1. Eaa te akaraanga ta Iesu i akanoo no tana au pipi, e eaa ta ratou i rave? (Akara i te tutu i te kapi mua.)

TO IESU tuatau i te enua nei, kua rave maroiroi aia i te angaanga tutu aere e kua inangaro i tana au pipi kia rave katoa i te reira. (Ioa. 4:35, 36) Kua mataora a Iesu e tana au pipi i te rave anga i te angaanga tutu aere. (Luka 10:1, 5-11, 17) Inara te mate anga a Iesu, kua akaparuparuia te inangaro o te au pipi no te tutu aere. (Ioa. 16:32) I muri ake i tona tuakaouanga, kua akamaroiroi a Iesu ia ratou kia tutu ua atu rai. I muri ake i tona oki anga ki te rangi, kua maroiroi akaou ratou i te tutu aere, e kua kopekope to ratou enemi: “E i na, kua ki rava Ierusalema ia kotou i ta kotou i tuatua.”​—Anga. 5:28.

2. Akapeea a Iehova te akameitaki anga i ta tatou angaanga tutu aere?

² Kua arataki a Iesu i te angaanga a te au Kerititiano i te au anere mataiti mua, e kua akameitaki a Iehova i te reira. Ei akaraanga, ia Penetekote 33 T.N., mei tetai 3,000 tangata tei papetitoia. (Anga. 2:41) E kua tupu ua atu te numero o te au pipi ki te maata. (Anga. 6:7) Noatu rai, kua totou a Iesu e ka tupu te angaanga tutu aere ki te maata i te au rā openga.​—Ioa. 14:12; Anga. 1:8.

3-4. Eaa ra i ngatā ei no tetai pae kia rave i te angaanga tutu aere, e eaa ta tatou ka uriuri i roto i teia atikara?

³ Ka tauta tatou pouroa i te rave maroiroi i te angaanga tutu aere. I tetai au enua, e mea mama ua i te rave i te reira. No teea ra? No te mea e maata te tangata te inangaro ra i te apii i te Pipiria e te tiaki ra tetai pae kia vā mai tetai Kite no te rave i te reira! Inara i tetai au enua, e ngatā i te au  papuritia i te rave i te angaanga tutu aere; kare e tangata i te kainga e penei kare ratou e inangaro i te kite i te Pipiria.

⁴ Mei te noo ra koe i tetai ngai e ngatā i te rave i te angaanga tutu aere, penei ka tauturu teia atikara ia koe. Ka uriuri tatou eaa ta tetai pae i rave kia aravei maata atu i te tangata. E ka akara tatou i te tumu kia maroiroi tatou i te tutu aere noatu me ka akarongo mai te tangata e me kare.

5. Eaa te au manamanata e kite ana te au Kite?

⁵ E ngatā tikai no te maataanga o te Au Kite i te aravei i te tangata i to ratou kainga. Penei te noo ra tetai au papuritia i te au ngai kua paruru meitakiia te au are me kore kua aua ia te kainga o te tangata. Penei e tangata tiaki tetai te ka arai ia ratou kia kore e tomo ki roto, kia akatika roa mai te pu ngutuare. Tetai au papuritia, ka rauka ia ratou i te aere mei tera are ki tera are ma te kore e tamanamanata, inara kare e maata te tangata i te kainga. E ko tetai pae, ka tutu aere ratou i te au ngai mamao kare e nooia ana e te tangata. Penei ka aere te au papuritia ki te au ngai mamao kia aravei e tai ua tangata​—kare ra aia i te kainga! Me te tutu aere ra tatou i roto i teia au turanga, auraka e tuku i te au. Eaa ta tatou ka rave kia akakoromaki i teia au turanga e kia puapingaia te angaanga tutu aere?

6. Akapeea te aronga tutu aere i aite ei ki te au ravakai?

⁶ Kua akaaite a Iesu i te angaanga tutu aere ki te angaanga ravakai. (Mare. 1:17) Penei ka tautai te au ravakai no tetai au rā e kare e rauka mai te ika. Kare ratou e tuku i te au, mari ra ka rave i te au taui anga. Ka taui ratou i te ora, te ngai, e te tu o te tautai. Ka rauka katoa ia tatou i te rave i te tauianga i roto i te angaanga tutu aere. Ka uriuri tatou i tetai au ravenga.

7. Eaa te ka tupu me tutu aere tatou i tetai ora ke?

⁷ Tamata i te tutu aere i tetai ora ke. Ka aravei tatou i te tangata me tutu aere tatou i te tuatau tei te kainga ratou. Kua kite tatou e oki ana te tangata ki to ratou kainga! E maata te au taeake e te au tuaine tei tutu aere i te avatea me kore i te aiai e kua aravei ratou i te tangata i te kainga. Pera katoa, penei kua akangaroi meitaki ratou e kua papa no te pukapuka i tera ora. Me kore, penei ka rauka ia koe i te taangaanga i te ravenga ta te tangata pakari ko David i rave. Me oti tetai ngai i te tutu aere putuputuia, ka oki aia e tona patana i te atoro akaou i te au are kare e tangata i te kainga. Karanga aia, “Poitirere tikai au i te kite e tei te kainga te tangata me oki akaou maua ki reira.” *

8. Akapeea tatou me taangaanga ia Koheleta 11:6 i roto i te angaanga tutu aere?

⁸ Auraka tatou e tuku i te au. Te akamaara maira ta tatou tumu irava i te tu tau kia akaari tatou. (E tatau ia Koheleta 11:6.) Ko David, tei taikuia i mua ana, kare aia i tuku ana i te au. I tetai kainga, kua aravei aia i te pu ngutuare i muri ake i tona oki putuputu anga ki reira. Kua inangaro teia tangata i te uriuri i te Pipiria e kua karanga, “E varu oku mataiti te noo anga i konei e kare rava au i aravei ana i tetai Au Kite o Iehova i toku kainga.” Karanga a David, “Kite mai au e me aravei koe i te tangata i to ratou  kainga, te maataanga o te taime ka āriki ratou i ta tatou karere.”

9. Eaa ta tetai au Kite i rave kia aravei i te tangata i te kainga?

⁹ Tamata i tetai ngai ke. E rauka ai i te aravei i te au tangata kare i te kainga, kua taui tetai pae papuritia i ta ratou ngai tutu aere. Ei akaraanga, ko te tutu aere i runga i te mataara e te taangaanga i te au pereoo puka, e ravenga meitaki teia no te aravei i te tangata e noo ana ki roto i te au are mamaata tei kore e akatikaia kia tutu aere i reira. Na teia tu e rauka ai i te Au Kite i te pukapuka ki te tangata e noo ana ki roto i teia au are. Pera katoa, kua kite mai te au papuritia e te inangaro ra te tangata i te pukapuka e ka āriki ratou i te au puka i ko i te au ngai noonooanga, te makete, e te au ngai pitiniti. Karanga a Floiran, e akaaere kotinga i Bolivia, “Ka aere matou ki te makete e te au ngai pitiniti mei te ora 1:00 ki te ora 3:00 i te avatea, te ora akangaroi o te aronga okooko. E reka ana ta matou pukapuka kia ratou e ka akamata tetai au apii Pipiria.”

10. Eaa te au ravenga no te aravei i te tangata?

¹⁰ Tamata i tetai ravenga ke. Penei kua tauta putuputu ana koe i te aravei i tetai tangata. Kua atoro koe iaia i te au taime tukeke e kare rai aia i te kainga. E ravenga ke atu ainei tetai no te aravei atu iaia? Karanga a Katarína, “E tata ana au i tetai reta ki te aronga kare au e aravei i te kainga.” Eaa te apiianga? E tauta i te aravei i te tangata i toou ngai na roto i te au ravenga tukeke o te angaanga tutu aere.

11. Eaa tetai pae kare e inangaro i te akarongo ki ta tatou karere?

¹¹ Kare tetai pae e inangaro i te akarongo ki ta tatou karere. Penei kare ratou e inangaro i te kite i te Atua e te Pipiria. Kare ratou e irinaki i te Atua no te mea te kite ra ratou i te kino i roto i teia ao. Patoi ratou i te Pipiria no te mea te kite ra ratou i te tu pikikaa o te au arataki akonoanga. Tetai pae, kua pou to ratou taime ki ta ratou ngai angaanga, kopu tangata, e to ratou au manamanata e kare e kite akapeea te Pipiria me tauturu ia ratou. Akapeea tatou me tutu ua atu rai ki te aronga tei manako e puapinga kore ta tatou karere?

12. Akapeea a Philipi 2:4 me tauturu ia tatou i roto i te angaanga tutu aere?

¹² Akaari i te tu inangaro. Te aronga tei kore i akarongo ki ta tatou karere i mua ana, kua āriki ratou i te nuti meitaki te akaari anga te au papuritia i te tu inangaro no ratou. (E tatau ia Philipi 2:4.) Ei akaraanga, karanga a David, “Me karanga mai tetai tangata e kare aia e inangaro i ta tatou karere, ka tuku au i taku Pipiria e taku puka ki roto i te kete e ka ui: ‘Ka inangaro au i te kite eaa koe i manako akapera ai.’” Ka kite te tangata e te manako ra koe ia ratou. Penei, kare ratou e maara i ta tatou i tuatua, inara ka maara ia ratou i toou tu meitaki. Noatu me kare te tangata e akatika ia tatou kia tuatua, kia akaari ra tatou na roto i to tatou tu oaoa e te inangaro ra tatou iaia.

13. Akapeea tatou me akatano i ta tatou karere kia tau ki te pu ngutuare?

¹³ Ka akaari tatou i te tu inangaro me akatano tatou i ta tatou karere kia tau ki te pu ngutuare. Ei akaraanga, te kite ra ainei tatou i te au akairo e e tamariki ta ratou? Penei ka inangaro te au metua i te kite i ta te Pipiria e akakite ra no te utuutu tamariki, e akapeea e rauka ai ia ratou tetai ngutuare mataora. E maata ainei te roka i runga i to ratou ngutupa? Penei ka uriuri tatou no runga i te kino e te mataku e tupu ra i teianei ao. Penei ka mataora te pu ngutuare i te akarongo e ka takoreia te au kino katoatoa. Noatu eaa te turanga, e tauturu i te tangata kia kite akapeea te Pipiria me tauturu ia ratou. Karanga a Katarína, “Ka akamaara ua rai au akapeea te Pipiria i te akameitakianga i toku oraanga.” Tei tupu mai, ka akakite a Katarína i te karere ma te papu, e ka kite meitaki te tangata i tona tu inangaro.

14. Ia Maseli 27:17, akapeea te au taeake me tauturu i tetai e tetai i roto i te angaanga tutu aere?

 ¹⁴ Pati i te tauturu a tetai ke. I te anere mataiti mua, kua apii a Paulo ia Timoteo i te au ravenga no te tutu aere e te apii anga, e kua akamaroiroi iaia kia taangaanga i te reira no te tauturu i etai ke. (1 Kori. 4:17) Mei ia Timoteo rai, ka puapingaia tatou mei te aronga tukatau i roto i ta tatou putuputuanga. (E tatau ia Maseli 27:17.) Akamanako ana i te akaraanga o te Taeake ko Shawn. No tetai tuatau, kua painia aia i tetai ngai kua mareka ua te tangata i ta ratou uaorai akonoanga. Akapeea aia te vai rekareka ua anga i te tutu aere? Karanga aia, “Ka angaanga kapiti au ki tetai taeake ke. Me tutu aere maua, ka tauturu maua i tetai e tetai kia akameitaki atu i to maua tu karape. Ei akaraanga, ka uriuri maua i tei tuatuaia i ko i te ngutupa, e ka akapeea me akameitaki atu i te reira me tupu akaou.”

15. Eaa i puapinga ai te pure i roto i te angaanga tutu aere?

¹⁵ Pure no ta Iehova tauturu. E pati i ta Iehova tauturu i te au taime ravarai me tutu aere koe. Ka anoano tatou i te tauturu a te vaerua tapu i roto i te au mea katoatoa ta tatou ka rave. (Sala. 127:1; Luka 11:13) Me pure koe no ta Iehova tauturu, e akakite eaa tikai te tauturu taau ka inangaro. Ei akaraanga, e pati iaia kia arataki ia koe ki tetai tangata te inangaro ra i te apii no runga i te Atua. E oti, ka anoanoia koe kia tutu aere ki te aronga pouroa taau ka aravei.

16. Akapeea taau uaorai apii me tauturu ia koe i roto i te angaanga tutu aere?

¹⁶ Akanoo i tetai taime no taau uaorai apii. Karanga te Tuatua a te Atua: “Kia taka tikai ia kotou i to te Atua ra anoano, tei meitaki, e te tau, e te apa kore oki.” (Roma 12:2) Me kite tikai tatou i te tuatua mou no runga i te Atua, ka matutu atu to tatou irinakianga me tuatua ki etai ke i roto i te angaanga tutu aere. Karanga a Katarína, tei taikuia i mua ana: “Kua kite mai au e ka anoanoia kia akaketaketaia toku akarongo no tetai au apiianga Pipiria. No reira, kua apii meitaki au i te au akapapuanga e te vaira tei Anga i te au mea ravarai, e ko te Pipiria te Tuatua a te Atua, e e akaaerenga ta te Atua i te enua nei.” Kua riro tana uaorai apii i te akaketaketa i tona akarongo e kua maata mai tona rekareka i te angaanga tutu aere.

17. Eaa a Iesu i maroiroi ei i te rave i te angaanga tutu aere?

¹⁷ Kua maroiroi ua rai a Iesu i te tutu aere noatu kare tetai pae i akarongo mai ki tana karere. Eaa te tumu? Kua mārama aia e ka anoanoia te tangata kia kite i te tuatua mou, e kua inangaro aia ia ratou kia āriki i te karere o te Patireia. Kite katoa aia e ko te aronga tei kore i akarongo i mua ana, ka āriki ratou i te reira a muri mai. Akamanako ana eaa tei tupu i roto i tona uaorai ngutuare. I roto i ta Iesu angaanga tutu aere no tetai toru e te apa mataiti, kare tona au teina i riro mai ana ei pipi. (Ioa. 7:5) Inara, i muri ake i tona tuakaouanga, kua riro mai ratou ei au Kerititiano.​—Anga. 1:14.

18. Eaa ra tatou ka rave ua rai i te angaanga tutu aere?

¹⁸ Kare tatou e kite koai te ka āriki mai i te tuatua mou a te Pipiria. Tetai pae kare ratou e āriki viviki i ta tatou karere.  Pera te aronga kare e inangaro i te akarongo mai, ka kite ratou i to tatou tu meitaki e ka “akameitaki ratou i te Atua.”​—1 Pete. 2:12.

19. Eaa ta 1 Korinetia 3:6, 7 e apii maira no ta tatou angaanga tutu aere?

¹⁹ Noatu e na tatou e tanu e te tamauu, na te Atua ra e akatupu. (E tatau ia 1 Korinetia 3:6, 7.) Karanga a Getahun, e taeake i Etiopia: “No tetai 20 mataiti, ko au anake ua te Kite e tutu aere ra i toku oire. I teianei, e 14 papuritia e noo ana i konei. E taingauru ma toru ia ratou kua papetitoia, kapiti mai taku vaine e taku tamariki e toru. E 32 tangata e aere mai ana ki te au uipaanga.” Kua mataora a Getahun e kua tutu aere ua atu rai aia e kua tiaki marie ia Iehova kia akavaitata i te aronga ngakau tika ki tana akaaerenga!​—Ioa. 6:44.

20. Akapeea tatou i aite ei ki te aronga akaora?

²⁰ Te akaperepere ra a Iehova i te au tangata ravarai. E tikaanga manea to tatou kia angaanga kapiti ki tana Tamaiti kia tauturu i te tangata i te au enua katoa i mua ake ka tae mai ei te openga. (Haga. 2:7) Kua aite te angaanga tutu aere ki te tauturu i te tangata mei tetai tumatetenga. E ko tatou te aronga tei tonoia kia akaora i te aronga angaanga tei piritiaia ki roto i te ana. Noatu kare e maata tei kiteaia mai, e puapinga ra te angaanga akaoraanga. Mei tei reira rai te angaanga tutu aere. Kare tatou e kite i te maata o te tangata ka ora mai mei to Satani akatereanga. Inara ka taangaanga a Iehova ia tatou kia tauturu ia ratou. Karanga a Andreas no Bolivia mai: “Tetai tangata te ka apii i te Pipiria e ka papetitoia, kua tupu te reira ma te angaanga taokotai a te katoatoa.” No reira me maroiroi tatou, ka akameitaki a Iehova i ta tatou angaanga tutu aere e ka riro ei rekareka anga maata.