1. Jesus hatudu ezemplu saida ba ninia dixípulu sira? Saida mak sira halo? (Haree dezeñu iha livru oin.)

JESUS kontinua iha hanoin neʼebé pozitivu bainhira haklaken iha rai no nia hakarak ninia dixípulu sira mós halo nuneʼe. (João 4:35, 36) Bainhira Jesus hamutuk ho ninia dixípulu sira, sira laran-manas atu haklaken. (Lc 10:1, 5-11, 17) Maibé bainhira ema kaer no fó kastigu-mate ba Jesus, dixípulu sira-nia laran-manas atu haklaken lakon ba tempu balu. (João 16:32) Depois Jesus hetan tiha moris-hiʼas, nia anima dixípulu sira atu tau fokus ba serbisu haklaken. No kuandu Jesus saʼe tiha ba lalehan, ninia dixípulu sira haklaken ho laran-manas toʼo inimigu sira hatete: “Imi halo nakonu Jeruzalein ho imi-nia hanorin.”—Após 5:28.

2. Oinsá Jeová haraik bensaun ba serbisu haklaken?

² Jesus mak dirije serbisu haklaken neʼebé ema Kristaun halaʼo iha apóstolu sira-nia tempu no Jeová haraik bensaun ba sira, tan neʼe ema barak simu lia-loos. Porezemplu, iha loron Pentekostes tinan 33 EC, maizumenus ema naʼin-3.000 mak hetan batizmu. (Após 2:41) No ema barak liután kontinua sai dixípulu. (Após 6:7) Maski nuneʼe, Jesus hatete nanis katak ema barak liután sei simu lia-loos iha loron ikus sira.—João 14:12; Após 1:8.

3-4. Tanbasá serbisu haklaken mak susar iha fatin balu? Iha lisaun neʼe, ita sei aprende saida?

³ Ita hotu presiza hakaʼas an atu kontinua iha hanoin pozitivu kona-ba serbisu haklaken. Iha rai balu, fasil deʼit atu halo nuneʼe. Tanbasá? Tanba ema barak liu mak hakarak atu estuda Bíblia toʼo sira balu presiza hein atu Testemuña  ida iha tempu. Iha rai seluk, serbisu haklaken mak susar. Irmaun-irmán sira labele hasoru ema iha uma, no ema neʼebé sira hasoru ladún interese ba Bíblia.

⁴ Se Ita hela iha área neʼebé serbisu haklaken mak susar, sujestaun sira iha lisaun neʼe bele ajuda Ita. Ita sei haree buat neʼebé irmaun-irmán balu halo atu bele hasoru ema barak liután iha serbisu haklaken. Ita mós sei koʼalia kona-ba tanbasá ita bele kontinua iha hanoin pozitivu maski ema rona ka la rona ba ita-nia mensajen.

5. Testemuña barak hasoru susar saida deʼit?

⁵ Agora, susar liután ba Testemuña barak atu hasoru ema iha uma. Irmaun-irmán balu nia haklaken-fatin mak iha apartamentu barak neʼebé iha seguransa ka fatin neʼebé ema labele tama arbiru. Karik seguransa la husik ema atu tama se uma-naʼin la fó lisensa. Irmaun-irmán sira seluk bele haklaken husi uma ba uma, maibé la hasoru ema. Irmaun-irmán seluk tan haklaken iha área izoladu neʼebé ema uitoan deʼit mak hela bá. Karik sira presiza halo viajen dook atu bele toʼo ema nia uma, maibé dala ruma la hasoru ema ida. Se ita hasoru susar hanesan neʼe, labele rende an. Ita presiza halo saida atu manán susar sira-neʼe no bele koʼalia ho ema barak liután?

6. Oinsá haklaken-naʼin mak hanesan peskadór?

⁶ Jesus kompara serbisu haklaken ho peskadór nia serbisu. (Mc 1:17) Dala ruma peskadór balu kail ikan ba loron barak, maibé la hetan ikan ida. Maski nuneʼe, sira la rende an, sira halo mudansa tuir situasaun. Sira troka sira-nia dalan, fatin ka tempu atu kail ikan. Ita mós bele halo nuneʼe ba ita-nia serbisu haklaken. Hanoin toʼok sujestaun sira tuirmai neʼe.

7. Ita bele hetan rezultadu saida kuandu troka tempu neʼebé ita haklaken?

⁷ Koko troka tempu neʼebé ita haklaken. Ita sei hasoru ema barak liu se ita haklaken iha tempu neʼebé ema barak iha uma. Ikusmai ema hotu sei fila ba sira-nia uma. Irmaun-irmán barak haklaken iha lokraik ka kalan tanba sira bele hasoru ema barak iha uma. Karik iha oras hanesan neʼe, uma-naʼin iha tempu no prontu atu koʼalia ho ita. Karik ita bele halo tuir sujestaun ida husi katuas kongregasaun naran David. Nia hatete katak depois haklaken ba oras ida ka rua, nia no maluk Kristaun neʼebé hamaluk nia bá vizita fali uma sira neʼebé sira la konsege hasoru uma-naʼin. Nia hatete: “Haʼu hakfodak tanba haʼu bele hasoru uma-naʼin barak neʼebé ohin haʼu la hasoru.” *

8. Oinsá ita bele aplika matadalan husi Eclesiastes 11:6 iha serbisu haklaken?

⁸ Eskritura tema ba lisaun neʼe hanorin ita katak ita labele rende an. (Lee Eclesiastes 11:6.) Irmaun David neʼebé temi ohin la rende an. Nia konsege hasoru uma-naʼin ida bainhira nia vizita tiha ba dala balu. Uma-naʼin neʼe gosta koʼalia kona-ba Bíblia no hatete: “Haʼu hela iha neʼe maizumenus tinan ualu ona, maibé haʼu seidauk hasoru Testemuña ida iha haʼu-nia uma.” Irmaun David hatete: “Haʼu aprende katak kuandu ita konsege hasoru ema ida iha uma, baibain sira hakarak rona ba ita-nia mensajen.”

9. Testemuña balu halo saida atu bele hasoru ema?

 ⁹ Koko haklaken iha fatin seluk. Irmaun-irmán balu koko atu haklaken iha fatin seluk atu bele koʼalia ho ema neʼebé sira labele hasoru iha uma. Porezemplu, irmaun-irmán balu hetan susesu bainhira haklaken iha fatin públiku ka ho karrosa tanba sira bele hasoru ema sira neʼebé hela iha apartamentu neʼebé baibain ema labele tama arbiru. Neʼe fó oportunidade ba Testemuña sira atu koʼalia ba ema neʼebé baibain sira la hasoru. Irmaun-irmán barak mós aprende katak ema barak kontente liu atu koʼalia ka simu ita-nia publikasaun iha jardín, merkadu, no fatin negósiu. Katuas área ida iha rai-Bolívia naran Floiran hatete: “Ami haklaken iha merkadu no fatin negósiu husi tuku ida toʼo tuku tolu lokraik bainhira negósiu-naʼin sira ladún okupadu. Baibain ema hatudu interese no ami mós komesa estuda Bíblia.”

10. Saida mak dalan seluk neʼebé ita bele haklaken?

¹⁰ Koko haklaken iha dalan seluk. Karik Ita koko dala barak ona atu hasoru ema iha sira-nia uma, no Ita koko vizita sira iha tempu oioin, maibé nafatin la hasoru sira iha uma. Iha dalan seluk atu bele kontaktu sira ka lae? Irmán Katarína hatete: “Haʼu hakerek karta ba ema sira neʼebé haʼu la hasoru iha sira-nia uma, no hakerek buat neʼebé haʼu sei hatete se haʼu hasoru sira oin ba oin.” Ita aprende saida? Hakaʼas an atu haklaken ba ema hotu iha Ita-nia haklaken-fatin hodi uza dalan oioin.

11. Tanbasá ema balu la interese ba ita-nia mensajen?

¹¹ Ema balu la interese ba ita-nia mensajen. Sira hanoin sira la presiza hatene kona-ba Maromak ka Bíblia. Sira la fiar Maromak tanba sira haree susar barak akontese iha mundu. Sira la interese ba Bíblia tanba ulun-naʼin relijiaun neʼebé hatete katak sira halo tuir Bíblia, maibé hatudu hahalok aat. Ema seluk okupadu ho sira-nia serbisu, família ka sira-nia problema rasik, no sira la hanoin katak Bíblia bele ajuda sira. Ita bele halo saida atu kontinua haksolok maski ema la interese ba ita-nia mensajen?

12. Oinsá liafuan iha Filipe 2:4 bele ajuda ita kuandu haklaken?

¹² Hatudu interese ba ema. Ema barak neʼebé foufoun la interese ba lia-loos ikusmai interese tanba haklaken-naʼin hatudu interese ba sira. (Lee Filipe 2:4.) Porezemplu, irmaun David neʼebé temi ohin hatete: “Bainhira ema ida hatete katak nia la interese, ami hatama ami-nia Bíblia no publikasaun ba pasta laran no hatete: ‘Haʼu bele husu, tanbasá Ita sente hanesan neʼe?’” Ema bele sente bainhira ita hatudu interese ba sira. Karik sira bele haluha buat neʼebé ita hatete, maibé sira sei nunka haluha laran-diʼak neʼebé ita hatudu. Maski uma-naʼin la fó tempu ba ita atu koʼalia, maibé ita bele hatudu liuhusi ita-nia hahalok no oin katak ita interese ba sira.

13. Oinsá ita bele troka ita-nia mensajen tuir uma-naʼin nia situasaun?

¹³ Ita hatudu katak ita interese ba ema bainhira ita troka ita-nia mensajen tuir sira-nia situasaun. Porezemplu, ita haree buat ruma neʼebé hatudu katak uma-naʼin iha oan ka lae? Inan-aman sira karik interese ba Bíblia nia matadalan kona-ba oinsá atu haboot oan ka oinsá atu halaʼo moris família nian neʼebé kontente. Ita haree kadiadu barak iha sira-nia odamatan ka lae? Karik ita bele koʼalia kona-ba krime no oinsá ida-neʼe halo ema sente la seguru. Karik uma-naʼin sei sente kontente atu hatene katak iha futuru, krime sei la iha tan. Iha situasaun naran deʼit, koko ajuda ema atu haree oinsá Bíblia nia matadalan bele ajuda sira. Irmán Katarína neʼebé temi ohin hatete: “Haʼu hanoin kona-ba oinsá Bíblia ajuda ona haʼu.” No rezultadu mak irmán Katarína haklaken ho fiar metin, no klaru katak ema neʼebé nia haklaken bá bele haree ida-neʼe.

14. Tuir Provérbios 27:17, oinsá irmaun-irmán bele ajuda malu kuandu haklaken hamutuk?

 ¹⁴ Buka ajuda husi irmaun-irmán sira. Iha apóstolu sira-nia tempu, Paulo hanorin Timóteo kona-ba oinsá atu haklaken no hanorin. Nia mós anima Timóteo atu hanorin maluk Kristaun seluk. (1 Kor 4:17) Hanesan ho Timóteo, ita mós bele aprende husi irmaun-irmán sira neʼebé iha esperiénsia barak. (Lee Provérbios 27:17.) Hanoin toʼok irmaun Shawn neʼebé serbí nuʼudar pioneiru iha área izoladu no ema iha área neʼe lakohi troka sira-nia relijiaun. Oinsá nia bele sente haksolok nafatin? Nia hatete: “Dala barak, haʼu koko haklaken ho maluk Kristaun seluk. Bainhira ami laʼo husi uma ida ba uma seluk, ami ajuda malu atu aumenta liután ami-nia matenek atu haklaken. Porezemplu, ami koʼalia hamutuk kona-ba ami-nia dalan haklaken. Tuirmai ami koʼalia kona-ba saida mak ami sei halo se ami hasoru tan situasaun neʼebé hanesan.”

15. Tanbasá orasaun importante kuandu haklaken?

¹⁵ Halo orasaun hodi husu Jeová nia ajuda. Bainhira Ita haklaken, husu Jeová atu ajuda Ita. Ita presiza Jeová nia espíritu santu atu ajuda Ita kumpre buat oioin. (Sal 127:1; Lc 11:13) Halo orasaun neʼebé espesífiku hodi husu Jeová nia ajuda. Porezemplu, husu nia atu ajuda Ita hetan ema neʼebé hakarak atu aprende kona-ba nia no prontu atu rona ba Ita. Tuirmai hakaʼas an atu haklaken ba ema hotu neʼebé Ita hasoru.

16. Atu bele haklaken ho didiʼak, tanbasá ita presiza estuda mesak?

¹⁶ Buka tempu atu estuda mesak. Bíblia haruka ita atu hakaʼas an hodi “hatene loloos kona-ba Maromak nia hakarak neʼebé diʼak no perfeitu”. (Rom 12:2) Bainhira ita estuda, ita koñese didiʼak Maromak. Tuirmai bainhira ita haklaken kona-ba nia, ema sei haree katak ita fiar duni buat neʼebé ita hatete. Irmán Katarína neʼebé temi ohin hatete: “Foin daudaun, haʼu rekoñese katak haʼu presiza hametin haʼu-nia fiar kona-ba Bíblia nia hanorin báziku balu. Tan neʼe, haʼu estuda didiʼak kona-ba evidénsia sira neʼebé hatudu katak iha duni Kriadór, Bíblia mak Maromak nia Liafuan, no iha organizasaun ida neʼebé reprezenta Maromak ohin loron.” Irmán Katarína hatete katak estuda mesak hametin ninia fiar no ajuda nia sente haksolok liután iha serbisu haklaken.

17. Tanbasá Jesus kontinua iha hanoin pozitivu kona-ba serbisu haklaken?

¹⁷ Jesus kontinua iha hanoin pozitivu no kontinua haklaken maski ema balu la interese ba ninia mensajen. Tanbasá? Nia hatene katak ema presiza tebes atu rona kona-ba lia-loos, no nia hakarak fó oportunidade ba ema barak atu simu mensajen kona-ba Maromak nia Ukun. Nia mós hatene katak ema balu neʼebé foufoun la interese ikusmai sei hakarak simu lia-loos. Hanoin toʼok kona-ba Jesus nia família rasik. Durante tinan tolu ho balu neʼebé nia haklaken, ninia alin-mane ida mós la sai ninia dixípulu. (João 7:5) Maibé depois nia moris-hiʼas, ninia alin-mane sira sai ema Kristaun.—Após 1:14.

18. Tanbasá ita presiza kontinua haklaken?

¹⁸ Ita la hatene sé mak ikusmai sei simu lia-loos. Ema balu presiza tempu kleur  atu simu lia-loos. Maski ema balu lakohi rona ba ita, maibé karik sira haree ita-nia hahalok diʼak no ikusmai sira bele serbí Maromak.—1 Ped 2:12.

19. Tuir 1 Korinto 3:6, 7, ita presiza rekoñese saida?

¹⁹ Maski ita mak kuda no rega fini lia-loos nian, maibé ita rekoñese katak Maromak mak halo moris ida-neʼe. (Lee 1 Korinto 3:6, 7.) Irmaun ida neʼebé serbí iha rai-Etiópia hatete: “Durante tinan 20 liu, haʼu mesak deʼit mak Testemuña iha haʼu-nia área. Maibé agora iha haklaken-naʼin hamutuk 14, inklui haʼu. No haklaken-naʼin 13 mak hetan ona batizmu, inklui haʼu-nia feen no ami-nia oan naʼin-tolu. Baibain ema naʼin-32 mak tuir reuniaun.” Irmaun neʼe kontente tanba nia kontinua haklaken no hein ho pasiénsia atu Jeová dada ema sira neʼebé laran-loos ba Ninia organizasaun.—João 6:44.

20. Tanbasá ita mak hanesan ho ekipa neʼebé salva ema bainhira mosu dezastre?

²⁰ Jeová hafolin ema hotu nia moris. Nia fó ita priviléjiu atu serbisu hamutuk ho ninia Oan-Mane hodi halibur ema husi nasaun hotu antes mundu neʼe nia rohan toʼo mai. (Ageu 2:7) Ita bele kompara ita-nia serbisu haklaken ho serbisu atu salva ema. Ita mak hanesan ekipa neʼebé salva ema bainhira mosu dezastre. Karik ita bele salva ema uitoan deʼit, maibé serbisu neʼebé ema hotu iha ekipa neʼe halo mak folin-boot. Nuneʼe mós ho ita-nia serbisu haklaken. Ita la hatene ema naʼin-hira mak ita sei salva husi Satanás nia mundu neʼe. Maibé Jeová bele uza ita hotu atu ajuda ema. Irmaun Andreas neʼebé hela iha rai-Bolívia hatete: “Bainhira ema ida simu lia-loos no hetan batizmu, neʼe tanba irmaun-irmán hotu serbisu hamutuk.” Mai ita kontinua iha hanoin pozitivu kona-ba serbisu haklaken. Se ita halo nuneʼe, Jeová sei haraik bensaun mai ita no ita sei haksolok ho ita-nia serbisu haklaken.