1. Andi Jesosi bi du, nöö unfa dee bakama fëën bi djeesi ën? (Luku di peentje u di kafiti.)

JESOSI bi ta du di peleikiwooko go dou di a bi dë a goonliba aki, nöö a bi ta dë ku di pakisei taa sëmbë dë di bi o kë haikëën. Di wan seei soni a bi kë u dee bakama fëën ta du tu (Joh. 4:35, 36). Di Jesosi bi dë ku dee bakama fëën, nöö de bi ta du di peleikiwooko waiwai (Luk. 10:1, 5-11, 17). Ma di de kisi Jesosi, söseei di de kii ën, nöö dee bakama fëën bi ko lasi hati. De an bi ta peleiki a di pisiten dë möön (Joh. 16:32). Di Gadu weki Jesosi ko a libi baka, hën Jesosi da dee bakama fëën taanga u de buta pakisei a di peleikiwooko. Di a bi toona go a liba ala, hën dee bakama fëën bi ta peleiki sö tee taa wanlö felantima u de bi taki taa: „Dee sëmbë aki, u bi bai unu kaa e, . . . un ta lei sëmbë kodo, tefa hii sëmbë u Jelusalen tuu jei kaa.”​—Tjab. 5:28.

2. Unfa Jehovah mbei soni waka bunu a di peleikiwooko?

² Jesosi bi ta tii dee fesiten Keesitu sëmbë te de bi ta du di peleikiwooko. Nöö Jehovah bi ta mbei soni waka bunu da de, u di a bi ta mbei sëmbë haika di bosikopu di de bi ta tja. A di Pensiti Daka u di jaa 33, söwan 3000 sëmbë bi dopu (Tjab. 2:41). Daka fu daka dee bakama u Jesosi bi ta ko möön hia (Tjab. 6:7). Ma Jesosi bi taki a fesi taa di peleikiwooko bi o go a fesi möön gaanfa a dee lasiti daka.​—Joh. 14:12; Tjab. 1:8.

3-4. Faandi mbei a sa ta taanga da so peleikima u de du di peleikiwooko, nöö andi woo luku a di woto aki?

³ Hii u tuu ta mbei möiti fuu ta peleiki waiwai go dou. A so köndë, an taanga u du di soni aki. Faandi mbei u taki sö? Wë u di dee sëmbë dee ta kë lei soni u Bëibel hia sö tee taa de ta  abi u wakiti wan pisiten ufö wan Kotoigi sa ko lei de soni. Ma a so köndë a ta taanga da dee peleikima u de du di peleikiwooko, u di sëmbë an ta dë a wosu sö hia, nasö u di sëmbë an ta kë haika soni u Bëibel wan apaiti.

⁴ Ee i ta libi a wan kamian ka a ta taanga fii du di peleikiwooko, nöö di woto aki o heepi i. Woo taki u soni di wantu peleikima bi du, u de sa ta miti möön hia sëmbë a di peleikiwooko. Söseei woo taki andi u sa du fuu sa ta peleiki waiwai go dou aluwasi sëmbë an ta haika u.

5. Andi da wantu bookohedi di sömëni Kotoigi abi?

⁵ A ta taanga da sömëni peleikima u de miti sëmbë a wosu te de go peleiki da de. So peleikima ta libi a wan kamian ka sëmbë abi gaangaan wosu, ku gaan hei döö, nöö dee sëmbë aki seti soni sö taa woto sëmbë an sa ko a dendu. So juu dee sëmbë aki ta abi wakitima a de dööbuka, nöö ee na buka i ku di sëmbë di abi di wosu bi mbei, nöö de an o da i pasi fii denda ko a dendu. Woto peleikima sa nango ta peleiki a sëmbë pisi, hii fa soni an ta tapa de wan apaiti. Ma tökuseei dee peleikima aki an ta miti sëmbë sö hia. I abi woto peleikima jeti, di ta peleiki a wan kamian ka biti sëmbë ta libi. So juu dee peleikima aki musu ta waka, nasö de musu ta lëi longi seei ufö de go miti wan sëmbë, hii fa a sa pasa taa di sëmbë an pena dë a wosu seei. Wë ee a dee lö kamian dee u kai aki i ta peleiki, tökuseei ja musu lasi hati. Andi sa heepi u fuu ta peleiki waiwai go dou, nöö unfa u sa ta miti möön hia sëmbë?

6. Faandi mbei u sa tei dee peleikima maaka ku sëmbë di ta du fisi wooko?

⁶ Jesosi bi tei di peleikiwooko maaka ku di kisi di wan sëmbë ta kisi fisi (Maik. 1:17). So sëmbë di ta du fisi wooko nango sömëni daka longi a di wooko aki, hii fa de an ta kisi na wan fisi. Ma tökuseei de an ta lasi hati, ma de ta fiti deseei. So juu de nango a wan woto juu, a wan woto kamian, nasö de ta tooka di fasi fa de ta du di wooko. U sa du di wan seei soni te u ta du di peleikiwooko. Boo taki u wantu soni di u sa du.

7. Andi sa pasa ee u mbei möiti fuu peleiki a woto ten di wa bi guwenti u peleiki?

⁷ Pooba u miti sëmbë a wan woto ten. Woo sa miti möön hia sëmbë te u ta peleiki a di pisiten te de ta dë a wosu. Hii fa sëmbë nango a kamian, tökuseei de musu toona ko a wosu baka, na sö nö? Wë sömëni baaa ku sisa ta feni ën bunu u de peleiki a sapate, u di a di ten dë de ta möön miti sëmbë. Boiti di dë, dee sëmbë di de ta peleiki da, an ta abi hia soni u du a dee lö juu dë, nöö de ta möön kë haika de. Kandë i sa du di soni di wan gaanwomi de kai David ta du. A bi taki taa te de peleiki te de kaba, nöö hën ku di sëmbë di ta wooko ku ën di daka dë, nango baka a dee wosu ka de an bi feni sëmbë u peleiki da. Di gaanwomi bi taki taa: „A ta bigi da mi te mi ta si fa sömëni sëmbë ta dë a wosu te u toona go a de.” *

8. Unfa u sa du di soni di sikifi a Peleikima 11:6, te u ta du di peleikiwooko?

⁸ U musu ta mbei taanga möiti go dou u miti sëmbë a wosu. Di soni aki u ta lei a di tëkisi u di woto aki. (Lesi Peleikima 11:6.) Di gaanwomi de kai David, di u bi taki soni fëën a fesi kaa, an bi ko wei. Sömëni pasi a bi go a wan wosu u peleiki da dee sëmbë, ma nöiti a bi feni sëmbë a wosu. Ma wan daka a bi miti di womi di ta libi a di wosu. Di womi bi kë jei soni u Bëibel, söseei a bi taki tu taa: „Aiti jaa  longi mi libi aki, ma Jehovah Kotoigi an ko peleiki da mi wan daka.” David bi taki taa: „Mi feni taa te i miti wan sëmbë nëën pisi u peleiki dëën, nöö a ta möön kë haika di bosikopu di i ta tja.”

9. Unfa so Kotoigi bi miti sëmbë di de an bi sa ta miti a wosu?

⁹ Pooba u du di peleikiwooko a wan woto kamian. So peleikima nango peleiki a woto kamian, u di de kë peleiki da sëmbë di de an ta miti a wosu. De ta peleiki a sitaati, söseei de ta wooko ku di buku wagi u peleiki da sëmbë di ta libi a wan kamian ka de an sa go. Sömëni peleikima ta taki taa sëmbë ta kë möön fan ku Kotoigi nasö tei buku u de te de dë a kamian ka hia sëmbë ta waka pasa, a dee wojowojo, nasö a kamian ka de ta wooko. Wan keling gaanwomi de kai Floiran, di ta libi a Bolifia, bi taki taa: „U nango a dee wojowojo ku dee kamian ka sëmbë ta wooko a dee pisiten u 1 juu te go miti 3 juu sonu hati. A di ten dë, dee sëmbë dee ta sei soni sa ta haika u. U ku de ta fan seei, nöö so juu u ta feni sëmbë di ta kë lei soni u Bëibel.”

10. Andi ku andi i sa du fii sa miti sëmbë u peleiki da de?

¹⁰ Pooba u peleiki a wan woto fasi. Wë unfa a dë ee sömëni pasi i bi mbei möiti u miti wan sëmbë fii sa peleiki dëën, kandë i bi go a peipei juu tu, ma tökuseei ja sa miti ën a wosu möönsö? Woto soni dë di i sa du fii sa miti ën u? Wan sisa de kai Katarína bi taki taa: „Mi ta sikifi biifi da dee sëmbë dee ma ta miti a wosu. Di soni di mi ta sikifi da de da di soni di mi bi o piki de ee mi bi miti de fesi ku fesi.” Andi u ta lei a di soni di di sisa aki bi taki? Wë u ta lei taa u musu mbei hii möiti u miti hii sëmbë a di pisiwata ka u ta peleiki.

11. Faandi mbei so sëmbë an ta kë haika di bosikopu di u ta tja?

¹¹ So sëmbë an ta kë haika di bosikopu di u ta tja. De an ta si kuma a dë fanöudu u de ko sabi soni u Gadu, nasö u Bëibel. De an ta biibi taa wan Gadu dë, u di sömëni hogi ta pasa a goonliba aki. De an ta kë ko sabi soni u Bëibel, u di de ta si unfa dee keiki fesima ta libi a wan fasi di an ta kai ku Gadu. Wotowan an abi ten, u di de ta wooko, de abi wan wosudendu u sölugu, nasö u di de ta abi sömëni bookohedi, nöö de an ta biibi taa di Bëibel sa heepi de ku dee soni aki. Andi sa heepi u fuu sa ta peleiki waiwai go dou, te dee sëmbë dee u ta peleiki da an ta si di bosikopu fuu kuma wan fanöudu soni?

12. Unfa dee soni dee sikifi a Filipi 2:4 ta heepi u te u ta du di peleikiwooko?

¹² Lei taa i ta booko i hedi ku wotowan. Sömëni sëmbë di an bi ta haika u bigibigi di u bi ta peleiki da de, bi ko ta haika di bunu buka bakaten, u di wan peleikima bi lei taa a ta booko hën hedi ku de. (Lesi Filipi 2:4.) David di u bi taki soni fëën a fesi kaa, bi taki taa: „Ee wan sëmbë taki taa an kë haika, nöö u sa buta di Bëibel fuu a wan së, nöö u hakisi ën taa: ’Wë faandi mbei i taki sö?’” Sëmbë sa fii ee u ta booko u hedi ku de. Kandë de o fëëkëtë dee soni dee i bi taki, ma de an o fëëkëtë di fasi fa i bi mbei de fii di i bi fan ku de. Aluwasi ee wan sëmbë an da u pasi fuu peleiki dëën, tökuseei di fasi fa u ta tja useei, sa lei di sëmbë taa u ta booko u hedi ku ën.

13. Unfa u sa peleiki a sö wan fasi taa di bosikopu fuu sa hai sëmbë?

¹³ Te u ta taki soni di sa hai di sëmbë pakisei, nöö u ta lei taa u ta booko u hedi ku ën. Te i go a wan sëmbë pisi go peleiki dëën, i ta si soni di ta lei taa a abi miii ö? Wë ee a dë sö, nöö kandë di sëmbë o kë jei andi di Bëibel ta taki u di fasi fa u musu kiija miii, nasö a sa kë sabi andi wan sëmbë musu du faa sa abi wan piizii wosudendu libi. I ta si wan gaan söötö a di döö u di sëmbë u? Wë kandë i sa taki u di fëëë di sëmbë ta fëëë taa hogi sa miti de. Di sëmbë bi o sa wai seei u jei taa hogidu an o dë möön. Wë aluwasi un pei sëmbë i ta miti, mbei möiti fii mbei de ko sabi unfa di Bëibel sa heepi de. Katarína di u bi taki soni fëën kaa, bi taki taa: „Mi ta mëni fa di Bëibel bi heepi mi tjika”. Wë Katarína ta biibi dee lei u Bëibel, nöö dee sëmbë dee a ta peleiki da ta si taa a ta biibi de tu.

14. Unfa tu peleikima di ta peleiki makandi sa ta heepi deseei te u luku Nöngö 27:17?

¹⁴ Suku heepi a woto peleikima. A di pisiten u dee fesiten Keesitu sëmbë, Paulosu bi lei  Timoteo unfa a bi musu ta peleiki, söseei unfa a bi musu ta lei sëmbë soni. Nöö a bi dëën taanga faa bi ta lei wotowan u de du di wan seei soni (1 Kol. 4:17). Leti kumafa Timoteo bi lei soni a Paulosu, sö nöö useei sa lei soni a wotowan a di kemeente. (Lesi Nöngö 27:17.) Boo luku di woto u wan baaa de kai Shawn. Wan hii pisiten di baaa aki bi ta du di pioniliwooko a wan boiti kamian, ka sëmbë bi lobi di keiki u de. Ma andi bi heepi di baaa aki faa sa ta du di peleikiwooko waiwai go dou? Di baaa aki bi taki taa: „Te mi bi ta wooko makandi ku wan woto peleikima, nöö u bi ta taki unfa u sa du di peleikiwooko möön bunu. Te u bi go peleiki da wan sëmbë nëën pisi, nöö te u bi kumutu dë, u bi ta taki unfa soni bi waka. U bi ta taki tu u soni di u sa du woto pasi te u miti wan sëmbë di taki di wan seei soni.”

15. Faandi mbei a dë fanöudu fuu ta begi te u ta du di peleikiwooko?

¹⁵ Begi Jehovah faa heepi i. Hiniwan juu te joo go a di peleikiwooko, i musu begi Jehovah faa heepi i. Soni an o sa waka bunu da u a di wooko aki ee na di santa jeje u Jehovah hën ta heepi u (Ps. 127:1; Luk. 11:13). Te joo hakisi Jehovah faa heepi i, nöö i musu konda finifini dëën ku andi i kë faa heepi i. Wë i sa hakisi ën faa heepi i fii feni wan sëmbë di o dë kabakaba u haika di bosikopu di i ta tja. Baka di dë, nöö i musu mbei möiti fii peleiki da hii pei sëmbë di i ta miti.

16. Faandi mbei u musu ta lei soni u Bëibel fuu sa du di peleikiwooko?

¹⁶ Buta wan ten ka i sa ta lei soni u Bëibel. Di Wöutu u Gadu ta piki u taa: ’I musu ko sa’ u wegi soni luku fii sabi andi Gadu kë’ (Lom. 12:2). Te u ta lei soni u Bëibel, nöö woo ta ko sabi Gadu möön bunu. Nöö te u ta konda soni fëën da wotowan, de o ko si taa u ta biibi dee soni dee u ta taki. Katarína, di u bi taki soni fëën kaa, bi taki taa: „A wan pisiten dë, mi bi ko fusutan taa mi bi musu ta möön biibi so u dee tuutuu lei u Bëibel. Fëën mbei mi bi öndösuku soni finifini a di Wöutu u Gadu, u mi sa dë seiki taa wan Gadu dë di mbei hii soni, taa di Bëibel da di Wöutu u Gadu, söseei taa Gadu abi wan ölganisaasi a goonliba aki.” Katarína bi taki tu taa di lei di a bi ta lei soni u Bëibel, bi mbei di biibi fëën ko möön taanga, söseei taa a bi ko ta möön dë waiwai a di peleikiwooko.

17. Unfa a waka taa Jesosi bi sa ta du di peleikiwooko waiwai go dou?

¹⁷ Jesosi an bi fii bookosaka u di sëmbë an bi kë haika di buka di a bi ta tja, ma a bi ta peleiki go dou. Unfa a waka taa a bi sa peleiki go dou? A bi sabi taa dee sëmbë bi abi di tuutuu lei fanöudu, nöö a bi kë u hia sëmbë ko sabi soni u di Könuköndë u Gadu. A bi sabi tu taa so sëmbë di an bi kë haika, bi o kë haika bakaten. Luku andi bi pasa a di wosudendu ka de bi kiija Jesosi. Dii jaa ku hafu longi Jesosi bi du di peleikiwooko. Ma na wan u dee baaa fëën bi toon bakama fëën (Joh. 7:5). Ma di Gadu weki ën ko a libi baka, hën dee baaa fëën bi ko dë Keesitu sëmbë.​—Tjab. 1:14.

18. Faandi mbei u ta peleiki go dou?

¹⁸ Wa sabi ambë o toon wan dinima u Jehovah. A ta tei möön ten a so sëmbë u de tei di tuutuu lei. Dee sëmbë dee an ta kë haika u seei, ta si di fasi fa u ta tja useei, nöö kandë de o bia „gafa Masa Gadu.”​—1 Pet. 2:12.

19. Andi 1 Kolenti 3:6, 7 ta lei u u di peleikiwooko?

¹⁹ Hii fa u ta peleiki, söseei hii fa u ta lei sëmbë soni u Gadu, tökuseei u musu ta hoi a pakisei taa Gadu hën ta mbei soni ta waka  bunu a di peleikiwooko. (Lesi 1 Kolenti 3:6, 7.) Wan baaa de kai Getahun, di ta du di peleikiwooko a di köndë Etiopia bi taki taa: „Söwan 21 jaa longi, mi bi dë di wan kodo Kotoigi a di kamian ka mi bi ta libi. Ma nöunöu u ko abi 14 peleikima aki, nöö 13 u dee peleikima aki dopu. Mi mujëë ku dii mii fuu dë a de dendu. Nöö söwan 32 sëmbë ta ko a dee komakandi fuu.” Getahun ta wai taa a bi peleiki go dou, hii fa a bi ta wakiti ku pasensi u Jehovah heepi dee sëmbë u de ko toon dinima fëën!​—Joh. 6:44.

20. Unfa u musu ta si di peleikiwooko?

²⁰ Jehovah ta si di libi u hiniwan libisëmbë kuma wan gaan dii soni. A ta da u di gaandi fuu wooko makandi ku di Womi Mii fëën fuu heepi sëmbë u hii pei nasiön u de ko sabi soni fëën ufö di kaba dou (Hag. 2:7). Di peleikiwooko ta tjubi sëmbë libi. Ee u kë tjubi wan sëmbë libi, nöö u musu wooko makandi, hii fa na hii u tuu o sa heepi sëmbë u de toon Jehovah Kotoigi. Wa sabi un mëni sëmbë woo sa heepi. Ma Jehovah sa wooko ku hiniwan fuu u heepi de. Wan baaa de kai Andreas, di ta libi a Bolifia, bi taki taa: „Mi ta si taa u di sömëni sëmbë ta wooko makandi, mbei wan sëmbë di ta lei soni u Bëibel ta dopu bakaten.” Wë be useei si di peleikiwooko fuu a di lö fasi aki tu. Ee u du di soni aki, nöö Jehovah o mbei u feni gaan bunu, söseei di peleikiwooko o ta mbei u dë waiwai seei!