1. Kileshesho kinyi kibadi Yesu mulekyele balongi baye, na nkinyi kibabadi bakite? (Tala kifwatulo kya ku kipusu.)

PABADI pa nsenga, Yesu badi mulame mweneno e buwa mu mudimo wa bulungudi, na akumina’shi balongi baye bamwambule. (Yo. 4:35, 36) Pabadi Yesu na balongi baye, balongi baye abadi na kisumi mu mudimo wa bulungudi. (Luk. 10:1, 5-11, 17) Anka, kunyima kwabo kukwata na kwipa Yesu, balongi baye abadi bashimishe kisumi kyabo bwa kapindji kapela mu mudimo wa bulungudi. (Yo. 16:32) Kunyima kwaye kusanguka, Yesu badi mwibanyingishe bwa kutula binangu ku mudimo wa bulungudi. Na kunyima kwaye kukamina mwiyilu, abadi balungule mukandu wibuwa na kisumi ki bungi mu mushindo ubadi mpa na beshikwanyi babo bambe’shi: “Anwe, nubausha mu Yelusalema moso na lulambukisho lwenu.”​—Bik. 5:28, Kilombeeno kipya.

2. Mushindo kinyi ubadi Yehowa mwelele mudimo wa bulungudi myabi?

² Yesu badi akunkusha mudimo wa bena Kidishitu ba mu siekele a kumpala, na Yehowa badi ebelela mwabi mwanda bantu be bungi abadi abakumina mukandu wabo. Bu kileshesho, mu Pentekote a kipwa kya 33 B.B., bantu pepi 3 000 abadi babatshishibwe. (Bik. 2:41) Na bungi bwa balongi bubadi abufwimi nka kufwima. (Bik. 6:7) Binyibinyi, Yesu badi mupwe kutemuka’shi, bantu be bungi abakakumina mukandu wibuwa mu mafuku a ku nfudilo.​—Yo. 14:12; Bik. 1:8.

3-4. Bwakinyi bangi be kumona mudimo wa bulungudi bu wi bukopo, na kinyi ky’atutalula mu uno mwisambo?

³ Atwe boso atutompa kulama mweneno e buwa pabitale mudimo wa bulungudi. Mu angi maumbo, mbibofule kwibikita. Bwakinyi? Mwanda bantu be bungi abakuminaa kulonga  Bible, na bangi ba kwabadi abatengyelaa mpa na ba Temwe ba Yehowa. Anka mu angi maumbo, balungudi abamonaa mudimo wa bulungudi bu wi bukopo mwanda t’abakambaa kusangana bantu ku mashibo, na benyi bantu babasanganaa kwanka, be bungi t’abasankilaa kulonga Bible.

⁴ Su we mushalele mbalo ayimweneka mudimo wa bulungudi bu wi bukopo, myanda y’atwisambila mu uno mwisambo inkukwasha. Atwisambila bikite bangi bwa kupeta bantu be bungi mu bulungudi. Na atutalula bwakinyi abitungu tulame mweneno e buwa, nsaa ayikumina bantu mukandu wetu sunga kupela kwiukumina.

5. Nkalakashi kinyi ikwete kufumankana nayo ba Temwe be bungi?

⁵ Abyelelaa ba Temwe ba Yehowa be bungi bukopo bwa kwisamba na bantu ku mashibo aabo. Bangi balungudi mbashale mu ma mbalo ebakwe mashibo alamibwe kalolo. Kwanka, nkulombene kwikala nsamu sh’atwesha muntu abashibetamine kwi bena nshibo. Bangi balungudi be kwenda ku nshibo na nshibo kushi lukalakashi, anka t’abapete bantu be bungi. Bangi balungudi namu, abalungula mukandu wibuwa mu tu bibundji mushi bantu be bungi. Balungudi be kutambuka kipindji ki bula bwa nkatala muntu umune pangi abashabapete su nkupeta. Su twapeta lumune lwa ku ino nkalakashi, t’abitungu tubofule. Nkinyi kyatudya kukita bwa kukambila ino nkalakashi na kupeta bipeta bi buwa mu bulungudi?

6. Balungudi be bu balobi mu mushindo kinyi?

⁶ Yesu badi mupwandjikishe mudimo wa bulungudi na mudimo wa mulobi. (Mak. 1:17) Bangi balobi, mbalombene kwenda mu kuloba munda mwa mafuku, kadi kushi kukwata. Anka, t’abakokaa; kadi abashintulaa mushindo wa kuloba. Be kushintula nsaa, mbalo, sunga angi mayele a kuloba. Natwe namu, twikushintula bya kulungula mukandu wibuwa. Binobino, tutaluleyi ingi myanda yatudi balombene kukita.

7. Mbipeta kinyi byatudya kupeta su atulungula mukandu wibuwa mu ma nsaa elekene?

⁷ Tompa kukimba bantu nsaa ilekene. Twi kwisamba na bantu be bungi su atulambukisha nsaa yatudi balombene kwibapeta ku mashibo aabo. Sunga byakita naminyi, abalukila’nka ku mashibo aabo. Bakwetu balume na bakashi be bungi mbamone’shi, bi buwa kulungula mukandu wibuwa kunyima kwa midi sunga ku kyolwa mwanda’shi abapetaa bantu be bungi ku mashibo aabo. Na dingi bena nshibo, abekalaa bapwe kwikisha na abakuminaa kwisamba na bantu yaya nsaa. Sunga’shi, kufubisha mayele a ungi mukulu abetaminaa bu David kwi nkukwasha. Amba’shi kunyima kw’abo kupwa kulungula mukandu wibuwa mu teritware, aye na mulungudi adi naye, abalukila mu kutala bantu babash’abekalanga bapete. Amba’shi: “Nakanyaa bungi bwa bantu batupetaa ku mashibo aabo nsaa y’atwibalukila.” *

8. Mushindo kinyi watudi balombene kutumikila Mulungudi 11:6 mu mudimo wa bulungudi?

⁸ T’atukookanga. Nyi abitunyingisha kifundwe kyetu kya mutwe wa mwanda. (Badika Mulungudi 11:6.) David atatutemwine, ta badi mukookye nya. Ku ingi nshibo, badi mupete muntu abadi musembele misusa na misusa, kadi kushi’ye kumupeta. Yawa muntu badi musankile kwisamba pabitale Bible  na aye nkwamba’shi: “Napu kukita pano bipwa pepi 8, na kashaa tanemonene na Temwe a Yehowa kuno kwande.” David amba’shi: “Nsaa y’atupete bantu ku mashibo, ke bungi abakumina kutemesha mukandu wibuwa.”

9. Bangi ba Temwe ba Yehowa mbakite naminyi bwa kumona bya kwisamba na bantu babash’abapetaa ku mashibo aabo?

⁹ Tompa ma mbalo elekene. Bwakumona bya kwisamba na bantu babashina mushindo wa kupeta ku mashibo aabo, bangi balungudi mbashintule ma mbalo a kulungula mukandu wibuwa. Bu kileshesho, mayele a bulungudi bwa mu kilayi na kufubisha tutempo twa mikanda ngamwekye bu mayele e buwa a kumona bya kwisamba na bantu bashale mu mashibo akata mwatushi na matalwa a kutwela bwa kukita bulungudi bwa ku nshibo na nshibo. Bino abibakwasha bwabadya kwisamba na bantu bashale mu ano mashibo. Na dingi balungudi be bungi mbamone’shi, bantu abakuminaa kwisamba sunga kutambula mikanda yetu pabadi mu ma park e bantu be bungi sunga mu kisalwe. Floiran mukunkushi a kifunda mu Bolivie amba’shi: “Atwendaa mu kisalwe pankatshi pa 13h na 15h nsaa i ba nsunga ta bena bantu be bungi. Atwisambaa kalolo nabo mpa na kubanga kulonga nabo Bible.”

10. Mayele angi kinyi odi mulombene kufubisha bwa kupeta bantu?

¹⁰ Tompa mayele a bulungudi elekene. Pwandjikisha’shi botompo bya kwimonena na muntu kwaye kushi kumupeta. Bomwalukila mu ma nsaa elekene, anka t’omumupete ku nshibo nya. Kwi ungi mushindo odya kupeta yawa muntu su? Katarína amba’shi: “Nafundjilaa baba boso banshampete ku mashibo aabo mikanda, bwa kwibalesha kyankumina kwibalungula  mpala kwa mpala. Ky’abitulongyesha.” Tompa mishindo ilekenelekene ya bulungudi mu teritware obe bwa kupeta bantu bwa’shi okumbashe mudimo obe wa bulungudi kalolo.

11. Bwakinyi bangi bantu t’abasankila mukandu wetu?

¹¹ Bangi bantu t’abasankilaa mukandu wetu. Abapwandjikisha’shi, ta bena lukalo lw’Efile Mukulu sunga kuuka bi mu Bible. T’abakuminaa mwi Efile Mukulu mwanda bakwete kumona makyenga e bungi pa nsenga. T’abakuminaa Bible mwanda wa bu nsesa bwa bakata ba bipwilo abamba’shi abakookyela abyamba Bible, aku namu abakitshi myanda i bubi bukile. Bangi abanangushenaa pabitale midimo yabo, bifuko byabo, na ku myanda yabo, na t’abamono’shi Bible mulombene kwibakwasha. Mushindo kinyi watudya kulama muloo wetu nsaa i bantu batulungula mukandu wibuwa ababepula mudimo wetu?

12. Kutumikila mayi e mu Bena-Fidipe 2:4, kwi kwitukwasha mu bulungudi naminyi?

¹² Lesha’shi opasukilaa bantu. Bantu be bungi abadi bapele mukandu wetu kumpala, mbafikye mu kwiukumina nsaa ibabadi bamone’shi mulungudi kwete kwibapasukila. (Badika Bena-Fidipe 2:4.) Bu kileshesho, David atatutemwine, amba’shi: “Su muntu amba’shi t’abisankisha, nele Bible sunga mikanda mu kibuta; akupu namwipusha’shi: ‘We kundungula namu bwakinyi t’abikusankisha?’” Bantu be kumona’shi muntu kwete kwibapasukila. Bekwilwankana kyatwikele besambe nabo, anka batentekyesha mushindo watudi bebapasukile. Sunga mwina nshibo t’akumina’shi, tumulungule mukandu wibuwa, tulame’nka mweneno etu e buwa bwa kulesha’shi tukwete kumupasukila.

13. Twi kukita kinyi bwa’shi mukandu wetu usankishe muntu atwisamba naye?

¹³ Atulesha’shi atupasukila mwina nshibo, nsaa y’atushintula mukandu wetu muyile nkalo yaye. Bu kileshesho, tukwete kumona kintu akilesha’shi sha nshibo e na bana su? Ba nambutwile bekusankila malango a mu Bible pabitale mushindo wa kukusha bana sunga malongyesha aalesha mushindo wa kwikala na nshalelo a muloo mu kifuko. Bomono nkufidi i bungi ku kiibi ky’abo su? We kwata kitshibilo kya kwisambila pabitale buntomboshi na by’abupushisha bantu moo mu nsenga, kunyima mwina nshibo e kusangala p’apusha’shi, buntomboshi abukapu. Mu mishindo yoso, tompa kukwasha baba abakutemesha bwabadya kumona’shi Bible e na malango alombene kwibakwasha. Katarína atatupwile  kutemuna amba’shi: “Ami nabene, natentekyeshaa binkwashe malongyesha a mu Bible.” Bu kipeta, Katarína akulaa na kushinkamisha, na bantu besambaa nabo, abebimonaa.

14. Muyile Nkindji 27:17, balungudi be kwikwashena naminyi?

¹⁴ Kumina bukwashi bwa bangi. Mu siekele a kumpala, Mpoolo badi mulungule Timote mayele abyakulungula na kulongyesha mukandu wibuwa, na bwadya kulesha bangi aa mayele. (1 Kod. 4:17) Nka bu Timote, twi kulongyela kwi bangi mu kakongye. (Badika Nkindji 27:17.) Tutaluleyi kileshesho kya ungi mukwetu mulume abetaminaa bu Shawn. Munda mwa mafuku, badi mufube bu mbala-mashinda mu ka kibundji mu badi bantu be bungi abakumina nka penda myanda ya kipwilo kyabo. Badi mulame muloo waye naminyi? Amba’shi: “Su kwi mushindo, natukaa na muntu mu bulungudi. P’atukatuka ku nshibo bwa kwenda ku ingi, atufubisha yaya nsaa bwa kwikwashena bwa’shi tulumbule mayele etu a kulungula mukandu wibuwa. Bu kileshesho, atutalula mushindo ubakula sha nshibo na kibatukitshi. Akupu atwisambila kyatudya kukita su twafumankana na mwanda wi byabya.”

15. Luteko lwi na bukwashi kinyi mu bulungudi?

¹⁵ Teka bukwashi kwi Yehowa. Teka Yehowa bukwashi nsaa yoso yodi mu mudimo wa bulungudi. Kushi bukwashi bwa kikudi kiselele, muntu su ngumune a kwatudi tamulombene kobesha kukita uno mudimo. (Mis. 127:1; Luk. 11:13) Nsaa y’otekye bukwashi kwi Yehowa mu luteko, mulungule myanda yoso patoka. Bu kileshesho, mutekye bwa’shi akukunkushe kwi muntu mulombene nkutemesha. Akupu, okite myanda mukwipushena na luteko lobe, p’obe kulambukisha bantu boso bopete.

16. Bwa kupeta bipeta bi buwa mu bulungudi, bwakinyi kwilongyela kwi na muulo?

¹⁶ Ata nsaa ya kwilongyela. Eyi dy’Efile Mukulu adyamba’shi: ‘Shinguula eshi kikyebe ki’eshimba di’Efile Mukulu nkinyi, kii buwa, akimusangasha na nkipwidikye.’ (Lom. 12:2, Kilombeeno kipya 2014) Nsaa y’atulongo Bible, atuuku Efile Mukulu kalolo kakile, bino abitukwasha bwa kwakula na kushinkamisha nsaa y’atulungula bangi pabimutale. Katarína atatutemwine amba’shi: “Mu mafuku ashale’mu, nekalanga mumone’shi abitungu nyingishe lukumino lwande pabitale malongyesha a kitako a mu Bible. Byabya, nadi mulongye myanda ayishinkamisha’shi Efile Mukulu nyi Mupangi, Bible Eyi dyaye, na’shi Efile Mukulu ena ndumbulwilo pa nsenga.” Katarína amba’shi kwilongyela kwaye kubadi kunyingishe lukumino lwaye na kutamisha muloo waye mu bulungudi.

17. Bwakinyi Yesu badi mulame mweneno e buwa mu mudimo waye wa bulungudi?

¹⁷ Yesu badi mulame mweneno e buwa, na mutungunukye na kulungula mukandu wibuwa sunga bibadi bangi bantu abapele kwiutemesha. Bwakinyi? Badi auku’shi bantu be bungi be na lukalo na kuuka bya binyibinyi, na badi akitshi mwaye moso bwa’shi ebakwashe bakumine mukandu wa Bufumu. Badi auku dingi’shi bangi be kupela, kadi kunyima beukumina. Tutaluleyi kibadi kikitshikye mu kifuko kyabo. Munda mwa bipwa bisatu na kipindji bya mudimo waye wa bulungudi pano pa nsenga, ta kubadi mukwabo su ngumune badi mwikale bu mulongi aye. (Yo. 7:5) Anka kunyima kwa lusangukilo lwaye, abafikile bena Kidishitu.​—Bik. 1:14.

18. Bwakinyi abitungu tutungunukye na kulungula mukandu wibuwa?

 ¹⁸ T’atuku’shi nanyi mulombene kukumina bya binyibinyi bya mu Bible by’atulongyesha. Bangi abibataa mafuku e bungi bwa kukumina mukandu wetu. Mpa na baba abapele kwitutemesha, bekumona mwikelo wetu wi buwa, mweneno etu e buwa, na be kubanga “kutumbisha Efile Mukulu.”​—1 Mp. 2:12.

19. Muyile 1 Bena-Kodinda 3:6, 7, nkinyi akitungu’shi tushingule?

¹⁹ Patukunu na ku myamina mema, abitungu tushingule mudimo winao Efile Mukulu. (Badika 1 Bena-Kodinda 3:6, 7.) Getahun mukwetu mulume mushale mu Éthiopie amba’shi: “Munda mwa bipwa bikile pa 20, nadi nkapenda Temwe a Yehowa bupena mu kibundji kyetu. Anka binobino, tamudi balungudi 14. Bantu 13 mbapwe kubatshishibwa, mwanka mwi mukashi ande na bana bande basatu. Tukwete atutwele mu bisangilo, bantu bakafikye ku 32.” Getahun ena muloo mwanda badi mutungunukye na kulungula mukandu wibuwa, mutengyele na lwishinko bwa’shi Yehowa akakye bantu basha mashimba alombane mu ndumbulwilo Aye!​—Yo. 6:44.

20. Nkinyi akitungu’shi tushinkamishe pabitale mudimo wa bulungudi?

²⁰ Yehowa ataa bantu boso na muulo. Mwitupe kinemo kya kufuba pamune na Mwan’aye bwa kubunga bantu ba mu miilo yoso kumpala kwa’shi nfudilo afikye. (Ang. 2:7) Mudimo wa bulungudi aupasha myuwa ya bantu. Byabya tufubeyi boso pamune bwa kukumbasha uno mudimo, sunga byekala’shi, ta natwe boso abafwisha bantu mu ndumbulwilo a Yehowa. T’atuuku bungi bwa bantu abutungu kukwasha be mu uno ndubulwilo a Satana nya. Anka Yehowa e kufubisha oso akwatudi bwa’shi tukwashe bano bantu. Andreas mushale mu Bolivie amba’shi: “Nauku’shi nsaa yamono muntu alongo Bible na kubatshishibwa, nyi mbipeta bya bantu boso bafube pamune bwa kumukwasha.” Abitungu tulame uno mweneno mu mudimo wa bulungudi. Su tubebikitshi, Yehowa etwelela myabi na mudimo wetu wa bulungudi awitupa muloo wi bungi.