1. Fa Yesus ben si a preikiwroko èn fa den disipel fu en teki na eksempre fu en? (Luku a fowtow na tapu a kafti.)

DI YESUS ben de na grontapu a tan preiki fu di a ben e howpu taki sma ben o arki en. A ben wani taki den disipel fu en ben musu du a srefi tu (Yoh. 4:35, 36). Di Yesus ben de nanga den disipel fu en, den ben du a preikiwroko fu den fayafaya (Luk. 10:1, 5-11, 17). Ma di den grabu Yesus èn den kiri en, dan den disipel ben lasi-ati èn den tapu fu preiki fu wan pisi ten (Yoh. 16:32). Baka di Yesus kisi wan opobaka a gi den disipel deki-ati fu tan preiki go doro èn baka di a drai go baka na hemel den disipel ben e preiki so fayafaya, taki den feanti fu den taki: „Unu panya a leri fu unu na ini heri Yerusalem.”​—Tori 5:28.

2. Fa Yehovah tan blesi a preikiwroko?

² Yesus ben e tiri a preikiwroko fu den fosi Kresten èn Yehovah blesi a wroko fu den. Na so furu sma tron disipel. Fu eksempre, na a Pinksterfesa fu a yari 33 sowan 3000 sma dopu (Tori 2:41). Dei fu dei moro nanga moro sma ben e tron disipel (Tori 6:7). Toku Yesus ben taki dati na ini den lasti dei bun furu sma ben o gi yesi na a bun nyunsu.​—Yoh. 14:12; Tori 1:8.

3-4. Fu san ede a preikiwroko muilek gi son sma? San wi o luku na ini na artikel disi?

³ Wi alamala musu pruberi fu tan du a preikiwroko fayafaya. Na ini son kondre a no muilek fu du dati. Fu san ede? Fu di furu sma wani studeri Bijbel nanga wi! Son leisi den sma disi furu so te, taki den musu wakti teleki wan Kotoigi man studeri nanga den. Ma na tra presi fu grontapu a moro muilek gi den preikiman fu du a preikiwroko, fu di furu sma no de na oso èn nofo tron den wan di de na oso no wani sabi noti fu Bijbel.

 ⁴ Efu yu e libi na wan presi pe a muilek fu preiki, dan den rai na ini a artikel disi kan yepi yu. Wi o luku san son preikiman du fu man miti moro sma na ini a preikiwroko. Wi o luku tu fa wi kan tan du wi preikiwroko nanga prisiri awinsi sma no wani arki wi.

5. Fu san ede a muilek gi furu Kotoigi fu preiki na son presi?

⁵ Gi furu Kotoigi a e kon moro muilek fu miti sma na oso. Son preikiman e libi na presi pe yu abi bigi apartement gebow, noso birti pe yu no man go so makriki. Son leisi den presi disi abi wan waktiman di no e meki sma pasa efu wan sma fu a presi dati no kari den kon. Na tra presi den kan preiki oso-fu-oso, ma furu sma no de na oso. Dan yu abi trawan di e preiki na den boitipresi, noso na farawe presi pe furu sma no e tan. Kande den preikiman disi musu waka bun fara fu miti wán sma nomo èn te den doro na a oso, dan kande a sma no de na oso srefi. Efu yu musu preiki na wan fu den sortu presi disi, dan no lasi-ati. San wi kan du fu miti moro sma?

6. Fu san ede wi kan taki dati preikiman de leki fisiman?

⁶ Yesus ben agersi a preikiwroko nanga a fisiwroko (Mark. 1:17). Son leisi wan fisiman kan tan omeni dei fosi a fanga wan fisi. Ma na presi fu gi abra a e suku tra fasi fu fanga fisi. Kande a e go na wan tra ten, noso na wan tra presi, noso a e du wan tra sani. Na so wi srefi kan tyari kenki kon na ini a fasi fa wi e preiki. Kon meki wi luku wan tu sani di wi kan du.

7. Sortu bakapisi wi kan abi efu wi e preiki na difrenti yuru?

⁷ Pruberi fu preiki gi sma na wan tra ten. Wi o man miti moro sma efu wi preiki na wan yuru pe wi sabi taki den o de na oso, bika ala sma musu fu kon na oso wan ten! Furu brada nanga sisa kon si taki a bun fu preiki bakadina noso netiyuru fu di moro sma de na oso na a ten dati. Boiti dati, sma wani arki moro furu na a ten dati fu di den de moro relaks. Kande a ben o bun fu du san wan owruman di nen David e du. A taki dati baka te en nanga en preikiwroko patna preiki wán noso tu yuru na ini wan birti, dan den e drai go baka na den oso pe sma no ben de a fosi leisi. A taki: „Yu no o bribi omeni sma wi e miti na oso te wi e go baka a di fu tu leisi.” *

8. Fa wi musu du wi preikiwroko soleki fa Preikiman 11:6 e sori?

⁸ Wi no musu gi abra. A thema tekst e sori wi fa wi musu denki. (Leisi Preikiman 11:6.) David, di wi ben kari na ini a paragraaf fosi a wan disi, no ben gi abra. Na wan fu den oso a feni wan man, baka di a ben go omeni leisi. A man ben wani sabi moro fu Bijbel èn a taki: „Na ini ala den aiti yari di mi e libi dya, noiti wan Yehovah Kotoigi kon na mi oso.” David taki: „Mi kon si taki te yu miti wan sma na oso te fu kaba, dan nofo tron a de klariklari fu arki sortu boskopu wi abi gi den.”

9. San son Kotoigi du fu man taki nanga den sma di den no man miti na oso?

 ⁹ Pruberi fu preiki na wan tra presi. Son leisi a bun fu go preiki na wan tra presi. Na so son preikiman ben man miti den sma di den no ben gwenti miti na oso. Fu eksempre, furu preikiman di ben e du stratiwroko èn di ben e preiki nanga den bukuwagi, ben man miti den sma di e libi na ini den bigi apartement gebow pe yu no mag preiki. Na so den Kotoigi ben man taki nanga den sma di yu no e miti nofo tron. Furu preikiman kon si taki sma e arki moro makriki te den de na wowoyo, na den presi pe sma e go koiri, èn na bisnis kontren. Èn furu fu den e teki buku tu. Floiran, wan kring-owruman na ini Bolifia, taki: „Wi e go na den wowoyo èn den presi pe furu bisnis de na wan ten fu wán yuru te go miti dri yuru bakadina, bika na a ten dati den sma di e seri sani no abi en so druk. Furu tron wi ben man abi bun takimakandra nanga den èn wi bigin wan tu Bijbelstudie srefi.”

10. San na difrenti sani di yu kan du fu preiki gi sma?

¹⁰ Pruberi wan tra sani. Kon meki wi taki dati yu pruberi fu miti wan sma omeni leisi. Yu go na en oso na difrenti yuru èn toku yu no miti en na oso. Tra fasi de fa yu kan miti so wan sma? Katarína e taki: „Mi e skrifi brifi gi den wan di mi no e miti na oso noiti. Na ini den brifi mi e skrifi san mi ben o wani taigi den efu mi ben miti den.” San disi e leri wi?  Du ala san yu man fu miti ala sma na ini a kontren pe yu e preiki.

11. Fu san ede son sma no wani arki a boskopu fu wi?

¹¹ Son sma no wani arki a boskopu fu wi. Den feni taki a no de fanowdu fu bribi na ini Gado noso na ini Bijbel. Fu di den e si so furu pina na grontapu, meki den no e bribi na ini Gado. Furu sma no wani yere noti fu Bijbel fu di den si taki den kerki fesiman e du wan lo ogri, aladi den e taki dati den e gi yesi na Bijbel. Fu di son sma e prakseri soso a wroko fu den, den osofamiri, nanga den eigi problema, meki den no man si taki Bijbel kan yepi den. San wi kan du fu no lasi prisiri te wi e si taki sma no wani arki a boskopu fu wi?

12. Fa Filipisma 2:4 kan yepi wi na ini a preikiwroko?

¹² Sori taki yu e broko yu ede nanga den sma. Furu sma di no ben wani arki a bun nyunsu fosi, ben wani sabi moro di wan preikiman sori taki a e broko en ede nanga den. (Leisi Filipisma 2:4.) David, di wi ben kari kaba na ini na artikel disi, taki: „Efu wan sma e taki dati a no wani yere noti fu kerki noso fu Bijbel, dan wi e poti wi Bijbel nanga den buku fu wi baka na ini wi tas, dan wi e taki: ’Mi mag aksi yu wan sani. Na ala ten yu ben denki so?’” Sma man firi te wan trawan e broko en ede nanga den. Kande den frigiti san wi taki, ma nofo tron den no e frigiti fa den ben e firi di wi taki nanga den. Awinsi wan ososma no e gi wi okasi fu taki, toku den o man si na wi fesi èn na a fasi fa wi e du efu wi e broko wi ede nanga den.

13. San wi kan taki fu hari a prakseri fu den sma?

¹³ Wi e sori taki wi e broko wi ede nanga den sma te wi e luku san den abi fanowdu èn san e hari den prakseri. Fu eksempre, wi e si sani di e sori taki den sma abi pikin? Kande a papa nanga mama wani sabi sortu rai Bijbel e gi fa fu kweki pikin, noso fa den kan abi wan moro koloku osofamiri-libi. Efu yu e si wan lo sroto na a doro, dan kande yu kan taki nanga den sma fu den ogri di e pasa na ini grontapu èn fa sma e frede. Kande na ososma ben o breiti fu sabi taki wan kaba o kon na den problema disi. Awinsi fa a no fa, pruberi fu sori den sma fa Bijbel kan yepi den. Katarína, di wi ben kari na ini na artikel disi kaba, taki: „Mi e  prakseri fa Bijbel meki mi libi kon moro bun.” Dati meki Katarína e taki fayafaya te a e preiki èn den sma man si taki a e bribi den sani di a e fruteri den.

14. Te yu e luku Odo 27:17, dan fa wi kan yepi makandra na ini a preikiwroko?

¹⁴ Meki trawan yepi yu. Na ini a ten fu den fosi Kresten, Paulus ben sori Timoteyus fa a ben e preiki èn fa a ben e gi sma leri. A ben gi Timoteyus deki-ati tu fu leri tra brada nanga sisa den srefi sani disi (1 Kor. 4:17). Neleki Timoteyus, wi srefi kan leri furu fu den brada nanga sisa na ini a gemeente di abi ondrofeni. (Leisi Odo 27:17.) Luku na eksempre fu wan brada di nen Shawn. Fu wan pisi ten a ben e pionier na wan boitipresi pe furu sma no ben wani yere sani fu tra kerki. San a du fu no lasi prisiri? A taki: „Efu a ben kan, dan mi ben e wroko makandra nanga tra sma. Te wi ben e waka fu a wan oso go na a trawan, dan wi ben e taki nanga makandra fa wi ben kan preiki moro bun. Son leisi wi ben e taki fu wan takimakandra di wi ben abi nanga wan sma, dan wi ben e luku san wi ben o man taki tra fasi efu wi ben de na ini so wan situwâsi baka.”

15. Fu san ede a prenspari fu begi te wi e du a preikiwroko fu wi?

¹⁵ Begi Yehovah fu yepi yu. Aksi Yehovah fu yepi yu ibri tron te yu e go preiki. Wi abi a santa yeye fu en fanowdu na ini ala san wi e du (Ps. 127:1; Luk. 11:13). Te wi e aksi Yehovah fu yepi wi, dan wi musu taki krin sortu yepi wi abi fanowdu. Fu eksempre, aksi en fu yepi yu fu feni sma di wani sabi moro fu en èn di wani arki. Baka dati yu musu du muiti fu preiki gi ibriwan sma di yu e miti.

16. Fu san ede wi musu studeri Bijbel fu kan du wi preikiwroko bun?

¹⁶ Meki ten fu studeri Bijbel. Gado Wortu e taki dati wi musu kon „sabi san na a wani fu Gado di bun, di e gi en prisiri, èn di no e mankeri noti” (Rom. 12:2). Te wi e studeri wi e kon sabi Gado moro nanga moro èn te wi e fruteri tra sma fu en, dan den o si taki wi e bribi den sani di wi e taigi den. Katarína, di wi ben taki fu en kaba, e taki: „Wan pisi ten pasa, mi kon si taki mi ben abi fu tranga a bribi fu mi. Mi ben musu kon sabi wan tu prenspari leri fu Bijbel moro bun. Dati meki mi go ondrosuku moro fini sortu buweisi mi abi taki Gado na a Mekiman, taki Bijbel na a Wortu fu Gado trutru, èn taki a abi wan organisâsi na grontapu na ini a ten disi.” Katarína e taki dati di a bigin studeri sani gi ensrefi, dan dati tranga a bribi fu en èn a kisi moro prisiri na ini a preikiwroko.

17. Fu san ede Yesus tan preiki sondro fu lasi-ati?

¹⁷ Srefi di son sma no ben wani arki Yesus, a tan preiki sondro fu lasi-ati. Fu san ede? A ben sabi taki sma ben abi a waarheid fanowdu èn a ben wani yepi so furu sma leki a man fu kon sabi a Kownukondre boskopu. A ben sabi tu taki son sma di no ben wani yere a boskopu na a bigin, ben kan arki bakaten. Prakseri san pasa na ini en eigi osofamiri. Na ini den dri nanga afu yari di Yesus ben e preiki na grontapu, nowan fu den brada fu en tron wan bakaman fu en (Yoh. 7:5). Ma na baka di a kisi wan opobaka, den tron Kresten.​—Tori 1:14.

18. Fu san ede wi musu tan preiki?

 ¹⁸ Wi no kan sabi na fesi suma o tron anbegiman fu Yehovah. Son sma e teki moro langa fu kon na ini waarheid. Srefi den sma di no wani arki wi kan si a moi fasi fa wi e tyari wisrefi èn a fasi fa wi e denki. Dati kan meki taki den „gi Gado glori” te fu kaba.​—1 Petr. 2:12.

19. Soleki fa 1 Korentesma 3:6, 7 e sori, dan san wi musu hori na prakseri?

¹⁹ Aladi wi e preiki èn wi e gi sma leri, toku wi musu hori na prakseri taki na Yehovah e meki a wroko go na fesi. (Leisi 1 Korentesma 3:6, 7.) Getahun, wan brada di e dini na Etiopia, e taki: „Moro leki 20 yari langa, mi ben de a wan-enkri Kotoigi na ini wan kontren pe sma no ben e preiki so furu. Ma now 14 preikiman de dyaso. Tinadri fu den dopu kaba. Mi wefi nanga den dri pikin fu mi de na ini a grupu dati tu. Sowan 32 sma gwenti kon na den konmakandra.” Getahun breiti taki a tan preiki nanga pasensi èn taki a wakti Yehovah fu hari sma kon na a organisâsi fu en!​—Yoh. 6:44.

20. Fu san ede wi kan taki dati wi de leki wan team di e puru sma na nowtu?

²⁰ Ala libisma prenspari gi Yehovah. A gi wi a grani fu wroko makandra nanga en Manpikin fu tyari sma fu ala kondre kon na wán, fosi a grontapu disi kisi pori (Hag. 2:7). A preikiwroko fu wi de neleki te yu e go puru sma na nowtu. Wi de leki wan team di e go yepi sma di de na ini wan boto di e sungu. Kande a team man yepi wan tu sma nomo, ma toku a wroko fu ala sma na ini a team de prenspari. Na so a de tu nanga a preikiwroko fu wi. Wi no sabi omeni sma wi o man yepi fu komoto na ini a grontapu fu Satan. Ma Yehovah kan gebroiki ibriwan fu wi fu yepi den. Andreas di e libi na ini Bolifia e taki: „Te wan sma e leri den tru tori fu Bijbel èn a e teki dopu, dan dati na fu di wi alamala wroko makandra fu yepi en.” Efu wi tan preiki sondro fu lasi-ati, dan Yehovah o blesi wi èn a preikiwroko o gi wi furu prisiri.