1. Savo primer o Isus aćhavđa pe sledbenikonenđe hem so on ćerđe? (Dikh i slika ki naslovno strana.)

ÐI HINE ki phuv, o Isus hine pozitivno ki služba hem manglja olese učenikija te oven pozitivna (Jov. 4:35, 36). Ði o Isus hine pe učenikonencar, on hine revna ki služba (Luka 10:1, 5-11, 17). Ama, ked astarđe e Isusese hem mudarđe le, olese učenikija jekh vreme našalđe pi želja te propovedinen (Jov. 16:32). Palo odova so uskrsninđa, o Isus podstakninđa len te den sa pestar ki služba. Ked đelo ko nebo, on hine odobor revna so olenge neprijateljija phenđe: „Tumen pherđen o Jerusalim odoleja so sikavena“ (Dela 5:28).

2. Sar o Jehova blagoslovinđa o propovedibe?

² O Isus usmerinđa e prvo hrišćanen đi propovedinđe hem o Jehova blagoslovinđa len ađahar so but manuša prihvatinđe olengi poruka. Na primer, ki Pedesetnica ko 33. berš ki nevi era, krstinđe pe oko 3 000 manuša (Dela 2:41). Sar nakhlja o vreme, o broj ando učenikija sa pobuter barilo (Dela 6:7). Ama, o Isus prorekninđa so ko poslednja dive pana pobuter manuša ka prihvatinen o ćaćipe (Jov. 14:12; Dela 1:8).

3-4. Sose tano disavenđe pharo te propovedinen hem so ka dikha ko akava članko?

³ Sare amen mangaja te dikha pozitivno ki služba. Ko disave phuvja, tano lokho te ćerel pe odova. Sose? Odolese so but manuša mangena te proučinen i Biblija, hem čak valjani te ađićeren neko ando Svedokija te oven slobodna te proučinen olencar. Ama, ko avera phuvja nane ađahar. Uduri tano pharo e objaviteljenđe te arakhen e manušen  ćhere, ama hem ked arakhena len on nane zainteresovana asi Biblija.

⁴ Ako živineja ki phuv ki koja tano pharo te propovedini pe, o predlogija kola tane dinde ko akava članko šaj te pomožinen tut. Akana ka dikha so disave ćerđe te šaj te arakhen e manušen. Isto ađahar, ka dikha sose šaj te aćhova pozitivna, bizo obzir da li o manuša šunena amari poruka ja na.

5. Save pharipa but objaviteljija isi len?

⁵ Sar đala o vreme, but tano pharo te arakha e manušen ćhere. Disave objaviteljija živinena ko područja kuri našti te aven đi o manuša sose on živinena ko zgrade kola tane phanle ja ko naselja kuri šaj pharo te avel pe đi o manuša. Odothe isi stražarija kola na mukhena e manušen te khuven andre ako neko ando stanarija na dozvolinđa lenđe. Ko disave thana, o objaviteljija šaj te propovedinen kotar ćher ko ćher, ama na arakhena bute manušen ćhere. A averthe o objaviteljija propovedinena ko thana kaj živinena but hari manuša. Podijekh puti, on šaj valjanena but dur te putujinen te bi resena đi samo jekh manuš. A ked resena othe, ov nane ćhere. Ako hem tu isi tut asavke pharipa, na valjani te odustajine. So ka pomožini tuće te nakhave asavke pharipa hem te vaćere so pobuter manušencar?

6. Ko kova način tane o objaviteljija sar o manuša kola astarena e maćhen?

⁶ O Isus o propovedibe uporedinđa odoleja so ćerela jekh ribari (Mar. 1:17). Disave ribarija šaj divencar te đan maćhenđe, a te na astaren nijekhe maćhe. Ama, on na odustajinena, nego samo šaj te menjinen o način sar astarena e maćhen. On šaj te đan ko aver vreme ja ko aver than ja te menjinen i metoda sar astarena e maćhen. Amen šaj te ćera slična promene ki amari služba. Hajde te dikha nekobor predlogija.

7. Sose tano šukar te propovedina ko različito vreme?

⁷ Ða ko različito vreme. Amen ka arakha pobuter manušen ko amaro područje ako đaja ko vreme ked tane on ćhere. Ko krajo ando dive, svako mora te irini pe ko po ćher. But phralja hem phenja propovedinena palo pladne ja uveče sose tegani šaj te arakhen pobuter manušen ćhere. Tegani, o manuša tane spremna hem opuštena te vaćeren. Ja šaj te primenine o predlog kova dinđa jekh starešina kova vićini pe Dejvid. Ov phenela so palo odova so propovedinena ko jekh tereni, ov hem oleso saradniko irinena pe ko odola manuša kolen prvo puti na arakhlje ćhere. Ov phenela: „Me hijum but iznenadimo kozom but manuša tane ćhere ked irinaja amen o dujto puti.“ *

8. Sar šaj ki amari služba te primenina o lafija ando Propovednik 11:6?

⁸ Amen valjani te da sa amendar te arakha e manušen ćhere. Amaro vodećo stih podstaknini amen ko odova. (Čitin Propovednik 11:6.) O Dejvid, kolestar angleder vaćerđam, na odustajinđa. Ko jekh ćher, ov konačno arakhlja jekhe manuše palo odova so but putija rodinđa le. Odova manuš manglja te vaćeri andi Biblija hem phenđa: „Me živinava akate oko ofto berš, ama e Jehovase svedokija niked na alje ko me udara.“ O Dejvid phenela: „Haljiljum so ked ko krajo arakhaja e manušen ćhere, on često šunena i poruka andi koja vaćeraja.“

9. So ćerena disave objaviteljija te šaj te arakhen e manušen?

 ⁹ Ða ko različita thana. Te šaj te arakhen e manušen kolen nane lokho te arakhen ćhere, disave objaviteljija menjinena o than kuri propovedinena. Sebepi so disave manuša živinena ko bare zgrade kuri nane dozvolimo te khuva, disave objaviteljija mislinena so najšukar način te arakha asavke manušen tano ađahar so ka propovedina ki ulica ja so ka terđova e kolicaja. Ko asavko način o Svedokija šaj lično te vaćeren olencar. Isto ađahar, but objaviteljija mislinena so o manuša pobuter mangena te vaćeren amencar ja te prihvatinen i literatura ked svedočinaja lenđe ko parko, ko pazari ja ko poslovno područje. Jekh pokrajinsko nadgledniko andi Bolivija kova vićini pe Floran, phenela: „Amen đaja te propovedina ko pazari ja ko poslovno područje maškaro jekh hem trin o sati palo pladne sose tegani o radnikija nane len but buti. Tegani obično isi amen šuže razgovorija hem čak nekasa počminaja e biblijako kurs.“

10. Kola metode šaj te koristine te šaj te arakhe e manušen?

¹⁰ Koristin aver metode. Zamislin so but putija pokušinđan te arakhe jekha osoba ko to tereni. Šaj đeljan ko različito vreme, ama palem naštinđan te arakhe la ćhere. Da li isi disavo aver način sar te arakhe la? I Katarina, phenela: „Me pisinava lila okolenđe kolen našti te arakhav ćhere. Ko lil pisinava sa so bi lično phenava lenđe.“ So sikljovaja olatar? De sa tutar ko bilo kova način te propovedine svakonese ko to tereni.

11. Sose disave manuša nane zainteresime asi amari poruka?

¹¹ Disave manuša nane zainteresime te šunen amari poruka. On smatrinena so nane lenđe potrebno te đanen diso ando Devel ja andi Biblija. On na verujinena ko Devel odolese so dikhena so ko sveto isi but patnje. Isto ađahar, nane zainteresime odolese so dikhena so o religiozna vođe na ićerena pe ko odova so pisini ki Biblija. Avera mislinena samo andi pi buti, pi porodica ja ando pe lična problemija hem nane zainteresime te dikhen sar šaj i Biblija te pomožini lenđe. Sar šaj te aćhova radosna iako o manuša kolenđe propovedinaja nane zainteresime?

12. Sar šaj o lafija ando Filipljanima 2:4 te pomožinen amen ki amari služba?

¹² Mothov so hijan zainteresimo averenđe. But manuša kola ki početka na hine zainteresime asi šukar vest, kasnije prihvatinđe la ked dikhlje kobor tano jekh objavitelj zainteresimo olenđe. (Čitin Filipljanima 2:4.) Na primer, o Dejvid kolestar angleder vaćerđam, phenela: „Ked neko phenela so nane zainteresimo, tegani amen ćhivaja i Biblija hem i literatura ki torba hem phenaja: ’Mangava te šunav sose mislineja ađahar.‘“ O manuša šaj te osetinen ked neko brinini pe olendar. On šaj na setinena pe sostar tačno vaćerđam, ama verovatno setinena pe sar osetinđe pe đi vaćerđam olencar. Čak iako o manuša na dozvolinena amenđe te vaćera andi šukar vest, odoleja sar ponašinaja amen ja savo izraz ko muj ćeraja, šaj te mothova lenđe so brininaja amen olendar.

13. So šaj te ćera te šaj o manuša te oven zainteresime asi amari poruka?

¹³ Amen mothovaja so hijam zainteresime e manušenđe ked olencar vaćeraja ando odova so olen zanimini. Na primer, da li dikhaja so ko odova ćher isi ćhave? E roditeljen šaj ka zanimini sar šaj i Biblija te pomožini len te barjaćeren pe ćhaven ja sar šaj olengi porodica te ovel bahtali. Ja šaj dikhaja nekobor brave ko udara. Tegani šaj te vaćera e manušeja ando kriminal hem ando odova so daravi le. Odole manuše šaj ka zanimini te šunel so jekh dive više na ka ovel kriminal. Svako puti ked vaćeraja disave manušeja valjani te da sa amendar te pomožina lese te haljol sar šaj i Biblija te pomožini le. I Katarina, kolatar angleder vaćerđam, phenela: „Kokri man setinćerava ko odova kobor i Biblija pomožinđa maje.“ Odolese i  Katarina tani uverimi ko odova so vaćeri hem o manuša šaj te dikhen odova.

14. Premalo Poslovice 27:17, sar šaj o partnerija te pomožinen jekh jekhese ki služba?

¹⁴ Prihvatin averengi pomoć. Ko prvo veko, o Pavle sikavđa e Timoteje sar te propovedini hem te sikavi averen. Palo odova, ohrabrinđa e Timoteje te pomožini averenđe (1. Kor. 4:17). Sar o Timotej, hem amen šaj te sikljova ando iskusna objaviteljija. (Čitin Poslovice 27:17.) Hajde te dikha o primer ando phral kova vićini pe Šon. Disavo vreme, ov hine pioniri ko jekh than kuri but manuša hine zadovoljna odoleja so olengi religija sikavđa len. Sar ov uspinđa te aćhol radosno? Ov phenela: „Ked god šajinđum hine man partneri asi služba. Me hem mo partneri bi koristinaja odova vreme đi đaja ko aver ćher te pomožina jekh jekhese pošukar te ćera amari služba. Na primer, amen bi vaćeraja ando odova sostar vaćerđam e stanareja hem so phenđam lese. Palo odova, bi vaćeraja sar šaj te odgovorina avere manušese ako pućela amen diso slično.“

15. Sose tani i molitva but važno asi amari služba?

¹⁵ Molin tut e Jehovase asi pomoć. Svako puti ked đaja ki služba, molin tut e Jehovase. Bizo oleso sveti duh amen našti ništa te ćera (Ps. 127:1; Luka 11:13). Ked molineja tut e Jehovase te pomožini tut, ov konkretno ko te molitve. Na primer, šaj te moline e Jehova te usmerini tut đi i osoba koja ćaće mangela te sikljol olestar hem koja tani spremno te šunel le. Palo odova, ćer ađahar sar so molinđan tut hem propovedin svakonese kas reseja.

16. Sose tano o lično proučibe važno asi amari služba?

¹⁶ Odvojin vreme lično te proučine. E Devleso Lafi phenela: „Uverinen tumen soj tani e Devlesi volja – soj tano šukar, prihvatljivo olese hem savršeno“ (Rimlj. 12:2). So pobuter hijam uverime ko odova so đanaja o ćaćipe ando Devel, ka ovel amen sa pobaro uverenje đi vaćeraja e manušencar ki služba. I Katarina, kolatar angleder vaćerđam, phenela: „Akana sigende haljiljum so mora te zorjaćerav mi vera ko e biblijake osnovna sikljoviba. Odolese, temeljno proučinđum o dokazija so o Stvoritelj postojini, so i Biblija tani ćaće e Devleso Lafi hem so o Devel isi le pi organizacija ki phuv koja predstavini le avdije.“ I Katarina phenela so olako lično proučibe zorjaćerđa olaki vera hem pomožinđa la te ovel poradosno ki služba.

17. Sose o Isus aćhilo pozitivno ki služba?

¹⁷ O Isus aćhilo pozitivno ki služba hem nastavinđa te propovedini, iako disave manuša na manglje te šunen olesi poruka. Ov đanđa so e manušenđe valjani o ćaćipe hem odolese dinđa sa pestar te pomožini so pobuter manušenđe. Isto ađahar, ov đanđa so disave manuša ki početka na ka mangen te šunen, a kasnije ka prihvatinen o ćaćipe. Te dikha so desinđa pe ki olesi porodica. Ði trin tekvaš berš propovedinđa, niko ando olese phralja na ulo oleso učenik (Jov. 7:5). Ama, palo oleso uskrsenje, on ulje hrišćanija (Dela 1:14).

18. Sose valjani hem ponodri te propovedina?

¹⁸ Amen na đanaja ko krajo ko ka ovel e Jehovaso sluga. Disave manušenđe valjani pobuter vreme te sikljon o ćaćipe. Ama, čak hem okola kola na mangena te šunen, ked dikhena amaro šukar ponašanje hem amaro pozitivno stav, on šaj te počminen „te slavinen e Devle“ (1. Petr. 2:12).

19. Premali 1. Korinćanima 3:6, 7, so sikljovaja andi amari služba?

 ¹⁹ Iako amen sadinaja hem vadinaja, na valjani te bistra so o Devel dela te barjol. (Čitin 1. Korinćanima 3:6, 7.) O Gejtohun, jekh phral kova služini ki Etiopija, phenela: „Pobuter ando 20 berš, hijum le jedino Svedoko ko than kuri živinava. Ama, akana odothe isi 14 objaviteljija. Dešutrin olendar krstinđe pe, a maškaro olende tane mi romni hem me trin ćhave. Akana oko 32 manuša avena ko sastankija.“ O Gejtohun tano bahtalo so nastavinđa te propovedini hem so strpljivo ađićerđa o Jehova te pomožini disave manušenđe te oven olese sluge (Jov. 6:44).

20. Ko kova način amen hijam sar o spasiocija?

²⁰ Anglo e Jehovase jaćha sa o manuša tane dragocena. Ov mothovđa amenđe čast te sarađujina olese Ćhaveja ko odova te ćeda e manušen ando sa o narodija angleder so ka avel o krajo (Ag. 2:7). Amaro propovedibe šaj te uporedini pe e bućaja koja ćerena o spasiocija. Amen hijam sar o članija ki jekh spasilačko ekipa koja tani bićhaldi te oslobodini e manušen kola tane zarobime ko rudniko. Iako samo nekobor spasiocija andi ekipa arakhlje nekas, sarine ćerđe odija važno buti. Isto tano hem amencar ki služba. Amen na đanaja pana kobor manuša ka oven spasime ando e Bengeso sveto. Ama, o Jehova šaj te koristini bilo kas te pomožini lenđe. O Andreas, kova živini ki Bolivija, phenela: „Ðanava so ked jekh manuš sikljola o ćaćipe hem krstini pe odova tano odolese so but đene sarađujinđe zajedno te pomožinen lese.“ Hem amen valjani te ovel amen asavko pozitivno stav premali služba. Ako ćeraja odova, o Jehova ka blagoslovini amen hem ka ova poradosna ki služba.