijcunaca ashtahuan mirashpa catirca (Hech. 6:7). Shinapash Jesusca, tucurimui punllacunapimi gentecunaca Diosmanda ashtahuan yachajungapaj munanga nircami (Juan 14:12; Hech. 1:8).

3, 4. a) Huaquin llactacunapica ¿imamandata villachinaca shinlli can? b) Caipica ¿imatata yachajupashun?

³ Tucuicunallatami villachinapi ama desanimaringapaj esforzaripanchi. Huaquin llactacunapica ashtaca gentecuna Bibliamanda yachajungapaj munashcamandami villachinaca fácil can.  Cutin huaquin llactacunapica villachinaca na facilchu can. Villachingapaj llujshishpaca gentecunataca na huasipi tupanllu. Huasipi cashpapash chai gentecunaca huaquinbica Bibliamanda yachajungapaca na munanllu.

⁴ Na fácil villachita usharij llactacunapi causashpaca, cai temapimi gentecunahuan ashtahuan parlangapaj imata rurana cashcata, gentecuna na uyangapaj munajpi huaquin huauquipanicuna imata rurashcata yachajupashun. Shinallata imamanda na desanimarishpa villachishpa catina cashcatapashmi yachajupashun.

5. Cunan punllacunapica Testigocunapaca ¿imata ashtahuan shinlli ricurishca?

⁵ Testigocunapaca cunanbi gentecunaman villachinaca ashtahuan shinllimi tucushca. Huaquin gentecunaca jatun edificiocunapi o condominiocunapimi causan. Cashna huasicunapica guardiacuna cuidanajushcamandami na fácil villachingapaca yaicuita usharin. Guardiacunaca dueñocunalla o rijsishcacunalla yaicuchunmi ricurianajun. Chaimi chai huasicunamanga na yangata yaicuita usharinlla. Cutin shuj pushtucunapica huasin huasin villachingapaj ri ushashpapash gentecunataca casi na tupanchichu. Cutin shuj huauquipanicunaca carucunata rishpa ashalla gentecuna tiaj pushtucunapimi villachin. Chaimandami ashtaca horascunata rishpapash huaquinbica huasicunapica pitapash na tupan. Ñucanchicunata shina pasajujpi ama desanimarishpa villachishpa catingapaca ¿imatata rurai ushapanchi?

6. Villachinataca Jesusca ¿imahuanda chimbapurarca?

⁶ Jesusca villachinataca pescadocunata japinahuanmi chimbapurashpa parlarca (Mar. 1:17). Huaquinbica pescadota japijcunaca cada punlla pescadota japingapaj rishpapash nimata na tarishpami tigramuita ushan. Shina pasajpipash pescadota japijcunaca na desanimarinllu. Ashtahuangarin huaquinbica shinallatami pasan yashpami pensarin. Chaimandami pescadocunataca shuj pushtupi, shuj horaspi mascashpa catin. Villachinapipash shinallatami ruraita ushapanchi. Chaipaca huaquin yuyaicunata ricupashun.

7. Shuj shuj horascunapi villachinaca ¿imashinata ñucanchitaca ayudaita ushan?

⁷ Horasta cambiapashunchi. Gentecuna huasipi cana horaspi villachishpaca ashtahuanmi gentecunahuanga parlai ushapashun. Gentecunaca maimandapash siempremi huasigumanga muyumun. Chaimandami ashtaca huauquipanicunaca chishillapi o tutayajujpi villachin. Shina villachishpaca ashtahuanmi gentecunataca tarishca. Chishicunapica gentecunaca ashtahuan tranquilo caimandami villachijpica uyana munaitapash charin. David shuti anciano huauquigu imata rurashcatapashmi rurai ushapanchi. Cai huauquiguca villachingapaj rishca territoriopica gentecunata chayashcandi na tupashpaca, jipamanmi paita cumbaj huauquigundi cutin chai huasicunaman tigrashpa villachin. Paica: “Shina rurajpica na crinatami na llujshishca huasicunapica casi tucuicuna llujshin” nin. *

8. Eclesiastés 11:6​pi nishca shimicunataca ¿imashinata pactachi ushapanchi?

⁸ Cai temapa callari textoca ama desanimarishpa villachishpa catichunmi animajun (Eclesiastés 11:6​ta liipangui). Jahua parrafomanda huauqui Davidca na desanimarishpa villachishcatami ricupanchi. Shina rurashcamandami Bibliamanda yachajungapaj munajta tarirca. Chai jariguca cashnami nirca: “8 huatacunatami caipi causajuni. Shinapash cunanmi primera vez shuj testigo de Jehovaca ñuca huasitaca huactachishca” nircami. Huauqui Davidca: “Huasicunapi gentecunata  tupangacaman esforzarishpaca, paicuna Bibliamanda yachajungapaj munaj cashcatami cuenta japipashcani” nirca.

9. Huaquin huauquipanicunaca huasipi na tarishca gentecunaman villachingapaca ¿imatata rurashca?

⁹ Shuj shuj ladocunapi villachipashunchi. Huasipi na tarishca gentecunaman Bibliamanda villachingapaca huaquin huauquipanicunaca shuj shuj ladocunapimi villachishca. Edificiocunapi na villachi ushashpaca huaquin huauquipanicunaca callecunapi o predicación publicata utilizashpami villachishca. Shina rurashpami huasipi na tarishca gentecunahuanga parlai ushashca. Ashtaca huauquipanicunami gentecuna mercadocunapi, parquecunapi, negociocunapi Bibliamanda ashtahuan yachajungapaj munashcata cuenta japishca. Bolivia llactamanda Floiran shuti shuj superintendente de circuito huauquiguca: “Mercadocunapi, negociocunapica gentecunaman villachingapaca entre la 1 o las 3 de la tardecunatami rinchi” nin. “Chai horascunami gentecunaca asha desocupado caimanda uyangapaj munan. Paicunahuanga ali parlashpami, Bibliamandapash yachachi callarishcanchi” nin.

10. Gentecunaman villachingapaca ¿imatata ashtahuan rurai ushapanchi?

¹⁰ Gentecunaman villachingapaca shuj shuj cosascunata rurapashunchi. Shuj shuj horascunapi villachingapaj rishpapash na tupashpaca ¿imatata ashtahuan rurai ushapanchi? Katarína shuti paniguca: “Pitapash shuj huasipi na tupashpaca, paiman imata ningapaj munashcatami shuj cartagupi escribishpa saquini” nin. Caimandaca ¿imatata yachajupanchi? Gentecunaman villachingapaca shuj shuj cosascunata rurana cashcatami yachajupashcanchi.

11. Huaquin gentecunaca ¿imamandata villachijpica na uyangapaj munan?

¹¹ Huaquin gentecunaca villachijpica na uyangapaj munanllu. Paicunaca Taita Diosmanda, Bibliamandapash yachajunataca na minishtinchichu yuyanmi. Shinallata cai mundopi ashtaca llaquicuna, problemacuna tiajta ricushpami Diospipash na crin. Religionda ñaupaman pushajcunapash Bibliapi nishcacunata na pactachijta ricushpami, Bibliapipash na crin. Cutin shujcunaca paicunapa trabajopi, paicunapa familiapi, paicunapa problemacunapi yapata preocuparimandami Biblia paicunata ayudai ushashcataca na cuenta japin. Shinaca ashtaca gentecuna na uyangapaj munajpipash ¿imashinata na desanimarishpa villachishpa catita ushapanchi?

12. Filipenses 2:4​taca ¿imashinata villachinapica pactachi ushapanchi?

¹² Gentecunamanda preocuparishcata ricuchipashunchi. Ashtaca gentecunaca callaripi villachijpi na uyangapaj munashpapash jipallamanga uyashcami. ¿Imamandata caica pasashca? Paicunapi preocuparishcata ricuchijpimi, jipamanga uyangapaj munashca (Filipenses 2:4​ta liipangui). Por ejemplo, ñaupa parrafopi parlashca huauqui Davidca: “Pipash ‘Bibliamanda na yachangapaj munanichu’ nijpica Bibliata huacaichishpa, publicaciongunatapash saquishpami imamanda Bibliamanda na yachangapaj munashcata tapuchinchi” nin. Gentecunaca paicunamanda preocuparijtaca cuenta japinllami. Paicunaca talvezpashmi ñucanchi imata nishcataca cungaita ushan. Shinapash ñucanchicuna paicunamanda preocuparishpa imashina tratashcataca na cungangachu. Gentecuna na uyangapaj munajpipash paicunapi preocuparishcataca ñucanchi parlocunahuanmi ricuchita ushapanchi.

13. Villachinajujpi gentecuna uyachunga ¿imatata ruraita ushapanchi?

¹³ Gentecunapi preocuparishcataca, paicuna yachangapaj munashca temacunamanda parlashpami ricuchi ushapanchi. Huahuacunata charijta ricushpaca taitacunapa consejocunamandami parlaita ushapanchi. Taitacunaca huahuacunata ali viñachingapaj, familia ucupi cushilla causangapami Bibliapa consejocunata minishtin. Cutin shuj huasi pungupi ashtaca candadocunata ricushpaca cunan punllapi ashtaca shuhuacuna tiashcamanda, shinallata shuj punlla chai nali gentecuna tucurinatapashmi parlaita ushapanchi. Shinapash tucui uyajcunamanmi Biblia tucuicunatallata ayudai ushashcata parlana capanchi. Párrafo 10​pi parlashca panigu Katarinaca: “Ñucaca, ñucata Biblia imashina ayudashcapi pensarishpami Bibliamanda parlashpaca tucui shunguhuan parlani. Tucui shunguhuan parlajtaca gentecunaca cuenta japinllami” ninmi.

14. Proverbios 27:17​pi nishcashnaca shuj cumbahuan villachinaca ¿imashinata ayudan?

 ¹⁴ Shuj huauquipanicunamanda yachajupashunchi. Apostolcunapa punllacunapica apóstol Pabloca imashina ali villachinatami Timoteomanga yachachirca. Chaitallata shuj huauquipanicunamanbash yachachichunmi animarca (1 Cor. 4:17). Timoteoshnallatami ñucanchicunapash congregacionmanda huauquipanicunapa experienciamanda ashtacata yachajui ushapanchi (Proverbios 27:17​ta liipangui). Cunanga Shawn shuti huauquigumanda yachajupashunchi. Paica gentecuna paicunapa religionhuan contento causanajuj pushtupimi asha tiempotaca precursor shina sirvijurca. Chashna pushtupi ama desanimarishpa villachichunga paitaca ¿imata ayudarca? Paica ninmi: “Villachingapaj rijushpaca pipash cumbaj tiajpica siempremi cumbahuan rin carcani. Shuj huasimanda shuj huasiman rinajushpapash imashina ashtahuan ali villachinatami parlarin carcanchi” nin. “Shuj huasipi shuj persona imata nijpipash cutin shuj huasipi shinallata nijpi imata ninatapashmi parlarin carcanchi” nin.

15. Villachingapaj rijushpaca Jehová Diosta mañanaca ¿imamandata minishtirishcapacha can?

¹⁵ Jehovapa ayudata mañapashunchi. Villachingapaj rijushpaca siempremi Jehová Diostaca canba espíritu santohuan ayudahuangui nishpa mañana capanchi. Shinallami paipa munaitaca pactachi ushapashun (Sal. 127:1; Luc. 11:13). Jehová Diostaca imapipacha ayudachun munashcatami ninalla capanchi. Por ejemplo, “pipash ali shunguta charij genteta, Bibliamanda yachangapaj munaj genteta tarichihuai” nishpami mañaita ushapanchi. Chai jipaca, chai mañashcata pactachingapami ñucanchipash esforzarina capanchi.

16. Bibliamanda ali yachajunaca ñucanchitaca ¿imapata ayudan?

¹⁶ Bibliamanda ali yachajungapaj tiempota llujchipashunchi. Bibliapica: “Imami Taita Diospaj munai cajta, paita cushichinata, ima pandatapash na rurashpa causanata” yachajuichi ninmi (Rom. 12:2). Bibliapi nishcacunata ñucanchira ali yachajushpa, tucui shunguhuan crishpami villachinajushpaca shinallata villachipashun. Panigu Katarinaca ninmi: “Ñucaca Bibliamanda huaquin yachachishcacunapi tucui shunguhuan crina faltajushcatami cuenta japircani. Chaimi Taita Dios ciertopacha tiashcata, Biblia Diospa Shimi cashcata cringapaj, Jehová Dios cai alpapi shuj organizacionda charishcata segura cangapaj Bibliata ashtahuan estudiarcani” nin. Katarinataca Bibliamanda ashtahuan yachajunami Jehová Diospi tucui shunguhuan crishpa catichun, villachinapipash cushijushpa villachichun ayudarca.

17. Jesusca ¿imamandata gentecuna na uyajpipash villachishpa catirca?

¹⁷ Jesusca gentecuna na uyangapaj munajpipashmi na desanimarishpa villachishpa catirca. ¿Imamandata shina rurarca? Jesusca ali villaigucunata gentecunaman villachina minishtirishcapacha cashcata yachaimandami shina rurarca. Paica ashtaca gentecunatami ayudangapaj munarca. Shinallata callaripi na uyangapaj munashcacunapash, jipamanga Diospa Reinomanda ali villaigucunata uyana cashcatami ali yacharca. Chaica paipa familiapillatami pasarca. Jesús 3 huata chaupita villachijujpipashmi paipa huauquicunaca Jesuspica na crirca (Juan 7:5). Shinapash Jesús huañushpa causarishca jipaca, paipa huauquicunaca paita catijcunami tucurca (Hech. 1:14).

18. ¿Imamandata Diospa Reinomanda villachishpa catipanchi?

¹⁸ Diospa Reinomanda villachijpi picuna ñucanchita uyanataca na yachapanchichu. Huaquingunaca shuj tiempo jipami Bibliamandaca yachajungapaj munan. Cutin cunanbi ñucanchita  na uyangapaj munaj gentecunapashmi ñucanchicuna imata rurajta, imashina causajta ricunajun. Chaimi talvez shuj punllaca paicunapash Jehovamanda yachajungapaj munanga y yachajushpaca paicunapashmi “Diostaca punchapambagumi cangui” ninajunga (1 Ped. 2:12).

19. 1 Corintios 3:6, 7​pi nishcashnaca ¿imatata siempre yarina capanchi?

¹⁹ Ñucanchicuna tarpunshna, yacuta churanshna villachinajujpipash ‘Taita Diosmi viñachijun’. Chaitaca siempremi yarina capanchi (1 Corintios 3:6, 7​ta liipangui). Etiopía llactamanda Getahun shuti huauquica ninmi: “20 yali huatacunatami casi na yapa seguido villachi pushtupi ñucalla villachijurcani. Pero cunanga 14 publicadorcunami tian. 13​ca ña bautizarishcami. Paicunapurapica ñuca huarmigu, ñuca quimsa huahuacunapashmi capan. Tandanajuicunapica 32puracunami tandanajupanchi” nin. Getahun huauquica na shaijushpa villachishcamanda, Jehová Diosllata ali shungu gentecunata paipa organizacionman pushamuchun shuyashcamandami cushilla sintirin (Juan 6:44).

20. Ñucanchicunaca terremotopi salvangapaj rinajuj gentecunashnaca ¿imapita igual capanchi?

²⁰ Jehová Diospaca tucuicunami valishca can. Chaimi ñucanchitaca paipa Churi Jesusta villachinapi ayudachun mingashca. Jehová Diospa punlla nara chayamujpillatami shuj shuj llactamanda gentecuna Jehovapa organizacionman shamuchun ayudana bendicionda charipanchi (Ageo 2:7). Ñucanchicunaca shuj terremoto tiashca jipa gentecunata salvangapaj rinajuj cuendami capanchi. Terremotopica na tucui salvangapaj rishcacunachu gentecunataca salvan. Shinapash tucuicunapa trabajollatami importante can. Villachinapipash shinallatami pasan. Na tucuicunachu Diablopa mundomandaca gentecunata salvaita ushapashun. Shinapash gentecunata salvachunga Jehová Diosca ñucanchicunamandaca maijandapashmi utilizaita ushan. Boliviamanda huauqui Andresca: “Pipash Jehová Diosmanda yachajushpa bautizarishpaca, congregación entero ayudashcamandami bautizarishcata intindipashcani” nin. Shinaca tucui shunguhuan cushijushpa villachingapaj esforzaripashunchi. Shina rurajpica Jehová Diosca ninandami bendicianga.