1. Саво пример о Исус мукхља пле следбениконге, хем со керѓе ола? (Дикх и слика тари насловно страна.)

ЏИКОТЕ о Исус сине ки Пхув ле сине ле позитивно стави спрема и служба хем мангља лескере следбеникија да те овел лен о исто стави (Јован 4:35, 36). Кеда ов сине пле учениконцар ола ревно проповединена сине (Лука 10:1, 5-11, 17). Ама, кеда астарѓе хем мударѓе е Исусе, лескере ученикија несаво време нашавѓе пумари желба те проповединен (Јован 16:32). Откеда о Исус воскреснинѓа, ов охрабринѓа лен те концентриринен пе ко проповедибе. Хем, откеда ов иранѓа пе ко небо, ола проповединѓе добором ревно со ленгере душмања жалинѓе пе: „Аке! Пхерѓен о Ерусалим тумаре сикљојбаја“ (Дела 5:28).

2. Сар о Јехова поможинѓа те проповединел пе о шукар хабери?

² О Исус водинѓа е христијанен таро прво веко кеда проповединена сине, хем о Јехова поможинѓа ленге. Адалеске бут мануша прифатинѓе ленгири порака. На пример, ки Педесетница 33 берш а.е., крстинѓе пе околу 3.000 мануша хем о број е учениконгоро бајровела сине са повише (Дела 2:41; 6:7). Ама, о Исус пророкујнѓа кај бут повише мануша ка прифатинен о шукар хабери ко последна диве (Јован 14:12; Дела 1:8).

3-4. Соске несавенге о проповедибе тано пхаро хем со ка дикха ки акаја статија?

³ Сарине амен трудинаја амен те овел амен позитивно стави ки амари служба. Ко несаве пхувја адава локхо тано те керел пе. Соске? Адалеске со бут мануша мангена те проучинен и Библија со чак некој лендар ваљани те овел чхивдо ко јекх списако хем те аџикерел јекх Сведоко те овел слободно те проучинел леа! Тари јавер страна, ко несаве јавера пхувја и служба е објавителенге тани попхари. О мануша  ретко тане кхере, хем адала сој тане кхере на мангена бут те шунен баши Библија.

⁴ Ако живинеа ко тхан коте со о проповедибе тано пхаро, о предлогија тари акаја статија веројатно ка поможинен туке. Ка дикха со керѓе несаве те шај те аракхен повише манушен ки служба. Исто аѓаар ка дикха, соске шај те ачхова позитивна бизи разлика дали о мануша шунена амен или на.

5. Саве предизвикија иси буте Сведокон?

⁵ Буте Сведоконге овела са попхаро хем попхаро те аракхен е манушен кхере. Несаве објавителија живинена ко тхана или зграде коте со иси обезбедување. Адатхе шај иси чувари кова со на мукхела те кхувел никој андре ако нане ле покана таро станари. Јавера објавителија шај те џан таро кхер ко кхер бизо нисаве проблемија, ама нашти аракхена буте манушен кхере. А јавера објавителија проповединена ко дур тхана коте со живинена хари мануша. Ола шај патујнена бут време те шај те аракхен јекхе станаре, а ов шај нане ни кхере. Ако иси амен асавке предизвикија, на ваљани те откажина амен. Со шај те кера те шај те накхава асавке предизвикија хем аѓаар амари служба те овел поделотворно?

6. Соске о проповедникија тане сар рибарија?

⁶ О Исус спорединѓа амен е манушенцар со астарена мачхе (Мар. 1:17). Несаве рибарија шај дивенцар керена бути, ама на астарена нијекх мачхо. Ама ола на откажинена пе, него прилагодинена пе. Ола менинена о време, о тхан хем о начин сар астарена мачхе. Амен шај те кера слична промене ки амари служба. Акана те дикха трин предлогија башо адава.

7. Саво резултати шај те овел ако проповединаја ко различно време?

⁷ Трудин тут те аракхе е манушен ко различно време. Ка аракха повише манушен ако проповединаја ко време кеда ола најверојатно тане кхере. Ко крајо, секова јекх некогаш ваљани те иранел пе кхере! Бут пхраља хем пхења проповединена палоручко или акшамеске адалеске со шај те аракхен повише манушен. Исто аѓаар, о станарија ко адава време веројатно тане поопуштиме хем поспремна те керен аменцар лафи. Или, шај те пробине адава со керела јекх старешина кова со викинела пе Давид. Ов вакерела кај откеда проповединѓе јекх или дуј саатија ко подрачје, ов хем лескоро партнери службаке иранена пе ко кхера коте со на аракхле никас. Ов вакерела: „Изненадимо сиум кобор манушен аракхаја кхере кеда иранаја амен о дујто пути“. *

8. Сар шај те применина о стихо таро Проповедник 11:6 ки амари служба?

⁸ На ваљани те откажина амен те рода е манушен. О главно стихо е статијакоро сетинкерела амен саво стави ваљани те овел амен. (Читин Проповедник 11:6.) О Давид, сој спомнимо поангле, на откажинѓа пе. Ко јекх кхер, ов конечно аракхља е станаре откеда некобор пути на сине кхере. О мануш сине интересимо те керел лафи баши Библија хем вакерѓа: „Живинава акате скоро офто берш, хем никогаш на запознајнѓум јекхе таро е Јеховаскере сведокија ко мло удар“. О Давид вакерела: „Халиљум кај кеда конечно аракхаја е манушен кхере, ола често мангена те шунен адава со проповединаја ленге“.

9. Со керѓе несаве Сведокија те шај те аракхен е манушен кола со на сине кхере?

 ⁹ Трудин тут те проповедине ко различна тхана. Те шај те аракхен е манушен кола со нане кхере, несаве објавителија менинѓе о тхан коте со проповединена. На пример, о сведочибе ки улица хем о количке баши литература сикавѓе пе кај тане делотворна те аракхен пе е манушен кола со живинена ко баре зграде коте со нане дозволимо те сведочинел пе таро удар ко удар. Аѓаар шај о Сведокија лично те керен лафи е манушенцар со живинена ко адала зграде. Исто аѓаар, бут објавителија приметинѓе кај о мануша поспремна тане те керен лафи хем те лен литература ко паркија, пазарија хем деловна подрачја. О Флорен, јекх покраинско надгледнико ки Боливија, вакерела: „Амен џаја ко пазарија хем деловна подрачја палоручко машкар о јекх хем трин о саати кеда о продавачија нане лен бут бути. Обично иси амен бут шукар разговорија хем чак почминаја библиска курсија“.

10. Кола методе шај те користине те шај те проповедине е манушенге?

¹⁰ Трудин тут те проповедине ко различна начинија. Замислин туке кај пробинѓан некобор пути лично те кере некасаја лафи. Гељан те посетине ле ко различно време, ама палем нашти те аракхе ле кхере. Дали иси јавер начин сар шај те ресе џи ко асавко мануш? И Катарина вакерела: „Пишинава писмија околенге со на аракхава лен кхере. Аѓаар шај те вакерав ленге адава со мангљум те вакерав“. Со шај те сикљова латар? Трудин тут те ресе е манушен ко тло подрачје ко било кова начин.

11. Соске несаве мануша на сикавена интерес баши порака со сведочинаја ленге?

¹¹ Несаве мануша на сикавена интерес баши порака со сведочинаја ленге. Ола мислинена кај нане лен потреба таро Девел или тари Библија. Ола на верујнена ко Девел адалеске со дикхена бут неволје ко свето. Исто аѓаар, отфрлинена и Библија адалеске со дикхена кај о религиозна водачија, кола со вакерена кај живинена спрема лате, керена бут лошна буќа. Јавера тане зафатиме пумаре буќенцар, фамилиенцар или лична проблеменцар хем мислинена кај и Библија нашти те поможинел ленге. Сар шај те ачхова бахтале кеда о мануша коленге со проповединаја на дикхена кобор тани важно амари порака?

12. Сар шај адава со ка применина о лафија таро Филипјаните 2:4 те поможинел аменге ки служба?

¹² Сикав кај грижинеа тут е јаверенге. Бут џене со на сикавѓе ко почеток интерес, покасно мангле те шунен о шукар хабери, соске о објавителија сикавѓе ленге искрено интерес. (Читин Филипјаните 2:4.) На пример, о Давид, кова сој спомнимо поангле вакерела: „Ако некој вакерела кај нане ле интерес, амен иранаја амари Библија хем литература ки ташна хем пучаја ле: ’Шај ли те џанав соске мислинеа аѓаар?‘“ О мануша шај те приметин кеда некој грижинела пе ленге. Ола шај ка бистрен со точно вакерѓем ленге, ама веројатно ка сетинен пе кај сикавѓем ленге лично интерес. Чак ако о станари на мукхела амен те кера лафи, амен шај те сикава кај грижинаја амен леске преку амаро љубезно понашибе.

13. Со шај те кера амари порака те овел поинтересно секоле станареске?

¹³ Амен шај те сикава кај грижинаја амен е манушенге аѓаар со ка прилагодина амари порака спрема ленгере потребе хем спрема адава со интересинела лен. На пример, дали дикхаја нешто со сикавела кај е станаре иси ле чхаве? О родителија шај кај интересинен пе башо библиска советија сар те воспитинен пе о чхаве или сар шај те овел лен бахтало фамилијарно живото. Дали дикхеа ко удар некобор браве или катанција? Тегани шај те одлучина те кера лафи башо криминал хем сар адава даравела буте манушен. О станари шај ка овел бахтало те шунел кај ка овел крајо башо криминал. Секова пути кеда аракхеа манушен кола со мангена те шунен, трудин тут те поможине ленге те хаљовен сар о библиска советија шај те поможинен ленге. И Катарина, која со спомними поангле, вакерела: „Размислинава кобор и Библија поможинѓа манге те овел мло  живото пошукар“. Адалеске и Катарина уверими тани ко адава со вакерела е манушенге, хем о мануша шај те приметинен адава.

14. Спрема Изреки 27:17, сар шај о објавителија сој ки служба те поможинен јекх јекхеске?

¹⁴ Сикљов таро јавера. Ко прво веко, о Павле сикавѓа е Тимотее сар те проповединел хем те сикавел е манушен хем охрабринѓа е Тимотее те поможинел е јаверенге ко исто начин (1. Кор. 4:17). Сар о Тимотеј, амен да шај те сикљова таро искусна објавителија ко амаро собрание. (Читин Изреки 27:17.) Те дикха о пример таро пхрал Шон. Несаво време сар пионери ов проповединела сине ко гава коте со побаро дело таро мануша сине задоволна тари пли религија. Со поможинѓа леске те ачховел бахтало? Ов вакерела: „Секогаш кеда шај џава сине ки служба јекхе јавере објавителеа. Џикоте патујнаја сине таро јекх кхер ко јавер кхер користинаја сине о време те поможина јекх јекхеске те ова пошукар проповедникија. На пример, кераја сине лафи башо адава со вакерѓа о станари хем сар амен одговоринѓем леске. Тегани, дискутиринаја сине сар шај јавер пути те реагирина ако о станари пучела амен о исто“.

15. Соске и молитва тани важно ки амари служба?

¹⁵ Молин е Јехова те поможинел туке. Роде о Јехова те поможинел туке секова пути кеда сиан ки служба. Ваљани аменге лескоро свети дух те поможинел аменге ко са со кераја (Пс. 127:1; Лука 11:13). Кеда молинеа е Јехова те поможинел туке, ов конкретно. На пример, молин тут те водинел тут ки некасте кова со мангела те сикљол баши лесте хем спремно тано те шунел. Тегани постапин ко склад тле молитваја адалеа ко ка проповедине сариненге со ка аракхе лен.

16. Соске о лично проучибе тано важно баши амари служба?

¹⁶ Одвојн туке време лично те проучине. Е Девлескоро Лафи вакерела: „Овен увериме со мангела о Девел те керен — буќа сој тане шукар, совршена хем прифатлива леске“ (Рим. 12:2). Кобор повише сием увериме кај џанаја о чачипе башо Девел, добором повише ка ова сигурна кеда кераја лафи е манушенцар ки служба. И Катарина, сој спомними поангле, вакерела: „Англедер несаво време, халиљум кај ваљани те керав мли вера позорали ко несаве основна библиска сикљојба. Адалеске проучинѓум детално о доказија кај иси Створители, кај и Библија тани е Девлескоро Лафи хем кај е Девле иси ле јекх организација која со претставинела ле авдиве“. И Катарина вакерела кај о лично проучибе керела лакири вера позорали хем керела те овел побахтали ки служба.

17. Соске о Исус ачхило позитивно ки пли служба?

¹⁷ О Исус ачхило позитивно хем понадари да проповединѓа иако несаве на мангле те шунен лескири порака. Соске? Ов џанља кај о мануша ваљани те џанен о чачипе хем адалеске мангља кобор со шај повише манушенге те поможинел. Исто аѓаар, џанља кај несаве мануша кола со на мангле те шунен ле ко почеток, покасно ка манген те шунен ле. Размислин со случинѓа пе лескере фамилијаја. Џикоте о Исус керѓа трин текваш берш пли служба, нијекх таро лескере пхраља на уло лескоро ученико (Јован 7:5). Ама, откеда воскреснинѓа, ола уле христијања (Дела 1:14).

18. Соске понадари да проповединаја?

¹⁸ Амен на џанаја точно кој ка овел е Јеховаскоро слуга. Несаве манушенге ваљани  повише време те прифатинен о чачипе. Иако несаве на мангена те шунен амен, ола дикхена амаро шукар понашибе хем амаро позитивно стави. Адава шај те поттикнинел лен „те славинен е Девле“ (1. Пет. 2:12).

19. Со сикљоваја баши амари служба таро 1. Коринќаните 3:6, 7?

¹⁹ Иако амен садинаја хем чхиваја пани, јавере лафенцар проповединаја хем сикаваја, на смејнаја те бистра кај о Девел дела те бајрол. (Читин 1. Коринќаните 3:6, 7.) Јекх пхрал кова со служинела ки Етиопија, вакерела: „Повише таро 20 берш, ме сиум сине единствено Сведоко ко ретко обработимо подрачје. Ама, акана акате сием 14 објавителија. Лендар 13 тане крстиме, коте сој вклучими ми ромни хем ме трин чхаве. Ко амаре состанокија просечно сием присутна 32 џене“. Акава пхрал бахтало тано со на чхинавѓа те проповединел хем стрпливо аџикерѓа о Јехова те привлечинел е искрена манушен ки пли организација (Јован 6:44).

20. Ко саво начин сием сар спасувачија?

²⁰ Е Јеховаске са о мануша тане скапоцена. Ов денѓа амен и предност заедно лескере Чхавеа те кхеда е манушен таро са о нацие англедер те авел о крајо акале светоскоро (Агеј 2:7). Амаро проповедибе шај те спорединел пе јекхе акцијаја спасибаске. Амен сием сар членија таро јекх тими кова сој бичхалдо те спасинел е манушен кола со заглавинѓе ко јекх руднико. Иако шај само некобор рударија ка овен спасиме, и бути таро са о спасувачија врединела. Исто тано амаре проповедибаја ки амари служба. На џанаја кобор џене ка овен спасиме таро е Сатанаскоро свето. Ама, о Јехова шај те користинел било кас амендар те спасинел лен. О Андреас, кова со живинела ки Боливија, вакерела: „Џанава кај кеда јекх мануш ка сикљовел о чачипе хем ка крстинел пе, адава тано адалеске со бут џене соработинѓе те поможинен леске“. Амен да мангаја те овел амен асавко позитивно стави ки амари служба. Ако кераја аѓаар, о Јехова ка дел амен берекети хем и служба ка анел аменге бахталипе.