1. Lwiganyo luhi Yezu ahire abanafunzi bage, na gurhi nabo bajijire? (Olole enfoto eri oku cijalada c’eyi gazeti.)

YEZU agendekire aba n’entanya nyinja omu kasanzi koshi k’omukolo gwage gw’amahubiri hanw’igulu ananaba alonzize abanafunzi bage nabo bagendekere babà n’ezo ntanya. (Yn. 4:35, 36) Amango Yezu ali haguma n’abanafunzi bage, bayerekana oku kobinali bashagalukire omukolo gw’amahubiri. (Lk. 10:1, 5-11, 17) Cikone erhi bagwarha Yezu n’okumuniga, abanafunzi bage baheza irala lyabo ly’okuhubiri hisanzi hisungunu. (Yn. 16:32) Erhi Yezu afûka, abaha omurhima oku basegeze obwenge bwabo oku mukolo g’amahubiri. N’enyuma za Yezu okuja empingu, abanafunzi bage bajira omukolo gw’amahubiri n’obushiru bunji kuhika abashombanyi babo bajaciduduma ntya: “Mw’oyo mwalumizize enyigirizo zinyu omu Yeruzalemu!”​—Ebj. 5:28.

2. Gurhi Yehova agishire omukolo gw’okuhubiri?

² Yezu alongoza omukolo gwajiragwa n’abo Bakristu b’omu myaka igana mirhanzi na Yehova abagisha bulya bahikira aha bayushûka. Kwa lwiganyo, oku Pantekoste y’omu mwaka gwa 33 K.K.K., bantu hofi 3 000 babatizibwa. (Ebj. 2:41) N’omubalè gw’abanafunzi gwagendekera okuyushûka bwenene. (Ebj. 6:7) Ciru akaba ntyo, Yezu alêba oku omukolo gw’okuhubiri gwakayânire malehe manji bwenene omu nsiku nzinda kulusha agandi mango goshi.​—Yn. 14:12; Ebj. 1:8.

3-4. Bici byakarhuma omukolo gw’amahubiri gwaba muzibu omu eneo nguma nguma, na bici rhwaganirira mw’eci cigabi?

³ Rhweshi rhunakacihangana okuba n’entanya nyinja kuyerekera omukolo gw’amahubiri. Omu bihugo biguma na biguma, kuba kulembu okujira ntyo. Bulya gurhi? Bulya bantu banji bwenene banabe basimisibwe n’okuyiga Ebibliya na muli ntyo binahûne abandi balinde kuhika Omuhamirizi w’okubayigiriza abonekane!  Cikone omu zindi eneo, omukolo gw’amahubiri guba muzibu; bulya abantu banakaba barhali aha mwababwe, na bakaba bahali banabe barhasimisibwi bwenene n’omwanzi gw’Ebibliya.

⁴ Amahano gali mw’eyi gazeti gakurhabala bwenene erhi akaba oba olamire omu eneo omukolo gw’amahubiri gubonekana oku guli muzibu. Rhwaganirira ebi abandi bajijire lyo baganira na bantu banji kulusha. Na kandi rhwayishiganirira bulya gurhi rhushinganine okuba n’entanya nyinja ciru abantu bakarhuyumvirhiza erhi babule kurhuyumvirhiza.

5. Mazibu gahi Bahamirizi banji bali balwisa?

⁵ Bahamirizi banji bali gagenderera okuba n’amazibu g’okuganira n’abantu aha mwababwe. Bahubiri baguma na baguma babà balamire omu maeneo gabamo enyumpa ziri nyubake buzibu-zibu, zinali ndange bwenene. Oku mulango gw’ezo nyumpa kwanaba kuli omulanzi arhanayemerirwi okuyigulira omuntu yeshi-yeshi orhali muhamagale na muntu mulebe wa mw’eyo nyumpa. Abandi bahubiri banaja omu mahubiri ga nyumpa oku yindi buzira mazibu, cikone banarhimana bantu basungunu bone bo bali aha mwababwe. Haligi n’abandi bahubiri baja omu mahubiri omu maeneo ga kuli bwenene gaba galamiremo bantu basungunu. Abo bahubiri banalambagira ebilometre n’ebilometre lyo bajibona muntu muguma yene, n’erhi bahikaho hali amango barhigana arhali aha mwage! Erhi akaba rhuli rhwarhimanana n’amazibu ga ntyo, rhurhavunikaga omurhima. Bici rhushinganine rhujire lyo rhulwisa ago mazibu n’okuhikira aha rhwaganiza bantu banji omu mahubiri?

6. Omu njira nci abahubiri babà bashushine n’abadubi b’ensamaki?

⁶ Yezu ashushanyize omukolo gw’amahubiri n’omukulo gw’okuduba ensamaki. (Mk. 1:17) Badubi baguma na baguma banajire nsiku nyinji bali baduba, buzira kuduba ciru n’ensamaki nguma. Cikone oko kurhabavuna omurhima; lubero n’oko banajire empindulo omu njira yabo y’okuduba. Banashanje ensa z’okugendiduba, aha bakagidubira, n’enjira yabo y’okuduba. Nirhu rhwanajira empindulo ziri nk’ezo omu mukolo gwirhu gw’amahubiri. Rhuganirirage aga mahano gakarhurhabala.

7. Bunguke buhi rhwakaba nabo erhi rhwakakahubiri omu kasanzi kali lubero?

⁷ Okalonza abantu omu kasanzi kali lubero. Rhwanaganira na bantu banji erhi rhwakabalambagirira omu kasanzi balugibonekana aha mwababwe. Bulya ntaye orhagaluka omw’ishasha lyage kasanzi kalebe! Bene wirhu na bali birhu banji banashagalukire okuhubiri enyuma z’emidi erhi bijingo bulya ko kasanzi balugibonamo bantu banji. Na mw’ako kasanzi ba nnanyumpa banakaba bali barhamûka aha mwababwe na kandi banabe bagwerhe akasanzi kw’okuganiza abandi. Erhi nkaba wanabona oku kuli kwa bulagirire okukolesa ihano ly’oyu mugula ohamagalwa David. Adesire oku enyuma z’okuhubiri kasanzi karhali kanyi omu eneo, ye n’oyu bali boshi banacibigaluka oku nyumpa barharhimanyiremo ndi. Adesire ntya: “Nansomerwe bwenene erhi ntigana bantu banji bali aha mwababwe erhi rhucibigaluka bwakabirhi.” *

8. Gurhi rhwakakolesa ihano liri omu lwandiko lwa Omuhanûzi 11:6, omu mukolo gwirhu gw’amahubiri?

⁸ Rhurhashinganini rhuvunike omurhima. Olwandiko lw’omusingi lw’eci cigabi lurhukengezize entanya rhushinganine okuba nazo. (Osome Omuhanûzi 11:6.) David, rhwaganiriraga embere, arharhamaga. Omu nyumpa nguma, ayishihikira aha arhimana omuntu mw’eyo nyumpa enyuma z’okumulonza kanji-kanji. Oyo mulume ashagalukira okuganira okubiyerekire Ebibliya, aderha ntya: “Nkola gwerhe myaka munani ndi eno munda, cikone nta Muhamirizi wa Yehova okola ojire hano mwani.” David adesire  ntya: “Nayishirihugûkwa oku erhi wakahikira aha wabugana abantu aha mwababwe, banayankirire bwinja omwanzi rhuhubiri.”

9. Gurhi Bahamirizi baguma na baguma barhimanine n’abantu babà balamire omu nyumpa zirhalugijibwamo?

⁹ Oshanje enafasi y’okuhubiri. Bahubiri banji bashanjire enafasi y’okuhubiri enyanya z’okurharhimana abantu aha mwababwe. Kwa lwiganyo, okuhubiri okw’ibarabara erhi kugerera eprezantware kwabonekine oku ziri njira nyinja z’okurhimanana n’abantu babà balamire omu nyumpa zirhalugijibwamo. Oko kunarhabale Abahamirizi baganire busu oku busu n’abantu nkaba birhakahashikine okuganira nabo. Kandi, bahubiri banji babwine oku binahashikane abantu bayemere okushambala na nirhu erhi kurhôla ebitabu birhu amango bali ahantu h’okurhamukira (parcs) erhi omu cibuye. Mwangalizi muguma w’omuzunguko ohamagalwa Floiran, olama e Bolivie, adesire ntya: “Rhunaje omu cibuye n’ahandi bajirira eby’oburhimbuzi egarhi k’ensa 7 n’ensa 9 enyuma z’emidi omu kasanzi abarhunzi babà barhagwerhi bakliya banji. Kanji-kanji rhunarhondeze enganîro nyinja haguma nabo, na kandi rhunahikire aha rhwarhondeza amafunzo g’Ebibliya.”

10. Njira zihi wakakolesa ly’ohubiri abantu b’omu eneo yawe?

¹⁰ Okolese enjira ziri lubero. Nkaba wajijire okwawe koshi ly’olola erhi wakarhimana muntu mulebe aha mwage. Wamulambagirire omu kasanzi kali lubero cikone orhasagimurhimana aha mwage. Ka hali ezindi njira wakakolesa ly’obona oyo muntu? Katarína, adesire ntya: “Nanyandikire abantu ntalugirhimana aha mwababwe amaruba, nambahugûlire mw’ago maruba ebi nakabaganizize ncibarhimanaga aha ka.” Bici oko kurhuyigirizize? Okacihangana okukolesa ngasi njira yoshi yakanahashikana ly’ohubiri abantu b’omu eneo yawe na ntyo ohikirize omukolo gwawe gw’amahubiri.

11. Bulya gurhi bantu baguma na baguma barhasimisibwa n’omwanzi rhukayaliza?

¹¹ Bantu baguma baguma banayerekane oku barhasimisibwi n’omwanzi rhuli rhwababwira. Barhaba bamanyire obulagirire bwa Nnamahanga erhi bw’Ebibliya. Barhayemera oku ho Nnamahanga aba enyaya z’amazibu bali babona omw’igulu. Banalahire okuyumvirhiza omwanzi guli omu Bibliya enyanya z’okubona obulyalya bw’abakulu b’amadîni bakacikunga oku babà balamire nk’oku eco citabu cidesire. N’abandi banakaba bashwesirwe n’emikolo yabo, emilala yabo, erhi amazibu gabo na ntyo banabone nka ntabyo Ebibliya yakabarhabalako. Gurhi rhwakagendekera rhwabamwo n’omwishingo amango aba rhuli rhwahubiri barhabwini obulagirire boshi-boshi bw’omwanzi gwirhu?

12. Gurhi okukolesa enderho ziri omu lwandiko lwa Abafilipi 2:4, kwakarhurhabala amango rhuli omu mahubiri?

¹² Oyerekane oku obashibirire. Bantu banji bakagiyerekana oku murhondero oku barhasimisibwa n’omwanzi mwinja rhukayaliza, cikone banahikire aha bagushagalukira erhi babona kunganaci omuhubiri abashibirire. (Osome Abafilipi 2:4.) Kwa lwiganyo, David rhwaganiriraga embere, adesire ntya: “Erhi omuntu akaderha oku arhasimisibwa n’omwanzi rhukayaliza, rhunagalule Ebibliya erhi bitabu birhu omu nshoho na buzinda nanaderha ntya: ‘Nanashagaluka bwenene erhi wakambwira bulya gurhi orhayumva osimisibwe n’ogu mwanzi.’” Abantu banabona oku rhubashibirire. Nkaba banahikira aha bayibagira ebi rhwadesire, cikone banakakengera gurhi rhwarhumire baciyumva. Ciru akaba omuntu arharhulekiri akasanzi k’okuderha, ebimanyiso b’isura lirhu n’oku rhuli rhwamushuza byanamuyereka kunganaci rhumushibirire.

13. Gurhi rhwakajira ly’omwanzi rhuli rhwahubiri gusimisa ngasi nnanyumpa?

¹³ Rhunayerekane oku rhushibirire abantu erhi rhujira omwanzi gwirhu gupatane n’amalagirire ga nnanyumpa n’ebi asimisibwe nabyo. Kwa lwiganyo, ka hali ebiyerekine oku mw’eyo nyumpa muli abana? Ababusi banashagalukira amahano g’Ebibliya gayerekine gurhi omuntu akalera omwana erhi amahano g’oku omuntu akabamwo n’omulala gulimw’omwishingo. K’olumvi lw’enyumpa yage luliko makale manji? Rhwanahiga okuganirira lugenda obushumusi n’ebintu by’okuyobohya biyunjwire omw’igulu. Enyuma z’aho nnanyumpa anashagalukira okumanya mangaci ebyo byoshi byahwa. Ciru wakarhimanana na kanga kahi, okacihangana orhabale abali bakuyumvirhiza babone gurhi amahano g’Ebibliya gakabarhabala. Katarína, rhwaganiriraga embere, adesire ntya: “Nankakengera kunganaci okumanya okuli kwantabire omu kalamo kani.” Co cirhumire amango Katarína ali aganiza abantu anayerekane oku  ayemire ebi ali ababwira, abali aganiza nabo banabone ntyo.

14. Omu kukolesa olwandiko lwa Emigani 27:17, gurhi abantu bali omu mahubiri bakarhabalana?

¹⁴ Oyunguke n’oburhabale bw’abandi. Omu myaka igana mirhanzi, Paolo ayeresire Timoteyo enjira akagikolesa omu mukolo gwage gw’okuhubiri n’okuyigiriza na buzinda aha Timoteyo omurhima oku akolese ezo njira ly’arhabala abandi. (1 Kr. 4:17) Aka Timoteyo, nirhu rhwanayunguka n’obulenga bwa bene wirhu na bali birhu b’omu cigamba. (Osome Emigani 27:17.) Rhuganirire olwiganyo lwa mwene wirhu ohamagalwa Shawn. Hagezire kasanzi kanji ali ajira omukolo gw’obupainiya omu eneo ya kuli n’evile, n’eyo munda ngasi muntu akagicikungira idîni lyage. Gurhi ajijire ly’arhagiheza omwishingo gwage? Adesire ntya: “Ngasi mango erhi byakahashikine, nakagija omu mahubiri n’owundi muhubiri. Omu kasanzi k’okurhenga aha nyumpa nguma n’okuja oku yindi, rhwakarhabalana omu kubona gurhi ngasi muguma akakubûlamwo obulenga bwage bw’okuhubiri. Kwa lwiganyo, rhwakaganirira enderho omuntu anarhubwizire na gurhi rhwamushuzize. Buzinda rhwakaganirira gurhi rhwakajira agandi mango erhi omuntu akacibirhubwira ntyo.”

15. Bulya gurhi isala liri lya bulagirire omu mukolo gwirhu gw’amahubiri?

¹⁵ Oshenge Yehova oburhabale. Okashenga Yehova akulongoze ngasi mango nk’oli omu mahubiri. Nta kantu rhwakahasha okujira buzira burhabale bw’iroho lyage litagatifu. (Enna. 127:1; Lk. 11:13) Obwire Yehova ebintu n’obwalagale amango oli wamushenga oburhabale kugerera isala. Kwa lwiganyo, wanamuhûna akulongoze emw’omuntu ogwerhe omurhima mwinja waba mubidu okukuyumvirhiza. Na buzinda wanakola nk’oku wanahûnaga omw’isala lyawe omu kuhubiri ngasi muntu yeshi onarhimanine naye.

16. Bulya gurhi ifunzo lirhu ly’Ebibliya liba lya bulagirire oku biyerekire omukolo gwirhu gw’amahubiri?

¹⁶ Okaciha akasanzi k’okuciyigiriza Ebibliya we nnene. Akanwa ka Nnamahanga kadesire ntya: ‘Mumanyirire obulonza bwa Nnamahanga; mumanye aminja, ebi asima n’ebishinganine lwoshi.’ (Rm. 12:2) Oku rhugendekire rhwayemera n’obwalagale oku rhumanyire okuli lugenda Nnamahanga, ko rhwakanayerekana n’obwalagale oku rhuyemire ebi rhuli rhwaganirira abandi amango rhuli omu mahubiri. Katarína, rhwaganiriraga embere, adesire ntya: “Hakola hali kasanzi kasungunu kurhenga mpugûsirwe oku kuli kwa bulagirire bwenene nzibuhye obuyemere bwani oku biyerekire nyigirizo nguma na nguma ntangiriza z’Ebibliya. Co cirhumire nahikira aha nayiga bwinja-bwinja ebintu biyerekine oku haba Omulemi, oku Ebibliya kobinali kaba Kanwa ka Nnamahanga n’oku Nnamahanga agwerhe ikubuliro lyage muli gano mango girhu.” Katarína adesire okw’ifunzo lyage ly’Ebibliya lyazibuhize obuyemere bwage, lyanamurhabala ayushûle omwishingo gwage omu mukolo gw’amahubiri.

17. Bulya gurhi Yezu agendekire aba n’entanya nyinja oku biyerekire omukolo gwage gw’amahubiri?

¹⁷ Yezu agendekire aba n’entanya nyinja anagendekera ajira omukolo gw’amahubiri ciru akaba bantu baguma na baguma barhakagisimisibwa. Bulya gurhi? Bulya alimanyire kunganaci abantu balilagirire oku kumanya okuli analilonzize ahe bantu banji obulyo b’okuyemera omwanzi g’Obwami. Analimanyire oku hali abantu barhasimisibwa n’ogo mwanzi oku murhondero, cikone buzinda banayishihikira aha basimisibwa nago. Orhanye oku byabaga omu mulala gwage. Nta mwene wabo ciru n’omuguma wabire mwanafunzi wage omu myaka isharhu n’enusu ayusagya omu mukolo gw’amahubiri. (Yn. 7:5) Cikone, enyuma z’okufûka, bahikira aha babà Bakristu.​—Ebj. 1:14.

18. Bulya gurhi rhushinganine rhugendekere rhwahubiri?

¹⁸ Rhurhamanyiri ndi wahikira aha ayemera  okuli kw’Ebibliya rhukayigiriza. Bantu baguma na baguma banajire nsiku nyinji lyo bayemera okuli n’abandi banayemere ho n’aho. Ciru na balya bakalahira okuyumvirhiza omwanzi rhukayigiriza banabone olugenzi lwirhu lwinja, na buzinda banahikira aha barhondera ‘okukuza Nnamahanga.’​—1 Pt. 2:12.

19. Nk’oku biyerekinwe omu lwandiko lwa 1 Abakorinti 3:6, 7, bici rhushinganine rhukakengera?

¹⁹ Ciru akaba rhwe rhurhwera rhunadômere, rhushinganine rhukengere oku Nnamahanga y’ekuza. (Osome 1 Abakorinti 3:6, 7.) Mwene wirhu Getahun, okolera omu cihugo c’e Éthiopie, adesire ntya: “Hofi myaka elushire 20, niene nali Muhamirizi omu eneo nguma barhalugihubirimo. Cikone muli eyo eneo mukola muli bahubiri 14. Ikumi na basharhu ba mulibo, kuhiramo mukanie na bana bâni basharhu, bahikire aha babatizibwa. Hofi bantu 32, banakayisha oku ntimanano zirhu.” Getahun ashagalusire bwenene okubona agendekire ayaliza omwanzi mwinja, analembera kuhika Yehova akulule abantu bagwerhe emirhima minja omw’ikubuliro lyage!​—Yn. 6:44.

20. Omu njira nci rhuba nk’abantu bacungula abandi?

²⁰ Yehova anakabona akalamo ka ngasi muntu oku kali ka bulagirire. Arhuhîre olukengwa lw’okukola haguma n’Omugala omu mukolo gw’okugusha haguma abantu ba ngasi ishanja embere obuzinda bw’er’igulu buhike. (Hag. 2:7) Omukolo gwirhu gw’amahubiri gwanashushanyizibwa n’omukolo gw’okucungula abantu. Nirhu rhunashushanyizibwe n’abantu b’omu cigusho c’okucungula abantu bahirimirweko n’olukumba. Omukolo abo bantu boshi bajira guba gwa bulagirire, ciru ankaba hali amango bacungula bantu basungunu bone omo lukumba. Oko kushushine n’omukolo gwirhu gw’amahubiri. Rhurhaba rhumanyire bantu banganaci bakacicunguka mw’er’igulu lya Shetani. Cikone Yehova anakolesa ngasi muguma wirhu ly’abarhabala. Andreas, olama e Bolivie adesire ntya: “Nambone oku buba bushiru bwa bantu banji burhabala omuntu arhondere okuyiga okuli kuba omu Bibliya n’okuhikira aha abatizibwa.” Neci, rhugenderere okuba n’entanya nyinja oku biyerekire omukolo gwirhu gw’amahubiri. Erhi rhwakajira ntyo, Yehova anarhugisha, n’omukolo gwirhu gw’amahubiri gwanaba nshôko y’omwishingo.