1. Yesu waabasiliile basambi bakue mufuano ki, kabili baakitile siani? (Mona foto ili ku ntendeko ya kazeeti.)

MUSITA lwaali pa kyalo, Yesu waatwaliliile kuya waali ni malanga aweeme palua miilo yakue ya kusimikila. Kabili, waatonene basambi bakue batwalilile kuya baali ni malanga aweeme palua miilo ezio. (Yoan. 4:35, 36) Musita Yesu lwaali wali pamo ni basambi bakue, weene pamo naabo baali basimikila kwa mute. (Luk. 10:1, 5-11, 17) Inzi, musita Yesu lwaakwetue ni kufikiila kwipaiwa, basambi baazeziizie nsaansa yabo palua miilo ya kusimikila mu nsita kampanda. (Yoan. 16:32) Kisia kutuntumunua kwakue, Yesu waabakinkiziizie bapooze maano ku miilo ya kusimikila. Kabili, kisia Yesu kupiluka ku muulu, basambi bakue baatwaliliile kusimikila kwa mute mpaka baluani babo baafikiile kulanda eevi bafipilue: “Mone vimwakikita! Mwakikumania masambilizio enu mu Yerusalemu monse.”​—Miil Bat. 5:28.

2. Yehova ali wapaala siani miilo ya kusimikila?

² Yesu waatunguluile miilo yaakitilue na babo Bakristu ba mu miaka mia ya ku ntendeko, ni Yehova waapaalile miilo yabo. Kwa mufuano, mu Pentekoste ya muaka wa 33, Yesu wasyavyelue, bantu elufu itatu (3 000) baabatiziiziwe. (Miil Bat. 2:41) Kabili, mpendua ya basambi yaatwaliliile kuvula mu nzila ya kupapia. (Miil Bat. 6:7) Inzi, Yesu waalandile nangue mu nsiku ya mpeleezio, bantu bengi saana baketabila mpunda iweeme.​—Yoan. 14:12; Miil Bat. 1:8.

3-4. Juu ya ki mu nkeende inge miilo ya kusimikila kunti yaaya yakolele, kabili ni kiki kituli kumona mu leeli lyasi?

³ Fwe bonse tuli twaikwinda kuya twali ni malanga aweeme palua miilo ya kusimikila. Mu byalo binge, kili kyasaangua kyaleengele kukita evio. Juu ya ki? Paantu bantu bengi bali batona kusambilila Bibilia, kabili ni bange pakati kabo bali basaangua bapembeelesie  Kasininkizia eze abasimikile! Inzi mu nkeende inge, bakasimika bali bapata maavia engi mu miilo ya kusimikila; bantu te beezi kumoneka saana ku masesi abo, kabili ni baalia bali basaanguako te beezi kutonesia kusambilila Bibilia.

⁴ Kine wikeele mu fuasi muli buavia bwa kusimikila, masoke ali mu leeli lyasi kunti akukwasia. Tuli kumona bange vibali bakita eevi bapate bantu bengi mu miilo yabo ya kusimikila. Kabili tuli kumona juu ya ki tupalile kutwalilila kuya twali ni malanga aweeme, anzia kine bantu bali kwitabila ao bali kukaana mpunda yeetu.

5. Ni maavia ki ali mukupata Bakasininkizia bengi?

⁵ Bakasininkizia bengi bali mukukila kupata buavia bwa kusaanga bantu ba kulondolola naabo ku masesi abo. Bakasimika bange bekeele mu nkeende ilimo bikuulua bisuungilue saana ao bilimo bantu baizaliilue. Kunti kwasaangua muntu wa kulinda pa muliango ali ni miilo ya kukaania muntu onse asipeelue na muine nsesi nsaambu ya kwingila. Bakasimika bange kunti baya baleengeeluesie kusimikila nsesi kwa nsesi, inzi kuya bapatasie bantu baniini ku masesi. Kabili, bange bali basimikila mu tuzonga twa mu kisonso ao twa kule mwali bantu baniini. Bakasimika kunti baenda lwendo lwaleepele eevi kufika ku nsesi ya muntu, inzi paange bila kumusaangako! Kine tuli twasimikila mu fuasi ya evio, te tupalile kutioka mutima. Kunti twakita siani eevi tuviinde kwanzia maavia azo ni kufikiila kupata bantu bengi mu miilo ya kusimikila?

6. Bakasimika bapaleeni siani ni balobi?

⁶ Yesu waapalaniizie miilo ya kusimikila ni miilo ya kuloba. (Mark. 1:17) Balobi bange kunti baya mu kuloba nsiku ingi, inzi, bila kupata ata lusabi. Inzi, te beezi kulekela kuya mukuloba, bali baalulula nzila ya kulobelamo. Bali baalulula nsita, fuasi mwakulobela, ao nzila ya kulobelamo. Ni fwefue kunti twakita evio vyenka mu miilo yeetu ya kusimikila. Kansi, tumonne bintu bituli kuviinda kukita.

7. Kunti twapata mazabo ki kine twasimikila mu nsita ipusene-puseene?

⁷ Ezia kubendela bantu mu nsita ipusene-puseene. Kunti twapata bantu bengi ba kulondolola naabo, kine twasimikila pa musita upalile saana kubasaanga ku masesi abo. Kila muntu ali wasaangua wali ni nsita ya kubuela ku nsesi! Balupua ni bankazi bengi, bali bamona kyali buino kusimikila kisia midi, ao kyungulo saana paantu ozo i musita ubali bapata bantu bengi. Kukila pakaako, beene nsesi kunti basaangua batuuziizie kabili bali ni nsita ya kulondolola ni bantu mu ezio nsa. Ao paange, weewe kunti wamona kyaweeme kubombia musoko wakue mukote umo ali wakuutua David. Kisia kusimikila musita kampanda mu kazonga, weene pamo ni kasimika nakue, bali babuela kabili ku masesi kusyakiba bantu musita ubali bapitamo lya kuanza. Walanda eevi: “Lutuli twabuelako lya bubili, tuli twasaanga bantu bengi saana basyakiba baliko, kabili keekio kili kyampapia.” *

8. Kunti twabombia siani lileembo lya Kasimika 11:6 mu miilo yeetu ya kusimikila?

⁸ Tupalile kutwalilila kukeba bantu ku masesi abo. Lileembo liimanine mutue wa leeli lyasi lyatulangulusia malanga atupalile kuya twali nao. (Soma Kasimika 11:6.) David, lupua utwanzimbulanga, taatiokele mutima. Ku nsesi imo, waafikiile kumusaanga muine nsesi kisia kubuelako lingi bila wamusaanga. Ozo muntu waatonene saana kulondolola ni lupua David palua Bibilia, kabili waalandile eevi: “Nakita kale miaka munane eevi naikeele paanu, inzi nsinamone Kasininkizia Wakue Yehova waiza pa muliango wane.” David walanda eevi: “Kine ku mpela yakue wafikiila kubasaanga bantu ku masesi abo,  lingi bantu babo bali baitabila mpunda ituli twasimikila.”

9. Bakasininkizia bange bali bakita siani eevi kupata bantu bakolele kusaanga ku masesi abo?

⁹ Ezia kusimikila mu fuasi ipusene-puseene. Eevi kupata bantu bakolele kusaangua ku masesi, bakasimika bange bali baalulula fuasi ya kusimikilako. Kwa mufuano, kusimikila mu misebo ni kubombia prezantware kuli kwakwasia kupata bantu bali baikala mu bikuulua bili mu fuasi musiitabiziiziwe kusimikila nsesi kwa nsesi. Keekio kili kyakwasia Bakasininkizia kulondolola menso kwa menso ni bantu bali baikala mu bebio bikuulua. Kabili, bakasimika bengi bali bamona nangue, bantu bengi bali batona kulanda naabo ni kupokelela mpapulo yeetu mu nkeende ili yaendelako bantu bengi eevi kwisaansamusia, ku nsoko ao mu fuasi muli mwakitilua busulu. Floiran, kangalila wa muputule ali wabombela mu kyalo kya Bolivia, walanda eevi: “Tuli twaya ku nsoko ni mu fuasi ya busulu pakati ka nsa ya inere (1:00) ni trwazere (3:00) musita bakusisia lubasiizi kusaangua na bingi bya kukita. Lingi, tuli twalondolola naabo buino, ni lunge kufikiila kutendeka kusambilila Bibilia pamo naabo.”

10. Kunti wabombia nzila ki eevi upate bantu ba kusimikila?

¹⁰ Ezia kusimikila mu nzila ipusene-puseene. Tulande, weewe waakikwinda lingi eevi ulondolole ni muntu mwamoneene. Waakiya ku nsesi ya ozo muntu mu nsita ipusene-puseene, inzi bila kumusaanga. Eba, kuli ni nzila inge ya kumupata? Katarína walanda eevi: “Ndi nabaleembela mikanda bantu bansiizi kusaanga ata limo ku masesi abo, ni kumubuila kila umo bintu binasianga kulondolola nakue mumonenge.” Twasambililapo ki? Ezia kubombia nzila  ipusene-puseene eevi umupate kila muntu mu kazonga kobe, musita luuli mukubomba miilo yobe ya kusimikila.

11. Juu ya ki bantu bange te beezi kutona mpunda ituli twasimikila?

¹¹ Bantu bange te beezi kutona mpunda yeetu. Te beezi kutontonkania nangue bakabiile kumumana Leeza ao kusambilila Bibilia. Bali baandua kumuzumina Leeza paantu bamwene maavia engi mu kyalo. Te beezi kupooza maano ku Bibilia, paantu bali bamona bantunguluzi ba ma diini bali bailanda nangue bali banakila beelia bilandile Bibilia, bakita bintu bingi bibiipile. Bange bali baemena saana miilo yabo, lupua lwabo, ao maavia abali nao nsita yonse, kabili te bamwene nangue Bibilia kunti yabakwasia. Kunti twatwalilila siani kusuunga nsaansa yeetu kine bantu batuli twasimikila te bamwene nangue mpunda yeetu ni ya mana?

12. Kubombia milandu ili mu lileembo lya Bafilipi 2:4, kunti kwatukwasia siani mu miilo ya kusimikila?

¹² Langilila nangue uli mukwemena bange. Bantu bengi baali bakaana lwa mambo mpunda iweeme, baafikiile kwitabila mpunda ezio musita ubaainikile nangue kasimika waali wabeemena saana. (Soma Bafilipi 2:4.) Kwa mufuano lupua David, utwazimbulanga kale walanda eevi: “Kine muntu walanda nangue tatonene, tuli twabuula Bibilia ni mpapulo yeetu twabiika ku mbali ni kulanda eevi, ‘Ati, kunti wambuila kyalenga ukaane?’” Bantu bali bainika kine muntu ali mukubeemena. Kunti balaba bintu bitwaalondoluele naabo, inzi bakaba kusyala balanguluka bintu bitwaabakitiile. Anzia kine beene nsesi te betabiile tulondolole naabo, kunti twalangilila kupitila aali yeetu ao lukebu lwetu nangue tuli mukubeemena.

13. Kunti twapatanisia siani mpunda yeetu ni aali ya muine nsesi?

¹³ Tuli twalangilila nangue tuli twabeemena bantu, musita utuli twaalulula mpunda yeetu eevi ipatane ni aali ya muine nsesi. Kwa mufuano, eba kuli ni bintu bilangiliile nangue pa nsesi pali ni baana? Baviazi kunti batona kuunvua masoke a Bibilia alandiile vya kukuzia baana, ao masoke ali akwasia alangiliile vya kwaluka ni lupua luli ni nsaansa. Eba, ku muliango wa nsesi yabo kuli ma kufuli engi? Kunti twalondolola nakue palua bungipaani buli mukukitika mu kyalo, buli mukulengia bantu bengi baaluka ni muenzo. Muine nsesi kunti wasekelela kunvua nangue bungipaani bwakapua. Lyonse lyuli kusaanga bantu batonene kutuilizia, ikwinde kubakwasia benike nangue masoke ali mu Bibilia kunti abakwasia. Katarína, utwazimbulanga kale walanda eevi: “Ndi nalanguluka Bibilia viyaankwasiizie kuwaamia buikazi bwane.” Pakaako, Katarína ali wasaangua wazumiine beelia byali  mukulanda, kabili ni bantu bali walanda naabo bali bamona evio.

14. Kukoonkana ni lileembo lya Tuswalo ni Mafunde 27:17, bantu bali basimikila pamo, kunti bakwasiana siani?

¹⁴ Sekelela kukwasiiwa na bange. Mu miaka mia ya ku ntendeko, Paulo waamusambiliziizie Timoteo vya kusimikila ni kusambilizia, kabili waamukinkiziizie Timoteo abakwasieko ni bange mu ezio yenka nzila. (1 Bakor. 4:17) Nga Timoteo, ni fwefue kunti twasambilila kupitila baalia bali ni kibeelezio mu kilonghaano kyetu. (Soma Tuswalo ni Mafunde 27:17.) Mona mufuano wakue lupua ali wakuutua Shawn. Musita umo, waabombele wali painia mu kazonga kamo ka ku kisonso kalimo bantu batonenesie diini yabo. Ni kiki kyaamukwasiizie kusuunga nsaansa yakue? Walanda eevi: “Naali naya mu kusimikila pamo ni kasimika unge kine kyakitika. Lutwali twafuma pa nsesi imo ni kuya pa inge, twaali twakwasiana juu ya kuwaamia bufundi bwetu bwa kusambilizia Kwa mufuano, twaali twalondoluela bintu byali byalanda muine nsesi ni vitwaali twaasuka ao kukita. Kisia twaali twalondoluela bintu bitupalile kukita mu nzila iibeleele kine twasaanga aali ipaleene ni ezio.”

15. Juu ya ki kupepa ni kwa mana musita utuli twaya mu miilo yeetu ya kusimikila?

¹⁵ Pepa kuli Yehova eevi akukwasie. Lyonse lyuli waya mukusimikila, uye wamuloomba Yehova akukwasie. Tukabiile mupasi utakatiifu utukwasie mu kila kintu kituli twakita. (Malum. 127:1; Luk. 11:13) Musita luuli wapepa kuli Yehova eevi akukwasie, lubulula kintu kyukebele. Kwa mufuano, kunti wamuloomba akutungulule ku muntu onse atonene kusambilila palwakue Yehova, kabili atonene kutuilizia. Kisia kita kukoonkana ni lipepo lyobe kupitila kusimikila kila muntu uuli kusaanga.

16. Juu ya ki tupalile kukita lisambililo lya bunke eevi tuye twapata mazabo aweeme mu miilo yeetu ya kusimikila?

¹⁶ Paanga musita wa kukita lisambililo lya bunke. Mulandu Wakue Leeza walanda eevi: “Mwakamana [mwakesininkiziizia, NWT] bintu bitonene Leeza, bimuwamiine ni bipuililikile.” (Bar. 12:2) Musita utuli twasambilila saana Bibilia tuli twaya twakila kumumana buino Leeza. Kisia, musita utuli kuya twalondolola pamo ni bange palwakue Leeza, bali kwinika nangue tuzumiine kakiine beelia bituli mukulanda. Katarína, utwazimbulanganke, walanda eevi: “Kisia musita uniini, naainikile nangue naali napalile kukosia kiketekelo kyane palua masambilizio kampanda a musinzi a Bibilia. Pakaako, naatendekele kusambilila tuntu tuniini-tuniini tulaangiliile nangue kuli ni Kabumba, nangue kakiine Bibilia i Mulandu Wakue Leeza, kabili nangue Leeza ali ni kuteania kwakue mu nsiku yeetu kuli kwabomba nga mukenzi wakue.” Katarína walanda nangue lisambililo lyakue lya bunke, lyaakosiizie kiketekelo kyakue ni kongezia nsaansa yakue mu miilo ya kusimikila.

17. Juu ya ki Yesu waatwaliliile kuya wali ni malanga aweeme palua miilo yakue ya kusimikila?

¹⁷ Yesu waatwaliliile kuya wali ni malanga aweeme palua miilo ya kusimikila, anzia kine bantu bange te baali batona kutuilizia mpunda yakue. Juu ya ki? Waali wamanine nangue bantu bakabiile kusambilila kisinka, kabili waali watonene kukwasia bantu bengi kine kyakitika. Kabili, waali wamanine nangue bantu bange baali bakaana kutuilizia lya kuanza, kunti baitabila lunge lwendo. Tontonkania bintu byaakitikile mu lupua lwakue muine. Mu miaka yonse itatu ni nusu ya kusimikila kwakue Yesu, te kuli ata umo pakati ka balupua bakue waalukile musambi wakue. (Yoan. 7:5) Inzi, kisia kutuntumuka kwakue baalukile Bakristu.​—Miil Bat. 1:14.

18. Juu ya ki tutwaliliilesie kusimikila?

¹⁸ Te twizi kuya twamanine kine naani wakaaluka mubombi wakue Yehova. Bantu bamo bali bakokola kuliko bange pa kufikiila kwitabila  mpunda yeetu. Atasie baalia bali bakaana kutuilizia mpunda yeetu, bali bamona lwendo lwetu ni aali yeetu iweeme, kabili kunti batendeka ‘kumutasia Leeza.’​—1 Pet. 2:12.

19. Kukoonkana ni lileembo lya 1 Bakorinto 3:6, 7, tupalile kumana ki?

¹⁹ Musita utuli twasimikila ni kusambilizia, tupalile kulanguluka nangue Leeza i ali wakuzia. (Soma 1 Bakorinto 3:6, 7.) Getahun, lupua ali wabombela mu kyalo kya Etiopia, walanda eevi: “Mu miaka ikilile pa 20, mbanga naalisie Kasininkizia bunke ku fuasi kundi naikala. Inzi loonu, kuli bakasimika 14. Bakasimika likumi na batatu pakati kabo, kubiika mukati ni mukazi pamo ni baana bane batatu baabatiziiziwe. Mu kulingilila, tuli twasaangua bantu 32 mu kulonghaana.” Getahun ali ni nsaansa, paantu waatwaliliile kusimikila wapembeleele Yehova abakulile mu kuteania Kwakue bantu bali ni mitima iweeme!​—Yoan. 6:44.

20. Fwefue, tupaleene siani ni bantu bali bakita miilo ya kupususiana?

²⁰ Yehova amwene bukose bwa bantu bonse kuya bwali bwa mana. Atupeele lisyuko lya kubomba pamo ni Muana wakue, mu miilo ya kukolonghania bantu kufuma mu kila ntundu, ntaanzi mpela ya keenu kyalo teinafike. (Hag. 2:7) Miilo yeetu ya kusimikila kunti yapalaniiwa na miilo ili yakita baalia bali bapususia bantu. Kabili tuli nga kikundi kya bantu batuminue eevi kupususia bantu babundukiluanga mu kiina kya mabue a mutengo. Anzia kine bali kupususiasie bantu baniini mu kiina keekio, miilo yakituanga na babo bantu ba kupususia ni ya mana. I vikili ni mu miilo yeetu ya kusimikila. Te tumanine kine ni bantu banga bakaba kupusuka kufuma mu kyalo kyakue Sataana. Inzi, Yehova kunti wabombia muntu onse pakati ketu eevi kubakwasia. Andreas, lupua ali waikala mu kyalo kya Bolivia, walanda eevi: “Manine nangue kine muntu wasambilila kisinka kili mu Bibilia ni kufikiila kubatiziiwa, ni paantu bakasimika bengi bakibombela pamo eevi kumukwasia.” Kansi, tutwalilile kuya twali ni malanga enka azo palua miilo yeetu ya kusimikila. Kine twakita evio, Yehova wakaba kutupaala, kabili miilo yeetu ya kusimikila yakaba kutuleetela nsaansa ikata.